Aaj Ka Suvichaar

September 23, 2025

Om Namaha Shivaya
Aaj Ka Suvichaar 🙏🏻🙏🏻

#2774

      Guruji Jaanein…

Guruji jaanein sach aur jhooth tumhaara
Guruji jaanein tumhaara sukh dukh
Har shwaas Guruji ke simran mein karo samarpan
Guruji kee oar karo mann ka rukh.

Na maun se, na ann tyaag se
Buss, antarmann se jaag ke
Dridh karo apna manobal
Varna vishayon ka dal dal
Mann ko phansaane mein maahir hai
Ye sabke jeevan mein zaahir hai.

Manobal se sudharenge tumhaare vichaar
Manobal badhaane se hoga uddhaar
Guruji kee meharbaani se
Unkee tum par nigraani se.

Ye jaan jaaoge tabb
Ki ek Guruji hee Hain sach
Kyunki Ve swayam Hain Rabb
Aur khokhla lagega tumhe baaki sabb.

Yahee hai hakeekat har pal kee
Jo badal degi tumhaari drishti aaj aur kal kee
Yakeen karo apni kabiliyat par
Jispar Guruji ka ho raha hai kripa bhara asar
Tum deen nahin tum ho dhanwaan
Tumhaare angg sangg Hain Guruji karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Jaanein… (09/23/2025)

September 22, 2025

Om Namaha Shivaya
Aaj Ka Suvichaar 🙏🏻🙏🏻

#2773

                     Dhundh Thi Itnee

Dhundh thi itnee
Ki dikh na raha thaa kinaara
Agyanta thi itnee
Ki mehsoos na ho raha thaa sahaara
Jo bin dikhe bhi hota hai sada saath
Haan, Guruji ka ruhaani haath.

Kabhi haath ko thaame huey
Kabhi sir par, dete huey ashirwaad
Kabhi bann kar vo ruhaani khushboo
Jo kar deti hai antas ko aabaad.

Musaafir ne aankhein lee moond
Aur karne lagaa ardaas, ki-

“Aye Srishti ke Shehenshah
Mujhe banaa lo Aap Apna das.
Nahin jhel sakta mai jeevan is tareh
Mujhe ehsaas do ki Aap ho har jageh
Vo shraddha do ki mai kar paaoon Aap par vishwaas
Vo sumat do ki mai sirf Aapke liye hua karoon udaas.
Mere paapon ke parde dhakh do
Mujhe Apni sharan mein rakh lo
Banaa kar sewak Apna
Poora kar do ye sapna.
Apne aap hee theek ho jaayega baaki sabb
Saara kalyaan ho jaayega tabb
Aap swami ho, mere Rabb
Aap jaano kya sahi hai kabb.”

Ardaas karte karte beet gaya bahut samay
Mann kee har baat ko Guruji se kehkar mitne lagey sabhi sanshay
Dhundh hatne lagi, musaafir ko dikhne lagaa kinaara
Agyanta mitne lagi, usey yakeen hua ki Guruji Hain uska sampoorna sahaara.

Musaafir raasta karne lagaa tayy
Na abb sanshay thaa, na koi bhayy
Guruji kee yaad ke samudri jahaaz mein
Leen hokar Guru prem ke andaaz mein
Badhta chala vo kinaare kee oar
Guruji ke naam kee chaadar oadh.

Mehnat hui safal
Mukammal hua safar
Musaafir pahuncha kinaare par
Sab Guruji kee meher ka hee thaa asar.

🌹🌹🌹🌹🌹🌹🌹

Jai Guruji 🙏🙏
Dhirja

Dhundh Thi Itnee (09/22/2025)

September 21, 2025

Om Namaha Shivaya
Aaj Ka Suvichaar 🙏🏻🙏🏻

#2772

 Deedar Hua Seher Se

Gumsum baitha thaa raahi
Poori na hui vo baat jo usne chaahi
Jaanta thaa Guruji kalyaan hee rahein Hain kar
Par yoon baith nahin sakta thaa haath par haath dhar
Bina kiye koi agar magar
Baaki sab se hokar bekhabar
Rakhey Huey manzil par nazar
Raahi chalne lagaa apni dagar
Lete huey har kadam par Guruji ka naam
Guruji ko mann hee mann karte huey salaam.

