Aaj Ka Suvichaar

May 6, 2025

Om Namaha Shivaya
Aaj Ka Suvichaar 🙏🏻🙏🏻

#2634

Chal Paa Rahi Hoon Kyunki…

Param poojya Guruji Maharaj,

Chal paa rahi hoon kyunki
Aap rahe Hain chalaa
Jaanti hoon ki jo bhi ho jaaye
Aap sada karenge bhalaa.

Aap pita Hain, Parameshwar Aap
Aapki vaddi hai vadiyaayee
Bhakt beshak jaisa bhi ho
Aap sada karte Hain uskee bhalaayee.

Jabb girne lagti hoon thakk kar
Aap hee himmat dete Hain
Aapne haath thaama hua hai
Aap hee sahaara dete Hain.

Mere udaas lamhon mein
Aap bante Hain meri muskuraahat
Meri khushi ke lamhe bhi hotey hain
Aap pyaare pita kee chaahat.

Rotey rotey chup ho jaati hoon
Sochkar ki mere ronei se Aap hotey hongei udaas
Shukrana hee mann mein aata hai tabb bhi
Ki Aap udaas samay mein bhi hotey Hain aas paas.

Aapko hanste dekh muskuraati hoon
Khush hoti hoon ki khush Hain Aap
Kaash meri vajeh se Aapko kabhi pareshaani na ho
Aise dho paaoon mai apne paap.

Aap sada maujood hotey Hain har jageh
Par mai Aapke samaksh bhi kabhi khayaalon mein kho jaati hoon
Jabb apni is gair-haaziri ka ehsaas hota hai
Toh bahut sharminda ho jaati hoon.

Lekin Aap bakhshanhaar Parwardigaar
Itne karunanidhaan
Yaad dilaate Hain, ekaagr hona sikhaate Hain
Taar judne par meri har khaami mujhe bataate Hain.

Sada mujhe sikhaate rahiyega
Sada raasta dikhaate rahiyega
Sahi galat ka vivek Aap hee dete rahiyega
Hukm pratyek Aap hee dete rahiyega.

Mai bahut bhaagyashaali hoon, sach much
Aapne diya hai mujhe sab kuch
Dekar Apne kamal charan mein sthaan
Vaheen rahoon har janam mein, kripa keejiye Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Chal Paa Rahi Hoon Kyunki… (05/06/2025)

May 5, 2025

Om Namaha Shivaya
Aaj Ka Suvichaar 🙏🏻🙏🏻

#2633

        Subah Honei Hee Wali Hai

Guruji Hain tumhaare saath
Unke haath mein hai tumhaara haath
Tumhaari kismat badi niraali hai
Subah honei hee wali hai.

Honei wala hai sooraj uday
Isliye tyaag do andhere ka bhayy
Guruji kee leela badi matvaali hai
Subah honei hee wali hai.

Jald hee meethi dhoop degi dharti par pehra
Sooryoday sangg uday hua bhaagya hoga sunehra
Guruji ka prataap bahut balshaali hai
Subah honei hee wali hai.

Subah laayegi soch nayi
Kaaraj pooran hongei kayi
Guruji kee prerna badi shaktishali hai
Subah honei hee wali hai.

Chidiyon ka chehekna abhi baaki hai
Phoolon ka mehekna abhi baaki hai
Tumhaara Guru tumhaari bagiya ka meherbaan maali hai
Subah honei hee wali hai.

Tum Guruji ke aanchal mein rahe ho pal
Tumhaare kasht Unkee karuna se rahe hain tal
Kabhi na sochna tumhaari jholi khaali hai
Subah honei hee wali hai.

🌹🌹🌹🌹🌹🌹🌹

Jai Guruji 🙏🙏
Dhirja

Subah Honei Hee Wali Hai (05/05/2025)

May 4, 2025

Om Namaha Shivaya
Aaj Ka Suvichaar 🙏🏻🙏🏻

#2632

         Karoron Arbon Kee Bheed

Karoron arbon kee bheed mein se
Guruji ne chuna apni sangat ko
Kitnee bhagyashali hain hum saari sangat
Mauka mila hai apnaane Guruji kee rangat ko.

