Aaj Ka Suvichaar

June 16, 2024

Om Namaha Shivaya
Aaj Ka Suvichaar 🙏🏻🙏🏻

#2310

                    Aapki Kripa Se

Param poojya Guruji Maharaj,

Aapki kripa se sunaaoon sundar sa anubhav aaj
Dekha ik manohar drishya
Dikha ek susheel shishya
Mastaana Aapke dar ka
Pyaasa Aapki meher-e-nazar ka
Deewaana Aap pyaare se Guruvar ka
Sewak Aap Mahadev Har ka.

Aap maalik ke charnon mein rakh kar veh apni matt
Koshish karta hai vo ki rakhe vikaaron se vrat
Aapko yaad kiye bina na soyey, na jaagey, na khaaye
Aapki agya bin ek kadam bhi aagey na badhaaye.

Rakh kar Aapka hukm sir aankhon par
Aapke simran aur chintan mein magn rehkar
Aapki mahima gaate huey jeeta hai vo zindagi
Usey santusht rakhti hai Aapki bandagi.

Aisa shishya bann paane ke liye
Jalaaye hongei usne awashya samarpan ke deeye
Mann ka paatr kiya hoga tayyaar
Taaki ekatrit kar paaye Aapki kripa aparampaar.

Adarneeya Guruji, mujh par bhi kar deejiye aisee meharbaani
Ki mai chod paaoon apni har naadaani
Aapki shishya kehlaane ke yogya bann paaoon
Aapko apne vichaar aur karma se sada prasann rakh paaoon.

Aapke charnon mein samarpit karoon apni akal
Aapke paas hee hai mere bheetar ke har agyan ka hal
Nishchay hee ho jaayega mera safar safal
Jabb Aapki kripa se praapt hoga mujhe gyan asal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Kripa Se (06/16/2024)

June 15, 2024

Om Namaha Shivaya
Aaj Ka Suvichaar 🙏🏻🙏🏻

#2309

Apni Meher Ka Noorani Nazaara

Bhakt kee palak se jabb aansoo chhalak jaaye
Karmon ka karz chukaate huey jabb rooh thakk jaaye
Toh Guruji ko hoti hogi sabse zyada pareshaani
Jabki humne kee hoti hai jaane anjaane mein naadaani.

Vo naadaani hui ho is janam mein ya pichhle kisee janam mein
Vahee banti hai kaaran abhi ke gumm mein
Kintu jo aushadhi hai Guruji ke naam ke marham mein
Vo raahat deti rahegi gumm ke har kshan mein.

Guruji ke naam ka marham
Zaroor bharta rahega hamaare zakhm
Kumm karta rahega hamaara gumm
Jaise jaise beetega hamaara jeevan.

Thaki hui rooh ko miltee rahegi raahat
Poori honei lagegi aagey badhne kee chaahat
Paramaarth ke raaste par
Guruji ke is dayalu dar par.

Guruji ka naam hee hai sahaara
Iske bin kisee bhakt ka nahin hai guzaara
Jisne bhi Guruji ko hai deen bhole bhaav se pukaara
Guruji ne dikhaaya hai usey Apni meher ka noorani nazaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apni Meher Ka Noorani Nazaara (06/15/2024)

June 14, 2024

Om Namaha Shivaya
Aaj Ka Suvichaar 🙏🏻🙏🏻

#2308

               Keejiye Aisee Inaayat

Param poojya Guruvar,

Aap taral taruvar, Aap taaranhaar
Aap prakash ke punj, Aap hee paalanhaar
Aap komalta ke kunj, Aap kalyaankaari
Aap saralta ke sarovar, Aap Shiv avatari.

Jo shanti miltee hai Aapki sharan mein
Usmein der ho sakti hai par andher nahin
Jo chayyn milta hai Aapke charan mein
Vahaan uday hoti hai sada saver sahi.

Raahon mein kaantein ho toh bhi Aap rukne nahin dete
Zara sa dard kya hota hai bhakt ko, Aap toh usey Apni goad mein Hain le lete
Jabb dhoop hoti hai karkash, Aap Apne aanchal kee chhavi bhari chhaaon Hain dete
Aur jabb sheet se hoti hai kathinaayi, Aap Apni mamta ka narm sauhaard Hain dete.

Utsah bakhshiye taaki mai kabhi na ho jaaoon udaas
Prerna bakhshiye ki sada mehsoos kar paaoon Aapko mai Apne aaspaas
Deejiye gyan, dhyan, atma-sammaan aur vinamrata ka daan
Keejiye aisee inaayat ki mai bann paaoon changa insaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Keejiye Aisee Inaayat (06/14/2024)

June 13, 2024

Om Namaha Shivaya
Aaj Ka Suvichaar 🙏🏻🙏🏻

#2307

          Mumkin Hai 

Kaayinaat ke kore kaagaz ko
Pyaare Guruji, Aapne Apni kripa se kiya kritagya
Har brahmand, sooraj, chand aur taare
Aapke hukm mein hain ye saare.

