Aaj Ka Suvichaar

June 26, 2024

Om Namaha Shivaya
Aaj Ka Suvichaar 🙏🏻🙏🏻

#2320

            Guruji Hain Asal Maalik

Apne maalik kee nigraani mein kaam kar raha thaa ek das
Kaam toh kar raha thaa, lekin thaa kuch udaas udaas
Maalik ne bulaaya das ko apne paas
Poochne uskee udaasi ka raaz.

Maalum chala ki das ka bachcha thaa beemaar
Chal raha thaa uska upchaar
Kharcha ho raha thaa baar baar
Par haalat sudharne ke na dikh rahe thei aasaar.

Ek din vahaan kaam karte karte
Peene ka paani botal mein bharte bharte
Das ko vahaan dikhee ek chhoti si tasveer
Na maalum thaa usey ki badalne wali thi uskee taqdeer.

Tasveer mein dekha das ne ek noorani chehra
Aankhein Unkee aisee ujjwal ki de rahi hon pehra
Muskaan suhaani, chhavi ruhaani
Tasveer par chehre ke neeche ‘Jai Guruji’ kee likhee nishaani.

Uss tasveer kee oar das hua aakarshit
Usey lagaa uskee koi chinta gayi mitt
Tasveer ke peechhe thaa Guruji ke ashram ka pata aur naam
Das vahaan pahunch gaya khatm kar ke uss din ka apna kaam.

Lagaa usey vo jannat ka sa nazaara
Usne bhi baaki sangat kee tareh ‘Jai Guruji’ pukaara
Uske antas mein jaagrit hui anokhi sakaaratmak oorja
Karne lagaa veh mann hee mann pooja.

Darbar takk pahunchte huey shuru hua Guruji ka mantra jaap
Guruji kee mehar se das bhi japne lagaa saath saath apne aap
Aayi usey ek adbhut si khushboo
Jis se gadd gadd hui uskee rooh
Usne dekhi apne peechhe ek ladki
Jisne kaha vo khushboo thi Guruji kee.

Guruji ke aasan par dikha usey jyotirmay prakash
Jaan gaya ki Guruji shareer mein nahin kintu Unkee maujoodagi hai khaas
Das ko bhi mila chai prasad aur langar prasad
Jinka bhautik bhojan se kuch bhinn hee thaa swad
Baahar nikalte huey kuch sangat ne sunaaye apne anubhav das ko
Jinhonei aur bhi utsaahit kiya das ke Guruji kee mahima sunn-ne ke prayaas ko.

Das ko ho gaya poora yakeen
Ki khaas hai ye mandir aur yahaan kee zameen
Ek nayi ummeed jaagi uske bheetar
Ki abb duur hoga uskee santaan ka roag aur jwar.

Abb se Guruji kee tasveer ko dekh kar
Har roz Guruji ke samaksh maatha tek kar
Veh hansne aur ronei lagaa
Aur phir Guruji mein hee khonei lagaa.

Nirogi hua das ka putr
Das ne manaaya Guruji ka shukr
Usne roag ka bhi kiya bharpoor dhanyawaad
Jiske kaaran Guruji ne joda usey Apne saath.

Aate hain aaj bhi das ke jeevan mein aur bhi imtehaan
Hota hai abb pehle se kumm vo pareshaan
Jaanta hai uske angg sangg Hain Guruvar mahaan
Kabhi bhoolta nahin vo japna Guruji ka naam.

Guruji sabhi par banaaye rakhein Apni drishti
Guruji sabhi par karein Apne ashish kee vrishti
Guruji Hain asal maalik aur sangat bann ke rahe das
Aur das nirantar karey maalik ko khush rakhne ka prayaas.

Bakhshishein milengi beshumar
Sanvar jaayega har das ka ghar sansaar
Jo das Guruji ka hukm maanega har baar
Yakeenan ho jaayega uskee atma ka uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Hain Asal Maalik (06/26/2024)

June 25, 2024

Om Namaha Shivaya
Aaj Ka Suvichaar 🙏🏻🙏🏻

#2319

                    Zindagi Ka Safar

Param poojya Guruji Maharaj,

Aapke charnon mein jhuka rahe rukh
Jeevan mein chaahe sukh aayein ya dukh
Vo bahut hon ya phir thode se
Hum toh sada hain Aapke hee bharose.

