February 2, 2026
Om Namaha Shivaya
Aaj Ka Suvichaar 🙏🏻🙏🏻
#2906
Musaafir Ne Suna Thaa…Musaafir ne suna thaa kayi bhakton se
Ki Guruji aksar chand mein dete Hain darshan
Baitha rehta thaa vo Guruji ko yoon dhoondhte huey
Beet jaate thei sainkdon kshan.
Bann sa gaya thaa ye uska swabhaav
Badhta gaya Guruji mein uska prem bhaav
Usey chand mein na dikhe Guruji tabb takk
Parantu Guruji mein uskee shraddha hoti gayi akath
Unkee yaad mein baitha rehta thaa athak
Na jaane kitnee ghadiyon takk.
Usey honei lagaa ehsaas
Ki Guruji se hai uska har shwaas
Aur Guruji Hain uske bheetar
Unke pyaar mein vo rota aur hansta thaa aksar.
Guruji se musaafir ka pyaar badhne lagaa
Jaanaa usne ki koi aur na hai sagaa
Yoon hee guzarte gaye din
Usey ruhaani anubhav huey bhinn bhinn.
Ik raat musaafir leta thaa khatiya par
Dekhte huye aseem aasmaan ko
Khush thaa, gumsum thaa magar
Yaad karte huey apne Guruji mahaan ko.
Aasmaan mein dikh rahe thei chand aur taare
Ik chand aur taare bahut saare
Dekhte huey aasmaan ke sundar nazaare
Vo hua chand kee oar aakarshit
Chaarul si thi chandani
Hriday uska hua pulakit
Guruji dikhey usey chaand mein
Uska har sanshay gaya mitt.
Chand mein dikha usey Guruji ka jo roop
Vo thaa itna saumya aur anoop
Bhar aaye musaafir ke nayyn
Mila uske dil ko adbhut chayyn.
Guruji ne jo ye divya mauka deeya
Uske liye musaafir ne Unka shukrana kiya
Guruji ka chintan karte karte neend aa gayi usey khatiya par
Aur swapn mein Guruji ne usey karaaya chand par safar.
Aane wali subah ne musaafir ko anokhe roop mein paaya
Har aasakti mit chuki thi, sab kuch hua uske liye paraaya
Guruji, Guruji, buss Guruji ko mehsoos karte huey rooh, tann, aur mann mein
Usne baaki ke din bitaaye apne jeevan mein
Jeete jee Guruji mein yoon kho gaya
Ki jeete jee Guruji ka ho gaya
Antim vele panch bhoot mein mil gayi uskee kaaya
Aur Guruji mein uskee rooh ka kann kann samaaya.
🌹🌹🌹🌹🌹🌹🌹
Jai Guruji 🙏🙏
Dhirja
Musaafir Ne Suna Thaa… (02/02/2026)
Aaj Ka Suvichaar 