Author: dhirjabhat

November 14, 2023

Om Namaha Shivaya
Aaj Ka Suvichaar 🙏🏻🙏🏻

#2095

Gaaon Ka Ek Niwaasi

Gaaon ka ek niwaasi thaa
Saadhaaran sa thaa uska jeevan
Na koi mithyaabhimaan na banaavati pann
Aur bahut dayalu thaa uska mann.

Uska mann duvidha mein thaa aur thaa pareshaan
Usey kaheen nazar na aa raha thaa Bhagwaan
Kar chuka thaa bahut puja, paath, aur daan
Phir bhi haalaat kee gambheerta se thaa hairaan.

Mann mein yuddh chal raha thaa
Muddat se kasht nahin tal raha thaa
Na le paa raha thaa veh koi nirnay
Mann mein uth rahe thei anek sanshay.

Chalte chalte pahuncha ek taalaab ke paas
Usee ke kinaare baith gaya hokar udaas
Yakaayak usey hua ehsaas
Ki mehek rahi hai vahaan kee ghaas.

Dekha usne mud kar apne peechhe
Ek yogi baitha thaa aasan bichhaakar neeche
‘Om Namaha Shivay’ ka jaap veh karta thaa jaa raha
Niwaasi ko lagaa ki veh kalyaan ka geet hai gaa raha.

Shant baithkar sunta raha jaap veh niwaasi
Jaap sunkar thodi kumm honei lagi uskee udaasi
Veh bhi japne lagaa ‘Om Namaha Shivay’ pyaar se
Aur yogi kee oar dekhne lagaa aabhaar se.

Jabb yogi kee jaap kriya hui sampann
Tabb niwaasi ke mann ko mehsoos hua halkapan
Veh gaya yogi ke sameep
Usey yogi ke maathe par dikha divyata ka deep.

Jaan gaya, veh maan gaya ki yogi hai bahut mahaan
Kintu usey gyat na hua ki Ve toh Guruji ke roop mein thei Bhagwaan
Ve swayam aaye thei karne niwaasi ka maargdarshan
Taaki shant ho niwaasi ka mann aur sudharne lagey uska jeevan.

Niwaasi ne chhoo liye unn yogi ke kamal charan moond kar apne nayyn
Poochha Unse niwaasi ne ki kaun Hain Ve Jinka Jaap sunkar milta hai yoon chayyn
‘Guruji,’ pyaar se kehne lagey yogi mahaan
Aur phir ek hee pal mein ho gaye vahaan se antardhaan.

Niwaasi kee aankhon mein aaye shukrana ke ashru
Usee kshan se uskee nayi zindagi hui shuru
Usey yogi ke roop mein miley Guruji aur Bhagwaan
Abb toh nishchit ho gaya uske mann aur uske jeevan ka kalyaan.

‘Om Namaha Shivay’ japte japte niwaasi lauta apne ghar
Guruji ne uspar mehar kar bula liya usey Apne dar
Jaap karte karte uskee duvidhaayein honei lagi duur
Antas shuddh hota gaya aur uspar chhaaya Guruji ka noor.

Niwaasi ko Guruji ne bakhsha
Guruji ne sada kee uskee raksha
Jaise Guruji ne niwaasi ko diya taar
Vaise hee Guruji banein hum sabke bakhshanhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Gaaon Ka Ek Niwaasi (11/14/2023)

November 13, 2023

Om Namaha Shivaya
Aaj Ka Suvichaar 🙏🏻🙏🏻

#2094

Dhoop Chhaaon Ka Khel

Khushi ko mai chhaaon maanoon ya dhoop?
Gumm ko maanoon dhoop ka ya phir chhaaon ka roop?
Kyunki dhoop or chhaaon dono hain zaroori
Lekin kabhi kabhi ichcha hoti hai dono mein se ek se badhaani kee duuri
Dono bhaate hain mann ko alag alag samay par
Kintu jo bhaaye nahin, zaroori toh nahin ki vo ho jaaye agochar.

