Tag: poetry

Baithi Thi Guruji Kee Daasi (01/15/2026)

dhirjabhatLeave a comment

January 15, 2026

Om Namaha Shivaya
Aaj Ka Suvichaar 🙏🏻🙏🏻

#2888
           Baithi Thi Guruji Kee Daasi

Baithi thi Guruji kee daasi
Atithi bannkar gayi thi jahaan
Mann mein thi ajab si udaasi
Phir ek manohar drishya dikha vahaan.

Jis kursi par baithi thi daasi
Saamne ik darpan thaa paas hee
Shaayad vo kamre kee shobha badhaane ke liye thaa vahaan
Lekin uss darpan mein dekh kar daasi ko hua harsh mahaan.

Darpan mein se dikh raha thaa usey Guruji ka swaroop
Jo uske peechhe deewar par thaa sushobhit
Usey lagaa ki Guruji usey dekh rahe Hain
Aur prafullit hua uska chitt.

Dekhti rahi darpan se
Vo Guruji ko bade pyaar se
Vo darshan daasi ko le chale
Bahut duur is sansaar se.

Baithi hui mezbaan ke ghar par
Veh chal padi Guruji ke sangg safar par
Ek sundar se vann mein
Mann hee mann mein.

Guruji tezi se thei chal rahe
Daasi peechhe peechhe daudi
Guruji toh sarvgyani Hain
Unhonei uskee oar nigah modi.

Daasi ne choome Guruji ke charan
Guruji ne usey diya ashirwaad
Phir Guruji baithe ik taruvar ke paas
Aur daasi ko bakhsha ik anubhav khaas.

Guruji ne oopar kiya Apna ik haath
Unke chehre ka rangg badla saath saath
Guruji ne prakat kiya sachkhand ka prasad
Aur daasi ko vo dete huey deeya ashirwaad.

“Kalyaan kitta,” Guruji ne kaha
Bhaav se bharpoor daasi ne jo jo thaa saha
Vo sab Guruji ko toh thaa pataa
Unkee kripa se uska har kasht kataa.

Tabhi daasi ko mehsoos hua
Ki kisee ne usey chhua
Uske kareeb thaa mezbaan
Aur vo thi uskee maujoodagi se anjaan
Phir daasi kee chetna pahunchi vaapis vahaan
Atithi bannkar baithi thi vo jahaan
Kintu abb kee baar
Uske chehre par thaa ruhaani nikhaar
Itna, ki mezbaan ne jabb usey chai se bhara cup deeya
Toh usne daasi se poochh hee liya
Ki kya thaa uske noor ka raaz
Aur bhaav vibhor daasi kee niklee hee nahin awaaz.

Daasi ne Guruji ke swaroop kee oar dekha aur muskuraayi
Samjha nahin sakti thi ki unn lamhon mein usne kya saugat thi paayi
Tabhi mezbaan ko kamre mein Guruji kee divya khushboo aayi
Abb veh bhi khushi se phooli na samaayee.

Aisee hai Guruji Maharaj kee leela
Jo Unkee marzi se hoti hai sangat par
Aur har bhakt ke sangg hai Unka anokha rishta
Har bhakt par barasti hai Unkee meher.

Bhinn hon sangat ke anubhav beshak
Ya phir kisee kisee ke hon ek samaan
Guruji Hain saari sangat par meharbaan
Karte Hain Ve sabhi ka kalyaan.

🌹🌹🌹🌹🌹🌹🌹

Jai Guruji 🙏🙏
Dhirja

Baithi Thi Guruji Kee Daasi (01/15/2026)

Har Din Kee Shuruaat (11/27/2025)

dhirjabhatLeave a comment

November 27, 2025

Om Namaha Shivaya
Aaj Ka Suvichaar 🙏🏻🙏🏻

#2839
               Har Din Kee Shuruaat

Shukrana se ho har din kee shuruaat
Shukrana hee shukrana karoon mai din raat
Shukrana se shuru aur usee par khatm ho har baat
Guruji Maharaj, mujhe deejiye aisee daat.

