Aaj Ka Suvichaar

August 5, 2024

Om Namaha Shivaya
Aaj Ka Suvichaar 🙏🏻🙏🏻

#2360

                Kabhi Uljhan Nahin

Jo bakhsh rahe Hain tumhe zindagi
Kuch pal toh kar lo Unn pyaare Guruji kee bandagi
Varna baad mein padega pachhtaana
Kyunki samay ne haath se hai nikal jaana.

Prem bhaav se bandagi mein beete huey aaj ke pal
Guruji kee kripa se sanvaar denge tumhaara aane wala kal
Tum apna vishwaas aur prayaas rakho atal
Guruji tumhaari bandagi karenge safal.

Guruji udaar Hain
Guruji chitrakaar Hain
Unhe jitna chet-ta rahega tumhaara chitt
Uss se bhi zyada Ve karenge tumhaara hitt.

Beshak socho tum ki tumhaara hitt hai sabse zaroori
Ya phir socho ki tumhaare liye tumhaara hitt hai ek majboori
Guruji bakhsh rahe Hain tumhe har shwaas
Isliye tumhaara farz hai rakhna Unpar poorna vishwaas.

Jinhonei shwaas hai bakhsha
Ve karenge tumhaari raksha
Ismein do rai kee nahin hai koi gunjaaish
Tumhe iske liye na karni hai Unse guzaarish Na hee bataani hai Unhe yeh khwaahish.

Guruji kee nadar bin tumhaari ek bhi dhadkan nahin
Guru kripa bin is safar mein poorna kalyaan ka dhan nahin
Guruji tumhaare baare mein na sochein, aisa koi kshan nahin
Unkee bandagi mein antataha awashya milegi suljhan, kabhi uljhan nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kabhi Uljhan Nahin (08/05/2024)

August 4, 2024

Om Namaha Shivaya
Aaj Ka Suvichaar 🙏🏻🙏🏻

#2359

            Ye Rishte Naate

Kya hain ye rishte naate
Beete janmon ke karmon ke khule khaate?
Na jaane abb takk kitne khaate gaye hain khul
Kya kabhi inse jude paap jaayenge dhul?

Kyunki paap toh awashya huey hain
Ismein nahin hai koi sanshay
Guruji kee sharan mein aayein hain hum manushya
Toh phir nibhaayein kartavya bina kisee bhay.

Is silsile ko bhanvar kaho ya chakravyuh
Ismein phansi hui shareer ke sangg hai rooh
Shareer toh phir bhi marne par ho jaayega khatam
Lekin rooh ko toh lene padenge aur bhi janam.

Bhaar kumm karna hai abb kee baar
Toh nibhaana hoga apna kirdaar
Bannkar imaandaar.

Guruji Hain Parwardigaar
Ve awashya denge taar
Koshish rehni hogi barkaraar.

Kyunki asal rishta toh hai Guruji ke sangg
Kyunki Unka noor hai swayam Parameshwar ka rangg
Is noorani rangg kee kanti mein khud ko hoga khona
Karmon ke khaate saaf honei se hee mumkin hoga aisa hona.

Pooran Guru Hain Guruji Maharaj
Tezi se karam katvaayenge
Kiya hai Unhonei tumhe Apne naam ke jahaaz par savaar
Dekhna, Ve tumhe bhavsaagar paar awashya karaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Rishte Naate (08/04/2024)

August 3, 2024

Om Namaha Shivaya
Aaj Ka Suvichaar 🙏🏻🙏🏻

#2358

                    Ati Sukhdaayee

Guruji kee baatein karo
Guruji kee karo vadiyaayee
Guruji ka chintan karo
Guruji kee sharan hai ati sukhdaayee.

Guruji kee raza mein razi raho
Maano Guruji kee guruyaayee
Guruji ko kar do samarpan
Guruji kee sharan hai ati sukhdaayee.

Guruji se baatein karo
Pehchaano rishte kee gehraayee
Guruji ka karo shukrana
Guruji kee sharan hai ati sukhdaayee.

Guruji kee tareef karo
Saraaho Unkee prataapi oonchaayee
Guruji ko prasann rakho
Guruji kee sharan hai ati sukhdaayee.

