Aaj Ka Suvichaar

August 14,2025

Om Namaha Shivaya
Aaj Ka Suvichaar 🙏🏻🙏🏻

#2734

Guruji Kee Dee Prakriti Ka

Aye samundar, tu itna na itraa
Tu toh Guruji kee kripa se hai itna bada
Arey taruvar, tu itna sundar hua
Kyunki Guruji kee rehmat ne tujhko chhua.

Sunn le dharti ko dekhte huey tu gagan
Tu jeevit hai Guruji kee paakar sharan
Shokhiyon kee ada se jhoomti hawaayein
Tumhe miltee hain Guruji se divya duaaein.

Agni, apne tej par tu abhimaan yoon na kar
Teri shakti pe hai Guru ashish ka asar
Dharti, Guruji dilavaayein tujhe sammaan
Tere poshan se jeevit hai har insaan.

Paani taruvar aur dharti aur ye gagan
Hawaayein agni karein Guruji ko naman
Srishti mein inkee sewa hai itnee badi
Tabhi Guruji kee kirpa inke sangg hai khadi.

Insaan bann-na nahin tu abb aur naadaan
Prakriti bin na bachenge tujhmein praan
Jagaa rahe Hain Guruji dekar chetna ka daan
Abb bhi samay hai sudhar jaa tu o insaan.

Prakriti hai Guruji ka deeya parsad
Ismein shaamil hain tere liye ashirwaad
Prakriti kee daya se tu hai aabaad
Guruji kee dee prakriti ka kar tu dhanyawaad.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Dee Prakriti Ka (08/14/2025)

August 13,2025

Om Namaha Shivaya
Aaj Ka Suvichaar 🙏🏻🙏🏻

#2733

               Shukrana Ka Afsaana

Guruji ke charnon mein ho jaaye anuraag jiska
Bhaagya khul jaata hai uska
Guruji ke charnon mein hai vo sharan
Jahaan jo karta hai jitna samarpan
Utna hee sukhdaayi ho jaata hai uska mann
Beshak jaisa bhi chal raha ho uska jeevan.

Kyunki samarpan mein aatmasaat hai vo atal vishwaas
Ki Guruji sada Hain aas paas
Aur har aata jaata shwaas
Unkee meher se lagta hai khaas.

Kyunki har shwaas hai daat
Unka deeya hua
Har kalyaan jo ho raha hai
Vo hai Unka kiya hua.

Kyunki Guruji Hain kalyaankarta
Ve hee Hain dukh harta
Unkee kripa bin nahin mumkin
Kar paana Unhe samarpan
Guruji kee praapti na ho paaye
Unkee kripa ke bin
Isliye jitne pal dete hain tujhe raat aur din
Na gavaa tu unhe har ghadi ko gin gin
Guruji ko yaad karta chal
Safal kar le apna har pal
Unkee yaad se tera antas ho jaaye yoon aabaad
Ki jo ho raha hai vo tu maan lega Unka deeya prasad
Aur iske sangg apne har karma ko bhi karta jaayega tu Unhe arpan
Toh tujhse ho paayega Guruji ke charnon mein sarv-samarpan
Shikayatein hoti jaayengi khatam
Aur shukrana ka afsaana bann jaayega tera jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Shukrana Ka Afsaana (08/13/2025)

August 12,2025

Om Namaha Shivaya
Aaj Ka Suvichaar 🙏🏻🙏🏻

#2732

      Savaar Huey Ho Naav Mein Tum

Savaar huey ho naav mein tum
Guruji ke nirmal naam kee
Abb kya intazaar subah kee
Aur kaisi intazaar shaam kee
Har ghadi mein tayyaari karo
Jaane param dham kee
Dincharya toh chalti rahegi
Dunivayi kaam aur aaraam kee.

Guruji kee sharan milee hai kismat se
Nahin mumkin ye bin Unkee rehmat ke
Is naav mein Unhee par kendrit raho
Unhee kee suno, Unse hee kaho.

Naav mein goonjein Guru mahima ke bol
Naav mein mann na honei paaye daanva-dol
Guruji ke haath mein hai naav kee patvaar
Naavik bhi Hain swayam Ve Parwardigaar.

Paani kee leherein Unhe karti rahengi salaam
Gagan jhuk kar karta rahega Unhe pranaam
Hawaayein jhoomengi Unke paawan sparsh se
Tum bhi Unpar sab chod kar toh dekho harsh se….

Naav mein Guruji ko khush karo apne bhole bhaav se
Unka chintan karte raho chaarul chaav se
Ve le chalenge tumhe bhavsaagar ke paar
Buss, thoda sa aur kar lo intazaar.

