Aaj Ka Suvichaar

September 3, 2025

Om Namaha Shivaya
Aaj Ka Suvichaar 🙏🏻🙏🏻

#2754

                    Guruji Hee Guruji

Guruji ke naam ka beej
Boya jo apne antas mein
Guruji kee kripa aisee hui
Mai honei lagi Unke buss mein.

Guruji ka simran
Guruji ka chintan
Guruji kee yaad
Mann rehne lagaa inse aabaad.

Mushkilein aayin gayin
Guruji kee meher se
Guruji ka pehra rehta hai
Jeevan ke har peher pe.

Dukh ke pal mein Guruji kee yaad
Prerit karti hai karne ko fariyaad
Sukh ke lamhe mein Guruji kee yaad aana
Bann jaata hai shukrana.

Guruji ke chintan mein samajh aata hai
Ki apne karmon se hain sukh dukh
Guruji se ardaas rehti hai
Ki Unkee oar rahe mere antas ka mukh.

Beej upajtaa rahe
Antas sajta rahe
Guruji kee divyata se
Unke naam kee sheetalta se.

Unke naam ke prataap se
Raahat miley dukh santaap se
Mukti miley paap se
Saakshaatkaar ho asal apne aap se
Yaani ki atma se
Jo milna chaahe Paramatama se.

Usee milan kee hai ye tayyaari
Taaki Guruji kee kripa se aaye baari
Jaaoon mai Guruji kee leela par balihaari
Jinhonei mere bheetar kee drishti hai sudhaari.

Beej ik din ruhaani taruvar jaayega bann
Jis se prafullit ho jaayega sada ke liye mera mann
Ruhaani raahon par chalte chalte Guruji ke naam ke sahaare
Guruji karte rahenge mere vaare nyaare.

Unpar hai vishwaas
Unse lagaayi hai aas
Kaheen bhi koi aur nahin
Har taraf Guruji hee Guruji.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Hee Guruji (09/03/2025)

September 2, 2025

Om Namaha Shivaya
Aaj Ka Suvichaar 🙏🏻🙏🏻

#2753

          Arey O Mere Matvaale Mann

Arey o mere matvaale mann
Seekhta chal rehna Guruji mein magan
Khilne de upaasana ka upvan
Usee mein hai sachche anand ka dhan.

Tujhe milee hai Guruji kee sharan
Yaheen hoga teri har duvidha ka haran
Unke charnon mein kar tu samarpan
Tu shant aur sthir ho jaayega, o mann.

Jabb takk tujh mein hain sansaar ke vichaar
Na hoga tera beda paar
Guruji bakhsh rahe Hain tujhe simran
Tu kar le simran aur manan.

Aaj nahin toh kal
Badh jaayega tera bal
Simran aur dhyan mein hai hal
Inke dwaara ho jaa tu safal.

Mushkil samay mein ye nahin hota aasaan
Tabhi toh isey kaha jaata hai imtehaan
Tu chunautiyon se nahin hai anjaan
Buss, Guruji ko yaad karte rehne kee tu le thaan.

Isee mein hai har chunauti ka samaadhaan
Kyunki Guruji Hain sabse mahaan
Aur tu hai Unkee pyaari santaan
Isliye abb na bann aur naadaan.

Arey o mere matvaale mann
Jitna rahega Guruji mein magan
Utna sanvar jaayega tera jeevan
Isliye abb vyarth na jaane de tu ek bhi kshan.

🌹🌹🌹🌹🌹🌹🌹

Jai Guruji 🙏🙏
Dhirja

Arey O Mere Matvaale Mann (09/02/2025)

September 1, 2025

Om Namaha Shivaya
Aaj Ka Suvichaar 🙏🏻🙏🏻

#2752

Har Subah, Har Shaam

Har subah, har shaam
Lete chalo Guruji ka naam
Har pal ik nayi ummeed
Gaate chalo Guruji ke geet
Har lamha jo beete udaas
Karte raho Guruji se ardaas
Har ghadi ka aana jaana
Karte raho har ghadi shukrana
Kyunki anekon se aur pehle se behtar hai haal tumhaara
Jabb se Guruji baney Hain tumhaara sahaara.

