Aaj Ka Suvichaar

July 18, 2025

Om Namaha Shivaya
Aaj Ka Suvichaar 🙏🏻🙏🏻

#2707

                  Sampoorna Savera

Param poojya Guru Sahib,

Zindagi ke har moad par
Kayi chale gaye chod kar
Par Aap sada saath rahe Hain
Jaise jaise waqt ke jharne bahe hain.

Jaanti hoon aur maanti hoon ki aagey bhi
Mere angg sangg hongei Aap hee
Aapke sangg bandhi rahe meri doar
Isliye na sochoon bhi jaane kee kaheen aur.

Aap hee raasta, Aap manzil bhi
Har vele jo mann mein yaad rahe Aapki
Toh niraasha kar na sakegi ghar
Aisa dayalu hai Aapka dar.

Mainey jeevan kee jo bhi ghadi abb takk Aapki sharan mein guzaari hai
Uske liye mera tann mann, meri rooh ka kann kann, Aapka aabhaari hai
Jaise sambhaala hai Aapne aaj takk mujhe, vaise hee sambhaalte rahiyega
Apne charnon ke chetan chinh ke sahaare mere kamzor kadmon ko chalaate rahiyega
Thak na jaaoon, ruk na jaaoon
Aapke naman mein jhukti jaaoon
Aapki sharan mein rahe mera basera
Usee basere mein hai mera sampoorna savera.

🌹🌹🌹🌹🌹🌹🌹

Jai Guruji 🙏🙏
Dhirja

Sampoorna Savera (07/18/2025)

July 17, 2025

Om Namaha Shivaya
Aaj Ka Suvichaar 🙏🏻🙏🏻

#2706

      Guruji Ke Phool

Beej se upjaa paudha
Paudhe mein phool anek
Guruji nirmaata hamaare
Unkee sangat hai phool pratyek.

Har phool ko Apne amrit se seench kar
Guruji dete Hain khilne ka pyaara sa avsar
Sabhi phool Guruji kee sangat
Sabb par chadhe Guruji kee rangat
Guruji toh poora karein Apna vaada
Par rangg kisee phool par kumm, toh kisee par zyada.

Guruji se sabhi judey hain
Kuch Guruji kee oar mudey hain
Kuch jhuk jaate hain baahari hawaa ke prabhav se
Kuch gir jaate hain bhakti ke abhaav se
Tufaan mein sabhi phoolon ka hota hai imtehaan
Koi murjhaa jaate hain, koi lete rehte hain Guruji ka naam.

Guruji karein har sangat kee rooh ka poshan
Par sabki rooh ho bhinn bhinn janam mein roshan
Ve jaanein kaun Unke kareeb aur kaun Unse duur
Kisee par kumm, kisee par zyada hota hai Guruji ka noor.

Lekin sabse zaroori baat
Jo satya hai din raat
Vo ye ki Guruji ko sabhi phool hain pyaare
Guruji bante Hain har phool ke sahaare.

Guruji kee kripa se Unke sangat roopi phool
Sada sada khile rahein
Har phool mein atmasaat ho Guruji kee khushboo ruhaani
Aur Guruji ke kamal charnon mein beete har phool kee zindagaani.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Phool (07/17/2025)

July 16, 2025

Om Namaha Shivaya
Aaj Ka Suvichaar 🙏🏻🙏🏻

#2705

              Ye Hai Shiv Ka Sheher

Ye hai Shiv ka sheher
Yahaan bahe naad kee nirmal neher
Guruji ke roop mein Shiv Bholenath
Sada rehte Hain yahaan bhakton ke saath.

Guruji ke hain anekon gann
Rehte Hain Ve Guruji mein magan
Karte Hain Guruji kee sewa anant
Jaankar Guruji ko Shiv Bhagwant.

Sabke roop rangg alagg hain
Sab ke liye Guruji hee jagg Hain
Bhinn hotey huey bhi unmein hai ye satya ek
Ki Guruji kee sharan mein hai unmein se pratyek.

