Aaj Ka Suvichaar

August 15, 2024

Om Namaha Shivaya
Aaj Ka Suvichaar 🙏🏻🙏🏻

#2370

                 Sukhad Ho Jaaye

Guruji mein lagg jaaye aisee lagan
Ji mera mann aur meri har dhadkan
Rahe Guruji mein hee magan
Toh sukhad ho jaaye jeevan.

Kisee aur vichaar ka na ho sthaan
Har soch aur karma mein basaa ho Guruji ka naam
Har chunauti ko jaanoon aur maanoon Unka diya hua imtehaan
Toh sukhad ho jaaye har subah aur shaam.

Vishwaas atal ho Guruji kee ruhaani maujoodagi par
Nishtha atal ho Guruji mein zindagi bhar
Kabhi sanshay kee parchhaayee bhi na aaye bandagi par
Toh sukhad ho jaaye ye safar.

Har karma arpit kar doon Guruji ke kamal charan mein
Khud ko samarpit kar doon Unkee sharan mein
Na chodoon koi kasar Guruji ke anusaran mein
Toh sukhad ho jaaye janam maran.

Antas mein hota rahe Guruji ka simran
Kaanon mein goonjta rahe Guruji kee mahima ka shravan
Chit chete Guruji ko, nirantar ho Unhee ka chintan
Toh sukhad ho jaaye nitya ka vandan.

Guruji ke naam kee dhaal ho
Har pal bheetar Guruji ka yaad-e-khayaal ho
Santushti aisee ho ki na koi sawaal ho
Toh sukhad ho jaaye har dhadkan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukhad Ho Jaaye (08/15/2024)

August 14, 2024

Om Namaha Shivaya
Aaj Ka Suvichaar 🙏🏻🙏🏻

#2369

                    Manohar Manzil

Chhoti padd jaayegi teri har fariyaad
Itna vadda hai Guruji ka ashirwaad
Tu himmat na haar
Tu buss Unhe karta chal yaad.

Tu hai Guruji kee dekh rekh mein sada se
Ve waakif Hain teri har ada se
Chaahe vo ho ya na ho achchi
Chaahe vo jhoothi ho ya ho sachchi.

Tere bheetar kee gehraayee mein
Tu ye jaanta hai
Teri rooh kee tanhaayee mein
Tu ye maanta bhi hai.

Kyunki teri rooh toh Guruji se hai judi
Jaise suman ke sangg sugandh hai hoti
Suman ke bin sugandh nahin
Sugandh suman se hee hai hoti.

Ye hee toh hai satyamayi saar
Teri rooh ka, teri rooh ke safar ka
Ki sugandh suman mein samaayi rahe
Jahaan suman, vaheen sugandh bahe.

Guruji kee kripa se aisee avastha aaye
Jahaan Paramatama, Unhee mein atma samaaye
Phir toh janam maran dhanya ho jaaye
Aur rooh ko apni manohar manzil mil jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Manohar Manzil (08/14/2024)

August 13, 2024

Om Namaha Shivaya
Aaj Ka Suvichaar 🙏🏻🙏🏻

#2368

 Guruji Ka Vo Ho Gaya

Ik raahi thaa albela
Mila usey saath suhela
Param poojya Guruji Maharaj ka
Brahmaandon ke sartaj ka.

Guruji ne chuna usey jabb Guruji kee hui mauj
Banaa vo shishya Unka, usey karni na padi khud khoj
Usey Guruji mein hui nishtha nirmal
Guruji ne uske antas mein ruhaani deep kar diye ujjwal
Guruji ne joda usey yoon Apne se aur gurbani se
Ki vo apne girebaan mein jhankne lagaa aasaani se.

Usey Guruji mein miley murshid, saathi, nath, aur Rabb
Usey Guruji mein miley sahaare sabb
Guruji ne usey Apni suraksha ka kavach pehnaaya
Usne Guruji se abhay daan paaya
Chaahi thi usne jo befikri aur beparwaahi kabb se
Usey veh mil gayi apne Guru, apne Rabb se.

