Aaj Ka Suvichaar

July 16, 2024

Om Namaha Shivaya
Aaj Ka Suvichaar 🙏🏻🙏🏻

#2340

Sabb Jaante Hain Pyaare Guru Sarkar

Jabb jabb mann ne fikr hai kiya
Rooh ne shukrana ka zikr hai kiya
Vo sapna jo toot gaya
Vo manzar jo chhoot gaya…
Na soch ki muqaddar rooth gaya
Ye vish nahin jiska toone ghoont piya
Ye amrit hai kalyaan ka
Ehsaan tere Guru karunanidhaan ka
Jo aaya bannkar ek mushkil
Jis se pareshaan hua tera dil.

Darasal ye thaa tere pichhle karmon ka bhaar
Aur Guruji ne de diya tujhe bhaar utaar paane ka uphaar
Is akalpaneeya mushkil ke ajab roop mein
Isliye tujhe andhera dikh raha hai dhoop mein.

Sooraj abb bhi raha hai chamak akash mein
Na soch ki tera bhagya soya hai avakaash mein
Guruji kee meher kee baarish se tu bheeg jaayega is tareh
Ki bin bheege na rahegi tere bheetar aur tere jeevan mein koi jageh.

Jo toone socha thaa vo nahin hua
Tere dil ko is hakeekat ne ghaav bann kar ke chhua
Leki tujhe is kadar ghere huey hai Guruji kee shakti aur dua
Ki tu saaf dekh paayega beshak ho tere saamne duvidhaaon ka dhuan.

Itna toh tu jaanta hai
Ye toh tu bhali bhanti maanta hai
Ki Guruji kee soch kee vadiyaayee aur gehraayee ka koi mukaabala nahin
Aur koi nahin soch sakta hai Unse adhik ki tere liye kya hai sahi.

Jabb Ve shareerik roop mein thei viraajmaan
Toh bhi aksar badal dete thei bhakt ka raasta aur mukaam
Aaj bhi Ve Hain maujood lekar ruhaani roop mahaan
Aur Ve teri kalpana se kaheen zyada kalyaanmayi banaayenge teri dastaan.

Ve jaante Hain ki tu gaya hai thakk
Ve jaante Hain ki tu gaya hai ruk
Kal bhi Unke charnon mein jhuka thaa, aaj bhi tu raha hai vahaan jhuk
Toh ho hee nahin sakta ki Guruji tujhse kabhi bhi moadenge mukh.

Tu shagird hai, Ve murshid Hain tere
Abhi toh toone dekhne hain anginat ujle savere
Tu himmat na haar
Guruji awashya karenge tera beda paar
Tu karta hai Unse behad pyaar
Sabb jaante Hain pyaare Guru sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabb Jaante Hain Pyaare Guru Sarkar (07/16/2024)

July 15, 2024

Om Namaha Shivaya
Aaj Ka Suvichaar 🙏🏻🙏🏻

#2339

                      Karma Bandhan

Karma bandhan
Karma hee vandan
Karma bandagi
Karma zindagi.

Karma kee yukti
Karma aur mukti
Yukti yathaarth
Jis se safal ho purusharth.

Isliye, Guruji ke pyaare paarth
Poori shraddha se joad kar apne haath
Shukr manaa ki Guruji Hain tere saath
Bin karta baney tu apne karma kar
Anaasakt hokar har karma Guruji ko arpit kar.

Karma bandhan se rahega phir tu azad
Tujhe har paash se swatantra karenge Pashupati nath
Bannkar aaya hai tu insaan
Bhagwaan se apni ekta ko pehchaan
Yahaan par tu hai mehmaan
Sab kuch chhoot jaana hai yahaan.

Saath jaayega karmon ka bhaar
Isliye apne chaal chalan ko sanvaar
Guruji kee sharan milee hai is baar
Is mauke ko na jaane de tu bekaar.

Nibha apne farz
Adaa kar apna karz
Seekh Guruji ke hukm mein rehna
Chaahe jo bhi pade sehna.

Tu anjaan
Ve jaan-e-jahaan
Tu insaan
Ve Bhagwaan.