Mera shukrana kar leejiye qubool
Maafi ki kabhi shukrana karna jaati hoon bhool
Meri gaflat par parda daalne ka shukrana
Sweekaariye kripa kar shukrana ka nazraana.

Shukrana karna yaad dilaane ka shukrana
Har kadam par jeena sikhaane ka shukrana
Apne gireban mein jhaankne kee prerna ka shukrana
Jaagrit rehne kee chetna ka shukrana.

Yoon toh sabhi alfaaz kumm hain
Shukrana bayaan karne ke liye
Par Aapka shukrana karti rahoon
Ki Aapne zehen mein alfaaz hain deeye.

Aapki dee har daat ka shukrana
Jo na mila uske liye aur bhi shukrana
Mujhe sada Apni dekh rekh mein rakhne ka shukrana
Shukrana ki mujhe shukrana ke liye dhoondhna nahin koi bahaana.

Kyunki shukrana se hee hai har muskuraahat kaayam
Beshak raasta sakht ho ya ho mulaayam
Shukrana hee sur rahe meri bandagi ka
Shukrana hee saaz rahe meri zindagi ka.

Jagaane ka aur sulaane ka shukrana
Thakoon phir bhi chalaane ka shukrana
Har muskuraahat ka shukrana, har aansoo ke liye shukrana
Is tann mann ka shukrana, is rooh ke liye shukrana
Jo Aapka hee hai hissa
Aur poorna karti hai meri ruhaaniyat ka kissa.

Vastra, sir par chhat, aur bhojan ka shukrana
Mere jeevan mein jo aaya hai aur aayega, har uss jann ka shukrana
Shukrana is prakriti ka
Shukrana Apni preeti ka
Shukrana Apni ruhaani mehek ka
Shukrana har panchhi kee chehek ka.

Shukrana ghar parivaar ke har sadasya ka
Shukrana Aapke bakhshe har kartavya ka
Shukrana karma karvaane ka
Shukrana karma katvaane ka
Shukrana har shwaas ka
Shukrana is vishwaas ka
Jiske bal par shukrana kar rahi hoon Aapka
Shukrana har uss dukh santaap ka
Jo laata hai mujhe Aapke aur bhi kareeb
Shukrana ki mai hoon itnee khushnaseeb.

Shukrana itnee barkat ka
Shukrana har uss beete sankat ka
Jo Aapki meher se aakar khatm hua
Shukrana ki Aapka aisa hukm hua.

Shukrana Apne sangg ka
Shukrana sewa aur satsang ka
Shukrana simran aur dhyan ka
Shukrana Aapse judey rehne ke armaan ka
Shukrana dene ka maat-pita ka pyaar
Shukrana dene ka meet roopi deedar
Shukrana Apni divyata ke ehsaas ko dilaane ka
Shukrana bin jataaye dhanwaan banaane ka
Shukrana is insaani deh aur is anmol jeevan ka
Shukrana Guru shishya ke is paavan amulya bandhan ka.

🌹🌹🌹🌹🌹🌹🌹

Jai Guruji 🙏🙏
Dhirja

Har Din Kee Shuruaat (11/27/2025)

Paudha, Titlee, Taruvar (10/02/2025)

dhirjabhatLeave a comment

October 2, 2025

Om Namaha Shivaya
Aaj Ka Suvichaar 🙏🏻🙏🏻

#2783
            Paudha, Titlee, Taruvar

Ik nanhi si niraali titli
Subah subah sayyr ke liye nikli
Idhar udhar mandaraate huey
Guruji ke naam kee dhun gungunaate huey.

Dhoop aur chhaaon ka khel chal raha thaa raahon par
Hawaa ka sparsh titli ko mehsoos ho raha thaa apni baahon par
Yahaan se vahaan dolte huey
Mann hee mann ‘Jai Guruji’ bolte huey
Titli kee padi ik chhote se paudhe par nazar
Jo pichhlee baar usne na dekha thaa udhar.