Isliye har kshan koshish karo Guruji ke kareeb aane kee
Unkee sharan mein milee hai paristhiti naseeb jagaane kee
Bhakti bhaav se hokar prerit
Guruji ko karo apni oar aakarshit
Jitnee badhegi Unse kareebi
Utnee badhegi tumhaari khushnaseebi
Kyunki Guruji Hain mahasaagar kalyaan ke
Aur tum bachche Unhee Bhagwaan ke.

Unhee ka aanchal deta aaya hai tumhe chhaaya
Duniya kee duvidhaaon kee dhoop se
Ve hee Hain jinhe tumhaari jindri dhoond rahi thi
Kyunki uska apnapan hai in Paramatama ke roop se.

Guruji ke kamal charan mein mila hai thikaana
Kumm hai jitna bhi kar lo is daat ke liye shukrana
Isliye abb bilkul bhi samay na gavaana
Jeete jeete Guruji kee yaad mein samaa bitaana
Pyaar kee baarish kar rahe Hain Parwardigaar
Usmein bheeg kar karaa lo tum apna uddhaar.

🌹🌹🌹🌹🌹🌹🌹

Jai Guruji 🙏🙏
Dhirja

Har Subah, Har Shaam (09/01/2025)

August 31, 2025

Om Namaha Shivaya
Aaj Ka Suvichaar 🙏🏻🙏🏻

#2751

     Tum Guruji Ka Deewana Bann…

Mishrit vyavhaar ke is sansaar mein
Duniya ke vyaapaar mein
Guruji sangg waqt bitaana ho jaata hai mushkil aksar
Lekin gavaana matt jabb miley iska avsar.

Beshak lagey majboori
Par karma katna bhi hai zaroori
Nibhaate nibhaate farz
Utar jaayega karmon ka karz.

Chalte phirte dincharya ke dauran
Yaad karo Guruji ko aur lo Unka naam
Mehsoos hoga tumhe Unka pyaar
Mann mein aayenge Guruji ke vichaar.

Anand Guruji mein magan rehne ka
Bhaav Unke pyaar mein behne ka
Hoga jitna saral aur sheetal
Roam roam hoga utna hee nirmal.

Guruji kee kripa jaayegi baras
Guruji ko zaroor tum par aayega taras
Kar denge Ve tumhe har maajre se beparwaah
Yoon bhar denge tumhaare bheetar Ve Apne liye chaah.

Buss, phir jaisi bhi hogi paristhiti
Guruji mein leen hogi mann kee sthiti
Tumhe Unka har hukm hoga sweekaar
Unkee har leela mein dekh paaoge tum Unka pyaar.

Guruji ka hee khayaal hoga tumhaare mann mein
Poornata hogi tumhaari oar se samarpan mein
Deewane honei lagoge Guruji ke tum isee janam mein
Ye deewanapan chalkega tumhaare har karam mein.

Agar sach mein hai ye aas
Toh karte raho prayaas
Bann kar raho Guruji ke das
Ve denge tumhe deewanepann ka ehsaas.

Tum Guruji ka deewana bann
Guruji mein rehte chaloge magan
Khila rahega tumhaara mann
Dhanya hoga tumhaara jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Tum Guruji Ka Deewana Bann… (08/31/2025)

August 30, 2025

Om Namaha Shivaya
Aaj Ka Suvichaar 🙏🏻🙏🏻

#2750

     Satya Ka Savera

Guruji ke dhyan kee soch
Bheetar ek adbhut anand bhar deti hai
Aur jabb Guruji bakhshte Hain vo dhyan
Toh vo ghadi na jaane kitne dukh har leti hai.

Yahee toh hai yatra satya kee oar
Is raaste par toh chaalaakiyan chod
Varna na raasta tayy hoga na hee manzil milegi
Aur ye atma ek joni se doosri joni mein chalti chalegi.

Vaise hee atma shaayad thaki ho
Kyunki abb takk Parabrahm ko na paa saki vo
Apni deh ka rakhta hai tu itna khayaal
Apni atma ko bhi toh sambhaal
Guruji kee yaad se na ho juda
Ve Hain Guru, Parabrahm, Ishwar, Khuda
Mann se sab chod kar Unkee sharan mein aa
Idhar udhar na bhatak, dar dar thokar na khaa
Guruji Hain satya
Ve Hain tera lakshya
Guruji mein basta Rabb Hai
Unke kamal charnon mein sab hai
Satya kee oar teri yatra hee param uddeshya hai tera
Guruji kee yaad mein aagey badhte badhte mil jaayega is satya ka savera.

