Aaj Ka Suvichaar

July 28, 2025

Om Namaha Shivaya
Aaj Ka Suvichaar 🙏🏻🙏🏻

#2717

Raat, Sundar, Suhaani

Raat, sundar, suhaani
Chandni ruhaani
Pareshaan praani
Chalta raha.

Na mukh par muskaan
Na dil mein armaan
Na jhoothi na sachchi shaan
Buss, praani pareshaan.

Koi chaahat nahin
Koi raahat nahin
Apnon kee aahat nahin
Praani chalta raha.

Bheetar duvidhaaon ka tufaan
Dekhkar ajab jahaan
Tann mann zehen zubaan
Reh gaye bilkul hairaan.

Praani thaa gyani
Gyan uska thaa ruhaani
Usne Guruji kee leela pehchaani
Aur kumm honei lagi uskee pareshaani.

Guruji pahuncha rahe Hain vairagya ke mukaam par
Jahaan se aur bhi aagey badhega uska safar
Praani ko apne bheetar se hee milee ye khabar
Hua uspar chetna ka aisa asar
Ki pareshaani honei lagi duur
Har duvidha honei lagi chuur chuur
Sab hai karmon ka dastoor
Aur Guruji kalyaan kar rahe Hain zaroor
Gaya vo samajh
Uske vichaar gaye sulajh
Suhaani raat kee chandni ruhaani mein
Aagey badha karmon kee kahaani mein
Koi kamee nahin thi Guruji kee meharbaani mein
Ve uske angg sangg rahe uskee zindagaani mein.

Jaisi bhi ho bhakt kee kahaani
Guruji karte Hain har bhakt par meharbaani
Ye hai bhakt ke kalyaan kee sabse badi nishaani
Ye sachchaayee aaj nahin toh kal sabne hai jaani.

🌹🌹🌹🌹🌹🌹🌹

Jai Guruji 🙏🙏
Dhirja

Raat, Sundar, Suhaani (07/28/2025)

July 27, 2025

Om Namaha Shivaya
Aaj Ka Suvichaar 🙏🏻🙏🏻

#2716

        Madhu, Aapki Meharbaani Ka

Mere sundar sartaj
Mere Guruji Maharaj
Soumya SadaShiv sarvagyani
Anant akhand antaryami
Koi nahin Aapsa daani
Daya ka daan maange ye nimaani.

Aap sarvasaamarthyavaan
Aap sarvashaktimaan
Aapse chale ye saara jahaan
Aap maya ke swami, Aap meharbaan.

Aapse jude rehne kee hai aas
Aapse jude rehne ka hai prayaas
Jabse hua hai ye ruhaani ehsaas
Ki kitnee anmol hai divya madhu kee mithaas.

Divya madhu, Aapki meharbaani ka
Hai aisa sahaara meri zindagaani ka
Jiske bin mumkin nahin meri zindagi
Jis par nirbhar hai meri kee bandagi.

Kyunki Aapki meher bin
Aapka simran bhi nahin mumkin
Aur Aapki yaad bin na jee paaoon ek bhi din
Beshak apna loon mai anya tareeke bhinn bhinn.

Aapse hee mera har shwaas hai
Aap par hee vishwaas hai
Aapke hukum se hee jeevan mein loon har kadam
Toh yakeenan sahi disha aur dasha kee oar chalega mera jeevan.

Aapki meharbaani ka madhu milta rahe
Uss se mere bheetar ka phool khilta rahe
Toh jaanti hoon ki tarr kar sanvar jaayegi meri ye atma
Aapki meharbaani se hee chalti hai meri zindagaani, mere Paramatama.

🌹🌹🌹🌹🌹🌹🌹

Jai Guruji 🙏🙏
Dhirja

Madhu, Aapki Meharbaani Ka (07/27/2025)

July 26, 2025

Om Namaha Shivaya
Aaj Ka Suvichaar 🙏🏻🙏🏻

#2715

 Oonchaayee Kee Oar

Oonchaayee kee oar chadhna mushkil
Par oonchaayee se neeche aana kitna aasaan
Chadhte chadhte gir na jaayo kaheen
Rehna har pal saavdhaan.

