Aaj Ka Suvichaar

March 9, 2024

Om Namaha Shivaya
Aaj Ka Suvichaar 🙏🏻🙏🏻

#2211

Tera Thaa Hee Nahin Jo

Tera thaa hee nahin jo
Agar chhoot bhi gaya vo
Toh tera kuch nahin gaya hai kho
Isliye yoon vyarth mein na tu ro.

Abb bhi sahi raah le
Guruji ko tu apna le
Ve khade Hain baahein pasaar
Ve karte Hain tujhse behad pyaar.

Khushkismat hain ve jinhe Guruji ne hai apnaaya
Tera bhi achcha waqt tabb se hai aaya
Isliye niyati kee in karvaton se na ho tu udaas
Rakh Guruji Maharaj par tu poora vishwaas.

Agar tujhe lagg raha hai ki ho gayi hai der
Toh bhi niyati kee karvaton se nazrein na pher
Beshak tujhe mayoosi ke andhere ne liya hai gher
Dekhna, tere dekhte dekhte ho jaayegi saver.

Kuch khoya hai toh tu paayega uss se behtar
Guruji, tere param shubhchintak, karte rahe Hain tujh par mehar
Unka haath ho jiske sir par
Uske imtehaan bhi hotey hain aksar.

Tera haal bahuton se achcha hai
Tera zameer sachcha hai
Tu Guruji ka bachcha hai
Uddhaar kee teri ichcha hai.

Sabr aur shukr ke sangg is waqt ko guzaar
Guruji ka chintan karta chal tu baarambaar
Teri niyati nikhaar rahe Hain Guru sarkaar
Buss, abb thoda sa hee baaki hai intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Thaa Hee Nahin Jo (03/09/2024)

March 8, 2024

Om Namaha Shivaya
Aaj Ka Suvichaar 🙏🏻🙏🏻

#2210

                     MahaShivratri

Aa gayi MahaShivratri kee raat
Lekar jaagriti kee saugat
Is saugat ko na jaane dena vyarth
Is saugat ka bahut goodh hai arth.

Nikhaar kar antas kee aakriti
Sajaa kar bheetar ke purush aur prakriti
Ye jaagriti sanvaar degi hamaari manovritti
Isliye bahut mahatvapoorna hai yeh shubh tithi.

Shiv satya Hain, Shiv Hain sundar
Shiv basey Hain hum sabke andar
Shivmayi hai saara sansaar
Shiv karte Hain beda paar.

Guruji Hain Shiv avatari
Unkee mamta hai bahut hee pyaari
Unmein samaayi hai Shiv Shakti kee oorja saari
Tabhi toh Unkee har leela hai itnee nyaari.

Shiv ka jyotirling mayi swaroop
Hai bheetar mere aur tumhaare
MahaShivratri ke paawan parv par
Usey pehchaan lein hum Guruji ke sahaare.

Swayam ko Guruji mein khonei dein
Simran aur dhyan karein, chetna ko na sonei
dein
Mitaa kar har bhed bhaav
Badhaayein bhakti ka chaav
Shiv mahima ke geet gaayein
Guruji ka stavan kar raat bitaayein
Nritya se Guruji ko karein prasann
Satsang mein karein Gurbani ka shravan aur kirtan
Chhakein Guruji ka langar prasad
Paayein Mahadev ka ashirwaad.

Bhool kar har chinta aur har gumm
Bhaav vibhor hokar Guruji mein jaayein yoon ramm
Ki shuddh ho jaaye manovritti
Paawan ho jaaye drishti
Shubh ho jaaye kriti
Aur badh jaaye Guruji se preeti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

MahaShivratri (03/08/2024)

March 7, 2024

Om Namaha Shivaya
Aaj Ka Suvichaar 🙏🏻🙏🏻

#2209

                 Safar Aur Raasta

Safar ka raasta ho saral aur sundar
Toh manzil ka pataa lagaana zaroor
Ye na ho ki sundar raaste se aakarshit hokar
Ho jaao tum kaheen Guruji se duur.