Bann kar sadh sangat
Mil sakti hai veh rangat
Jiske liye devi devta bhi taraste Hain apne lok mein
Jiske bin Ve bhi reh jaate Hain shok mein.

Sangat mein Guruji Hain baste
Sangat sangg Ve rotey aur hanste
Guruji ka roop hai sadh sangat
Pheeki na ho paaye iskee ruhaani rangat.

Ye rangat Guruji kee dee bakhshish hai
Ye rangat Guruji ka deeya ashish hai
Ye rangat dikhaaye aisa ruhaani raasta
Jahaan hota hai buss Guruji se vaasta.

Kyunki vahee ek rishta hai sachcha
Baaki har rishta hai kachcha
Guruji ne jo rangat bakhshi hai
Usmein Guruji ne piroya hai Apna noor
Taaki Unkee sangat Unse kabhi na ho duur.

Har daat bakhshne ke liye Guruji ka shukrana
Har vo daat jo nahin milee, uska bhi shukrana
Bann kar sadh sangat aa jaaye hamein Guruji ke rangg mein rangte jaana
Guruji aur Unkee ruhaani rangat se bada nahin hai koi khazaana.

🌹🌹🌹🌹🌹🌹🌹

Jai Guruji 🙏🙏
Dhirja

Karoron Arbon Kee Bheed (05/04/2025)

May 3, 2025

Om Namaha Shivaya
Aaj Ka Suvichaar 🙏🏻🙏🏻

#2631

Baarish Aur Musaafir

Baarish thi bahut tez
Phir bhi maayoos musaafir chalta jaa raha thaa
Beh rahi thi uskee aankhon se ashrudhaara
Maano baarish ne ashruon se saath dene ke liye kaha thaa.

Jitnee boondein baras rahi thi anekon baadalon se
Shaayad utnee hee barsaa rahin thi aankhein
Dharti bhi diler thi hui
Samaa kar boondon ko pasaare apni baahein.

Guruji ke hukm mein thei dono
Aankhein aur baadal
Pavitrikaran kar rahe thei Guruji
Taaki sunehra ho aane wala kal.

Baarish ka aur ashrudhaara ka
Dono ka samaapt hona thaa nishchit
Lekin sahi samay Guruji ne kiya hua thaa nirdhaarit
Kyunki Ve chaahte thei prakriti aur musaafir ka hitt.

Bhaagya ke indradhanush ko dekhne ke liye
Musaafir kee ankhein rahin thi taras
Aur baadal rahe thei baras
Vyakul thei peene ko indradhanush ka ruhaani rass.

Aasaan toh nahin thaa intazaar
Musaafir rukta, phir chalta thaa baar baar
Baadalon ke garbh se bhi hoti rahi baarish kee bauchhaar
Dono taraf Ishwar par bharosa thaa barkaraar.

Bharosa laaya rangg
Guruji rahe angg sangg
Baandh tootne se pehle baarish gayi thamm
Musaafir thakk raha thaa par chal rahe thei uske kadam.

Karte huey Guruji ka chintan
Musaafir ko dikhee ummeed kee kiran
Indradhanush se sajne lagaa uska mann
Aansoo rukey, aankhein beshak thi numm.

Usey hua ehsaas ki baarish hui kaafi kumm
Usne gagan kee oar dekha toh usey dikha usee kshan
Sundar sa indradhanush aasmaan mein
Maano aaya ho Guruji ke sammaan mein.

Ek indradhanush gagan mein
Aur dooja musaafir ke mann mein
Ye nahin thaa khwaab
Na hee itefaaq
Ye Guruji se sanket thaa musaafir ko
Jisey samajh kar musaafir shukrana mein gaya kho.

Jodey huey Guruji sangg seedhi ruhaani taar
Musaafir Guruji ka dhanyawaad karta gaya baarambaar
Jis indradhanush ka thaa uske antas ko kabb se intazaar
Guruji ne usey uss indradhanush ka sanket dekar kee uspar kripa aparampaar.

