Aaj Ka Suvichaar

September 6, 2020

Om Namaha Shivaya
Aaj Ka Suvichaar 🙏🏻🙏🏻 # 931

    Saanson Ko Simran Se Sajaa Lo

Chod do tum vehem aur andhvishwaas,
Beshaq shauk aur khushi ke liye nibhaa lo reet rivaaz,
Lekin inka anusaran karne ko na socho tum majboori,
Aur ye bhi nahin socho ki tumhe inko nibhaana hai bilkul zaroori.

Jaise hamein fikr hoti hai, agar hamaare bachche khaana nahin khaate hain,
Vaise hee hamaare bhookhe rehne se shaayad Guruji bhi pareshaan ho jaate hain.
Achchaa socho aur doojon ko dukh na do, aisa karo upvaas,
Aur koshish karo ki vikaaron ka na ho mann mein vaas.

Kyunki vehem aur andhvishwaas kee vajeh se darte rehna,
Veh bandish hai, bandagi nahin,
Aur aisee bandish mein saansein lena,
Veh adheen hokar jeena hai, lekin adhyatmik zindagi nahin.

Kyunki aisee bandish se atma-shakti par ho sakta hai asar,
Jabki Guruji chaahte Hain ki hum aadhyaatmikta mein hon agrasar.
Tabhi toh Guruji kehte Hain ki hum vehem aur andhvishwaas ko tyaag dein,
Aur Unkee sharan mein rehkar swayam kee ruhaani unnati mein bhaag lein.

Guruji kee sharan mein har din shubh hai,
Tumhaare liye kya sahi hai veh Guruji tumhe khud bataayenge,
Seedha naata rakho Guruji ke sangg,
Toh Ve har kshan har jageh tumhaare saath aayenge.

Vehemon kee bandish ko chod kar,
Saanson ko simran se sajaa lo,
Jo deewar khadi hai andhere aur roshni ke beech,
Uss deewar ko Guruji ka naam lekar tum hataa do.

Deewar kee doosri taraf na hoga koi bhi andhvishwaas,
Vahaan hoga adhyaatmik sukh aur simran bharaa shwaas,
Guruji mukt karenge har bandhan se,
Antt mein zaroor sukh milega Unke vandan se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2020

Om Namaha Shivaya
Aaj Ka Suvichaar 🙏🏻🙏🏻 # 930

          Shikshak Divas

Shukrana Guruji Aapka,
Hamein apna shishya banaane ke liye,
Shukrana Guruvar Aapka,
Hamein itna kuch sikhaane ke liye.

Aap mein Brahma, Vishnu, Mahesh Hain samaaye,
Aur Aap hamaare jeevan mein Guru ke roop mein aaye,
Dete Hain Aap Apne naam ka daan,
Aur karte Hain Apne bhakton ka kalyaan.

Itne protsaahan aur laad se Aap,
Apne satsang kee kaksha mein bulaate Hain,
Apne sangg hamein jod kar,
Simran ka mahatva samjhaate Hain.

Atma-bal badhaate Hain hamaara,
Aur dete Hain hamein adhyatmik deeksha,
Hamein taarne ke liye,
Lete Hain hamaari pareeksha.

Jeevan ka paathyakram jab kathin lagta hai,
Toh Aap sewa karaa kar baar baar padhaate Hain,
Aur hamaari shraddha aur bhavna dekhkar,
Hamaara utsaah aur bhi badhaate Hain.

Goodh gyan sikhaane ke liye,
Hamein Gurbani se jodte Hain,
Aapke chhaatr neeven bann jaayein,
Isliye kitne shishyon ka ahem Aap todte Hain.

Saadagi aur saralta se jeena sikhaate Hain Aap,
Taralta aur nirmaltaa ka mahatva samjhaate Hain Aap,
Gyan pradaan karne ke saath aish karaate Hain Aap,
Har mushkil kaam ko aasaan banaate
Hain Aap.

Maarg dikhaate Hain Aap insaaniyat ka,
Roshan karte Hain raasta ruhaaniyat ka,
Khandit kar ke har vichaar vikaaron ka,
Amrit pilaate Hain shudh sanskaaron ka.

Aap Hain Ve murshid jinse srishti hui shuru,
Aapko samarpit hai Shikshak Divas ka din.
Aap hee Hain Rabb, aur Aap hee Hain Guru,
Aapke sab shagird asahaay hain Aapke bin.

