Tag: poetry

Aise Prataapi Hain (10/10/2024)

dhirjabhatLeave a comment

October 10, 2024

Om Namaha Shivaya
Aaj Ka Suvichaar 🙏🏻🙏🏻

#2426
    Aise Prataapi Hain

Behta hai amrit yahaan
Har sees yahaan jhuk jaata hai
Ye Guruji ka dar hai bhakton
Jo aaye, yaheen ruk jaata hai.

Kahaan kahaan se aate hain sab
Paate Hain sab Guruji mein Rabb
In charnon mein lagg jaati hai lagan aisee
Pehle kaheen bhi na lagi thi jaisi.

Yahaan ahem vehem ka sthaan nahin
Koi insaan yahaan pradhaan nahin
Guruji Hain Sahib ek
Jinhe poojey bhakt pratyek.

Yahaan kamee nahin hai gungaan kee
Guruji kee mahima mahaan kee
Is mahima ko sunkar sunaakar
Is mahima ko gungunaakar
Paapi bhi tarr jaate hain
Bigde kaaj sanvar jaate hain.

Yahaan aksar rooh ko leti hai chhoo
Guruji Maharaj kee anokhi khushboo
Koi Guruji ke samaksh bahaata hai aansoo
Toh muskuraata hai kisee kisee ka muh.

Guruji bhaav ko Hain parakhte
Bhinn bhinn bhaav se dil hain dhadakte
Sangat ke alag alag jann ke
Kuch antarmukhi, kuch das apne mann ke.

Manobal ko Guruji badhaate Hain
Apni ichcha se sewa simran karaate Hain
Patit ko paawan banaate Hain
Sachchi neeyat se prasann ho jaate Hain.

Antas ko karte Hain saaf
Galatiyon ko karte Hain maaf
Sudharne ka mauka dete Hain kayi baar
Har pal nigraani rakhte hain Unke nayn kayi hazaar
Koshish karne waalon kee sahaayata awashya karte Hain
Dayavaan Hain, bhakton ko nirbhay karte Hain.

Anokhi hai Guruji kee leela
Anupam Unka gyan dene ka silsila
Unka satsang hai suraksha ka kila
Unkee agya bin patta bhi na hila.

Shwaas shwaas hai Unpar nirbhar
Shwaas shwaas naman karey Unke dar par
Shwaas shwaas hai Unkee karzdaar
Aise prataapi Hain Shiv avatari Guru sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aise Prataapi Hain (10/10/2024)

Behad Khushnaseeb (10/09/2024)

dhirjabhatLeave a comment

October 9, 2024

Om Namaha Shivaya
Aaj Ka Suvichaar 🙏🏻🙏🏻

#2425
 Behad Khushnaseeb

Guruji ke roop mein aaye khud Bhagwaan
Unkee kripa se tarr rahe Hain anginat insaan
Ve sabb kehlaate Hain Guruji kee sangat
Aaj ya kal chadh jaati hai unpar Guruji kee rangat.

Kitne praaniyon ko karaate Hain Guruji bhavsaagar se paar
Pashu, pakshi, vanaspati ka bhi karte Hain Ve uddhaar
Har yoni ke praani ko de paate Hain Apni ichcha se Ve mukti
Shiv avatari Hain, adbhut aur anokhi hai Unkee yukti.

Ye bhi hai Guruji kee vadiyaayee
Ki Ve sangat ke dil mein basein kewal agar Ve chaahein
Varna sangat ko Ve mil nahin paate
Beshak sangat bhatak le sainkdon raahein.

Kabhi toh Apni leela se Ve sangat ko yaad hee nahin aate hain
Kabhi Unhee kee kripa se bhakt Unke deewaane ho jaate hain
Guruji kee hee marzi se bhakt Unkee mahima sunte gaate hain
Ashutosh bhi Ve hee Hain, aasaani se prasann bhi ho jaate Hain.

Unkee maya, Unkee marzi, Unka hai divya paraakram
Anivaarya hai ki Unhe saadhaaran Guru samajhne kee galati na karein hum bhakt jann
Kitnee bhi koshish koi kar le, Guruji ko poori tareh se samajh paana hai namumkin
Unkee sharan mein ye samajh aata hai zaroor ki hum sangat kee gati nahin hai Unke bin.

