Author: dhirjabhat

January 2, 2024

Om Namaha Shivaya
Aaj Ka Suvichaar 🙏🏻🙏🏻

#2144

Tere Yahaan Se Jaane Ke Baad

Tere yahaan se jaane ke baad
Tere chaahne wale karenge tujhe yaad
Karenge teri atma kee shanti ke liye ve fariyaad
Kuch samay ke liye ve tujhe yaad karenge din raat.

Teri deh ko raakh kee dheri bante huey dekh bhi ve kuch na kar paayenge
Chaahenge ve, toh bhi tere saath na jaa paayenge
Pehle pehle mushkil hogi unhe, lekin dheere dheere aadat daalni padegi jeene kee tere bin
Phir samay ke saath saath is mushkil ke bin jeena ho jaayega mumkin.

Samay ka pahiya chalta rahega
Unke dil ka ghaav bharta rahega
Teri atma ka safar bhi jaari rahega
Jabb takk Paramatama mein samaane ka waqt na aayega.

Tere karmon ka bhaar jaayega tere sangg
Dhyan rahe ki uss se teri ruhaani yaatra na ho jaaye bhangg
Tann ke safar se kaheen zyada mahatvapoorna hai
Atma ka aagey ka safar
Kyunki yahaan shareer ka safar toh
Waqt ke saath jaayega guzar
Parantu atma ko pahunchna hai uss mukaam par
Jahaan Paramatama se mil kar mukammal hoga uska safar.

Lekar bhakt ko Apni sharan mein
Guruji katvaate Hain uske karma is janam mein
Kalyaan karne ke liye pareekshaayein bhi lete Hain
Apni marzi se aksar dobaara lekha bhi likh dete Hain.

Bhakt ke gunaahon ko maaf karte Hain
Uske antas ko saaf karte Hain
Halka karte Hain uske karmon ka bhaar
Har tareh se bhakt ko dete Hain taar.

Apne komal aanchal kee chhaaon mein
Baitha kar usey Apne paawan paaon mein
Tudvaate huey vikaaron ke dhaagey
Bade prem se usey ruhaaniyat mein le jaate Hain aagey.

Bhakt ko toh buss apni oar se karna hai prayaas
Aur karte rehna hai shukrana aur ardaas
Rehte huey bhakt ke bheetar aur aaspaas
Guruji uskee atma ke safar ko karte Hain safal.

Ve hee jaanein ki bhakt ko mukti milegi kis janam mein
Tabb takk itne pyaar se sambhaalte Hain Ve Apni sharan mein
Apni mehar se bhakt ko ruhaaniyat mein itna aagey badhaa dete Hain
Ki phir bhakt ko Apne mein hee samaa lete Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Yahaan Se Jaane Ke Baad (01/02/2024)

January 3, 2024

Om Namaha Shivaya
Aaj Ka Suvichaar 🙏🏻🙏🏻

#2145

           Sachkhand Ka Swaroop

Koi zor zabaradasti nahin
Koi vehem nahin
Guruji ke darbar mein
Sachkhand ke is sansaar mein.

Shuddh bhaav ka ikraar hai
Dikhaawe aur paakhand se inkaar hai
Guruji ko bholapan sweekaar hai
Yahaan Unka pyaara deedar hai.

Ummeed kee kiranein ujjwal rehti hain yahaan
Chaand kee sheetalta kee hoti rehti hai barsaat
Amrit ke jharne behte hain anant
Har pal maujood rehte Hain Guru Bhagwant.

Maafi miltee hai
Mayyl dhulti hai
Guruji nirantar karte Hain maargdarshan
Akele nahin chodte ek bhi kshan.

Guruji Apni goad mein sambhaalte Hain
Lori ke sangg jhoola jhulaate Hain
Antas ke bujhe huey deep jalaate Hain
Bhakt ko bheetar se muskuraana sikhaate Hain.

Sachkhand mein varsha hoti hai aise ruhaani pyaar kee
Ki gunjaaish hee nahin rehti kisee nakaaraatmak vichaar kee
Chhaaya rehta hai yahaan shanti ka spandan
Nikharta hai bhakton ka vandan.

Hota hai Guruji kee mahima ka gungaan
Jiske sur aur shabd se goonjta hai aasmaan
Bindu aur naad, Shakti aur Shiv ka prataap
Mitaa deta hai har dukh santaap.