Titli gayi uss chhote se paudhe ke paas
Dekha usne ki uss paudhe par suraksha thi khaas
Kyunki veh thaa ik vishal taruvar ke paaon mein
Aur anand le raha thaa uss taruvar kee chhaaon mein.

Titli ke mann mein aaya vichaar
Ki Guruji Maharaj Hain taruvar kirpadhaar
Jis bhakt ko lete Hain Apni sharan mein
Usey poshit honei ka mauka dete Hain Apne charan mein
Bilkul is vishal taruvar kee tareh
Jisne dee uss chhote paudhe ko nikharne kee jageh.

Guruji ke aanchal ke taley
Jo bhi bhakt samarpit hokar paley
Uska ho jaaye kalyaan
Jaise harey patte baney uss chhote paudhe kee pehchaan.

Titli uss din ke baad
Vaheen tehelne aati rahi aksar
Dekhkar paudhe par taruvar kee mamta ka asar
Veh taruvar ka shukrana karti jhuka kar sir.

Taruvar kee paudhe par rahi daya
Paudha bada hota gaya
Dekh kar usey harey bharey patton se alankrit
Muskuraata thaa titli ka chit.

Guruji ka shukrana anant
Ki dete Hain Ve bhakton ko mamta beantt
Karte Hain Ve poshan hamaara
Taaki hamaare jeevan mein ho haraa-bharaa ujiyaara.

Hum hee hain vo chhote paudhe Guruji ke charnon mein pal rahe
Guruji kee paawan meher se hamaare kasht aur paap hain tal rahe
Guruji karte Hain hamaari raksha taaki hum rahein harey bharey
Ve Hain vo vishal taruvar jo hamaare liye itne tufaanon se Hain ladey
Dete Huey hum paudhon ko unnat honei ka bal
Kal bhi Guruji thei, Ve aaj bhi Hain, aur Ve hee hongei kal.

🌹🌹🌹🌹🌹🌹🌹

Jai Guruji 🙏🙏
Dhirja

Paudha, Titlee, Taruvar (10/02/2025)

Daasi Ka Naseeb (09/08/2025)

dhirjabhatLeave a comment

September 8, 2025

Om Namaha Shivaya
Aaj Ka Suvichaar 🙏🏻🙏🏻

#2759
     Daasi Ka Naseeb

Titlee mandaraati hui niklee
Moar ne machaaya shor
Guruji ke aane kee khabar milee
Daasi hui bhaav vibhor.

Hawaayein jhoomne lagi
Patton ko choomne lagi
Patton ne khushi se kee sarsaraahat
Utne mein aayi raunak kee aahat.

Guruji Maharaj aaye
Apne sangg kuch sangat laaye
Guruji sangat ke saath ik taruvar ke sameep ruk gaye
Uss taruvar ke patte sangat sangg naman mein jhuk gaye
Na jaane kahaan se koi kursi laaya
Aur Guruji ko aadar se uspar baithaaya.

Guruji ka swaagat kar rahi thi sheetal ghaas
Sangat bhi baith gayi Guruji ke aaspaas
Daasi dekhti reh gayi
Prem bhaav mein beh gayi.

Do sangat ko Guruji ne dee sewa Apne charan kee
Do sangat ko bheja paas ke dhaabe par
Bhejne se pehle unke kaan mein Guruji ne kuch kaha
Haami milaate huey unhonei maana Guruji ka kaha.

Phir do sangat ko Guruji ne kiya khada
Ek ka kadd chhota thaa, ek ka thaa thoda bada
Guruji ke kehne par unhonei sunaaye Guruji ke satsang
Dekhte dekhte vaatavaran par chhaa gaya Guruji kee mahima ka rangg.