Guruji se maangta chala saboori aur bharose ka daan
Kehta chala Unse ki usey nahin hai gyan ya pehchaan
Isliye Ve hee usey raasta dikhaayein
Iss raaste par Ve hee usey chalaayein.

Guruji toh jaante thei raahi kee har laachaari
Aur abb aa gayi thi uske kalyaan kee baari
Guruji mauj mein aaye
Raahi par Unhonei ashish barsaaye
Lekar chale usey safalta ke vimaan mein
Raahi mastt raha Guruji aur Unke naam mein
Kabb safar hua khatm, raahi ko na chala pataa
Is se pehle ki veh ye Guruji ko sakta bataa
Guruji ne rakha Apna haath raahi ke sir par
Bataaya usey ki safal hua uska safar
Raahi gir pada Guruji ke charan mein
Aisa pal na aaya thaa pehle kabhi bhi jeevan mein
Raahi ko raah bhi milee aur manzil bhi, Guruji kee meher se
Raat beshak lambi thi, par Guru kripa se deedar hua seher se.

🌹🌹🌹🌹🌹🌹🌹

Jai Guruji 🙏🙏
Dhirja

Deedar Hua Seher Se (09/21/2025)

September 20, 2025

Om Namaha Shivaya
Aaj Ka Suvichaar 🙏🏻🙏🏻

#2771

    Guruji Bulaate Hain Satsang Mein

Guruji bulaate Hain satsang mein
Hamein rangne Apne rangg mein
Hamaare sudhaar ke liye
Hamaare uddhaar ke liye.

Guruji se seedhi taar joadkar
Baaki har soch se muh moadkar
Sadh sangat baithey Guruji ke charan mein
Koi simran ya dhyan mein, koi Guruji ke chintan mein.

Gurbani sunvaate huey
Hamaare karma katvaate huey
Guruji hamaare praarabdh ka bojh kumm karte Hain
Hamaari jholiyan bakhshishon se bharte Hain.

Chai prasad aur langar prasad
Inse milta hai Guruji ka ashirwaad
Aur Unke satsang sunn-ne sunaane se
Unkee mahima ke gunn gaane se
Bhakt Guruji kee vadiyaayee mein khota jaata hai
Unke sangg aur bhi pyaar hota jaata hai.

Guruji kee karuna aur mamta ka
Hota jaata hai aur bhi gehra ehsaas
Guruji kee leela aur guruyaayee ka
Ehsaas hota hai aur bhi khaas.

Guruji ke dwaara mila satsang mein maun rehne ka aadesh
Agya lekar seedha ghar jaane ka seedha sandesh
Iska paalan karna hai sangat kee zimmedari
Guruji kee hee meher kee mohtaaj hain hum sangat saari.

Saari sangat par banee rahe Guruji kee meher
Haunsla na kumm kar paaye kalyuga roopi keher
Guruji kee vadiyaayee kee chhatra-chhaaya mein surakshit rahein sabb
Sangat Guruji kee santaan hai, Guruji hum sabke pita aur Rabb.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Bulaate Hain Satsang Mein (09/20/2025)

September 19, 2025

Om Namaha Shivaya
Aaj Ka Suvichaar 🙏🏻🙏🏻

#2770

             Mann Ke Shivalay Mein

Apne mann ke shivalay mein
Dhoondo toh sahi tum Guruji Maharaj ko
Unkee meharbaaniyon mein koi kamee nahin
Isliye shukrana karo Unn sartaj ko.

Kyunki kamee yakeenan Unn Prabhu mein nahin
Kamee hai hum naadaan insaanon mein
Guruji hee ek apne Hain
Anginat begaanon mein.

Jaanoge jitna baithoge Guruji ke chintan mein
Ki kitna anand hai Unke manan mein
Aur Unkee meharbaaniyon ka hota chalega ehsaas
Jaise jaise Guruji mein leen hotey jaayenge tumhaare shwaas.

Tumhe dikh jaayega vo Kailash
Jo basaa hai tumhaare bheetar
Tumhaare sabhi paap vaheen jhuk jaayenge
Mahadev Guruji ke dar par.

Pavitrikaran hota jaayega antakaran ka
Chaav badhta chalega Guruji ke manan ka
Shuddhikaran hota jaayega har karam ka
Safal honei lagega har pal janam ka.