Isee tareh se hain khushi aur gumm
Kabhi ek zyada aur dooja kumm
Kabhi pehla ghat jaaye aur dooja adhik ho jaaye
Aur mann ho asthir toh dono se prabhaavit ho jaaye.

Sukh dukh, khushi aur gumm
Ye toh hotey rahenge zyada aur kumm
Lekin ye antas par na dhaayein sitam
Iske liye bahut zaroori hai swasth mann.

Isliye anivaarya hai badhaana manobal
Taaki khushi gumm mein mano sthiti na jaaye badal
Jitna shant aur sthir hoga mann
Utna hee suljha hua rahega jeevan.

Guruji ne bakhsha hai sangat ko simran
Unkee kripa se hee simran kar paata hai mann
Simran hai raasta pavitrikaran ka
Simran se kumm mehsoos hota hai tanaav jeevan ka.

Prayaas karte karte
Guruji ke naam se mann ko bharte bharte
Kumm sataane lagti hai har tareh kee chhaaon aur dhoop
Mann ko haani pahunchaane ka saamarthya kho dete hain khushi aur gumm
ke badalte roop.

Guruji se hai ye vinamr ardaas
Ki Unke simran mein ramm jaaye har shwaas
Na khushi na gumm na sukh na dukh lagey khaas
Manobal badhaane ka jaari rahe prayaas.

Guruji Hain bhakt vatsal aur karunanidhaan
Ve Apni ichcha se bakhshte Hain simran, dhyan, aur gyan
Unkee is bakhshish mein basaa hai manobal badhaane ka upaay
Bhakt nishtha se Unke charnon mein mann ko jhukaaye, aur pyaare Guruji sada sahaay.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhoop Chhaaon Ka Khel (11/13/2023)

November 12, 2023

Om Namaha Shivaya
Aaj Ka Suvichaar 🙏🏻🙏🏻

#2093

Aapke Naam Kee Jyot

Param poojya Guruji,

Apni mehar se Aapne
Jalaayee mere antas mein jyot Apne naam kee
Aapki daya se ummeed jaag gayi
Pahunch paane Aapke dhaam kee.

Kyunki kuch bhi nahin hai Aapke naam se zyada anmol
Jo Aapki mahima sunaaye, sarvashreshth hai har veh bol
Aapka naam hee kar raha hai mera kalyaan
Aur aagey bhi banega uddhaar ka baan.

Aapke naam kee jyot se milee hai jo himmat mere mann ko
Uss himmat se bahut haunsala mila hai jeevan ko
Jabb bhi hoti hoon udaas
Jabb bhi hoti hoon niraash
Aapka naam japp leta hai mera shwaas
Aur badhaata hai mera Aap par vishwaas.

Aapke bakhshe huey is vishwaas ke sahaare
Aapki mehar se pahunch paati hoon Aapke dwaare
Kripa kar bulaate rahiyega Apne darbar mein
Vyarth lagta hai kaheen bhi aur jaana sansaar mein.

Aapke naam kee jyot se ujjwal hui hai meri raah
Ye Aapki hee rehmat hai mere sachche badshah
Kripa keejiyega ki mai kabhi galati se bhi na ho jaaoon gumraah
Aur bakhshiye aisee bhakti mujhe, jismein kabhi kumm na ho mera utsaah.

Jaanti hoon ki ye shareer hai nashwar
Maanti hoon Aap Guru ke roop mein Hain Ishwar
Maanti hoon ki Aapka naam hai akhand, anant, aur amar
Arzi hai Aapse, ki mere bheetar Aapke naam kee jyot jalti rahe nirantar.

Bahut tejasvi hai Aapke naam ke jyot kee jwaala
Aapke alaawa koi nahin hai mera rakhwaala
Mera mann Aapke naam mein hua hai matvaala
Mai Aapki shukraguzaar hoon, ki Aapke naam se hua hai mere bheetar uttam ujaala.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Naam Kee Jyot (11/12/2023)

November 11, 2023

Om Namaha Shivaya
Aaj Ka Suvichaar 🙏🏻🙏🏻

#2092

                 Deep Jalaa Kar

Deep jalaa kar pyaar ka
Bitaaoongi har pal intazaar ka
Aayenge, mere Guruji aayenge
Diwali ka deeya jalaayenge.