Jabb gayi hui sangat dhaabse se laut kar aayi
Apne haathon mein khoob saare paranthe aur chai laayi
Guruji ne Apna ashish diya aur sangat ko diya vo prasad
Saari sangat ko mila Guruji ka ashirwaad.

Daasi thi anjaan
Par Guruji toh Hain jaan-e-jahaan
Unhonei ik sangat ko bhej kar daasi ko bulvaaya
Daasi itnee khush hui ki usey kuch samajh na aaya
Usne aakar Guruji ka kiya naman
Guruji ne usey chhoone diye Apne kamal charan
Phir usey bhi mila prasad
Usne kabhi khaaya na thaa kuch bhi itna swad.

Satsang sunte sunaate huey
Sangat baithi rahi Guruji ke paas
Aisa prateet hua daasi ko
Ki aayi khushboo khaas.

Guruji usey dekh kar muskuraaye
Phir ek sangat se khushboo se judey satsang sunvaaye
Daasi ko honei lagaa ehsaas tabb
Ki ye saadhaaran mahapurush nahin Hain, ye toh Hain Rabb.

Daasi kee aankhon mein aaye prem bhaav ke aansoo
Guruji kee Prabhuta ne uskee rooh ko liya chhoo
Guruji kee kripa se daasi bhi hui satsang mein shaamil
Guruji ke anugraha se daasi ka naseeb gaya khil.

🌹🌹🌹🌹🌹🌹🌹

Jai Guruji 🙏🙏
Dhirja

Daasi Ka Naseeb (09/08/2025)

Pahuncha Ek Bhakt (07/01/2025)

dhirjabhatLeave a comment

July 1, 2025

Om Namaha Shivaya
Aaj Ka Suvichaar 🙏🏻🙏🏻

#2690
              Pahuncha Ek Bhakt

Pahuncha ek bhakt Guruji ke dwaar par
Shuru hua uska Guruji kee sharan mein safar
Aayiye sunein aur jaanein uske judne ka satsang
Kaise Guruji ho gaye uske angg sangg.

Guruji se milne ko bhakt thaa bekaraar
Ek din aakhir Guruji ne bulaa liya usey Apne dwaar
Apne sheher se nikal pada vo jaise hee sooraj uday hua
Raaste mein har kiran ne uske saath honei ke liye uska daaman chhua.

Kintu uske aagey chalte chalte
Kirnein peechhe gayin chhoot
Ve saath nahin jaa paayin uske
Unka dil toh gaya toot.

Veerane mein dikhne lagi bhakt ko hariyaali
Dil kee dhadkan tez hui aur uskee chaal hui matvaali
Jaan gaya ki Guruji ka dhaam kareeb hai
Usne Unka shukr kiya ki vo itna khushnaseeb hai.

Aaya mehekta paigaam
Jabb pahuncha Guruji ke dham
Ki Guruji usey bulaa rahe Hain bheetar
Vo toh bheetar gaya daudkar.

Guruji aasan par thei viraajmaan
Unka sowmya roop dekhkar bhakt ho gaya hairaan
Jaisa usne socha thaa, ye roop thaa uss se kaheen adhik noorani
Guruji ne usey charan chhoone deeye toh uskee toh badal gayi zindagaani.

Guruji ke charan sparsh se
Uska roam roam khil gaya harsh se
Aur jabb Guruji usey dekh kar muskuraaye
Toh usey lagaa ki abb jo hona hai ho jaaye
Par mai Guruji ko kabhi no chodoon
Kaheen aur na apna rukh modoon.

Guruji toh jaanein sabke jazbaat
Jaan gaye uske dil kee baat
Unhonei usey aate rehne ke liye keh deeya
Bhakt ke dil mein jal gaya utsaah ka diya.

Usne kaha Guruji se ‘Satya vachan’
Phir Guruji ko kar ke naman
Baitha sangat mein
Rangne Guruji kee rangat mein.

