Aaj Ka Suvichaar

August 24, 2025

Om Namaha Shivaya
Aaj Ka Suvichaar 🙏🏻🙏🏻

#2744

     Ruhaani Unnati

Guruji ne itna prem hai deeya
Jabb se Unhonei Apne prem mein mujhe baandh liya
Tabb se azad hui mai itnee bandishon se
Tabb se ummeed prajvalit hui koshishon se
Kyunki Guruji kee maujoodagi mehsoos hoti hai angg sangg
Unkee kripa se jeevan ke chitr mein dikhne lagey hain anokhe rangg.

Shaayad ve rangg pehle se thei
Par Guruji ne dee dekhne wali nazar
Ya phir ve rangg Guruji ne bhare
Ye hai Unkee rehmat ka asar
Jo bhi hua aur jaise bhi
Guruji kee meher bin na thaa mumkin
Balki jeevan hee nahin chal sakta Unkee daya ke bin.

Jabb har daat hai Unkee hee rehmat
Toh phir har haalaat mein rehna sehmat
Hai mera farz
Taaki utar jaaye karmon ka karz
Varna na jaane kitne janam phiroongi maari maari
Isliye kyun na Guruji kee sharan mein karoon unnati kee tayyaari.

Guruji ke prem ne sanvaar dee hai meri rooh kee kismat
Unke ashirwaad se koshish karoon ki rooh hoti chale unnat
Khushnaseebi se milta hai aisa shubh avsar
Ki Sadashiv roopi Guru kee sharan mein hon agrasar
Isliye tann mann rooh se Unke charnon mein jhukaa kar sir
Unkee kripa se ruhaani unnati mein na chodoon koi kasar.

🌹🌹🌹🌹🌹🌹🌹

Jai Guruji 🙏🙏
Dhirja

Ruhaani Unnati (08/24/2025)

August 23, 2025

Om Namaha Shivaya
Aaj Ka Suvichaar 🙏🏻🙏🏻

#2743

          Gumm Kee Ghata….

Gumm kee ghata chhat jaayegi
Guruji kee meher rangg laayegi
Buss, thoda aur sabar tu kar
Guruji saath Hain, tu bilkul na darr.

Unhe chhoone se pehle tujhe koi chunauti chhoo sakti nahin
Aur Unke samaksh koi chunauti jeet sakti nahin
Kyunki Ve Hain param shaktimaan
Ve Hain Guruji Maharaj mahaan
Jo abb takk bhi karte aaye Hain tera kalyaan
Aur bhavishya mein bhi rahenge tere jeevan mein pradhaan.

Uthaate huey tere karmon ka adhiktar bhaar
Dete huey tujhe har pal itna pyaar aur dulaar
Guruji Maharaj rahe Hain tujhe taar
Karta chal tu Unpar aitbaar.

Kaafi raasta toone kar liya hai tayy
Guruji Maharaj dete rahenge aashray
Tu buss tyaagta chal apna bhay
Mann mein na aane de tu sanshay.

Guruji tere saath rahe Hain har imtehaan mein
Ve tere rakshak baney Hain jeevan ke har tufaan mein
Anant saamarthya hai Unn karunanidhaan mein
Tera uddhaar nishchit hai Unke amrit kee khan mein.

Dukh kaat kar sukh dene wale daata Hain Guruji
Bhaagya ke nirmal nirmaata Hain Guruji
Tere jeevan mein laa rahe Hain Ve sudhaar
Suhaila vela de raha hai tujhe pukaar
Shukrana karta chal tu baarambaar
Guruji se hee hai sanatan sukh ka sansaar.

🌹🌹🌹🌹🌹🌹🌹

Jai Guruji 🙏🙏
Dhirja

Gumm Kee Ghata…. (08/23/2025)

August 22, 2025

Om Namaha Shivaya
Aaj Ka Suvichaar 🙏🏻🙏🏻

#2742

              Baitha Thaa Saadhak

Baitha thaa saadhak maun mein
Sochte huey ki vo kaun hai
Guruji aaye uske samaksh
Aur dekhkar Unhe pratyaksh
Saadhak hua hairaan
Phir kehne lagey uss se Guruji mahaan
Ki Unka vo darshan hai ruhaani
Aur ruhaani hai Unkee maujoodagi
Saadhak ka mann jo hai darpan
Veh utna saaf hoga jitnee hogi uskee bandagi.

