Aaj Ka Suvichaar

March 29, 2024

Om Namaha Shivaya
Aaj Ka Suvichaar 🙏🏻🙏🏻

#2231

            Ye Mauka

Ye safar hai aane jaane ka
Guruji ne mauka diya Apni sharan mein aane ka
Is mauke mein hai raaz tumhe sahi raaste par chalaane ka
Na dhoondh lena koi bahaana is mauke ko gavaane ka.

Simar paane ka
Sudhar jaane ka
Paropkaar karvaane ka
Paap mitaane ka
Mil raha hai tumhe mauka
Na karo apne sangg dhokha.

Tumhe ye mauka moolyavaan
De rahe Hain swayam Bhagwaan
Is mauke ke mol ko lo pehchaan
Is mauke mein hai tumhaara kalyaan.

Mauka de rahe Hain Guruji swayam
Taaki kat jaayein tumhaare karam
Taaki har aantrik ghaav ko mil jaaye marham
Taaki safal ho jaaye tumhaara ye janam.

Tumhe Guruji de rahe Hain ye mauka
Iska laabh uthaana hai zimmedari tumhaari
Vyarth na jaane do abb ek bhi pal
Is mauke ke sahaare karo ruhaani unnati kee tayyaari.

Tumhaari gaflat ne tumhaare ruhaani vikas ko abb takk hai roka
Jaago, abb haath se na jaane do ye sunehra mauka
Guruji Maharaj tumhe rahe Hain sambhaal
Sanshay ka toh uthta hee nahin koi sawaal
Ye mauka hai Guruji dwaara bakhshi raksha kee dhaal
Ye mauka tumse koi cheen le, kisee kee nahin hai ye majaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Mauka (03/29/2024)

March 28, 2024

Om Namaha Shivaya
Aaj Ka Suvichaar 🙏🏻🙏🏻

#2230

                 Khare Dhanwaan

Duniya waalon ke liye hon hum jitne bhi samajhdaar
Guruji kee nazron mein hum hain anjaan aur naadaan
Guruji ke prataap ke aagey vifal ho jaaye bade se bada gyan
Lekin uska bhala nishchit hai jo Guruji ka kaha le maan.

Yahaan akal shakal ka kaam nahin
Yahaan laukik dhan ka koi kaam nahin
Yahaan faayda hee faayda hai nuksaan nahin
Yahaan bataana padta khud ka armaan
nahin
Kyunki Guruji Maharaj Hain antaryaami
Samdrishti dene wale brahmgyani
Yahaan barasti rehti hai Guruji kee rehmat
Jiske saamne pheeki hai saari duniyavi daulat.

Kuch nahin ho sakta hai is daulat se zyaada
Is daulat mein samaaya hai Guruji ka vaada
Saari sangat ke kalyaan ka
Sangat ke atma-sammaan ka.

Besharte, niyati ko Guruji ke havaale kar dein
Taaki Ve Apni marzi se jholi bhar dein
Unhee kee marzi bann jaaye hamaari chaahat
Unkee jaisi kripa, usee mein miley raahat.

Beshak jeevan ka har pehlu nahin hota hai aasaan
Lekin hamaare angg sangg toh Hain swayam Bhagwaan
Hamein nirantar mil raha hai Unkee bakhshi daulat ka daan
Guruji kee kripa se kyun na hum banein khokhle ke bajaaye khare dhanwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Khare Dhanwaan (03/28/2024)

March 27, 2024

Om Namaha Shivaya
Aaj Ka Suvichaar 🙏🏻🙏🏻

#2229

Tumhe Paash Se Azad Karey

Vartmaan ke moh paash mein
Bhavishya ko tum bhula na dena
Ho raha hai bahut kuch jeevan mein shaayad
Lekin tum mann pe kuch matt lena
Mann na ho jaaye aur bhi naazuk aur kamzor
Karna tum nirantar is baat par gaur.

Pyaar bina aasakti
Ismein hai shakti
Kintu aasakti sangg pyaar
Ismein moh ka hai izhaar
Beshak apratyaksh ya sookshma ho ye izhaar
Phir bhi is se prabhaavit ho jaata hai pyaar.

Khoney ka bhayy
Mann mein sanshay
Hotey hain is se utpann
Phir ashant aur asthir hota hai mann.

