Subah hoti hai har roz aur har roz aati hai shaam Har din beet raha hai lete huey Guruji ka naam Har din ke har pehar mein hai Guruji ka ye paigaam Ki Unkee raza mein razi rehne se hota rahega kalyaan.
Guruji jaante Hain sab kuch, aur hum kuch bhi na jaanein Guruji aaye bashar bannkar kalyuga ke kop se hamein bachaane Hamaare jeevan mein aglaa pal kya laayega, hamein toh yeh bhi gyat nahin Lekin Guruji ko jo maalum na ho, aisee toh koi bhi baat nahin.
Aaj kaun yahaan hai galat, kaun sahi Kal kaun yahaan hoga, kaun nahin Insaaniyat kee ye kahaani Guruji ne kahi Unkee mehar se saanson kee dhaara har praani mein bahi.
Din shuru honei par Unka shukrana Aur Shukrana Unka jab ho shaam Har shwaas ko miley aaraam Jabb usmein sanjoya ho Guruji ka naam.
Har bhakt ho jaata hai Guruji ka deewana Unka naam hai kaayinaat ka sabse anmol khazaana Yoon hee toh isey nahin kehte hain dukh bhanjan Har koi sukhi ho jaata hai paakar yeh dhan.
Jitna simrenge is naam ko hum Utna hee gumm hota jaayega kumm Kitnon ka ho gaya Guruji ke naam se kalyaan Yahee naam pahunchaayega hamein sachkhand ke dhaam.
Buss, koshish rakhni hogi jaari Chaahe peeda ho badi aur bhaari Guruji kara rahe Hain tayyaari Isliye zaroor aayegi sabki baari.
Har faasla mitt jaayega Dekhna, dil sukoon paayega Jabb deedar ka veh vela aayega Aur hamaara astitva Unmein samaayega.
Bhakt aur Guru ke beech ka dvait ho jaayega khatm Hamesha hamesha ke liye Rooh divyata mein samaakar ho jaayegi magn Jal jaayenge milan ke noorani deeye.
Rooh se rooh ka rishta hai Isliye mila hai tumhe Guruji ka saath Yeh rishta kewal is janam ka nahin Ye toh hai kayee janmon kee baat.
Jis bhi janam mein tumhe Guruji ne thaa apnaaya Tabb se lekar abb takk Unhonei yakeenan saath hai nibhaaya Tumhe yaad nahin hai kuch, is mein koi galati tumhaari nahin hai Guruji kee leela hai ye saari, aur tumhaare kalyaan ke liye yahee sahi hai.
Har janam mein Guruji ne kiya hai tumhaara uddhaar Har janam mein Unhonei diya hai tumhe taar Lekin har janam mein tum ekatrit karte rehte ho aur karam Aur unka bhugtaan karna bhi hai tumhaara hee dharam.
Kaun thei tum apne pichhle janmon mein Aur kaun hogei tum chalkar aagey Tumhe shaayad na maalum ho, lekin Guruji ko sabb hai pataa Kyunki Unke saath bandhe hain tumhaare bhakti bhare prem ke dhaagey.
Ye dhaagey bahut mazboot hain Ye kabhi bhi na tootenge Ye bandhan hain janmon janmon ke Ye beech mein nahin chhootenge.
Kyunki Guruji ke haathon mein hai divya bal Isee bal ke bal par hee hai in dhaagon mein itna bal Kaayinaat kee koi bhi taakat is bal ke aagey hai kamzor Aur Guruji ke jaisa ruhaani murshid na milega koi aur.
Isliye karte huey is rooh se rooh ke rishte ka sammaan Sunte aur samajhte chalo janmon se chale aa rahe is rishte ka paigaam Guruji kee ibadat mein rehne do apni rooh ko magan Badhaa lo rooh se rooh ke is rishte kee gehraayee mein lagan.
Isee rishte kee gehraayee mein param sukh kar raha hai tumhaara intazaar Har janam mein jo sukh na mil paayaa, uss sukh ko apnaa lo abb kee baar Isee sukh ko paakar tumhaari rooh ko milega karaar Isee sukh kee talash mein bekaraar hai yeh saara sansaar.
