Ho rahi hai, ho rahi hai Guruji kee kripa kee vrishti Jaise Unkee sangat bheegey nirantar ismein Vaise hee bheegti rahe saari srishti.
Varsha se upajaao bann jaaye vo, jo bhoomi ho banjar Vaise hee kalyaan ho har uss praani ka, Guru kripa ho jaaye jis par Antas ka sookha ho khatm Maan kar Guruji ka hukm Kyunki Unke hukm mein bhi kripa basee hai Unkee Aur Unkee kripa mein hai layy satvagun kee madhur dhun kee.
Unkee kripa se har paristhiti sweekaar kar paayein mujh jaise naadaan Unkee kripa se hee Unhe samarpan karna ho jaaye aasaan Unkee kripa kee baarish pahunch jaaye antas ke bheetar takk Atma bhi bheegti rahe Unkee kripa se athak.
Guruji kee rehmat se sab kar paayein mehnat Unkee bhakti mein madhosh rehkar miley santosh Na rahe bheetar aur baahar ka sookha Koi na rahe bhojan ya padaarthon ke liye bhookha Pyaas bhi badhe toh simran, sewa, aur satsang kee Rangoli ho sabke antas mein Guruji ke naam ke rangg kee.
Agar chaahta hai tu ki tu jaaye tarr Toh ukaad de laddhadpann kee jadd Apni chetna se tu matt ladd Vyarth hain dikhaawe, unmein na tu padd.
Kar aur sunn Guru Govind ka gungaan Karta chal Unke naam amrit ka paan Koshish toh kar Zamaane se na darr Na honei de apni aur durdasha Chadhne de swayam par Guruji ke naam ka nasha.
Maya toh hai bahut prabal Vo na chaahe ki kumm ho tere mann ka mal Kintu tu poora prayatn kar ki tujh par naam ka nasha ho itna gehra Ki maya vifal honei lagey tujh par jataa paane mein apna pehra.
Ye nasha achcha hai tere antas aur teri atma ke liye Is nashe se tere bheetar ujjwal hotei rahenge bandagi ke deeye Guru par poora vishwaas kar, na bann graas kaal ka Unhe poora gyan hai tere asal haal ka.
Guruji se seedhi taar joad Anaasakt ho baaki sab chod Guru naam ke nashe se jaise jaise tu hota chalega pavitra Vaise vaise sadachaari se sajta jaayega tera charitra.
Guruji lete rahenge tera imtehaan Guruji karte rahenge tera kalyaan Guru naam hai amrit kee khan Iske nirmal nashe se na reh tu anjaan.
Ye hai aisa nasha Jo sanvaar dega teri manodasha Tu mehsoos kar paayega Guru kripa kee barsaat Usmein bheegte huey paayega tu Nirmal anand kee saugat.
Kitne anokhe dhangg se Aap Bhakton ko banaa lete Hain Apna Hoti hai hakeekat Kintu kabhi kabhi lagta hai sundar sapna.
Aapke hukm mein toh Swapn bhi nahin aata bin Aapki izaazat ke Bhakt swapn avastha mein ho ya phir jaagrit avastha mein Saare lamhe dhanya hotey hain Aapki inaayat se.
Kyunki Aapke ashishmayi amrit se paap dhulte jaate hain Beshak kasht aate hain, kintu aagey ke dwaar khulte jaate hain Aap Apni mehar-e-nazar se jo lete Hain bhakt ko dekh Bhakt ke toh sudhar aur sanvar jaate hain lekh.
Ye safar kewal is janam ka nahin Ye safar toh hai janam janam ka Aap angg sangg Hain isliye jo hai vo hai sahi Kyunki Aap karvaate Hain hisaab har pichhle karam ka.
Achcha hee toh hai jo halka hota chale ye bhaar Vaise hee na jaane kitne janmon se kiya hai ye intazaar Buss, Aap yoon hee angg sangg rehna, Guruvar Kyunki ye safar na hoga safal bin Aapki nadar.
Subah se shaam hoti rahegi aur raat ke baad hogi prabhaat Jabb takk saans hai deh mein, pal yoon beetenge bannkar din aur raat Aap hee Noor-e-ilahi, Aap hee Apne bhakton ke nath Shukr hai Aapka ki Aap sada rahenge saath.
Tann kee aankhein khul gayi Antarmann kee aankhein reh gayin moond Vyarth hee jaati rahi Naam amrit kee har boond.