Buss jaata hai antas mein Guruji ka jyotirmay roop
Miltee hai mamta kee chhaaon aur tej kee dhoop
Guruji kee mehar ka asar hota hai itna anoop
Ki antas hee bann jaata hai sachkhand ka swaroop.

Poshit hota hai yahaan ke vaataavaran mein samarpan ka bhaav
Guruji kee karuna se badhta rehta hai bandagi ka chaav
Bhakt magn ho jaata hai Guruji ke chintan ke khumaar mein
Tarr jaata hai vo sachkhand ke sundar se sansaar mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sachkhand Ka Swaroop (01/03/2024)

January 1, 2024

Om Namaha Shivaya
Aaj Ka Suvichaar 🙏🏻🙏🏻

#2143

           Ujjwal Utsaah Kee Leher

Yakeenan prabal hai maya
Sabhi ko isne hai ulajhaaya
Is maya ne insaan ko apni anguli par yoon hai nachaaya
Ki koi virla hee iske prabhaav se hai bach paaya.

Maya shakti hai Maheshwar kee
Aur Guruji Hain Maheshwar Mahadev ke avatar
Leeladhaari Hain Guruji
Leela se hee Ve taarein sansaar.

Leela se hee lein Ve sangat ke imtehaan
Unkee leela se hee milta hai har daan
Guruji pyaare Hain sarvshaktimaan
Koi nahin Unke jaisa mahaan.

Maya kee shakti se
Guruji Hain sarvsampann
Sangat kee bhakti se
Guruji hotey Hain prasann.

Shiv kee maya se jeevan ka khel tamasha
Shiv kee maya se hai asha aur niraasha
Maya baahar, avidya bheetar
Mahadev le jaayein inse hatkar.

Shiv se jeev aur phir jeev se Shiv ka safar
Isey tayy karaayegi Guruji kee mehar
Ye mehar barasti rahegi aathon peher
Aur jeevan mein laayegi ujjwal utsaah kee leher.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ujjwal Utsaah Kee Leher (01/01/2024)

December 31, 2023

Om Namaha Shivaya
Aaj Ka Suvichaar 🙏🏻🙏🏻

#2142

    Naye Saal Mein…

Ye saal khatm ho raha hai
Kintu Guruji ka saath nahin
Guruji ke aur bhi kareeb aane kee koshish mein
Tu aane wale saal mein na chodna koi kamee.

Apni oar se karna dridh prayatn
Bakhshish mein maangte rehna simran
Karna tu Guruji ka itna chintan
Ki Unka naam japey tu mann hee mann.

Sotey jaagte lete rehna Unka naam
Kar le sankalp tu dridh
Guruji ke simran mein leen rakhna mann
Taaki mann ho jaaye shant aur sthir.

Kisee ke kaam aa sakey nek tareeke se
Kisee ko khushi de sakey shuddh saleeqe se
Toh isey apna saubhagya samajh lena
Aur sansaar ko behtar banaane mein apna yogdaan dena.

Apne tann mann ka rakhna aur bhi khayaal
Ghar parivaar vyavasaaya kee oar farz nibhaate rehna
Anyaaya na sehna
Bhakti mein behna.

Karte huey Guruji ka Shukrana
Swaagat kar aane wale varsh ka
Kisee ke dukh ka kaaran na bann
Sulajhaata chal apna jeevan.

Chalta chal Guruji ke nakshe kadam par
Dhyan deta chal Unke har vachan par
Ardaas kar Unse ki Ve bulaate rahein tujhe Apne dar par
Unkee mehar se ruhaani raaste par hota chal agrasar.

Banaa har din ko pichhle din se behtar
Banda bann kar tayy karta chal ye ruhaani safar
Guruji ke rangg mein rangta chal
Guruji sanvaar rahe Hain tera aane wala kal
Guruji ka naam hai teri suraksha kee dhaal
Naye saal mein ho jaa tu Guruji par nihaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Naye Saal Mein… (12/31/2023)

December 30, 2023

Om Namaha Shivaya
Aaj Ka Suvichaar 🙏🏻🙏🏻

#2141

Har Kadam Par Anubhav Anokha

Har kadam par anubhav anokha
Har kadam par sudharne ka mauka
Guruji dete Hain Apne bhakt ko
Taaki uska antas sashakt ho.

Kyunki tann ho balshali par antas ho nirbal
Toh adhyaatmik safar kaise hoga safal
Jo tu sochta raha ki aaj nahin, karega kal
Toh yoon hee vyarth beet jaayega har pal.

