Tag: blog

December 2, 2024

Om Namaha Shivaya
Aaj Ka Suvichaar 🙏🏻🙏🏻

#2479

              Guruji Kee Yaad Mein

Guruji kee yaad mein
Guruji ke manan mein
Jo bhakt guzaar le apna samay
Kumm hotey chalein uske sanshay
Duur hota chale uska bhayy
Uddhaar uska hai bilkul tayy.

Zaroorat nahin usey kisee aur kee
Guruji usey disha dikhaayein har daur kee
Unka naam kavach baney suraksha raaste ke har moad kee
Aaj ya kal uske jeevan mein zaroor kiran dikhtee hai sunehri bhor kee.

Guruji kee yaad ke sangg rehna
Ye hai itna mehfooz gehna
Jis bhakt ne ye anmol gehna hai pehna
Usne har chunauti ko yoon hai sehna
Maano vo hai ek halka sa jhonka hawaa ka
Ya chhota sa ghoont kisee kadvi dawaa ka
Jiska zor jald hee khatm ho jaata hai
Aur bhakt aagey badh paata hai.

Guruji de rahe Hain jo shraddha aur saboori
Inke dwaara aur bhi jald mitegi Unse duuri
Tabb takk Unkee yaad ko hriday mein basaa lo
Ekant mein bhi Guruji ke sangg muskuraa lo
Unkee yaad mein Unhee ke sangg gungunaa lo
Anokha hai ye ehsaas, isey galey se lagaa lo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad Mein (12/02/2024)

November 29, 2024

Om Namaha Shivaya
Aaj Ka Suvichaar 🙏🏻🙏🏻

#2476

          Aapke Charnon Ke Taley

Param poojya Guruvar mere,

Aapke charnon ke taley rehne kee bhi nahi meri aukat
Phir bhi Aapne dee hai Apne charnon mein sir jhukaane kee daat
Kalpana bhi nahin kee thi ki kabhi milegi aisee sunehri saugat
Shukrana Guruji, ki Aapne diya hai ye anupam ashirwaad.

Aapke charnon kee mahima akhand hai
Aapke charnon mein hee sachkhand hai
Aapke charnon mein hai atulneeya sukh
Jiska antas Aapke charnon mein jaaye jhuk
Uss se pareshaaniyon ko moadna padta hai rukh
Kyunki Aapke charnon mein hai suraksha nishchit
Aapke charnon mein aane se ho jaata hai hitt.

Koi raat nahin rehti andheri
Nahin rehti jeevan mein ujaale kee deri
Barasta hai Aapka ashirwaad
Jo karta hai antas ko aabaad
Rooh takk tarne lagg jaati hai
Mann kee mai marne lagg jaati hai
Apni tuchhta ka badhta jaata hai ehsaas
Aapke charnon ka sukh hai itna khaas.

Jitna jhukta hai mann
Utna rukta hai veh kshan
Manan ke liye
Vandan ke liye
Aur jalte hain deeye
Ruhaani jaagriti ke
Sudharti aatmik aakriti kee.

In deeyon se hota hai aisa prakash
Jis se roshan hota hai apne bheetar ka mann roopi akash
Mulaakaat hoti hai seher se
Ye sab hota hai kewal Aapki hee meher se.

Guruji, Aapke charnon mein meher hai apaar
Aap hee Guru, Aap hee Parwardigaar
Aapke charnon mein aakar ho jaayega beda paar
Aapki kripa se badhta jaaye Aapke charnon ke prati mera pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Charnon Ke Taley (11/29/2024)

November 28, 2024

Om Namaha Shivaya
Aaj Ka Suvichaar 🙏🏻🙏🏻

#2475

               Kis Kis Baat Ka….

Kis kis baat ka karoon shukrana, mere daata
Kis kis daat ka karoon shukrana
Diya hai Aapne jo ruhaani khazaana
Uske bin na reh paaye abb ye dil deewaana.

Aapse judi hai taar Guruji, shukrana
Aapse mila hai pyaar Guruji, shukrana
Aapki raksha mein parivaar mera hai, shukrana
Aapke charnon mein sansaar mera hai, shukrana.

Mujhe Aapne Apne paas bulaaya, shukrana
Mujhe Aapne Apna das banaaya, shukrana
Apne charnon ke paas baithaaya, shukrana
Mujh par ashirwaad barsaaya, shukrana.

Sewa simran mein mujhe lagaaya, shukrana
Apne satsang mein mujhe bulaaya, shukrana
Apni mahima ka gungaan karaaya, shukrana
Apni kirpa ka bakhaan sunvaaya, shukrana.

Sadh sangat se milvaaya Aapne, shukrana
Langar prasad chhakvaaya Aapne, shukrana
Sabr aur shraddha ka paath sikhaaya, shukrana
Murjhaaye huey mann ko utsaah se khilaaya, shukrana.