Darne se kuch nahin milega aye insaan
Chinta na karo, angg sangg Hain Bhagwaan
Guruji ke param sundar roop mein
Jeevan kee chhaon dhoop mein.

Guruji ka hai sahaara
Prayaas hoga tumhaara
Toh oonchaayee ka nazaara
Dikhega saara ka saara.

Shraddha aur saboori
Guruji kee prashansa bhuri bhuri
Mitaani Guruji se har duuri
Ye hain bilkul zaroori.

Guruji ke haath mein saump kar apni naiya kee patvaar
Badhte chalo oonchaayee kee oar karte huey koshish baar baar
Girne par kaheen maan na lena tum haar
Jodey rehna tum Guruji sangg seedhi ruhaani taar.

Ye hai tumhaara Unke sangg seedha naata
Na koi bichauliya na hee beech mein koi baadha
Na koi dikhaawa na karmakand na chadhaava
Bhole bhaav se seenchit ho ye rishta seedha saada.

Girte uthte chalte chalte
Oonchaayee kee oar badhte badhte
Guruji kee meher ka awashya hota chalega asar
Aur Ve pahunchaayenge tumhe shikhar par.

🌹🌹🌹🌹🌹🌹🌹

Jai Guruji 🙏🙏
Dhirja

Oonchaayee Kee Oar (07/26/2025)

July 25, 2025

Om Namaha Shivaya
Aaj Ka Suvichaar 🙏🏻🙏🏻

#2714

                    Mera Ye Janam

Param poojya Guruji Maharaj,

Aapke naad se mera bheetar hai aabaad
Kintu mujhe abhi uskee nahin pehchaan
Phir bhi shukr hai Aapka, mere maalik
Ki mai is sundar satya se nahin hoon anjaan.

Aapki kripa kee behti dhaara
Hai mere liye atoot sahaara
Jo amrit ke roop mein mere bheetar ke vish ko dhota rahe
Aapki kripa se Aapki aseemata mein mera katra katra khota rahe.

Aapki shunyata kee sampoornata ke saagar mein basee shanti
Aapki karuna kee komalta ke kunj mein basee kanti
Jabb jabb Aap dilaate Hain inka khoobsoorat ehsaas
Toh ek aise anand se garbhit ho jaata hai mera shwaas
Jiska mai varnan kar na paati hoon
Kintu jis se mai aur bhi aakarshit hoti jaati hoon
Aapki aur Aapki mahaanata kee oar
Aur meri ruhaani aankhein dekh paati hain vo doar
Jis se Aapne mujhe joda hai Apne se
Jo kaheen adhik sundar hai kisee bhi sundar sapne se
Kyunki vo doar hai uss anmol rishte kee gavaah
Jismein Aapne dee hai mujhe Apni paawan panaah.

Jhuka hai sir mera, uspar hai Aapka haath
Shukraguzaar hoon ki mila hai Aapka saath
Aapne itnee daya kee hai mujh gareeb par
Vinamr sa naaz hota hai mujhe mere naseeb par
Ki Aapki meher se milee hai Aapki sharan
Varna vyarth chala jaata mera ye janam.

🌹🌹🌹🌹🌹🌹🌹

Jai Guruji 🙏🙏
Dhirja

Mera Ye Janam (07/25/2025)

July 24, 2025

Om Namaha Shivaya
Aaj Ka Suvichaar 🙏🏻🙏🏻

#2713

               Duniya Kee Ye Mehfil

Duniya kee ye mehfil
Ye na teri hai na hai meri
Kuch bhi na paayega tu antt mein
Kar ke hera pheri.

Maalik Hain param poojya Guruji Maharaj
Saari sangat ke Shiv Sartaj
Unkee sharan mein hee karmon ke khaate khulenge
Unkee sharan mein hee paap dhulenge
Kyunki Unke charnodak se zyada pavitra koi jal nahin
Ve kalyaan na kar rahe hon, aisa koi pal nahin.

