Aaj Ka Suvichaar

May 18, 2024

Om Namaha Shivaya
Aaj Ka Suvichaar 🙏🏻🙏🏻

#2281

                Ibadat Kee Aadat

Ibadat kee aadat
Sudhaaregi tere antas kee haalat
Bina kisee nuksaan
Sunn le, o naadaan.

Swayam hee kar ke dekh le
Na dhoondh kaheen aur tu pramaan
Mann se jhuk jaa Guruji ke charan mein
Ibadat kar le Unkee sharan mein.

Ibadat kee shakti ko tu lega pehchaan
Toh tujhe aur bhi aakarshit karenge simran aur dhyan
Guruji ke swaroop ke saamne baith kar ibadat ke dauran
Kar diya kar tu apne dil ka haal bayaan.

Sotey jaagte reh tu Guruji kee ibadat mein
Anand manaa le Unkee inaayat mein
Tere bin jaane bhi Guruji kar rahe Hain tera kalyaan
Isliye tu Unke Prabhutva ko bin sanshay ke le maan.

Shukrana ko banaa le tu ibadat ka hissa
Kyunki ibadat se juda hai tere kalyaan ka kissa
Jabb jabb ibadat mein Guruji se judegi teri seedhi taar
Tujhe mehsoos hoga ki Guruji kar rahe Hain tera uddhaar.

Beshak ibadat dheere dheere rangg laayegi
Kintu teri bhavna jabb ibadat mein behti jaayegi
Toh veh bhavna Guruji se itna kuch keh jaayegi
Ki teri jindri is safar kee har chunauti seh paayegi.

Ibadat se Guruji aur tera rishta gehra hota jaayega
Ibadat se tera antas Guruji mein yoon khota jaayega
Ki duniya ke mele mein jeete huey bhi tu dil-o-jaan se hoga Guruji ke paas
Karta chal tu Unkee ibadat, ibadat ka karishma hai bahut hee khaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ibadat Kee Aadat (05/18/2024)

May 17, 2024

Om Namaha Shivaya
Aaj Ka Suvichaar 🙏🏻🙏🏻

#2280

     Adhyaatmik Oonchaayee Ka Var

Guruji kee meher se mitt jaata hai mann ka paakhand
Guruji kee rehmatein hain be-antt
Guruji ka har ashirwaad hai akhand
Guruji ke kamal charan mein hai sachkhand.

Guruji ke liye namumkin hai kuch
Yeh soch hai bilkul tuchh
Kyunki Ve toh Hain Parameshwar Parabrahmroopi Parwardigaar
Jinke hukm par aashrit hai ye sansaar.

Na hil sakey koi patta
Na hai koi satta
Bin Guruji kee izaazat ke
Bin Guruji kee hukoomat ke.

Unke naam bin astitvaheen hai sabb
Kyunki Guruji swayam Hain Rabb
Aur Rabb se hee hai sabb
Aisa tabb bhi thaa, aur aisa hee hai abb.

Aur aisa hee aagey bhi rahega
Jabb takk srishti kee rachna paalan sanhaar ka jharna bahega
Jo ki hota rahega lagaataar
Kyunki aisa hota aaya hai baarambaar.

Is paraakram mein hee hota rehta hai praaniyon ka uddhaar
Guruji kee kripa se yoniyon ko bhog kar ek din hum bhi pahunchenge uss paar
Guruji dikhaate rehte Hain jo raasta
Vahaan nirantar rehta hai ruhaaniyat se vaasta
Guruji bulaate Hain Apne dar par
Hamein dene adhyaatmik oonchaayee ka var.

Ve toh chaahte Hain yeh var dena
Besharte hum seekh lein isey lena
Jiske liye Guruji se Guruji ko hee maangna hai zaroori
Baaki har zaroorat aur chaahat se anaasakt hokar banaani hogi ruhaani duuri.