🌹🌹🌹🌹🌹🌹🌹

Jai Guruji 🙏🙏
Dhirja

Satya Ka Savera (08/30/2025)

August 29, 2025

Om Namaha Shivaya
Aaj Ka Suvichaar 🙏🏻🙏🏻

#2749

                     Har Jageh….

Har jageh tumhe Guruji aayein nazar
Har lamhe mehsoos ho tumhe Unkee kripa ka asar
Toh Unhee ke bharose chal raha hai tumhaara ye safar
Kuch beet gaya, baaki bhi jaayega guzar.

Beet jaayega jo pal Guruji kee yaad mein
Vo pal hoga safal
Na bujhne dena jyot jigyaasa kee
Na chodna chadhna seedhiyan abhilasha kee
Jigyaasa, atma saakshaatkaar kee
Abhilasha, Guruji se deedar kee.

Guruji ke roop mein Paramatama ne tumhe hai sweekaara
Khushkismati se milta hai pooran Guru ka sahaara
Jabb samajh jaaoge ki Guru praapti hai sabse shreshth dhan
Toh baaki har tamanna tyaag dega tumhaara mann.

Buss, phir uddeshya saaf aayega nazar
Guruji kee meher ka tumhaari koshish par hoga asar
Saarthak hoga tumhaara Guruji kee oar samarpan
Tumhe sanatan sukh degi Guruji kee sharan.

🌹🌹🌹🌹🌹🌹🌹

Jai Guruji 🙏🙏
Dhirja

Har Jageh…. (08/29/2025)

August 28, 2025

Om Namaha Shivaya
Aaj Ka Suvichaar 🙏🏻🙏🏻

#2748

            Raat Kitnee Hee Lambi…

Raat kitnee hee lambi kyun na ho
Subah zaroor aayegi
Vo raat ke parde ke peechhe chhipi hai
Waqt aane par apni chhavi dikhaayegi.

Andhere mein jeete huey
Sooraj dekhne kee tayaari karo
Andhere mein bhi Guruji angg sangg Hain
Isliye tum bilkul na daro.

Darasal toh maya hee hai andhera bhi
Asal cheez toh hai savera hee
Jo andhere mein bhi upasthit hai
Lekin tumhaara mann aisee avastha mein sthit hai
Ki usey andhera hee aata hai nazar
Ye hai maya aur karmon ke khel ka asar.

Gehra hai ye vichaar, kar lo ispar manan
Guruji kee bakshish dwaara kar lo Unka chintan
Har sawaal ka milega jawaab
Guruji kee leela sach mein hai lajawaab.

Parda chhatne par
Andhere ka ehsaas hatne par
Hoga gyanmayi anand ka ujaala tumhaare jeevan mein
Aur ruhaani spandan ka prakampan samaa jaayega tumhaare tann mann mein.

🌹🌹🌹🌹🌹🌹🌹

Jai Guruji 🙏🙏
Dhirja

Raat Kitnee Hee Lambi… (08/28/2025)

August 27, 2025

Om Namaha Shivaya
Aaj Ka Suvichaar 🙏🏻🙏🏻

#2747

          Kuch Bhi Na Aaye Samajh

Param poojya Guruvar,

Mujhe kuch bhi na aaye samajh
Uljhanein nahin rahi hain sulajh
Guruji, Aapke sahaare bin na le paaoon ek bhi shwaas
Ek Aap se hee hai mujhe aas
Kyunki jaanti hoon Aap kalyaan karta Hain
Mere liye toh ek Aap hee dukh harta Hain.

Jabb mai har din Aapke gunn gaaoon
Toh kyun koi aur darwaaza khatkhataoon
Jis dar par sab kuch paaoon
Usey chod kar kyun kaheen aur jaaoon?

Aap hee Hain mera sahaara
Aapke bin nahin mera guzaara
Jabb se mila hai mujhe Aapka dwaara
Mainey sukh dukh mein Aapko hee hai pukaara.

Bhavishya mein bhi Aapko hee pukaaroon
Jeevan bhar Aapki chhavi aur Aapki leela ko nihaaroon
Aisee khushkismati bakhshte rahiyega Aap
Aisee niyati bakhshte rahiyega Aap.

Aapki kripa se talti rahegi har qayamat
Mann jhuka rahe karne mein Aapki ibadat
Ardaas aur shukr karne kee dete rahiyega izaazat
Aapki inaayat bin mujhe na mil paaye koi bhi niyaamat.

