Author: dhirjabhat

November 4, 2023

Om Namaha Shivaya
Aaj Ka Suvichaar 🙏🏻🙏🏻

#2085

Saral, Sukhad, Aap Sarvshaktimaan

Saral, sukhad, Aap sarvshaktimaan
Kaaran karta, karein kalyaan
Dukh bhanjan, amrit kee khan
Bhole Hain Aap Bholenath Bhagwaan.

Aap Hain murshid meharbaan
Lete Hain bhakton ka imtehaan
Dete Hain himmat uss dauran
Taaki bhakt seh paaye har tufaan.

Aap Hain Vaidyanath vidvaan
Bachaate Hain anginat bhakton kee jaan
Kitnon ko dete Hain deerghaayu ka vardaan
Sainkdon ko karte Hain aarogyata pradaan.

Aap Hain mata aur pita mahaan
Saari sangat Hai Aapki santaan
Koi santaan naadaan, koi anjaan
Kintu sabhi Aapka aanchal paakar bhaagyawaan.

Aap Hain pooran Guruvar karunanidhaan
Dein Apne anokhe dhangg se goodh gyan
Poori karaate Hain andhere se roshni kee ruhaani dastaan
Shishya ko dete Hain shuddhi aur buddhi ka daan.

Aap Hain Mahapurush, prataapi, pradhaan
Aap barkaraar rakhte Hain bhakton ka swaabhimaan
Aap nasht karte Hain baaki vikaaron sangg abhimaan
Param poojya Guruji, jaisa Aap chaahein, banaa deejiye mujhe vaisa insaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saral, Sukhad, Aap Sarvshaktimaan (11/04/2023)

November 3, 2023

Om Namaha Shivaya
Aaj Ka Suvichaar 🙏🏻🙏🏻

#2084

    Beshak Guruji Na Aayein Nazar

Tumhe beshak Guruji na aayein nazar
Jabb kaheen na dikhe sukoon kee sehar
Unkee maujoodagi kee shaayad tumhe na ho khabar
Toh bhi baras rahi hoti hai Unkee mehar.

Uss samay bhi tum par hoti hai Guruji kee nazar
Uss samay bhi Unkee kripa ka hi raha hota hai asar
Tumhe maalum nahin hota magar
Aur tumhe lagta ki nahin hui Unkee nadar.

Jeevan ke safar se ho ya na ho waakif
Safar mein utaar chadhaav aane hai swaabhaavik
Guruji ka prataap hai paawan aur daivik
Ve hee Hain tumhaare jeevan kee naiya ke naavik.

Har kisee ko pichhle karmon ka hisaab hai chukaana
Phir chaahe vo ho koi raja ya koi fakir deewaana
Namumkin hai Guruji kee adalat mein peshi ka samaa na aana
Kintu rakho tasalli ki Guruji kee sharan mein mila hai tumhe thikaana.

Tum sukh mein na itraana
Aur dukh mein na ghabraana
Har haalaat mein milega Unkee kripa ka khazaana
Karte chalo tum buss Guruji ka shukrana.

Shukrana mein hai tasalli
Shukrana mein hai ashirwaad aparampaar
Shukrana mein hai santushti
Shukrana se prasann hotey Hain Guru sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Beshak Guruji Na Aayein Nazar (11/03/2023)

November 2, 2023

Om Namaha Shivaya
Aaj Ka Suvichaar 🙏🏻🙏🏻

#2083

 Jinkee Preet Mein Chalakti Hai Mamta

Jinkee preet mein chalakti hai mamta
Jinkee mamta mein har bhakt hai ramta
Jinka simran aur dhyan pradaan karey mann ko samta
Jinke paas lekha dobara likhne kee hai kshamta
Ve Hain param poojya Guruji pyaare
Jinhonei sada Apne bhakton ke kaaj Hain sanvaare.

