Aaj Ka Suvichaar

March 19, 2024

Om Namaha Shivaya
Aaj Ka Suvichaar 🙏🏻🙏🏻

#2221

            Arey O Bhikshuk Bhole

Arey o bhikshuk bhole
Chalte huey hauley hauley
Tumhe anumati milee aane kee Guruji ke dwaar mein
Na rehna bhautik chamatkaar ke intazaar mein
Guruji Maharaj Hain chamatkaar ke bhi paar
Kyunki Ve toh swayam Hain Parwardigaar.

Ve karte Hain bhakton ka beda paar
Karte huey bhakton ka aisa adhyaatmik uddhaar
Jiske samaksh pheeka padd jaata hai har bhautik chamatkaar
Buss, jodni hai Unse seedhi ruhaani taar.

Isliye kewal ichchaaon kee maangon se
Na honei do apna safar bekaar
Balki Unhe saump kar tum apna sampoorna sudhaar
Unke hukm mein lo zindagi guzaar.

Dhyan rahe ki tumhaari maangon kee imaarat
Tumhe hee dabaa na de is kadar
Ki tum kar na paao imaan se ibadat
Aur adhoora reh jaaye tumhaara ye safar.

Maangon ka kya hai
Ve toh hongi na khatm
Uss se bhi kaheen zyada paaoge
Jo maanoge tum Guruji ka hukm.

Guruji pahunchaayenge tumhe jis mukaam par
Vahaan pahunch kar tumhaari rooh par hoga anokha asar
Shabdon ke oonche aasmaan ke bhi paar
Guruji tumhe dikhaayenge Sachkhand ka sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Arey O Bhikshuk Bhole (03/19/2024)

March 18, 2024

Om Namaha Shivaya
Aaj Ka Suvichaar 🙏🏻🙏🏻

#2220

Kalyaan Ke Shikhar Par

Guruji ke naam ka amrit peete peete
Dhul jaayega vish tere har vikaar ka
Guruji ke hukm mein jeete jeete
Shodhan ho jaayega tere har vichaar ka.

Guruji ka simran hotey hotey
Ho jaayega tere mann ka pavitrikaran
Guruji mein apne aap ko khotey khotey
Paa lega tu Guruji mein Bhagwan.

Guruji ke pyaar mein doobte doobte
Tere jeevan kee naav paa legi kinaara
Guruji ke bharose apni har chinta chodte chodte
Tere chintan ke bhaav ko mil jaayega Unka sahaara.

Guruji ke satsang sunte sunaate
Hota jaayega tera kalyaan
Guruji kee mahima gaate gaate
Hota jaayega teri samasyaaon ka samaadhaan.

Guruji ke sangg rishta ghanishth hotey hotey
Kamzor hoti jaayegi sansaar ke prati teri aasakti
Guruji ke samaksh apna har gunah maante maante
Tujhe aur paap karne se roak legi Unkee dee hui ruhaani shakti.

Guru kripa se tu banda bann jaayega
Tere antas ka paatr chamak jaayega
Teri rooh kee shakti jaayegi nikhar
Guru charnon mein jhuka rahega tera sir
Jitna neevan tu hota jaayega, utne khush hongei Guruji tujh par
Unkee mehar se tu pahunchega kalyaan ke shikhar par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyaan Ke Shikhar Par (03/18/2024)

March 17, 2024

Om Namaha Shivaya
Aaj Ka Suvichaar 🙏🏻🙏🏻

#2219

             Mere Antas Ka Gulzar

Mere antas ka gulzar
Karta rehta thaa intazaar
Gulzar ka har phool
Rehta thaa bekaraar
Ki baghban ke bin
Kaheen ujad na jaaye kisee din.

Kintu kismat kee kali khilee
Mujhe Guruji kee sharan milee
Unhonei itna pyaar barsaaya
Ki antas ka gulzar muskuraaya.

Seencha Apne amrit se
Guruji ne gulzar ka har kona aur hissa
Guruji ke paalan poshan dwaara
Sanvar gaya kismat ka kissa.

Pratikool paudhe vichaaron ke
Guruji lagey hataane
Gyan ke sooraj kee kiran
Guruji lagey dikhaane.

Har phool jhoomne lagaa
Ruhaaniyat kee hawaa ke sangg
Har phool par chadhne lagaa
Guru naam kee davaa ka rangg.

Mai naadaan
Mere baghban mahaan
Diya hai Unhonei mujhe aseem daya ka aisa daan
Ki mai kabhi nahin kar sakti bayaan.

