Tag: blog

November 15, 2024

Om Namaha Shivaya
Aaj Ka Suvichaar 🙏🏻🙏🏻

#2462

                      Anokha Maza

Khushkismati maani jaati hai
Agar doobte ko mil jaaye tinke ka sahaara
Hum Guruji kee sangat ko mauka mil raha hai
Ki Unke raajya ke jahaaz mein savaar hokar paayein kinaara
Bhogon ke samundar ka
Paakar ashish Guruvar ka.

Naapa ya tola nahin jaa sakta hai
Is mubarak mauke ka mol
Guruji ne ye mauka daan mein dekar
Hamaari kismat ka har bandd darwaaza diya hai khol.

Har darwaaze kee har dehleez par mil raha hai aur milta rahega kalyaan ka uphaar
Guruji raajya ke samrat Hain, aur hamaare paalanhaar
Hum Unkee praja, Unkee santaan, Unka parivaar
Hamein doobne se bachaayein Ve taral taaranhaar.

Bhogon ke is bhavsaagar kee gehraayee
Guruji kee vadiyaayee ke mukaabale mein kuch bhi nahin
Guruji kee mahima toh hai aisee aparampaar
Ki Unke saamne na ke baraabar hai bhogon ke is samundar ka vistaar.

Isliye kyun ghabraayein hum is samundar kee gehraayee se
Kyun vichalit hon hum iske vistaar se
Kyun na ismein tayrne kee koshish ke dauran
Guruji sangg judey rehne ka prayaas karein seedhi taar se.

Paramatama se khud kee rooh ke rishte kee baat hai aakhirkaar
Ve sumat bakhshein ki Unkee har ichcha ho hamein sweekaar
Raazi rahein agar usmein jo ho Unkee raza
Toh bhavsaagar ke safar ka aa jaayega anokha mazaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anokha Maza (11/15/2024)

November 14, 2024

Om Namaha Shivaya
Aaj Ka Suvichaar 🙏🏻🙏🏻

#2461

          Hamaari Arzi, Unkee Marzi

Kuch nahin chhipta Guruji se
Sab lete Hain Ve dekh
Kuch nahin namumkin Unke liye
Ve dobaara likh sakte Hain sabke saare lekh.

Guruji maalik Hain srishti ke
Kisee ke hukm ke nahin Ve mohtaaj
Phir bhi sabke lekh ka alag hota hai ilaaj
Aksar aasaan nahin hota kisee kisee bhakt ka aaj.

Aaj, yaani ki aaj ka samaa
Jo kashton mein hota hai ramaa
Jismein Guruji nishchay hee dete Hain panaah
Par lagta hai kasht hotey jaa rahe hain jamaa.

Darasal Guruji ko hee hai gyat
Hamaare pichhle karmon kee har baat
Ve shubhchintak Hain hamaare
Chaahein ki karmon ka bhugtaan ho jaaye isee janam mein Unke sahaare.

Is satya ko maan lena nahin hai aasaan
Ki Guruji kee kripa se ho raha hai abb bhi kalyaan
Par yahee toh hotey hain imtehaan
Jinke dwaara Unke dwaara parkhe jaate hain hum insaan.

Guruji hee bakhsh sakte Hain veh vishwaas
Jo mushkil samay mein na tootne dega aas
Ve hee bakhsh sakte Hain hamaare gunah
Dete huey hamein Apni paawan panaah.

Jinhonei sainkdon ko taara hai
Anginat bhakton ka janam sanvaara hai
Unhee Shivroopi Guruji ne hamein jo apnaaya hai
Toh hamaara uddhaar nishchay hee Unhonei shuru karaaya hai.

Unmein hee hai sampoorna paraakram
Aur kisee mein nahin
Isliye Ve jo bhi karenge hamaare liye
Nishchit hai ki veh hoga sahi.