Mann mandir mein vishwaas jagaaya, shukrana
Antas mein gyan ka deep jalaaya, shukrana
Har samay raasta dikhaaya, shukrana
Uss par Aapne chalna sikhaaya, shukrana
Duniyadaari se bhayy hatvaaya, shukrana
Na jaane kya kya karna katvaaya, shukrana.

Dee bakhshishein aur prerna, shukrana
Dee asisein aur chetna, shukrana
Suraksha dee bharpoor Guruji, shukrana
Baney mere huzoor Guruji, shukrana

Har angg, har rangg ka shukrana
Jeevan ke is dhangg ka shukrana
Sadh sangat ke sangg ka shukrana
Mann rehta hai Aap mein malang, shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kis Kis Baat Ka…. (11/28/2024)

November 27, 2024

Om Namaha Shivaya
Aaj Ka Suvichaar 🙏🏻🙏🏻

#2474

             Guruji Ke Pyaar Mein

Har bhakt jo hai Guruji ke pyaar mein
Har bhakt jo pahunch paata hai Guruji ke darbar mein
Har uss bhakt kee bhakti ko pranaam
Har uss bhakt ka bhaav pehchaanein Guruvar mahaan.

Koi muskuraata hai
Koi gungunaata hai
Guruji ka gungaan
Unkee mahima mahaan.

Koi rota hai
Koi sota hai
Koi khota hai
Guruji ke khayaalon mein
Ruhaani sawaalon mein
Simran mein ya vandan mein
Kisee bhi tareh Guruji ke chintan mein.

Koi aata hai arzoo lekar
Koi aaye khaa kar dar dar thokar
Koi aate hee karey shukar, koi lagaaye arzi
Lekin ye nishchit hai ki koi na aa paaye bin Guruji kee marzi.

Koi aata hai maangne kshama
Koi aaye kyunki bura chal raha hai uska samaa
Kisee ko hoti hai shikaayat
Koi aaye karta hua ibadat
Koi kisee shubh kaam se pehle ya uske baad
Koi laachaari bayaan karne, toh koi karey dhanyawaad.

Koi aata hai majboori mein
Koi aaye ‘Ji huzoori’ mein
Koi virla hee hota hai jo aaye buss Guruji ke pyaar mein
Bheegne buss Unke darshan deedar mein
Karne Unhee Guruji ke liye ardaas
Jinhonei bakhsha hai har shwaas.

Aisa ajab hai jeevan ka safar
Ki bhool jaate hain hum aksar
Ki bhakti bin swaarth ke hee sachchi
Niswaarth bhakti laagey Guruji ko achchi.

Guruji toh aaye hee karne kalyaan
Kalyaan toh karenge hee Ve karunanidhaan
Hum de paayein Unhe prasannata, Guruji bakhshein aisee buddhi
Hum bann jaayein Unke yogya, Guruji bakhshein aisee shuddhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Pyaar Mein (11/27/2024)

November 23, 2024

Om Namaha Shivaya
Aaj Ka Suvichaar 🙏🏻🙏🏻

#2470

Tumhaare Pukaarne Mein

Tumhaare pukaarne mein deri ho sakti hai
Guruji ke sunn-ne mein nahin
Is satya par karo yakeen
Guruji toh Hain bhakton ke adheen.

Beete lamhon ko hee dekh lo kar ke yaad
Jabb bhi tumne kee fariyaad
Guruji ne dee tumhe sehensheelta aur saboori
Kyunki Ve jaanein ki tumhaare liye ye thei zaroori.

Har chunauti ka saamna karne ke liye
Guruji dete Hain shakti
Dete Hain aagey badhne kee yukti
Guruji nikhaarte Hain tumhaari bhakti.

Unkee dee bakhshishein
Unkee dee ashishein
Ye sab sampoorna sanket hain
Ki Ve sabb bhakton kee sunte Hain.

Kabhi kabhi usee samay hoti hai aas poori
Lekin kabhi der se, aur kabhi reh jaati hai adhoori
Par yaad se karte raho Guruji kee ji huzoori
Jitna yaad karoge, utnee kumm hoti jaayegi Unse duuri.

Mitaani ye duuri
Yahee hai sabse zaroori
Guruji par rakhte chalo vishwaas
Agar tumhaare bhale ke liye hogi tumhaari aas
Toh poori ho jaayegi
Varna Guru kripa alag hee rangg laayegi
Jismein hoga aisa kalyaan
Ki tum andaaza bhi lagaa sakte nahin
Guruji tumhaare shubhchintak Hain
Ve sab kar denge sahi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Pukaarne Mein (11/23/2024)

November 22, 2024

Om Namaha Shivaya
Aaj Ka Suvichaar 🙏🏻🙏🏻

#2469

Purushaarth Toh Sambhaalna Hoga

Guruji kee sharan mein
Anokha banaa hai ye safar
Mauka banaa hai ye safar
Swayam ko sudhaarne ka
Bhakti ko nikhaarne ka
Guruji kee meher se
Aaj se, isee peher se.