Guruji ko banaakar Apni manzil
Beshak chodni padey koi bhi mehfil
Beshak raasta ho jaaye mushkil
Toh bhi tum vo raasta apnaana
Agar tumhe Guruji ko hai paana.

Safar par raaste aur saathiyon ka hoga asar
Isliye satark rehna har ghadi, har peher
Jo bhi prabhaav Guruji se duur karey
Usey tyaag dena tum bin darey.

Guruji ke charnon mein milega swarg
Guruji ke charnon mein milegi mukti
Guruji mein samaane par
Sahi waqt ke aane par.

Kab hoga vo sahi samaa
Ye Guruji ke siwa koi jaane na
Isliye raaste par chalte chalo
Guruji ke naam ke saanche mein dhalo.

Guruji ke naam japp se raasta tayy kar paaoge
Guruji ka naam lete lete Unn takk pahunch paaoge
Ve hee Hain murshid, Ve hee Hain manzil
Kuch bhi matt socho, buss Unhee ko de do dil.

Guruji par kar do sab nisaar
Ho jaayega tumhaara poora uddhaar
Raaste mein beshak ho bhayankar tufaan ya varsha mooslaadhaar
Tum chalne se na karna inkaar
Karte jaana Guru prem ka tum ikraar
Guruji awashya karenge tumhaara beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safar Aur Raasta (03/07/2024)

March 6, 2024

Om Namaha Shivaya
Aaj Ka Suvichaar 🙏🏻🙏🏻

#2208

                 Mann Ka Upvan

Param poojya Guruvar,

Mann ke chhote se upvan se
Laayi hoon phool Aapke charan mein karne arpit
Karam, dharam, ghar parivaar, bhaav, aur saansein
Karna chaahti hoon Aapko samarpit.

Mera hai hee nahin kuch
Mai hoon praani tuchh
Ye toh hai Aapki vaddi vadiyaayee
Jo mujhe Aapki sharan mein laayi.

Bulaakar Apni sharan mein
Aapne kripa kee hai aparampaar
Koshish toh karti hoon
Par manobal girne lagta hai kayi baar
Baadha bann jaata hai koi na koi vikaar
Aur ekatrit hota jaata hai atma par bhaar.

Mann ke upvan ka har phool aur kali
Jaise jaise chodti chale upvan kee gali
Aur aaye Aapke kamal charan mein
Vaise vaise meri har khaami
Aur meri har naadaani
Arpit ho jaaye Aapki sharan mein.

Jaanta hai mera mann aur chitt
Ki Aapki sharan mein mera kalyaan hai nishchit
Aapki kripa se mera har sanshay jaaye mitt
Mere paap dhul jaayein jaise jaise mai peeoon Aapke naam ka amrit.

Aapki mehar se toh mann ke upvan ke kante bhi shuddh ho jaayein
Aapki karuna se kashton ke kankad hatt jaayein
Upvan par noor chhaaye Aapke tejasvi prakash ka
Aapki bhakti mein ranga hua rangg ho upvan par chhaaye akash ka
Aapki ruhaani khushboo se meheke upvan ka vayumandal
Aapki kripa se mera har vichaar ho mangal.

Har phool har kali par ho Aapka naam
Aapke charnon mein ve paa lenge teerath dham
Aapka chintan karoon chaahe ho subah ya ho shaam
Shukrana karte huey karoon Aapke charnon mein pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ka Upvan (03/06/2024)

March 5, 2024

Om Namaha Shivaya
Aaj Ka Suvichaar 🙏🏻🙏🏻

#2207

     Honhaar Raahi

Honhaar thaa raahi pyaara
Parishram mein beet-ta thaa uska din saara
Sab kuch chal raha thaa achcha
Uska har vichaar thaa sachcha.

Phir achanak pichhle kisee janam ka koi karam jis se vo thaa anjaan
Aaya is jeevan mein uske saamne bannkar imtehaan roopi tufaan
Uspar thaa Guruji ka ashirwaad mahaan
Apni leela se Guruji karaa rahe thei uske karmon ka bhugtaan.

