Aaj Ka Suvichaar

August 26, 2023

Om Namaha Shivaya
Aaj Ka Suvichaar 🙏🏻🙏🏻

#2015

       Apne Kadmon Kee Nishaani

Jitna prayatn aur jitna samay
Tum bitaata ho sanvaarne mein apna oopari roop rangg
Agar tum utna hee prayaas aur waqt lagaaoge bheetar ke shringar mein
Toh yakeenan sanvar jaayega jeevan ka dhangg.

Jabb bheetar chaayega ruhaani noor
Toh uskee chamak chehre par bhi chalkegi zaroor
Yeh manzil itnee bhi nahin hai duur
Ki tum is prayaas ko kar do namanzoor.

Balki is prayaas se mitegi Guru Govind se tumhaari duuri
Bheetar ka bal badhega toh badhegi ekaagrata aur saboori
Ahankar ko dene do is bheetari shringar ke liye manzoori
Taaki mann karey tumhaari ji huzoori.

Guruji ke simran aur dhyan se
Prakashit hota rahega tumhaara antakaran
Dhool udti jaayegi
Aur jyotirmay hota jaayega mann ka darpan
Tumhaare nek prayaas se
Har heen bhavna ka hota jaayega khandan
Antakaran ka spandan sugandhit ho jaayega
Jaise nirmal chandan.

Baahari shringar ho na ho, tumhaara chehra hoga noorani
Tumhaare kaheen aur bhi aane se vahaan ka vayumandal ho jaayega ruhaani
Tum mein aaye sakaaraatmak parivartan se sanvar jaayegi doojon kee bhi zindagaani
Tum yahaan se vida honei ke baad bhi jahaan mein chod jaaoge apne kadmon kee nishaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apne Kadmon Kee Nishaani (08/26/2023)

August 25, 2023

Om Namaha Shivaya
Aaj Ka Suvichaar 🙏🏻🙏🏻

#2014

           Saraaye Hai Ye Jahaan

Saraaye hai ye jahaan
Sabhi musaafir hain yahaan
Kisee kee bhi ek si nahin hai daastaan
Koi lakshyaheen lagey, toh koi dhoondhe aasmaan.

Koi hai dono paristhitiyon ke beech
Kisee ka mann sona, kisee ke mann mein keech
Lekin sabki atma hai ansh Unhee Paramatama ka, jo Hain sabke paalanhaar
Is rishte ko dekhte huey toh poora sansaar hai ek hee parivaar.

Na sansaar hai avinaashi
Na hee hum musaafir hain amar
Kisee ko bhi nahin hai khabar
Ki kabb aur kaise khatm hoga ye safar.

Bahut zaroori hai Guru dwaara maargdarshan
Taaki har yug mein satyugi hee rahe jeevan
Kyunki nahin rukega karmon ka hisaab
Sabhi hain Guru Govind ke samaksh benakaab.

Aaj ya kal har musaafir is musaafir khane se hoga rukhsat
Aakhir kabb takk veh apne pichhle janmon ke karmon ka hisaab lega bhugat
Kaheen na kaheen, kabhi na kabhi hisaab chukta karna hoga zaroori
Varna baar baar ka janam maran bann ke reh jaayega ek kathor majboori.

Hamein milee hai Guruji kee mamta pyaari
Hamein toh tyaag deni chahiye fikr saari
Kintu hamein aksar hoti hai shanka aur ahankar kee beemari
Jis se kalankit ho jaati hai bhakti bhavna hamaari.

Kyun na is janam mein yoon nibhaayein har zimmedari
Ki is janam maran ke silsile se aagey badhne kee karein taiyyaari
Guruji kee mahima hai poorna kalyaankaari
Unke har bhakt ke kalyaan kee awashya aati hai baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saraaye Hai Ye Jahaan (08/25/2023)

August 24, 2023

Om Namaha Shivaya
Aaj Ka Suvichaar 🙏🏻🙏🏻

#2013

        Tu Hoga Bhavsaagar Ke Paar

Jabb takk sunega matvaale swami mann kee
Tabb takk anjaane mein tayyaari kar raha hoga tu apne patan kee
Guru bhakti kee panah le
Aur mann ko das banaa le.

Guruji bakhshte Hain simran
Jiske dwara Ve karaate Hain pavitrikaran
Tere mann ka mal dhulne lagega is abhyaas se
Tera mann tere adheen hoga iske nirantar prayaas se.