Guruji ke charnon mein hai vandan
Ki gulzar ke maalinya ka karte rahein khandan
Guruji ne sunn lee antas kee pukaar
Baghban bannkar dete Hain divya dulaar.

Mai sada rahoon Guruji kee shukraguzaar
Unkee kripa se honei lagaa hai mera uddhaar
Veeraane mein aayi hai bahaar
Mukammal hua hai mera intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Antas Ka Gulzar (03/17/2024)

March 16, 2024

Om Namaha Shivaya
Aaj Ka Suvichaar 🙏🏻🙏🏻

#2218

Guruji Kee Sampoornata Mein

Jud jaayein uss jyot se
Jo jalti hai bheetar swayam ke
Sunn lein goonjti awaaz
Bheetar kee divya dhvani kee.

Dekh lein jyot mein Guruji ka swaroop
Saumya, tejomayi, anoop
Antas mein basey hain jo
Unn darshan mein jaayein kho.

Guruji ke prem rass mein
Doob kar tarr jaayein
Guruji kee bandagi kar
Sudhar kar sanvar jaayein.

Mann ke aangan mein
Sayyr karein Guruji ke sangg
Kritagyata se jhuk jaayein
Vichaarte huey Unkee leela ke rangg.

Guruji ko yaad karte huey
Bhulaa dein apne saare gumm
Guruji ka chintan badhaate badhaate
Har chinta kar lein kumm.

Guruji kee saadagi ka anusaran kar
Jeeyein seedha saada jeevan
Guruji kee agya ka shravan aur manan kar
Ruhaani raees baney humm.

Guruji kee guruyaayee ka anusaran karte huey
Aadarsh swaroop ho jaaye hamaari bhakti
Nek neeyat rakhte huey koshish karein poori
Guruji koshish ko anugrahit karenge dekar hamein shakti.

Guruji ke alaawa koi aur uddeshya na ho
Ho jaayein yoon hum ekaagrachitt
Hamaara kalyaan isee mein hai
Ki Guruji kee sampoornata mein apni hasti hee jaaye mitt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Sampoornata Mein (03/16/2024)

March 15, 2024

Om Namaha Shivaya
Aaj Ka Suvichaar 🙏🏻🙏🏻

#2217

      Guruji Mein Basey Bhagwaan

Seedha saada sa jeevan jeete jeete
Guruji ke naam ka amrit peete peete
Boond boond bator kar ekatrit kiya khazaana
Guruji ke prem mein hota gaya deewana
Veh musaafir, jo Guruji mein magan rehta thaa
Jo bhi usey milta thaa, usey veh kehta thaa….

‘Mere Guruji Hain sarv vardaata
Aur jis jiska jud jaaye Unse naata
Uska honei lagta hai uddhaar
Uska awashya hota hai beda paar.

Guruji mere Hain Shivji ke avatar
Pooran Guru Hain mere sarkar
Jagg ke swami Hain
Antaryami Hain.

Guruji jaanein ki tu bheed mein bhi hai akela
Agar tu chaahta hai ki tera har vela ho suhela
Toh Guruji kee preet ko basaa le tu dil mein
Phir kabhi na hoga akela beshak ho bhari mehfil mein.

Kyunki Guruji kee preet samaayi hogi jabb tere bheetar
Toh Unke sangg teri taar judi hogi is kadar nirantar
Ki tujhe fursat na hogi kisee aur ke liye kaheen ya kabhi
Tujhe fark nahin padega jo sochein ya karein sabhi.

Buss, maun ko dhaaran kar le swayam mein
Vyast reh Guruji ke chintan mein
Jitna khoyega Guruji ke saumya spandan mein
Utna sukoon paayega tu Unke vandan mein.

Mere Guruji jaisa koi nahin
Kehta hoon mai baat sahi
Jee kar toh dekh Unke naam ke sahaare
Tera mann, vivek, jeevan sajj jaayega, aye pyaare.’

Karte huey Guruji kee mahima ka gungaan
Beeti musaafir ke jeevan kee dastaan
Dikhne mein thaa nirdhan parantu asal mein hua bahut dhanwaan
Guruji ko itna prem kiya usne ki paaye usne Guruji mein basey Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Mein Basey Bhagwaan (03/15/2024)

March 14, 2024

Om Namaha Shivaya
Aaj Ka Suvichaar 🙏🏻🙏🏻

#2216

   Aapki Nazar Ne…..