Guruji ke hukm ko maan lo
Guruji sangg baant lo apni tanhaayee
Guruji ke baare mein suno, kaho, gaao
Guruji kee sharan hai ati sukhdaayee.

Guruji jaisa meet na dooja
Guruji hee murshid aur bhai
Guruji hee nath, Guru, Ek Onkar
Guruji kee sharan hai ati sukhdaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ati Sukhdaayee (08/03/2024)

August 2, 2024

Om Namaha Shivaya
Aaj Ka Suvichaar 🙏🏻🙏🏻

#2357

Baandhe Huey Aapke Sangg Preet Kee Dori

Param poojya Guruji Maharaj,

Baandhe huey Aapke sangg preet kee dori
Aapko pukaare meri rooh kee tijori
Nawaaziye anmol asal dhan se
Mere gareeb nawaaz bann ke.

Na jaane kitne janam yoon hee gaye beet
Na paa saki apne vikaaron par mai jeet
Oopar se aur karmon ke bhaar ke taley rooh gayi dabb
Ye toh shukra hai Aapka ki Aap mein mil gaye mujhe Rabb.

Varna gavaa baithti mai sabb
Phir na jaane rooh kee kismat khulti kabb
Abb jo rooh ne paa liya hai Aap mein apna ashiyaana
Toh veh jamaa karna chaahe Aapke diye huey asal dhan ka khazaana.

Jabb se jaagrit hui asal dhan kee oar
Tabb se rooh aur antas ne pakki kar lee is raaste kee moad
Yahee moad le kar chalegi Aapki oar
Ye soch soch kar ho jaati hoon mai bhaav vibhor.

Ye dhan thoda thoda kar ke miley ya Aapki nadar ke ek ishaare par
Jaise bhi deejiyega lekin rehne deejiyega mujhe Apne dwaare par
Jabb takk meri rooh Aap mein samaa kar ho na jaaye azad
Mujhe Apne charnon mein rakhiyega, ye hai meri fariyaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baandhe Huey Aapke Sangg Preet Kee Dori (08/02/2024)

August 1, 2024 Thursday

Om Namaha Shivaya
Aaj Ka Suvichaar 🙏🏻🙏🏻

#2356

             Dhanya Hui Veh Daasi

Dekhkar rangat shaam ke geruey aasmaan kee
Jyot jalaakar Guruji ke paawan naam kee
Duur karne apni udaasi
Muskuraati hui zaraa si
Guruji ke darshan kee pyaasi
Baithi thi ik daasi.

Na dikh raha thaa usey mandir mein koi aur
Guruji ke swaroop kee oar karne lagi veh gaur
Unse baat karne kee koshish kar rahi thi mann hee mann
Guruji ke nayan ko dekhne lagey uske nayan.

Ya phir ye thaa uska bhram?
Kyunki usey lagaa ki usey dekh rahe Hain Guruji ke nayan!!
Thoda ghabraayee
Thoda chakraayee
Guruji kee hee thi ye vadiyaayee
Usey ye baat samajh mein aayi.

Guruji kee nazar daasi se kuch kehne lagi
Daasi ke naynon se ashru dhaara behne lagi
Kuch khushi ke aansoo thei, kuch aansoo thei gumm ke
Toot padey thakey huey baandh uske aantrik sanyam ke
Labon par aa bhi na paaye thei alfaaz mann ke
Ki sunn honei lagey angg uske tann ke.

Dekh rahi thi Guruji ke jis swaroop ko
Vaisa hee jyot ka roop gaya ho
Vahee aakaar, divya abhamandal se susajjit
Jisey dekh kar anandit ho gaya daasi ka chitt.

Paakar aise sundar darshan
Harshit ho gaya uska mann
Jaanti thi ki ye hua Guruji kee mahima ke kaaran
Jaanti thi vo ki Guruji kee mahima nahin hai saadhaaran.