Guruji, mere maanjhi, Aap hee Hain mera sahara Aapki hee madad se mujhe mil paayega kinaara Kalyuga ke tufaan mein dol rahi hai mere jeevan kee naav Kewal Aap hee samajh sakte Hain mere mann ka bhaav.
Naav pehchaan rahi hai saagar kee lehron ka dhangg Dikh raha hai aasmaan ka badalta hua rangg Aandhi zoron se chal rahi hai Bijlee bhi chamak rahi hai Garaj rahe hain akash mein baadal Ashruon ke sangg behta ja raha hai meri aankhon ka kaajal.
Naav hai sankat mein Kaise pahunchegi ye tat pe Ghaav aur gehra na ho jaaye Ye soch kar mera dil ghabraaye Aap hee hal nikaaliye Aap hee sab kuch sambhaaliye.
Aap jaisa maanjhi toh kismat waalon ko milta hai Isliye mai daave ke saath kehti hoon ki bahut achchi hai meri kismat Saare devi devta Aapko rijhaane ke liye karte Hain Aapki khidmat Har bhakt ko Aapki rehmat se miltee hai himmat aur sumat.
Himmat, zindagi ke har tufaan ka saamna kar paane kee Sumat, sada apna kartavya nibhaane kee Hamesha nek rahe ravaiya aur shakhsiyat Har soch aur har karam mein achchi rahe meri neeyat.
Aapke prabal haathon mein hai naav kee patvaar Jaanti hoon ki Aap meri vintee karenge sweekar Meri naav ko tufaan ke bavajood Aap lekar jaayenge uss paar Ye ummeed hee nahin, mera vishwaas hai, ki Aap kabhi na karenge inkaar.
Aapki mehar se naav pahunchegi kinaare par Aas lagaaye baithi hoon Aapke divya sahaare par Aap par nirbhar hai mere safar ka parinaam Aap Guruji ke roop mein Hain MahaShiv Bhagwaan.
Mere meharbaan Maalik, mere Khuda Kabhi bhi na karna mujhe Apne se juda Mera har shwaas Aapki rehmat ka mohtaaj hai Aapki divya abha se hee toh mere jeevan mein prakash hai.
Aap mere Guruji honei ke saath saath Hain meri mata aur mere nath Meet aur bhrata bhi maana hai Aapko Maarg darshak bhi jaana hai Aapko.
Jinka shukr karte huey hota hai mera har din shuru Aap hee Hain ve Bhagwaan aur pooran Guru Jinhe dhanyawaad karte huey hoti hai har din ke baad raat Aap hee Hain Ve mere Guru Deenanath.
Aapne jab se sambhaala hai Tabb se badhaa hai atma-vishwaas Jabb se Aapne kashton ko taala hai Tabb se hua hai raahat ka ehsaas.
Sab kuch choda hai jabb se Aap par Tabb se duur ho gaya hai har darr Aankhein khuli hon ya hon bandd Dikhta hai buss Aapka dar.
Bin vajeh ke muskuraati hoon kayee baar Dekh kar mann mandir mein Aapka darbar Ho gaya hai Aapse behad pyaar Aur kisee ka nahin hai abb intazaar.
Kyunki Aapse hee safar hai Aur Aap hee Hain manzil Aapko paane kee tamanna hai Chaahe mai hoon nahin is kaabil.
Lekin Aapki mehar se namumkin bhi mumkin ho jaata hai Aapki kripa se har bhakt tarr jaata hai Mai thehri nimani Aur hoon bilkul agyaani Aap Hain antaryaami Is poori srishti ke swaami
Yeh sach hai ki koi aukat nahin hai meri Phir bhi ye arzi karne mein na karoongi mai deri Ki mujhe rakhna sada ke liye Aap Apni sharan mein Kyunki veh sukh aur kaheen nahin jo milta hai Aapke kamal charan mein.
Chitt se jaagrit honei ko bol do Anta-karan ke chakshu khol do Rona bhi aaye toh ro lo Lekin abb apne paapon ko dh lo.