Kaayinaat mein sabse uttam Guru Hain Aap,
Jeevan ka paath padhaakar duur karte Hain hamaare santaap,
Hum itne khushkismat hain ki Aapne hamein sweekara hai,
Yeh shikshak aur chhaatr ka rishta sach mein bahut hee pyaara hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2020

Om Namaha Shivaya
Aaj Ka Suvichaar 🙏🏻🙏🏻 # 929

               Hamaare Sartaaj

Aye bande, ye duniya na hai teri, na hai meri,
Kalyuga ka toh jaise dharam bann gaya hai hera-pheri,
Iska anusaran karne mein duniya kadaachit nahin karti hai deri,
Guruji, Aap kripa kar bachaayiye, taaki aur bhaari na ho jaaye hamaare paapon kee dheri.

Aapki kripa se hum laukik aakarshanon se rahein duur,
Aur hamaara ahankaar ho jaaye chuur chuur.
Guruvar, chhichhorepan ke haathon na ho jaaye hum majboor,
Sadaa dil aur atma par chaaye Aapka noor.

Kisee ka bhalaa na kar sakein,
Toh kisee ka bura na sochein aur na karein,
Chaahe saari duniya jhoothi ho,
Hum sachchaayee ka saath dene se na darein.

Aapne kaha ki kewal maree machhlee bahaav ke sangg behti hai,
Aapki yeh baat kitnee gehraayi se itna kuch kehti hai.
Phir bhi ve anjaan banenge jinhonei sudharnaa nahin hai,
Aur bheed mein ulajhte rahenge jinhonei sulajhnaa nahin hai.

Oopari dikhaawa toh itnon ko bhatkaata hai yahaan,
Khuda ke bajaaye loag samajhne lagte hain insaan ko Bhagwaan,
Chaahe is kalyuga kee bheed mein na rahey sadaachaari ka koi nishaan,
Aap mein hee sadaa samaaye hamaara toh saara jahaan.

Kyunki Aapse hee hai divya dharamaacharan,
Aapse hee hai satya ka raaj,
Aap hee Hain maargdarshak hamaare,
Aap hee Hain hamaare Sartaaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2020

Om Namaha Shivaya
Aaj Ka Suvichaar 🙏🏻🙏🏻 # 928

     Aisa Kabhi Nahin Honei Denge

Kabhi kabhi niraasha itnee hoti hai,
Ki aisa lagne lagta hai baar baar,
Jaise khatm hee nahin ho raha hai,
Sukh kee subah ka intazaar.

Toh dil se lo Guruji ko pukaar,
Kyunki Ve hee sambhaalte Hain saara sansaar,
Ye toh hai nahin ki Guruji nahin jaante Hain tumhaari paristhiti,
Phir bhi agar badal nahin rahi hai abhi sthiti,
Toh shaayad
jo tumhe lagg rahi hai prateeksha,
Veh darasal ho Guruji kee dee hui koi pareeksha?
Aur jo tumhe lag raha hai Unkee oar se vilambh,
Kya maalum veh ho Guruji kee kripa se koi aur shubh aarambh?

Tumhaare bina boley hee,
Guruji sab jaante Hain,
Phir bhi, ye aansoon shaayad kabhi kabhi,
Is satya ko nahin maante hain.

Isliye ye beh jaate hain,
Aur dil ka dukh keh jaate hain,
Isliye tum Guruji ke saamne ronei se na ghabraana,
Guruji ko apna raaze dil tum sunaana.

Guruji ke bharose hee toh hai tumhaari har shwaas,
Isliye kaayam rakhna Guruji par tum apna vishwaas,
Bilkul bhi matt sochna ki tum reh jaaoge beech majdhaar,
Aisa kabhi bhi nahin honei denge itne pyaare parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2020

Om Namaha Shivaya
Aaj Ka Suvichaar 🙏🏻🙏🏻 # 927

   Tum Himmat Na Haarna

Tum jo socho veh Guruji na jaanein,
Aisa ho sakta hee nahin,
Isliye socho bhi zaraa dhyan se,
Taaki tumhaari soch ho sahi.

Na kisee vishesh intazaam kee zaroorat,
Na kisee khaas din ka chaahiye mahoorat,
Guruji se judne ke liye har pal hai shubh,
Buss apni neeyat ko tum rakho shudh.

