Author: dhirjabhat

November 15, 2025

Om Namaha Shivaya
Aaj Ka Suvichaar 🙏🏻🙏🏻

#2827

  Behti Hai Sukoon Kee Sarita Yahaan….

Behti hai sukoon kee sarita yahaan
Ye Guruji Maharaj ka dar hai
Dukh se raahat paate hain insaan
Ye Guruji Maharaj ka dar hai
Sajde mein jhuk jaata hai yahaan aasmaan
Ye Guruji Maharaj ka dar hai.

Aksar hotey hain yahaan imtehaan
Karaane hamaare hee karmon ka bhugtaan
Hamesha imtehaan nahin hotey aasaan
Aksar nikal jaati hai jaan
Aksar aate hain tufaan
Par Guruji sada karte Hain kalyaan.

Aakhirkaar, Guruji ka ganit achook hai
Unkee leela anoop hai
Ve jaanein sabka ateet, bhavishya, vartmaan
Ve Hain swayam Bhagwaan.

Guruji Maharaj ka dar hai daya ka ghar
Guruji kee daya barasti hai nirantar yahaan
Duur duur phaili hai Guruji kee sangat
Guruji Hain sabke Jaan-e-Jahaan.

Guruji kee mamta aur shakti hai sabse mahaan
Ye Guruji Maharaj ka dar hai
Guruji kee inaayat beshumaar hai yahaan
Ye Guruji Maharaj ka dar hai
Guruji kee yaad mein bita lo samaa
Ye Guruji Maharaj ka dar hai
Shukrana mein jeeyo apne jeevan kee dastaan
Ye Guruji Maharaj ka dar hai.

🌹🌹🌹🌹🌹🌹🌹

Jai Guruji 🙏🙏
Dhirja

Behti Hai Sukoon Kee Sarita Yahaan…. (11/15/2025)

November 14, 2025

Om Namaha Shivaya
Aaj Ka Suvichaar 🙏🏻🙏🏻

#2826

     Guruji Bulaayein…

Guruji bulaayein
Aur bhakt pahunch paayein
Goonje jahaan Gurbani
Dhyan mein baithe sangat deewani
Guruji hon viraajmaan vahaan
Sangat de Unhe sammaan
Kewal Unse jodkar taar
Koi na karey kisee aur se baat
Beshak baitha ho kisee ke bhi saath
Guruji ko arpan ho saari sewa aur saara simran
Taaki satsang mein Guruji Maharaj hon prasann.

Koi oonch neech ya jaati ke bhed bhaav ke bina
Sabhi chhakein Guruji ka diya langar prasad
Samarpan kar Guruji ke kamal charan mein
Paayein Guruji ka anant ashirwaad.

Sangat karey aur sunei Guruji kee mahima ka gungaan
Sabhi ka dhyan ho Guruji kee oar
Anekta mein ekta ho ruhaaniyat kee
Bhavna ho shuddh ibadat kee.

Jeevan hee bann jaaye Guruji ka satsang
Satsang hee bann jaaye jeevan
Guruji ka shukrana aur Unka stavan
Isee mein leen rahe abb mann.

Dincharya chalti rahe Guruji ke khayaalon mein rehte huey
Waqt beete har paristhiti mein Guruji ko shukriya kehte huey
Guruji kee yaad bin na ho koi subah ya shaam
Guruji ko seedha pahunchta rahe dil ka har paigaam.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Bulaayein… (11/14/2025)

November 13, 2025

Om Namaha Shivaya
Aaj Ka Suvichaar 🙏🏻🙏🏻

#2825

Guru Kahoon Ya Kahoon Daataar

Guru kahoon ya kahoon daataar
Pita kahoon ya kahoon paalanhaar
Khuda kahoon ya kahoon taaranhaar
Ek baar kahoon ya kahoon baar baar
Aap hee Hain mere har shwaas ka aadhaar
Aap Hain mere sarvasva, mere Parwardigaar.