Abb na inhe dhoya toh ye badhte jaayenge Tumhaare mann mein basey devta se ye ladte jaayenge Ye mann mein basey daanav ko dost banaayenge Aur mann ko galat raaste par aagey badhaayenge.
Maanav ke mann mein daanav ho Yeh toh uchit nahin hai Isliye mann ko maanavta ke path par laana Yahee upaay sahi hai.
Guruji ko tum yaad karo Unhee se hee fariyaad karo Mann ko Unkee maujoodagi se aabaad karo Aur mann ko vikaaron aur paapon ke paash se azad karo.
Jaise jaise mann karega Gurbani ka simran Vaise vaise hota chalega bheetari pavitrikaran Jaise jaise simran se jaaoge dhyan mein Guruji kee mehar se badhauti hogi gyan mein.
Gyan vo, jo chetna kee oar le jaayega Gyan vo, jo tumhe tarne mein madad kar paayega Guruji ka ashirwaad har kadam par tumhe sudhaarega Aur tumhaare aane waale janmon kee bhi kismat sanvaarega.
Kyunki Guruji ka saath hai anant Ve tumhare har janam mein hongei Bhagwant Unkee kripa se ek din tumhaare karmon ka ho jaayega poora bhugtaan Aur mukti kee manzil par pahunch kar mukammal hogi tumhaare janam-maran kee dastaan.
Is shubh kaam ke liye parishram karna aaj hee kar lo shuru Tumhaari poorna sahaayata karne ke liye tumhaare sangg Hain tumhaare Guru Aaj rona aa raha hai toh koi baat nahin, kyunki kal tum muskuraa paaoge Aur Guruji ke achche bachche bannkar Unke dikhaaye raaste par tum jaaoge.
Guruji kee sharan mein tumhaara basera hai Vaheen par tumhaari intazaar karta hua savera hai Na daro, balki taro Abb is kaam mein aur der na karo.
Khushi ka hai jo ye humsafar Veh chaahe hamesha na ho khushi par nirbhar Lekin khushi par zaroor hota hai uska asar Aur jeevan jeena aasaan ho jaata hai jabb veh dil mein karta hai basar.
Kaun hai veh anmol humsafar? Yeh socho toh zara… Kaun hai vo, jo hai khushi se bhi bada? Haan, tumne bilkul sahi pehchaana Uss hum safar ka naam hai ‘Shukrana.’
Shukrana jaisa humsafar jo mil jaaye Toh khushi ho jaati hai kayi guna zyada Aur khushi ke aaye bina jo dil Shukrana ka geet gaaye Toh gumm duur chale jaane ka nibhaata hai vaada.
Shukrana ka itna rajasi hai prataap Ki bin chhuey hee khatm ho jaate hain kayi santaap Shukrana se veh taarne wala phool dil mein khilta hai Jiskee khushboo se har kasht kumm hokar milta hai.
Kyunki Guruji utha lete Hain sab kashton ka adhiktar bhaar Taaki Unka bhakt ho apne karmon kee yatra mein kumm se kumm laachaar Chaahe ho veh kaisi bhi mushkil ya phir koi beemaari Guruji ke paas bhakt ke uddhaar ke liye vyavastha hai saari.
Shukrana na bhi karey bhakt Toh bhi Guruji Apni divyata ka ashirwaad barsaayenge Lekin jo bhakt Unka Shukrana karega Uss se Ve aur bhi zyada prasann ho jaayenge.
Aur Guruji ko prasann karne se adhik aawashyak kuch bhi nahin Jeevan ko khushhaal banaa degi khush-khabri yahi Guruji ne toh kalyaan karna hai, Ve toh karenge vahi Isliye bhakt ke liye Shukrana ko humsafar banaana hai upaay sahi.
Guruji har bhakt ka dhyan rakhte Hain bann kar nirmal nath Nath ko hum Shukrana kee shraddhaanjali arpit karein, yaad rakhte huey apni aukat Bina vilamb ke thaam lein hum Shukrana ka haath Aur kabhi na chodein is neeven humsafar ka salona saath.