Guruji ne kaha saadhak se
Ki Ve Hain divya noor
Jo nahin Hain uss se duur
Isliye vo na sochey swayam ko majboor.

Saadhak ko apne bheetar se hee
Aa rahi thi Guruji kee awaaz
Is adhyaatmik vaartaalaap dwaara
Usey samajh aane lagaa raaz
Ki vo swayam bhi divya noor ka ansh hai
Kyunki har atma Paramatama ka hee vansh hai.

Guruji Hain Paramatama swayam
Aur saadhak ka shareer jabb hoga mrit
Toh atma hee reh jaayegi
Deh mitti mein mil jaayegi.

Saadhak ko hua gyan
Jiske daata thei Guruji mahaan
Ki vo atma hai, na ki shareer
Aur atma kee divya jyot nahin hai mehez ek tasveer
Vo divya jyot Paramatma kee hai
Kyunki vo Paramatma ka ansh hee hai
Usne apne bheetar kee divya jyot mein Guruji ko paaya
Guruji kee kripa se jaagrit hokar saadhak ka roam roam harshaaya.

Vo saadhak hai hum sab mein
Jo vishwaas rakhte Hain Rabb mein
Guruji kee kripa se aa jaaye jo jaagriti
Toh nikhar jaaye bheetar kee aakriti
Guruji kee divya jyot se bheetar ka andhera ho jaaye duur
Har taraf har kann kann mein chhaa jaaye Guruji ka noor.

🌹🌹🌹🌹🌹🌹🌹

Jai Guruji 🙏🙏
Dhirja

Baitha Thaa Saadhak (08/22/2025)

August 21, 2025

Om Namaha Shivaya
Aaj Ka Suvichaar 🙏🏻🙏🏻

#2741

               Bin Guruji Ke Chintan

Bin Guruji ke chintan
Na chal paaye abb jeevan
Bhojan karne ka bhi na karey mann
Khush kaise reh paaoon kisee bhi kshan?

Ye Guruji ka deeya pyaar hee toh hai
Aur hai ye Unkee kee daya
Ki param poojya Guruji Maharaj se
Aisa pyaara pyaar ho gaya
Ki Unkee yaad bin mann ho jaata hai bechaynn
Aur Unkee yaad ke sangg sundar hon din aur rayn.

Guruji pyaar karein har bhakt ko
Ek sa, kisee bhed bhaav ke bin
Guruji kee yaad mein beete
Jis sangat ka har raat aur din
Toh Guruji se pyaar kee hai ye
Ek aisee pyaari nishaani
Jis se manohar mohar lagg jaati hai
Is ruhaani rishte par
Jisey Guruji kee meher
Gehra karti hai har peher.

Guruji kee yaad se mitt jaata hai akelapan
Kyunki Guruji angg sangg hotey Hain rakshak bann
Guruji kee yaad, Unka chintan, Unka manan
Isee se saarthak ho har bhakt ka jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Bin Guruji Ke Chintan (08/21/2025)

August 20, 2025

Om Namaha Shivaya
Aaj Ka Suvichaar 🙏🏻🙏🏻

#2740

                      Guruji Se Baat

Jab Guruji se ho rahi hoti hai baat
Yaad nahin rehta ki din hai ya raat
Kyunki bheetar jyoti rahi hoti hai jal
Na jaane kaise beet jaate hain ve pal.

Beshak jo socho vo kehna yaad nahin rehta
Par mann phir bhi nahin thakta kehta kehta
Kabhi hoti hai baaton mein awaaz
Kabhi maun ho jaata hai
Par mann ka deewana panchhi
Baaton mein aksar yoon kho jaata hai
Ki waqt guzarta hai tez raftaar se
Karte huey baatein Parwardigaar se.

Baaton mein shukrana
Baaton mein shikaayat
Baaton mein deewaanagi
Baaton mein sharmindagi
Baaton mein ehsaas
Baaton mein ardaas
Baaton mein baantna haal
Baaton mein jawab sawaal
Baatein idhar udhar kee
Jeevan ke ajab safar kee.

Har bhakt kee Guruji se hai anokhi baat
Ruhaani taar dwaara Guruji ke saath
Isliye seedha naata zaroori hai bin kisee vikarshan
Jiske dwaara Guruji sangg baatein jo sakti hain kisee bhi kshan.