Mann ke Shivalay mein goonjenge geet Guruji ke gungaan ke
Jalenge sainkdon deep Guruji ke sammaan mein
Guruji viraajmaan rehkar anginat ashirwaad denge kalyaan ke
Tum Unke agyakari sewak bannkar intazaar mein rahoge Unke farmaan ke.

🌹🌹🌹🌹🌹🌹🌹

Jai Guruji 🙏🙏
Dhirja

Mann Ke Shivalay Mein (09/19/2025)

September 18, 2025

Om Namaha Shivaya
Aaj Ka Suvichaar 🙏🏻🙏🏻

#2769

      Itne Dayavaan Hain Mere Sartaj

Guruji Maharaj SadaShiv mahaan
Rutba Unka hai alishaan
Har bhakt hai Unkee santaan
Aur Ve sabke pita karunanidhaan.

Chhipaaye na chhipe Guruji se bhakt ka koi karma ya vichaar
Saari sangat par har pal nazar rakhte Hain Parwardigaar
Bhakt ko milta rahe aaraam
Isliye Guruji kabhi nahin karte vishraam.

Ek pal bhi nahin sotey Hain Guru sarkar
Taaki sangat par Unkee nigraani rahe barkaraar
Bhakton ke kasht kaat-te huey nirantar karte Hain kalyaan
Yoon hee thode hee na sanvar rahi hai sabki dastaan.

Baithey hon Ve beshak kisee ek sthaan par
Ve sarvavyaapi Hain magar
Duniya ke kitne sthaanon par ek hee baar mein dekar darshan
Kar dete Hain Ve gadd gadd sangat ka mann.

Kalyaankaari kirpa dhaari
Mangalkaari paap haari
Leeladhari Hain Guruji Maharaj
Ve toh Hain sartaajon ke bhi sartaaj.

Sambhaali Hain Unhonei poori srishti
Dekar saari srishti ko Apni drishti
Phir bhi neeven aur nirmal
Kshamasheel aur komal.

Aise meharbaan maalik ko
Maatha jitna bhi tekoon vo kumm hai
Itne dayavaan Hain mere sartaj
Ki Unka jitna bhi gungaan karoon, vo kumm hai.

🌹🌹🌹🌹🌹🌹🌹

Jai Guruji 🙏🙏
Dhirja

Itne Dayavaan Hain Mere Sartaj (09/18/2025)

September 17, 2025

Om Namaha Shivaya
Aaj Ka Suvichaar 🙏🏻🙏🏻

#2768

            Ye Mishran

Vichitra sa hai ye baahari sansaar
Har kshan, anukool aur pratikool ka mishran
Isliye pavitra rakho bheetar ka sansaar
Taaki jaisi bhi ho baahari paristhiti
Anukool rahe bheetar kee sthiti.

Zaroor hogi Guruji kee rehmat
Par khud bhi karni padegi mehnat
Guruji ke kareeb aane ke liye
Varna jeeye toh kya jeeye.

Mann hai deewana
Aksar isey yoon prabhaavit karta hai zamaana
Apna hokar bhi ye ho jaata hai begaana
Aur ye shuru kar deta hai sataana.

Guruji ke kareeb aane kee koshish se
Mann honei lagega apne vash mein
Guruji ke chintan aur yaad se manobal badhega
Jo laabhdaayak hoga har sangharsh mein.

Mann ka bhatakna honei lagg jaayega kumm
Mann ko dagmagaa na paayenge vikarshan
Mann ko sthir aur shant rehne mein hogi aasaani
Usey kamzor karne wali baatein lagne lagg jaayengi begaani.

Sankat bhi bann jaayega avsar
Ruhaani unnati ka
Guruji raasta dikhaate rahenge
Sadgati ka.

Jeevan mein jaari rahega anukool aur pratikool ka mishran
Par Guruji ke prati hoga jitna prem bhaav aur deewaanapan
Utna balshaali hota jaayega mann
Aur ye mishran buss bann kar reh jaayega anubhav ka dhan.