Guruji kee imaandaar ibadat kar
Unke ashish se hum jaayein tarr
Unhee ke kamal charnon mein beete jo ye safar
Toh hum anugrahit hotei rahenge paakar Unkee meher-e-nazar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatmik Oonchaayee Ka Var (05/17/2024)

May 16, 2024

Om Namaha Shivaya
Aaj Ka Suvichaar 🙏🏻🙏🏻

#2279

                 Unhee Ko Rijhaao

Prerna ka prakash
Dega tumhaare mann ka akash
Guruji ke simran aur chintan dwaara
Isliye lo tum inka atoot sahaara.

Utsah se sajegi tumhaari raah
Jitnee badhegi mann mein Guruji kee chaah
Sunkar aur sunakar Unke satsang
Kyunki unmein hogi ruhaani umang.

Bhole bhaav se bheeg jaayenge tumhaare nayyn
Jabb Guru prapti kee tamanna le legi tumhaara chayyn
Guruji ke sangg waqt bitaao
Unhe apne dil ka haal bataao.

Neevanpann badhega aur paapon ka bojh ghatega
Jabb tumhaara mann aur tann sewa mein lagega
Niswaarthataa se ho jaaoge aur bhi pavitra
Chamakne lagega tumhaara charitra.

Karte rahoge Guruji ka tum jitna shukrana
Tumhaare liye utna saral hoga har din bitaana
Mushkilon ka toh laga rahega aana jaana
Kintu unke kaaran jeevan na banega neeras afsaana.

Guruji se karte rahoge jo tum ardaas
Ki Ve bhakti kee shakti se bhar dein tumhaara har shwaas
Toh is shakti se tumhe milenge atma-vishwaas aur taakat
Is shakti se tumhe milegi nirbhayta aur himmat.

Guruji ko samarpan kar dega tumhaara mann
Toh karmon ke bhaar kee vyatha hogi kumm
Is ehsaas ke saath jeena ho jaayega aasaan
Ki tumhaare angg sangg Hain swayam Bhagwaan.

Ye saari rehmatein hain, jo Guruji kee marzi bin
Kisee ke liye bhi paani nahin hain mumkin
Isliye Unhee ko rijhaao har pal, har din
Dekhna, Unkee baaki kee rehmatein bhi tum nahin paaoge gin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unhee Ko Rijhaao (05/16/2024)

May 15, 2024

Om Namaha Shivaya
Aaj Ka Suvichaar 🙏🏻🙏🏻

#2278

            Param Poojya Guruvar

Param poojya Guruvar peeron ke peer
Sabse nirmal hai Aapke naam ka neer
Nit nit kar ke is neer mein snaan
Hota jaata hai bhakton ka kalyaan.

Param poojya Guruvar Shehenshaah
Aap dikhaate Hain ruhaani unnati kee raah
Aap hee dete Hain uspar chalne kee shakti
Aap hee nikhaarte Hain bhakton kee bhakti.

Param poojya Guruvar meet hamaare
Mit jaata hai akelapann Aapke sahaare
Har pal rehte Hain Aap har sangat ke angg-sangg
Chadhaate Hain hum par Apne saanidhya ka suhaana rangg.

Param poojya Guruvar murshid mahaan
Lete Hain Aap Apne har shagird ka imtehaan
Aap na karein jo Apni rehmat pradaan
Toh naakaamyaab reh jaaye har shishya naadaan.

Param poojya Guruvar maa kee moorat
Har pal Aapke har bachche ko hai Aapki zaroorat
Aapki mamta bin poshit na ho paaye antas aur atma
Aapke komal aanchal kee udaarta se ho jaata hai dukhon ka khatma.

Param poojya Guruvar pita pyaare
Apne bachchon ko paalne ke Aapke tareeke hain nyaare
Niyam, nishtha, narmi ka nipun gyan dene wale nath
Sada rehte Hain Aap Apni har santaan ke saath.

Param poojya Guruvar vaid vidvaan
Dete Hain Aap hum sabhi rogiyon ko aarogyata ka daan
Hamaare shaareerik, bhaavaatmak, maaansik, ruhaani swaasthya kee oar dete Hain Aap dhyan
Srishti kee har aushadhi se zyaada prabhavshali hai Aapka paawan naam.