Karte huey apna har kaam
Tu liya kar Guruji ka naam
Tera farz hai karna sachchi koshish
Guruji denge teri koshish ko anjaam.

Har pal kadam badha ke chalta chal
Guruji tere prayaas ko na honei denge vifal
Ve katva rahe Hain tere karmon kee fasal
Aur nikaal rahe Hain teri mushkilon ka hal.

Har anubhav se seekh har baar
Guruji ke sangg jodey rakh tu seedhi taar
Ruhaani seedhiyaan chadh
Yatra mein aagey badh.

Safar jaayega beet
Gaata jaa tu Guruji ke geet
Guruji kar rahe Hain tera kalyaan
Guruji par tu ho jo qurbaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Kadam Par Anubhav Anokha (12/30/2023)

December 29, 2023

Om Namaha Shivaya
Aaj Ka Suvichaar 🙏🏻🙏🏻

#2140

     Mausam Ho Ya Na Ho Suhaana

Mausam ho ya na ho suhaana
Saath de ya na de ye zamaana
Guruji ka suhaana saath sada rahega
Unke ashish ka amrit sada tujh par bahega.

Baaki sab kuch hai nashwar
Sanatan Hain toh kewal Ishwar
Aur Guruji ka dar hai Ishwar ka dar
Jahaan har bhakt jaata hai tarr.

Jald aaye ya ho vilamb
Shubhta ka awashya hoga praarambh
Lamba ho ya chhota ho intazaar
Is samay ke liye tu ho jaa tayyaar.

Tayyaar ho simran dwaara
Jo Guruji ne hai tujhe bakhsha
Aaj takk bhi Unhonei nadar kee hai tujh par
Aagey bhi Ve karenge teri raksha.

Simran kee seedhi ke aagey
Thaame huey Guru chintan ke dhaage
Tu Guruji kee vadiyaayee se
Pahunch paayega sadhna kee oonchaayee pe.

Veh oonchaayee, jahaan teevra khushboo hogi ruhaaniyat kee
Kyunki safal ho chuki hogi teri pareeksha insaaniyat kee
Guruji kee mehar ke dwaara
Aur aagey bhi milta rahega tujhe Unka sahaara.

Isliye badalte mausam se tu na ho pareshaan
Zamaane ke khel tamaashe mein nahin hai asal gyan
Ghabraa matt, beshak aayein imtehaan
Tera naseeb khila hai kyunki tu hai Guruji kee santaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mausam Ho Ya Na Ho Suhaana (12/29/2023)

December 28, 2023

Om Namaha Shivaya
Aaj Ka Suvichaar 🙏🏻🙏🏻

#2139

                  Kalyaan Ka Kinaara

Aadarneeya Guruji,

Aap Hain vidhaata
Aap Hain daata
Aap Hain Param poojya paalanhaar
Aap hee Hain bakhshanhaar.

Aapki bakhshish bin nahin hai guzaara
Aapki bakhshish hai is ruhaani safar mein sahaara
Bemisaal hai Aapki bakhshish ka badappan
Aapki dee har bakhshish se sanvarta jaata hai jeevan.

Bakhshiye aisa gyan
Jo mita de mera abhimaan
Bakhshiye simran aur dhyan
Taaki mann paaye vishraam.

Thakk sa gaya hai ye mann
Soch soch kar har kshan
Dhoondhta hai ye sthirta aur shanti
Taaki maun ho vichaaron kee kranti.

Baahar toh hota rahega
Kabhi raat toh kabhi savera
Aap bakhshiye antas mein aisa ujaala
Ki bheetar kabhi na ho andhera.

Bakhshiye shuddhi
Bakhshiye subuddhi
Bakhshiye sakaaraatmak vichaardhaara
Bakhshiye Apni kripa se kalyaan ka kinaara.

🌹🌹🌹🌹🌹🌹🌹

Jai Guruji🙏🏻🙏🏻
Dhirja

Kalyaan Ka Kinaara (12/28/2023)

December 27, 2023

Om Namaha Shivaya
Aaj Ka Suvichaar 🙏🏻🙏🏻

#2138

              Saubhagya Hai Tera

Tu beshak Guruji ko na bataa
Phir bhi Ve jaante Hain teri har khataa
Chaahe ho vo tera pichhla samaa ya phir tera vartmaan
Arey, Unhe toh tere aane wale kal kee bhi hai poori pehchaan.

Ho sakta hai ki tu ho apni kisee khataa ya soch se anjaan
Kintu Guruji ko toh hai unn sabka bhi poora gyan
Aakhir tu hai mehez ek insaan
Aur Ve Hain swayam Bhagwaan.