Na sukh miley kabhi bhi Aapki kripa bina
Na dukh mein Aapke bin mumkin jeena
Bhoolein na ye kabhi hum
Ki chaahe khushi ho ya gumm
Chaahe dono mein aankhein hon numm
Dono hee nahin kisee bakhshish se kumm.

Kyunki Aap Hain bakhshanhaar
Aap Hain taaranhaar
Aap Hain pratipaalak
Hum hain Aapke baalak.

Hum kabhi bhool jaayein haath pakde rehne kee ada
Toh bhi Aap daya kar hamaara haath thaame rahiyega sada
Zamaane ke zehen mein beshak chhaayi ho bewafaai kee hawaa
Hamein yakeen hai ki Aapke paas hogi bhakton ke har marz kee davaa.

Aapke bharose rahenge
Toh doob kar bhi tayyr paayenge
Aapki meher se is bharose ke sahaare
Hum har chunauti ka saamna kar paayenge.
Aapke pyaar ka hee hai asar
Ki jeevan ho raha hai basar
Varna toh yakeenan aasaan nahin
Paheliyon se bhari is zindagi ka safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Ka Safar (06/25/2024)

June 24, 2024

Om Namaha Shivaya
Aaj Ka Suvichaar 🙏🏻🙏🏻

#2318

Guruji Maharaj Bin Nahin Hai Guzaara

Guruji Maharaj bin nahin hai guzaara
Guruji Maharaj Hain ekmaatra sahaara
Nikaalne wale kashton ke dal dal se
Saathi Hain Ve bhakton ke jeevan ke pal pal ke
Nirdeshak aur sanchaalak Hain Ve har hal ke
Prerna daayak strot bhakton ke manobal ke.

Adbhut hoti hai Guruji kee har leela
Suraksha deta hai Unke satsang ka kila
Jiske jeevan mein chale Unke simran ka paawan silsila
Uska bhavishya aaj nahin toh kal hai khila.

Guruji sabhi ko jaanein pehchaanein
Magar koi Unhe na paaya hai jaan
Na ho Unkee kripa bin sewa, simran, satsang
Na praapt ho Unkee daya bin gyan ya dhyan.

Guruji kee nazar hai har bhakt ke jeevan ke har nazaare par
Guruji awashya le chalenge jeevan kee naiya ko kinaare par
Har bhakt ka uddhaar aadhaarit hai Guruji ke diye sahaare par
Srishti ka nritya nirbhar hai Guruji ke ek ek ishaare par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Maharaj Bin Nahin Hai Guzaara (06/24/2024)

June 23, 2024

Om Namaha Shivaya
Aaj Ka Suvichaar 🙏🏻🙏🏻

#2317

          Santosh Se Bharpoor Ho

Hriday mein prem bhaav ka ho vaas
Prem bhaav mein mishrit ho vishwaas
Shraddha aur samarpan banaayein bhaav ko khaas
Toh kitna anandmayi ho hriday mein Guruji ka nivaas.

Gurbani ka ho raha ho shravan aur manan
Guruji kee kripa se ho raha ho Unka simran
Yaad mein basey hon Guruji ke kamal charan
Soch aur karma mein atmasaat hon Guruji ke vachan
Bheetar se gehra ho Guruji ke prati vandan
Antas ko chhoo raha ho Guruji ka spandan
Guruji kee sewa mein leen ho tann mann dhan
Toh kitna sukhdaayi ho jeevan.

Rooh ke roam roam ko seenche amrit Guruji ke naam ka
Naynon mein basaa rahe saundarya Guruji ke dham ka
Dil ko milta rahe saubhagya Guruji ke paigam ka
Toh Guru ashish se aarambh aur samaapan ho har kaam ka.