Mann na bhi lagey simran mein
Toh bhi koshish karne kee koshish toh kar
Mann idhar udhar kee sochne ke liye majboor bhi karey
Toh tu mann ke aagraha se matt darr.

Dheere dheere vash mein honei lagega tera mann
Aur tera simran hota jaayega gehra
Tu apni neeyat nek rakh aur reh anushaasit
Guruji de rahe Hain teri raksha ke liye pehra.

Simran se Guruji tujhe dhyan kee oar le jaayenge
Jo Unka aur tera naata hai, Ve usey aur bhi ghanishth banaayenge
Shukrana ke saath saath karte rehna tu ardaas
Ki jaisa Ve chaahein, vaise badhta rahe tera ruhaani abhyaas.

Abhyaas karte karte tu ho jaayega dhyan mein nipun
Guruji kee bakhshish se hee milega yeh gunn
Kalyug mein kuch badla hua sa hai spandan
Aasaani se hota hai ekaagrata ka khandan
Lekin Guruji dekhenge teri shraddha, teri neeyat
Isliye tu deta chal buss Unkee raza ko ahemiyat.

Apni khushkismati ke liye tu Guruji ka shukr kar baar baar
Ki Unhonei tujhe dhyan aur gyan bakhsha Hai bulaakar Apne darbar
Tu Guruji ke naam kee naiya mein reh savaar
Unhee ke haath mein rehne de naiya kee patvaar
Jis manzil ke liye Guruji kar rahe Hain tujhe tayyaar
Vahaan pahunchkar tu hoga bhavsaagar ke paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Hoga Bhavsaagar Ke Paar (08/24/2023)

August 23, 2023

Om Namaha Shivaya
Aaj Ka Suvichaar 🙏🏻🙏🏻

#2012

                        Suprabhat

Duur kaheen parvat ke peechhe
Maano aasmaan ke neeche
Sooraj dhal gaya
Samay badal gaya.

Akash ka rangg hua gerua
Aayi thi saanjh kee bela
Raahi chalta raha akela
Peechhe chod kar duniya ka mela.

Tann se nahin, balki mann se
Kyunki usne seekha jeevan se
Ki asal safar toh hai bheetar ka
Aur asal manzil ka raasta vaheen se hai.

Gyan kee baatein sunta rehta thaa
Bahut pyaar se Guruji kee mahima gaata aur kehta thaa
Phir bhi uska vikaas ruka rehta thaa
Kyunki mann mein aasakti ka jharna jo behta thaa.

Uss shaam jabb baitha veh simran mein
Apni mrityu ka drishya dikha usey mann mein
Aur yakayak uske kayi pichhle janmon ka chalchitra chal pada
Veh achambhe ke saath uth kar ho gaya khada.

Har janam ke baad thaa maran
Kewal uska nahin, sabhi ka hee
Aisa nahin ki veh thaa is niyam se anjaan
Lekin usey samajh aane lagaa aasakti ka nuksaan.

Mal, maya, aur vikaar hee hain paash
Sochne lagaa, inse chhoot jaaoon kaash
Bheetar aayi Guruji kee awaaz
Unka sanket thaa ki anaasakti hai paash se chhootne ka raaz.

Guruji kee vaani se hua satark
Sawaal nahin uthta thaa ki ho koi tark
Usne nishchay kiya ki veh karega apni oar se prayatn
Har rishte ko farz samajh kar nibhaane ka karega yatna.

Jis shaam ko mila usey Guruji se ye seedha paigaam
Usey lagaa ki ye hai abb uska imtehaan
Guruji ne sunn lee uskee ardaas
Aur badha diya uske simran, dhyan, aur sadhna ka abhyaas.

Dhulta rahi mal uske antakaran ka
Aasakti par honei lagaa niyantran
Ye nahin thaa aasaan
Aakhir thaa veh insaan.

Lekin usey thaa poora yakeen
Ki agar uska manobal kabhi hua ksheen
Toh Guruji uskee madad karenge zaroor
Kyunki Ve bheetar Hain, nahin hai uss se duur.

Usne sabse ummeed rakhni di chod
Usne vyarth ke jhamelon se muh liya moad
Dil tootne se bachaa anginat baar
Bayaan karta raha Guruji ko veh apna aabhaar.