Rooh ko chhoo leta hai veh hawa ka jhonka Jo Guruji ka pyaar laata hai Aur rooh ko chhoo lene ke baad Veh rooh mein bass jaata hai.
Na zamaane ka shor, na kuch aur Uss pyaar kee pavitrata ko khandit kar paata hai Kyunki uss paawan pyaar mein Guruji ka ashirwaad samaata hai.
Rooh kee Guruji se baat hoti hai Seedhi taar se Guruji se mulaakaat hoti hai Is mulaakaat mein jo daat hoti hai Veh Unn lamhon ko milee hui saugat hoti hai.
Kaash aise lamhe aate rahein baar baar Kaash hawaa ke jhonke aate rahein bann kar bahaar Milta rahe yoon Guruji ka paawan pyaar Aur mithaas se bharta rahe rooh ka intazaar.
Intazaar, rooh ke milan ka, Milan, Unn Shehenshah se Shehenshah Kaayinaat ke Racheta har din aur har raat ke.
Kaayinaat ke shehenshah Guruji pyaare Jinkee inaayat se huey rooh ke vaare nyaare Diya Unhonei Apna paawan pyaar Diya hai Apne se milan ka intazaar.
Shraddha hai is intazaar ka prasang Sabr rakhna hai shraddha ke sangg Guruji ko pasand hai aisa dhangg Kyunki inse chadhta hai rooh par Unka noor-e-rangg.
Rooh par jo chadh jaayega Guruji ka noor-e-rangg Toh rooh mein vaas karne lagegi ek umda umang Rooh kee divya deewanagi kar degi har fikr ko bhangg Aur har pal rooh rehne lagegi Guruji ke pyaar mein malang.
Insaan ne har din ke sooraj ko dhalte dekha Usne mausam ko bhi badalte dekha Mausam ne apne se bhi jaldi insaan ko badalte dekha Ekant chodkar bheed mein usey chalte dekha.
Ekant ko galati se samajh liya hum insaanon ne akelapann Aur kiya vahee jo chaahta thaa mann Mann ko swami banaa liya aur khud bann gaye uske das Utna hee Guruji se duur hotei gaye jitna hona chahiye Unke paas.
Chalo, koi baat nahin, ho jaati hai naadaani aksar Kaafi samaa vyarth gaya, lekin abhi bhi hai avsar Guruji ke naam se judne ka Bhautik trishna se mudne ka
Avsar, jhaankne ka swayam ke bheetar Guruji kee kripa se mitaa dene ka mann se darr Darr iska, ki loag kya kahenge Darr iska, ki kaise akele rahenge
Kyunki jabb Guruji ne sweekaar liya hai Toh Unhonei uphaar mein Apna sanatan saath diya hai Isliye akele rehne ka uthta hee nahin hai sawaal Aur abb se kewal Guruji ko sunaana apna haal.
Ye nahin ki Ve jaante nahin Lekin zaroori hai apne mann ko halka karna Aur yeh bhi satya hai ki koi aur kaam na aayega antt mein Isliye kisliye duniya se hai darna?
Baat uljhi hui nahin hai, balki saaf hai Buss, mann ko suljhaa kar karna azad hai Ekant ke simran aur dhyan se Nidhidhyaasan aur anubhav gyan se.
Waqt beet-ta jaayega Mausam bhi phir badal jaayega Hum mein se har koi agar sahi koshish kar paayega Toh parivartan achchi disha mein jaayega.
Guruji humse khush hongei aur is se badi koi saugat nahin Kyunki dekha jaaye toh hum sabki aisee koi aukat nahin Phir bhi jo Maalik ne apnaaya hai Itne prem se hamein apna banaaya hai Hamein Apne ashish ka kavach pehnaaya hai Toh bhi kyun hamein abb takk samajh nahin aaya hai?
Kyun na abb bhi prayaas karein Ekant mein vaas ka thoda toh abhyaas karein Taaki Guruji se judi seedhi taar mein behte spandan kee oorja badh jaaye Taaki mann ke bheetar kee veh anokhi si pyaas bujh jaaye.