Deep jalaa kar aadar satkaar ka
Swaagat karoongi Guru sarkar ka
Aayenge, mere Guruji aayenge
Uss swaagat ko qubool farmaayenge.

Deep jalaa kar sachchaayee ka
Gungaan karoongi Unkee vadiyaayee ka
Aayenge, mere Guruji aayenge
Apni guruyaayee dikhaayenge.

Deep jalaakar stavan ka
Geet gaaoongi Guru vandan ka
Aayenge, mere Guruji aayenge
Stavan se Ve prasann ho jaayenge.

Deep jalaa kar kshama ka
Intazaar karoongi maafi maangne ke samaa ka
Aayenge, mere Guruji aayenge
Kshama daan ka dariya bahaayenge.

Deep jalaakar samarpan ka
Prayaas karoongi chintan ka
Aayenge, mere Guruji aayenge
Mujhe bandagi karna sikhaayenge.

Deep jalaa kar arzi ka
Intazaar karoongi Guruji kee marzi ka
Aayenge, mere Guruji aayenge
Apni marzi mujhe sunaayenge.

Deep jalaakar agyaparataa ka
Naman karoongi kaaran karta ka
Aayenge, mere Guruji aayenge
Mere liye Apna hukm sunaayenge.

Deep jalaa kar dhanyawaad ka
Intazaar karoongi Guru prasad ka
Aayenge, mere Guruji aayenge
Guru prasad Ve barsaayenge.

Deep jalaakar vaade ka
Samarthan karoongi apne nek iraade ka
Aayenge, mere Guruji aayenge
Mujhe taar kar paar lagaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deep Jalaa Kar (11/11/2023)

November 10, 2023

Om Namaha Shivaya
Aaj Ka Suvichaar 🙏🏻🙏🏻

#2091

Guruji Kee Kripa Ka Rangg

Guruji kee hoti hai kripa
Toh hee pahunch paate hain hum Unke darbar
Asambhav bhi jahaan sambhav ho jaata hai
Uske liye jisey Guru apnaata hai.

Har kisee ka anokha hai rishta Guruji ke sangg
Lekin har rishte mein Guruji bharte Hain Apni kripa ka rangg
Is rangg ko gehra honei mein kabhi kabhi lagti hai der
Lekin uss gehraayee ke aane se aati hai ruhaani jeevan mein saver.

Guruji kee kripa ka rangg hai bahut khaas
Guruji kee kripa ke rangg mein basaa hai Guruji ka ehsaas
Guruji kee kripa ka rangg pavitra kar deta hai har bhakt ka shwaas
Guruji kee kripa ka rangg protsaahit karta hai bhakt ka ruhaani prayaas.

Guruji kee kripa ke rangg se
Neerasta ka hota hai antt
Naam ke ras mein ramm jaati hai sangat
Aur praapt hota hai anand anant.

Is rangg mein hoti hai Guruji kee khushboo
Jis se gadd gadd hokar tarr jaati hai rooh
Tabhi bhi anokha hai yeh rangg
Iske saath judi hai umang kee tarang.

Guruji kee kripa ka rangg
Yoon rehne lagta hai atma ke sangg
Ki veh atma par jaata hai chadh
Aur atma aagey jaati hai badh.

Atma chadhne lagti hai adhyatmik oonchaayee par
Guruji saath hee nazar rakhte Hain bhakt kee bhakti kee gehraayee par
Har seedhi par hota hai bhakt ka imtehaan
Guruji parakhte Hain uska iraada, dhyan, aur gyan.

Aagey badhte badhte
Oonchaayee par chadhte chadhte
Guruji kee kripa ka rangg
Rangg deta hai atma ka angg angg
Atma hoti jaati hai Guruji kee guruyaayee mein malang
Aur chal deti hai Unn Paramatama ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Kripa Ka Rangg (11/10/2023)

November 9, 2023

Om Namaha Shivaya
Aaj Ka Suvichaar 🙏🏻🙏🏻

#2090

Guruji Kar Rahe Hain Intazaar

Guruji kar rahe Hain intazaar
Ki tum kar lo Unse behad pyaar
Aur tum chaahte ho poora sansaar
Toh kaise hoga Guruji ka deedar?