Jaise jaise gehra hota gaya uspar chadha Guruji ke naam ka nasha
Vaise vaise sudharti sanvarti gayi har tareh se uskee dasha
Sakaaraatmak parivartan kee oar hoti gayi uske soch vichaar kee disha
Aane wala har savera lamba hota gaya aur chhoti hoti gayi har nisha.

Guruji kee mahima gaane wala
Veh raahi mastt matvaala
Guruji ke chintan mein vyast rakh kar apna chitt
Guruji ke charnon mein ho gaya samarpit
Guruji ke pyaar mein vo yoon kho gaya
Ki poornata se Guruji ka vo ho gaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Vo Ho Gaya (08/13/2024)

August 12, 2024

Om Namaha Shivaya
Aaj Ka Suvichaar 🙏🏻🙏🏻

#2367

              MahaShiv Gangadhar

MahaShiv Gangadhar,
pyaare Guruvar
Leela Unkee nyaari
Ve khud hee Hain Parameshwar
Rasik bairaagi jatadhaari.

Aisee paawan hai Unkee preet
Ki ye bann gayi jeevan kee ruhaani reet
Kaheen jaane kee zaroorat nahin Guruji ke dar par aane ke baad
Kyunki yaheen mil jaata hai har tareh ka ashirwaad.

Dete Hain Guruji hamein daan jeevan ka
Sudhaarte Hain swaasthya rooh, tann, aur mann ka
Bakhshein duniyaavi sukh aur samriddhi
Karein bhakt ke gyan kee vriddhi.

Bholenath Hain Guruji swayam
Chaahein bhola bhaav hamaara
Hum beshak na hon kaabil Unke
Ve Hain hamaara sampoorna sahaara.

Jitnee hoti jaayegi Unhe paane kee hamein kashish
Vaise hee badhaani hogi antas ko saaf karne kee koshish
Taaki vahaan ka poora sthaan hamaare ahankar se khaali ho paaye
Taaki uss pavitra sadan mein Guruji kee guruyaayee yoon buss jaaye
Ki bheetar aur baahar Guruji, aur kewal Guruji ka ehsaas ho paaye
Jeevan kitna sundar ho jaaye, jo Guruji ko poori tareh se samarpit har das ho jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

MahaShiv Gangadhar (08/12/2024)

August 11, 2024

Om Namaha Shivaya
Aaj Ka Suvichaar 🙏🏻🙏🏻

#2366

        Na Bhooloon

Param poojya Guruji Maharaj,

Na bhooloon kabhi karna Aapka shukrana
Na bhooloon ki nahin hai mujhe ghabraana
Chaahe jaise bhi hon haalaat
Chaahe sataaye koi bhi baat
Kyunki Aap sada Hain mere saath
Subah aur shaam, din aur raat.

Aapki rooh ka hissa hai meri rooh
Phir kyun bhramit karey mujhe koi bhi chakravyuh
Aapka noor kar raha hai meri rooh ko roshan
Aapka pyaar kar raha hai meri rooh ka poshan
Aisa ho raha hai har ghadi, har kshan
Jiskee badaulat kaayam hai meri dhadkan.

Ye nahin hai koi saadhaaran baat
Balki ye hai Aapki dee hui paawan saugat
Nashukr hokar aur bhi gir na jaaoon
Kripa keejiye ki shukrana mein sees jhukaaoon…
Har pal, har ghadi
Chaahe daat chhoti lagey ya badi
Kyunki kabhi jholi khaali nahin padi
Ghar parivaar kee bagiya hai hari bhari.

Aap Hain mere maalik meharbaan
Apne niyantran mein rakhiye mera imaan
Aapka shukrana karna kabhi na bhoole Aapki ye santaan
Aakhiri saans takk Aapka naam japti rahe meri zubaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Bhooloon (08/11/2024)

August 10, 2024

Om Namaha Shivaya
Aaj Ka Suvichaar 🙏🏻🙏🏻

#2365

Sab Rangon Se Pyaara

Sab rangon se pyaara hai
Rangg Guruji ke pyaar ka
Unkee ye anokha rangg hai prateek
Ruhaaniyat ke saar ka.

