Tag: blogs

January 13, 2025

Om Namaha Shivaya
Aaj Ka Suvichaar 🙏🏻🙏🏻

#2521

    Andhere Par Tum Dhyan Na Do

Andhere par tum dhyan na do
Dhyan dharo uss jyot par
Jo tumhaare bheetar rahi hai jal
Jisey Guruji kee divyata karti hai ujjwal.

Guruji Hain adi aur anant
Unkee divya jyot hai akhand
Is akhandata kee shakti hai itnee prabal
Ki iske samaksh kamzor hai baaki har bal.

Kitna bhi gehra ho andhera
Vo jyot ko na bujha paaye
Lekin jyot kee ek kiran se
Poora andhera khatm ho jaaye.

Is jyot ka astitva hai prataapi itna
Ki jitna badhe vishwaas, ye prabal ho utna
Ye kewal antakaran ko hee nahin, balki rooh ko roshan kar de sada ke liye
Jitnee mahima gaaoge Guruji kee, is jyot se jal jaayenge utne aur deeye.

Guruji kee kripa se hoga ye anjaam
Ki sabhi ke bheetar hoga Guruji ka naam
Divyata kee jyot sabke bheetar hogi prajwalit
Aur sabhi ke bheetar ka andhera jaayega mitt.

Bheetar hoga jabb prakash
Toh roshan hongei baahari zameen aur akash
Na karni padegi roshni kee vyakul talaash
Na jakad paayega mann ko koi bhi paash.

Isliye is jyot par dhyan dharte huey
Guruji ka chintan karte huey
Andhere kee honei do vidaayee
Sweekaarte huey Guruji kee vaddi vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Andhere Par Tum Dhyan Na Do (01/13/2025)

January 12, 2025

Om Namaha Shivaya
Aaj Ka Suvichaar 🙏🏻🙏🏻

#2520

Uss Oonchaayee Kee Oar

Guruji ke hukm par hee chalte aur rukte
Guruji ke charnon mein mann se jhukte jhukte
Tu badhta jaa uss oonchaayee kee oar
Jahaan khatm hota hai vyakulta ka shor.

Bhautik tark vitark se alagg
Hai uss oonchaayee ka jagg
Vahaan nahin hai ashanti aur unmaad laukik
Vahaan ka spandan hai alaukik.

Ye oonchaayee hai ruhaani
Jis se nikhar jaayegi zindagaani
Isey chaahe bheetar se har praani
Chaahe usey ye samajhne na de uskee naadaani.

Jeete jee tu pahunch sakta hai is oonchaayee par
Guruji kee yaad mein rehta chalega agar
Unka chintan tujhe duur rakhega har vikarshan se
Aur tu ruhaani oonchaayee kee oar badh paayega ekaagra mann se.

Uss oonchaayee kee hawaa
Vo hogi tere har marz kee dawaa
Vo hawaa hogi taaza aur taral
Jis se tujhe mehsoos hoga nirmal aur sheetal
Vahaan bhi barasti rahegi Guruji kee mamta komal
Aur saarthak ho jaayega tere bheetar ka asht-dal kamal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Uss Oonchaayee Kee Oar (01/12/2025)

October 18, 2024

Om Namaha Shivaya
Aaj Ka Suvichaar 🙏🏻🙏🏻

#2434

               Safar Kee Ghadiyan

Jabb raaste par ho makhmali ghaas
Aasaan hota hai chalna
Lagta hai ki bin ghadi dekhe hee
Palak jhapakne se pehle hee beet jaati hai har ghadi
Aur jabb raasta ho pathreela
Mushkil hota hai chalna
Aisa lagta hai ki ghadi kee ghadiyan beet jaane par bhi
Apni gati ruk kar vaheen kee vaheen hai khadi.

Har ghadi mein hotey hain ek jitne hee pal
Par mushkil paristhiti mein lagta hai aisa
Ki aane mein bahut der kar raha hai aane wala kal
Aur aise mein bahut zaroori hai manobal.

Isliye jo aa rahe hon raaste mein pathar
Toh awashya pichhle karmon ke phal de rahe hain takkar
Lekin Guruji tere angg sangg Hain har ghadi
Ye sachchaayee hai sabse badi.

Aur jo aa rahi hai paaon ke neeche makhmali ghaas
Toh yaad rakhna zaroori hai ye baat khaas
Ki kabhi bhi ubhar sakta hai koi pathar raahon mein
Jo rukaavat bann sakta hai tere chalte paaon mein.

Isliye jaise bhi tu har ghadi raha ho guzaar
Chaahe jaisi bhi mehsoos ho rahi ho waqt kee raftaar
Chaahe makhmali ghaas ho ya mil rahe hon pathar baar baar
Tu Guruji ka shukrana karta chal baarambaar.

Saath hee Unse bakhshish maang har kadam par
Tu Guruji par yakeen kar
Ye hai kalyaan ka dar
Jaisa bhi hoga tera safar
Is satya mein santosh kar
Ki Guruji kee meher sada rahegi tujh par.

Beet jaayengi safar kee saari ghadiyan
Banti jaayengi ve satsang kee ruhaani ladiyan
Aisee hai Guruji Maharaj kee vadiyaayee
Ki tanhaayee mein bhi goonj uthti hai shehnaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safar Kee Ghadiyan (10/18/2024)

October 17, 2024

Om Namaha Shivaya
Aaj Ka Suvichaar 🙏🏻🙏🏻

#2433

         Muskuraa Lo

Muskuraa lo, Guruji Hain tumhaare angg-sangg
Varna na hotei tumhaari zindagi mein aise anokhe rangg
Kyun mushkilon se darr rahe ho
Arey, tum inke dwaara tarr rahe ho.

