Author: dhirjabhat

August 19, 2024

Om Namaha Shivaya
Aaj Ka Suvichaar 🙏🏻🙏🏻

#2374

   Mere Dil Ka Dveep

Mera dil toh hai ik dveep
Jahaan ujjwal hai ik deep
Guruji Maharaj ke naam ka
Jo strot hai raksha daan ka.

Dveep ko ghere huey hai
Mahasaagar Guruji kee vadiyaayee ka
Mushkil nahin, balki namumkin hai andaaza lagaana
Is mahasaagar kee gehraayee ka.

Dveep mein dol rahi hai jo vayu
Vo nikhaarti hai ruhaani aayu
Zindagaani kee kahaani mein
Guruji kee meharbaani se.

Dveep mein barasta hai Guruji ke ashish ka amrit
Jis se hota hai Guruji kee kripa dwaara hitt
Jis se mere paap dhulte jaayein
Jis se gyan ke kapaat khulte jaayein.

Dveep mein Guruji ka prasad hai har aahaar
Dveep mein Guruji ka pyaar hai meri saanson ka aadhaar
Dveep kee dharaa ka karoon mai aadar satkaar
Dveep par chhaaye akash mein goonjta rahe Guruji ka naam baarambaar.

Dveep ke har phool mein
Guruji kee ho ruhaani mehek
Dveep par basey har panchhi kee ho
Guruji ka gungaan karti hui chehek.

Dil ke dveep kee nivaasi hai meri har dhadkan
Guruji kee daya se ye rahi hai chal
Guruji dveep ke Aradhya Dev Hain
Ye dil poojta rahe Unhe pal pal.

Dil ke dveep mein divya ujaala
Guruji kee kripa se rahe barkaraar
Is dveep par milne wali har daat ke liye
Guruji ka anantan shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Dil Ka Dveep (08/19/2024)

August 18, 2024

Om Namaha Shivaya
Aaj Ka Suvichaar 🙏🏻🙏🏻

#2373

    Guruji Se Baatein

Har vo lamha jo hum baithte hain
Poojya Guruji Maharaj ke saath
Har vo pal
Jismein hum karte hain Unse baat
Har veh lamha anmol hai
Nahin uss lamhe ka koi tol hai.

Kahein Unse, jabb baat ho shuru
Ki kitne mahaan Hain Vo, hamaare Guru
Kar lein ho paaye jitna Unka stavan
Jitna bhi ho paaye Unka pyaar bhara vandan.

Phir kuch baatein khushi kee
Kuch shaayad udaasi kee bhi
Koi baat chinta ya krodh wali
Koi baat moh se bhari
Lekin har baat ke sangg shukrana ho bayaan
Guruji ke charnon mein jhuka ho zameer ka zameen aasmaan.

Baaton baaton mein zaahir hota rahe
Guruji ke prati sneh aur aadar
Baaton baaton mein dikha dein Unhe
Apne bheetar kee mayli chaadar
Aisa nahin ki Ve nahin ye jaante ki ye hakeekat hai
Apitu isliye ki halki karni apni hee tabeeyat hai.

Pashchaataap ho jaaye baatein karte huey
Bakhshish mil jaaye jholi bharte huey
Toh Guruji kee daya se ho paaye praayashchit
Aur anekon duvidhaayein jaayein mitt.

Kabhi kisee baat mein laad pyaar
Kabhi kisee baat mein shikaayat ya khwaahish
Kisee baat mein hairaani ya pareshaani
Toh kisee baat mein haq jataana ya phir guzaarish.

Baatein karein Unhe nath maan kar
Ya phir Guru, khasam, bhai, ya meet
Har baat mein yaad rahe ki Ve hee Hain Parameshwar
Aur yaad rakhein nibhaana Unse preet kee reet.

Aur na jaane kitnee aur kaisi baatein
Jinmein beet jaayein kitne din aur kitnee raatein
Kabhi muskuraate huey
Kabhi gaate huey
Kabhi bahut kuch kehte huey
Kabhi dard sehte huey
Kabhi bol kar, kabhi bin awaaz ke dil se
Kabhi aankhon mein bhare aansuon kee jhilmil se.