Chai prasad aur langar prasad
Guruji ka ashirwaad
In sabse hua vo kritagya
Mil gaye usey Guru sarvagya.

Yoon shuru hua is bhakt ka safar
Guruji kee sharan mein safar gaya guzar
Guruji karte rahe jis prakaar is bhakt ka kalyaan
Vaise hee saari sangat ka uddhaar karein Ve karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Pahuncha Ek Bhakt (07/01/2025)

Guruji Ka Ik Das Thaa… (06/13/2025)

dhirjabhatLeave a comment

June 13, 2025

Om Namaha Shivaya
Aaj Ka Suvichaar 🙏🏻🙏🏻

#2672
                  Guruji Ka Ik Das Thaa…

Guruji ka ik das thaa
Anginat daason mein se thaa vo bhi ek
Baaki sab ke jaise uske jeevan mein bhi
Khushiyon ke sangg thei gumm aur sankat anek.

Jaise jaise aagey badh raha thaa
Das ruhaani yatra mein
Imtehaan ho rahe thei aur bhi kathin
Ajab see hee matra mein.

Hui paristhitiyon kee aisee dasha
Ki har oar dikhne lagi niraasha kee nisha
Guruji par vishwaas thaa toh jeeta jaa raha thaa
Guruji ke hee sahaare abb takk bhi usne sabb saha thaa.

Mushkil ho rahi thi pareeksha
Parantu usey milee hui thi Guruji kee suraksha
Baithta thaa aksar vo Guruji ke paas
Unse kehta thaa apna har ehsaas.

Badhne lagi pareshaaniyan jabb
Guruji ke swaroop ko dekh kar tabb
Kabhi kabhi toh kuch kehta thaa
Kabhi rota thaa, kabhi chup rehta thaa.

Ek din jabb huey bahut saal
Aur sudhar na raha thaa haal
Thakk kar phir aaya Guruji se karne baat
Liye apni tanhaayee ko apne saath.

Dekhta raha vo Guruji ka swaroop
Baat na kar sakaa magar koi
Guruji ko dekhte dekhte
Uskee aankh ek baar phir royi.

Aansoo bahe phir itne
Ki ruk paana thaa mushkil
Guruji swaroop se dekhte rahe
Das bhi vahaan se na paaya hil.

Kyunki is baar Guruji ke swaroop se
Guruji kee aankh se bhi bahe aansoo
Dukhi das ne dekha jabb ye
Toh jaise pighal si gayi uskee toh rooh.

Phir toh Guruji aur das ke beech jo hua
Vo ve dono hee jaanein
Buss, gavaah bann sakti thi tanhaayee
Par vo abb nazar hee na aayi.

Na jaane beete kitne pal
Ya phir shaayad aaj se ho gaya kal
Buss, Guruji se jo judi das kee taar
Guruji mauj mein aaye aur kiya uska uddhaar.

Guruji aur das, dono ke mukh par
Ik adbhut si raahat thi
Das ko abhi bhi lekin
Vaheen rehne kee chaahat thi.

Vaheen Guruji ke kamal charan mein
Guruji ke hee chintan mein
Guruji ne lori dee gaa
Das ko neend gayi aa.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Ik Das Thaa… (06/13/2025)

Ik Mastt Sa Fakir (05/29/2025)

dhirjabhatLeave a comment

May 29, 2025

Om Namaha Shivaya
Aaj Ka Suvichaar 🙏🏻🙏🏻

#2657
                Ik Mastt Sa Fakir

Ik mastt sa fakir
Toad kar moh kee zanjeer
Guruji ke geet gaa raha thaa
Akele chalta jaa raha thaa.

Baazaar aur sadkon se duur kaheen
Chalte huey aksar dekhte huey zameen
Phir oopar dekhte huey gagan
Guruji mein magn thaa uska mann.

Duur reh gaye sheher aur gaaon
Aise chalte gaye uske paaon
Veerane se nikal kar pahuncha vann mein
Lekin koi darr nahin thaa uske mann mein.