Har pal ke liye rahein Guruji ke shukrguzaar
Guru kripa se laate rahein swayam mein sudhaar
Saboori rakhte chalein beshak lamba ho intazaar
Toh santosh se bharpoor ho ghar parivaar aur sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Santosh Se Bharpoor Ho (06/23/2024)

June 22, 2024

Om Namaha Shivaya
Aaj Ka Suvichaar 🙏🏻🙏🏻

#2316

                  Aye Mann Chhote

Aye mann chhote
Aye mann khote
Tu aksar deta hai aise nyote
Ki insaan gumraah hain hotey.

Parantu jisey miley Guruji kee sharan
Jisey Guruji bakhshte Hain simran
Vo jann banaa sakta hai tujhe hee apna das
Kyunki ye Guruji kee mahima hai khaas.

Guruji de rahe Hain tujhe sambhalne ka mauka
Isey gavaa kar na de tu swayam ko dhokha
Guruji bakhshte rahenge tujhe har jo daat
Tu uska sadupyog karna kyunki har vo daat hogi anmol saugat.

Guruji bakhshte rahenge jo simran
Vo karta rahega tera pavitrikaran
Guruji kee meher se tujh se ho paayega jo dhyan
Uss se tujhe praapt hota rahega gyan
Besharte tu jaari rakhega abhyaas
Ki tu karey sudharne ka prayaas.

Tu idhar udhar jo dolega
Toh hota rahega pareshaan
Tabb bhi simran kar paayega tujhe sthir aur shant
Isliye Guruji sangg zaroor bitaaya kar tu ekaant.

Guruji ke naam japp aur dhyan se, o mann
Tu rok sakega vikaaron ka tujh par aakraman
Kyunki teri sthirta tujhe degi ek vishesh shakti
Jisey aur bhi prabal banaayegi har din teri kee gayi bhakti.

Kabhi jo lagega tu bhatakne
Kabhi jo lagega tu atakne
Toh Guruji ko karna yaad
Unse karna maargdarshan kee fariyaad.

Apni neeyat rakhna tu nirmal
Apna swabhaav rakhna tu komal
Duniyadari ke maamalon mein na hee ulajhna
Vaise hee abhi toh tujhe bahut hai sulajhna.

Jitna sanyam tu karega atmasaat
Utne chayyn se tu reh paayega din raat
Guruji ko saadh aur swayam ko anushaasan sikhaata chal
Taaki sukhmayi ho tera aaj aur aane wala kal
Tu bhakt ke antakaran ka hai anmol hissa
Tere sangg juda hai tere maalik kee kahaani ka har kissa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aye Mann Chhote (06/22/2024)

June 21, 2024

Om Namaha Shivaya
Aaj Ka Suvichaar 🙏🏻🙏🏻

#2315

   Sharton Ke Vyaapaar Ke Bin Pyaar 

Sharton ke vyaapaar ke bin pyaar ho
Bhakt ka Guruji ke sangg
Toh hee nikhar paata hai
Niswaarth bhakti ka rangg.

Shraddha ka jazbaat ho
Guruji se bhakt kee baat ho
Atoot vishwaas ho das ke mann mein
Toh sabr saathi banaa rahega jeevan mein.

Kyunki sabr kee toh zaroor hoti hai zaroorat
Khaaskar jabb takk aata nahin uddeshya poorti ka mahoorat
Lekin phir ek aur sawaal ubhar kar aata hai
Ki ‘uddeshya’ shabd se kisko kya samajh aata hai?

Kyunki koi toh uddeshya ko khwaahish poorti samjhe
Koi maane vo ho jabb purusharth sulajhe
Kyunki purusharth ke raaste par chalna hoga insaan ko
Jiske liye paar karna hoga Guruji dwaara diye har imtehaan ko.