Ye hai Shiv ka sheher
Yahaan Gurbani goonjti hai aathon peher
Guruji ke saanidhya mein bhakt jann
Karte hain sewa, satsang, aur simran.

Ye hai Shiv ka sheher
Yahaan umadti hai shukrana kee leher
Har jann aur gann ke dil se
Sabke dil rehte hain khil ke.

Ye hai Shiv ka sheher
Yahaan kewal Guruji kee meher
Deti hai aane kee anumati
Aur Guruji bakhshte Hain sumati.

Ye hai Shiv ka sheher
Yahaan ke amrit se dhul jaata hai bheetar ka zeher
Yahaan Guruji ke charnon mein sab tarr jaate hain
Sab Guruji se kalyaan ka var paate hain.

Guruji se jitna jude rehne ka karenge aap prayaas
Mehsoos hogi Guruji ke sangg utnee Aapko kareebi
Jaan leejiye, ye hai Shiv ka sheher
Aap yahaan hain, ye Aapki khushnaseebi.

🌹🌹🌹🌹🌹🌹🌹

Jai Guruji 🙏🙏
Dhirja

Ye Hai Shiv Ka Sheher (07/16/2025)

July 15, 2025

Om Namaha Shivaya
Aaj Ka Suvichaar 🙏🏻🙏🏻

#2704

Paawan Prabha Aapki

Param poojya Guruji Maharaj,

Paawan prabha Aapki
Divya abha Aapki
Roshan karti hai mera jeevan
Roshan karti hai mera kann kann.

Aapki dee daat hai ye tann, mann, dhan
Phir bhi gustaakhi kar baithti hoon kabhi kabhi
Jaane anjaane mein ho jaata hai inka tiraskaar
Phir pachhtava bhi hota hai baar baar.

Aap kshamasheel, Aap dayavaan
Kar dete Hain maaf
Aapke hee prataap se
Antas ho sakta hai saaf.

Mere bheetar mal anek
Mere taaranhaar Aap ek
Om bhi Aap, Aap hee Ek Onkar
Aap hee Mahadev, Aap nirankaar.

Mere buss mein toh nahin hai Guruji
Aap pavitra kar deejiye mera charitra
Aap mata, pita, bhai, Guru, aur Prabhu Hain mere
Aap hee Hain mere sabse ghanishth mitra.

🌹🌹🌹🌹🌹🌹🌹

Jai Guruji 🙏🙏
Dhirja

Paawan Prabha Aapki (07/15/2025)

July 14, 2025

Om Namaha Shivaya
Aaj Ka Suvichaar 🙏🏻🙏🏻

#2703

     Dekhkar Sooraj Ko Dhalte Huey

Dekhkar sooraj ko dhalte huey
Ruk na jaana tu chalte huey
O raahi, teri soch beshak ho nimaani
Teri dagar beshak ho anjaani
Par vaddi hai Guruji kee meharbaani
Vo dhak degi teri har naadaani.

Tu sabr mein bunta chal sehenshakti
Jo kasht ke dauran banee rahegi sahaayak yukti
Sabr mein sammilit kar le vishwaas
Ki Guruji kee marzi ke aagey khokhli hai teri har aas
Kyunki Guruji karte Hain kalyaan poora
Aur tera vichaar hai insaani aur adhoora.

Guruji se maangte huey bakhshish
Unke charnon mein jhuka kar apna sees
Sabr ke aabhooshan se shraddha ko sajaa
Aur Guruji kee dikhaayee raah par chalta jaa.

Aaj sooraj dhal gaya toh na kar fikr
Tu Guruji ka bachcha hai, rakh sabr
Sooraj dobaara hoga uday kal
Guzar jaayenge andhere ke ye pal
Guruji ke aitbaar mein
Sabr bhare intazaar mein.