Hamaari har arzi se kaheen zyada mainey rakhti hai Guruji kee marzi
Isliye jo aur jaisa bhi hai kalyaan karne ka Unka andaaz
Buss, Ve kabhi bhi na hon humse naaraaz
Humse prasann rahein Ve gareeb nawaaz.

Aise karunanidhaan kalyaankaari param pita ko shat shat naman
Unn pyaare Deenanath Guruvar ke kamal charnon mein hai vandan
Ki kabhi na honei dein Unpar hamaare vishwaas ka khandan
Aur hamaari arzi anusaar nahin, balki Apni marzi anusaar Ve sanvaare hamaara janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hamaari Arzi, Unkee Marzi (11/14/2024)

November 13, 2024

Om Namaha Shivaya
Aaj Ka Suvichaar 🙏🏻🙏🏻

#2460

Naam Ke Roop Mein Sada Meri Rasna Par Basna

Param poojya Guruji Maharaj,

Naam ke roop mein sada meri rasna par basna Aap
Gyan ke roop mein viraajmaan rahiye mere girebaan mein
Noor ke roop mein mere antas mein jaayiye yoon bass
Ki ruhaaniyat ke roop mein mere shwaas shwaas mein ho Aapka vaas.

Aapki khushboo se mehekti rahe meri rooh
Aapke ruhaani sparsh se milta rahe haardik harsh
Aapki prerna jagaaye rakhe meri chetna
Aapki mamta badhaati rahe meri kshamta.

Aapki chhavi ke karzdaar hain chaand aur ravi
Har roop se prataapi aur sundar Aapka har swaroop anoop
Aap itne dayalu ki aur koi nahin Aap jaisa kripalu
Aap sarvshaktimaan, Aap sabse mahaan, Aap hee Pradhaan.

Aapki sharan mein hota rahe jabb takk hona hai janam maran
Rakh kar mujhe Apne hee dar par rakhe rahiyega Apna haath mere sir par
Aapke diye har daan aur vardaan mein hee hai mera kalyaan
Mai agyani anjaan, Aap swayam Bhagwaan.

Guruji, Aapki yaad mein beeta har pal hota hai safal
Arzi hai ki mere jeevan ka koi bhi pal na ho vifal
Yaani ki har pal ko karey aabaad Aapki madhur yaad
Pyaare Guruji, sada meri fariyaad sunn-ne ke liye Aapka dhanyawaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Naam Ke Roop Mein Sada Meri Rasna Par Basna (11/13/2024)

November 12, 2024

Om Namaha Shivaya
Aaj Ka Suvichaar 🙏🏻🙏🏻

#2459

                      Meher Aapki

Param poojya Guruji Maharaj,

Maalik mere, meher Aapki
Marham hai mere har santaap kee
Aapki daya, Aapka dulaar
Dete hain mujhe prerna baarambaar
Chunautiyon ke baavajood chalte rehne kee
Pratikool paristhitiyan sehne kee.

Maalik mere, Aapki sharan milee jabb se
Mere naseeb kee ghadi kee sui yoon hilee tabb se
Ki meri zindagi ka har pal hua Aapke hukm ka mohtaaj
Har pal par, har ghadi par, har peher par hota hai Aapka raaj.

Iska ehsaas ek baar nahin, balki hota aaya hai anginat baar
Isliye waqt achcha lagey ya nahin, seekh rahi hoon usey karna sweekaar
Maan kar isey Aapki ichcha
Kyunki Aapki ichcha ka parinaam hee sabse achcha.

Aapki sharan mein mujhe lagta rahe har vela suhela
Aisa bodh ho mujhe, mere daata
Mujhe kabhi bhi na mehsoos ho akela
Itna gehen ho Aapse mujh nacheez ka naata.