Agar kabhi tu kuch hai likhta
Toh Guruji ko usmein tera bhaav hai dikhta
Padhne wale beshak shabd, vaakya, aur vyaakhya padhte hain
Kintu Guruji unmein basey bhaav kee gehraayee ko samajhte Hain.

Tu na bhi kahe ya likhe
Guruji ko sabb saaf dikhe
Ve bhakt ke dil kee baat jaanein
Chaahe Ve uskee baat maanein ya na maanein.

Kyunki Unkee soch hai badi
Aur vaddi hai Unkee vadiyaayee
Guruji swayam Hain roop Khuda ka
Aur bemisaal hoti hai Khuda kee khudaayee.

Hamaari maamuli soch hoti hai khatm jahaan
Guruji kee soch shuru hoti hai vahaan
Aur Unkee soch jaati hai kahaan takk
Hum andaaza bhi nahin lagaa sakte, vahaan takk.

Tu shukrana kar aur maang le Unse maafi
Ve kabhi na honei denge tere saath na-insaafi
Guruji Hain Shiv avatari rasik bairaagi
Saubhagya hai tera ki teri liv Unke sangg hai laagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saubhagya Hai Tera (12/27/2023)

December 26, 2023

Om Namaha Shivaya
Aaj Ka Suvichaar 🙏🏻🙏🏻

#2137

                 Tu Vyakul Na Ho

Zaroor aayega veh kshan
Jabb Guruji hongei tujhse itne prasann
Ki denge Ve tujhe Apne saakshaat darshan
Isliye tu vyakul na ho, Guruji ka jann.

Ve bakhsh rahe Hain tujhe simran
Tu karta chal Unka chintan
Unhee ka naam hai tera asal dhan
Isey japp kar tu dhanwaan bann.

Tu Guruji ko na bhi dekh paaye
Toh bhi Ve toh tujhe dekh rahe Hain har kshan
Toh Unke swaroop se ya mann hee mann kar Unse tu baat
Ve sunte Hain, isliye chhota na kar tu mann.

Ve tujhe banaa rahe Hain shaktishali aur kaabil
Taaki Unke divya darshan se tera maansik santulan na jaaye hil
Aksar aasaan nahin hota paana saakshaat darshan
Sashakt aur susthir hona chaahiye antarmann.

Teri atma ka rishta hai Guru Paramatama ke sangg
Gehra hota jaayega jaise jaise chadhega tujh par bhakti ka rangg
Kewal darshan hee nahin hongei tujhe, balki teri atma Guru Paramatama mein hee jaayegi samaa
Kyunki Ve hee de sakte Hain atma ko sanatan aur surakshit panah.

Tu Guruji kee karuna se pada hai chal
Abb raasta bilkul bhi na badal
Guruji kee mehar se tujhe praapt hota rahega dhan asal
Tu manzil par pahunch kar zaroor hoga safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Vyakul Na Ho (12/26/2023)

December 25, 2023

Om Namaha Shivaya
Aaj Ka Suvichaar 🙏🏻🙏🏻

#2136

            Tu Ho Jaa Gumnaam

Guruji ka prataap hai itna prabal
Ki veh har mushkil ko banaa deta hai nirbal
Isliye tu bebasi mein yoon na haath mal
Teri duvidha ka bhi Guruji ke paas hai hal.

Abhi waqt aaya nahin
Aagey sab ho jaayega sahi
Vo waqt bhi hai aane wala
Tera Guru hai tera rakhwala.

Yaad rakhna bhool na jaana
Ki raat ke baad subah ne hai aana
Chalta rahega aisa aana jaana
Jabb takk chalega jeevan ka afsaana.

Tu hai Guruji kee sharan mein
Tera bhaagya nishchay hai achcha
Ve Guru ke roop mein Hain tere nath
Aur tu hai Unka pyaara sa bachcha.

Ve toh karte rahenge rehmat
Tu na haarna himmat
Tu karta rehna mehnat
Guruji hongei teri neeyat se sehmat
Tu karta chal ibadat
Ve barsaa rahe Hain tujh par Apni inaayat.

Guruji ke paawan prabal prataap se
Tujhe mukti milegi tere har santaap se
Ve denge tujhe samarpan aur santosh ka daan
Unke naam mein ramm kar tu ho jaa gumnaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Ho Jaa Gumnaam (12/25/2023)