Param poojya Guruvar,

Aapki nazar ne yoon diya nikhaar
Ki Aapke dar par pahunchi baar baar
Shukrana Aapka ki Aapne dee iskee manzoori
Bakhshiye mujhe ki duur ho jaaye Aapse har duuri.

Aapki mehar se mann hota jaaye malang
Aapki ruhaaniyat ka chadhta jaaye meri rooh par rangg
Ye ehsaas ki Aap sada Hain angg sangg
Kabhi na dheemi ho is ehsaas kee tarang.

Kabhi na bhooloon Aapke kiye ehsaan
Kabhi na bhooloon kaise bachaayi Aapne meri jaan
Ek baar nahin, balki anekon baar
Aur kaise dete rehte Hain Aap kalyaan ka uphaar.

Raasta dikhaate rahiyega, uspar chalaayiyega bhi Aap
Akele mai raaste par bhatak na jaaoon, na kar baithoon aur koi paap
Vaise hee anjaane mein na jaane hoti hongi kitnee galatiyan
Aur Aap, deen dayal karunanidhaan kar dete Hain kshamaa.

Aapke naam ke mahasaagar kee boondon par hoon mai jeevit
Param poojya daata, Aapka protsaahan karta hai mujhe har pal prerit
Lamhe khushi ke hon ya hon gumm ke
Lamhe spashtataa ke hon ya bhram ke
Aap hee Hain mere ekmaatra sahaara
Aapke is sahaare bin mera nahin hai guzaara
Sada rakhiyega mujhe Apne aanchal kee chhaaon mein
Thodi si jageh dete rahiyega mujhe Apne paawan paaon mein
Mere liye toh Aapke charnon mein jannat aur mukti, dono ke jahaan hain
Sabhi se kehti rehti hoon ki mere Guruji kitne mahaan aur meharbaan Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Nazar Ne….. (03/14/2024)

March 13, 2024

Om Namaha Shivaya
Aaj Ka Suvichaar 🙏🏻🙏🏻

#2215

Goad Mein Prakriti Kee

Baitha thaa fakir goad mein prakriti kee
Chinta ho rahi thi usey apni atma kee aakriti kee
Mann ko na mil raha thaa chayyn ya aaraam
Shraddha bhaav se japne lagaa veh qGuruji ka naam.

Guruji kee kripa se veh kar paaya Unkee dhyan bhari pooja
Prakriti ke prakampan mein badhti gayi oorja
Guruji ke siwa fakir ko dhyan mein soojha na koi bhi dooja
Dhyan mein baithe baithe uske bheetar shabd goonja.

Bheetar mehsoos honei lagaa fakir ko anand nirmal
Guruji ke spandan se sajne lagaa uska manobal
Mann honei lagaa sthir aur shant
Usey raas aane lagaa ekant.

Akash ne geruey rangg kee chaadar odhi
Subah ne shaam par saari zimmedaari chodi
Fakir ne liv Guruji sangg yoon jodi
Ki Guruji ne uskee oar Apni nazar modi.

Antas mein hua usey Guruji ka deedar
Umad raha thaa uske bheetar Guruji ke liye pyaar
Guruji ne uska bhaagya diya nikhaar
Usko taar kar kiya uska uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Goad Mein Prakriti Kee (03/13/2024)

March 12, 2024

Om Namaha Shivaya
Aaj Ka Suvichaar 🙏🏻🙏🏻

#2214

            Rooh Se Rooh Ka Rishta

Na jaane kabb ye shareer chhoot jaaye
Yaad rahe ki rooh se rooh ka rishta na toot jaaye
Isliye koshish karta chal tu baar baar
Ki Guruji sangg joad tu seedhi taar.

Ye taar teri rooh ko Unn Paramatama se yoon jodey
Ki teri buddhi dishaheen hokar tujhe idhar udhar na modey
Balki is taar mein basee vidyut shakti tere ahankar ko todey
Aur is taar se bandh kar tu baaki har taar ko chodey.

Guruji sunte Hain bhakt ke rooh kee pukaar
Rooh se rooh ka rishta kaayam rakhegi yeh seedhi taar
Teri shraddha aur Guruji ke ashish se is rishte kee gehraayee badhegi
Guruji jabb tujhe yogya samjhenge, tabb teri atma oonchaayee chadhegi.

Shareer ka nahin koi bharosa
Kabb iske naash ka pal aa jaaye
Lekin rooh ka safar toh chalta rahega
Jabb takk vo Paramatama mein na samaa jaaye.