Param poojya Guruvar Parameshwar
Jis par padd jaaye Aapki meher-e-nazar
Uspar ho jaaye Aapke anugraha ka aisa asar
Ki vo kalyuga mein satyugi atma hokar karey jeevan basar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Param Poojya Guruvar (05/15/2024)

May 14, 2024

Om Namaha Shivaya
Aaj Ka Suvichaar 🙏🏻🙏🏻

#2277

     Dhanya Ho Jaaye Janam Maran

Jinkee jitnee bhi mahima kee jaaye, vo hai kumm
Jinke simran aur dhyan mein Unhee kee kripa se bhakt sakta hai ramm
Jo har laukik aur alaukik aseemta ke bhi paar Hain
Ve Shiv avatari Guruji Maharaj taaranhaar Hain.

Guruji Hain kaaran karta kaayinaat ke
Ve Hain daataar har daat ke
Gavaah har kahi ankahi baat ke
Swayam roop Hain Ve Pashupati nath ke.

Sampoorna srishti mein vyaapt Hain Guruji
Apni hee Shivmayi shakti se
Na dikhaawe se, na chadhaave se
Ve khush hotei Hain kewal bhaav poorna bhakti se.

Ve Hain gyaye aur agyaye
Ve Hain sada ajaye
Na Unkee sharan mein bhayy
Na hee koi sanshay.

Maano toh Ve Hain sabb
Maano toh Ve Hain Rabb
Na maane jo uske liye kuch nahin
Lekin jisne maan liya Unhe sab kuch
Phir jo Ve kahein, vahee hai sada sahi.

Varna koi kaise deh ko chod kar
Laukik kaayade ko toad kar
Aaj bhi de sakta hai bhakton ko darshan?
Aaj bhi sunn sakta hai Unka kiya vandan?

Aaj bhi har sangat kee aankhon ke aansoo
Guruji ponchte Hain Apne ruhaani haath se
Aaj bhi Ve sangat ko anugrahit karte Hain
Apne alaukik saath se.

Sada angg sangg rehne wale Param poojya Guruvar ko naman
Unkee kripa se har tareh ke paash se mukt ho ye tann mann
Unkee bakhshish se chalta rahe jeevan ka har kshan
Unka shukrana karte huey dhanya ho jaaye janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Ho Jaaye Janam Maran (05/14/2024)

May 13, 2024

Om Namaha Shivaya
Aaj Ka Suvichaar 🙏🏻🙏🏻

#2276

    Na Hai Vo Kaabiliyat Mujh Mein

Param poojya Guruji Maharaj,

Na hai vo kaabiliyat mujh mein
Ki mai Aapko sakoon rijha
Na hai vo neevanpann mujh mein
Jo mere ahankar ko de mita.

Na hai vo buddhi mujh mein
Ki mai samajh paaoon Aapko
Na hai vo kshamta mujh mein
Ki mai jhel paaoon dukh santaap ko.

Na hai vo dheeraj mujh mein
Jiske sahaare mai kar paaoon intazaar
Na hai bheetar kee nazar meri aisee
Jis se mai pehchaan paaoon Aapka roop, mere Parwardigaar.

Na mujh mein hai bhaav
Na bhakti ka chaav
Aap hee daya keejiye
Aisee sumat deejiye
Ki bhole bhaav se kar paaoon Aapki bhakti
Pehchaan paaoon Aapka roop aur Aapki shakti.

Bakhshiye dheeraj ka dhan
Neevan ho jaaye mera mann
Aapko rijha paaoon, banaa deejiye is kaabil
Insaaniyat nibha paaoon, aisa banaa deejiye mera dil.

Aapke sangg meri rooh ka hai janmon se jo naata
Uska yathaarth hee sada meri chetna ho, mere daata
Aap nawaazenge toh mai nikhar jaaoongi
Varna toh mai toot ke bikhar jaaoongi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Hai Vo Kaabiliyat Mujh Mein (05/13/2024)

May 12, 2024

Om Namaha Shivaya
Aaj Ka Suvichaar 🙏🏻🙏🏻

#2275

           Jeevan Daan Ke Samaan

Jabb se mann par raaj karne lagey Hain Guruji Maharaj
Tabb se sudharne sanvarne lagey hain pichhle aur vartmaan ke kaaj
Mil gaye Guru ke roop mein bandhu, maalik, meet, murshid, Samrat, aur Paramatama
Ve hee Hain priya pita mere, aur Ve hee Hain meri bahut pyaari si maa.