Guruji ke naam ke amrit mein hai shakti Uss pyaas ko bujhaane kee Ekant mein tasalli se milenge mauke Guru aur bhakt ke aapas kee baatein sunn-ne aur sunaane kee.
Ek naya ullaas, ek nayi chetna Ek naya samjhauta, ek nayi prerna Ek nayi anubhooti, ek naya ehsaas Ek naya uddeshya, ek naya vishwaas.
In sabke sahaare badalein swayam ko Ek sudhari hui paribhasha dein hum dharam ko Kshama daan dekar aur kshama maang kar suljhaa lein apne karam ko Guruji kee kripa se har ghaav par lagaa lein ekant ke marham ko.
Dekhna, har ghaav bhar jaayega Yeh mann bhi tarr jaayega Mann se har darr jaayega Aur mann Har ko paayega.
Mann ke bheetar hee hai moksh ka dwaar Phir bhi na jaane kahaan chala jaa raha hai sansaar Mann mein hai veh shakti jo lagaayegi beda paar Phir bhi mann ko vash mein karne ka na jaane kyun aata nahin vichaar.
Guruji kahein ki karein hum pyaar bina aasakti ke Taaki badhaayein na aayein raaste mein bhakti kee shakti ke Aasakti rakhein Guruji mein basey Bhagwaan se Aur anugrihit ho jaayein Unke kiye kalyaan se.
Shareer ne saadhan bann kar kiya hai ant-karan aur atma ko basaane ka intazaam Isliye japte huey Guruji ka naam subah aur shaam Hum apne mann-mandir mein dhoondhein veh paawan dham Jahaan se dwaar khulega sunaakar moksh ka paigaam.
Ho sakta hai ki ye na ho mumkin is janam mein Lekin oordhvagati kee oar hum karte rahein prayaas Jis adhyatmik mukaam par hamaare praan niklenge tann se Usee mukaam par agley janam ka shareer ruhaani yatra praarambh karaayega mann se.
Isliye yaad rahe ki hota rahe nirantar prayaas Moksh ke dwaar takk jaane kee oar Uss bhakt ke liye yeh kathin nahin Jiske jeevan kee Guruji ne thaami hai doar.
Isliye Guruji ke naam ka karte huey simran Guruji ke ashish se pavitra karte rahein hum apna mann Simran dwaara bheetar jaane ka raasta bantaa jaayega Aur raaste ke dwaara dwaar nazar aa paayega.
Mann mein simran chalta rahega jo baarambaar Toh mann ko simran karne se ho jaayega pyaar Guruji kee kripa se kabhi toh mukhtasar hoga intazaar Khul jaayega mann ke bheetar ke moksh ka dwaar Aur Apni goad mein sada ke liye le lenge Parwardigaar.
Aye gagan, Kaunsa hai tera vatan? Is paar ya uss paar Kya toone kabhi kiya hai vichaar?
Aye hawaa, Tu rehti hai kis se khafa? Is kalyuga ke vesh mein Kaun hai tujhse dvesh mein?
Aye neer, Tujh mein dikhtee hai kiskee tasveer? Tera bahaav kis oar hai Is ultee ganga ke daur mein?
Aye dharti, Tu kiske paap hai harti? Itne varshon se toone kis kis se kaha Jo bojh toone kabb se hai sahaa?
Aye agni, Sabke vikaaron ko kabb jalaayegi? Kyun tujhse aaj ka insaan nahin darta Jabb kee tera tej sabko bhasm hai karta?
Aye prakriti, tumhe naman hai Insaanon ne tumhaare saath bura vyavhaar kiya hai Phir bhi tumne anyaay sehte sehte apna farz kiya adaa Aur hum insaanon ne na suni tumhaari dard bhari sada.
Maanav ne le liya daanav ka roop Apne kabze mein karni chaahi chhaaon aur dhoop Maanav ne pradooshit kiya vayu, jal, mitti, aur akash Aur swarth, avidya, bhautikvaad ke andhere se mitne lagaa saralta ka niswaarth prakash.