Rukne si lagg gayi uskee gati
Saath jaise chodne lagi sumati
Kamzor hoti gayi uskee nirnay shakti
Madad na kar paayi vyakulta se mukt honei kee koi bhi yukti.

Na chaahte huey bhi uskee chetna sonei lagi
Mann mein asthirta aur ashanti honei lagi
Kaafi waqt aise hee gaya guzar
Thamm gaya thaa maano uske jeevan ka safar.

Lekin waqt toh nahin thaa ruka
Sahi samay par uska karam thaa katt chuka
Ye namumkin hota Guruji kee kripa ke bin
Raahi phir se utsaahit rehne lagaa raat aur din.

Guruji toh Hain Vaidyanath
Ve toh har pal rahe uss raahi ke saath
Uskee vyakulta, ashanti, asthirta par Guruji ne lagaaya viraam
Uskee nirnay shakti khilne lagi paakar Guruji ka ruhaani paigaam.

Apni sharan mein Guruji katvaate Hain Apne bhakton ke karam
Bahut shukrana Unka ki Unhonei dee hai bhakton ko Apni sharan
Karmon ka katna anivaarya hai adhyaatmik pragati ke liye
Adhyaatmik pragati anivaarya hai janmon ke safar mein sadgati ke liye.

Guruji kee vaddi hai vadiyaayee
Unkee mehar se awashya milegi adhyaatmik oonchaayee
Guruji ne Apne har bhakt par sada kripa hai barsaayee
Guruji kee leela kee gahan hai gehraayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Honhaar Raahi (03/05/2024)

March 4, 2024

Om Namaha Shivaya
Aaj Ka Suvichaar 🙏🏻🙏🏻

#2206

          Guruji Se Vintee Karey

Thaame huey mere jeevan kee doar
Lekar mujhe andhere se ujaale kee oar
Guruji mujhe dikhaayein sooryamayi bhor
Guruji se vintee karey mere mann ka moar.

Baavari bhookh na ho sthool dhan kee
Teevra ichcha ho sookshma gyan ke dhan kee
Guruji le chalein meri buddhi ko uss oar
Guruji se vintee karey mere mann ka moar.

Chaahe mujhe gher lein dukh ke ambaar
Chaahe saamne ho chunautiyon kee kataar
Guruji meri saanson ko na machaane dein vyakulta ka shor
Guruji se vintee karey mere mann ka moar.

Ummeed kee nanhi si kiran bhi paaoon dekh
Yaad rakhoon ki Guruji ke mujh nacheez par ashirwaad hain anekon anek
Guruji duur karein bhayy aur sanshay kee ghataa ghanghor
Guruji se vintee karey mere mann ka moar.

Nakaaraatmakta ko na kehne kee rakhoon himmat
Anyaaya ko na sehne kee rakhoon taakat
Guruji kavach dein aisa ki kisee pratikool paristhiti ka na chale mujh par zor
Guruji se vintee karey mere mann ka moar.

Apni khaamiyon aur shikaayaton se oopar uth paaoon
Har din pehle se behtar insaan banti jaaoon
Guruji ke alaawa ye na kar paaye koi aur
Guruji se vintee karey mere mann ka moar.

Har paristhiti mein shukrana kahoon
Guruji kee tareef kee baatein kehti rahoon
Guruji mujhe shukr karne kee sumat bakhshein chaahe jaisa bhi ho daur
Guruji se vintee karey mere mann ka moar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Vintee Karey (03/04/2024)

March 3, 2024

Om Namaha Shivaya
Aaj Ka Suvichaar 🙏🏻🙏🏻

#2205

                         Ye Safar

Ye safar hai vishwaas ka
Guruji se judey rehne kee aas ka
Ye safar hai Guru aur bhakt ke pyaar ka
Guruji ke kiye aparampaar uddhaar ka.