Guruji, Aapse kuch chhipa nahin
Aap mujhse zyada jaanein mere mann kee har bhavna ko
Mai avagat hoon ya nahin, mai na jaaoon
Par Aap jaante Hain mere antarmann kee har kaamna ko.

Phir bhi keh deti hoon Aapse kayi baar
Aakhirkaar hoon mai naadaan nimaani
Unn palon ke liye jaise bhool jaati hoon
Ki Aapki hee dein hai ye zindagaani.

Kshama karte rahiyega meri har naadaani
Ye khwaahish bhi hai, guzaarish bhi
Aap dete rahiyega prerna aur chetna
Aur karte rahiye bakhshish kee baarish bhi.

Jaanti hoon Aap rakh rahe Hain mera khayaal
Varna itna behatareen na hota mera haal
Kin lafzon mein mai Aapse shukrana kahoon
Sumat deejiye aisee ki sada Shukrana mein rahoon.

🌹🌹🌹🌹🌹🌹🌹

Jai Guruji 🙏🙏
Dhirja

Guru Kahoon Ya Kahoon Daataar (11/13/2025)

November 12, 2025

Om Namaha Shivaya
Aaj Ka Suvichaar 🙏🏻🙏🏻

#2824

                Khoobsoorat Niwaas

‘Guruji’ is shabd ka prataap hai itna mahaan
Ki is shabd mein hee maano basaa hai kalyaan
Maano toh hai sab kuch, baat saari hai vishwaas kee
Ye naam toh abb jaise hai oorja har shwaas kee.

Aur Guruji swayam toh Hain mahaanon mein sabse mahaan
Srishti mein sabse bade karunanidhaan
Shiv avatari leeladhaari
Sambhaalte Hain Ve srishti saari.

Hai ye yug parivartan ka samay
Ismein nahin hai koi sanshay
Guruji angg sangg Hain toh ye waqt bhi jaayega guzar Unke kamal charan mein
Khushnaseeb hain hum ki Unhonei liya hai hamein Apni sharan mein.

Har haalaat mein Guruji ko karte chalein yaad
Har baat mein le aayein Guruji kee baat
Baatein karein aur sunein Guruji ke baare mein
Toh pahunchte chalenge sakaaratmakta ke dwaare mein.

Kitnon ko taara hai Guruji ne
Aur kitnon ko bhavishya mein bhi taarenge
Anginat bhakton ka jeevan Unhonei sanvaara hai
Aur aagey bhi sainkdon ka sanvaarenge.

Ye aas nahin, ye hai vishwaas
Jis se paripoorna hai har shwaas
Jis hriday mein Guruji karein vaas
Veh hriday toh sada hai khoobsoorat niwaas.

🌹🌹🌹🌹🌹🌹🌹

Jai Guruji 🙏🙏
Dhirja

Khoobsoorat Niwaas (11/12/2025)

November 11, 2025

Om Namaha Shivaya
Aaj Ka Suvichaar 🙏🏻🙏🏻

#2823

Guruji Ne Kiya Mujh Par Itna Ehsaan

Guruji ne kiya mujh par itna ehsaan
Mujhe joad kar Apne sangg
Bahut hee pyaara hai ye rishta ruhaani
Anokhe moad lene lagi abb meri zindagaani.

Ye rishta hai anokha
Yahaan nahin miley kabhi dhokha
Is rishte mein har pal hai sundar mauka…

Mauka, Guruji ke saanidhya mein rehne ka
Mauka, Guruji ke prati prem bhaav mein behne ka
Mauka, atma nireekshan seekhne ka
Mauka, darpan dekhne ka…

Darpan, apne antarmann ka
Taaki apni khaamiyan dikh jaayein
Aur Guruji ke bakhshe simran se
Ve pavitrikaran dwaara dhul jaayein.

Sewa, simran, satsang se rishta hota jaaye mazboot
Samarpan aur lagan aise hon ki apni oar se rishta na jaaye toot
Har imtehaan ko rishte kee seedhiyan maan
Unpar chadhna hoga hokar saavdhaan
Aur saath hee tyaagna hoga abhimaan
Balki ye hai shaayad sabse bada imtehaan.