Chakra-vyuh sa ho jaata hai
Jismein shakhs khud itna kho jaata hai
Ki baahar nikalne ka dikhta na hai hal
Bahut tadpaata hai ksheen manobal.

Jo bhi hai beshak vartmaan mein tumhaari majboori
Bhavishya ke liye manobal badhaate rehna hai bahut zaroori
Guruji ne simran hai bakhsha
Uske dwaara manobal badhaao
Guruji toh karenge tumhaari raksha
Kintu tum apna farz nibhaao
Kaam krodh lobh moh ahankar
Inke paash mein bandhe na rehna
Varna vartmaan ke baad bhavishya mein
Yaatanaaon ko padega tumhe sehna.

Guruji se karo nirantar ardaas
Ki Unkee mehar se badhe tumhaara simran ka prayaas
Hota rahe tumhaare dwaara dhyan ka riyaz
Aur tumhe paash se azad karey ye ruhaani abhyaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhe Paash Se Azad Karey (03/27/2024)

March 26, 2024

Om Namaha Shivaya
Aaj Ka Suvichaar 🙏🏻🙏🏻

#2228

          Unkee Noorani Hukoomat

Guruji ke ashish ka taj ho jiske sir par
Uske liye har pal bann jaata hai shukrguzaar rehne ka avsar
Aise jann ko zaroorat nahin rehne kee ek kshan ke liye bhi shok mein
Kyunki Guru ashish se adhik shubhta nahin hai kisee bhi lok mein.

Pooran Guru Hain Guruji Maharaj
Karte Hain har brahmand par raaj
Sada rakhi hai Jinhonei Apne bhakton kee laaj
Ve pehle se bhi zyada prataapi Hain aaj.

Hokar bhautik deh kee seema se paar
Karte Hain Ve bhakton ka akalpaneeya uddhaar
Bhakt de paaye ya nahin Guruji ko pukaar
Bin kisee ke pukaare bhi sunn lete Hain Guru sarkar.

Unhonei Apna ashish dekar kee hai sangat par aseem meharbaani
Unka ehsaas chukaane ke liye kumm hai na sirf ye zindagaani
Balki anginat janam bhi padd jaayein kumm
Kyunki Unke kiye ehsaan kabhi na hongei khatam.

Har samay Unkee yaad mein, Unke pyaar mein bitaayein
Na ki kewal jabb ho hamaari koi farmaish
Unhe praathamikta dena hai dharma hamaara
Is vaktavya mein sanshay kee nahin hai koi gunjaaish.

Beshak sooraj bhi ho jaaye kamzor
Guruji tabb bhi thaamenge sangat kee doar
Guruji kee shakti par na chal paaye kisee pratibandh ka zor
Ve Shiv avatari Hain, Unkee noorani hukoomat roshan hai har oar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unkee Noorani Hukoomat (03/26/2024)

March 25, 2024

Om Namaha Shivaya
Aaj Ka Suvichaar 🙏🏻🙏🏻

#2227

                  Zindagi Ke Lamhe

Zindagi ke lamhe
Kuch beet rahe hain hanste huey
Kuch kadaapi beet jaate hain rotey huey
Kuch beetein jaagte huey
Kuch beetein sotey huey
Kitna achcha ho jaaye
Jo har lamha beete buss Guruji mein khotey huey.

Guruji mein kho kar paa loongi sab kuch
Nishchay hee baaki har upaay hai tuch
Dincharya mein rakhoon ye yaad
Guruji se karoon mai ye fariyaad.

Guruji kee hee yaad mein, Guruji ke hee pyaar mein
Karti rahoon har kaam kaaj
Unhee ka naam ho rasna par aur antas mein
Mere angg sangg hon Guruvar sartaj.

Har lamha Guruji mein kho kar
Har lamha Unhee kee ho kar
Kuch Unkee sunoon, kuch apni kahoon
Phir Unkee sunte sunte buss mai chup rahoon.

