Aaj Ka Suvichaar

February 23, 2024

Om Namaha Shivaya
Aaj Ka Suvichaar 🙏🏻🙏🏻

#2196

        Adhyaatma Ke Akash Mein

Yug sangam ka samaa hai chaaron oar
Kar lein apne antas par gaur
Vaheen par kar paayenge asal tayyaari
Jabb padegi zaroorat uskee ati-bhaari.

Maanav ne prakriti ka kiya hai apmaan
Prakriti ne saha hai itna nuksaan
Phir bhi rakhti rahi sab praaniyon ka veh dhyan
Lekin tabb bhi duur na hua maanav ka agyan.

Thakk gayi hai abb prakriti
Nibhaate huey niswaarth preeti
Nishchit hai khatma kalyuga ka
Taaki aagaman ho satyuga ka.

Baahar jaana chod nahin sakte
Lekin bheetar jaane se kisee ne nahin roka
Jo bheetar na jaaye baar baar
Usey swayam se hee ho jaayega dhokha.

Guruji ne hamein jod kar swayam se
Kiya hai hum par aseem upkaar
Sewa, simran, satsang, dinacharya mein
Ve hamein bheetar jaana yaad dilaate Hain baarambaar.

Guruji ka diya yeh maargdarshan
Hamaari raksha karega har kshan
Besharte hum uss par amal karein
Taaki pralay kaal mein jeete jee na marein.

Na bhoolein Guruji kee kahi baat
Toh hum surakshit rahenge din raat
Simran aur dhyan se mann ko milegi kshamta
Aur hamein milegi suraksha kee sampoornata.

Varna jabb baahar hongei bhukamp aur tufaan
Toh unse bhi zyaada dardnaak hogi asthirta aur kampan bheetar kee
Abhi toh phir bhi saawan hai
Tayyaari kar lein abhi se patjhad kee.

Pehchaanein Guruji kee prerna ka paigam
Guruji hamaare mann kee shanti aur sthirta ka kar rahe Hain intazaam
Khushnaseeb hain hum ki japp paate hain Guruji ka paawan naam
Guruji ke sahaare adhyaatma ke akash mein hum bharein udaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatma Ke Akash Mein (02/23/2024)

February 22, 2024

Om Namaha Shivaya
Aaj Ka Suvichaar 🙏🏻🙏🏻

#2195

                            Deedar

Sab kuch honei par bhi apoornataa
Na jaane kyun maya mein phanse hain praan
Aye praani, dhoondhte ho tum nirvaan
Parantu ho asal saar aur tattva se tum anjaan.

Apoornata se sampoornata ka ye safar
Bin Guru ke maargdarshan ke na hai mumkin
Jo satta hai parey is shareer se
Uska gyan ho jaayega Guru dwaara bakhshi taqdeer se.

Guruji Maharaj Hain Shiv avatari
Ve karaa rahe Hain tumhaari tayyaari
Sookshmata mein hai sampoornata
Tumhe mehsoos karaayegi Guruji kee divyata.

Zaroori hai Guruji ka simran aur chintan
Apne aatmik swaroop ko mehsoos karne ke liye
Isliye jitna ho sakey
Unse seedhi taar jodne ka karte chalo prayatn
Ye atma aur Paramatama ko jodne wali taar dwaara
Uttar paayega tumhaara har ruhaani prashn.

Jitnee tadap hogi Guruji se judey rehne kee
Utnee shakti denge Ve tumhe chunautiyon ko sehne kee
Kyunki chunautiyan toh aayengi hee aayengi
Mann kamzor hua toh ve bahut sataayengi.

Guruji ne bakhsha hai tumhe simran
Simran dwaara shaktishali banaao mann
Ekant aur maun mein karo Gurbani ka shravan
Aur uske pashchaat karo shabad par manan.

Saadho, saadho Guruji ko, shraddha aur pyaar se
Sansaar mein rehte huey anaasakt raho sansaar se
Ye beshak aasaan na lagey pehle pehle, lekin ye namumkin nahin
Arey, tum apni taraf se koshish kar ke dekho toh sahi.