Saanjh se hua savera
Sirf aasmaan mein nahin, balki uske mann mein
Aur jo mann mein hua savera
Toh veh suprabhat laaya uske jeevan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Suprabhat (08/23/2023)

August 22, 2023

Om Namaha Shivaya
Aaj Ka Suvichaar 🙏🏻🙏🏻

#2011

             Tera Aane Wala Kal

Bahut jee chuka tu behoshi kee haalat mein
Abb daal le hosh mein rehne kee aadat
Mann ne bahut bhatak liya idhar udhar
Abb mann se keh de ki veh kar le ibadat.

Ibadat ke liye zaroori hai daasya bhaav mann ka
Varna ibadat duniyavi hee reh jaayegi
Aur jo aisa hua toh
Tujhe shanti kaise mil paayegi?

Guruji se kar ardaas
Ki Ve jaagrit karein teri ruhaani pyaas
Tera daasya bhaav nikhar jaaye
Tu apna har farz nibhaaye….

Shanka se nahin, balki vishwaas se
Duvidha se nahin, balki azad shwaas se
Apne har shwaas ko kar simran se alankrit
Apna har kaarya Guruji ko kar arpit.

Guruji jaante Hain tera kathin ateet
Ve jaante Hain tujh par kya rahi thi beet
Arey, ek Ve hee toh Hain aise meet
Jo agochar hotey huey bhi nibhaate Hain sanatan saath kee reet.

Tujhe diya Unhonei itna pyaar
Diya hai pyaara ghar parivaar
Teri pratidin kee zarooraton ka rakha sada dhyan
Ve chaahte Hain vartmaan aur bhavishya mein tera kalyaan.

Apni goad mein tujhe baithakar
Karma katva rahe Hain Ve tere
Beshak tu pareshaan aur niraash thaa
Unhonei tujhe surakshit rakha hai shaam savere.

Jaisa bhi waqt aaye zindagi mein
Kuch na kuch toh sikhaata hai
Kaun apna hai kaun paraaya
Yeh bhi bhali bhanti samajh aa jaata hai.

Har anubhav se seekhte huey abb tu aagey badhta chal
Guruji ke ashirwaad se badhta rahega tera manobal
Unhee kee mehar se aur kasht aane se bhi pehle jaayenge tal
Teri nek neeyat, mehnat, ibadat se prasann hokar Guruji sanvaarenge tera aane wala kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Aane Wala Kal (08/22/2023)

August 21, 2023

Om Namaha Shivaya
Aaj Ka Suvichaar 🙏🏻🙏🏻

#2010

      Naag Panchami Ka Tyohaar

Aaj hai Naag Panchami ka tyohaar paawan
Is sundar tithi ke kaaran aur bhi shubh maana jaata hai saawan
Aaj bhi sunte aur sunaate hain is tyohaar kee kathaayein bhakt jann
Aur ek adbhut utsaah mein magn ho jaata hai sabka mann.

Ek seth kee thee vadhuein saat
Sabse chhoti thi bahut sushil aur nek
Peeli mitti khodne chalin ek din saaton bahuyein
Aur yakayak mitti mein nikla sarp ek.

Jyeshth bahu ne sarp ko chaaha maarna
Kintu chhoti ne chaaha kaam sanvaarna
Uske kehne par badi ne saamp ko diya jaane
Chhoti ne saamp se kiya laut kar aane ka vaada lekin na lauti vaada nibhaane.

Yaad aane par sabhi ko veh le gayi vahaan
Sarp reh raha thaa jahaan
Is se pehle ki sarp ko krodh aata
Chhoti bahu ne usey keh diya apna bhraata.

Usee din se sarp ne sada nibhaaya bhai ka dharam
Aisa bhai paakar dhanya hua chhoti bahu ka janam
Tabb se chali aa rahi hai Naag Panchami ke parv kee pratha
Bahut pyaar, satkaar, kartavya prerna se poorna hai ye katha.

Raja Pareekshit kee mrityu ka kaaran banaa Takshak naag
Unke putr Janmajay ne yagya aayojit kiya karne naag vansh ka vinaash
Aastik muni ne naag raksha hetu
Sabhi sarpon par arpit kee doodh kee dhaara
Sabhi sarpon ne prasann hokar
Diya vardaan pyaara
Ki is tithi par jo bhi naag par doodh chadhaayega
Usey naag ka bhay kabhi nahin sataayega.