🌹🌹🌹🌹🌹🌹🌹

Jai Guruji 🙏🙏
Dhirja

Dekhkar Sooraj Ko Dhalte Huey (07/14/2025)

July 13, 2025

Om Namaha Shivaya
Aaj Ka Suvichaar 🙏🏻🙏🏻

#2702

         Unka Ho Jaa

Aye mere dil
Tu hai toh nahin is kaabil
Ki tujhe Guruji ka saanidhya ho haasil
Lekin Guruji Hain itne dayavaan
Ki har pal rehte Hain tere angg sangg
Bharte huey tere jeevan mein ruhaani rangg.

Ve tere liye karte Hain sabb
Par kar ke kabhi nahin jataate
Arey, Unkee meher kee badaulat hee
Khuley hain tere karmon ke bandd khaate
Isliye tujhe lagta hai aksar
Ki jeevan mein tufaan hain idhar udhar
Kyunki Ve madad kar rahe Hain teri
Is se pehle ki ho jaaye deri.

Kyunki jitnee der lagegi tere pichhle kukarmon ke talne mein
Utna zyada hoga kasht tujhe aagey chalkar
Karmon ke ganit ko tu nahin sakta samajh
Koshish karega jitnee utna jaayega ulajh
Isliye Guruji par sabb chod
Tu buss Unkee oar rukh moad
Unmein kho jaa
Buss, Unka ho jaa.

🌹🌹🌹🌹🌹🌹🌹

Jai Guruji 🙏🙏
Dhirja

Unka Ho Jaa (07/13/2025)

July 12, 2025

Om Namaha Shivaya
Aaj Ka Suvichaar 🙏🏻🙏🏻

#2701

      Guruji Rabb Mere

Guruji Rabb mere
Guruji sabb mere
Ve preet Hain
Ve meet Hain
Mere geet hain
Arpit Unhe.
Bhagwaan Hain
Dayavaan Hain
Mere praan Hain
Arpit Unhe.

Ve bhor Hain
Aghor Hain
Ve doar Hain
Thaame huey.

Uss doar se
Chalti hoon mai
Kathputli hoon
Hiltee hoon mai.
Ve prerna meri
Ve chetna meri
Varna mera kya
Hoon mitti kee dheri.

Saath Unka hai
Chal rahi hoon mai
Haath Unka hai
Pal rahi hoon mai.

Ve samundar Hain
Mai nadiya neeveen
Unkee oar bahi
Ve hee kal bhi thei
Ve Hain aaj bhi
Unka sabhi
Aisa tabb bhi thaa
Aisa hee hai abhi
Aaj kal mein ye
Jaan jaayenge sabhi
Ki Ve hee Guru Hain
Hain Ve bakhshanhaar
Unke aasre hee hai
Ye saara sansaar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Rabb Mere (07/12/2025)

July 11, 2025

Om Namaha Shivaya
Aaj Ka Suvichaar 🙏🏻🙏🏻

#2700

Bann Kar Guruji Ka Deewaana

Bade pyaar se Guruji mere
Likhte rehte Hain mera lekha dobara
Shukr hai Unkee marzi chalti hai
Varna mujhe kaise milega kinaara.

Mujh rooh ko, jo lekar is deh ka bhaar
Chal padi karne bhav saagar ko paar
Shukr hai Guruji ke haathon mein hai patvaar
Varna yakeenan reh jaaoongi kaheen beech majdhaar.

Abb toh is tathya mein hai satya poorna
Ki Guruji kalyaan karenge sampoorna
Unhe jaise jaise sahi lagega jabb jabb
Ve hee mere Guru Hain, aur Ve hee Hain Rabb.

Dharti par rehte huey
Rabb ko Guru ke roop mein paana
Ho hee nahin sakta
Is se uttam koi bhi khazaana.

Isliye kehti rehti hoon apne mann se
Ki vo chod de abb ghabraana
Aur zindagi ke din guzaar le
Bann kar Guruji ka deewaana.