Khaalipan aur agyan ke andhkaar se
Mukt karaayega tumhe Guru dwaara diya atma bodh ka ujaala
Guruji ke charnon mein chalega tumhaara safar
Toh tumhe sampoornata bheetar aayegi nazar.

Kyunki bheetar ka hai yeh safar
Hadd se paar jaana hai guzar
Avidya aur maya kee hadd se paar
Jahaan atma ka Paramatama se ho deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deedar (02/22/2024)

February 21, 2024

Om Namaha Shivaya
Aaj Ka Suvichaar 🙏🏻🙏🏻

#2194

            Apni Aakhiri Saans Takk

Guruji ne jabb mujhe dekha
Toh yakeenan Unhonei badal dee mere haath kee rekha
Dobaara likhne lagey Ve meri kismat ka lekha
Karte huey meri kayi galatiyon ko andekha.

Guruji ne daali mujh nacheez par Apni mehar-e-nazar
Yoon chhoo gayi meri zindagi ko Unkee nirmal nadar
Ki har anubhav par abb hota hai Unkee kripa ka asar
Har pal Unhee ke naam ke aadhaar par hota hai abb jeevan basar.

Punj Hain Guruji prakash ka
Sarovar Hain Ve sundar sakaash ka
Guruji ke prataap ke samaksh alp hai vistaar akash ka
Guruji ke ashirwaad mein koi kaam nahin avkaash ka.

Kyunki Guruji ka ashirwaad barasta hai nirantar
Bahut dayalu hai Guruji ka divya dar
Guruji kee bhakti banaa deti hai nidarr
Guru kripa ka jeevan par hota hai shubh asar.

Guruji ne mujh nirmaani ko apnaa liya
Jalaaya Unhonei mere antas mein deeya
Mujhe har pal Apna ruhaani saanidhya hai diya
Ye sab Guruji kee hee hai daya.

Guruji kee daya kee dariya mein doob jaaoon
Unkee mamta kee goad mein jhool jaaoon
Unke naam kee sarita mein kar paaoon nirantar snaan
Apni aakhiri saans takk karti rahoon Unkee mahima ka gungaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apni Aakhiri Saans Takk (02/21/2024)

February 20, 2024

Om Namaha Shivaya
Aaj Ka Suvichaar 🙏🏻🙏🏻

#2193

        Guruji Kee Rehmat Ka Amrit

Hon kaise bhi haalaat
Ho jaaye jeevan mein kaisi bhi baat
Guruji kee rehmat ka amrit
Bhakt par barasta hai nit nit.

Ye amrit nahin hai kewal paani
Is amrit ka asar hai ruhaani
Yeh amrit taarte taarte deta hai buddhi
Yeh amrit karta hai rooh kee shuddhi.

Is amrit kee khushboo anokhi hai itnee
Mita deti hai ye antas mein hoti hai durgandh jitnee
Is amrit ke ashish se murjhaayee hui asha khil jaati hai
Is amrit ke prabhaav se khoi hui ummeed vaapis mil jaati hai.

Paawan se bhi paawan Ganga hai Guruji kee rehmat ka amrit
Ismein veh shakti hai jo shant aur sheetal kar deti hai chit
Rehmat ke is amrit mein anukampa hai aisee aparampaar
Ki veh dukhi mann ko deti hai sahaara aur pyaar.

Guruji kee rehmat ke amrit kee har boond mein
Basee hai Guruji kee mamta
Ye mamta apni komalta aur nirmalta se Nipun karti hai bhakt kee kshamta
Amrit ko peete rehne kee
Jeevan ko jeete rehne kee.

Guruji kee rehmat ke amrit mein
Aushadhi hai Guruji ke naam kee
Guruji kee rehmat ke amrit mein
Vibhooti hai bhakt ke kalyaan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Rehmat Ka Amrit (02/20/2024)

February 19, 2024

Om Namaha Shivaya
Aaj Ka Suvichaar 🙏🏻🙏🏻

#2192

     Sunehra Mauka

Khareed le jitnee bhi kothiyan aur zameenein
Tu rahega toh karzdaar kyunki
Karmon ke karz ko chukaana abhi baaki hai
Apna har farz nibhaana abhi baaki hai.