Na jungle mein jaana padega tumhe,
Na chodna padega parivaar,
Yahaan kewal dil se jodo seedhi taar,
Kyunki ye hai Guruji ka darbar.

Yeh baat mann mein kabhi na laana,
Ki Guruji tumhaari aur dhyan nahin Hain dete,
Arey, ek Ve hee toh Hain jo tumhaare saare kasht,
Khud Apne aap par Hain le lete.

Agar tumhe lagta hai ki abhi,
Bahut buree dashaa hai tumhaari,
Phir socho ki Guruji kee kripa ke bin,
Yeh haalat hoti is se bhi zyaada maadi.

Tumhaari haalat ka sahi andaaza,
Guruji ko hai tumse bhi zyada,
Tum chaahe na bol paao mukh se,
Guruji waqif Hain tumhaare har dukh sukh se.

Kisee ne tumhaare sangg anuchit kiya,
Toh Guruji is paristhiti ko bhi sambhaalenge,
Tumhaare jeevan mein jaisi bhi uljhan ho,
Neeyat achchi hai toh Ve usey suljhaa lenge.

Arey, jab tum niraash aur udaas ho hotey,
Toh Guruji ke chakshu tumhaare naynon se bhi zyada hain rotey,
Tumhaare karmon ka bhugtaan karaane ke liye,
Guruji aaj bhi nahin Hain sotey.

Isliye iska toh prashn hee nahin hai uthtaa,
Ki Guruji tumhaari vintee sunenge ya nahin,
Haan, Unhe samarpan kar ke Unhe jeevan kee doar saump do,
Ve hameshaan vahee karenge jo tumhaare liye hoga sahi.

Swaarth na laao vichaar mein,
Sabke bhaley ke liye maango dua,
Phir dekhna Guruji tumse kitne khush hongei,
Kyunki tumhaari praarthanaa mein zikr sabka hua.

Guruji tumse kabhi bhi muh na modenge,
Ve tumhe kabhi bhi nahin chodenge,
Nyaayaadheesh Hain Ve Bhagwaan ke swaroop mein,
Tumhaare uddhaar ke liye aayenge kisee bhi roop mein.

Isliye tum himmat na haarna,
Dil mein basaa lo yeh sachchi dhaarna,
Ki Guruji se kuch bhi chhupta nahin,
Aur kisee bhi bhakt ka kalyaan rukta nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2020

Om Namaha Shivaya
Aaj Ka Suvichaar 🙏🏻🙏🏻 # 926

 Guruji Hee Hamaare Sarvesh Hain

Anant Chaturdashi ka din hai aaya,
Vishnu ji ke sammaan mein,
Ananta toh Vishnuji ke Hain avataar,
Jo Paalankarta Bhagwaan Hain.

Jab Kauravon ne Pandavon ko haraaya,
Jooey ke khel mein chhal se,
Toh Paandavon ne apna raajya kho diya,
Aur Ve ghabraaye aane waale kal se.

Tyaag kar saara aisho-aaraam,
Unhonei vanvaas le liya,
Tabb Krishanji gaye Unhe milne,
Aur Unhe mushkil se nikalne ka upaaya diya.

Krishna Bhagwaan kee baat maankar,
Yudhishthir ne Prabhu Anant ka kiya upvaas aur vandan,
Is shraddha poorna pooja se,
Ve apna raajya paakar huey sampann.

Ek aur pauraanik katha mein,
Brahmin putri Sushila ne ‘Ananta shapath’ lee,
Lekin uskee pooja mein uske pati ne vighn daali,
Phir bhi Ananta ne unhe saari khushi dobaara dee.

Isee din par Ganeshji ka pyaar bharaa visarjan,
Har varsh itne ullaas ke sangg hai hota,
Har koi khushi se gaata hai Ganeshji kee mahima,
Chaahe bhakt bada ho ya ho chhota.

Jabb se Guruji ne liya hai hamein sharan mein,
Kashi aur Baikunthdhaam mila Unke kamal charan mein,
Jahaan mil jaaye saare teerath dhaam ka sukh,
Aisee paawan panaah mein phir kaahe ka dukh?