Is satya ko bhi rakhna hoga yaad
Ki Guruji hamaari swatantra ichcha mein na karein hastakshep kabhi
Is yaad se rakhein matt ko aabaad
Toh ho sakta hai ki khud jeeyein aur doojon ko bhi jeene dein sabhi.

Agar aisa ho jaaye sabka jeevan
Toh kalyuga swayam hee satyuga jaayega bann
Guruji hum sabse hongei kitne prasann
Jabb hum sabb Unke bande jaayenge bann.

🌹🌹🌹🌹🌹🌹🌹

Jai Guruji 🙏🙏
Dhirja

Duniya Kee Ye Mehfil (07/24/2025)

July 23, 2025

Om Namaha Shivaya
Aaj Ka Suvichaar 🙏🏻🙏🏻

#2712

         Aapke Kadmon Ke Nishaan

Mere param poojya Guruji Maharaj,
Mere dayavaan sartaj,

Aapke kadmon ke nishaan
Le jaayein jahaan
Meri manzil hai vaheen
Aur kaheen nahin.

Rahoon sada Aapke kadmon ke taley
Mera kann kann dhool bann kar paley
Neeche Aapke kadmon ke
Paap dhulein mere kayi janmon ke.

Aapke kadam, Aapke vachan
Karti rahoon Inka naman
Sada jhuka rahe mera antakaran
Aapki sewa mein beete jeevan.

Mai Aapko sada khush kar sakoon
Aapko rijhaate huey kabhi na thakoon
Meri saansein bheegeein hain Aapki rehmat mein
Samarpit rahein ve sada Aapki khidamat mein.

Aap mil jaayein toh bhaagya khil jaayein
Aur koi tamanna baaki na rahe
Apne se kabhi juda na keejiyega
Mere dil kee har dhadkan Aapse ye kahe.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Kadmon Ke Nishaan (07/23/2025)

July 22, 2025

Om Namaha Shivaya
Aaj Ka Suvichaar 🙏🏻🙏🏻

#2711

Aapka Dwaar Aur Aapki Dagar

Param poojya Guruji Maharaj,

Pichhle janmon ke karmon ka bhaar
Bilkul bhi na sambhaal paaoon mai khud
Shukr hai Aapka, mere Prabhu
Ki Aapse gayi mai jud.

Ye deh bann jaayegi raakh kee dheri
Par Aapka ansh hai ye rooh meri
Is rooh ko Aapne liya hai chhoo
Iss rooh kee hai ye arzoo
Ki Aapko khush rakh paaoon
Aapke charnon mein tann mann se sees jhukaaoon
Aapko nihaarti rahoon
Aapko pukaarti rahoon
Aapki sunti rahoon
Kewal apni na sunaati rahoon.

Aapke deewanepann mein yoon rahoon mastt
Ki sataaye na mujhe koi chhal kapat
Sumat bakhshiye ki na karoon gaflat
Vivek deejiye taaki jaanoon kya hai sahi kya galat
Sahi aur satya ko apnaane kee deejiye buddhi
Bakshte rahiye antakaran kee shuddhi
Aapki kripa bin mumkin nahin ye sabb
Aapke charnon mein hee rehna chaahoon mai abb.

Sada bulaate rahiyega Aap mujhe Apne dar par
Kabhi na keejiyega mujhe Apne se duur, mere Guruvar
Bahut saari zindagi beet gayi karte huey agar magar
Shukr hai ki mil gaye Aapka dwaar aur Aapki dagar.

🌹🌹🌹🌹🌹🌹🌹

Jai Guruji 🙏🙏
Dhirja

Aapka Dwaar Aur Aapki Dagar (07/22/2025)

July 21, 2025

Om Namaha Shivaya
Aaj Ka Suvichaar 🙏🏻🙏🏻

#2710

             Unkee Yaad Se Aabaad

Koi aaye lekar mann mein koi abhilaasha
Koi aaye jaan-ne dhyan aur ruhaani gyan kee paribhaasha
Koi aaye lekar koi koi asha
Koi aaye mitaane niraasha
Guruji ke dar par
Paate hee shubh avsar.