Is safar mein sukh kee shaiya par le tu jhool
Bannkar Guruji ke charnon kee dhool
Ya bannkar Unke charnon mein arpit veh phool
Jo Unke paaon taley dabb kar sudhaar leta hai apni har bhool.

Is safar mein beshak padey maya ka thappad
Kumm se kumm tu Guru kripa se jaag toh jaayega
Jis chetna se bhaybheet hokar tu duur bhaag raha hai aaj
Kal usee chetna ko atmasaat kar ke tu utsaahit kadam badhaayega.

Rakhta chal tu haunsala aur himmat
Guruji agochar hotey huey bhi de rahe Hain tujhe taakat
Safar ke har moad par
Tujhe Apne sangg joad kar.

Tu jaanta hai ki tu anjaan hai
Tujhe khabar hai ki tu laaparwaah aur naadaan hai
Tujhe maalum hai ki tere bheetar agyaan hai
Is safar mein ho raha tera imtehaan hai.

Guruji kar rahe Hain tujhe imtehaan ke liye tayyaar
Ve Hain tere maargdarshak aur bakhshanhaar
Unka saanidhya praapt hai joad kar Unse seedhi taar
Swayam ko ye yaad dilaa aur koshish karta chal tu baar baar.

Is safar mein aane wale aandhi tufaan
Mausam laayenge jismein hoga tera kalyaan
Teri poori madad karenge sewa, simran, aur dhyan
Kyunki Guruji Hain bhakt vatsal karunanidhaan.

Is safar mein rakhna kaayam apni shraddha aur vishwaas
Is safar mein har kadam par le tu Guruji ka naam
Tu khushkismat hai ki Guruji ne tujhe liya hai thaam
Ek din aayega vo imtehaan jo hoga teri parakh ka aakhiri mukaam.

Jabb tu hoga uteerna uss imtehaan mein
Guruji hee Guruji hongei tere jahaan mein
Tujhe dharti par bhi lagega ki tu udd raha hai aasmaan mein
Guruji aisa nirmal anand bakhshenge teri ruhaani udaan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Safar (03/03/2024)

March 2, 2024

Om Namaha Shivaya
Aaj Ka Suvichaar 🙏🏻🙏🏻

#2204

   Dori Is Jeevan Kee

Param poojya Guruvar,

Rehmatein Aapki
Sehamati Aapki
Toh koi jageh nahin dukh santaap kee
Buss, kripa hee kripa Aapki.

Hua Aapka avataran
Laane ke liye parivartan
Kar ke jagat ka kalyaan
Dekar Apni karuna ka daan.

Lete gaye Aap kitnon ko Apni sharan mein
Bulaate Hain aaj bhi aur kitnon ko Apne charan mein
Poori zimmedaari lekar sangat ke dukh haran mein
Anivaarya akhand aadhaar bannkar sangat ke janam maran mein.

Itnee swaabhaavik Aapki saralta
Itnee neeveen Aapki nirmalta
Aapki vadiyaayee kee gehraayee kee anantataa mein
Itnee tarun Aapki taralta
Itnee kalyaankaari Aapki komalta
Aapki mamta kee kshamta kee aseemta mein.

Hamaari aukat Aapke charnon ke taley kee dhool jitnee bhi na
Phir bhi Aapne Apni anukampa ke amrit ko pilaakar aasaan kiya hamaara jeena
Chaahein bhi toh na kar sakenge kabhi Aapka poora shukriya ada
Buss, ardaas kar sakte hain ki yoon hee Apni daya banaaye rakhiyega sada.

Aapke naam kee khushboo se mehekti rahe vayu mann ke upvan kee
Aapke noor se roshan taaron se ruhaaniyat nikhar jaaye chitt ke gagan kee
Aapko khabar hai hamaari zindagi ke har kshan kee
Abb toh Aapke hee haath mein hai dori is jeevan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dori Is Jeevan Kee (03/02/2024)

March 1, 2024

Om Namaha Shivaya
Aaj Ka Suvichaar 🙏🏻🙏🏻

#2203

        Satchittanand Ke Pradaata

Guruji, param poojya Guruji pyaare
Aapne bulaaya mujhe Apne dwaare
Duur karne mere bheetar ke andhiyaare.