Isliye beshak zameen teri ho ya paraayee
Satark hokar lena tu har kadam yahaan
Har raaste par bichha hai maya ka jaal
Beshak tu chalta jaaye jahaan.

Kaheen aisa na ho ki jis zameen ko tu kehta hai apna
Uss se milne wala sukh ho kewal ek sapna
Kyunki vahaan phans kar maya ke jaal mein
Tu ho jaaye dukh ke haal mein.

Zameen teri ho ya kisee aur kee
Chalna tu dhyan se
Guruji raasta dikhaayenge
Anugrahit karenge tujhe gyan se.

Gyan ka sadupyog karna tu, kyunki
Chalte phirte dene hongei tujhe imtehaan
Har tareh ke sambandh ke sampark ko bhi
Tu imtehaan ka hee ek pehlu maan.

Sirf duur aur doosaron par na rakhna nazar
Balki nazdeekiyon par aur swayam par gaur zaroor farmaana
Bhaukivaad ke gaddhe mein aise na gir jaana
Ki phir mushkil ho jaaye baahar aana.

Chalte chalte jhankte rehna apne gireban mein
Aur vikaaron ko vish na gholne dena apni ruhaani pehchaan mein
Khushakismat hai tu ki kar paata hai tu Guruji ke naam ka amrit paan
Is amrit se apne antas ko seench kar bann jaa tu sadgunon kee khan.

Jaise jaise har din ka sooraj uday ho aur dhalta rahe
Vaise vaise tere bheetar Guruji ka naam simran chalta rahe
Keechad se gande honei kee paristhitiyaan beshak aayein anek
Tu Guruji ka anusaran karna aur rehna nirlep.

Gupt daan, gupt sewa, gupt paath karna rakhna yaad
Inke sangg simran aur satsang ke liye Unse karna fariyaad
Guruji pahunchaayenge tujhe tere gantavya par
Tu Unhe rijhaane ka kartavya kar.

Guruji saaf karvaayenge tere karmon ke khaate
Tu apna farz nibhaate nibhaate
Chalte jaana Unkee dikhaayee disha mein
Sudhaar aata rahega teri dasha mein.

Guruji uddeshya poorna karaayenge tere jeevan ka
Tu maalik bhi bann paayega apne mann ka
Tu adhikaari hai Guruji dwaara diye asal dhan ka
Isliye na gavaana ye sunehra mauka jeevan ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sunehra Mauka (02/19/2024)

February 18, 2024

Om Namaha Shivaya
Aaj Ka Suvichaar 🙏🏻🙏🏻

#2191

Sundar Sa Shivaalay

Jabb bhi aaye aisa koi daur
Ki tum mehsoos karo swayam ko kamzor
Tabb khud ko yaad dilaao ki Guruji Hain tumhaare saath
Aur Unhonei thaami hai tumhaare jeevan kee doar.

Guruji toh Hain sarvshaktimaan
Guruji toh Hain karunanidhaan
Ve tumhaare dukh se nahin Hain anjaan
Guruji bin kahe kar rahe Hain tumhaara kalyaan.

Sancha hai rishta Guruji aur tumhaara
Ye rishta hai tumhaare har shwaas ka sahaara
Is rishte bin tumhaara ho na paayega abb guzaara
Na jaane is rishte se pehle bhi kaise tumne jeevan hoga guzaara.

Guruji kewal Guru aur pita mata nahin
Guruji kewal meet aur bhraata nahin
Ve toh swayam Hain roop Bhagwaan ka
Isliye aadar karo Unke diye har imtehaan ka.

Tum aacharan karo Guruji kee dee prerna ke aadhaar par
Unke dar par pahunch kar tumne paaya hai Sachkhand ka dar
Tum tyaag do har sanshay aur har darr
Tum har pal Unkee kripa se rahe ho tarr.