Baahar toh thaa jungle
Par uske bheetar thaa mangal
Kyunki bheetar basee thi Guruji kee chhavi ruhaani
Jiskee badaulat anandmayi lagti thi usey zindagaani.

Har paudha, har patta, har pashu pakshi kee awaaz
Fakir ko dete thei Guruji kee divyata ka ehsaas
Guruji Parameshwar Hain, veh jaanta thaa
Unse oopar koi shakti nahin, veh maanta thaa.

Guruji ke darshan ke liye rehti thi usey pyaas
Guruji ke simran aur dhyan ka karta rehta thaa prayaas
Badhti jaa rahi thi sakshat darshan kee aas
Is aas kee pyaas se honei lagaa veh thoda udaas.

Udaasi usey jagaati thi
Phir neend bhi nahin aati thi
Darshan kee pyaas sataati thi
Rooh chayyn nahin paati thi.

Guruji kee yaad mein
Darshan kee fariyaad mein
Beete anekon baras
Guruji ko aaya taras.

Ik din dhyan ke dauran aayi aisee khushboo
Jisne maano chhoo lee fakir kee rooh
Fakir ko hua Guruji kee maujoodagi ka ehsaas
Tabhi usey pukaarte huey aayi ek awaaz.

Fakir ne aankhein kholi aur dekha Guruji ko samaksh apne
Suna thaa usne pehle kuch logon se ki unhe aate thei Guruji ke sapne
Usey bhi lagaa vo sapna thaa dekh raha
Aur phir uskee aankh se aansoo baha.

Guruji ne Apne haath se usey ashirwaad diya
Fakir ne bhi jhuk kar Unka charan sparsh kiya
Usee pal Guruji ho gaye antardhan
Dekhta hee reh gaya fakir vahaan.

Khushboo abhi bhi thi, phir hoti gayi kumm
Lekin fakir ko nahin hua thoda sa bhi gumm
Antas ke naynon mein Guruji kee chhavi basaaye
Usne vaheen par nritya sangg geet gaaye
Pashu pakshi bhi dekhkar muskuraaye
Taruvar bhi phooley nahin samaaye.

Baahar aur bheetar mangal chhaaya
Fakir ne Guruji ka sakshat darshan paaya
Kehne ko jo thaa fakir, vo asal mein hua sabse ameer
Guruji ka shukr kiya usne aur saraahi apni taqdeer.

🌹🌹🌹🌹🌹🌹🌹

Jai Guruji 🙏🙏
Dhirja

Ik Mastt Sa Fakir (05/29/2025)

Karam Bade Balvaan (05/22/2025)

dhirjabhatLeave a comment

May 22, 2025

Om Namaha Shivaya
Aaj Ka Suvichaar 🙏🏻🙏🏻

#2650
              Karam Bade Balvaan

Karam bade balvaan, musaafir
Karein ve kismat ka nirmaan
Par sabse bade Bhagwaan, musaafir
Sabse bade Bhagwaan.

Bhagwaan swayam dharti par aaye
Lekar roop Guruji Maharaj ka
Unhonei Apni sharan mein liya kitnon ko
Anginat jann lete Hain naam Unn sartaj ka.

Rakhte Ve koi bhed bhaav nahin
Har bhakt ko dete Hain pyaar
Sabhi dho rahe hain jo karmon ka bhaar
Usey kumm karne aaye Guru sarkar.

Karmon se kaheen adhik balvaan
Hain Guruji Maharaj karunanidhaan
Tabhi toh abhi takk bach paaye hain hum insaan
Jinhe Guruji ne banaaya Apni santaan.

Varna jaane anjaane mein
Kiye hongei humne dushkarma kitne
Ye toh kewal Guruji hee jaanein
Phir bhi Ve Hain dayavaan itne.