Leen ho gayi veh daasi Guruji ke chintan mein
Shukrana kiya usne Guruji ke kamal charan mein
Daasi ne jaani aur maani Guruji kee mahima unn diye darshan mein
Guruji ne dekha bhola bhaav uske prem aur neevenpann mein
Jo thi Guruji ke darshan kee pyaasi
Aaj dhanya hui veh daasi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Hui Veh Daasi (08/01/2024)

July 31, 2024

Om Namaha Shivaya
Aaj Ka Suvichaar 🙏🏻🙏🏻

#2355

             Intazaar

Intazaar hai bahaar mein
Intazaar hai meri pukaar mein
Intazaar hai mere izhaar mein
Intazaar hai mere ikraar mein.

Intazaar, Guruji kee mauj mein aane ka
Intazaar, Guruji dwaara mere bakhshe jaane ka
Intazaar, mere tarr jaane ka
Intazaar, mera banda bann paane ka.

Intazaar, uss pal ka
Intazaar, uss kal ka
Jabb mukammal hoga mera intazaar
Jaan paane ka jeevan aur mrityu ka saar.

Guruji dete rahein Apna dulaar
Guruji se badhta rahe mera pyaar
Toh meetha lagta rahega ye intazaar
Varna toh jeena ho jaayega dushvaar.

Jaanti hoon ki yahee hai dwaar
Jahaan par safal hoga mera intazaar
Guruji kee hoon mai shukraguzaar
Ki is nacheez ko Unhonei kiya sweekar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Intazaar (07/31/2024)

July 30, 2024

Om Namaha Shivaya
Aaj Ka Suvichaar 🙏🏻🙏🏻

#2354

   Razi Rahoon Guruji Kee Raza Mein

Razi rahoon Guruji kee raza mein
Ajab sa maza hai is ada aur saza mein
Ummeed hai ki har anubhav le jaa raha hai Guruji ke aur bhi kareeb
Kyunki agar aisa hai phir toh har anubhav hai khushnaseeb.

Jo khushnaseebi kaheen dhoondhne se bhi na miley
Vo Guruji dete Hain behisaab
Yoon hee toh nahin kehti mai
Ki mere Guruji kee leela hai lajawaab.

Kalyuga kee kashmakash mein
Unhonei satyugi spandan hai bakhsha
Jaane anjaane kashton se
Unhonei sada kee hai meri raksha.

Saboori bhi itnee, aur itna pyaar
Guruji dete Hain baarambaar
Ki badh jaati hai sehenshakti
Aur banti hai kathin samay mein haunsle kee yukti.

Guruji kee sharan mein safar ke kaanton kee chubhan
Guruji ke prataap se kumm hoti jaati hai har kshan
Kuch kaante toh Guruji raaste se dete Hain hataa
Baaki kaanton sangg karma dete Hain kataa.

Unkee raza mein razi rehne se
Unkee goad mein rehkar kasht sehne se
Paap dhulta jaata hai
Raasta khulta jaata hai
Unka ashish milta jaata hai
Bhagya khilta jaata hai.

Kewal haathon kee lakeerein hee nahin
Balki kismat ka lekha bhi hai Unke haath mein
Aur koi rahe ya na rahe saath mere
Guruji sada Hain mere saath mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Razi Rahoon Guruji Kee Raza Mein (07/30/2024)

July 29, 2024

Om Namaha Shivaya
Aaj Ka Suvichaar 🙏🏻🙏🏻

#2353

Guruji Kee Panaah Mein

Shaam ka aasmaan
Uda le jaa tu har gumm
Jo tu le jaa nahin sakta
Toh kumm se kumm unhe kar de tu kumm.

Sooraj ne bhi vaada kiya thaa kal
Ki uske aane se mere gumm jaayenge tal
Kintu vo raha kuch hee pal
Aur mausam gaya badal.

Chhaa gaye baadal ghaney
Bade dhokhebaaz baney
Badhaa gaye gumm ko
Phir kaise na aankh num ho.

Shaam ka aasmaan
Tu kar aansoo ponchne ka kaam
Guruji ko pahuncha mera vintee se bhara paigaam
Ki abb laut aaye muskaan.

Shaam ke aasmaan ne shunya mein ghoora
Kaha usne, “Guruji kehte Hain sooraj ho raha hai boodha
Kewal Guruji hee vaapis laa sakte Hain savera
Unkee kripa duur kar sakti hai har andhera.”