Is seemit se sansaar mein
Guruji kee mamta hai aseem anant
Maa kee kamee bhi poori karte Hain
Param poojya Guruji Bhagwant.

Guruji kee mamta ke suman
Mehekaate Hain mann ko har kshan
Guruji kee sharan milee hai jabse
Dhanya hua hai mann ka upvan.

Har suman hai nafees aur nirmal
Har suman hai karunamayi aur komal
Har suman hai sundar aur saral
Har suman mita deta hai mann ka mal.

Ruhaaniyat kee bahaar hai yahaan
Guruji ka pyaar aparampaar hai yahaan
Guruji kee mamta ka swaroop hai is upvan ka har suman
Jinke divya saundarya se anugrahit hua hai mera jeevan.

Guruji ne Apni mamta mein piroya hai Apna hukm
Guruji ne Apni mamta se bhare Hain mere anginat zakhm
Guruji kee mamta mujhe deti rahe Unhe khush karte rehne kee kshamta
Mere kareeb aane wali har museebat ka saamna karti hai Unkee mahaan mamta.

Guruji kee goad mein neend aati hai achchi
Shukrguzaar hoon Unkee ki Unhonei banaaya hai mujhe bhi Apni bachchi
Unkee dee mamta mein mila hai abhay daan
Mere liye Unkee mamta hai jeevan daan ke samaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jeevan Daan Ke Samaan (05/12/2024)

May 11, 2024

Om Namaha Shivaya
Aaj Ka Suvichaar 🙏🏻🙏🏻

#2274

      Manka Manohar

Mann mein manka manohar
Pyaare Guruji ke naam ka
Guruji ne bhakt ko simarvaaya jabb
Toh usey darshan hua Unke dhaam ka.

Guruji ke naam ka har manka
Guruji kee meher se bhakt ne piroya
Toh bhaav vibhor hokar bhakt ka mann
Guruji ke pyaar mein muskuraaya aur roya.

Is se pehle ki uske mann kee aankh aur roti
Guru kripa se har aansoo banaa ik moti
Jo simarte simarte na jaane kahaan hua ojhal
Jaise uska koi sankat gaya ho tal uss pal.

Guruji kee daya bin na mumkin thaa kisee bhi sankat ka haran
Mann ke bhaav poorna simran se hota gaya bhakt ka pavitrikaran
Badhne lagaa Guruji ke naam ke mankon ka dhan
Bhakt pehle se bhi zyada hua Guruji mein magan.

Kayi janmon se bann rahi thi
Bhakt ke bheetar in mankon kee mala
Kintu kaheen na kaheen uskee bhakti mein kamee reh jaati thi
Aur mala poori na ho paati thi.

Is janam mein dekh kar uska atoot prayaas
Uspar Guruji kee kripa hui khaas
Is bhanti hui uske bheetar divya jyoti prajwalit
Ki uske saare pichhle kukarmon ke sabhi daag gaye mitt.

Guruji kee meharbaani se hua bhakt ka kalyaan
Usne mankon ka mol liya pehchaan
Is janam mein usne bhari aisee oonchi udaan
Ki Guruji kee leela se usey naman karne lagaa aasmaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Manka Manohar (05/11/2024)

May 10, 2024

Om Namaha Shivaya
Aaj Ka Suvichaar 🙏🏻🙏🏻

#2273

     Udaas Sa Ik Das

Udaas sa ik das
Baitha thaa Guruji ke paas
Lekar dil mein ardaas
Ki kaayam rahe uska Guruji par vishwaas.