Har baat mein rahe vinamrata
Har baat mein bhaav das ka
Har baat mein komal pan ho ehsaas ka
Har baat mein ehsaas kshama aur ardaas ka.

Guruji kripa karein
Aise lamhe jeevan mein aate rahein
Guruji se baatein karne ke liye
Ye lamhe mauke barsaate rahein
In baaton mein bhakt jann
Apne bhaav bahaate rahein
Aur sada hee
Guruji ke gunn gaate rahein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Baatein (08/18/2024)

August 17, 2024

Om Namaha Shivaya
Aaj Ka Suvichaar 🙏🏻🙏🏻

#2372

                  Guruji Ka Prataap

Namumkin hai andaaza lagaana
Guruji ke prataap ka
Lekin Guruji ko sab maalum hai
Tumhaare dukh aur santaap ka.

Prataap Unkee guruyaayee ka
Prataap Unkee vadiyaayee ka
Prataap Unkee dee hui chetna ka
Prataap Unkee dee hui prerna ka.

Unke charnon mein tumhaara sheesh hai
Tumhaare sheesh par Unka ashish hai
Unke swaroop mein tumhaare sangg Ish hai
Tumhaare naseeb ke sangg Unkee bakhshish hai.

Guruji tumhaare hunar nikhaarenge
Aur Unmein hee hai hunar nikhaarne ka tumhaari taqdeer ko
Unhee ka hunar, Unhee kee mehar
Har pal, har ghadi, har peher.

Guruji ke prataap ko pranaam
Sabse nirmal hai Unka naam
Unhee se miley har praan ka daan
Unkee kripa mein hai poorna kalyaan.

Guruji ka prataap hai bada hee pyaara
Guruji ka prataap hai har bhakt ka sahaara
Rahasyamayi hai, ruhaani hai
Unke prataap kee har gaatha suhaani hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 16, 2024

Om Namaha Shivaya
Aaj Ka Suvichaar 🙏🏻🙏🏻

#2371

      Sab Unpe Chod

Guruji ko fakr hai
Ki tujh mein itna sabr hai
Isey na gavaa
Ye bhi hai davaa
Tere marz kee
Karmon ke karz kee.

Imtehaan hai
Vardaan hai
Ye sabr bhi
Jo dein Guruji
Bhale ke liye
Jalaa kar deeye
Ashirwaad ke
Guru prasad ke.

Tu karma kar
Bilkul na darr
Aagey tu badh
Jaagrit reh magar.

Guruji Hain khade
Ve sabse bade
Nahin aur kuch
Baaki sab hai tuchh.

Apna ahem toad
Sabr ko na chod
Apne haath jod
Sabb Unpe chod.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Unpe Chod (08/16/2024)

August 15, 2024

Om Namaha Shivaya
Aaj Ka Suvichaar 🙏🏻🙏🏻

#2370

                 Sukhad Ho Jaaye

Guruji mein lagg jaaye aisee lagan
Ji mera mann aur meri har dhadkan
Rahe Guruji mein hee magan
Toh sukhad ho jaaye jeevan.

Kisee aur vichaar ka na ho sthaan
Har soch aur karma mein basaa ho Guruji ka naam
Har chunauti ko jaanoon aur maanoon Unka diya hua imtehaan
Toh sukhad ho jaaye har subah aur shaam.

Vishwaas atal ho Guruji kee ruhaani maujoodagi par
Nishtha atal ho Guruji mein zindagi bhar
Kabhi sanshay kee parchhaayee bhi na aaye bandagi par
Toh sukhad ho jaaye ye safar.

Har karma arpit kar doon Guruji ke kamal charan mein
Khud ko samarpit kar doon Unkee sharan mein
Na chodoon koi kasar Guruji ke anusaran mein
Toh sukhad ho jaaye janam maran.

Antas mein hota rahe Guruji ka simran
Kaanon mein goonjta rahe Guruji kee mahima ka shravan
Chit chete Guruji ko, nirantar ho Unhee ka chintan
Toh sukhad ho jaaye nitya ka vandan.