Guruji kee meher se hum Unse judey rahein
Har aakarshan ke baavajood Guruji kee oar mudey rahein
Toh atma ka hota rahega pooran poshan
Aur Guru kripa se bheetar ka jyotirlinga rahega roshan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Se Baat (08/20/2025)

August 19, 2025

Om Namaha Shivaya
Aaj Ka Suvichaar 🙏🏻🙏🏻

#2739

       Jaise Jaise…

Jaise jaise aagey badhi zindagaani
Peechhe chhooteein kuch aadatein puraani
Apni oar se iraada raha hai achcha
Apni oar se prayaas raha hai sachcha
Par bhi reh jaati hain kamiyaan kayi
Aati hain umad kar mushkilein nayi
Shaayad yahee hota hai is khel mein
Pichhle aur vartmaan ke karmon ke mel mein.

Guruji kee sharan milee, ye khushkismati hai badi
Varna na pahunchti zindagi jahaan abb aakar hai khadi
Hai Unkee maun kripa ka ye parinaam
Ki ho raha hai har din har pal kalyaan
Himmat haarne ke bajaaye haunsla badh gaya hai
Museebaton ke baavajood utsah naya hai.

Na koi pravachan
Na koi pradarshan
Na karmakand, na havan
Buss, Guruji kee oar lagaana hai mann.

Saral saadagi
Bholi bandagi
Guruji ka simran
Unhe hai pasand.

Unka pyaar hai anoop
Anekon hain Unke roop
Ve Hain Pooran Guru roopi Paramatma
Jinka ansh hai har atma
Yahee hai tathya aur saar
Jisey bhool baitha hai sansaar
Jo bhi rakh lega ye yaad
Uskee bann jaayegi baat.

Guruji dekh rahe Hain koshish aur neeyat
Unke charnon mein aane se sunehri hui hai kismat
Guruji ko paa liya toh yakeenan sab kuch mil jaayega
Guruji kee meher se adhyaatmik jaagriti hogi aur atma ka naseeb khil jaayega.

🌹🌹🌹🌹🌹🌹🌹

Jai Guruji 🙏🙏
Dhirja

Jaise Jaise… (08/19/2025)

August 18, 2025

Om Namaha Shivaya
Aaj Ka Suvichaar 🙏🏻🙏🏻

#2738

             Aapke Deedar-e-Dwaar

Kitna shukar karoon Aapka, Guruvar mere
Jitna shukar karoon vo kumm hai
Na jaanoon ki shukrana karte karte
Aankh meri kyun numm hai.

Aapne itne prem se pehnaaya mujhe apne ashish ka taaj
Mera katra katra Aapki rehmat ka hai mohtaaj
Neend khule Aapki yaad se aur Aapko yaad karte karte so jaaoon
Jeevan ke kisee bhi lamhe mein Aapse juda na hona chaahoon.

Yahee rehti hai meri rooh kee pukaar
Ki Aapse hee mera asal sansaar
Ye sansaar toh hai saraaye
Na jaane kabb yahaan se jaane ka waqt aa jaaye
Kintu asal sansaar toh hai iske paar
Jahaan meri rooh ka hoga Aapse aisa deedar
Ki nahin padega phir kabhi bichadna
Aur safal ho jaayega marna.

Meri khaamiyan mujhe chadhne na dein vo seedhiyan
Jo le jaati Hain Aap Paramatama Sadashiv takk
Aap sumat aur himmat dete rahiye
Taaki mai koshish karte huey na jaaoon thakk.

Shukrana Aapka ki Aapne deeya hai ye avsar
Ki aa paaoon mai Aapke dar
Pehle bhi beet toh raha thaa ye safar
Lekin Aapse jud kar hua hai itna adbhut asar
Ki jaati hoon mai jidhar
Aapka ehsaas hota hai udhar
Din yoon jaata hai guzar
Jaankar ki Aap sangg Hain har peher.

Ye khoobsoorat ehsaas rahe barkaraar
Aapka shukrana karti rahoon baarambaar
Toot jaaye har paash, har bandhan, har deewaar
Aur Aapke charan mujhe lekar chalein Aapke deedar-e-dwaar.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Deedar-e-Dwaar (08/18/2025)

August 17, 2025

Om Namaha Shivaya
Aaj Ka Suvichaar 🙏🏻🙏🏻

#2737

Unkee Rehmaton Ka Shukar

Tum Guruji par har aas do dhar
Aur Ve tumhe har bakhshish se nawaaz kar
Bulaate rahein Apne dar
Toh safal hoga tumhaara safar.