Har saans ko seench sakte thei tum Guruji ke naam ke amrit se Kintu har boond ka tumne anaadar kar diya Aur vikaaron ke aakraman ko sweekar kar liya.
Kamee thi tumhaare manobal mein Tabhi vifal rahe har mushkil ke hal mein Guruji ne bakhsha thaa tumhe simran Kintu tumne na lagaaya usmein mann.
Guruji ke naam ke amrit kee khan Tumhe hui hee nahin uskee pehchaan Duniyavi dhan ko asal dhan maan Tum karte rahe usee ka abhimaan.
Guruji toh phir bhi meher karte rahe Tumhaari jholi bharte rahe Kyunki Ve Apne bhakt ko nahin chodte Kabhi Apne bhakt se muh nahin moadte.
Ve toh kshamasheel Hain, Unse maang lo kshama Abb bhi mauka hai, simran se sanvaar lo samaa Guru naam ke amrit se antas hoga paawan aur sheetal Jitna prayaas karoge, utna badhega tumhaara manobal.
Aane wale samay mein manobal tumhaara Guru kripa se banega tumhaara sahaara Ye mann ko ashant aur asthir honei se bachaayega Ye mann ko sanyam mein rakh paayega.
Jitna simrogey tum Guruji ka naam Tumhaara mann banega shakti ka dhaam Vikaaron ko milega unkee haar ka paigaam Aur naam amrit se tum bante rahoge dhanwaan.
Chand par pahunch gaya insaan Chhoo liya insaan ne aasmaan Kintu agar saath mein chadhta gaya uska abhimaan Toh phir use kaise milega Bhagwaan?
Aaj kalyuga ke is samay mein Zyada ho raha hai aisa sanskaar Insaaniyat bhi jokhim mein hai Yoon badal raha hai sansaar.
Aisa nahin ki sadgunon ka hua hai khatma Aisa bhi nahin ki sabhi bhool gaye hain kaun Hain Paramatama Kintu vaataavaran mein nahin hai pehle wale yugon ka spandan Aur kitne mool aadhaaron ka hua hai khandan.
Aise mein Guruji ne liya hai hamein thaam Daya kar hum par diya hai hamein Apna naam Ve karna chaahte Hain hamaara kalyaan Is se bada kya ho sakta hai daan?
Chaurasi lakh yoniyon se chaahte Hain Guruji hamein bachaana Varna phir badh jaayega hamaara is sansaar mein aana jaana Kewal Parwardigaar hee kar sakte Hain aisa upkaar Khushkismati hai hamaari ki Unhonei bulaaya hai hamein Apne dwaar.
Chand par toh pahunch gaye Pahunchein apne bheetar bhi Guruji ka karein anusaran Rakhein Unke har hukm ko smaran.
Bhalaa chaahte Hain Ve hamaara Dikha rahe Hain hamein kalyaan roopi kinaara Phir bhi jo hum na chaley Unke nakshe kadam par Toh kaise chalega hamaara guzaara?
Guruji toh madad kar rahe Hain nirantar Kintu hamaari bhi toh hai zimmedaari Ki apne prayaas se karein aisee tayyaari Ki hamaari aagey kee yatra ho jaaye nyaari.
Bahut hua abb laddhadpan Guruji keh rahe Hain, ‘banda bann’ Sudridh karein hum apna mann Taaki Guru kripa se sanvar sakey hamaara jeevan.
Sthaayi nahin hai sukh Na hee sthaayi hai dukh Paristhiti badalti rehti hai rukh Toh mann kee sthiti ka alag ho jaata hai mukh.
Sukh mein mann muskuraata hai Dukh mein mann dhal sa jaata hai Jabb takk aisa hota rahega Bhakt taralta se kaise paristhiti sahega?
Mann pyaasa hai simran ka Simran karey pavitrikaran mann ka Guruji kee bakhshish hai simran Guruji ka ashish hai simran.
Simran se akelapann bann jaaye ekant Simran se mann ho jaata hai shant Simran se mann ko miltee hai ekaagrata aur sthirta Mitne lagti hai mann kee ashuddhi aur chanchalta.
Swaabhaavik hai sukh dukh ka aana jaana jeevan mein Anivaarya hai simran aur chintan ka jaari rehna mann mein Badhta rahega jo inse manobal Toh vyakulta aur niraasha ka hoga hal Mushkil samaa jaayega tal Sehenshakti laayega aane wala har pal.