Is rishte mein khila rahe niswaarth pyaar
Is rishte mein na ho koi mannat ya vyapaar
Karti rahoon har pal Guruji ka dhanyawaad
Unke sangg ye rishta hai Unka diya prasad.

Buss, Guruji Maharaj ko prasann rakhne mein vyast rehkar
Unkee mahima ke gungaan mein mastt rehkar
Is rishte ko nibhaana
Guruji ko rijhaana
Laagi rahe ismein meri aisee lagan
Ki is rishte mein mai rahoon magan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ne Kiya Mujh Par Itna Ehsaan (11/11/2025)

November 10, 2025

Om Namaha Shivaya
Aaj Ka Suvichaar 🙏🏻🙏🏻

#2822

Har Bhakt Kee Sunvaayee

Kewal Guruji Maharaj hee
Toad sakte Hain praarabdh kee doar
Varna pratikool haalaat ke ghoont peete peete
Guruji kee sharan se vanchit ho jeete jeete
Kitne aaye aur gaye duniya ke rangg manch se
Vyakul aur dukhi hokar yahaan ke prapanch se.

Pooran Guru Hain Guruji meharbaan
Apni daya barsaate Hain Ve karunanidhaan
Unkee mehar se toot paaye praarabdh kee doar
Unkee kripa nahin honei deti kamzor.

Guruji kee dee prerna ummeed kee lau jalaati hai
Guruji kee dee chetna kadam aagey badhvaati hai
Sehensheelta aur viveksheelta kee dete Hain Guruji bakhshish
Sampoorna kalyaan ka Guruji dete Hain ashish.

Guruji kee marzi ko hukm maan lene mein hai bhalaayee
Aisee hai Guruji Maharaj kee vaddi vadiyaayee
Alaukik mahima se paripoorna hai Guruji kee guruyaayee
Guruji ke darbar mein hoti hai har bhakt kee sunvaayee.

🌹🌹🌹🌹🌹🌹🌹

Jai Guruji 🙏🙏
Dhirja

Har Bhakt Kee Sunvaayee (11/10/2025)

November 9, 2025

Om Namaha Shivaya
Aaj Ka Suvichaar 🙏🏻🙏🏻

#2821

          Beshak Tum Na Jaano…..

Beshak tum na jaano ki ye raasta le jaayega kahaan
Is par chalne ka aadesh de rahe Hain Guruji mahaan
Guruji angg sangg Hain is raaste par
Isliye yahaan hoga kalyaan hee kalyaan
Tum har sanshay ko tyaag kar
Badhte chalo jahaan le chalein Guruji ke kamal charnon ke nishaan.

Guruji kee deewaanagi mein ye raasta katt jaayega
Guruji ke naam se bhayy ka asur raaste se hatt jaayega
Tum chal ke dekho toh zaraa
Raasta ashishon se hai bhara
Jo Guruji ne bichhaaye Hain tumhaare liye swayam
Jinse sudhar jaayega tumhaara jeevan.

Guruji toh dene ke liye aaye Hain
Tum seekh lo lena abb
Phir na kehna ki tumhaare kehne par
Aaye nahin thei Rabb.

Arey, Guruji toh tumhaare bin boley hee de rahe Hain tumhe prasad
Unse seedhi taar jodoge toh jaanoge tum Unke ashirwaad
Kar lee tumne bahut naadaani
Abb akal se kaho vo baney sayaani
Aur Guruji ko Rabb jaan lo
Unka hukm abb maan lo.

🌹🌹🌹🌹🌹🌹🌹

Jai Guruji 🙏🙏
Dhirja

Beshak Tum Na Jaano….. (11/09/2025)

November 8, 2025

Om Namaha Shivaya
Aaj Ka Suvichaar 🙏🏻🙏🏻

#2820

Maalik Hain Mere Guruvar Pyaare

Maalik Hain mere Guruvar pyaare
Saari kee saari srishti ke
Unke sabhi bhakt aadaata hain
Unkee kripa kee drishti ke.