Guruji ke bharose hee hai ab janam maran,
Kyunki Guruji hee Hain dukh haran mangal karan,
Guruji mein Brahma, Vishnu, Mahesh Hain,
Guruji mein Hain Ganesh, aur Guruji hee hamaare Sarvesh Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 31, 2020

Om Namaha Shivaya
Aaj Ka Suvichaar 🙏🏻🙏🏻 # 925

             Sukh Ka Dhan

Shaant na hoga jab takk mann,
Kaise praapt hoga sukh ka dhan?
Guruji , kewal Aapki karunadrishti se yeh mumkin ho sakta hai,
Kyunki mann toh idhar udhar bhatakne se nahin rukta hai.

Duur karne mein madad keejiye,
Agyaan kee raat ka andhera,
Aapki kripa se hee dekhne ko milega,
Hamein gyan roopi savera.

Apne ashirwaad ke amrit se,
Kar deejiye hamaara uddhaar,
Hamein vinaash se bachaa sakta hai,
Kewal Aapka kiya upkaar.

Aapke simran aur satsang mein hum,
Seekhein vikaaron se chhootne kee kalaa,
Varna ye manovikaar hum par bhaari padkar,
Denge hamaari satyanishtha (integrity)ko jalaa.

Ek hee mann hai hamaare paas,
Usey niyantran mein rakhna sikha deejiye,
Buss ye mann Aapka dhyan karey sadaa,
Aisa raasta isey dikhaa deejiye.

Jitna hum Aap mein leen rahenge,
Utna hee vyarth kee baaton se hongei duur,
Aur japp tapp hee veh saadhan hai,
Jis se mann ekaagr hoga zaroor.

Jo yeh mann abhi hai itna chanchal,
Veh Aapki mehar se ho jaaye nishchhal,
Aapka dhyan hee karega shanti pradaan, Aapki rehmat se milega sukh aur hoga kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2020

Om Namaha Shivaya
Aaj Ka Suvichaar 🙏🏻🙏🏻 # 924

Umr Bande Kee Rahi Thi Guzar

Umr bande kee rahi thi guzar,
Phir bhi na aa raha thaa usey nazar,
Ki kya hai is jeevan mein aslee dhan,
Isliye ashaant thaa uska mann.

Bhatak raha thaa veh idhar udhar,
Haalaat nahin rahe thei sudhar,
Khaa raha thaa thokar dar dar,
Jeete jee raha thaa mar.

Na manzil dikh rahi thi,
Na raasta aa raha thaa samajh,
Ateet ke khayaalon mein,
Baar baar raha thaa ulajh.

Na theek se veh khaa raha thaa,
Na koi chayyn veh paa raha thaa,
Jeevan neeras ho gaya,
Niraasha mein veh kho gaya.

Guruji kee kripa hui aparampaar,
Unhonei usey Apni sharan mein liya,
Bade Mandir dikhaaya bande ko swapn mein,
Aur vahaan pahunchne ka gyan diya.

Yahaan vahaan se poochhte huey,
Bade Mandir takk banda pahuncha,
Adbhut sa ehsaas hua usey,
Dekh kar Shivlinga itna ooncha.

Bheetar gaya veh kuch jaane bin,
Raat thi, lekin raunak thi jaise ho din,
Itnee sangat dekhi usne aur baitha veh darbar mein,
Aasan dekhte hee doob gaya veh Guruji ke pyaar mein.

Itna anokha aakarshan, itna suhaana spandan,
Usne sees jhukaaya aur kiya vandan,
Bhaavuk hokar veh zor zor se ronei lagaa, Guruji ke ashish ka asar uspar honei lagaa.

Chai prasad peekar usne langar prasad bhi chhakaa,
Aur amrit peekar usey bahut anand aaya,
Mandir mein Guruji ke swaroop dekhkar,
Guruji ka divya roop uske dil mein samaaya.

Jodaghar par joote liye toh,
Kisee sangat ne usey diya Guruji ka swaroop,
Uskee khushi kee seema na rahi,
Jabb usmein bande ko dikha Shivji ka roop.

Guruji ke naam kee masti mein,
Tabb se usne jeena kar diya shuru,
Bahut khushkismat maana usne swayam ko,
Kyunki usey mil gaye thei uske Guru.

Buss, phir toh kya kehne uske,
Veh toh Guruji kee kripa se tarne lagaa,
Jo sankat ek ke baad ek aata thaa jeevan mein,
Veh sankat bhi uss-se darne lagaa.