🌹🌹🌹🌹🌹🌹🌹

Jai Guruji 🙏🙏
Dhirja

Kuch Bhi Na Aaye Samajh (08/27/2025)

August 26, 2025

Om Namaha Shivaya
Aaj Ka Suvichaar 🙏🏻🙏🏻

#2746

Apne Bheetar Kee Jyot Ko Sweekaar

Apne bheetar kee jyot ko sweekaar
Abb honei de uss se tu apna deedar
Guruji swayam Hain tere mahaan madadgaar
Ve aaj bhi sunn rahe Hain teri rooh kee pukaar.

Guruji Hain Vo jyot, ye hai tujhe gyat
Par bhool jaata hai tu ye baat
Is duniya ke mele mein rehkar
Bhautikvaad kee dhaara sangg behkar.

Bhautikvaad mein behna chod de
Guruji kee oar khud ko moad le
Unke bhaav mein behta chal
Unhe tu apni kehta chal.

Abb bhi samay hai, tu jaag
Bheed ke peechhe matt bhaag
Kar le sadh sangat ka sangg
Kyunki jaisa sangg, vaisa hoga rangg.

Jitna baithega tu Guruji ke saath
Jitnee karega Unse baat
Utna hoga tujhse tera saakshaatkaar
Buss, vaheen hoga uss divya jyot ka deedar
Jismein baste Hain Guruji swayam
Param poojya Paramatama Parabrahm.

Gehraayee mein le jaayega ye safar
Isliye na gavaa tu ye avsar
Maanav janam mila hai aur milee hai Guruji Maharaj kee sharan
Unse kareebi badhaakar sanvaar le tu apna janam maran.

🌹🌹🌹🌹🌹🌹🌹

Jai Guruji 🙏🙏
Dhirja

Apne Bheetar Kee Jyot Ko Sweekaar (08/26/2025)

August 25, 2025

Om Namaha Shivaya
Aaj Ka Suvichaar 🙏🏻🙏🏻

#2745

          Baithi Thi Mai Jheel Kinaare

Baithi thi mai jheel kinaare
Gagan mein timtima rahe thei taare
Jalaa kar kuch deeye
Ruhaani kaagaz haath mein liye
Guruji ko kar rahi thi mai yaad
Dil se nikal rahi thi Unke liye fariyaad
Guruji kee salaamati sanatan rahe
Mere Prabhu ke ashish ka amrit sada bahe
Unkee saari sangat par
Shuddh karey sabke parivaar aur ghar.

Jaise hee mann mein khayaal aaya
Mainey apna kalam uthaaya
Lagi jabb kaagaz par mai likhne
Toh kaagaz par mujhe Guruji lagey dikhne.

Guruji rahe thei muskuraa
Muskuraahat mandd aur itnee sundar
Mai ho gayi bhaav vibhor
Aur dekhti gayi Unkee chhavi manohar.

Phir leela rachi Guruji Maharaj ne
Aur likhaayee ho gayi bin mere likhe
Kaagaz par sundar alfaaz dikhe
Aur Guruji ka chehra hua ojhal
Is sab mein lagaa maano ek hee pal.

Yakayak tez hua deeyon ka ujaala
Mera mann honei lagaa matvaala
Guruji dwaara likhe alfaaz baney ik geet
Jisey gaate huey agley kayi pal gaye beet.

Guruji thei angg sangg
Unkee ruhaani khushboo thi vahaan
Itna manoram sa thaa vaatavaran
Jaise utsav manaa raha ho jahaan.

Guruji ne kiya maargdarshan
Khushboo Apne sangg liye Ve chal diye
Mai bhi ruhaani kaagaz aur kalam ke saath
Chal padi Unke madhur saath ke liye.

Chalte chalte na jaane kyun bhaagi mai
Usee samay neend se jaagi mai
Guruji ke swapn darshan ka hua ehsaas
Jo thei itne pyaare, itne khaas.

Karte huey Guruji ka shukrana
Unkee kripa se mainey din kiya shuru
Vadde bhaagya hain unn sabke
Jinhe miley Hain itne pyaare Guru.

🌹🌹🌹🌹🌹🌹🌹

Jai Guruji 🙏🙏
Dhirja

Baithi Thi Mai Jheel Kinaare (08/25/2025)