Har lamha Unke sangg bitaakar
Idhar udhar se apni ichcha hataakar
Guruji ke prem ko galey lagaakar
Unke charnon mein swayam ko samaakar
Meri rooh bheeg jaayegi jo yoon barsegi Unkee rehmat
Mujh kinkar kee zindagi muskuraayegi karte huey Guruji kee khidamat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Ke Lamhe (03/25/2024)

March 24, 2024

Om Namaha Shivaya
Aaj Ka Suvichaar 🙏🏻🙏🏻

#2226

                   Rangon Ka Parv

Rangon ka parv bann kar Aaya hai Holi ka tyohaar
Baith Guruji ke saath karoon Unse mai apne pyaar ka izhaar
Unhonei bakhsha hai ruhaaniyat ka rangeen uphaar
Unkee mehar se Unkee bhakti ka rangg chadhta jaaye mujh par baarambaar.

Param poojya Guruvar,

Chadha deejiye mujh par aisa rangg Apne simran ka
Ki aur kuch simaraya hee na jaaye
Chadha deejiye mujh par satsang ka rangg aisa
Ki kaheen aur jaana hee nahin bhaaye.

Jaisa bhi ho mausam
Jaisa bhi chale jeevan
Chadha deejiye mujh par Apni sewa ka aisa rangg
Ki mai aathon pehar rahoon is rangg mein malang.

Jaise jaise Aap hataayenge mal mere mann ke darpan ka
Na bhooliyega chadhaana mere mann par rangg samarpan ka
Aapke prati shukrana ka rangg chadhaate rahiyega mujh par nirantar
Taaki mai gavaaoon na Aapka shukrana karne ka koi bhi avsar.

Rangg sumat ka mujh par chadhaate rahiyega
Mere kuch bhi galat sochne ya karne se pehle hee mujhe chetaavni dete rahiyega
Chadhaaiyega Apne prati prem ka itna gehra rangg
Ki koi bhi paristhiti na kar paaye is rangg kee shubhta ko bhangg.

Jaise jaise Aapki meharbaani se
Ye rangg chadhenge mujh par baarambaar
Vaise vaise ye hotey jaayenge pakke
Aur rangg jaayegi inmein veh seedhi taar
Jo Aapki kripa se meri rooh ko Aapse hai jodti
Arzi hai ki ye mera har vikaar bhi rahe todti
In rangon kee pavitra holi chale har pal mere bheetar
Taaki har pal bann jaaye Aapke aur bhi kareeb honei ka shubh avsar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rangon Ka Parv (03/24/2024)

March 23, 2024

Om Namaha Shivaya
Aaj Ka Suvichaar 🙏🏻🙏🏻

#2225

Leher Kee Har Boond Mein

Teri divya jyotirmay atma
Uskee intazaar mein Hain Paramatama
Jaldbaazi beshak na kar
Kashton se bilkul na darr.

Guruji tere kasht rahe Hain har
Guru kripa ke dwaara tarr
Paramatama se milne kee tayyaari kar
Sunn Guruji aur Paramatama kee ekta ka swar.

Isee swar mein Bindu aur Naad hai
Isee swar mein Guruji ka ashirwaad hai
Yahee swar hai Shivmayi layy ka
Isee se vinaash hoga tere har bhayy ka.

Jitna hota chalega tujh dwaara simran
Jitna karega tu Guruji ka chintan
Ekta ke is swar kee leher se tere antas ka saagar hoga aabaad
Is leher ke umadne se milne waala sukoon hoga Guruji ka ashirwaad.

Kyunki ye leher hogi adbhut
Ye leher hogi shant, sthir, aur nirmal
Isey milti rahegi Guruji kee mamta komal
Isliye shant hotey huey bhi ismein hoga aseem bal.

Ekta ke swar kee is leher ka bal hoga ruhaani
Is leher kee dheer gati hogi ati suhaani
Is leher mein sada goonjti rahegi Gurbani
Is leher kee har boond mein samaayega Guru prem ka amrit roopi paani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Leher Kee Har Boond Mein (03/23/2024)

#2224

March 22, 2024

Om Namaha Shivaya
Aaj Ka Suvichaar 🙏🏻🙏🏻

Kuch Paana Baaki Na Reh Jaayega

Kuch paana baaki na reh jaayega
Jinko paane ke baad
Ve Hain Parameshwar Parwardigaar Guruji Maharaj
Jo de rahe Hain nirantar Apna ruhaani aashirwaad.