Jinke aagey sabhi devi devta karein naman
Jinke hukm par apna sees jhukaaye gagan
Jinkee sharan mein tarr jaata hai jeevan
Jinkee marzi se badal sakta hai janam maran
Ve Hain Guruji mahaan meharbaan
Jo Hain komal karuna kee khan.

Jinkee ibadat hai kalyaankaari
Jinkee inaayat hai mangalkaari
Jinkee hifazat se khiltee hai kismat kee kyaari
Jinkee hidaayat sada hoti hai hitkaari
Ve Hain Guruvar Brahmand ke Shehenshaah
Jo ujjwal karein har bhakt kee raah.

Jinkee har leela hai lajavaab
Jinkee bakhshish hai behisaab
Jinke samaksh saari sangat hai benakaab
Jinka poori srishti mein hai sabse ooncha khitaab
Ve Hain Shiv avatari Guruji Sarkar
Jo karte Hain bhakton ka beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jinkee Preet Mein Chalakti Hai Mamta (11/02/2023)

November 1, 2023

Om Namaha Shivaya
Aaj Ka Suvichaar 🙏🏻🙏🏻

#2082

Chaand Ka Soumya Roop

Chaand ka soumya roop
Beshak hai anoop
Kintu sada dikhta nahin
Kyunki jabb aati hai dhoop
Ya jabb parda bann kar aate hain baadal
Toh chaand ho jaata hai ojhal.

Aur Shukla paksh Krishna Paksh ka niyam
Chaand ko karna padta hai qubool
Kyunki Puraanon ke anusaar
Uss se hui thi bhool.

Chaand Shivji ke charnon mein jhukaaye sees
Chaand maange Unn kshama daata se bakhshish
Karte huey Chaand ka kalyaan Ve uskee fikr lein har
Aur usey ashish dein Apne sir par usey dhaaran kar.

Chandrashekhar Shiv roopi Hain Guruji Maharaj
Jinka roop soumya hai aaj
Kal bhi thaa, aur sada rahega
Divyata kee kalyaankaari kahaani kahega.

Koi bhi paksh ho, chaahe ho din ya raat
Dhoop ho ya hon baadal, ya phir ho barsaat
Guruji ke roop ka noor rehta hai barkaraar
Aur bhakton ko ashirwaad deta hai baarambaar.

Kyunki yahaan tann kee aankhon se zyada
Mann kee aankhein karti hain kaam
Guruji ke chintan mein mastt rehkar
Lete huey Unka paawan naam.

Aur aankhein mann kee hon ya tann kee
Jhalak umr bhar kee ho ya ek kshan kee
Guruji kee mehar bin nahin hai mumkin
Chaahe hum mehnat kar lein raat aur din.

Guruji kee mehar se bada nahin koi daan
Veh milta rahe toh bhakt rahein dhanwaan
Unhee kee mehar se japp paayein hum Unka naam
Unkee mehar se antas mein Unka roop basaa rahe subah aur shaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chaand Ka Soumya Roop (11/01/2023)

October 31, 2023

Om Namaha Shivaya
Aaj Ka Suvichaar 🙏🏻🙏🏻

#2081

         Aapke Jaisa Koi Na Dooja

Param poojya Guruvar,

Aap ucch se bhi ucch
Mai tuchh se bhi tuchh
Aap sarvagyani
Mujhe gyan nahin kuch.

Aap hee Guru
Aap hee Bhagwaan
Aap hee Mrid
Aap meet meharbaan.

Aap hee Rabb
Aap mein sabb
Aap dhairya waan
Aap karuna nidhaan.

Aap preet paawan
Aap daya ka daaman
Aap amrit ke punj
Aap kalyaan ke kunj.

Aap sarv vardaata
Aap hee dhanwaan
Aap Hain vidhaata
Aap hee balvaan.

Aap hee Shivtattva
Aap har tattva ke gyata
Aapka mahaan mahatva
Aap pita aur mata.