Apaar shakti hai Guruji ke naam mein
Phir kyun karni der shubh kaam mein
Karte karte Unka chintan
Jaari rahe jo mann ka manthan
Har koshish ho poori apni oar se
Toh Guruji prasann hongei tumhaari daud se
Manzil kee oar
Mehfil ko chod.

Vo manzil, jiskee rooh ko hai talaash
Jahaan baandhta nahin koi paash
Jahaan aisa milan hota hai Guruji ke sangg
Ki rooh par poori tareh se chadhta hai Unka rangg.

Ye mumkin hai rehte huey yaheen par
Dharti kee isee zameen par
Kyunki mila hai Unn Guruji ka dar
Kyunki Ve bakhsh rahe Hain ye avsar.

Samaa hai purushaarth ke imtehaan ka
Purushaarth uddeshya hai har insaan ka
Bhautik zindagi yahaan kee
Ruhaani tayyaari vahaan kee
Purushaarth toh sambhaalna hoga, o paarth
Guruji har pal Hain tumhaare saath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Purushaarth Toh Sambhaalna Hoga (11/22/2024)

November 21, 2024

Om Namaha Shivaya
Aaj Ka Suvichaar 🙏🏻🙏🏻

#2468

     Shiv Roopi Guruji Karunanidhaan

Shiv roopi Guruji karunanidhaan
Guruji Maharaj bade meharbaan
Tekne diya Unn kripadhaari ne Apne charnon mein maatha
Abb Guruji ke gunn gaate huey beete jeevan kee gaatha.

Namumkin hai karna bayaan
Unke kiye kalyaan
Unkee mahima mahaan
Lafz padd jaayein kumm kyunki beantt hai bakhaan.

Panch tattvon se bann kar janmey hain hum
Unhee tattvon mein hai jaana humne mil
Ye toh Guruji Maharaj kee meher hai
Ki hamaare naseeb gaye hain khil.

Varna kya hai hamaari aukat
Antt mein bann jaana hai humne raakh
Unhonei phir bhi jageh dee Apne aanchal mein
Hum jaise bhi hain, Ve sambhaalte Hain pal pal mein.

Har roag mein, har bhog mein
Hum par hai Guruji kee nadar aur nazar
Jo bhi ho raha ho zindagi mein
Unke ashish ka zaroor ho raha hota hai asar.

Ve praarabdh bhogne mein saath nibhaate Hain
Karma kumm kar ke bhugatvaate Hain
Apna noor hamaare jeevan mein phailaate Hain
Prerna ke strot bann kar hamein aagey badhaate Hain.

Unkee sharan mein aane se pehle
Alag sa hee thaa zindagi ka chehra
Abb toh mehsoos hota hai apne aaspaas suraksha kavach
Kyunki Guruji ka hum par har pal hai pehra.

Aisee khushnaseebi ko kaise na saraahein
Bhaav vibhor hokar nayn kaise na bhar aayein
Sochne kee zaroorat nahin ki hum jaayein toh kahaan jaayein
Buss, mann mandir mein Guruji ke naam kee jyot jalaayein.

Jinkee daya se pehle bhi kasht talaa
Ve taalenge sir par aayi har balaa
Guruji karenge bhalaa
Ve bakhshenge chadhdi kala.

🌹🌹🌹🌹🌹🌹🌹

Jai Guruji 🙏🏻🙏🏻🌹🌹
Dhirja

Shiv Roopi Guruji Karunanidhaan (11/21/2024)

November 18, 2024

Om Namaha Shivaya
Aaj Ka Suvichaar 🙏🏻🙏🏻

#2465

     Kaun Hain Swami, Tum Kiske Das

Bhautik sukh nahin hai tumhaara swaami
Na hee tum ho bhautik dukh ke das
Kewal Guruji Hain swaami tumhaare
Tum ho Unke hee das, isliye na hona tum udaas.

Aise sukh kee khushaamad kar ke khushi mil bhi gayi agar
Toh veh hogi kshanbhangur si dagar
Aur jo dukhi hotey chaley bhautik dukhon se
Toh zyada honei lagegi mann mein agar-magar.

Agar magar aur kintu parantu wale vichaar
Inse nahin honei wala hai tumhaara koi uddhaar
Poorna shraddha se karna hoga Guruji pe aitbaar
Agar chaahte ho ki ho tumhaara beda paar.