Naseebon se milta hai aisa avsar
Vo bhi Guruji ke hee bulaane par
Jahaan sangat sakti hai maatha tek
Aur Guruji badal sakte Hain unke lekh.

Kar na paaye ye Guru ke siwa koi bhi aur
Guru chaahein toh badal dein raaste ka har moad
Unhee kee kripa se manzil mil paaye
Unhee kee daya se bheetar ka kamal khil paaye.

Guruji ne thaama hai jiska haath
Guruji kabhi na chodein uss sangat ka saath
Phir chaahe ho khushnuma savera ya ho udaas si raat
Sangat sada kar paaye Guruji se baat.

Guruji se baat, ruhaani taar dwaara
Ye taar hai har sangat ka mazboot sahaara
Guruji se judey rehne ke liye
Unkee sunn-ne aur Unse kehne ke liye.

Mushkil chhoti ho ya ho badi
Har din, har peher, har ghadi
Guruji ke saanidhya mein rehna hai mumkin
Balki abb toh namumkin hai jeena Guruji kee yaad ke bin.

Guruji se hai fariyaad
Ki dil mein basee rahe Unkee yaad
Rehkar Unkee yaad se aabaad
Milta rahe Unka divya ashirwaad.

🌹🌹🌹🌹🌹🌹🌹

Jai Guruji 🙏🙏
Dhirja

Unkee Yaad Se Aabaad (07/21/2025)

July 20, 2025

Om Namaha Shivaya
Aaj Ka Suvichaar 🙏🏻🙏🏻

#2709

       Mann Se Karoon Naman Aapka

Param poojya Guruvar,

Mann se karoon naman Aapka
Mann se karoon manan Aapka
Deejiye aisa manobal
Ki mann Aap mein magn rahe har pal.

Mann ko mai swayam kaabu kar paaoon
Mujh mein vo saamarthya kahaan
Mann ko bhi iskee khabar hai
Aur veh daudta hai yahaan vahaan.

Daat bakhshte rahiye simran kee
Sthirta bakhshiye mann kee
Bheed ho ya ho ekant
Aapki daya se mann rahe shant.

Mann vichalit na ho kisee tareh ke bhi tufaan se
Mann ghabraa na jaaye kisee bhi imtehaan se
Vikaaron ke aakraman ke dauran mann na padey kamzor
Mann par na chale kisee pratikool prabhav ka zor.

Mann mein ho sanyam
Mann par ho mera niyantran
Vaisa, jaisa Aap chaahein
Aap hee ujjwal keejiye mann kee raahein.

🌹🌹🌹🌹🌹🌹🌹

Jai Guruji 🙏🙏
Dhirja

Mann Se Karoon Naman Aapka (07/20/2025)

July 19, 2025

Om Namaha Shivaya
Aaj Ka Suvichaar 🙏🏻🙏🏻

#2708

                   Rabb Ka Dar

Param poojya Guruji Maharaj,

Aapka shukrana karte karte
Bhaav vibhor hokar aankhein huin numm
Jitna bhi shukrana karoon Aapka, daata
Vo sach mein hoga kumm
Kyunki Aapki meher aseem hai
Aur bahut seemit si hai meri shabdaavali
Dil chaahta hai ki Aapka gungaan karti rahoon
Ghar ghar aur gali gali.

Aapki dee har niyaamat, har bakhshish
Aapka diya hua har ashish
Seemabaddh nahin duniyavi daayare dwaara
Kyunki Aapki har niyaamat hai deerghkaalik sahaara.

Mai bilkul agyani, Aapki leela na samajh paaoon
Buss, dil ye chaahe har pal Aapke gunn gaaoon
Saari duniya ko Aapki mahima sunaaoon
Aapke deedar mein palkein bichaaoon.

Aapke hukm ko sir aankhon par rakh kar
Jaari rahe mera ye ruhaani safar
Shukr hai abb rulna nahin mujhe idhar udhar
Shukr hai mujhe mil gaya hai Aap Rabb ka dar.

🌹🌹🌹🌹🌹🌹🌹

Jai Guruji 🙏🙏
Dhirja

Rabb Ka Dar (07/19/2025)