Sudhaar kar tera haal
Bin poochhe tujhse sawaal
Bannkar teri raksha kee dhaal
Guruji awashya kar denge tujhe nihaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Karma Bandhan (07/15/2024)

July 14, 2024

Om Namaha Shivaya
Aaj Ka Suvichaar 🙏🏻🙏🏻

#2338

Guruji Maharaj Hain Tere Rahnuma

Shukr hai ki aata nahin dobaara
Vo samaa jo jaata hai guzar
Varna kaise aagey badhey safar
Kaise manzil aaye nazar?

Uss waqt bhi Guruji ne thaa sambhaala
Aaj aur aane wale waqt ka bhi Guru hai rakhwala
Unkee ibadat karte huey
Unkee inaayat se jholi bharte huey
Unke simran se susajjit rahe safar
Toh mushkil samaa bhi thodi aasaani se jaayega guzar.

Guruji ke simran mein jo shakti hai
Vo hee purusharth kee yukti hai
Jabb takk bheetar Guru bhakti hai
Tabb takk himmat nahin thakti hai.

Guruji kee bhakti mein hai vandan
Guruji kee bhakti se hai vishwaas
Guruji kee bhakti se hai unnati
Guruji kee bhakti mein hai ullaas.

Samay ke saath saath
Tu kadam badhaata chal
Tere param poojya Guru nath
Bakhshte rahenge tujhe bal.

Jaise jaise beete samaa
Guruji ke naam ka dhan tu kamaa
Bakhshishon kee poonji kar tu jamaa
Guruji Maharaj Hain tere rahnuma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2024

Om Namaha Shivaya
Aaj Ka Suvichaar 🙏🏻🙏🏻

#2337

            Patjhad Bann Gaya Saawan

Thaa ek duraachaari insaan
Jis se darte thei uskee patni aur santaan
Jhooth, chori, aur nasha
Inse bigadti rahi uskee dasha.

Kaheen se chori kar ek shaam ko veh raha thaa bhaag
Uskee kismat khuli ki uskee chetna gayi jaag
Guzaraa veh Guruji ke Mandir ke paas se
Usey anubhav huey kuch khaas se.

Usey koi kheench kar le gaya mandir ke bheetar
Vahaan usey dilaaya chai prasad aur khilaaya langar
Uss shakhs ne chor ko Guruji ke aasan ke paas baithaaya
Aur Guruji kee kripa se chor ko bahut rona aaya.

Yaad aaye usey apne kiye anginat paap
Jiske kaaran uska parivaar bhugat-ta raha dukh santaap
Uss shakhs ne chor ke haath mein diya Guruji ka swaroop sundar
Aur parivartan aane lagaa chor ke bheetar.

Abb se chori nahin karega, kar liya usne ye nishchay
Nasha aur jhooth chodne ka bhi le liya usne nirnay
Guruji kee mahima se usmein aane lagaa sudhaar
Itihaas bann gaya uska har duraachaar.

Guruji ne usey leen kar diya apni bhakti mein
Naukari kar rozi roti lagaa kamaane
Sukhi honei lagaa uska ghar parivaar
Sabhi sadasya Guruji ke mandir lagey aane.

Ye Guruji ke bulaave bin na thaa mumkin
Abb toh veh Guruji kee yaad mein rehta thaa raat din
Bin rukey subah ya shaam
Veh japta rehta thaa Guruji ka naam
Guru kripa se uske kiye paap jalte gaye
Guru meher se uske kasht talte gaye.

Uskee surt Guru Paramatama se jud gayi yoon
Ki uske bheetar buss gaya ruhaani sukoon
Guruji kee daya se paapi banaa paawan
Uske ghar sansaar ka patjhad bann gaya saawan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Patjhad Bann Gaya Saawan (07/13/2024)

July 12, 2024

Om Namaha Shivaya
Aaj Ka Suvichaar 🙏🏻🙏🏻

#2336

             Ghode Par Savaar Ik Raja

Ghode par savaar ik raja
Vann mein se raha thaa guzar
Sainik bhi thei saath mein uske
Padi raja kee ek fakir par nazar.