Shaam ke aasmaan ne kiya kuch vichaar
Guruji sangg seedha naata judey rehne ka yaad dilaaya upchaar
Shaam se mainey apne bhullakkarpann ka kiya izhaar
Aur Guruji se arzi kee mainey jod kar Unse seedhi taar.

Chintan ke dauran Guruji ne kee mujhse jo baat
Uss baat ne yoon chhoo liye mere jazbaat
Ki mai Unke charnon mein gayi kho
Jaagi, toh jaana ki mai gayi thi so.

Guruji ne deeye thei swapn darshan
Harshit ho gaya mera mann
Swapn mein shaam ka andhera hua duur
Jaagi, toh chharon oar phaylaa thaa Guruji ka noor.

Shaamein toh aati jaati rahengi jeevan mein
Guruji kee kripa se sthirta aur shanti rahe sabke mann mein
Saari sangat ke liye nikalti hai dil se yeh praarthana
Ki Guruji kee panaah mein sabhi ke gumm ho jaayein fanaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Panaah Mein (07/29/2024)

July 28, 2024

Om Namaha Shivaya
Aaj Ka Suvichaar 🙏🏻🙏🏻

#2352

                   Satya Aur Susangat

Satya aur susangat
Ruhaani rangat
Guruji ke darbar kee
Shringaar hai bhakt ke sansaar kee.

Nikhaarte Huey bhakt kee insaaniyat
Guruji suspasht karte Hain ruhaaniyat
Besharte bhakt maane Unka hukm aur Unkee hidaayat
Ye sab mumkin nahin hai bina Unkee inaayat.

Ye kewal lafzon ka her-pher nahin
Ismein hai adhyatmik vikas ka raaz
Guruji pooran Guru Hain
Lajavaab hai Unke naam ka jahaaz.

Is jahaaz par savaar hokar
Guru kripa se paap dhokar
Bhakt kee atma hoti hai agrasar
Guruji unnat karaate Hain safar.

Jitna doob paayein gehraayee mein
Jitna khoyein khud ko Khudaayee mein
Utna pahunchte jaayenge uss mukaam kee oonchaayee mein
Jahaan baaki sab chhota hokar lupt ho jaayega Guruji kee vadiyaayee mein.

Buss, aur kuch nahin reh jaayega
Jabb Guruji se milan ho jaayega
Yaheen rehte rehte ho sakta hai ye sabb
Kyunki hamaare bheetar hee toh basey Hain Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satya Aur Susangat (07/28/2024)

July 27, 2024

Om Namaha Shivaya
Aaj Ka Suvichaar 🙏🏻🙏🏻
# 2351

Aapki Dharohar Hai

Param poojya Guruji,

Meri bhakti mein hee hogi kamee
Aapki bakhshish toh sada hee hoti hai aparampaar
Shaayad nirdosh nahin meri aankhon kee namee
Varna Aap toh lauta dete Hain khoyi hui muskuraahatein hazaar.

Ghera hai yoon karmon aur vikaaron ke santaap ne
Ki mushkil hota hai lagaana dhyan Aap mein
Ye toh vadiyaayee hai Aapki, Guruvar
Ki Aap phir bhi aane dete Hain mujh nacheez ko Apne dar.

Raasta bhi Aapse, Aapse hee manzil
Himmat deejiye taaki na bann jaaoon buzdil
Jaanti hoon ki Aapki izaazat bina ek patta bhi nahin sakta hil
Lekin kya karoon, sambhaalne se bhi sambhalta nahin is ablaa ka dil.

Aapki chaukhat ke alaawa mujhe aur kaheen nahin hai jaana
Ek Aapke dar ka darwaza hee mainey hai khatkhataana
Beshak dar dar bhatakta rahe saara zamaana
Mujhe toh Aapke hee dwaar par milna hai khaas khazaana.

Isey apni hasrat kahoon ya apna yakeen
Dono ke jazbaat mujhe lagte hain bahut hee haseen
Bhakti karna sikha deejiye
Chetna ka deeya dikha deejiye.

Aapki prerna kee hoon mai pyaasi
Aap Hain maalik, mai hoon daasi
Aap jaante Hain meri har zaroorat aur har chaahat
Aapki dharohar hai meri aankhon kee namee aur meri har muskuraahat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Dharohar Hai (07/27/2024)