Simran kee bakhshish ke liye Guruji ka dhanyawaad Dhyan na bhi lagey toh bhi Guruji dete Hain ashirwaad Simran karte karte kumm hoti jaayegi Guruji se duuri Mehar karein Guruji ki kisee bhakt kee koshish na rahe adhoori.
Karne lagi mai baat Pyaare Guruji ke saath Jo soojha mujhe uss kshan Unse kehne lagi mai mann hee mann…
Kann kann mein Aapke spandan ka ehsaas Ho raha hai yoon, jaise Aap Hain mere bahut hee paas Aapki anupam khushboo Meri rooh ko rahi hai chhoo Aapke divya saundarya se Sharmaa rahi hai hawaa Aapko bade pyaar se Antas kee bagiya de rahi hai sada Aayiye Guruji, kripa kar aayiye Antas mein viraajmaan ho jaayiye.
Bheetar se aayi awaaz ‘Jaan le abb tu ye raaz Ki Mai kabb se hoon tere antas mein Tere mann mein basey shabad ke ras mein.’
‘Mai hee bakhshta hoon tujhe simran Meri prerna se tu kar paati hai mera chintan Mai awaaz hoon teri chetna kee Mai mithaas hoon teri samvedana kee.’
‘Tere pichhle janmon ke saare paap Tere is janam ke dukh santaap Mai hee toh hoon harta Teri jholi Mai hoon bharta.’
‘Mai jaanta hoon kya tere liye hai sahi Jabb jo uchit hota hai, Mai deta hoon vahee Mai hoon tere praanon kee oorja Mai hoon teri bhakti aur teri pooja.’
‘Har karam tu karti chal mujhe arpan Koshish toh kar ki mujhe kar samarpan Teri koshish ko Mai sweekaaroonga Usey Apne ashish se Mai nikhaaroonga.’
‘Mai Shiv hoon, Mai hoon Shakti Mai bakhshta hoon bhog aur mukti Mujhse hee hai tera mann, tera kann kann Mujhse hee milega tujhe asal dhan.’
Mai sunti rahi Mere ashru kee boond bahi Hui mai bhaav vibhor Mujhe bheetar dikhee bhor.
Guruji hee Guruji aane lagey bheetar nazar Unkee har baat ka honei lagaa asar Mann hee mann mein dekh kar Unka sundar roop Mujhe mila sukoon anoop.
Mainey Guruji ko kiya dhanyawaad Dhanya hui paakar Unka ashirwaad Mera toh jeevan ho gaya hai safal Kyunki Guruji angg sangg Hain har pal.
Kartik maas ka din hai aakhiri Sainkdon shraddhalu jann lagaate hain darbar mein apni haaziri Hindu ho ya sikh, Shiv bhakt ho ya Vishnuji ke bhakt jann Sabhi ke liye bahut vishesh hota hai Kartik Poornima ka ye din.
Dharma shastron mein Ved sabse shreshth Yugon mein Satyug sabse uttam Saritaaon mein Ganga Vaise hee Kartik Maas hai maas sarvottam.
Jo shraddha se karein is maas mein deep daan Mit-ta hai Dev kripa se Unka agyan Deep daan, dhan daan, bhaav poorna snaan In sabse mit jaate hain kasht mahaan.
Shiv ji aur Vishnu ji dono ko Ye maas hai bahut pasand Unkee kripa se shraddhaalu bhakt janon ke Dukh santaap ka hota hai antt.
Deepawali ke panch shubh din Kartik maas poora na ho inke bin Maa Tulsi kee pooja ka hai vishesh mahatva Shubh aur shuddh bhaav jaagrit karta hai devatva.
Kartik Poornima hai antim din is maas ka Hota hai is din par ehsaas bahut kuch khaas ka Pauranik granth Shivji dwaara is din Tripurasur ke vinaash kee katha sunaata hai Aur tabhi se yeh din Tripurari Poornima ke naam se bulaaya jaata hai Devtaaon ke chehre Tripurasur ke vinaash se prasannata se khile Toh is din Dev Deepawali manaakar Ve aapas mein khushi se miley.
Kartikeya ka janam hua aur Vishnu ji ne liya is din Matsya Avatar Aur surakshit kiya samast sansaar Shaligram aur Tulsi Maa kee pooja kee hai is din reet Bhakt manaate hain utsav aur gaate hain bhakti ke geet.
Guru Nanak Dev ji ka Prakash Purab bhi hai aaj Jo sanvaarte Hain Apne sabhi bhakton ke kaaj Kewal sikhon ko nahin, balki poori maanavta ko Unhonei sadachari ka raasta dikhaaya Apne saade saral jeevan ke maadhyam se swayam mein Devatva darshaaya.