Phir bhi maanav ruka nahin Divyata ke aagey jhuka nahin Machhliyon kee atyadhik pakad, pashu pakshiyon ko maara jaana Apne bhojan aur apni khudagarzi ke liye inke prayog ko maanav ne uchit maana!!
Prakriti ke baaki sab praani Hamaari maanav jaati se aatankit ho gaye Lekin ve kuch keh na sakey Aur zulm sehte sehte sankatgrast aur vilupt ho gaye.
Pyaari prakriti, humne aapko vivash kar ke badal hee diya aapka chehra Phir bhi aap aaj takk deti hain hamaari suraksha ke liye pehra Itne neech, itne kudgaraz hain hamaare khayaal Lekin aapka badappan dekhiye, aapne kabhi na kiya humse koi sawaal.
Honi hee thee hamein yeh laachaari Honi hee thee yeh mahaamaari Vikaaron, paapon, khudagarazi aur kudgarazi- ye sab toh hain beemari Hum maanav beemar huey, ye saari galati hai hamaari.
Kaam, krodh, lobh, moh, matsar, aur ahankar Irshya, jhooth, nasha, kusangat, shadyantra, aur vyabhichaar Hum in sab mein ulajhte gaye aise Maano inse hum sulajhte gaye hon jaise.
Kshamaa kar deejiye hum sab sansaar waalon ko, poojya prakriti Humne apne swaarth ke liye bigaad dee aapki aakriti Kaash hum sab de dein apne gunaahon kee sweekriti Taaki hamaari is sweekriti se prasann hokar laut aaye aapki sukriti.
Phir yeh dharti, agni, aur hawa Yeh neer aur gagan Yeh poori kaayinaat Aur har insaan ka vatan Sabka saamanjasya phir se khilne lagg jaayega Aur aapke har hissey ko apna haq milne lagg jaayega.
Guruji ko pyaar karte hain agar hum sab Toh hamein aap prakriti ko hoga sanvaarna Kyunki hamaara hee kukarma thaa aapko bigaadna Aapko haani pahunchaakar kaise phalegi sadhna?
Guruji kee rachna hain aap Hum insaanon kee vajeh se jhel rahi hain aap santaap Maanav se hota raha itna paap Yeh kalyuga mein jaise hai ek shraap.
Niswaarth karo sewa, Guruji ne kaha Lekin kisee virle ko hee ye yaad raha Maango nahin, maano, Guruji ne samjhaaya Lekin hum bhakton ne farmaishon ko sunaaya.
Shukrana kitta karo, Guruji ne bataaya Aur humne naakhush hokar gila shikwa jataaya Jis samay aur bhi zyada lena chahiye thaa Guruji ka naam Hum karte rahe laalach ke hetu apni chaahaton ka intazaam.
Bande bano, Guruji ka hai aadesh Lekin humne ghaayal kiya har tattva aur har desh Apne swaarth mein yoon huey hum magan Ki zakhmi hui dharti, neer, hawa, agni, aur gagan.
Guruji, hamein maaf karein, yahee hai abb toh arzi Humne apne swaarth ke liye khoob chalayee apni marzi Guruji, Aapki kripa se hum sab jaagrit ho jaayein Aur Aapki mehar-e-nazar se ek baar phir chayyn kee neend so paayein.
Humne jabb se apni karni ka parinaam hai dekha aur jaana Tabb se maana ki hum mujrim hain jo Aapka kaha nahin maana Vaise toh aise ghor apraadhon kee kshama maangne ka nahin hona chahiye hamein adhikaar Lekin kyunki Aap Hain hamaare meet, nath, murshid, aur taaranhaar Isliye anurodh hai Aapse ki kripa kar sunn leejiye hamaari maayoos pukaar Aur Apni leela se prakriti ke roop ko phir se deejiye nikhaar.
Hum hain karzdaar Hum hain talabgaar Hum hain gunehgaar Aur Aap Hain Parwardigaar.
Aur kuch abb kaha na jaaye Abb yeh drishya aur saha na jaaye Ummeed aur bharosa hai Aapki mehar par Jis se sooraj uday hoga suhaani sehar par.