Guruji ke naam kee dhaal ho
Har pal bheetar Guruji ka yaad-e-khayaal ho
Santushti aisee ho ki na koi sawaal ho
Toh sukhad ho jaaye har dhadkan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukhad Ho Jaaye (08/15/2024)

August 14, 2024

Om Namaha Shivaya
Aaj Ka Suvichaar 🙏🏻🙏🏻

#2369

                    Manohar Manzil

Chhoti padd jaayegi teri har fariyaad
Itna vadda hai Guruji ka ashirwaad
Tu himmat na haar
Tu buss Unhe karta chal yaad.

Tu hai Guruji kee dekh rekh mein sada se
Ve waakif Hain teri har ada se
Chaahe vo ho ya na ho achchi
Chaahe vo jhoothi ho ya ho sachchi.

Tere bheetar kee gehraayee mein
Tu ye jaanta hai
Teri rooh kee tanhaayee mein
Tu ye maanta bhi hai.

Kyunki teri rooh toh Guruji se hai judi
Jaise suman ke sangg sugandh hai hoti
Suman ke bin sugandh nahin
Sugandh suman se hee hai hoti.

Ye hee toh hai satyamayi saar
Teri rooh ka, teri rooh ke safar ka
Ki sugandh suman mein samaayi rahe
Jahaan suman, vaheen sugandh bahe.

Guruji kee kripa se aisee avastha aaye
Jahaan Paramatama, Unhee mein atma samaaye
Phir toh janam maran dhanya ho jaaye
Aur rooh ko apni manohar manzil mil jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Manohar Manzil (08/14/2024)

August 13, 2024

Om Namaha Shivaya
Aaj Ka Suvichaar 🙏🏻🙏🏻

#2368

 Guruji Ka Vo Ho Gaya

Ik raahi thaa albela
Mila usey saath suhela
Param poojya Guruji Maharaj ka
Brahmaandon ke sartaj ka.

Guruji ne chuna usey jabb Guruji kee hui mauj
Banaa vo shishya Unka, usey karni na padi khud khoj
Usey Guruji mein hui nishtha nirmal
Guruji ne uske antas mein ruhaani deep kar diye ujjwal
Guruji ne joda usey yoon Apne se aur gurbani se
Ki vo apne girebaan mein jhankne lagaa aasaani se.

Usey Guruji mein miley murshid, saathi, nath, aur Rabb
Usey Guruji mein miley sahaare sabb
Guruji ne usey Apni suraksha ka kavach pehnaaya
Usne Guruji se abhay daan paaya
Chaahi thi usne jo befikri aur beparwaahi kabb se
Usey veh mil gayi apne Guru, apne Rabb se.

Jaise jaise gehra hota gaya uspar chadha Guruji ke naam ka nasha
Vaise vaise sudharti sanvarti gayi har tareh se uskee dasha
Sakaaraatmak parivartan kee oar hoti gayi uske soch vichaar kee disha
Aane wala har savera lamba hota gaya aur chhoti hoti gayi har nisha.

Guruji kee mahima gaane wala
Veh raahi mastt matvaala
Guruji ke chintan mein vyast rakh kar apna chitt
Guruji ke charnon mein ho gaya samarpit
Guruji ke pyaar mein vo yoon kho gaya
Ki poornata se Guruji ka vo ho gaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Vo Ho Gaya (08/13/2024)

August 12, 2024

Om Namaha Shivaya
Aaj Ka Suvichaar 🙏🏻🙏🏻

#2367

              MahaShiv Gangadhar

MahaShiv Gangadhar,
pyaare Guruvar
Leela Unkee nyaari
Ve khud hee Hain Parameshwar
Rasik bairaagi jatadhaari.

Aisee paawan hai Unkee preet
Ki ye bann gayi jeevan kee ruhaani reet
Kaheen jaane kee zaroorat nahin Guruji ke dar par aane ke baad
Kyunki yaheen mil jaata hai har tareh ka ashirwaad.

Dete Hain Guruji hamein daan jeevan ka
Sudhaarte Hain swaasthya rooh, tann, aur mann ka
Bakhshein duniyaavi sukh aur samriddhi
Karein bhakt ke gyan kee vriddhi.

Bholenath Hain Guruji swayam
Chaahein bhola bhaav hamaara
Hum beshak na hon kaabil Unke
Ve Hain hamaara sampoorna sahaara.