🌹🌹🌹🌹🌹🌹🌹

Jai Guruji 🙏🙏
Dhirja

Savaar Huey Ho Naav Mein Tum (08/12/2025)

August 11,2025

Om Namaha Shivaya
Aaj Ka Suvichaar 🙏🏻🙏🏻

#2731

Raasta Ho Jaayega Tayy

Tayy karte huey jeevan ka raasta
Guruji kee yaad se rakhiye vaasta
Beshak ho adrishya, par awashya hota rahega aapke antas ka pavitrikaran
Guruji kee kripa se chetna ka bhi hota rahega shuddhikaran.

Guruji kee yaad mein Guruji ka ho naam
Ya japte rahiye ‘Om Namaha Shivaya’ subah shaam
Beej mantra ya mantra jaap
Guruji kee kripa se dhulte rahenge paap.

Guruji kee karuna aur leela kee jhalkiyan
Aapke nijee safar mein dikhtee rahengi Aapko
Raaste bhar mein Guruji kee anukampa aur bakhshish
Kumm karegi Aapke dukh aur santaap ko.

Raaste mein sunte sunaate rahiyega Guruji ke satsang
Guruji kee dee hui sewa karte rahiyega
Shraddha aur saboori sangg rakhiye safar jaari
Kya maalum kabb aa jaaye Aap par Guruji kee kripa kee baari.

Guruji kee yaad mein chaltey huey
Raaste kee baadhaayein kumm hoti chali jaayengi
Beshak chunautiyan aayengi
Par Guruji kee meher se talti jaayengi.

Sabse badi baat
Guruji na chodenge saath
Unke saanidhya kee daat
Degi karma Aapke kaat.

Raaste mein badalenge mausam
Bhinn bhinn hoga paryaavaran
Na chodiyega karna Guruji ka chintan
Toh sakaraatmak banaa rahega spandan.

Har kadam par Guruji kee yaad
Rakhegi Aapke utsah ko aabaad
Har shwaas mein hogi Shivmayi layy
Aur raasta ho jaayega tayy.

🌹🌹🌹🌹🌹🌹🌹

Jai Guruji 🙏🙏
Dhirja

Raasta Ho Jaayega Tayy (08/11/2025)

August 10,2025

Om Namaha Shivaya
Aaj Ka Suvichaar 🙏🏻🙏🏻

#2730

       Anant Kee Oar

Anant kee oar yaatra karne wale
Na bano tum saadhak darne wale
Guruji ke chintan dwaara ho jaao nirbhay
Anant kee oar badho bina kisee sanshay.

Guruji SadaShiv Hain swayam
Kar do har soch, har karma Unhe arpan
Ve jaante Hain tumhe aur tumhaare jeevan ko
Unka manan dega shanti tumhaare mann ko.

Ye yaatra saadhaaran nahin
Na hee hai ye chhoti si
Anivaarya hai ye anant takk jaane ke liye
Yahaan gunjaaish nahin kisee bahaane ke liye.

Bandd karna hoga mann ka dwaar
Taaki aakraman karne mein safal na hon vikaar
Kendrit rehna hoga Guruji Maharaj par
Rokna hoga duniyavi keechad ka khud par asar
Achchaayee aur sachchaayee kee oar behna hoga
Sadh sangat ke angg sangg rehna hoga
Ekant bhi utna zaroori hai jitna hai atma-nireekshan
Guruji se judey rehne ka prayatn chalna hoga har kshan.

Tumhaare har prayaas ko karega aabaad
Guruji ka karunamayi kripa prasad
Na chodna tum karna prayaas
Na chodna karna Guruji se ardaas
Anant kee oar aayenge pathreele moad
Unhe karna hoga tumhe paar
Oonchaayee bhi karni hogi tayy
Isliye Guruji ke chintan dwaara ho jaao nirbhay
Anant kee oar badho bina kisee sanshay.

🌹🌹🌹🌹🌹🌹🌹

Jai Guruji 🙏🙏
Dhirja

Anant Kee Oar (08/10/3025)

August 9,2025

Om Namaha Shivaya
Aaj Ka Suvichaar 🙏🏻🙏🏻

#2729

      Guruji Maharaj Kee Leela Mein

Guruji Maharaj kee leela mein
Bhakt ke tark-vitark ka nahin koi kaam
Vo hai akal aur rafl ke paar
Jis paar ka bahut hee sookshma hai dwaar.

Jisne jitna akal aur rafl ko choda
Guruji ne utna usey Apne sangg joda
Phir chaahe usey Unhonei neembu kee bhanti nichoda
Bhavishya mein kabhi na hua uss bhakt ka Guruji se bichoda.

Neembu kee bhanti bhakt ko nichodna toh hai Guruji kee tarkeeb
Lene bhakt ka imtehaan laane ke liye usey Apne aur bhi kareeb
Aise anubhav ke liye bhi chaahiye achcha naseeb
Isliye jiska ye haal ho, vo kabhi na samjhe swayam ko gareeb.