Maalik mere, paakar Aapki meharbaani
Sanvar gayi hai meri zindagaani
Bante bante Aapki deewaani
Dhanya hui hoon mai nimaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meher Aapki (11/12/2024)

November 10, 2024

Om Namaha Shivaya
Aaj Ka Suvichaar 🙏🏻🙏🏻

#2457

          Dhaaga Paawan Pyaar Ka

Dhaaga paawan pyaar ka
Bandhaa Guruji ke sangg
Unkee kripa bin ye thaa namumkin
Aise hain Guruji ke rangg.

Kehne ko ye dhaaga hai adrishya
Par ismein shakti ka pramaan hai anant
Is dhaage mein lacheelapann toh hai
Par saath mein ismein hai dridhta beantt.

Banaa hai is dhaage dwaara
Guruji sangg naata bhakt kee rooh ka
Is dhaage par saurabh hai anokha
Guruji kee ruhaani khushboo ka.

Tabhi toh paawan pyaar ka ye bandhan
Guruji sangg bhakt ko jodey rakhta hai
Jitne bhi imtehaan hotey rahein bhakt ke
Ye dhaaga bilkul bhi nahin thakta hai.

Ye toh Guruji kee vadiyaayee hai
Ki is pyaar ke dhaage ko milta hai mahatva itna
Ve jaante Hain ki bhakt kitne naadaan hain
Aur unhe chaahiye hota hai dilaasa kitna.

Is anupam dhaage ke bal pe
Guruji ke dikhaaye raaste par chal ke
Guruji kee praapti ka uddeshya hoga jo poora
Toh phir koi bhi armaan na rahega adhoora.

Guruji se juda rahe rooh ka naata
Saaf hota rahe karmon ka khaata
Har bhakt is pyaar ke dhaage mein piroye atoot aitbaar
Guruji har bhakt ko dete rahein ashirwaad baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhaaga Paawan Pyaar Ka (11/10/2024)

November 8, 2024

Om Namaha Shivaya
Aaj Ka Suvichaar 🙏🏻🙏🏻

#2455

          Saahil Hain Ve Itne Sundar

Saahil Hain Ve itne sundar
Khud hee Hain Ve aseem samundar
Jinkee gehraayee ka koi antt nahin
Guruji toh Ishwar Hain, Ve kewal santt nahin.

Unhee kee hai naiya
Ve hee Hain khivaiya
Thaamte Hain patvaar
Lekar chalte Hain uss paar.

Unkee dee hui daat hai satsang
Sikhaate Hain Ve jeene ka dhangg
Sewa aur simran ke dwaara
Nikhaarte Hain bhakt kee atma ka rangg.

Param pita Hain Ve swayam
Unkee santaan hum
Koi bhi sangat nahin anath
Kyunki Guruji Hain har ek ke saath.

Unhee kee mamta
Unhee kee kshamta
Unhee kee chalni hai marzi
Unhee se karni hai arzi.

Unhee kee raza mein kalyaan
Unhee ke kiye kalyaan se kaayam hain praan
Unhee kee daya kee dastaan
Sansaar ko sunaaye Unkee har santaan.

Na thaa, na hai, na Unke jaisa hoga koi kabhi bhi
Unkee toh har leela hai adbhut aur anokhi si
MahaShiv Hain param poojya Guruji Maharaj
Ve kal thei, kal bhi hongei, aur Ve hee sampoorna srishti ke sartaj Hain aaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saahil Hain Ve Itne Sundar (11/08/2024)

November 7, 2024

Om Namaha Shivaya
Aaj Ka Suvichaar 🙏🏻🙏🏻

#2454

                        Ye Safar

Karma kiye jo humne har pichhle janam mein
Guruji unhe katvaayein dekar hamein jageh Apni sharan mein
Maaf kar dein hamaare kayi karmon ke parinaam
Ya phir kayion ko badal kar de dein hamein vardaan
Ya phir aisee mauj mein aa jaayein
Ki uss se bhi zyada bakhshishein dene par aayein
Aise Hain Guruji Maharaj hamaare
Shukr hai ki Ve Hain bakhshanhaar hamaare.