Guruji sanvaar rahe Hain tumhaari taqdeer
Na hona abb tum niraash ya pareshaan ya adheer
Unhe har karma arpit kar abb tum jee lo bann kar veer
Tumhaare antas mein sundar se Shivaalay ka niwaas hai ye shareer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sundar Sa Shivaalay (02/18/2024)

February 17, 2024

Om Namaha Shivaya
Aaj Ka Suvichaar 🙏🏻🙏🏻

#2190

    Bheetar Ke Nandi Kee Muskaan

Guruji ka ek bhakt thaa deewaana sa
Apnon mein bhi mehsoos karta thaa apne ko begaana sa
Usey Guru Govind hee lagte thei apne
Achche lagte thei usey Unhee ke naam japne.

Bhautik bhaag daud mein uskee zindagi bhi chalti rahi
Har din subah aayi aur shaam bannkar vo dhalti rahi
Utaar chadhaav kee vaadiyon mein kismat haath malti rahi
Antas mein bandagi kee nirmal jwaala jalti rahi.

Guruji ne bakhsha thaa usey simran aur satsang
Chadhta gaya uspar Guruji kee bhakti ka ruhaani rangg
Laukik rangon mein ruchi chhooti dheere dheere
Samajh mein aane lagaa ki kitne farebi hotey hain bhautikvaad ke heere.

Na samet paaya kayi toote huey sapnon ko
Dekha safed jhooth bolte huey usne apnon ko
Har tareh ke anubhav huey usey zindagi mein
Raahat milee toh kewal bandagi mein.

Aisa nahin ki kewal kasht aur dukh aaye
Anekon khushi ke lamhe aur sukh aaye
Guruji kee mehar se Unse har din aur zyaada judta gaya
Sansaar mein rehkar laukik matt se duur mudta gaya.

Guruji ne usey duniya ka asal roop dikha diya
Guruji ne usey sumat bakhshi aur sikha diya
Ki Guruji ka Nandi bannkar rehna hai is sansaar mein
Unke ruhaani saanidhya mein sab sehna hai is sansaar mein
Jabb takk Guruji le nahin jaate Hain uss sansaar mein
Tabb takk yahaan har lamha jeena hai Unmein samaane ke intazaar mein.

Muskuraate huey, Guruji kee mahima gaate huey
Unkee sewa aur Unke hukm mein zindagi bitaate huey
Preeti mein
Sweekriti mein
Bin kisee sawaal ya maang, hokar apeksha se rahit
Jeena hai Guruji kee dee hui prerna ke sahit
Guruji kee raza mein raazi rehna hai
Jo kehna hai vo Guruji se kehna hai.

Atma Paramatama ka hai ansh
Nandi Hain Shivji ka roop
Guruji Hain Shiv avatari
Jis bhakt ne Nandi ke jaise zindagi guzaari
Vo Guruji se juda nahin
Ye baat hai sahi
Yahaan bhi, aur vahaan bhi.

Isliye bann jaaye ye zindagi
Har pal Guruji kee bandagi
Unkee bakhshindagi miltee rahe
Bheetar ke Nandi kee muskaan khiltee rahe.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetar Ke Nandi Kee Muskaan (02/17/2024)

February 16, 2024

Om Namaha Shivaya
Aaj Ka Suvichaar 🙏🏻🙏🏻

#2189

       Sukhad Ho Jaaye Ye Jeevan

Guruji ke sangg ruhaani rishte ko shat shat naman
Unhee ke chintan mein leen rahe antarmann
Unka naam japey dil kee har dhadkan
Toh nishchay hee sukhad ho jaaye ye jeevan.

Dinacharya mein har soch har karam
Guruji ke kamal charan mein karein arpan
Mann se kar dein Unhe sarvsamarpan
Toh nishchay hee sukhad ho jaaye ye jeevan.

Fikr kee yaad ko bhool kar karein Guruji ke naam ka smaran
Guruji kar rahe Hain anginat kashton ka haran
Bandagi mein ramm jaayein hum karte huey simran aur manan
Toh nishchay hee sukhad ho jaaye ye jeevan.