Jo masti bhi tum kar rahe ho
Jin bhaavnaonmein bhi tum bahe ho
Ye sabb hai Guruji kee rehmat
Unkee raza se raho sehmat.

Bin jaane Guruji kee leela ke raaz
Muskuraahat ko banaa lo apna andaaz
Kyunki raaz toh raha aane se samajh
Balki tark vitark se aur bhi jaaoge tum ulajh
Tumhaare khush rehne se Guruji honge prasann
Is baat par karo manan aur karo Guruji ka anusaran.

Guruji se tum karte raho pyaar
Tumhaare liye Unka pyaar toh hai aparampaar
Unhe prasann rakhna tumhaara bahut zaroori farz hai
Ve tumhaare karmon ka bhaar sambhaal rahe Hain, jinka tum par bahut karz hai.

Aur koi nahin is karz ko utarvaa sakte
Aur Guruji ye sab karte nahin thakte
Maanjo, maanjo, apne mann ka bartan
Muskuraate huey sajaao jeevan ka upvan.

Jabb takk shareer nahin bann jaata hai shav
Hotey rahenge tumhe anekon anubhav
Yaad rakho ki rooh ka safar toh rahega jaari
Jabb takk aati nahin Param pita mein samaa jaane kee baari.

Isliye har din rooh ko karo tayyaar
Kar ke rooh ka poshan
Aur Guruji Parwardigaar
Karte rahenge safar ko roshan.

Is baat mein kitnee raahat hai
Kyunki yahee toh rooh kee chaahat hai
Isliye muskuraa lo, Guruji kar rahe Hain tumhaara kalyaan
Muskuraate huey kalyaan ke is vardaan ka karo tum sammaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Muskuraa Lo (10/17/2024)

October 8, 2024

Om Namaha Shivaya
Aaj Ka Suvichaar 🙏🏻🙏🏻

#2424

Sabse Uttam Sthaan

Preet ka geet sunaaoon mai
Apne param poojya pyaare Guruji ko
Unkee agya se meet banaaoon mai
Apne sanaatan sahaare Guruji ko.

Ve Hain sarvkala sampann
Mai Unhe karna chaahoon prasann
Karna chaahoon Unhe samarpan apna mann
Unhee par nirbhar hain meri saansein aur jeevan.

Mai na jaanoon, par Guruji jaanein mere pichhle janmon ke bhi raaz
Nivedan hai Unse ki Ve kabhi na hon mujhse naaraaz
Ve hee Hain jo bin mere lagaaye awaaz
Sunn lete Hain meri har dukhti rugg ka saaz.

Unka Shukrana karti na thakoon
Unka jitna stavan kar sakoon
Karti rahoon din raat
Toh vo bhi hogi saugat.

Kyunki bin Unkee nadar ke
Na soch paaoongi alfaaz kadar ke
Na dhoondh sakoongi lafz Unkee meher-e-nazar ke
Jo Hain jeevan daata mere safar ke.

Ekaagr rahega chitt Guruji ke khayaalon mein
Toh duur rahega vyarth ke sawaalon se
Guruji ka hai jeevan mein param mahatva
Baaki duniyadaari mein toh nibhaana hai kartavya.

Guruji se hai arzi ki unn kartavyon kee poorti mein mujhse chook na ho
Jo mere liye achcha nahin, uskee mujhe pyaas ya bhookh na ho
Guruji mein lagi rahe aisee lagan
Ki har shwaas rahe buss Unmein hee magan.

Guruji se hee hai sab kuch
Apna astitva toh kuch bhi nahin
Jaise bhi rakhein buss rakhein Ve Apni sharan mein
Sabse uttam sthaan hai vahee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabse Uttam Sthaan (10/08/2024)

October 5, 2024

Om Namaha Shivaya
Aaj Ka Suvichaar 🙏🏻🙏🏻

#2421

Aap Swayam Hain Bhagwaan

Param poojya Guruvar,

Aap sada, Aap hee sarvada, Aap hee sundar swami
Aap anant, Aap akhand, Aap antaryami
Aap nirmal, Aap noorani, Aap nirgun
Aap saral, Aap saumya, Aap sagun.

Bhavsaagar mein doobi hum sangat ka
Karne aaye Hain Aap kalyaan
Agyan ke timir mein bhatke houn ko
Dene aaye Hain gyan.

Bolein beshak zyada na Aap
Sunte Hain par sab kuch
Aapki mahaanta hamaari kalpana se kaheen oonchi
Hum aur hamaari soch bilkul tuchh.

Aapki leela hamein na aaye samajh
Dekhte dekhte uljhanein jaati hain sulajh
Kabhi palak jhapakte hee, toh kabhi lagg jaaye der
Par Aap awashya sambhaalte Hain hamaare karmon ka herpher.

Itnee saari hain Aapki rehmatein
Ki chhoti padd jaati hai jholi hamaari
Aapki mahima gaate nahin thakti
Aapki sangat saari kee saari.

Aapki daya ke sahaare hee toh
Chalta hai hum sangat ka guzaara
Bakhshishon ke manohar ratnon se
Sampann hai Aapka dar aur dwaara.

In ratnon se huey hain hum raeees
Kyunki aisa hitkar dhan hai Aapki bakhshish
Jis se bigde kaaj sanvar jaate hain
Aur saubhagya ke kivaad khul jaate hain.

Aapke charnon ke rahein hum bhikshuk
Aapki kripa ke hain hum ichhuk
Grahasth ashram mein rehte huey
Aapki oar hee kendrit rahe hamaara dhyan
Aisee sumat deejiye, deejiye aisa gyan
Ki kabhi na bhoolein ki Aap swayam Hain Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Swayam Hain Bhagwaan (10/05/2024)