Guruji dayavan Hain, bhakt ko rakh kar Apne charan mein
Paristhitiyon ka saamna karaate Hain uske jeevan mein
Rakhkar Guruji par vishwaas aur dekar Unhe shraddha bhara pyaar
Jo bhakt kar le bandagi ko ikhtiyaar
Usey sada suraksha ka ehsaas dilaayegi Guruji kee sharan
Aur anupam anmol Guru pyaar mein bhakt rahega magan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sharton Ke Vyaapaar Ke Bin Pyaar (06/21/2024)

June 20, 2024

Om Namaha Shivaya
Aaj Ka Suvichaar 🙏🏻🙏🏻

#2314

        Kar Ke Guruji Ka Shukrana 

Behaal bhakt ho jaaye nihaal
Pehen kar Guruji ke naam kee dhaal
Nirbal ko mil jaaye bal
Peekar Guruji ka amrit roopi jal.

Naadaan insaan ko mil jaaye gyan
Kar ke Guruji ka shraddha poorna dhyan
Bechayyn jann ko mil jaaye chayyn
Jabb Guru daras se anugrahit hon uske nayyn.

Patjhad mein mehsoos ho saawan
Lekar Guruji ka naam paawan
Andhere ko vida kar de uttam ujaala
Jabb mann ho jaaye Guru prem mein matvaala.

Gumraah ko mil jaaye raah
Kar ke Guruji kee bhakti ka utsah
Beghar ko mil jaaye Guruji ka dar
Jabb pyaare Guruji karein nadar.

Sangat par barsey Guruji ka ashirwaad
Grahan kar ke Unka diya langar prasad
Dawaai kar paaye apna asar
Paakar Guruji kee mehar.

Apni asaliyat se ho jaaye milan
Jabb Guruji kee kripa se ho simran
Dukhiyaare ke dukh ho jaayein lupt
Kar ke daan, sewa, aur paath gupt.

Thaki hui atma ko mil jaaye raahat
Sunnkar Guruji ke aane kee aahat
Niraasha ko mita de asha ka rangg
Jabb suno sunaao Guruji ke satsang.

Dhanya ho jaaye zindagi
Paakar Guruji kee bakhshindagi
Tarr jaaye jeevan ka afsaana
Kar ke Guruji ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kar Ke Guruji Ka Shukrana (06/20/2024)

June 19, 2024

Om Namaha Shivaya
Aaj Ka Suvichaar 🙏🏻🙏🏻

#2313

           Sabhi Ho Jaayein Sukhi

Badal kar mausam ka rukh
Dooji oar kar ke apna mukh
Hawaaon ne jaari rakha apna safar
Chhoote huey na jaane kaunse kaunse dar.

Chooma unhonei Guruji ke paaon ko
Sajda kiya Unke aanchal kee chhaaon ko
Kehne lagi ve Guruji Maharaj se
Brahmand ke sundar Sartaj se,
“Aapke hukm par hum badal deti hain rukh mausam ka
Kintu kewal Aap badal sakte hain rukh har sankat aur gumm ka
Jo bann gaya hai hissa jann jann ke jeevan ka
Jo chheen raha hai saundarya sabke mann ke aangan ka.”

Guruji ne hawaaon ko samjhaaya,
“Ye hai insaan ka kiya karaaya
Prakriti ka kiya nahin sammaan
Kalyugi insaan hain bilkul naadaan.”

“Kewal duniyavi hai Unka gyan
Duur hona hoga unka ruhaani agyan
Ve kehte sunte hain ki Mai hoon kann kann mein
Phir bhool bhi jaate hain ek hee kshan mein.”

“Ek toh ekatrit kiye hain unhonei karma sanchit
Ve Meri kripa se rahe hain mitt
Parantu ikattthaa karte jaate hain aur bhi bhaar
Aise mein kaise gumm rahit hoga sansaar?”

Guruji ne kaha, “Mainey liya bashar ka roop
Phailaane vivek aur kalyaan kee dhoop
Kayi jann baney mere bhakt aur chhaatr
Kaiyon ne khali kiya mann ka paatr.”