Jo tumhe sachcha sukh dene ke liye Hain tayyaar
Na karaao Unhe itna intazaar
Unke sangg bitaao samaa
Duniyadaari ko na maano panaah.

Vish ko amrit na samjho
Moodhta mein na ulajho
Farz nibhaao duniyadaari kee oar
Lekin kewal Guruji sangg seedhi taar ko joad.

Kewal duniyadaari mein leen reh kar reh jaaoge adhoore
Kewal Guruji mein leen rehkar ho jaaoge ruhaaniyat se poore
Kund mil raha hai amrit ka, mal ke kund ko tyaag do
Guruji kee mehar se apni adhyaatmik unnati mein bhaag lo.

Guruji hee Hain param sachchaayee
Bahut vaddi hai Unkee vadiyaayee
Goonj rahi hai Guruji kee vaani
Usey suno aur sudhaaro apni zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kar Rahe Hain Intazaar (11/09/2023)

November 8, 2023

Om Namaha Shivaya
Aaj Ka Suvichaar 🙏🏻🙏🏻

#2089

 Nahin Hai Koi Antar

Param poojya Guruvar,

Nahin hai koi antar
Aap mein aur Nirankaar mein
Aapka hukm chale nirantar
Bheetar aur sansaar mein.

Sunn paayein ya nahin
Vo nirbhar hai hum par
Maanein ya na maanein
Vo bhi hum par hai nirbhar.

Aapne bulaaya hai Apne dar par
Hamein bhatakne kee zaroorat hee nahin dar dar
Har pal rehti hai hum par Aapki nazar
Toh kyun na ho jaayein hum har sanshay se bekhabar.

Bhayy ka kaaran bann jaata hai sanshay
Jo kathin karta hai nibhaana kartavya
Tabhi toh apraapya lagne lagta hai gantavya
Chhota sa tufaan bhi lagne lagta hai jaise koi pralay.

Hamein vishwaas ka aisa deejiye daan
Ki mit jaaye hamaare antas se sanshay ka naam-o-nishaan
Aisee chetna keejiye pradaan
Ki duur ho jaaye hamaara agyan.

Dhanya hain hum ki
Milee hai goad Aapki guruyaayee kee
Subuddhi bakhshiye
Taaki hamaare labon par ho vaani Aapki vadiyaayee kee
Har din jeevan kee kahaani mein judte rahein kisse
Aapke dwaara kiye kalyaan ke
Kripa kar ke hamein mauke bakhshte rahiye
Taaki hum geet gaa paayein Aapki mahima ke gungaan ke.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nahin Hai Koi Antar (11/08/2023)

November 7, 2023

Om Namaha Shivaya
Aaj Ka Suvichaar 🙏🏻🙏🏻

#2088

    Ek Anokha Praani

Ek anokha praani thaa
Veh bahut hee gyani thaa
Anginat aankhon wala
Guruji ke pyaar mein matvaala
Sabhi aankhon se Guruji ko dekhta rehta thaa
Phir naynon se kehta thaa
Ki abhi bhi bhara nahin ye dil
Jabki sabhi naynon ka sehyog gaya hai mil.

Naynon kee bhi badhti rehti thi pyaas
Har nayn se ashru ponchta thaa praani das
Itnee saari aankhein, lekin Guruji kee mahaanta dekh paane mein huin asamarth
Kintu koshish karti rahi har aankh, ki pehchaan paaye Guruji ke ishaaron ka arth.

Praani ke mukh bhi thei anek
Rasna se sampann thaa mukh pratyek
Har rasna japti rehti thi Guruji ka naam
Har ghadi, har subah aur shaam
Phir bhi tript na hota thaa praani
Toh uskee har rasna gaati thi geet ruhaani
Guruji ke pyaar mein
Uss pyaar ke ikraar mein.