Aap pujari kee prerna
Aap swayam Hain pooja
Aap chitt kee chetna
Aapke jaisa koi na dooja.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Jaisa Koi Na Dooja (10/31/2023)

October 30, 2023

Om Namaha Shivaya
Aaj Ka Suvichaar 🙏🏻🙏🏻

#2080

Unhee Ke Paropkaar Se

Gaati chaloon Guruji kee mahima ka geet
Badhaati chaloon Guruji se mai preet
Guruji kee ibadat se
Unhee kee inaayat se.

Dil mein basaakar Guruji ka naam
Guruji ka chintan karoon subah aur shaam
Guruji kee izaazat se
Unhee kee inaayat se.

Guruji ke dikhaaye path par chalti jaaoon
Guruji ko har pal rijhaaoon
Guruji kee hidaayat se
Unhee kee inaayat se.

Guruji ke prem mein rahoon mastt
Guruji ke simran mein rahoon vyast
Guruji kee bakhshish se
Unhee ke ashish se.

Guruji par mera bharosa rahe atoot
Chaahe baaki sab jaaye chhoot
Guruji ke gurutva se
Unhee ke prabhutva se.

Guruji kee sharan mein sada ho mera janam maran
Guruji ke charan mein kat jaayein har janam ke karam
Guruji kee guruyaayee se
Unhee kee vadiyaayee se.

Guruji se meri har saans ho shuru
Guruji par aakhiri saans ho khatm
Guruji ke pyaar se
Unhee ke paropkaar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unhee Ke Paropkaar Se (10/30/2023)

October 29, 2023

Om Namaha Shivaya
Aaj Ka Suvichaar 🙏🏻🙏🏻

#2079

                        Sab Kuch

Aasan sajaaoon, sajaaoon darbar
Aavaahan karoon taaki aayein Guru sarkar
Apne bhaav ko shuddh karoon Unke paawan naam se
Unke aane se mai toh jud jaaoon Kailas dham se.

Jalaa kar jyot apne mann kee baati se
Mai baatein karoon Guruji mein basey apne saathi se
Ekatrit kar ke suman apne haath se
Arpit karoon charnon mein mere Guru nath ke.

Unkee agya se Unke paaon dabaaoon mai bahut dhyan se
Mann hee mann saath saath baatein karoon Unn Bhagwaan se
Unke kehne par satsang sunaaoon mai shuru se
Shukrana mein sees jhukaaoon aagey apne Guru ke.

Jinkee mehar se gyan aur dhyan baney mere liye aakarshak
Ve Guruji baney Hain mere shubh shikshak
Mere jeevan kee gaadi ke sanchaalak
Guruji Hain mere pratipaalak.

Mai beshak na jaanoon apni soch, kintu Guruji toh Hain antaryami
Khushnaseeb hoon ki meri raksha karte Hain sansaar ke swaami
Jaana aur maana hai mainey swayam ko bilkul tuchh
Aur jaana aur maana hai ki Guruji Hain mere sab kuch.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Kuch (10/29/2023)

October 28, 2023

Om Namaha Shivaya
Aaj Ka Suvichaar 🙏🏻🙏🏻

#2078

Bhakt Ke Jeevan Kee Kishti

Sooraj kee kiranein hoti hain kayi hazaar
Lekin unse kaheen zyada ujjwal hai mere Guruji ka pyaar
Na jaane meri rooh ne kitne janam kiya hoga intazaar
Paane ke liye Guruji ka ye taaranhaari pyaar ka deedar.

Zindagi mein bante aur toot-tein hain rishte anek
Lekin Guruji ke sangg hai jo rishta, vo hai anokha ek
Guruji kee nazar mein har pal hota hai bhakt pratyek
Guruji sabko dekhte Hain chaahe bhakt Unhe na bhi paaye dekh.

Duniya mein anginat phool hain aur sabki bhinn bhinn hai khushboo
Lekin kisee aur mehak se itnee prasann nahin hoti hai rooh
Jitnee prasann veh hoti hai jabb Guruji kee khushboo usey leti hai chhoo
Phir veh rooh chaahe ho aasmaan mein ya uska nivaas ho ye bhoo.