🌹🌹🌹🌹🌹🌹🌹

Jai Guruji 🙏🙏
Dhirja

Bann Kar Guruji Ka Deewaana (07/11/2025)

July 10, 2025

Om Namaha Shivaya
Aaj Ka Suvichaar 🙏🏻🙏🏻

#2699

                   Guru Aur Shishya

Guru aur shishya ka naata itna pavitra
Guru sudhaarein shishya ka charitra
Dein Ve shishya ko adhyatmik gyan
Karein Ve shishya ka sampoorna kalyaan.

Har din shubh hai karne ke liye Guru ka dhanyawaad
Har din paawan hai paane ke liye Guru ka ashirwaad
Kintu Gurupurnima ka utsav iske mahatva ko karta hai aur bhi roshan
Ki kitna zaroori hai shishya ka Guru ke dwaara poshan
Aur anivaarya hai shishya ka apne Guru ke prati shraddha bhaav aur aadar satkaar
Isliye aaj ke din khaas taur par vyakt karein hum Guruji ka aabhaar.

Apni saari sangat ko andhere se prakash kee oar le jaane aaye Guruji
Anginat shishyon ke soye bhaagya jagaane aaye Guruji
Aaj takk bhi rahe Hain Apni sangat ko Ve taar
Aagey bhi karte rahenge Apne bachchon ka uddhaar.

Guruji Hain Guru ke roop mein Bhagwaan
Sangat hai Unkee shishya, sewak, aur santaan
Bin Guruji ke gati nahin
Unke bin sumati nahin
Ve Hain toh niraasha mein bhi hai asha
Unke bin poorna na ho oordhvagati kee abhilasha.

Sunvaate Hain Apne saanidhya mein Gurbani
Bakhshte Hain sewa aur sadh sangat ka sangg
Sangat ke kasht lete Hain Ve swayam par
Apne shishyon ka maargdarshan karte Hain jeevan bhar.

Vyasa Poornima ke mahaan naam se shuru hua ye utsav
Sabhi Guruon ka dhanyawaad karne ka hai ye avsar
Aaj ke khaas din par param poojya Guruji Maharaj ko shukrana anantam
Ki Unhonei mujhe sweekaar kar sanvaar diya hai mera jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Guru Aur Shishya (07/10/2025)

July 9, 2025

Om Namaha Shivaya
Aaj Ka Suvichaar 🙏🏻🙏🏻

#2698

             Ye Rishta

Guruji sunte Hain rooh kee har awaaz
Guruji jaanein hamaari rooh ka har raaz
Aakhirkaar ye rishta hai hee ruhaani
Rooh se rooh ke judne kee hai ye kahaani.

Ho ya nahin hamein ye gyat
Kintu hai ye bilkul pakki baat
Ki hamaari rooh Paramatama se milne ke liye utsuk hai
Veh janam maran se mukt honei kee ichchuk hai.

Lekin maya, vikaar, aur karmon ka hai jo chakkar
Ismein reh kar hum ye bhool jaate hain aksar
Aur yathaarth se hokar bekhabar
Safal nahin kar paate ye safar.

Bina kisee vikarshan ke
Guruji ke simran aur chintan se
Judi rahe Guruji se jo seedhi ruhaani taar
Toh hoti rahengi Unse baatein do chaar.

Kabhi baatein hongi zyada, kabhi kumm
Dheere dheere is marham se upchaarit hotey rahenge hamaare gumm
Duvidhaaon se bhara hai ye jeevan
Kitnee sukhdaayi hoti hai aise mein Guruji kee sharan.

Ruhaani taar kamzor na padne paaye
Guruji se rahe ye ardaas
Unkee shakti toh hai aseem
Kintu hamaari kshamta hai ksheen
Isliye anivaarya hai Guruji kee hum par meharbaani
Taaki Unse ruhaani taar joad paayein hum praani.

Is ruhaani rishte par sada hai Guruji ka pehra
Unkee kripa se ye rishta hota rahe gehra
Koi rishta nahin is rishte se zyada anmol
Is rishte ko bayaan na kar paaye koi bhi duniyavi bol.

🌹🌹🌹🌹🌹🌹🌹

Jai Guruji 🙏🙏
Dhirja

Ye Rishta (07/09/2025)