Baitha thaa fakir lagaaye dhyan
Maano jagg se ho bilkul anjaan
Raja aakarshit hua fakir kee oar
Jaise chand kee oar hota hai chakor.

Raja baith gaya fakir ke paas
Taruvar ke neeche
Sainik aakar khade ho gaye
Raja ke bilkul peechhe.

Usne sainikon ko diya aadesh
Ki veh fakir ke saath ekant mein chaahta hai rehna
Sainik toh raja ke das thei
Maan gaye ve raja ka kehna.

Raja fakir ko raha nihaarta
Mann mein raha Ishwar ko pukaarta
Usey fakir mein dikh rahi thi chhavi Shivji ke roop kee
Veh mann hee mann saraahana karne lagaa uss roop anoop kee.

Raja bhi leen ho gaya dhyan mein
Aur jaise hee dekha usne apne gireban mein
Usey dikha vahaan fakir
Uske naynon mein bhar aaya neer.

Fakir ne aankhein kholi uss pal
Aur raja ke kandhe par rakha haath
Raja ne dekha fakir ko
Aur karne lagaa uss se baat.

Kaha raja ne fakir se
Ki usey usmein Shiv kee chhavi nazar aayi
Toh fakir kuch kuch muskuraaya
Aur uskee muskuraahat phir sharmaayi.

Usne kaha raja se ki veh prem ka sandesh phailaata hai
Aur idhar udhar ghoomte ghoomte veh Shiv kee mahima gaata hai
“Kya tumhe Shivji se prem hai?” Raja se fakir ne poochha
Raja ne kaha fakir se ki uska Aaraadhya Dev hai na koi dooja.

Fakir ne raja ke sangg Shiv bhakti kee baatein kee bahut saari
Raja ne bhi vyakt kar dee Shivji mein apni shraddha nyaari
Fakir Shiv prem kee baatein raha karta ghanton takk
Phir bhi veh bilkul nahin raha thaa thakk.

Sunnkar fakir ke prem kee gaatha
Raja ka fakir ke charnon mein jhuk gaya maatha
Tabhi fakir ne rakha raja ke sir par apna haath
Awaaz sunn raja ko lagaa ki Shivji kar rahe thei uss-se baat.

Raja ne sir uthaaya
Veh aashcharyachakit ho muskuraaya
Veh apne samaksh fakir na dekh paaya
Balki usey Guruji ka saakshaat roop nazar aaya.

Guruji ne usey diya kalyaan ka vardaan
Raja ne vann mein paa liya jannat ka jahaan
Guruji ne ‘Guruji’ bataaya Apna naam
Aur raja ko Unke mastak par dikha trishul aur Om ka nishaan.

Na raha Raja kee khushi ka thikaana
Fakir ke roop mein Guruji aaye usne jaana
Aur Guruji Hain Shiv ka roop, usey aane lagaa samajh
Itne sundar divya darshan se uske sabhi vichaar gaye sulajh.

Guruji Huey antardhaan
Lekin kuch der takk aati rahi Unkee khushboo
Raja ne Unhe apna Guru liya maan
Aur gadd gadd ho gayi raja kee rooh.

Shuru hui Guru charnon mein raja kee kahaani
Guruji kee meher barsi aur tarr gayi raja kee zindagani
Bhog bhoga usne kintu na banaa bhog vilaas ka shikaar
Jabb usne choda shareer toh uskee rooh pahunchi Sachkhand ke dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ghode Par Savaar Ik Raja (07/12/2024)

July 11, 2024

Om Namaha Shivaya
Aaj Ka Suvichaar 🙏🏻🙏🏻

#2335

   Maalik Meharbaan

Maalik meharbaan
Paawan pita Guruji hamaare
Aapki karuna unn sabko taare
Jinhe bulaate Hain Aap Apne dwaare.

Kabhi pal lagey kewal ek
Kabhi lagg jaayein lamhe anek
Kintu Aapka saath milta hai pal pratyek
Tabhi toh bhakt na thakey Aapke dar par maatha tek.