Aapka vandan karey vanaspati
Pawan bhi Aapko maane Pashupati
Dharti, jal, agni, aur akash
Na lein ve bhi Aapki sewa se avakaash.

Aapki bakhshish hoti hai har sewa jo miltee hai
Aapki kripa barasti hai toh rooh khiltee hai
Saari kaayinaat ho ya phir ho ek bhakt kee zindagi
Aap lekhe mein likhein toh hee mumkin hoti hai kar paani Aapki bandagi.

Aapka naam lene ke liye bhi
Zaroori hai Aapki manzoori
Aap bhakt kee koshish par meher karein
Toh hee mit sakti hai uskee Aapse duuri
Aap toh dena chaahte Hain har bakhshish, har daat
Lekin hum kaabil toh banein ki sambhaal paayein Aapki dee saugat.

Is kaabiliyat kee bhi bakhshish deejiye, Guruvar
Varna har saugat paakar bhi hum khaali reh jaayenge
Aapka dar na chhoote kabhi, Prabhu
Kalyaan ka khazaana hum yakeenan yaheen paayenge.

Yeh kewal ummeed nahin, ye hai akhand vishwaas
Jiske sangg judi hai Aapko paane kee atoot aas
Ye hai toh chhota muh aur bahut badi baat
Kintu Aapke dayalu dar par mumkin hai paani har daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mumkin Hai (06/13/2024)

June 12, 2024

Om Namaha Shivaya
Aaj Ka Suvichaar 🙏🏻🙏🏻

#2306

              Aapke Aur Bhi Kareeb

Param poojya Guruji Maharaj,

Shukrana har beete huey kal ka
Jo Aapke charnon mein bitaaya
Jisne tapaa kar meri ruhaani kaaya
Itna kuch dikhaaya aur sikhaaya.

Itnee bakhshishein, itne ashirwaad
Bhautik sukh ke sangg adhyaatmik prasad
Jodte rehte Hain mujhe Aap Apne se simran, sewa, satsang ke dwaara
Har sukh dukh kee ghadi mein Aap baney Hain mera sahaara.

Kaha thaa Aapne ki ye raasta nahin hai aasaan
Kaha thaa Aapne ki aayenge kayi imtehaan
Kintu Aapke aanchal kee chhaaon mein beet rahi hai jeevan kee dastaan
Jaanti hoon ki Aap mere angg sangg hotey Hain mai hoti hoon jahaan.

Apni ruhaani maujoodagi se Aap anugrahit karte Hain lamhe intazaar ke
Apni bakhshish se Aap sudhaarte Hain sanskaar mere har anuchit vichaar ke
Aapka shukrana ki Aap tufaan ke dauran bhi dete Hain anmol jhonke bahaar ke
Aapka shukrana ki Aap qubool kar lete Hain mere bol Aapke prati pyaar ke izhaar ke.

Aapki vadiyaayee kee gehraayee mein doobti jaa rahi hoon jabb se
Duniyadari mein doobne se bachaate rehte Hain Aap tabb se
Aapke khayaalon mein khoti jaati hoon jitna
Aap duniya ke mele mein khone se bachaate Hain utna.

Ye Aapki karuna bin nahin ho sakta mumkin
Shukrana karoon Aapka mai har din
Subah se lekar raat takk ke har pal ke liye
Aur phir aglee subah takk ke har pal ke liye.

Har peher ka shukrana karoon Aapko, mere Guruvar
Shukrana ki Aapne bulaaya Apne dar par
Shukrana ki Aap dete Hain shukrana karne ka avsar
Shukrana ki Aapka haath hai mere sir par.

Idhar udhar rulne se bachaane ka shukrana
Jal kee har boond aur ann ke har daane ka shukrana
Meri liv kee leher ko Apni oar le jaane ka shukrana
Aapki kripa se jo sanvar raha hai, mere uss afasaane ka shukrana

Shukrana aaj ka, shukrana Aap Maharaj ka
Shukrana uss kal ka jo aayega
Aapki bakhshi hui har sunehri daat vo laayega
Jis se mera bhavishya mujhe Aapke aur bhi kareeb laayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Aur Bhi Kareeb (06/12/2024)

June 11, 2024

Om Namaha Shivaya
Aaj Ka Suvichaar 🙏🏻🙏🏻

#2305

Guruji Aur Unke Bhakt Ke Beech Kee Baat

Aksar haalaat shaamil hotey hain insaan ke haal mein
Koi dooja dekh paata hai, koi nahin
Aksar jawaab chhipe hotey hain sawaal mein
Koi dooja jaan paata hai, koi nahin.

Dunivayi paheliyan boojhte boojhte
Kabhi kabhi yoon beet jaati hai zindagi
Ki aakhir mein yaad aata hai
Ki karni hee reh gayi bandagi.

Kaash aisa honei se pehle hee hum sambhal jaayein
Kyun na aaj, ya phir abhi hee, swayam ko yaad dilaayein
Ki Guruji se jude rehne mein hee hai hamaari bhalaayee
Kalyuga mein hamaara ekmaatra sahaara hai Unkee guruyaayee.

Kyunki Guruji hee Hain vo sarvashreshth maargdarshak
Jo kalyuga ke kohare mein karaate rahenge hamein agrasar
Agar maargdarshak hee nipun na hoga
Toh aur bhi kathin hota jaayega ye safar.

Vaise kathinaiyan kya hain kumm
Jo unhe aur badhaava dein hum
Kyun na Guruji kee madad ko maanein
Bina banaaye anekon bahaane.

Guruji shubhchintak Hain hamaare
Is satya ko yaad rakhne mein milta rahega ek anokha anand
Kalyugi duniya ke mele mein Guruji se baantein haal
Chod dein ahem, vehem, aur paakhand.

In sabse azad hokar jo hum karenge bandagi
Toh badhti jaayegi Guruji kee bakhshindagi
Kyunki jabb shuddh bhaav se Guruji ko bhajega Unka chhaatr
Toh hee ashirwaad paane ke kaabil banega uske antas ka paatr.

Phir haalaat jaise bhi hongei, achcha hee hoga haal
Na pareshaan karega koi bhi sawaal
Mitenge vikaar ke dosh
Milega santosh
Is rishte mein kisee tareh ka koi roab nahin jataa sakti duniyadaari
Kyunki Guruji aur Unke bhakt ke beech kee baat hai ye saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Aur Unke Bhakt Ke Beech Kee Baat (06/11/2024)

June 10, 2024

Om Namaha Shivaya
Aaj Ka Suvichaar 🙏🏻🙏🏻

#2304

 Guruji Mein Poori Tareh Se Ramm Kar

Kehne se nahin, karne se hota hai pyaar
Guruji se pyaar kar ke dekho toh ek baar
Tumhaare jee chaahega Unhe pyaar karne ka baar baar
Kyunki tum har pal Unke pyaar mein hee paaoge karaar.

Jitna pyaar dogey tum Guruji Maharaj ko
Utna apne kareeb mehsoos kar paaoge Unn sartaj ko
Kyunki tabb hee jud paati hai rooh se rooh ke beech seedhi taar
Jabb koi bhi kabhi bhi dakhal nahin de sakta ek bhi baar.

Kyunki Guruji ka har bhakt se hai anokha naata
Rooh se rooh ka ye naata jo bhakti ko gehra hai kar paata
Bhakt jitna Guruji se hai judta jaata
Utna hee veh sukhi hai ho paata.

Kyunki rooh se rooh ke is naate se
Bhakt banta jaata hai antarmukhi
Aur antarmukhi jann hee reh sakta hai sukhi
Varna baahari prabhaav toh aasaani se kar sakte hain dukhi.

Guruji kee bakhshish se hota rahe simran aur dhyan
Taaki milta rahe tumhe antarmukhi bann-ne ka gyan
Vahee raasta le jaayega Guru milan kee oar
Naadaani hogi jo tum usey dogey chod.

Bin kahe, bin jataaye
Guruji se pyaar jo karta jaaye
Na dikhaawa, na chadhaava
Buss, bheetar ruhaani bulaava.

Aise antarmukhi honei se praapt hogi jo shanti
Uspar aisa ruhaani rangg laayegi Guruji kee kanti
Ki kewal chehra nahin, balki tumhari rooh ho jaayegi Unke noor se noorani
Guruji mein poori tareh se ramm kar hee toh safal hogi tumhari zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Mein Poori Tareh Se Ramm Kar (06/10/2024)

June 9, 2024

Om Namaha Shivaya
Aaj Ka Suvichaar 🙏🏻🙏🏻

#2303

Ve Toh Kirpadhaar Hain

Na sada saath rahengi tumhaari maa
Na sada saath rahenge bachche
Duniya ke mele mein, o matvaale
Tumhaara saath chod jaayenge achche achche.

Tum jin rishton ko maanoge pakke
Mumkin hai ki ve bhi sabit hon kachche
Tum yakeen karo ya nahin
Ye bol hain vaastavik aur sachche.