Guruji ke roop mein tere bheetar aur aas paas hai Khuda
Na soch kabhi bhi ki tu hai Unse juda जुदा
Ye jaante huey bhi tu is satya ko bhool jaata hai aksar
Kyunki is ehsaas ko poshit honei ka tu deta nahin hai paryaapt avsar.

Kabhi kumm na honei de satya ke is sundar ehsaas ko
Varna sambhaal na paayega tera mann hoga udaas jo
Is ehsaas ka kar nirantar prayaas
Bann kar Guruji ke charnon ka das.

Is ehsaas ke sangg karega tu jabb bhi Guruji se koi bhi ardaas
Toh Guruji kee maujoodagi ko atmasaat karega tera har shwaas
Sudharti jaayegi tere avachetan mann kee har aadat
Behtar ho jaayegi tere bheetar kee haalat.

Guruji kee mehar se ye ehsaas tujhe deta rahega utsaah
Jiske dwaara prerit hogi teri ruhaani raah
Prayaas se mit jaayegi Guruji ko paane ke alaawa teri baaki har chaah
Guruji ko paakar tu phir kabhi bhi na ho sakega gumraah.

Na reh jaayega aur kuch bhi paana
Poornata se prafullit hoga teri saanson ka afsaana
Jinhonei tujhe Apni praapti kee oar hai pahunchaana
Har pal karta chal tu Unn Guruji Maharaj ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kuch Paana Baaki Na Reh Jaayega (03/22/2024)

March 21, 2024

Om Namaha Shivaya
Aaj Ka Suvichaar 🙏🏻🙏🏻

#2223

                Atyant Ameer Fakeer

Jo nahin hai tere haath kee lakeer mein
Guruji vo khushkismati bhi daal sakte Hain teri taqdeer mein
Kuch toh baat hai tujh fakeer mein
Jo Guruji ne izaazat dee tujhe Apne dil kee tasveer mein.

Apni kismat par fakr kar, abhimaan nahin
Is raaste par sabr kar, ho pareshaan nahin
Guruji jo jaante Hain, tujhe anumaan nahin
Unkee leela ka kisee insaan ko gyan nahin.

Jitnee sakaaratmakta tu rakhega soch aur karma mein
Shuddhi utnee badhti jaayegi tere antakaran mein
Jeevan ulfat mein jee, gaflat mein nahin
Jeevan pyaar se jee, nafrat se nahin.

Maanav janam ke moolya ko na kar nazar andaaz
Guruji ke simran aur chintan mein lagaa de har shwaas
Tere kashton mein bhi chhipa hai tere kalyaan ka raaz
Guruji se seedhi taar jod kar sunn paayega tu Unkee awaaz.

Unkee awaaz mein hai tere liye maargdarshan
Isliye na ho tu aur adheer
Arey, Guruji kee sharan tujhe milee hai
Tu toh fakeer hotey huey bhi hai atyant ameer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atyant Ameer Fakeer (03/21/2024)

March 20, 2024

Om Namaha Shivaya
Aaj Ka Suvichaar 🙏🏻🙏🏻

#2222

     Tujhe Nawaz Kar

Khuda ko aasmaan mein dhoondhne wale
Jhaank le tu apne girebaan mein
Jitna khojega tu apne bheetar
Samaane lagega tu Bhagwaan mein.

Ishwar ka roop Hain swayam Guruvar
Ve teri madad rahe Hain kar
Bulaa kar tujhe Apne dar par
Sunvaa kar Gurbani ka divya swar
Dekar satsang sunn-ne sunaane ka avsar
Dekar tujhe niswaarth sewa ka var.

Jitne adhik kshan
Bina kisee vikarshan
Guruji ke sangg tu bitaayega
Utna Unke kareeb aa paayega
Aur aise hee aate aate Unke kareeb
Sanvarta jaayega tera naseeb.

Aakhir mein zara si bhi duuri na reh jaayegi
Teri chetna Unke sangg yoon roo-ba-roo ho jaayegi
Ki Unke tej kee har kiran
Chhoo kar tera antakaran
Kar degi tera aisa divya shringar
Ki tu bhool hee jaayega ye sansaar.

Na rahega tera liye ye sansaar
Na hee rahega tujh mein tu
Guruji Apne nirmal noor se tujhe nawaz kar Nikhaar denge teri rooh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tujhe Nawaz Kar (03/20/2024)