Anubhav nahin hoti intazaar kee mithaas
Kyunki bujhti nahin hai saboori kee pyaas
Aap bakhshte rahiye saboori
Taaki majboor na kar paaye koi bhi majboori.

Tann kee thakaavat toh na karey pareshaan
Kintu pareshaan karti hai mann aur atma kee thakaan
Aapki karuna aur bakhshish ka milta rahe daan
Poora kar deejiye ye armaan.

Is armaan kee poorti se ho jaayega kalyaan
Kyunki miltee rahegi Aapki karuna aur bakhshish
Aur jaayein bhi toh jaayein kahaan aur kyun
Aap hee Hain ma baap, Aap hee bhai bandhu aur Ish.

Nahin chodna hai Aapka dar
Yaheen jeena hai, yaheen jaana hai marr
Aapki kripa se yaheen jaaoon mai tarr
Aapne hee toh sambhaalna hai mera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maalik Meharbaan (07/11/2024)

July 10, 2024

Om Namaha Shivaya
Aaj Ka Suvichaar 🙏🏻🙏🏻

#2334

             Kuch Bikhre Bikhre Se

Kuch bikhre bikhre se vichaar hain aaj
Mere param poojya Guruji Maharaj
Qubool keejiyega
Sumat deejiyega.

Mere paapon ka pahaad chuur hokar toot jaaye
Kaam krodh ahankar chhoot jaaye
Lobh aur moh na karein pareshaan
Kripa keejiye Guruji karunanidhaan.

Raat ke andhere se na ho bhayy
Baadal dekh kar mujhe na ho sanshay
Sooraj ke prakash jaise ho ye tayy
Ki safar ho mangalmay.

Swatantra ichcha ka karoon sadupyog
Anuchit disha mein na le jaaye koi bhog
Aapne sweekaara hai, ye hai saubhagya khaas
Aapka aabhhar prakat karne mein leen rahein mere shwaas.

Banta rahe Aapke dar par hee rehne ka koi na koi bahaana
Aapka dar lagta hai bahut suhaana
Kabhi bhi yahaan se na keejiyega mujhe ravaana
Jabb keejiyega ravaana, toh yoon ki Apne mein hee mujhe samaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kuch Bikhre Bikhre Se (07/10/2024)

July 9, 2024

Om Namaha Shivaya
Aaj Ka Suvichaar 🙏🏻🙏🏻

#2333

  Kabb Jeevan Mein Tufaan Aa Jaaye

Kabb jeevan mein tufaan aa jaaye
Aksar nahin hota iska pataa
Zyadaatar lagta hai ki aisa kyun hua
Jabb ki humse toh hui nahin koi khataa.

Sunte sunaate aaye hain hum
Ki pichhle janmon mein kiye karam
Parinaam dikhaate hain baad mein
Ghul kar kismat aur jazbaat mein.

Guruji Apni sangat par karte Hain rehem
Karam ke parinaam ko bhugat-ti hui sangat ke
Gehre ho sakte hain zakham
Aur Guruji unn zakhmon par malte Hain marham
Apni mamta ka
Apni kshamta ka.

Maanav janam mila hai hamein
Ismein ye hisaab chukaana bhi zaroori hai
Guruji ke hukm mein rehkar chukaayein toh achcha
Chaahe samajh kar farz ya samjhein ki ek majboori hai.

Kyunki Guruji sambhaalenge hamaare karmon ka adhiktar bhaar
Mushkil se mushkil samay mein bhi hamein doobne se bachaayega Guruji ka pyaar
Karmon ka bhaar utarne par hee pahunch paayenge hum uss paar
Jahaan par mukammal hoga Rabb se milne ke liye rooh ka intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kabb Jeevan Mein Tufaan Aa Jaaye (07/09/2024)

July 8, 2024

Om Namaha Shivaya
Aaj Ka Suvichaar 🙏🏻🙏🏻

#2332

      Aye Mann Mere

Aye mann mere, vaapis aaja
Tu Guruji ke khayaalon mein
Varna aur bhi kho jaayega
Vyarth kee uljhanon aur sawaalon mein.