“Kintu ve bacha na paayein apne ko vikaar ke aakraman se
Isliye sankat aur gumm duur nahin hotey hain unke jeevan se
Mai kripa karta rahoonga Unhe jodey rakh Apne dhyan aur simran se
Kintu unhe sahi kaam karna hoga apni swatantra ichcha ke dhan se.”

“Tabhi toh rukh badalega gumm ka
Aansoo sookhega har aankh numm ka
Mai toh gumm ka rukh badalta hoon par nasamajh hain ye insaan
Mutthi bhar reh jaayenge jinhe hogi asal dhan kee sahi pehchaan.”

“Ve hongei taruvar ke unn patton ke samaan
Jo taruvar se judey rahenge beshak aaye patjhad ya tufaan
Mai toh karta chaloonga sabhi bhakton ka kalyaan
Aur saath hee leta chaloonga har bhakt ka imtehaan.”

Hawaaon ne Guruji ke charnon mein sees jhukaaya
Guruji ne unhe Apni ruhaani khushboo se mehkaaya
Hawaaon ne dua kee ki har manmukhi ho jaaye Gurumukhi
Taaki Guruji ke ashirwaad se sabhi ho jaayein sukhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabhi Ho Jaayein Sukhi (06/19/2024)

June 18, 2024

Om Namaha Shivaya
Aaj Ka Suvichaar 🙏🏻🙏🏻

#2312

     Guruji Kee Kripa Rangg Laayegi

Jabb bheetar aur baahar ho andhera
Jabb dikh hee na raha ho kaheen bhi savera
Guruji tabb bhi Hain bheetar aur baahar tere liye
Tayyaar kar rahe Hain ashirwaad ke deeye.

Tujhe Ve dikh nahin rahe hon beshak
Kintu mann mein na aane de tu shak
Kyunki chaahe Guruji kee maujoodagi hai teri shaareerik aankhon ke paar
Tere antas kee aankhon ko hota reh sakta hai Guruji ka deedar.

Guruji kee mamta bhari mehar
Yakeenan dikhaayegi apna asar
Tu koshish karte rehne kee koshish kiya kar
Guruji ne pehle bhi tera dukh har liya hai aksar.

Tujhe vaasta tere akhand vishwaas ka
Na chod daaman tu prayaas ka
Guruji ke samaksh badi se badi samasya chhoti hai
Unke hastakshep se samasya khatm hoti hai.

Unke naam amrit se seench apne har shwaas ko
Ve jaante Hain teri har kahi aur ankahi aas ko
Unse ardaas kar ki judi rahe teri surt Unkee surt ke saath
Unke ashirwaad ke deeye jald hee roshan karenge teri andheri raat.

Guruji kee kripa rangg laayegi
Subah zaroor aayegi
Tujhe aagey badhaayegi
Safalta takk pahunchaayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Kripa Rangg Laayegi (06/18/2024)

June 17, 2024

Om Namaha Shivaya
Aaj Ka Suvichaar 🙏🏻🙏🏻

#2311

Satchittanand Ke Sampoorna Aadhaar

Kaanon se ho shravan
Hriday mein ho havan
Mann mein ho simran
Pyaare Guruji ke naam ka
Apne bheetar anand aaye
Guru mein basey Shiv ke dhaam ka.

Unhee ke sangg har lamha aaraam ka
Unhee ke saath har lamha vishraam ka
Unhee mein deedar Ram aur Shyam ka
Unhee se aarambh aur antt har kaam ka.

Ye kalpana nahin, yahee ho hakeekat
Buss, apni oar se chaahiye dridh nishchay aur nek neeyat
Unhee se ishq bakhsh deti hai Unkee ibadat
Bhakt kee rooh ko shringaarit kar deti hai Unkee inaayat.

Ye rooh se rooh ka rishta na jaane kab hua thaa shuru
Parantu ye awashya jaante Hain hamaare pooran Guru
Unka diya asal sukh hai har sambhaavya sukh suvidha se paar
Guruji Maharaj swayam Hain Satchittanand ka sampoorna aadhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satchittanand Ke Sampoorna Aadhaar (06/17/2024)