Yakeenan vaisa samaa nahin hota aasaan
Beshak mann jaane ki angg sangg Hain tabb bhi Bhagwaan
Lekin rukta nahin vo samay
Ismein nahin hai koi sanshay
Guruji hamesha kee tareh
Saath hotey Hain har pal har jageh
Sab kuch sambhaalte Hain
Burey haalaat se nikaalte Hain.

Kaat kar bhakt ke dukh
Guruji bakhsh dete Hain sukh
Buss, Guruji kee oar rakhna hai rukh
Antakaran aur atma ka
Maan kar apne ko ansh Paramatama ka
Kyunki ye toh rishta hai ruhaani
Jisey poshit karne ke liye milee hai zindagaani
Jisne ye sachchaayee jaani aur maani
Nikhar gayi uss bhakt ke jeevan kee kahaani.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Maharaj Kee Leela Mein (08/09/2025)

August 8,2025

Om Namaha Shivaya
Aaj Ka Suvichaar 🙏🏻🙏🏻

#2728

               Fakir Aur Shubhchintak

Kaise hoga, hoga kya
Isee soch mein thaa reh gaya
Hokar pareshaan
Ik fakir naadaan.

Dekha usey shubhchintak ne ek
Jabb vo matha raha thaa tek
Baahar ek mandir ke dwaar par
Bina jaaye mandir ke bheetar.

Shubhchintak ne dekha
Fakir ka aansoo baha
Shubhchintak ko aaya taras
Usne fakir ko ek tasveer dete huey kaha
Ki vo tasveer hai Guruji Maharaj kee
Srishti ke sartaj kee.

Fakir utsuk honei lagaa
Uske bheetar aur bhi jaan-ne ka bhaav jagaa
Vo baitha shubhchintak ke sangg
Aur sunn-ne lagaa uske mukh se satsang.

Har satsang mein thaa Guruji kee mahima ka stavan
Sunte sunte Guruji ke prati bhakti bhaav se bhara fakir ka mann
Usey lagaa ki mil rahi hai uske jeevan ko disha
Aur abb khatm hogi duvidhaaon aur sanshay kee nisha.

Sunkar Guruji kee vadiyaayee ka gungaan
Hua fakir ka kalyaan
Shubhchintak ko bhi mila Guruji ka ashirwaad
Dono apne apne raaste chal diye uske baad.

Fakir har roz baatein karne lagaa Guruji kee tasveer se
Guruji prasann huey fakir se
Uska samay jabb aaya
Tabb Guruji ne usey Apne mandir bulaaya
Guruji ko aayi fakir par daya
Unhonei usey dikhaaya raasta naya
Jispar fakir kee hui sampoorna unnati
Aur Guru kripa se milee usey sadgati.

Vo fakir hai bheetar hum sabke
Jo aasare hain Uss Rabb ke
Vo Rabb, jo Guruji Maharaj Hain swayam
Jinke bharose chal raha hai hamaara jeevan.

Guru bin gati nahin
Guruji bin sumati nahin
Adhyatamik ho ya bhautik, Guruji sudhaarein har pehlu bhakt ke jeevan ka
Guru kee kripa bin na ho paaye pavitrikaran antakaran ka
Guruji Maharaj kee meher se mitt jaaye saara agyan
Hamaare bheetar ke fakir ko taarein Guruji meharbaan.

🌹🌹🌹🌹🌹🌹🌹

Jai Guruji 🙏🙏
Dhirja

Fakir Aur Shubhchintak (08/08/2025)

August 7,2025

Om Namaha Shivaya
Aaj Ka Suvichaar 🙏🏻🙏🏻

#2727

                   Hamaare Karam

Hamaare hee pichhle anubhav
Aur unke prati pratikriya hamaari
Kriya ho ya ho soch hamaari
Ya phir dono saath saath ya baari baari
Yahee toh hain hamaare karam
Jo nishchit karein hamaara bhaagya aur janam maran.

Anubhav jis bhi janam ke hon
Unse judey karam hotey rehte hain sanchit
Praarabdh bhugatna anivaarya hota hai
Taaki atma ka hota rahe hitt.

Kitna achook hai karam ka niyam
Nyayadheesh Guruvar kee hukoomat mein
Ye koi baahari vyavastha nahin
Guruji jo nishchit karte Hain vahee hota hai sahi.

Kathin lagey ya lagey saral
Ye kaayda hai atal
Shukr hai ki Guruji Maharaj aksar
Sambhaalte Hain hamaare karmon ka bhaar adhiktar.