Guruji ke shukraguzaar rahein har kshan
Ekatrit karte rahein Unke nirmal naam ka dhan
Unkee ruhaaniyat ke prataap ka karein vinamr vandan
Toh nishchay hee sukhad ho jaaye ye jeevan.

Yaad karaayein swayam ko ki hamein milee hai MahaShiv kee sharan
Khushkismat hain hum ki Guruji ne kiya hamaara chayan
Neevan hokar chalne ka karte rahein hum yatan
Toh nishchay hee sukhad ho jaaye ye jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukhad Ho Jaaye Ye Jeevan (02/16/2024)

February 15, 2024

Om Namaha Shivaya
Aaj Ka Suvichaar 🙏🏻🙏🏻

#2188

            Aparampaar Uddhaar

Param poojya Guruji Maharaj
Swayam Hain Shiv avatari
Adi yogi tapasvi karein Nandi kee savaari
Trinetradhaari nirmohi Unka Shiv roop hai jatadhaari.

Trishul Unka dikhaaye ki Ve Hain Trigunateet
Mahima Unkee aseem aur shabdateet
Neel kanth bannkar dein tyaag kee prerna
Vasuki naag dwaara vikaaron ko vash mein karne kee dein chetna.

Damru divya dhvani Om ka prateek
Sabse duur hotey huey bhi Ve Hain sabhi ke nazdeek
Rudraksh aur japp se jal ko Ve amrit banaayein
Kulhaari se Ve shatru ko daraayein.

Bhasma se yaad dilaayein ki anitya hai sansaar
Kewal atma aur Paramatama hain saara saar
Vairagya ka bhaav utpann karne ka dein protsaahan
Ve pehen kar baagh kee khaal.

Nandi hai yeh shareer
Jis par savaar hai atma
Ye yaad dilaayein Guruji
Jo Hain Guru ke roop mein Paramatama.

Guruji ka chintan kar ke
Mann ko Kashi banaayein
Kailas roopi sachkhand mein
Guruji kabhi toh lekar jaayein.

Rooh kee hai ye arzoo
Dil kee hai ye khwaahish
Guruji se seedhi taar jodein
Na karaayein kisee ke dwaara sifaarish
Judi rahe jo Inn Paramatama se atma kee seedhi taar
Toh Unke kiye aparampaar uddhaar se ho jaayega beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aparampaar Uddhaar (02/15/2024)

February 14, 2024

Om Namaha Shivaya
Aaj Ka Suvichaar 🙏🏻🙏🏻

#2187

Maa Saraswati Kee Pooja

Aaj ka sundar sunehra din
Maa Saraswati kee pooja ko hai samarpit
Reeti rivaaj ke anusaar
Saadhak Unhe peele vastra karte hain arpit.

Devi vidya aur vaani kee
Karein hans kee savaari
Veenavaadini Hain dayalu mata
Bhakton ko lagti Hain Ve bahut hee pyaari.

Prem se manaayein bhakt yeh tyohaar
Shraddha bhaav se hotey hain tayyaar
Ghar aur mandir kee safai
Peele rangg kee mithai
Peele aur rangeele suman
Saraswati Mata ka prem bhara vandan
Maa kee archana ghar parivaar ke sangg
Bhakt chaav se pehne peela rangg
Karein bhakt Sharda Maa ka gungaan
Maangein Unse gyan praapti ka vardaan
Maangein Maa se bhakti aur kala ka daan
Arzi lagaayein ki Maa karein kalyaan.

Gyan kee jyot jalaayein Maa Saraswati
Sabhi ke jeevan aur antarmann mein
Bheetar ka andhkaar karein duur
Pradaan karein vidya ka ruhaani noor.

Divya jyot toh hai ek
Chaahe hon prateekatmak vichaar anek
Satyugi sanskaar aur vidya se anugrahit ho jann pratyek
Arzi hai ye har Devi Devta ko maatha tek.

Guruji kee saari sangat ko
Mubarak ho Saraswati Puja ke khaas din kee
Guruji mein Guru sangg milee hai maa kee mamta
Duur hui har kamee jeevan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maa Saraswati Kee Pooja (02/14/2024)