Bakhshte rehte Hain Ve bakhshanhaar
Karte Hain Apni kripa dwaara sabka uddhaar
Utarvaate Hain bhakton ke karmon ka bhaar
Taaki balvaan karam na bann kar reh jaayein bhaar.

Beshak karam balvaan Hain
Par Guruji meharbaan Hain
Unkee marzi ho toh lekha bhi likh dete Hain dobaara
Bhaagya nikhaar Ve dete Hain saara
Parantu zaroori hai Unhe aur Unke hukm ko maan-na
Zaroori hai ye jaan-na
Ki rakhna hoga Unhe rijhaakar
Khud achcha insaan bann kar Unhe dikhaakar
Rakhte huye nek neeyat, nek kriyamaan karam
Nibhaate huey ruhaaniyat aur insaaniyat ka dharam
Varna is jeevan mein vyarth chala jaayega samay
Is baat mein nahin hai koi bhi sanshay.

Musaafir, Is jeevan ke dauran
Karta chal Guruji ka gungaan
Tu banaa balvaan apne mann ko
Taaki vo rok sakey vikaaron ke aakraman ko.

Guruji ka bakhsha simran karta chal
Taaki badhta rahe tera manobal
Vikaaron ka aakraman jaayega tal
Manobal kaam aayega aaj aur kal.

Sab kuch antar sambandhit hai
Ye jaan lene mein tera hitt hai
Guruji se judi rahegi jo teri rooh kee taar
Toh tujhe ye smaran hoga baar baar.

Pichhle karmon se milee ye kismat
Abb ke karmon se aagey kee kismat banegi
Aaj ke balvaan karam aise hon ki unke dwaara ho tere kalyaan ka nirmaan
O musaafir, Guruji kee bakhshi chetna aur sumat se apni soch aur karam par deta chal tu dhyan.

🌹🌹🌹🌹🌹🌹🌹

Jai Guruji 🙏🙏
Dhirja

Karam Bade Balvaan (05/22/2025)

Bhola Sa Bhakt (05/02/2025)

dhirjabhatLeave a comment

May 2, 2025

Om Namaha Shivaya
Aaj Ka Suvichaar 🙏🏻🙏🏻

#2630
                 Bhola Sa Bhakt

Guruji ka bhola sa bhakt thaa rehta
Duur kaheen kisee sheher mein
Sehejta se beet rahe jeevan mein
Bhaagya ne palti khaayi ik pratikool peher mein.

Is janam ka dosh na thaa
Dosh thaa pichhle kisee janam ka
Lekin sabhi insaanon ke liye
Kaanoon ek hai karam ka.

Pichhle koi kukarma aaye dukh bann kar
Bhola thaa, achcha insaan thaa, thaa pichhle gunaahon se bekhabar
Par karmon ke kaanoon ke aagey uskee bhi na chali
Koi bhalaamaanas zariya banaa usey Guruji ke paas le jaane ka, jahaan museebat tali.

Guruji kee kripa se Bhola pahuncha Unke dar
Guruji ke charnon mein poori shraddha se jhukaaya usne sir
‘Aap hee jaanein khataa meri, Aap deejiye kshama daan
Apni kripa barsaa deejiye, mere Bholenath Bhagwaan.’

Bhole ne kaha ye Guruji se mann hee mann
Guruji ne usey sweekaar liya usee kshan
Bhola thaa Bhole ka bhaav
Samarpan kee oar thaa uska bahaav
Guruji ke dar par aata raha
Aksar aansoo bahaata raha.

Guruji toh Bhagwaan Hain
Dukh kaatne wale karunanidhaan Hain
Ve hee jaanein kaise aur kabb
Duur karne hain dukh sabb.

Bhola badi lagan se
Guruji se juda raha
Kayioyn ne bataaye usey aur upaay
Par veh unn sabse muda raha.