Unkee ek vinamr muskaan mein
Har Brahmand ka rahasya samaata hai
Lakh chhipaane se bhi koi kuch na chhipa paaye
Guruji ko toh bhakt ke jeevan ka agala pichhla sab nazar aa jaata hai.

Guruji ke charnon mein karte rahein naman
Anekon devi devta aur Unke gann
Guruji niyantrit kar paate Hain
Dharti, jal, agni, vayu, aur gagan.

Ve chaahein toh de sakte Hain jeevan daan usee kshan
Ve swasth karte Hain bhakton ka dimaag, tann, aur mann
Ve de sakte Hain bhautik padaarth aur param ruhaani dhan
Nishchay hee Ve Hain swayam hee Bhagwan.

Guruji kee sharan mein jhooth aur paakhand na chal paaye
Jo bhole bhaav se aaye, veh Guruji kee kripa ka asal khazaana le jaaye
Shraddha aur saboori rakhte huey Guruji ke charnon mein mushkil waqt tal jaaye
Behad khushnaseeb hai har veh praani jisey Guruji ke kamal charan mein jageh mil jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Behad Khushnaseeb (10/09/2024)

Sabse Uttam Sthaan (10/08/2024)

dhirjabhatLeave a comment

October 8, 2024

Om Namaha Shivaya
Aaj Ka Suvichaar 🙏🏻🙏🏻

#2424
Sabse Uttam Sthaan

Preet ka geet sunaaoon mai
Apne param poojya pyaare Guruji ko
Unkee agya se meet banaaoon mai
Apne sanaatan sahaare Guruji ko.

Ve Hain sarvkala sampann
Mai Unhe karna chaahoon prasann
Karna chaahoon Unhe samarpan apna mann
Unhee par nirbhar hain meri saansein aur jeevan.

Mai na jaanoon, par Guruji jaanein mere pichhle janmon ke bhi raaz
Nivedan hai Unse ki Ve kabhi na hon mujhse naaraaz
Ve hee Hain jo bin mere lagaaye awaaz
Sunn lete Hain meri har dukhti rugg ka saaz.

Unka Shukrana karti na thakoon
Unka jitna stavan kar sakoon
Karti rahoon din raat
Toh vo bhi hogi saugat.

Kyunki bin Unkee nadar ke
Na soch paaoongi alfaaz kadar ke
Na dhoondh sakoongi lafz Unkee meher-e-nazar ke
Jo Hain jeevan daata mere safar ke.

Ekaagr rahega chitt Guruji ke khayaalon mein
Toh duur rahega vyarth ke sawaalon se
Guruji ka hai jeevan mein param mahatva
Baaki duniyadaari mein toh nibhaana hai kartavya.

Guruji se hai arzi ki unn kartavyon kee poorti mein mujhse chook na ho
Jo mere liye achcha nahin, uskee mujhe pyaas ya bhookh na ho
Guruji mein lagi rahe aisee lagan
Ki har shwaas rahe buss Unmein hee magan.

Guruji se hee hai sab kuch
Apna astitva toh kuch bhi nahin
Jaise bhi rakhein buss rakhein Ve Apni sharan mein
Sabse uttam sthaan hai vahee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabse Uttam Sthaan (10/08/2024)

Jud Gaya Hai Jo Guruji Se Naata (10/07/2024)

dhirjabhatLeave a comment

October 7, 2024

Om Namaha Shivaya
Aaj Ka Suvichaar 🙏🏻🙏🏻

#2423
   Jud Gaya Hai Jo Guruji Se Naata

Jud gaya hai jo Guruji se naata
Toh yakeenan saaf hoga karmon ka khaata
Bahut khushkusmati se milte Hain pooran Guru
Bade naseebon se Unke charnon mein hota hai safar shuru.

Ye nahin hai saath pal do pal ka
Ye rishta hai kal aaj aur kal ka
Guruji hee jaanein asal avadhi iskee
Aur kaisi wafa hai kiskee.