Guruji kee marzi jo chalti hai
Toh kalyaan hota hai sab ka
Yoon hee thode hee na hai
Unka darja Rabb ka.

Balki Guruji toh lekh badalte Hain
Vo bhi Apni hee marzi se
Unkee daat badi hoti hai
Har sangat kee arzi se.

Guruji Hain bhole bhaav ke ichchuk
Unke samaksh hum sab hain bhikshuk
Ve hee daata, Ve hee rakshak
Ismein nahin hai koi bhi shak.

Guruvar kee daya mil jaaye jisey
Nishchit hai uska kalyaan
Guruvar hee Hain maat-pita bhi
Guruvar mein hee basey Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Maalik Hain Mere Guruvar Pyaare (11/08/2025)

November 7, 2025

Om Namaha Shivaya
Aaj Ka Suvichaar 🙏🏻🙏🏻

#2819

Aapki Rehmaton Se Aabaad….

Param poojya Guruji Maharaj,

Aapke charnon mein aayi thi toh thi mai fakir
Aapne Apni rehmat kee daulat se banaaya mujhe behad ameer
Kyunki mila Aapke ashirwaadon ka beantt khazaana
Jeevan bann-ne lagaa anokha sa afsaana.

Na jaane kin kin pichhle janmon ke kaun kaunse karmon ka
Aap bhog karvaate jaa rahe Hain is ek janam mein
Apni suraksha ka kavach mujhe pehna kar
Aap mujhe aagey badhaate jaa rahe Hain jeevan mein.

Aapki meher se Aapke charnon mein rahoon jhuki
Aapki kripa se Aapke dar par rahoon ruki
Mujh mein na hai vivek na hai shuddhi
Nahin seekhni mujhe koi siddhi
Aapke charnon mein mai thi aur rahoongi fakir
Aapki daya ke bharose hai aur rahegi meri taqdeer
Apni khaamiyon ko apne prem mein piro kar
Mai Aapko shraddhaanjali arpit karoon
Jaanti hoon Aap sweekaar lenge
Phir bhi na jaane kyun mai daroon.

Jo rog hain mujhe, ve hain mere hee karam
Par ilaaj har tareh se Aapki niyaamat hai
Insaaniyat nibhaati hoon ya nahin, mai na jaanoon
Aapne Apni sangat banaaya mujhe, ye Aapki inaayat hai.

Aapke sahaare chalta rahe ye fasaana
Meetha lagta rahe mujhe Aapka bhaana
Aapki sharan milne se pehle mera jahaan thaa veeraana
Aapki rehmaton se aabaad hua vo, Aapka anantam shukrana.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Rehmaton Se Aabaad…. (11/07/2025)

November 6, 2025

Om Namaha Shivaya
Aaj Ka Suvichaar 🙏🏻🙏🏻

#2818

            Guruji Mere Paalanhaare

Guruji mere paalanhaare
Meri har saans hai Unke sahaare
Na saathi koi Unsa sachcha
Na saath koi Unsa achcha
Phir kyun kaheen aur mai jaaoon
Unse ardaas karti jaaoon
Ki rakhte rahein Ve mujhe Apne charan mein
Ye jeevan beete Unkee sharan mein
Aur jitne janam hon mere
Guruji angg sangg hon shaam savere
Phir kya raat aur kya din
Koi lamha na ho Unke bin
Ye hai meri abhilaasha
Yahee toh hai asal sukh kee paribhasha.

Kyunki duniyavi sukh dukh toh aate jaate rahenge
Par Guruji ke saanidhya mein jo bhi mere aansoo bahenge
Ve Guruji kee kripa se karenge mera pavitrikaran
Guruji Apni mehar se karenge mere paapon ka haran.

Karna chaahoon toh bhi nahin kar sakti Guruji ke kiye upkaaron kee gintee
Guruji se mujh nacheez kee hai ye vinamr vintee
Ki Ve banaaye rakhein saari sangat par Apni mehar
Unhee kee mehar se hai har din, har pal, har peher.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Mere Paalanhaare (11/06/2025)