Varna toh hum galatiyon ke putale, hum agyani
Hamein ye zindagi raas nahin thi aani
Doojon kee toh baat hee kya hai
Swayam ko hee sataati hamaari apni naadaani.

Lekin Guruji Maharaj Hain taaranhaar
Ve har haalaat mein kar rahe hotei Hain hamaara uddhaar
Ye satya khud ko yaad dilaana hoga baar baar
Varna lagega ki hamein dekh nahin rahe Ve paalanhaar.

Is janam mein hum aaye hain
Lekar na jaane kitne pichhle janmon ka bhaar
Aur hamaare kalyaan hetu Shivroopi Guruji ne
Liya bashar roop aur dharti par aaye Ve avatar
Taaki hamaare paapon ka aur kashton ka ho nivaaran
Chaahe unka ho jo bhi kaaran.

Aise mein jaisi bhi ho haalat
Jaise bhi hon haalaat
Kaise na karein Unn Guruji ka dhanyawaad
Jinse mil rahe Hain har pal hamein anekon ashirwaad.

Kya maalum kis pal mein honi thi koi durghatna
Ya phir gherna thaa kisee beemaari ya badnaseebi ne
Kya maalum kabb apne ya kisee apne kee jaan par bann aani thi
Ya phir sataana thaa bhautik gareebi ne?

Beshak jeevan mein kasht hon anek
Leki tayy hai ye satya ek
Ki Guruji kar rahe Hain kalyaan hamaara
Ve Hain hamaara atoot akhand sahaara.

Shukrana Guruji Maharaj ka
Shukrana beete kal aur aaj ka
Shukr uss aane wale kal ka
Shukrana har ek pal ka
Shukrana hai har shwaas ka
Shukrana is vishwaas ka
Shukrana hai har baat ka
Shukrana har haalaat ka.

Jaise jaise waqt kee dhaara bahe
Ye das pehle se bhi zyada shukrana kahe
Hriday mein shukrana hee shukrana rahe
Ye safar shukrana ka anmol afsaana rahe.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Safar (11/07/2024)

November 5, 2024

Om Namaha Shivaya
Aaj Ka Suvichaar 🙏🏻🙏🏻

#2452

Ginte Ginte Sitaaron Ko

Ginte ginte sitaaron ko
Subah ho jaati hai aksar
Lekin agar roshni aaye hee nahin nazar
Toh sochna ki haalaat ka hai ye asar
Uss mann par, jo abhi hai kamzor
Isliye uspar chalta hai haalaat ka zor.

Varna har subah sooraj toh uday hai hota
Aur beshak vo kabhi baadal ya ghata mein hai khota
Uska wajood nahin chhup paata
Kyunki vo roshni hai phailaata.

Nazar bhi chaahiye roshni ko dekh paane wali
Varna kaise dikhegi roshni niraali
Yogya hon mann aur nazar
Iske liye mil jaaye jo Guruji se var
Toh bhaagya jaaye sanvar
Sakaraatmak soch vichaar dwaara
Paakar Guruji ka sahaara.

Yahee toh hai vo roshni jo zaroori hai aani nazar
Aur isliye anivaarya hai Guruji kee nadar
Varna hum sitaare ginte reh jaayenge
Aur subah ke lakshan na dikh paayenge.

Guruji bakhshein sumat, shakti, aur simran
Taaki swasth, sthir, sashakt hota chale mann
Roshni dikhtee rahe andhere mein bhi
Beshak chhoti si kiran hee sahi.