Hum sabb kathputaliyan hain Unn Rabb ke aagey
Vaheen takk hamaari daud jahaan takk Ve le jaayein hamein chalaane wale dhaagey
Phir bhi Ve dete Hain azaadi swatantra ichcha kee bin kiye hastakshep
Aur hamaare kalyaan ke liye aksar dobaara bhi likhte Hain hamaare lekh.

Jis bhi tareh se dekha jaaye
Nishchit hai laabh hamaara
Kitne bhaagyashaali hain hum
Jo mila hai hamein Guruji ka sahaara.

Guruji se hee baatein saari
Guruji sangg hansna rona
Duniya mein jeete huey bhi
Buss, Guruji ka hee hona
Zaroori hai ye rakhna yaad
Varna bahut aasaan hai khona
Is kalyuga kee bheed mein
Jahaan mushkil hai paapon ko dhona.

Guruji jaisa aur Guru na dekha
Guruji jaisa na hai koi saathi
Jeevan mein aayi hai jo ananyata
Vo yakeenan Unhee ke sangg se hai aati.

Guruji Maharaj se nazdeekiyaan
Suljhaa rahi hain zindagi kee baareekiyaan
Unkee raza mein raazi rehne se sweekriti aur samarpan se sajta rahe ye safar
Guruji kee sharan mein hain toh yakeenan har pehlu par hoga Unke ashish ka asar.

Saraahein har din hum apni taqdeer ko
Naman karein mann mein basee Guruji kee tasveer ko
Unhonei thaama na hota toh hum hotey kitne laachaar
Shukrana ki hamein sambhaal rahe Hain Guruji Parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jud Gaya Hai Jo Guruji Se Naata (10/07/2024)

Aapka Saanidhya Aur Pyaar (10/06/2024)

dhirjabhatLeave a comment

October 6, 2024

Om Namaha Shivaya
Aaj Ka Suvichaar 🙏🏻🙏🏻

#2422
        Aapka Saanidhya Aur Pyaar

Mere priy Guruvar Parwardigaar
Aapka saanidhya aur pyaar
Aapka deedar
Milta rahe baarambaar.

Aankhon se keh doon Aapko vo sabb
Jo shabdon mein bhi keh na paaoon
Kabhi Apne se duur na karna mujhe, mere Rabb
Aapse bichadne kee soch bhi mai seh na paaoon.

Ho raat ka ekant ya dinacharya ka samaa
Antas mera Aap mein hee rehta hai ramaa
Aapke angg sangg honei ka hota hai jo nirantar ehsaas
Uss ehsaas se mera har shwaas mehsoos karta hai shuddhi khaas.

Aapka naam lete lete kabb ho jaati hai subah se shaam
Aapki kripa se kaise pooran ho jaate hain kaam
Ye toh Aap aur Aapki leela jaane
Jis se muskuraate hain mere mann ke udaas veeraane.

Aap na bhi dikhein toh nahin lagte Hain duur
Mere maarg ko roshan karta hai Aapka noor
Na lagta hai andhere se darr
Na tanhaayee se bhayy
Aapki meher se har pal vijayi ho vishwaas
Aur haarta rahe sanshay.

Koi aur ho ya na ho
Mai akele nahin sakti kho
Kyunki Aap Hain mere angg sangg
Mere jeevan mein bharne ruhaani rangg.

Is rangg par mai vaari jaaoon
Aapke sangg par mai balihaari jaaoon
Mai Aapke saanidhya se jo sukoon paaoon
Uss sukoon ke sahaare mai sthir reh paaoon
Har tufaan mein
Har imtehaan mein.