Jitna bhi chala ja idhar udhar
Uss se tu na sakega sudhar
Sach mein agar tujhe jaana hai sanvar
Toh Guruji par apna dhyan tu dhar.

Guruji ne bakhsha hai tujhe simran
Unkee kripa se tu usmein sakta hai ramm
Unhee ko simar, simarta jaa
Unke kareeb tu aata jaa.

Guruji tujhe jaante Hain tujhse bhi adhik
Ve manzil Hain aur tu hai mahaz ek pathik
Tu hai raaste aur uskee chunautiyon se beshak anjaan
Chinta na kar, tere angg sangg Hain Guru karunanidhaan.

Aye mann, idhar udhar ke khayaal banaate jaayenge tujhe nirdhan
Guru kripa se tu bator achche vichaaron ka dhan
Karta chal Guruji ka bakhsha dhyan aur simran
Dekhna, vikaar darenge tujh par karne se aakraman.

Abhi takk tu agar beshak asthir aur nirbal
Ashanti kee agni mein abb aur tu na jal
Badhaata chal tu apna bal
Vahee kaam aayega pal pal
Usee se niklega har mushkil ka hal
Jiska saamna tu karega aaj aur kal.

Bujh jaayegi agni ashanti kee
Tere bheetar lau hai Guruji kee kanti kee
Guru naam se dho kar apna mal
Abb honei de tu is kanti ko ujjwal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aye Mann Mere (07/08/2024)

July 7, 2024

Om Namaha Shivaya
Aaj Ka Suvichaar 🙏🏻🙏🏻

#2331

Saari Sangat Mein Dhoom Machee

Saari sangat mein dhoom machee
Sabke mukh par hai nutan hansee
Guruji ka avatar divas hai aaya
Sangat ke liye khaas ashirwaad hai laaya.

‘Special blessings’ ka din hai aaj
Janme aaj ke din Param poojya Guruji Maharaj
Unke mata pita ko bhi maalum na thaa
Lekin waqt ne sabhi ko diya bataa
Ki chhota sa saadhaaran sa lagta veh baalak
Banega saare jagat ka pratipaalak.

Guruji pyaare Shiv avatari
Unkee deewaani hoti gayi sangat saari
Unke bachpan se hee Unkee leela dikhne lagi
Kitnon kee soyi kismat Guruji ke sparsh se jagi.

Baalpan se hee leen rehte thei Guruji bhakti mein
Badhauti hoti gayi Unkee shakti mein
Saralta aur saadagi kee soorat
Taralta aur komalta kee moorat.

Samay ke saath saath
Loag aapas mein karne lagey baat
Guruji ke prabhutva kee
Har baat thi bahut mahatva kee.

Vikhyaat honei lagi Guruji kee vadiyaayee
Sakaaratmak parivartan laane lagi Unkee guruyaayee
Guruji ne bakhsha bhakton ko simran aur dhyan
Andhvishwaas aur vehem se duur kar mitaaya bhakton ka agyan.

Unke satsang sunn-ne sunaane kee aarambh hui pratha
Jo banti gayi sangat ke anubhavon kee satya katha
Sunn-ne aur sunaane wale ko miley Guruji ka ashish
Sangat tarti jaa rahi hai paakar Unkee bakhshish.

Guruji ka avatar divas hai bahut hee shubh din
Kyunki sangat kee sadgati nahin hai Guruji bin
Khushi aur garv se samast Guruparivaar is shubh parv ko manaaye
Guruji kee kripa se kalyuga mein satyuga ka paigaam phayltaa jaaye.

Aaj ka din hai Guruji ke sangat par khaas ashirwaad ka
Aur sangat kee oar se Guruji ko khaas dhanyawaad ka
Isliye Unka shukrana karna bhool na jaana
Unke charnon mein shraddha ke suman chadhaana.

Sabhi ko Guru Sahib ke avatar divas kee shubhkaamnaayein
Guruji ka hukm maankar hum sab bande bann jaayein
Yaad rakhein sewa simran satsang shukrana aur samarpan ka paath
Aur Guruji kee mahima ka gungaan sunein aur sunaayein din raat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saari Sangat Mein Dhoom Machee (07/07/2024)