Dukhon ko bhogna padd sakta hai asal sukh paane ke liye
Bhautik sukh toh aate rehte hain kabhi na kabhi jaane ke liye
Asal sukh mein hota hai sanatan anand ka vaas
Asal sukh paane wala phir kabhi nahi hota udaas.

Lekin haan, asal sukh ka rukh dekhne ke liye
Mann ka mukh modna hoga aasakti se parey
Varna bhautik sukh ke bhog mein khadey khadey
Asal sukh kee ichcha ke nanhe paudhe na hongei harey bharey.

Moad le jo mann ka mukh Guruji kee oar
Usey dikh paayegi yahaan ke sukh dukh se aagey kee bhor
Vo bhor dikhaayegi raasta asal sukh ka
Jis se noorani ho jaayega saundarya jeevan ke rukh ka.

Bhautik sukh dukh bhogte huey
Rehte huey yaheen par
Guruji ke dar par
Guruji se judey reh kar
Mil sakta hai asal sukh ka var
Kyunki sukh kee khan Hain Guruvar.

Dukh bhi zaroor hoga duur
Asal sukh bhi milega zaroor
Ho sakta hai lamba lagey ye safar
Lekin Guruji ka kiya kalyaan awashya laayega asar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kaun Hain Swami, Tum Kiske Das (11/18/2024)

November 17, 2024

Om Namaha Shivaya
Aaj Ka Suvichaar 🙏🏻🙏🏻

#2464

            Bhavsaagar Kee Leherein 

Leherein khushi aur gumm kee
Bhavsaagar mein aati jaati rahengi
Aate jaate huey apni bhaasha mein ye
Aksar apni kahaani bhi kahengi
Lekin kehne kehne se machta rahega shor
Vyarth hee chala jaayega ye daur.

Kisee aur ko sunaane se achcha hai
Guruji se sab kuch kehna
Duniya ke loag aur naate aate jaate rahenge
Par Guruji ne sada hai rehna.

Aisee hai Guruji kee ruhaani maujoodagi aaj bhi
Aisee hai Unkee mahima niraali
Ki Unke sangg bhakt baat kar paata hai
Aur lehron ka bahaav shor bhi nahin machaata hai.

Dil hee dil mein, mann hee mann mein
Guruji ke sangg hon baatein
Toh umadti leherein shant hon jaayein
Sehejta se beetein din aur raatein.

Bhavsaagar ke paar jaane kee hoti rahe tayyaari
Guruji kee liv mein leen hokar shant rahein lehrein saari
Roam roam mein samaati rahe Guruji kee khushboo
Unse milan ke poorvaabhaas mein gadd gadd hoti rahe rooh.

Socho phir kaisa hoga nazaara
Jabb dikhne lagega kalyaan ka kinaara
Bhavsaagar mein shanti hogi
Mann mein Guruji kee kanti hogi
Jeevan ke din hain do chaar
Guruji kee kripa se ho jaayega beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhavsaagar Kee Leherein (11/17/2024)

November 16, 2024

Om Namaha Shivaya
Aaj Ka Suvichaar 🙏🏻🙏🏻

#2463

             Kahoon Aapko…..

Param poojya Guruvar,

Kahoon Aapko Mahadev mai
Ya kahoon Bhole Bhandari
Kahoon Aapko Pashupatinath
Ya phir Guruji mangalkaari.

Chehre par Aapke noor aisa
Ki sooraj bhi sharmaaye
Anokhi ruhaani khushboo aisee
Ki meri atma pulakit ho jaaye.

Kahoon Aapko Vo Ek
Ya phir Ek mein Anek
Kahoon Aapko avatar
Kahoon Aapko Parwardigaar.

Aap hee bataayein
Aap hee kehelvaayein
Aap hee samjhaayein
Aap hee bulvaayein.

Aap toh jaan-e-jahaan Hain
Zaroorat hee nahin Aapse kuch bhi kehne kee
Aap chaahein toh seekhti rahoon kala chup rehne kee
Mann hee mann Aapse baatein kehne kee.

Aap hee hunar sikhaayenge
Baahar hai ye meri kaabiliyat se
Ye hee nahin, baaki har soojh boojh bhi
Ho paati hai Aapki hee inaayat se.

Deewaanepann mein na jaane
Kya kya mai keh jaati hoon
Vidhi vidhaan kuch aata nahin
Har pal Aapko nihaarna chaahti hoon.

Sotey huey, jaagte huey
Aapke khayaalon mein khoti jaaoon
Nit nit pal pal
Aapke kareeb hoti jaaoon.

Isee kareebi se duur hogi gareebi
Isee kareebi mein hai khushnaseebi
Aisee khushnaseebi bakhsh deejiye, mere karunanidhaan
Ki Aap mein samaa jaaye meri jindari, o jaan-e-jahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kahoon Aapko….. (11/16/2024)