Aapke bakhshe huey ruhaani rangg mein rangg jaaye chitr mere jeevan ka
Aapka bakhsha hua ruhaani rangg bann jaaye aadhaar mere antakaran ka
Aane waale har pal mein bhi Aapki soch se sajey har vichaar mere mann ka
Aapka saanidhya aur pyaar, Aapka deedar
ho mool aur saar meri zindagi ke har kshan ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapka Saanidhya Aur Pyaar (10/06/2024)

Aap Swayam Hain Bhagwaan (10/05/2024)

dhirjabhatLeave a comment

October 5, 2024

Om Namaha Shivaya
Aaj Ka Suvichaar 🙏🏻🙏🏻

#2421

Aap Swayam Hain Bhagwaan

Param poojya Guruvar,

Aap sada, Aap hee sarvada, Aap hee sundar swami
Aap anant, Aap akhand, Aap antaryami
Aap nirmal, Aap noorani, Aap nirgun
Aap saral, Aap saumya, Aap sagun.

Bhavsaagar mein doobi hum sangat ka
Karne aaye Hain Aap kalyaan
Agyan ke timir mein bhatke houn ko
Dene aaye Hain gyan.

Bolein beshak zyada na Aap
Sunte Hain par sab kuch
Aapki mahaanta hamaari kalpana se kaheen oonchi
Hum aur hamaari soch bilkul tuchh.

Aapki leela hamein na aaye samajh
Dekhte dekhte uljhanein jaati hain sulajh
Kabhi palak jhapakte hee, toh kabhi lagg jaaye der
Par Aap awashya sambhaalte Hain hamaare karmon ka herpher.

Itnee saari hain Aapki rehmatein
Ki chhoti padd jaati hai jholi hamaari
Aapki mahima gaate nahin thakti
Aapki sangat saari kee saari.

Aapki daya ke sahaare hee toh
Chalta hai hum sangat ka guzaara
Bakhshishon ke manohar ratnon se
Sampann hai Aapka dar aur dwaara.

In ratnon se huey hain hum raeees
Kyunki aisa hitkar dhan hai Aapki bakhshish
Jis se bigde kaaj sanvar jaate hain
Aur saubhagya ke kivaad khul jaate hain.

Aapke charnon ke rahein hum bhikshuk
Aapki kripa ke hain hum ichhuk
Grahasth ashram mein rehte huey
Aapki oar hee kendrit rahe hamaara dhyan
Aisee sumat deejiye, deejiye aisa gyan
Ki kabhi na bhoolein ki Aap swayam Hain Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Swayam Hain Bhagwaan (10/05/2024)

Aapki Rehmat Kee Aushadhi (10/03/2024)

dhirjabhatLeave a comment

October 3, 2024

Om Namaha Shivaya
Aaj Ka Suvichaar 🙏🏻🙏🏻

#2419
       Aapki Rehmat Kee Aushadhi

Param poojya Guruji,

Aapse hoti hai baat
Toh baat hoti hai Khuda se
Lagta hee nahin
Ki hum kabhi bhi thei juda juda se
Aisa apnapann, aisa pyaar
Aisa bandhan ki abb peechhe chhootne lagaa hai sansaar.

Kashish rehti hai toh buss
Aapse judey rehne kee
Arzoo rehti hai
Dil kee har baat buss Aapse kehne kee.

Ye deewaanapann hai ya bhakti
Kyun mai ye soch kar rahoon thakti?
Aap jis bhi tareh se rakhein mujhe Apne charan mein
Mujhe manzoor hai is aur kisee bhi aur janam mein.

Aapki mamta, Aapka sneh, Aapki rehmat
Mere dil mein Aapke liye izzat aur mohabbat
In sab se kaayam rehti hain meri saansein
Jinhe Apna sahaara deti hain Aapki baahein.

Meri oar se kamiyan hain anginat
Lekin kabhi kumm nahin hoti hai Aapki rehmat
Veh toh barasti rehti hai har mausam mein
Bannkar aushadhi meri khushi aur mere gumm mein.

Khushi ke lamhon mein mujh mein ahankar na aa jaaye
Isliye Apni is aushadhi dwaara bakhshte rahiyega mujhe sumati
Aur gumm kee ghadiyon mein ruk na jaaye meri gati
Isliye unn lamhon mein bhi mujh par bakhshte rahiyega ye aushadhi.