Tamanna hai meri ki mann ye sweekaare
Ki chaahe dhoond loon poora aasmaan aur ye zameen
Aapke alaawa hai aur koi nahin
Jo hai Guru, Govind, meet, bhraata, aur naath
Jo har pal rehta hai mere saath
Jo jaanta hai meri har kahi aur ankahi baat
Jiskee kripa se duur hogi mere agyan kee raat.

Phans kar moh maya ke jaal mein
Adhogati karte huey mere haal mein
Yoon badhne lagaa hai bheetar ka andhkaar
Ki namumkin lagne lagaa hai pahunchna uske paar.

Aa na raha hai aagey abhi kuch bhi nazar
Kintu Aapki kripa ka awashya hoga asar
Yeh meri aas hai
Mera vishwaas hai.

Aap Hain sarvshaktishali karunanidhaan
Koi aur nahin Aap jitna saamarthyavaan
Jis se thaama hai Aapne, avinaashi hai vo doar, shukr hai
Phir bhi na jaane kyun mann mein rehti fikr hai.

Fikr se ghire vichaaron se oopar uthaayiye mere vivek ko
Sumat bakhshiye ki Aapko samarpan karoon fikr pratyek ko
Varna Aapke chintan mein beetne ke bajaaye
Is jeevan ke lamhe fikr mein beet jaayenge
Aur meri khaamiyan aur mere dosh
Mujh par haavi hokar mujhe dabaakar jeet jaayenge.

Bakhshiye mujhe prerna
Jagaayiye yoon meri chetna
Ki mujhpar shoorveerta ka lehraav chhaaye
Mujhe koi bhi duniyaavi baat na sataaye
Mera kiran bindu kendrit rahe Aapki praapti par
Raas aaye mujhe toh kewal Aapka dar
Jaagriti ka ho ullaas
Aapse judey rehne ka ho nirantar mera prayaas
Yaad rakhe sada mera har shwaas
Ki vo hai mohtaaj Aapki mehar ka
Varna veh shikaar ho jaata kaal ke keher ka.

Aap toh Parameshwar Hain
Aap Mahakaleshwar Hain
Aapke anugrah se nishchay hee mitega mera har bhram
Satchittanand ke pradaata Hain Aap swayam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satchittanand Ke Pradaata (03/01/2024)

February 29, 2024

Om Namaha Shivaya
Aaj Ka Suvichaar 🙏🏻🙏🏻

#2202

Jo Aaj Nahin Ye Kehta

Chehre par ho meethi si muskaan
Labon par ho Guruji ka naam
Naynon mein ho neer pyaar ka
Rasna par geet Unke kiye aseem upkaar ka.

Antas mein ho raha ho Guruji ka simran
Kaanon mein samaa raha ho shabad ka shravan
Vaani kar rahi ho Guruji ka vinamr vandan
Zehen mein goonj raha ho Unka bhajan.

Seedhi taar se judi ho Guruji sangg atma kee doar
Kadam chal rahe hon satsang kee oar
Haath kar rahe hon sewa Unkee agya se
Antas noorani ho Unkee dee pragya se
Rooh par ho raha ho Unkee rehmat ka asar is kadar
Ki Ve ojhal hon toh bhi maalum ho ki Unkee hai hum par nazar.

Guruji ke stavan ka chaav ho
Unhe prasann karte rehne ka bhaav ho
Maante rahein Unka hukm aur Unkee hidaayat
Bin kiye koi shikva ya shikaayat.

Guruji ka shukrana karein chaahe jo bhi jaaye ho
Ve sada angg sangg Hain, iska atoot vishwaas hamein ho
Kyunki satya yahee hai aur yahee rahega
Jo aaj nahi ye kehta vo kal toh yahee kahega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jo Aaj Nahin Ye Kehta (02/29/2024)