Jitnee hoti jaayegi Unhe paane kee hamein kashish
Vaise hee badhaani hogi antas ko saaf karne kee koshish
Taaki vahaan ka poora sthaan hamaare ahankar se khaali ho paaye
Taaki uss pavitra sadan mein Guruji kee guruyaayee yoon buss jaaye
Ki bheetar aur baahar Guruji, aur kewal Guruji ka ehsaas ho paaye
Jeevan kitna sundar ho jaaye, jo Guruji ko poori tareh se samarpit har das ho jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

MahaShiv Gangadhar (08/12/2024)

August 11, 2024

Om Namaha Shivaya
Aaj Ka Suvichaar 🙏🏻🙏🏻

#2366

        Na Bhooloon

Param poojya Guruji Maharaj,

Na bhooloon kabhi karna Aapka shukrana
Na bhooloon ki nahin hai mujhe ghabraana
Chaahe jaise bhi hon haalaat
Chaahe sataaye koi bhi baat
Kyunki Aap sada Hain mere saath
Subah aur shaam, din aur raat.

Aapki rooh ka hissa hai meri rooh
Phir kyun bhramit karey mujhe koi bhi chakravyuh
Aapka noor kar raha hai meri rooh ko roshan
Aapka pyaar kar raha hai meri rooh ka poshan
Aisa ho raha hai har ghadi, har kshan
Jiskee badaulat kaayam hai meri dhadkan.

Ye nahin hai koi saadhaaran baat
Balki ye hai Aapki dee hui paawan saugat
Nashukr hokar aur bhi gir na jaaoon
Kripa keejiye ki shukrana mein sees jhukaaoon…
Har pal, har ghadi
Chaahe daat chhoti lagey ya badi
Kyunki kabhi jholi khaali nahin padi
Ghar parivaar kee bagiya hai hari bhari.

Aap Hain mere maalik meharbaan
Apne niyantran mein rakhiye mera imaan
Aapka shukrana karna kabhi na bhoole Aapki ye santaan
Aakhiri saans takk Aapka naam japti rahe meri zubaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Bhooloon (08/11/2024)

August 10, 2024

Om Namaha Shivaya
Aaj Ka Suvichaar 🙏🏻🙏🏻

#2365

Sab Rangon Se Pyaara

Sab rangon se pyaara hai
Rangg Guruji ke pyaar ka
Unkee ye anokha rangg hai prateek
Ruhaaniyat ke saar ka.

Guruji ke pyaar mein hai bhaav pavitra
Jo sudhaarta hai bhakt ka charitra
Guruji ke pyaar mein hai aisee komalta
Jo jeet leti hai har tareh kee karkashta.

Guruji ka pyaar hai sabse nirmal
Guruji ka pyaar hai sabse saral
Koi dikhaawa nahin, koi chadhaawa nahin
Koi ahem nahin, koi vehem nahin.

Guruji ke pyaar mein piroyi hain bhakt ke liye bakhshishein
Guruji ke pyaar mein hain akalpaneeya tarkeebein
Jinke dwaara Guruji bhakton ko dete Hain taar
Aur dete Hain bhakton ka jeevan sanvaar.

Guruji ka pyaar strot hai bhakt ke kalyaan ka
Guruji ka pyaar saadhan hai santosh ke vardaan ka
Is pyaar ko sweekaaro
Apne aap ko nikhaaro
Is se uttam na hai koi shringar
Beshak dhoondh lo tum saara sansaar.

Liv Guruji se jodo
Duniyavi aasakti ko chodo
Aasaan na hoga pehle, par koshish toh karo
Duniya mein rehte rehte duniya se na daro.

Farz nibhaao apna poora parishram dekar
Guruji ke kareeb aao kshama yachna lekar
Unkee yaad mein raho magan
Aisee lagaao Guruji mein lagan
Ki baaki sab kuch pheeka laagey
Ye sab vaise bhi hain kachche dhaagey.

Guruji ka pyaar baras raha hai
Usmein bheegne kee koshish toh karo
Kitnon ke paap dhule hain Unke pyaar se
Abb tum bhi Guruji ke pyaar se taro.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Rangon Se Pyaara (8/10/2024)