Ek bhola sa dil thaa praani ka
Veh saathi thaa uskee jindri deewani ka
Dil mein Guruji ke liye har pal prem bhaav behta thaa
Guruji ke chintan mein veh nirantar ekaagra rehta thaa
Uskee har dhadkan yoon chalti thi Guruji ke naam se
Maano uska puraana rishta ho Guruji ke dhaam se.

Guruji kee thi mehar bhari nazar
Guruji ne kee praani par nadar
Uss dil mein Guruji ne daal liya dera
Usey keh diya ki ‘tu hai mera.’

Praani ke ik kaan ko aayi Guruji kee awaaz
Usmein thaa praani kee khushi ka raaz
Koi seema na rahi uskee prasannata kee
Ye bakhshish thi saugat sampannata kee.

Sabhi aankhein aur sabhi mukh
Praani kee khushi se huey mugdh
Ve asankhya honei ke bavajood na thei kar paaye jo
Ek bhole se dil ke prem bhaav se ho paaya vo
Guruji ke daya daan se
Unkee mehar ke parinaam se.

Guruji ka ho liya jabb se veh adbhut praani
Uskee toh sanvar gayi zindagaani
Uskee rooh hui Guruji kee deewani
Taarti rahi usey Guruji kee meharbaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Anokha Praani (11/07/2023)

November 6, 2023

Om Namaha Shivaya
Aaj Ka Suvichaar 🙏🏻🙏🏻

#2087

Aap Sampoorna Samundar

Sakaaratmakta ke saagar, mere Guruvar
Banaa leejiye mujhe neer kee leher
Yoon samaa jaaoon Aapke vistaar mein
Ki mera astitva hee na rahe sansaar mein.

Na koi dukh mujhe haraaye
Na koi sankat mujhe daraaye
Mujh nacheez kee boond boond
Aapki gehraayee mein samaa jaaye.

Na rahoongi mai boond, na leher rahoongi
Aapke aanchal mein Aapki suraksha mein sab sahoongi
Jo bhi chinta hogi, uske baare mein Aapse hee kahoongi
Jo disha Aap dikhaayenge, usee oar Aapki hokar mai bahoongi.

Aapka ansh mai ho jaaoongi
Aapke amrit se poshit ho paaoongi
Nitya nirvighn nirantar
Mai leher, Aap sampoorna samundar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Sampoorna Samundar (11/06/2023)

November 5, 2023

Om Namaha Shivaya
Aaj Ka Suvichaar 🙏🏻🙏🏻

#2086

                    Bhakti Ka Bhaav

Param poojya Guruvar,

Aisa badh jaaye mere bheetar
Aapke prati bhakti ka bhaav
Ki meri poori zindagi ke liye
Veh bann jaaye mera swabhaav.

Aise badhta jaaye mujh mein bhakti ka chaav
Ki mujhe vikarshit na kar paaye mere dil ka koi bhi ghaav
Aap mein yoon jaaoon mai ramm
Ki na sataaye mujhe koi gumm.

Bhakti bhaav kee badhauti se hee
Mera bhavishya hoga sunehra
Isliye, mere Guruvar pyaare
Banaaye rakhiyega Aap Apna pehra.

Na daudoon baahar kee oar
Tabhi toh paaoongi aantrik bhor
Amrit ka strot hai bheetar
Mujhe yakeen hai, mere Guruvar
Isliye Aapki prerna se daudoon sahi disha mein
Taaki sudhaar hota rahe meri ruhaani dasha mein.

Dridh bhakti bhaav se mit-tee jaaye mere mann kee bhranti
Taaki mann mein badhe sthirta, spashtataa, aur shanti
Beshak iske liye vichaaron mein ho jaaye kranti
Mujhe vishwaas hai ki mere bheetar gyan deep jalaayegi Aapki kanti.

Ye is nimaani kee arzi hai
Aagey jaisi Aapki marzi hai
Kahoon Aapke dar par jhukaate huey sir
Ki Aapka hukm sada mere sir aankhon par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti Ka Bhaav (11/05/2023)