Guruji ne dee usey shakti aur prerna,
Aur tabb se uska swaasthya sudharne lagaa,
Guruji ne usey dee himmat aur chetna,
Aur veh apne kaam-kaaj mein aagey badhne lagaa.

Apne paraay kee pehchaan hui usey,
Laukik rishton kee asthirtaa usne jaanee,
Guruji se seedhaa naata hee sthir aur sachchaa hai,
Guruji kee yeh zaroori baat usne maanee.

Veh karta raha gupt sewa, aur simran aur satsang,
Uspar chadh gaya Guru bhakti ka pakka rangg,
Usne Guruji ko shukrana aur sarv-samarpan kar diya,
Guruji kee mehar se veh sadaa ke liye tarr gaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2020

Om Namaha Shivaya
Aaj Ka Suvichaar 🙏🏻🙏🏻 # 923

              Guruji Kee Bandagi

Guruji kee bandagi,
Deti hai nayee zindagi,
Na niyam, na naaraazagi,
Sirf saralta aur saadagi.

Guruji se bhaav ka izhaar,
Ismein ho masoom pyaar,
Na pratigya, na paabandi,
Kewal hukm kee razaamandi.

Guruji ka sowmya darbar,
Jahaan viraajmaan hotey Hain paalanhaar,
Na bhed-bhaav, na rusvaayee,
Sirf sweekriti aur sunvaayee.

Guruji ka diya prasad,
Ismein hota hai Unka ashirwaad,
Na gumaan, na ghamand,
Kewal kripa akhand.

Guruji ke prati saboori,
Ismein ho manzoori,
Na krodh, na ghabraahat,
Buss, shwaas mein vishwaas kee aahat.

Guruji ka simran,
Is se shaant ho mann,
Na aadambar, na andhvishwaas,
Buss, divyataa ka ehsaas.

Guruji ka satsang,
Laata hai ummeed aur umang,
Na shiqva, na shikaayat,
Sirf ikraar aur ibaadat.

Nishkaam niswaarth sewa,
Is se khush hotey Hain Devon ke Deva,
Na dhong, na dikhaawa,
Buss insaaniyat ka bulaava.

Guruji Ke Charan,

Dete Hain hamein sharan,

Na thokar, na prahaar,

Sirf karam katne ka intazaar.

Guruji ko kiya hua samarpan,
Chamkaata hai dil ka darpan,
Na zikr, na fikr,
Kewal Unka shukr.

Guruji ka shukrana,
Yeh karna na bisraana,
Na bichadna, na bhool jaana,
Buss, shraddha se rishta nibhaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2020

Om Namaha Shivaya
Aaj Ka Suvichaar 🙏🏻🙏🏻 # 922

        Guruji Ka Gungaan

Guruji kee mahima phaylaate chalo,
Guruji kee mehar ke geet gaate chalo,
Masti mein gungunaate chalo,
Dil mein ullaas tum laate chalo.

Yeh Guruji ka gungaan hai,
Iska meetha parinaam hai,
Ismein sukh aur aaraam hai,
Yahee toh aata kaam hai.

Guruji ke gungaan mein amrit kee pavitrataa hai,
Guruji ke gungaan mein chhaaon kee sheetaltaa hai,
Guruji ke gungaan mein Guruji ke liye pyaar hai,
Guruji ke gungaan mein Guruji ke liye satkaar hai.

Guruji ka gungaan karti hai saari sangat,
Guruji ka gungaan sunti hai saari sangat,
Guruji ke gungaan mein itna chayyn hai,
Guruji ke gungaan se num hotey nain hain.

Guruji ke gungaan mein hai hamaari suraksha ka sandesh,
Guruji ke gungaan se Guruji karein dil mein pravesh,
Guruji ka gungaan hota rahe baar baar,
Guruji ka gungaan hamein deta hai taar.

Guruji ke gungaan se bhakton ka hota hai kalyaan,
Guruji ke gungaan se sadaa rehta hai Guruji ka dhyan,
Guruji ka gungaan dil se rasna par hai aata,
Guruji ka gungaan aathon peher hai bhaata.

Guruji ke gungaan se utsaah badhta hai hamaara,
Guruji ka gungaan hai Guru mahima kee behti dhaara,
Guruji ka gungaan Guruji ko lagtaa hai pyaara,
Guruji ka gungaan hai har asahaay ka sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja