Aaj Ka Suvichaar

May 27, 2024

Om Namaha Shivaya
Aaj Ka Suvichaar 🙏🏻🙏🏻

#2290

     Guruji Kee Yaad

Guru kripa se savaar hua hai tu Unke naam kee naav mein
Doob jaa tu Guruji ke prati prem bhaav mein
Kaafi samay bitaa liya anekon tareh ke laukik chaav mein
Abb pirota chal Guruji kee yaad ka marham apne har ghaav mein.

Dard kumm hotei hotei ho jaayega gumm
Bheetar bajti rahegi Guruji ke naam kee madhur dhun
Is dhun dwaara Guruji se teri nazdeeki badhegi
Tere bheetar kee ruhaaniyat sunehri oonchaayee chhooegi.

Basey Hain Guruji tere antas kee gehraayee mein
Jahaan pahunchaayegi tujhe Unkee yaad
Tu bahut khushnaseeb hai ki Unhonei apnaaya hai tujhe
Unkee yaad mein shuddh bhaav ke sangg shaamil kar Unke prati dhanyawaad.

Guruji ko tu pyaar kar
Luta de apna sarvasva Unpar
Aur Guruji se kar fariyaad
Ki tujhe Ve har pal aayein yaad.

Guruji kee yaad se madhur
Kuch bhi nahin is sansaar mein
Guruji kee yaad tujhe magn rakhegi
Unke pavitra pyaar mein.

Tera har shwaas mehek jaayega
Unkee bakhshi hui ruhaani bahaar mein
Tera har din guzarne lagega
Unse milan ke meethe intazaar mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad (05/27/2024)

May 26, 2024

Om Namaha Shivaya
Aaj Ka Suvichaar 🙏🏻🙏🏻

#2289

               Kalyaan Aparampaar

Toone kavach pehna hai Guruji ke naam ka
Kabhi na tootega tera sapna kalyaan ka
Jiske sir par haath ho Guruji meharbaan ka
Usey koi prayojan hee nahin Khudaayee ke pramaan ka.

Kyunki Guruji kee guruyaayee mein basee hai Khudaayee
Unkee vadiyaayee mein basee hai ruhaaniyat kee gehraayee
Divya hota hai Unka deedar
Unke vash mein hai saara sansaar.

Beshak pareshaaniyon ne tujhe hua hai ghera
Apitu kalyaan awashya ho raha hai tera
Tu kar Guruji ke hukm par gupt paath, sewa, aur daan
Guruji karte chalenge tera gupt aur pratyaksh kalyaan.

Shubhta ka raag hai saubhagya
Sukh, samriddhi, swaasthya
Shubhta ka ehsaas ho sabke liye
Isliye jalaaye rakh sadbhaav ke deeye
Sabke prati
Toh sudharegi gati
Badhegi sumati
Khush hongei Pashupati.

Paashon ka karenge Ve vinaash
Hota chalega tere dukhon ka naash
Mann jaise jaise hoga saaf
Adbhut azaadi aur halkepan ka hoga ehsaas
Jismein hoga ek aisa saatvik sukh
Jisey kumm na kar paayega koi bhi duniyavee dukh.

Tu anubhav kar paayega Guruji kee shakti apne bheetar
Vo hee hai Param anand ka anubhav nirantar
Kyunki Guruji Hain Pashupati Nath Parameshwar
Jo swayam Hain Pranav aur naad roopi Ishwar.

Khul chuka hai tere liye kalyaan ka dwaar
Guruji dete rahenge bakhshishein beshumaar
Unmein leen rakhega mann to tujhe baandh na paayega ye sansaar
Guruji dwaara tere kalyaan ka sapna sach hokar laayega sanatan sukh aparampaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyaan Aparampaar (05/26/2024)

May 25, 2024

Om Namaha Shivaya
Aaj Ka Suvichaar 🙏🏻🙏🏻

#2288

               Badi Der Bhayee

Anekon shareer mein baste baste
Rooh mein bechayyn ehsaas ka baar baar hua aana hai
Rooh ne Guruji ko apna anurodh sunaana hai
Ki badi der bhayee, abb ghar jaana hai.

Badi der bhayee, abb ghar jaana hai
Vahaan, jahaan mera asal thikaana hai
Guruji ne hee raasta dikhaana hai
Badi der bhayee, abb ghar jaana hai.

Raasta rokey huey ye janam maran ka fasaana hai
Guruji hee jaanein yahaan kewal laukik gharaana hai
Guruji ne toh vahaan pahunchaana hai
Jahaan asal gharaana hai.

Maut toh jeene ka antt nahin
Kewal aglaa janam lene ka bahaana hai
Guruji ne rachaa yeh khel deewana hai
Badi der bhayee, abb ghar jaana hai.

Ye duniya maya ka maikhaana hai
Na jaane yahaan se sada ke liye kab hona ravaana hai
Guruji ke naam ke amrit ne hee tadapne se bachaana hai
Badi der bhayee, abb ghar jaana hai.

Guruji kee sharan sabse anmol khazaana hai
Guruji ke hukm ke khilaaf nahin jaana hai
Jitnee baar Ve kahein, rooh ko janmon se guzar jaana hai
Har janam mein Guru charnon mein sees jhukaana hai
Har janam mein har saans mein Guruji ka shukrana hai
Badi der bhayee, abb ghar jaana hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Badi Der Bhayee (05/25/2024)

May 24, 2024

Om Namaha Shivaya
Aaj Ka Suvichaar 🙏🏻🙏🏻

#2287

  O Musaafir Matvaale

O musaafir matvaale
Le tu dhyan se har kadam
Phayla hai kalyuga ka dal dal
Satark rehna tu har pal.

Aaspaas hain anginat aakarshan
Chalta hai nirantar vikaaron ka aakraman
Zaroori hai sudhaarte rehna vichaaron kee aakriti
Zaroori hai ki kaayam rahe tere chitt kee jaagriti
Taaki tu har nakaaratmak aakraman ka saamna kar paaye
Taaki tu kaheen kisee haanikaarak shakti se na darr jaaye.

Beparwahi achchi hai, lekin laparwahi nahin, rakh ye yaad
Guruji se maargdarshan ke liye karta chal tu fariyaad
Guruji kee yaad mein jeeta chal
Unke naam ka amrit tu peeta chal
Bheetar aur baahar ka har vish dhul jaayega
Bandd raasta bhi Unkee kripa se khul jaayega.

Jaise jaise Unke naam ka rangg tujh par chadhega
Tujhe bhatakna nahin padega
Tujhe raasta saaf aayega nazar
Tu ho paayega agrasar.

Dal dal mein na phansega tu
Dal dal mein na dhansega tu
Tujhe koi anuchit prabhav na sakega chhoo
Chalte rehne se na thakega tu.

Bahut hui tujh se naadaaniyaan
Parantu anginat hain Guruji kee meherbaaniyan
Ve toh sada karte Hain bhakton ka kalyaan
Isliye na chod Unka naam japp aur dhyan.

Mushkil safar lagta hai maano kabhi na hoga khatm
Sangharsh mein zyada dard karta hai har tareh ka zakhm
Tu Guruji par bharosa rakh aur dheeraj dhar
Na banaane de mayoosi ko apne antas mein ghar
Shraddha se pooja kar Guruji ko vahaan
Chalta chal Ve le jaayein jahaan
Ve hee preet Hain, Ve hee meet Hain
Ve maargdarshak Hain Bhagwaan ke roop mein
Aseem mamta mein bheega hai Unka aanchal
Ve sambhaalte rahenge tujhe jeevan kee chhaaon aur dhoop mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Musaafir Matvaale (05/24/2024)

May 23, 2024

Om Namaha Shivaya
Aaj Ka Suvichaar 🙏🏻🙏🏻

#2286

                      Na Ghabraa

Na ghabraa tu saver aane kee der se
Na ghabraa tu raat ke andher se
Tera sir jhuka hai Guruji ke dar par
Ve ujaala laane mein na chodenge koi bhi kasar.

Ve toh Surya Dev ke swami Hain swayam
Sabke jeevan ko ujjwal karna hai Unka dharam
Tu rakh shraddha, tu rakh sanyam
Tujhe bhool nahin gayi hai Unke prakash kee kiran.

Jabb bhi tujhe lagey ki Unkee tujh par nahin hai nazar
Toh apni saanson par dena dhyan
Ve swayam mein hee hain pramaan
Ki teri raksha kar rahe Hain Ve karunanidhaan.

Aksar paudhe ke poshan ke liye
Chhaaon bhi hoti hai zaroori
Isliye andher ko chhaaon jaan
Usey bhi Guruji kee mamta ka hissa le maan.

Andher mein bhi koshish karte rehne ka
Tu chod na dena prayaas
Guruji ko paayega tu apne paas
Jabb bhi Unke saanidhya kee hogi tujhe pyaas.

Guruji toh Hain Shivji ke swaroop
Unkee leela hai anokhi aur anoop
Isliye chaahe chhaaon ho ya ho dhoop
Unkee meher se sajaa rahega tere jeevan ka roop.

Vishwaas kar tu, aur chalta chal
Tu Guruji ke aanchal mein raha hai pal
Aaj nahin toh kal tere kasht jaayenge tal
Guruji kee raza mein raazi reh kar tera safar ho jaayega safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Ghabraa (05/23/2024)

May 22, 2024

Om Namaha Shivaya
Aaj Ka Suvichaar 🙏🏻🙏🏻

#2285

                  Guruji Kee Nadar

Surakshit hai tere jeevan kee doar
Tu na sochna kabhi jaane ka kaheen aur
Guruji ne liya hai tere jeevan kee doar ko pyaar se pakad
Aur tere jeevan ke har pehlu par baras rahi hai Unkee nadar.

Guruji kee nadar
Ka ho raha hai asar
Beshak tu jaane ya na jaane
Beshak tu maane ya na maane.

Varna tu abb takk toot jaata
Tu saamna na kar paata
Itnee kathinaayiyon ka
Itnee beemaariyon ka.

Arey, mumkin hai ki Guruji ne tujhe diya ho jeevan daan
Aur tujhe is baat ka ho hee na gyan
Tu har haalaat ko Unkee meharbaani hee jaan
Kyunki Ve karva rahe Hain tere praarabdh karmon ka bhugtaan.

Kewal maya aur mal nahin, balki ye karma bhi hain paash tere
Jo na jaane kitne janmon se huey hain tujhe ghere
Abb jo tu aaya hai pooran Guru kee sharan mein
Toh Ve tujhe sambhaale rahenge Apne kamal charan mein.

Guruji Maharaj Hain Pashupati Nath Shivji ke avatar
Teri khushkismati hai ki Unhonei tujhe kiya hai sweekaar
Har pal, har ghadi, har peher, har din ho raha hai tera uddhaar
Guruji kee nadar se zyada kalyaanmayi nahin hai brahmand mein koi bhi uphaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Nadar (05/22/2024)

May 21, 2024

Om Namaha Shivaya
Aaj Ka Suvichaar 🙏🏻🙏🏻

#2284

Zaroor Laut Kar Aati Hai Bahaar

Guruji ko hai maalum
Tere dukh aur dard ka kaaran
Aur uska prayojan bhi hai Unhe gyat
Tu is baat kee tasalli rakh din raat.

Jo sangharsh chal raha tere bheetar
Guruji ko hai uskee poori khabar
Tu fikar na kar
Zaroor hogi tujh par Unkee nadar.

Jo kaante tujhe chubh rahe hain abhi
Jald hee chubhna chod denge ve sabhi
Tabb takk lagaata chal marham Guruji ke naam ka
Taaki anubhav ho tere zakhmon ko thode aaraam ka.

Tera yeh daur beshak bahut kathinaayi wala hai
Kintu ye na bhool ki tera Guru vaddi vadiyaayee wala hai
Ye daur aaya hai toh beet jaayega samay ke saath
Aur Guruji kabhi bhi nahin chodenge tera haath.

Guruji kee daya se zaroor khatm hoga aane wali subah ka intazaar
Teri samasyaaon ke samadhan ka sooraj aayega lekar kiranein kayi hazaar
Ye dwaar hai Shiv avatari Guruji Maharaj ka dwaar
Yahaan tufaan thamm jaane par zaroor laut kar aati hai bahaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zaroor Laut Kar Aati Hai Bahaar (05/21/2024)

May 20, 2024

Om Namaha Shivaya
Aaj Ka Suvichaar 🙏🏻🙏🏻

#2283

          Dil Mein Karte Rehna Vaas

Dil mein karte rehna vaas, Guruji
Varna ho jaaoongi udaas, Guruji
Atoot rahe Aap par mera vishwaas, Guruji
Aapke naam se sajey mera har shwaas, Guruji.

Aapse hee antas mein hai ujaala
Aapke bin mera na hai koi rakhwaala
Apna pyaar dekar Aapne jabb se hai mujhe paala
Yakeen hai ki uss se pehle bhi Aapne hee thaa mujhe sambhaala.

Jis bhi shakti ke dwaara pahunchi mai Aapke dwaar
Unkee mai rahoongi sada shukrguzaar
Aur jo Aap MahaShiv ne mujhe bula kar kiya hai sweekaar
Mera shukrana kabhi paryaapt na ho chaahe mai karoon shukrana baarambaar.

Kripa keejiye mujh par ki mere liye shukrana shabd na rahe kewal
Apitu mai isey mehsoos karoon har anubhav mein har pal
Kyunki shukrana bin bhakti reh jaayegi adhoori
Jis bhakti ko bhawna aur kshama yachna kar denge poori.

Na aaye mujhe granthon mein likhe pooja ka upchaar
Galatiyan ho jaati hain mujh se baar baar
Kintu Aapki karuna se sahi raaste par agrasar honei kee koshish hai poori
Kripa kar mujhe vaapis kheench leejiyega jo badhne lagey meri Aapse duuri.

Mai toh poori tareh se aashrit hoon Aap par, mere swami
Aapse chhipi nahin hai meri koi bhi khaami
Maaf keejiyega meri har naadaani
Agyan ka andhera duur keejiyega, Dev sarvagyani.

Aapse baatein kar ke lagta hai itna achcha
Jaanti hoon na, ki sunn-ne wala hai poornatayaa sachcha
Kabhi naaraaz na hona mujh se, mere Parameshwar
Mai apni aakhiri saans takk jhuki rahoon Aapke charnon mein, Aapke dar par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dil Mein Karte Rehna Vaa (05/20/2024)

May 19, 2024

Om Namaha Shivaya
Aaj Ka Suvichaar 🙏🏻🙏🏻

#2282

   Shukrana Mein Dooba Hua Fakir

Guruji bulaate Hain Apni sangat ko Apne dwaar
Isee tareh se pahuncha ek fakir Guruji ke darbar
Suna thaa usne Guruji ke baare mein
Suna thaa usne ki bahut shakti hai Unke diye sahaare mein
Parantu is din se pehle mila hee nahin usey kabhi vahaan aane ka mauka
Ya phir yoon kahein ki Guruji ne hee usey vahaan aane se abb takk thaa roka.

Guruji hee jaante Hain kiska sahi waqt hota hai kabb
Aur Ve meher kar bhakt ko kisee na kisee tareeke se bula lete Hain tabb
Fakir jabb pahuncha Unke darbar mein
Toh ramm gaya Unke ruhaani pyaar mein
Veh Unke charnon mein girkar lagaa ronei
Guru kripa se uska kalyaan lagaa thaa honei.

Baandhe huey thi usey jo bhi zanjeer
Har uss zanjeer se thakk chuka thaa fakir
Paaoon mein bediyan thi agyan kee
Jinmein gaanthein thi abhimaan kee.

Apni khaamiyon par daal na paaya thaa abb takk nazar
Guruji ke darbar mein Guruji kee ruhaani maujoodagi ka uspar hua aisa asar
Ki uskee aankhon ke saamne chalchitra kee bhanti dikha usey apna beeta hua jeevan
Aur apne karma, apne rishton, apne vikaaron ko yaad kar kaamp utha uska mann.

Chalti rahi Gurbani vahaan
Uska dhyan bhatka pehle kahaan kahaan
Lekin phir thode samay ke baad
Niklee uske mann se Guruji ko fariyaad
Ki Ve usey bediyon se karein azad
Aur uske hriday mein bass kar karein uske hriday ko aabaad.

Dekhte dekhte Guruji kee tasveer ko
Apne par khoob glaani hui fakir ko
Guruji ne uske pashchataap ke bhaav ko sweekara
Uske jeevan kee naav ko dikhne lagaa abb kinaara.

Guruji ne Apne naam ke amrit se
Seencha fakir ke har vichaar ko
Agyan kee bediyan aur abhimaan kee ganthein lagin khulne
Uske paap aur vikaar lagey dhulne
Tootne lagi usey baandhne wali har zanjeer
Utsah se tejas honei lagaa abb fakir.

Guruji ke naam ke amrit kee aushadheeya shakti se
Aur Guruji kee bakhshi hui bhakti se
Fakir leen hota gaya Guruji ke simran mein
Aur sakaaratmakta chhaane lagi uske mann mein.

Guruji karte rahe fakir par upkaar
Unkee meharbaani se hota gaya uska uddhaar
Unkee rehmat se usey samajh aane lagaa parmaarth ka saar aur vistaar
Shukrana mein doobey fakir ko Guruji ne taara dekar Apna pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Mein Dooba Hua Fakir (05/19/2024)

May 18, 2024

Om Namaha Shivaya
Aaj Ka Suvichaar 🙏🏻🙏🏻

#2281

                Ibadat Kee Aadat

Ibadat kee aadat
Sudhaaregi tere antas kee haalat
Bina kisee nuksaan
Sunn le, o naadaan.

Swayam hee kar ke dekh le
Na dhoondh kaheen aur tu pramaan
Mann se jhuk jaa Guruji ke charan mein
Ibadat kar le Unkee sharan mein.

Ibadat kee shakti ko tu lega pehchaan
Toh tujhe aur bhi aakarshit karenge simran aur dhyan
Guruji ke swaroop ke saamne baith kar ibadat ke dauran
Kar diya kar tu apne dil ka haal bayaan.

Sotey jaagte reh tu Guruji kee ibadat mein
Anand manaa le Unkee inaayat mein
Tere bin jaane bhi Guruji kar rahe Hain tera kalyaan
Isliye tu Unke Prabhutva ko bin sanshay ke le maan.

Shukrana ko banaa le tu ibadat ka hissa
Kyunki ibadat se juda hai tere kalyaan ka kissa
Jabb jabb ibadat mein Guruji se judegi teri seedhi taar
Tujhe mehsoos hoga ki Guruji kar rahe Hain tera uddhaar.

Beshak ibadat dheere dheere rangg laayegi
Kintu teri bhavna jabb ibadat mein behti jaayegi
Toh veh bhavna Guruji se itna kuch keh jaayegi
Ki teri jindri is safar kee har chunauti seh paayegi.

Ibadat se Guruji aur tera rishta gehra hota jaayega
Ibadat se tera antas Guruji mein yoon khota jaayega
Ki duniya ke mele mein jeete huey bhi tu dil-o-jaan se hoga Guruji ke paas
Karta chal tu Unkee ibadat, ibadat ka karishma hai bahut hee khaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ibadat Kee Aadat (05/18/2024)