Guruji ke pyaar mein hai bhaav pavitra
Jo sudhaarta hai bhakt ka charitra
Guruji ke pyaar mein hai aisee komalta
Jo jeet leti hai har tareh kee karkashta.

Guruji ka pyaar hai sabse nirmal
Guruji ka pyaar hai sabse saral
Koi dikhaawa nahin, koi chadhaawa nahin
Koi ahem nahin, koi vehem nahin.

Guruji ke pyaar mein piroyi hain bhakt ke liye bakhshishein
Guruji ke pyaar mein hain akalpaneeya tarkeebein
Jinke dwaara Guruji bhakton ko dete Hain taar
Aur dete Hain bhakton ka jeevan sanvaar.

Guruji ka pyaar strot hai bhakt ke kalyaan ka
Guruji ka pyaar saadhan hai santosh ke vardaan ka
Is pyaar ko sweekaaro
Apne aap ko nikhaaro
Is se uttam na hai koi shringar
Beshak dhoondh lo tum saara sansaar.

Liv Guruji se jodo
Duniyavi aasakti ko chodo
Aasaan na hoga pehle, par koshish toh karo
Duniya mein rehte rehte duniya se na daro.

Farz nibhaao apna poora parishram dekar
Guruji ke kareeb aao kshama yachna lekar
Unkee yaad mein raho magan
Aisee lagaao Guruji mein lagan
Ki baaki sab kuch pheeka laagey
Ye sab vaise bhi hain kachche dhaagey.

Guruji ka pyaar baras raha hai
Usmein bheegne kee koshish toh karo
Kitnon ke paap dhule hain Unke pyaar se
Abb tum bhi Guruji ke pyaar se taro.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Rangon Se Pyaara (8/10/2024)

August 9, 2024

Om Namaha Shivaya
Aaj Ka Suvichaar 🙏🏻🙏🏻

#2364

          Ek Na Ek Din

Ye ret par khichi lakeer nahin
Teri kismat kee hai ye lakeer
Guru kripa bin badal nahin sakti
Jo bhi kar le, aye fakir.

Vaise toh Guruji kee sharan milna
Apne aap mein hai khushnaseebi badi
Aur bhakt kee kismat kee lakeerein bhi
Guruji ke samaksh jhuk kar ho jaati hain khadi.

Guruji mein hai aisa prataap
Ki Ve teri kismat likh sakte Hain dobaara
Virlon ko milta hai aisa mauka
Isliye dar dar na bhatak tu maara maara.

Guruji kee mehar apni leela dikhaayegi
Koi puraani lakeer pheeki padd jaayegi
Mumkin hai ki koi nayi lakeer bhi bann jaayegi
Jo teri kismat ka sitaara chamkaayegi.

Sahi waqt toh Guruji ko hee hai pataa
Unhonei pehle bhi maaf kee hai teri koi na koi khataa
Unkee vadiyaayee teri kismat par rehmat barsaayegi
Ek na ek din teri kismat kee lakeer zaroor muskuraayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Na Ek Din (08/09/2024)

August 8, 2024

Om Namaha Shivaya
Aaj Ka Suvichaar 🙏🏻🙏🏻

#2363

              Tere Safar Kee Manzil 

Rangg laayega Guruji ka pyaar
Aayegi tere jeevan mein bakhshishon kee bahaar
Teri kee hui bhakti ko nikhaarega Guruji ka dulaar
Unkee dee hui shakti aur apni koshish se tu laa paayega apne mein sudhaar.

Swayam mein sudhaar hee hai is safar ka saar
Kyunki yahee pahunchaayega tujhe uss paar
Jahaan tujhe galey lagaane ke liye Parwardigaar
Kar rahe Hain kab se intazaar.

Tujh par tere pichhle karmon ka karz hai
Guruji ko khush karna tera farz hai
Dono ke liye anivaarya hai ye atma-sudhaar
Isliye abb ismein jeevan de tu guzaar.

Atma-nireekshan har din, har pal
Taaki tu aaj se behtar insaan bann jaaye kal
Chadhdi kala mein jee
Guruji ke naam ka amrit pee.