🌹🌹🌹🌹🌹🌹🌹

Jai Guruji 🙏🙏
Dhirja

Baarish Aur Musaafir (05/03/2025)

May 1, 2025

Om Namaha Shivaya
Aaj Ka Suvichaar 🙏🏻🙏🏻

#2629

Aapki Nadar Ke Sahaare

Param poojya Guruji Maharaj,

Aapki nadar ke sahaare
Jeevan ke beete huey pal guzaare
Aagey bhi banaaye rakhiyega Apni nadar
Taaki jeevan ke baaki pal bhi yoon hee jaayein guzar.

Kabhi na chodein hum karna Aapki nadar kee kadar
Kyunki Aapki nadar se sanvar rahe hain hum kis kadar
Iska lafzon mein mumkin nahin karna bayaan
Kyunki ye toh hai ek ruhaani dastaan…

…Jahaan khoney mein hee paana hai
Jahaan peechhe reh jaata saara zamaana hai
Jahaan har saans Aapki manzoori se aana hai
Jahaan Aapke nakshe kadam par chalte jaana hai.

Bakhshiye sumat
Bakhshiye himmat
Bakhshiye ibadat
Bakhshiye har veh achchi aadat
Hum Aapko rijha paayein jiske dwaara
Aur dete rahiye Apni nadar ka sahaara.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Nadar Ke Sahaare (05/01/2025)

April 30, 2025

Om Namaha Shivaya
Aaj Ka Suvichaar 🙏🏻🙏🏻

#2628

Sangharsh Nahin Aasaan

Sangharsh nahin aasaan
Par vishwaas rakho aye insaan
Ki beshak aaye kaisa bhi tufaan
Kaheen na kaheen toh thaame huey Hain tumhe Bhagwaan
Guruji Maharaj ke roop mein
Jeevan kee chhaaon dhoop mein.

Varna tum yahaan takk bhi na pahunch paate
Aur na jaane kitne aur dhakke khaate
Ye toh Guruji ne hai sambhaala hua
Jabb jabb bhi kasht ne tumhe hai chhua.

Sangharsh toh hissa hai insaani jeevan ka
Tum banaaye rakho santulan apne mann ka
Jodkar Guruji se seedhi ruhaani taar
Aur Unke prati raho wafadaar.

Dar dar bhatakne mein faayda nahin, balki hai nuksaan
Yahaan se kaheen aur jaane kee zaroorat hee nahin, aye insaan
Anant koti Brahmand ke maalik Hain MahaShiv roopi Guruji Maharaj
Shraddha aur saboori rakho, sanvar jaayenge tumhaare kaaj.

Safalta nishchit hai sangharsh ke baad
Kyunki tumhaare sangg hai Guruji ka ashirwaad
Sangharsh ke dauran bhi Guruji ko prem se karo yaad
Ve tumhe har bhayy aur har sanshay se kar denge azad.

🌹🌹🌹🌹🌹🌹🌹

Jai Guruji 🙏🙏
Dhirja

Sangharsh Nahin Aasaan (04/30/2025)

April 29, 2025

Om Namaha Shivaya
Aaj Ka Suvichaar 🙏🏻🙏🏻

#2627

Prem Se Sunte Kehte Jaao

Prem se sunte kehte jaao
Prem ke bhaav mein behte jaao
Guruji Maharaj ke liye
Apne sartaj ke liye.

Is prem kee khushboo ruhaani ho
Is prem mein bhavna deewaani ho
Is prem ke nashe mein jaao yoon kho
Ki is prem mein tum khud ko kho do.

Guruji ke paawan prem mein kho kar
Tum uss dhan ko paaoge
Jis se tum janam janam ke liye
Dhanya ho jaaoge.

Har duniyavi prem se oopar hai prem Guruji ke sangg
Saarthak hai ye, aur ruhaani hai iska rangg
Guruji kee yaad se karte chalo antas ko roshan
Taaki is anokhe prem ka hota chale poshan
Is prem mein hain Guruji ke ruhaani darshan
Jinse anugrahit hota rahega jeevan.

Koi prem nahin is prem ke jaisa
Jiska jaisa bhaav, usey prem mehsoos ho vaisa
Is prem mein hai santosh aur sukh
Ye prem tumhe banaayega Gurumukh.