🌹🌹🌹🌹🌹🌹🌹

Jai Guruji 🙏🙏
Dhirja

Ye Mishran (09/17/2025)

September 16, 2025

Om Namaha Shivaya
Aaj Ka Suvichaar 🙏🏻🙏🏻

#2767

Guruji Ne Chuna Hai Tumhe

Guruji ne chuna hai tumhe
Aur shaamil kiya hai Apni sangat mein
Tum bhaagyashaali ho ki mila mauka tumhe
Rangg jaane ka Unkee rangat mein.

Guruji Hain tumhaare angg sangg
Tum ho Unkee sangat ka angg
Jitna chadhega tum par Guruji ka rangg
Utna sanvar jaayega jeene ka bhi dhangg.

Guruji ke satsang
Unke naam kee umang
Inse miltee rahegi tumhe sakaaratmak oorja
Aur Unke saanidhya mein har pal bann jaayega pooja.

Jitna badhega tumhaara Guruji mein dhyan
Utna kumm honei lagoge pareshaan
Roz din kee baaton se
Duniyavi khayaalaaton se.

Guruji ko mann se matha toh teko
Unkee oar ik kadam badha kar toh dekho
Ve sainkdon kadam badhaayenge tumhaari oar
Sada thaame rahenge Ve tumhaare jeevan kee doar.

Tum samjho is rishte ka ruhaani raaz
Guruji tumhaare kalyaan ke liye de rahe Hain tumhe awaaz
Anokhi khushkismati se milte Hain aise gareebnawaaz
Na karo naadaani kar ke Unn Khuda kee awaaz ko nazarandaaz.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ne Chuna Hai Tumhe (09/16/2025)

September 15, 2025

Om Namaha Shivaya
Aaj Ka Suvichaar 🙏🏻🙏🏻

#2766

                 Guruji Kee Kripa Se

Guruji kee kripa se hai shwaas
Guruji kee kripa se hai Unpar vishwaas
Guruji kee kripa rahe sada, ye hai aas
Kyunki kewal Unkee kripa se mitey har traas.

Saari sangat par Guruji kee kripa banee rahe
Sabhi par Unke ashish ka amrit bahe
Saari sangat Guruji ke satsang suney aur kahe
Guruji kee meher se koi bhi na vanchit rahe.

Kisko kabb lena hai Apni sharan mein
Ye toh Guruji hee jaante Hain
Badi kismat wale hain ve sabb
Jo Guruji ko Rabb maante hain.

Aur jo jann Guruji kee sab maante hain
Unn bhakton ka toh kya hee kaha jaaye
Aisa bhakt toh Guruji ke hukm ke bin
Ek kadam bhi aagey na badhaaye.

Guruji ka hukm sir aankhon par rakh kar
Kyun na guzaar lein jeevan ka ye safar
Sada kalyaankaari hoga Unke hukm ka asar
Unkee maan-ne ka na ganvaayein koi bhi avsar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Kripa Se (09/15/2025)

September 14, 2025

Om Namaha Shivaya
Aaj Ka Suvichaar 🙏🏻🙏🏻

#2765

             Jeete Huey Ye Jeevan

Jeete huey ye jeevan
Malin hota gaya hai ye mann
Guruji mein jaaoon jo ramm
Toh malinta hoti jaayegi kumm.

Guruji karein mujh par taras
Guruji kee daya aisee jaaye baras
Ki Unke siwa mujhe soojhe na koi aur
Jeevan ke har daur mein mai Guruji par karoon gaur.

Guruji, Guruji, buss Guruji mein yoon leen rahein mere praan
Ki duniyavi maajaron mein rehte huey bhi unse anaasakt rahei mera dhyan
Antakaran mein yoon goonjta rahe Guruji ka gungaan
Ki har pratikool awaaz se mai rahoon anjaan.

Guruji mein hee mastt rahoon
Unhe khush rakhne mein hee vyast rahoon
Unkee sunoon, Unse kahoon
Unkee hee mai bann kar rahoon.

Guruji ke naam ke amrit se seenchoon apne mann kee maati ko
Guruji kee yaad se sajaaoon mann ke upvan ko
Guruji kee kripa se santulan aur sthirta miley mere mann ko
Guruji ke hukm ke vash mein mere mann ka kann kann ho.

🌹🌹🌹🌹🌹🌹🌹

Jai Guruji 🙏🙏
Dhirja

Jeete Huey Ye Jeevan (09/14/2025)