Purusharth toh padega nibhaana
Agar ruhaani safar mein shikhar takk hai jaana
Guruji ne Apne charnon mein deeya hai thikaana
Isliye kyun dhoondhna koi bhi bahaana?

Shukrana karte karte Guruji se maangein himmat
Bakhshish maangte huey maangein Unse sumat
Unkee sharan mein awashya hoga atma ka hitt
Unke kamal charan mein kalyaan hai bilkul nishchit.

🌹🌹🌹🌹🌹🌹🌹

Jai Guruji 🙏🙏
Dhirja

Hamaare Karam (08/07/2025)

August 6,2025

Om Namaha Shivaya
Aaj Ka Suvichaar 🙏🏻🙏🏻

#2726

         Milee Jo Guruji Kee Sharan

Milee jo Guruji kee sharan
Toh adbhut andaaz se chalne lagaa jeevan
Spashtata milne lagi har sanshay ko
Aur sanshay honei duur lagey
Chetna ke ve jharokhe jo soye se thei
Ve bhi Guruji kee kripa se jagey.

Uddeshyaheen si chal rahi thi jo zindagi
Usey gantavya dikhaane lagi abb bandagi
Bandagi ko milee Guruji kee bakhshindagi
Vo bhi nikharne lagi chod kar sharmindagi.

Atma-nireekshan aur atma-sanyam ka ye daur
Guruji le jaa rahe Hain isey jis oar
Vaheen par yakeenan uddhaar hai
Vaheen gantavya ka dwaar hai.

Kyunki vo raasta jo Guruji dikhaate Hain
Jispar chalna Ve sikhaate Hain
Vahaan nirantar vrishti hoti hai Unke ashirwaad kee
Vahaan atma ko praapti hoti hai Unke kripa prasad kee.

Guruji kee raza mein chalta rahe mere jeevan ka har daur
Guruji ke hukm ka paalan karti rahoon, na chaahoon margdarshan koi aur
Unhee se liv judi hai Unkee meher se
Abb toh Guruji ka saanidhya maangoon her peher se
Taaki vyarth na jaaye koi peher ya koi pal
Aur Guruji ka saanidhya praapt ho aaj aur kal.

🌹🌹🌹🌹🌹🌹🌹

Jai Guruji 🙏🙏
Dhirja

Milee Jo Guruji Kee Sharan (08/06/2025)

August 5,2025

Om Namaha Shivaya
Aaj Ka Suvichaar 🙏🏻🙏🏻

#2725

    Jheel Ke Kinaare

Baithi thi mai jheel ke kinaare
Naynon mein basey thei Guruji pyaare
Jheel mein khile thei kamal ke suman
Jinhe dekh kar prabhaavit hua mera mann
Phir socha ki jo mann kamal ko dekh kar hua itna prasann
Vo kya mehsoos karega Guruji ke darshan hongei jis kshan?

Jheel ka paani shant thaa
Sundar sa ekant thaa
Laayi thi apne sangg deeye
Prem se unhe jalaa diye
Jheel ke paani mein unhe bahaaya
Ya kahoon ki jheel ko unse sajaaya.

Suryaast ho chala thaa
Bada suhaana vela thaa
Mann mein Guruji kee yaad thi basee
Mai muskuraayee, phir mandd si hansee.

Geruan thaa akash ka rangg
Guruji kee ruhaani maujoodagi ne diya sangg
Divya khushboo ne mere bheetar aur baahar ko kiya prafullit
Guruji ko hee chete jaa raha thaa mera chitt.

Unkee mamta ke aanchal mein jaise jhoomne lagaa mera mann
Meri jholi bharti gayi paakar Unke ruhaani deedar ka dhan
Hui mai bhaav vibhor hokar aisee magan
Ki bhool hee gayi ki mai jheel ke kinaare thi uss kshan.

Usee pal ek peeli titlee aayi
Aakar mere aaspaas mandaraayee
Sooraj dhalne ke samay titlee dekhi mainey pehli baar
Maana is anubhav ko bhi mainey Guruji kee leela aparampaar.

Akash mein honei lagg raha thaa andhera
Kintu mere roam roam mein thaa sundar savera
Guruji ka shukrana karte huey mai ghar ke liye ravaana hui vahaan se
Guruji ke khayaalon mein khoyi hui, bekhabar hui jahaan se.

Guruji kee kripa se mainey itnee sundar shaam bitaayee
Mere Guruji mahaan Hain, vaddi hai Unkee vadiyaayee
Jeevan ka har anubhav, har pal beete Guruji kee hee yaad mein
Kalyaan hee kalyaan basaa hai Guruji ke har ashirwaad mein.

🌹🌹🌹🌹🌹🌹🌹

Jai Guruji 🙏🙏
Dhirja

Jheel Ke Kinaare (08/05/2025)