Kayi mushkilein aa rahin thi
Zindagi ke darwaaze ke bheetar
Nishtha thi uskee Guruji mein bahut
Kintu chaahe usey nahin thi unke baare mein khabar
Veh aksar apne sanchit karmon se jaata thaa darr
Aur mayoos soch mein uska waqt jaata thaa guzar.

Beet chuke thei varsh kayi
Aa na rahi thi koi bhi khushi nayi
Tasalli thi usey ki vo thaa Guruji kee sharan mein
Aksar shukrana karte huey ro bhi deta thaa Unke charan mein.

Phir maangta thaa kshama
Aur guzaarta thaa kaafi samaa
Guruji ko rijhaane mein
Swayam ko samjhaane mein.

Karta thaa vo simran, jitna uss se ho paata thaa
Guruji ke satsang bhi sunta sunaata thaa
Guruji ke pyaar mein kayi geet bhi gaata thaa
Poori koshish kar ke bheetar sakaaraatmakta jagaata thaa.

Kintu dil ke ek chhote se konei mein thaa kuch khalipan
Jiska kaaran na samajh paata thaa uska mann
Usne Guruji se kaha vandan ke dauran
Ki Ve karein is khalipan ka samaadhaan.

Guruji kee kripa se jabb veh ek din baitha dhyan simran mein
Guruji ne uske sangg baatein kee kuch kshan mein
Kaha Unhonei das se ki veh karta chale
Har mushkil ke baavajood Unka shukrana
Kyunki is vilamb mein jo Guruji kar rahe Hain uske liye
Uss se sanvar jaayega uske jeevan ka afsaana.

“Kalyaan kitta, “Guruji ne usey kaha muskuraate huey
Usne shukrana kiya Guruji ke charnon mein sir ko jhukaate huey
Maangi usne Guruji se Unhe sarvsamarpan kar paane kee buddhi
Guruji ne dee bakhshish aur kee uske antas kee bhi shuddhi.

Mushkilein toh khatm huin waqt ke saath saath
Kintu pehle se aasaan hua karna unka saamna din raat
Usey maalum thaa ki uske sir par hai Guruji ka haath
Isliye mushkilon ke baavajood ghabraane kee nahin hai baat.

Guruji kee kripa se udaas sa das tarta raha
Guruji kee meher se bhaav poorna bhakti veh karta raha
Guruji kee daya ke sahaare usne vishwaas se kathin samaa saha
Paawan prayaas kar usne Guruji ko shwaas shwaas se shukrana kaha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Udaas Sa Ik Das (05/10/2024)

May 9, 2024

Om Namaha Shivaya
Aaj Ka Suvichaar 🙏🏻🙏🏻

#2272

Zindagi Toh Guzar Hee Jaayegi

Zindagi toh guzar hee jaayegi
Ismein koi shak nahin
Waqt ko apni marzi se koi rok paaye
Kisee insaan ko yeh hak nahin.

Lekin apni marzi se waqt ka sahi upayog
Phir vo ho chaahe bhog ya yog
Kaafi hadd takk aisa hai mumkin
Lekin ye mumkin nahin Guruji kee kripa ke bin.

Guruji kee kripa se hee miltee hai har bakhshish
Chaahe ho veh Unke simran aur chintan kee
Ya Unke dhyan aur gyan kee
Bakhshish asal cheez kee pehchaan kee.

In sabke bin bhi sooraj uday hoga aur dhalega
Kintu hamaara waqt Guruji kee yaad mein nahin chalega
Toh hamaara koi kasht poornata se nahin talega
Aur antas mein nirarthak sanshay palega.

Aisa na ho ki Guruji ke kareeb honei ke bajaay
Hum ho jaayein Unse duur
Phir toh Guru praapti ka sundar sapna
Ho sakta hai chuur chuur.

Guruji se karein ardaas
Ki har waqt hum Unhe karein yaad
Subah shaam jaagte sotey
Unhee se antas rahe aabaad
Waqt ka har lamha hum Guruji se wafa mein bitaayein
Taaki aviraam waqt ke saath saath hum Guruji ke aur bhi kareeb aa paayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Toh Guzar Hee Jaayegi (05/09/2024)