🌹🌹🌹🌹🌹🌹🌹

Jai Guruji 🙏🙏
Dhirja

Prem Se Sunte Kehte Jaao (04/29/2025)

April 28, 2025

Om Namaha Shivaya
Aaj Ka Suvichaar 🙏🏻🙏🏻

#2626

                Zaroor Hoga Deedar

Ye hai Guruji ka dikhaaya raasta
Yahaan Guruji se rakho vaasta
Yahee raasta pahunchaayega Guruji takk
Is raaste par agar gaye thakk
Toh Guruji madad karenge athak
Tum buss himmat na haarna
Mann mein kar lo ye dhaarna.

Is raaste par phool se zyada kaante milein
Toh aashcharychakit na hona
Ruhaani oonchaayee par pahunchna hai
Toh zaroori hai har paap ko dhona.

Kabhi hawaa hogi suhaani
Kabhi raasta hoga tufaani
Raasta badalne kee na karna naadaani
Varna pachhtaaoge saari zindagaani.

Tumhe dikhein ya nahin
Guruji hongei bilkul vaheen
Jahaan hogey tum
Hosh mein ya gumsum.

Tum beshak so jaao
Guruji bilkul na soyenge ek pal
Ve margdarshan karte rahenge
Taaki tum paao chal.

Ruhaani roshni jo chaahoge
Toh raasta ho sakta hai lamba aur kathin
Shraddha aur vishwaas se judey rahoge
Toh unnati nishchit hogi din-b-din.

Aayenge imtehaan kayi
Aayengi chunautiyan nayi
Guruji kee yaad mein rehna
Laukik aasakti mein na behna.

Karte chalna tum parishram
Ve bakhshte rahenge sewa simran
Nibhaana apna kartavya
Bin bhooley apna gantavya.

Har karma karna hoga Guruji ko arpan
Raaste mein karna hoga Unhe sarvsamarpan
Sachche mann se karte chaloge ardaas
Toh awashya aate chaloge Guruji ke paas.

Har mushkil, har chunauti tal jaayegi
Kaanton ko paar kar raaste mein bagiya aayegi
Hariyali par padti hui sooraj kee kiran kar rahi hai tumhaara intazaar
Guruji ko paane kee dhun mein raaste par chalo, zaroor hoga deedar.

🌹🌹🌹🌹🌹🌹🌹

Jai Guruji 🙏🙏
Dhirja

Zaroor Hoga Deedar (04/28/2025)

April 27, 2025

Om Namaha Shivaya
Aaj Ka Suvichaar 🙏🏻🙏🏻

#2625

Har Din Hai Khoobsoorat

Har din hai khoobsoorat
Har pal hai prerna kee moorat
Guruji kee sharan mein
Guruji se judey jeevan mein.

Beshak vo khoobsoorati dikhti nahin har baar
Kyunki vo drishti nahin hai hamaare paas
Isliye hee toh pratikool ghadiyon mein
Hum aksar ho jaate hain udaas.

Anukool lamhon mein khoobsoorati dekhna
Ye nahin hai mushkil kaam
Prerna ka strot bhi dhoondhna hota hai aise mein aasaan
Aur tabb mehsoos hota hai ki saath mein Hain Bhagwaan.

Pratikool pal kee khoobsoorati dekhne kee drishti
Bakhshte rahenge Guruji Maharaj
Besharte hum Unhe karne dein
Apne vivek par poora raaj.

Akl aur rafl ka koi kaam nahin vahaan
Guruji kee leela kee baat aati hai jahaan
Unkee har leela mein uddeshya hai hamaara kalyaan
Hamein khoobsoorat lagey ya nahin, har din hai daya se bharaa daan.

Guruji se judey huey jo beetega safar
Toh aaj ya kal khoobsoorati aane lagegi nazar
Aur har pal ka hoga prernadaayak asar
Buss, Guruji sangg rishta mazboot rakhne mein na chodein hum koi kasar.

Koshish zaroori hai apni oar se
Baaki Unkee kripa toh hai anivaarya
Unkee kripa se khoobsoorat aur prernadaayak ho jaayega
Har pal, har din, har kaarya.

🌹🌹🌹🌹🌹🌹🌹

Jai Guruji 🙏🙏
Dhirja

Har Din Hai Khoobsoorat (04/27/2025)