Swayam Nirankar aaye Ve dharti par lekar Guru Nanak ji ka roop Har shraddhalu bhakt waakif hai ki Unkee leela hai kitnee anoop ‘Kirt karo, Naam japo, Vand chhako’ ye hain Unke kahe siddhant Inke anusaran par aadhaarit Guru Granth Sahib Ji mein hain anek drishtant.
Guruji Maharaj ke darbar mein bhi Guru Nanak Dev Ji shraddha se hotey Hain virajmaan Guruji ke mandir aur satsang mein simran ke dauran Sunn-ne ko milta hai Gurbani ka ruhaani gaan.
Har shabad ka saar gehra Har shabad ke spandan se utsaahit hota hai vandan Guruji kee mehar se ho paaye simran aur dhyan Jaisa bhi simran Ve bakhshein, usey ashirwaad lein hum maan.
Bahut khushnaseeb hain hum Ki chaahe jeevan mein ho khushi ya gumm Guru kripa se bhakt kar paate hain Gurbani ka Shravan Aur usee par Guru mehar se ho paata hai manan.
Kalyuga mein kirtan ka mahatva hai khaas Gurbani kirtan se badhta hai Guru kripa ka ehsaas Protsaahit ho jaata hai simran aur dhyan ka prayaas Aisee bakhshish miltee rahe, hai Guruji se yeh ardaas.
Guruji sabhi ko taarein Sabhi ke Ve kaaj sanvaarein Dil se nikle dua ki saari sangat ka ho kalyaan Aaj ka din sabhi ke liye laaye shubhta ka paigaam.
Koi kinkar bann kar Koi bann kar kookar Aaye Guruji ke dar par Jhukaane apna sir.
Koi kisee ke kehne par Koi anek kasht sehne par Koi aansoo behne par Aaye Guruji ke dar.
Kintu Guruji ke bin bulaaye Koi na Unke dar pahunch paaye Kiska waqt kab aaye, kewal Guruji hee jaanein Kaun kis bhaav se aaye, kewal Guruji pehchaanein.
Guruji saari sangat par kripa karein Sabhi kee jholi Ve kalyaan se bharein Sabhi ke dukh santaap Ve harein Sabhi Guruji kee mehar se tarein.
Naiya, saari sangat ke jeevan kee Unke jeevan ke har kshan kee Guruji kee kripadrishti sabhi par hai padi Ye tasalli hai sabse badi.
Hum toh hain agyani, Guruji gyan ke bhandar Hum gunahgaar, Guruji bakhshanhaar Guruji ke saari sangat par hain anginat upkaar Guruji ko bhaav poorna shukrana baarambaar.
Tujhe swayan hee bharni hai apni udaan Tujhe hee banaani aur mitaani hai apni pehchaan Pehchaan aur phir tyaag de apna abhimaan Tere angg-sangg Hain Guruji ke roop mein swayam Bhagwaan.
Aseem akash de raha hai tujhe anivaarya pukaar Usee pukaar ko sunn-ne aur maan-ne mein hai tera uddhaar Ye akash baahar ka nahin, hai ye bheetar ka Ye uddhaar bhi hai tere andar ka.
Atma-bodh hona hai zaroori Taaki khud se mitey teri duuri Isliye Guruji se kar ardaas Ki jaagi rahe tere mann mein simran kee pyaas.
Guruji kee kripa se simran le jaayega tujhe dhyan mein Dhyan se badhauti hogi tere gyan mein Dhyan aur gyan teri madad karenge teri udaan mein Isliye tu sees jhukaata chal Guruji ke sammaan mein.
Iske paawan prayaas se katenge tere karmon ke bandhan Shuddh hota chalega tere dwaara kiya chintan aur vandan Halka ho jaayega karmon ka bhaar Badh jaayenge uttam udaan bharne ke aasaar.
Kalyaankaari hoga tere antas ka pavitrikaran Tere vikaaron kee aniyantritata ka hoga haran Mann kee sthiti hogi sthir aur sachchi Teri udaan hogi achchi.
Ye yakeenan hai yukti Jis se jeete jee hogi teri mukti Aye bande, Guruji teri sahaayata kar rahein Hain Unhonei dhyan mein tujhse prerna daayak shabd kahein Hain Tu apni oar se kar koshish poori Guru kripa se teri udaan na rahegi adhoori.
Aaj Ka Suvichaar 