Kyunki ye safar hai ruhaani
Jo yoon badal deta hai zindagaani
Ki jindri ho jaati hai Guruji kee deewani
Aur duniyadari lagne lagti hai beeti kahaani.

Badali hui zindagaani mein
Is safar kee kahaani mein
Badhta jaata hai Guruji ke sangg judey rehne ka nasha
Aur isee judaav se sanvarne lagti hai rooh, tann, mann, aur jeevan kee dasha.

Sadashiv roopi Hain Guruji Maharaj
Unhe karne do tum tumhaari niyati par raj
Unhee kee kripa se itne kashton se tum bache huey ho aaj
Unhonei anginat baar rakhi hai tumhaari laaj.

Aagey bhi Guruji ka aasara hai atal
Aagey bhi Unkee meher se kasht jaayenge tal
Tumhaari aap beeti thi tumhaari niyati
Abb Guruji de rahe Hain tumhe sumati
Dobaara likh rahe Hain tumhaara lekha Ve Apni marzi se
Waaqif Hain Ve tumhaari har arzi se
Tumhaare kalyaan mein Ve na chodenge koi bhi kasar
Tum har kadam par karte raho Unkee rehmaton ka shukar.

🌹🌹🌹🌹🌹🌹🌹

Jai Guruji 🙏🙏
Dhirja

Unkee Rehmaton Ka Shukar (08/17/2025)

August 16,2025

Om Namaha Shivaya
Aaj Ka Suvichaar 🙏🏻🙏🏻

#2736

      Ye Karma Bhoomi Hai Janaab…

Khushboo dene ke liye aksar phool ko kuchalna sehna padta hai
Roshni dene ke liye moam ko pighalna sehna padta hai
Ye karma bhoomi hai janaab…
Yahaan karma kaatne ke liye aksar nichodey jaana sehna padta hai.

Jaisa bhi ho jaaye haal
Mann mein aayein jaise bhi sawaal
Jisne pehni ho Guruji ke naam kee dhaal
Uska toh baanka bhi no paaye baal.

Ho raat ka andhera
Ya ho savera
Guruji kee suraksha hai nishchit
Nirantar hota hai bhakt ka hitt.

Karma bhoomi par kalyaan hotey hotey
Bhavishya ke liye achche beej botey botey
Praapt hota hai Guruji kee daya ka pehra
Jis se Guruji sangg rishta ho paata hai gehra.

Param poojya Guruji ke divya dar par
Mila hai ruhaani seedhiyan chadhne ka avsar
Kyun na aagey badhein karmon ka bhugtaan kar
Aur dekhein oonchhayee ka manohar manzar.

🌹🌹🌹🌹🌹🌹🌹

Jai Guruji 🙏🙏
Dhirja

Ye Karma Bhoomi Hai Janaab… (08/16/2025)

August 15,2025

Om Namaha Shivaya
Aaj Ka Suvichaar 🙏🏻🙏🏻

#2735

Aapke Pyaar Ka Shukrana

Param poojya Guruvar,

Jis dil mein chhaaya thaa ik adhoorapan , ik veeraana
Aapki yaad se aabaad hokar vo hua Aapka deewaana
Na aaye mujhe ardaas karne ka tareeka
Na samajh aaye kaise karoon shukrana
Shukrana ki Aap jaanein mere dil kee
Kyunki mujh nimaani ko toh aata nahin karna shukrana.

Mere lafzon mein vo gehraayee nahin
Jo gehraayee hai mere ehsaas mein
Shukrana ki Aap qubool karte Hain
Jabb ki kitnee khaamiyan hain is das mein.

Phir bhi lafzon ka lekar sahaara
Aapka shukrana karna chaahoon itna saara
Jeevan ka har pal jo Aapki sharan mein hai guzaara
Vo hai meri kahaani ke akash ka khoobsoorat sitaara.

Kyunki har pal mein hain anubhav
Jo huey hain Aapke ashirwaad se
Jo judey hain Aapki yaad se
Jo sajey hain anmol jazbaat se.

Har ghadi, har pal ka shukrana
Kal, aaj, aur kal ka shukrana
Manobal ka shukrana
Kashton ke hal ka shukrana
Din raat ka shukrana
Aapke saath ka shukrana
Aapki har daat ka shukrana
Har baat ka shukrana
Aapke darbar ka shukrana
Aapke deedar ka shukrana
Aapke ikhtiyaar ka shukrana
Aapke pyaar ka shukrana.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Pyaar Ka Shukrana (08/15/2025)