Itne maargdarshak milte hain jeevan ke safar mein
Kintu Guruji ke jaise koi dooja nahin jo har kadam par madad karey basar mein
Itna hitkaari gyan, sneh, haunsala hai Guruji ke ashirwaad ke asar mein
Ki nissandeh har bhakt ka mangal basaa hai Guruji kee mehar-e-nadar mein.

Sookhe mein baarish se kabhi kabhi tript hoti hai srishti
Kintu sada jeevan daayi hoti hai Guruji ke naam ke amrit kee vrishti
Bhalaa hota hai uska jis par padti hai Guruji kee drishti
Guruji kalyaan ke kinaare par pahunchaate Hain Apne har bhakt ke jeevan kee kishti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakt Ke Jeevan Kee Kishti (10/28/2023)

October 27, 2023

Om Namaha Shivaya
Aaj Ka Suvichaar 🙏🏻🙏🏻

#2077

Apne Kamal Charan Ke Paas

Phailaakar Aapke charnon mein
Apne antas kee jholi
Param poojya pyaare Guruji
Mai toh Aapki ho li.

Meri jholi hai Aapke samaksh
Jo Aapki marzi vo Aap deejiye bakhsh
Usey shukrana sangg na kiya qubool toh veh hogi meri bhool
Meri toh itnee aukat bhi nahin ki bann paaoon Aapke charnon kee dhool.

Aapki hui mai jabb se
Jeevan badal gaya tabb se
Aapki raza maangoon har kaam mein
Anand miley Aapke paawan naam mein.

Aapke sangg hai jo naata
Uskee badaulat mann adbhut sukoon hai paata
Ekant mein akelapann nahin hai hota
Kyunki antas Aapke chintan mein hai khota.

Ajeeb sa lagta hai soch kar
Ki Aapse judne se pehle kaise chalta thaa safar
Phir hansi aati hai apni naadaani par
Ki mai na jaanoon kab kis janam mein aayi mai Aapke dar.

Pichhle janmon ka toh nahin pata
Kintu is nacheez kee Aapse hai ardaas
Ki aane wale har janam mein, daata
Mujhe rakhiyega Apne kamal charan ke paas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apne Kamal Charan Ke Paas (10/27/2023)

October 26, 2023

Om Namaha Shivaya
Aaj Ka Suvichaar 🙏🏻🙏🏻

#2076

               Teri Jindri Nimaani

Toot jaayegi har zanjeer
Sajj sanvar jaayegi teri taqdeer
Basaa le mann mein Guruji kee tasveer
Ve Hain tere prerak, pita, aur tere peer.

Kar tu Unse ardaas
Ki Ve pavitra karein tere shwaas
Aur karein tere antas mein vaas
Banaa kar tujhe Apna deen das.

Aur phir tu Unmein rehna leen
Bannkar neevan aur deen
Jo sadgun tujh mein hoga ksheen
Guruji usmein se kamzori lenge chheen.

Guruji tujhe banaayenge sadgunon kee khan
Tu kabhi na bhoolna ki ye hoga Unka diya daan
Isliye mann mein kabhi na aane dena abhimaan
Aur karte chalna Guruji kee mahima ka gungaan.

Kyunki Guruji kee mahima ke gungaan se bada nahin hai koi paath
Tu Unka chintan aur paath karta chal din raat
Guruji ko zaroorat nahin suboot dene kee ki Ve Hain tere saath
Kintu tu dolega toh Unka naam roop thaam lega tera haath.

Hoti jaayegi tujh par Guruji kee meharbaani
Unpar ekaagra hokar beetne lagegi teri zindagaani
Unkee kripa kee khan se kalyaan krit hogi teri kahaani
Guruji kee deewani ho jaayegi teri jindri nimaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Teri Jindri Nimaani (10/26/2023)