Haan, ek Hain, jo tumhaare angg sangg rahenge hamesha
Chaahe jabb bhi jaisi bhi ho tumhaari dasha
Ve hee dikhaayenge tumhe asal dhan kee disha
Utaar kar tum par chadha hua moh maya ka nasha.

Ve Hain Guruji param poojya pyaare
Ve sada saath rahenge tumhaare
Saump kar dekho toh sahi tum Unhe apne jeevan kee doar
Tumhe jaane kee zaroorat nahin padegi kaheen aur.

Har duniyavi rishte se zyada bharosemandd hai rishta Guruji ke sangg
Unka prem laayega tumhaare jeevan mein imaan ka rangg
Tumhaare sabse kathin lamhon mein bhi tumhe rukne na degi Unkee rehmat
Mushkil bhi ho agar vilamb sehna, toh bhi Unkee raza se rehna sehmat.

Har rishte ko nibhaao tum pyaar se
Kintu bandh na jaao moh ya dooje kisee vikaar se
Duniya mein rehne ke din do chaar hain
Aur duniya wale toh khud hee bebas aur laachaar hain.

Lekin, Guruji Parwardigaar Hain
Ve Shivji ke avatar Hain
Guruji tumhe doobne de hee nahin sakte
Kyunki Ve toh taaranhaar Hain
Guruji tumhe Apni anukampa se vanchit na rakhenge kabhi
Kyunki Ve toh kirpadhaar Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ve Toh Kirpadhaar Hain (06/09/2024)

June 8, 2024

Om Namaha Shivaya
Aaj Ka Suvichaar 🙏🏻🙏🏻

#2302

      Aapki Dharohar

Mere param poojya MahaDev Har
Aapki kripa se chal raha hai mera safar
Aapki leela, Aapki karuna, Aapki mahima sunnkar aur dekh kar
Har pal badhti hai mere mann mein Aapki kadar.

Jabb se Aapne bulaaya Apni chaukhat par
Aapke pyaar ka hua hai aisa asar
Ki chhoot hee gaye baaki saare dar
Aur aankhein khuli hon ya hon bandd, buss, Aap hee Aap aate Hain nazar.

Jabb se hui hai Aapki nadar
Jeevan anokhe dhangg se raha hai guzar
Beshak hamesha aasaan nahin sweekriti kee dagar
Phir bhi koshish kar seekh rahi hoon chodna agar-magar.

Kyunki samarpan bin pahunch na paaoongi apne asli ghar
Jahaan ka raasta dikha rahe Hain Aap Guruvar
Aap kripa keejiye is bigdee hui bachchi par
Taaki Aapki ichcha ke mutaabik beete mera ye safar.

Jhuka kar Aapke charnon mein apna sir
Jodoon apne do kar bannkar Aapki naukar
Deejiye Aap par akhand vishwaas ka mujhe var
Meri har saans hai Aapki dharohar, usey doon mai Aapki sharan mein dhar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Dharohar (06/08/2024)

June 7, 2024

Om Namaha Shivaya
Aaj Ka Suvichaar 🙏🏻🙏🏻

#2301

Sab Kuch Aapke Haath Mein Hai

Param poojya Guruji,

Dete rahiye kalyaan ka uphaar
Karte rahiye mere naseeb ka shringaar
Jaisa Aap nikhaarein, mai usey kar loon sweekaar
Deejiye mujhe aisa samarpan daan, mere sarkar.

Na jaane kitne janmon se ekatrit kiye huey hongei mainey ye karam, mere Parwardigaar
Ye toh khushkismati hai meri ki Aapne bulaaya mujhe Apne dwaar
Koi nahin de sakta mujhe kabhi Aapke jitna dulaar
Mai swayam ko ye yaad dilaati rahoon baar baar
Badhta jaaye mere bheetar Aapke prati pyaar
Ye hai mere dil kee deen pukaar.

Aapki meher kee hoon mohtaaj, mere paalanhaar
Aapki bakhshish par nirbhar hoon, mere bakhshanhaar
Aapki rehmat hee mujhe sakti hai taar
Aur koi nahin hai ya hoga mera taaranhaar.

Thakk chuki hoon chal kar pathreele raaston par
Aap Apne aanchal mein samaa leejiye
Har dar par milee thokar
Aap Apne charnon mein panah deejiye.

Sookh chuke hain aansoo abb
Aap toh jaante Hain sabb
Yakeen hai aaj bhi is tathya par, jis par yakeen thaa tabb
Ki sab kuch Aapke haath mein hai, mere Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Kuch Aapke Haath Mein Hai (06/07/2024)