Kiran se kiran judti jaayegi
Sunehri subah dikh jaayegi
Guruji ke chintan mein
Sudh budh na rahegi sitaare ginte rehne kee
Zaroorat na mehsoos hogi
Kisee aur se kuch bhi kehne kee
Guruji ke sangg hoti rahengi baatein
Chaahe sitaaron se khaali ya khilee hongi raatein
Kyunki roshni dikhtee jaayegi Guruji kee meher se
Har peher safar sajta rahega seher se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ginte Ginte Sitaaron Ko (11/05/2024)

November 3, 2024

Om Namaha Shivaya
Aaj Ka Suvichaar 🙏🏻🙏🏻

#2450

           Kahaani Ek Deewaane Kee

Ye kahaani hai ek deewaane kee
Jisey parvah na thi zamaane kee
Kyunki vo apne Guruji ke nashe mein jeeta thaa din raat
Uske jeevan ka har pal guzarta thaa Guruji ke saath.

Guruji ne diya usey abhay daan
Satsang simran dwaara usey milta raha gyan
Dheere-dheere gehra hota gaya uska dhyaan
Guruji karte rahe uska kalyaan.

Itnee prataapi thi Guruji kee maujoodagi ruhaani
Ki Unke noor se prakashit hoti rahi deewaane kee zindagaani
Yoon judi thi Guruji sangg uskee rooh kee taar
Ki dono ke beech chalti thi baat lagaataar.

Is ruhaani baat cheet ka anand aata thaa deewaane ko
Beshak kabhi kabhi Guruji se gambhir aadesh bhi milta thaa nimaane ko
Apni dinacharya ke kaam sambhaalte huey
Swayam ko Guruji ke bataaye saanche mein dhaalte huey
Deewaana santusht rehta thaa
Guruji ke prem bhaav mein behta thaa.

Bandagi mein na rakhta thaa vo koi vehem
Kumm hota chala thaa Guru kripa se uska ahem
Anekon kasht vo kar paata thaa sehen
Guruji ka thaa uspar bahut rehem.

Guruji kee kripa se kathin hotey chaley uske imtehaan
Guruji kar rahe thei kalyaan, veh gaya thaa jaan
Usey hoti jaa rahi thi apne uddeshya kee pehchaan
Khatm ho rahe thei uske duniyavi armaan.

Kaisa thaa is deewaane ka safar
Ye koi deewaana hee sakta hai jaan
Jis jis par ho jaaye Guruji kee aisee meher
Deewaana bann sakta hai har vo insaan.

Bahut raas aaye aisee deewaanagi
Is deewaanagi mein hai Guruji kee bakhshindagi
Aisee deewaanagi se sanvar jaaye zindagi
Guruji ke bahut kareeb le aaye bandagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kahaani Ek Deewaane Kee (11/03/2024)

November 2, 2024

Om Namaha Shivaya
Aaj Ka Suvichaar 🙏🏻🙏🏻

#2449

     Aapki Rehmat, Aapki Mohabbat

Param poojya Guruvar,

Meri kee hui ibadat kuch nahin
Aapki rehmat hee hai sab kuch
Meri kee hui khidamat toh kuch nahin
Aapki mohabbat hee hai sab kuch.

Aapke charnon ke taley kee dhool jitnee bhi nahin hai meri aukat
Aur phir bhi Aapne dee hai Apne aanchal kee suraksha kee saugat
Kaise na rahoon pal pal mai Aapki shukrguzaar
Saraahati hee jaaoon mai Aapka pyaara pyaar.

Mere liye toh Aap sabse jyeshth Guru roopi vyakti Hain parivaar mein
Aap sabse prataapi shakti Hain sansaar mein
Aap hee Araadhya Hain mere, Aap Hain mere sachche meet
Jis bhi roop mein jaanoon aur maanoon, Aapse laagi hai preet.

Dukh Aapka deeya nahin hai
Par Aapse hee hai sukh saara
Jabb se jaana ki yahee sahi hai
Tabb se ye rishta laagaa aur bhi pyaara.

Ye swaarth hai ya deewaanapann, mai na jaanoon
Par Aap toh jaanein sab kuch
Meri avikasit tuchh soch kuch nahin
Aapki vaddi vadiyaayee hai sab kuch.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Rehmat, Aapki Mohabbat (11/02/2024)