Bhakt karein aaj ke din
Naag devta aur Shivji kee pooja aur arti
Ghar mandir shivalay sajaaye jaate hain
Bhakt jann bhaav se vandan ke liye aate hain
Maanyata hai ki Rudrabhishek se shubh phal hai milta zaroor
Kaal sarp dosh aur Rahu Ketu dosh bhi hotey hain duur.

Naag par yaugik sanskriti mein diya gaya hai khaas dhyan
Naag ke prateekvaad se milta hai prachurta aur gatisheelta ka gyan
Paanchon gyanendriyon se paar
Naag dev se seekhein hum hona tayyaar
Taaki kabhi toh jaan paayein ruhaaniyat kee gehraayee
Prayaas hamaara farz hai, prayaas bakhshegi Guruji kee vadiyaayee.

Guruji pyaare Shiv avatari
Apni sangat se karte Hain aseem pyaar
Unkee sangat Unhee ke sangg
Chaav se manaati hai har tyohaar
Guruji karte Hain Apne bhakton ke har dosh aur kasht ko duur
Ve toh karunanidhaan Hain, ye toh hum hain jo hain apne karmon se majboor.

Lekin Unkee karuna hai aparampaar
Hum yogya bhi nahin jiske, Ve kar dete Hain aisa uddhaar
Unkee marzi ho toh lekha bhi likh dete Hain dobaara
Unkee mehar ka mohtaaj toh hai Unka parivaar saara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Naag Panchami Ka Tyohaar (08/21/2023)

August 20, 2023

Om Namaha Shivaya
Aaj Ka Suvichaar 🙏🏻🙏🏻

#2009

                        Anurodh

Param Poojya Guruji, tattva darshi, sabke swami
Aap Hain Anant akhand antaryami
Apni kripa se mujhe
Banaa deejiye oordhva gaami.

Aap toh swayam Hain prakash param
Mai na jaanoon, kintu Aap jaanein mere sabhi pichhle janam
Aur jaanein unn janmon mein mere kiye karam
Mujhe toh unhe bin jaane hee aaye khud par sharam.

Na jaanoon mainey kee hogi pehle bhi kitnee gaflat
Phir bhi Aapne mujhe hai apanaaya
Mujhe toh theek se bandagi karna bhi na aaye
Phir bhi Aapne itna prem hai barsaaya.

Mujh mein Aapka shukrana ada karne kee nahin hai kshamta
Jaanti hoon ki jabb takk dhyan na hoga tabb takk na aayegi mann mein samta
Aapki kripa se jaari rahe mera prayaas
Aapki mehar se karti rahoon simran ka abhyaas
Aapki manzoori ho toh sab kuch hai mumkin
Kisee kann ka astitva nahin hai Aapki daya ke bin.

Aapki karuna se badhey mera manobal
Aapke prataap se adhyatmik safar ke kasht jaayein tal
Bhavnaaon kee ho shuddhi
Chinta chhoote, aaye subuddhi
Meri ekaagrataa ko keejiye saksham
Taaki mai kar paaoon dhyan uttam
Aapke dar ke alaawa mujhe koi aur kinaara na aaye nazar
Mujh nacheez ka anurodh hai Aapse ki Aapke dar par mukammal ho mera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anurodh (08/20/2023)

August 19, 2023

Om Namaha Shivaya
Aaj Ka Suvichaar 🙏🏻🙏🏻

#2008

 Ruhaani Raaste Par

Pyaare Guruvar deen dayal,

Jismein ho Aapki raza
Vaise hee chale hamaari bhi buddhi
Aapki raza ke anukool hamaare har vichaar aur karma mein samaayi ho shuddhi
Taaki Aapki mehar se asal dhan mein ho vriddhi.

Aapne sachet kiya saari sangat ko
Is maade waqt ke baare mein
Vigyan kee badhauti lekin kaheen kaheen asal gyan mein kamee
Hui hai sansaar saare mein.

Ye hai jaagrit honei ka samay
Ismein nahin hai koi sanshay
Aapki mehar se hon hum nirbhay
Kyunki chunautiyon ka aate rehna toh hai tayy.

Sansaar hai bhool-bhulaiyaan
Buddhi bhatakti hai yahaan vahaan
Aap de rahein Hain paawan prerna
Phir bhi ulajhti rehti hai chetna.

Aapki kripa se buddhi aisee ho jaaye
Ki chetna mein saamarthya aaye
Taaki hum Aapke hukm ko jaanein aur maanein
Aur divya satya ka swaroop pehchaanein.