Paramatama ne diya hai shareer
Na kar kisee bhi tareh se uska tiraskaar
Parantu shaareerik chetna mein yoon na jaa tu kho
Ki rooh ke poshan par tera dhyan hee na ho.

Ye shareer hai isee janam ka mitr
Iske saath rooh ko bhi rakh pavitra
Guruji ke bakhshe simran ne nikhaara hai anekon ka charitra
Tu bhi simran ke paawan prayaas se sajaa le apne safar ka chalchitra.

Beeta jaa raha hai samay
Is se pehle ki aa jaaye pralay
Shareer kee nashwarta ko jaan
Rooh ke sthaayitva ko pehchaan
Guruji ne sweekaara hai tujhe, Unka ehsaan maan
Aur rooh se rooh ke rishte ka kar bhaav poorna sammaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rooh Se Rooh Ka Rishta (03/12/2024)

March 11, 2024

Om Namaha Shivaya
Aaj Ka Suvichaar 🙏🏻🙏🏻

#2213

Waqt Kee Vaadiyon Ke Beech

Waqt kee vaadiyon ke beech behti hui
Saritaayein hain hum sabb
Paani hotey huey bhi pyaasi
Leheron mein aksar udaasi.

Aksar pulakit hokar nritya karein
Lekin kabhi kabhi prakriti ke kop se darein
Swayam ko vaadiyon mein kho
Dhoondhti hui gantavya ko
Waqt ke saath behti hui
Utaar chadhaav sehti hui.

Jidhar se bhi hum bahein
Jo bhi hum sahein
Guruji se beshak na kahein
Kintu Ve jaanein sabb
Hum kahaan hain kabb
Unka dhyan karte hain hum jabb jabb.

Karein Guruji ka shukrana har uss pathar ke liye
Jis se hum behte huey takraate hain
Kyunki ve unn karmon ke prateek hain
Jo Guruji Apni kripa se katvaate Hain.

Dekar hamein agya kinaaron par mal ko chodne kee
Dekar Apni anumati arachanon ko todne kee
Guruji dete Hain himmat aur pavitrata
Taaki hum nibhaayein prakriti se mitrataa.

Aaj takk Guruji ne hee behne ka raasta hai dikhaaya
Jaisa bhi ho mausam, Unhonei behna hai sikhaaya
Aagey bhi Guruji hee gantavya takk le jaayenge
Safar ke antt takk Ve Apni goad mein baithaayenge.

Arzi hai Unse ki Unhee mein jaayein samaa
Ve hee jaanein kabb aayega veh shubh samaa
Dhanyawaad Unka ki Ve har pal dete Hain panah
Dhanya hua mann jabb se veh Unmein hai ramaa.

Hum saritaaon ka astitva Guruji ke charnon mein qurbaan
Unmein magn rehkar behte behte chali jaaye jaan
Aakhiri saans bhi lein jabb, toh hon Guruji ke kamal charan mein
Kalyaan hee kalyaan hai Param poojya Guruvar kee sharan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Waqt Kee Vaadiyon Ke Beech (03/11/2024)

March 10, 2024

Om Namaha Shivaya
Aaj Ka Suvichaar 🙏🏻🙏🏻

#2212

Paawan Maun Ke Sundar Sindhu

Param poojya Guruji Maharaj Hain Trilokinath avatari
Unkee karuna kee mohtaaj hai Unkee sangat saari
Paawan maun ke sundar sindhu
Jinmein basey Hain Naad aur Bindu
Gehraayee ke saumya saagar
Jinhonei swayam dharti par aakar
Kiya anginat sangat ka kalyaan
Dekar Apni kripa ka daan
Aur aaj bhi mehsoos hoti hai Unkee divya shakti
Buss, chaahiye toh bhaav poorna bhakti.

Ashutosh Hain Guruji, Hain Ve Bholenath
Agam agochar hotey huey bhi Hain Ve sangat ke saath
Swayam hee swaroop Hain jo sansaar ke saar ke
Unke saare darshan Hain darshan Parwardigaar ke.

Arey, aur toh aur, Unke aadesh par prakriti badal leti hai apna rukh
Unkee mehar-e-nazar se manmukh tarr kar bann jaata hai Gurumukh
Unkee pyaar bhari baat aur daant, dono mein basaa hai bhakt ka sukh
Anivaarya hai ki hamaare antas mein Unka sthaan ho sarvpramukh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Maun Ke Sundar Sindhu (03/10/2024)