Soch ko rakh sakaaraatmak
Ye safar hai adhyaatmik
Ohada toh mit jaayega
Roshan rahegi ruhaani oonchaayee
Tujhe vahaan pahunchaayegi Guruji kee guruyaayee
Tu buss maanta chal Unkee vaddi vadiyaayee.

Guruji tere murshid, Unka shagird hai tu
Unkee rooh se judi hai teri rooh
Buss, yahee hai param sachchaayee
Is sachchaayee mein tere safar kee manzil hai samaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Safar Kee Manzil (08/08/2024)

August 7, 2024

Om Namaha Shivaya
Aaj Ka Suvichaar 🙏🏻🙏🏻

#2362

    Guruji Ke Bann Kar

Ye Guruji Maharaj ka dar hai
Bin bulaaye tum yahaan aa nahin paaoge
Begaane bann kar beshak aaoge
Lekin deewaane bann kar jaaoge.

Aansoo bahaate tum aaoge
Muskuraate huey tum jaaoge
Gunaahon ke sangg aaoge
Bakhshishon ke sangg jaaoge.

Haath phailaakar aaoge
Jholiyan bharkar jaaoge
Bhatakte huey aaoge
Manzil takk pahunch paaoge.

Apne naam se aaoge
Guruji ka naam paaoge
Unke naam mein jitna kho jaaoge
Utna hee Unko tum paaoge.

Shikayat karne aaoge
Shukrana kar ke jaaoge
Maangne wale bann kar aaoge
Maan-ne wale bannkar jaaoge.

Tum ek kadam badhaaoge
Unhe anekon kadam badhaate paaoge
Jitna tum Guruji ko dhyaaoge
Tum Unke hotey jaaoge.

Jis bhi disha se tum aaoge
Guruji kee disha mein jaaoge
Jis bhi dasha mein aaoge
Guru naam ka nasha tum paaoge.

Darte huey ya marte huey tum aaoge
Lekin har pal tarte huey tum jaaoge
Paraaye bann kar tum aaoge
Dekhna, Guruji ke bann kar reh jaaoge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Bann Kar (08/07/2024)

August 6, 2024

Om Namaha Shivaya
Aaj Ka Suvichaar 🙏🏻🙏🏻

#2361

                          Aagey Bhi

Ateet ka das bann kar rehna hai
Ya apne aane wale kal ka swami?
Jawaab tumhaare bheetar hai
Isliye kar na lena tum naadaani.

Ateet ka dukh bann gaya itihaas
Iske liye raho Guruji ke shukrguzaar
Ateet ka sukh bhoga tumne
Guruji ko shukrana ka karo izhaar.

Ateet ka dukh vartmaan ka banaa hai hissa
Kyunki abhi khatm nahin hua uss dukh se judey karmon ka kissa
Jabb takk poora na hoga imtehaan
Toh kaise niklega uska parinaam?

Ateet ke kisee bhi anubhav mein yoon kho na jaana
Ki mushkil ho jaaye vartmaan mein jee paana
Har samay ke anubhavon se seekh kar
Guruji ka naam lekar aagey jaao badh
Aane wale samay ke liye karo tayyaari
Kyunki vartmaan ke baad hai bhavishya kee baari.

Tumhe Guruji ne Apne sangg hai joda
Tumhaare liye Unhonei kayi baar samay kee raftaar ko hai moda
Tumhe shaayad na ho iskee khabar
Trikaal darshi Hain Guruji aur Unkee nadar.

Is se pehle ki samay bhaage
Guruji kee prerna dwaara tum badho aagey
Beshak pratibandh bade hain
Lekin Guruji tumhaare angg sangg khade Hain.

Ye hai bilkul sahi
Ki tum akele nahin
Tumhaare antas mein kaheen
Tumhe hai ye yakeen.

Na bann kar raho ateet ke das
Vartmaan hai tumhaare paas
Sunehre bhavishya ke liye karo prayaas
Guruji ke naam ka raksha kavach hai tumhaare paas.

Guruji pahunchaayenge tumhe uss sunehre bhavishya takk
Tum Unpar bharosa rakho athak
Unhonei saath na choda hai abb takk bhi
Ve tumhaare saath rahenge aagey bhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aagey Bhi (08/06/2024)