Ye waqt bhi jaayega guzar
Ek pal bhi rukega na ye safar
Aapki meharbaani se Aapki bakhshish ka hoga asar
Aur hum is maade waqt mein bhi ruhaani raaste par hongei agrasar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaani Raaste Par (08/19/2023)

August 18, 2023

Om Namaha Shivaya
Aaj Ka Suvichaar 🙏🏻🙏🏻

#2007

  Aapki Bandagi Bina

Param poojya Guruji,

Aapki kripa mujh par aisee vrishti barsaaye
Ki Aapse itna prem ho jaaye
Ki kisee aur ke prati moh na sataaye
Na hee kisee ke prati heen bhaav aaye.

Galatiyon kee mai putali hoon
Apne paapon ke alaawa Aapko aur kya doon
Meri nahin hai koi aukat
Phir bhi Aapne dee hai Apne ashish kee saugat.

Naye nazariye se vichaar karna mujhe aa jaaye
Mann mein ‘mai’ ‘mera’ ‘mainey’ na samaaye
Aapka MahaShiv roop jaan paane kee subuddhi aaye
Aapke divya roop ke darshan ho paayein, aisee shuddhi aaye.

Aapke uss maha paraakrami roop ke yogya bann paaoon
Kripa kar aise nikhaariye meri bhakti
Aapke uss maha prataapi roop ko dekh paane kee
Mujhe deejiyega shakti.

Jeena hai ghar parivaar mein, is sansaar mein
Himmat aur sumat deejiye ki farz nibhaate huey yahaan apne kirdaar mein
Mera antas juda rahe Aap mein aur Aapke paawan pyaar mein
Aur mera lakshya juda rahe Aap mein aur Aapke deedar mein.

Saboori se na badhe kabhi bhi meri doori
Beshak aaye jeevan mein koi bhi majboori
Meri chetna baar baar yaad dilaate hai mujhe ye baat zaroori
Ki Aapki bandagi bina meri zindagi hai vyarth aur adhoori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Bandagi Bina (08/18/2023)

August 17, 2023

Om Namaha Shivaya
Aaj Ka Suvichaar 🙏🏻🙏🏻

#2006

               Saat Rangon Ka Chola

Pyaare Guruvar,

Hokar Aap mein nimagn
Gungunaati hui Aapki dhun
Mastt hua mera mann
Dekh kar mann ka upvan.

Aap thei vahaan virajmaan
Jaise har pal hotey Hain vahaan
Aapki muskuraahat mandd mandd
Aapka noor divya akhand.

Goonj rahi thi Gurbani kee meethi awaaz
Ho raha thaa ruhaani khushboo ka ehsaas
Mann mein jyot jal rahi thi Aapke vandan kee
Upvan mein phaili thi oorja Aapke spandan kee.

Pehna thaa Aapne saat rangon ka chola
Aapke kehne par har rangg baari baari mujhse bola
Mai reh gayi bhaav vibhor aur dangg
Sunkar kya kehta chala har rangg.

Pehle ne kaha ‘sewa’ hai vo
Aur ‘simran’ hoon mai, kehna lagaa rangg dooja
Teesre na kaha veh prateek hai ‘satsang’ ka
Mujhe toh anmol lagaa prateekvaad har rangg ka.

Chautha rangg sehejta se bola ki vo hai ‘saboori’
Paanchve ne kaha ki yaad rakhoon har pal ‘shukrana’ hai zaroori
Chhatha bola ki har kartavya ko ek ‘sadhna’ samjhoon
Saatvein ne kaha ki Guruji ko ‘sarvsamarpan’ karoon.

Phir sab rangon ka ek sundar sa mishra
Safed rangg bannkar gaya umad usee kshan
‘Shuddhi’ hoon mai, usne kaha tabb
Aapne haami bhari tabb.

Aapne bakhshe ve rangg saat
Thee veh kitnee bahumoolya daat
Kuch rangg gehre, kuch pheeke hain abhi
Koshish hai meri ki gehraayee mein ucchatam ho jaayein sabhi.

Tabhi toh pahunch paaoongi safed rangg takk
Chod kar har shikva, shikaayat ya shak
Guruji, Aap aisa sudhaar laayiyega mere jeene ke dhangg mein
Ki mai rangg jaaoon poori tareh se Aapke rangg mein
Aap Apne ashish se sanvaar rahein Hain mera jeevan
Mann se karoon mai Aapko shukrana bhara naman.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saat Rangon Ka Chola (08/17/2023)