Guruji ne Bhole ko bharosa daan bakhsha
Aur dukh ke vele mein bhi karte rahe uskee raksha
Kumm karte karte uske praarabdh karmon ka bhaar
Guruji ne Apni daya se usey diya taar.

Jo na aata Guruji kee karuna bin
Aa gaya veh sunehra din
Jabb Guruji mauj mein aaye
Aur Bhole ke sukh laut aaye.

Jo bhakt gaya thaa poori tareh se bikhar
Guruji kee uspar hui meher
Bhola yoon gaya nikhar
Ki usne paa liya shikhar.

Jholiyan bharte bharte na thakaa
Bhola shukrana karte karte na thakaa
Shwaas shwaas karte huey Guruji ka simran
Bhole ne bitaaya bhakti bhaav se jeevan.

Bhole ka antt vela jabb aaya
Guruji ne usey galey se lagaaya
Vo jo apni bhakti mein raha atal
Uss Bhole ka jeevan hua safal.

🌹🌹🌹🌹🌹🌹🌹

Jai Guruji 🙏🙏
Dhirja

Bhola Sa Bhakt (05/02/2025)

Guruji Ke Darshan Kee Pyaasi (04/25/2025)

dhirjabhatLeave a comment

April 25, 2025

Om Namaha Shivaya
Aaj Ka Suvichaar 🙏🏻🙏🏻

#2623
         Guruji Ke Darshan Kee Pyaasi

Guruji ke darshan kee pyaasi
Guruji se milne aayi daasi
Shraddha ke phool thi laayi
Guruji ko milne ke khayaal se phooli na samaayee.

Guruji mein hee khoyi rehti thi vo
Sabse Guruji kee baatein kehti thi vo
Ve dete Hain har pal itna pyaar
Sabhi ko bataati thi baarambaar.

Guruji ke satsang sunti sunaati thi
Guruji kee masti mein jhoomti jaati thi
Guruji ke hukm ko sada rakhti thi sir aankhon par
Guruji kee raza mein raazi rehkar beet raha thaa uska safar.

Uth-te baith-te sotey jaagtey
Kaam karte huey aur chaltey bhaagte
Rehti thi vo Guruji kee yaad mein
Magn Unke ashirwaad mein.

Aaj bhi shraddha ke phool liye
Jalaaye huey mann mein bhakti ke deeye
Pahunchi Unhee Guruji ke darbar
Jinke charnon mein thaa uska sansaar.

Guruji baithey thei aasan par
Daasi ne Unke aadar mein jhukaaya sir
Shraddha ke phool arpit kiye Guruji ke charan mein usne bade pyaar se
Uskee rooh gadd gadd honei lagi Guruji ke deedar se.

Uske mukh se koi lafz nikal na paaye
Toh aankhon ne apne tareeke se kehne ka kaam kiya
Aankhein num thi par muskuraa rahi thi
Guruji ne toh daasi ka saara bhaav jaan liya.

Guruji ne apna haath rakha daasi ke sir par
Daasi ko apne bheetar aaya Guruji ke jyotirmay roop nazar
Ek pal dekhti thi Guruji ko aasan par
Dooje pal uss jyotirmay roop ko
Mantramugdh ho gayi dekh kar
Guruji kee ye leela anoop vo.

Guruji daasi ko dekh kar muskuraaye
Uskee sthiti Ve toh thei jaan paaye
Unhonei daasi ko Apna anant saanidhya bakhsha
Daasi ko milee sada ke liye Unkee sampoorna suraksha.

Apni jhoothi chai daasi ko pilaakar
Daasi ko ashish dekar vidaa kar
Guruji ne dhanya kar deeya daasi ko
Nirantar simran bakhsh deeya uss pyaasi ko.

Hua bhakti mein leen daasi ka uddhaar
Gehra hota gaya uska Guruji ke liye pyaar
Guzaare daasi ne jeevan ke din chaar
Aur phir Guruji usey Apni goad mein le gaye uss paar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Darshan Kee Pyaasi (04/25/2025)