Aapki rehmat kee aushadhi se mai rahoongi swasth
Mai Aapki yaad aur sewa mein rahoon mastt
Meri rooh deewaani hai Aapki aur Aapke dhaam kee
Kripa kar meri rooh ko har janam mein deejiyega daat Aap Apne naam kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ko Tu Samjhaata Chal (10/02/2024)

dhirjabhatLeave a comment

October 2, 2024

Om Namaha Shivaya
Aaj Ka Suvichaar 🙏🏻🙏🏻

#2418
       Mann Ko Tu Samjhaata Chal

Mann ko tu samjhaata chal
Mann maanega aaj nahin toh kal
Zaroori hai bahut mann ka bal
Varna bheetar rahegi ashanti aur halchal.

Mann ko shatru nahin, mitr banaa apna
Mann ko swami nahin, das banaa apna
Varna tu uska das bann kar reh jaayega pyaare
Zaroori hai ki tu Guruji ke saanidhya mein har pal guzaare.

Guruji kee yaad mein jee
Hain buss Ve hee
Jo tujhe chalaa rahe Hain pyaare
Bannkar tere atoot sahaare.

Beshak ye mushkil samaa hai
Lekin jo tera mann Guruji mein ramaa hai
Toh tera haal anekon se behtar hai pyaare
Varna kitne aise hain jo jud nahin paate aakar Unke dwaare.

Mann ko rakh tu sanyam mein
Laa apne mann ko samarpan mein
Tabhi kumm hogi pareshaani pyaare
Varna tu phirta rahega maare maare.

Tere mann, tere dil ke kisee konei mein
Tu jaanta hai ki thoda se waqt reh gaya hai abb kaaraj honei mein
Guruji tujhe yahaan takk laaye Hain pyaare
Aagey chalkar dikhaayenge Ve tujhe naayaab nazaare.

Tujhe maut ka darr nahin toh jeevan se kyun hai darta
Tere sangg tere Guruji Hain jo sada se rahe Hain tere dukh harta
Shraddha aur saboori rakhta chal tu pyaare
Guruji kee meher se jald hee andheron mein bhar aayenge ujiyaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ko Tu Samjhaata Chal (10/02/2024)

Tumhaare Vishwaas Kee Shila (10/01/2024)

dhirjabhatLeave a comment

October 1, 2024

Om Namaha Shivaya
Aaj Ka Suvichaar 🙏🏻🙏🏻

#2417
       Tumhaare Vishwaas Kee Shila

Tumhaare vishwaas kee shila
Aur Guruji dwaara bakhsha satsang ka kila
Ye sab saubhagya se tumhe hai mila
Sabka bhaagya aise nahin hai khila.

Vishwaas kee shila ko na samjho saadhaaran patthar
Ye shila le sakti hai bade se bade tufaan se takkar
Is shila par sada rehti hai Guruji kee meher-e-nazar
Is shila par sabr se tum khade raho nirantar.

Jabb takk hoge tum is shila par khade
Tum seh paaoge sangharsh bade bade
Guruji kee vadiyaayee se
Guruji kee guruyaayee se.

Is shila par chal rahi tumhaare bin dekhe
Aisee nakkaashi Guruji dwaara
Ki shila bann rahi hai ek mazboot buniyaad
Jo deti rahegi tumhe sahaara.

Jabb Guruji Hain sangg-taraash swayam
Toh awashya katenge tumhaare karam
Is shila ka karte raho sammaan
Aur Guruji ke satsang ka rakho tum maan.

Guruji ke satsang sunte sunaate
Unkee mahima sunte aur gaate
Tumhe miltee rahegi satsang ke kiley mein suraksha
Jahaan Guruji ne anginat sangat ko hai bakhsha.

Safar mushkil ho ya aasaan
Tumhe mila hai shila ka vardaan
Satsang ka kila kar raha hai tumhaara kalyaan
Kyunki bade hee dayavaan Hain Guruji mahaan.

Vishwaas sangg tumhaari aas mein rahegi mithaas
Meethi aas se kaayam rahegi satsang kee pyaas
Satsang ka kila tumhe honei na dega udaas
Kyunki Guruji kee yaad mein ramta rahega tumhaara har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Vishwaas Kee Shila (10/01/2024)

Jabb Labon Par (09/30/2024)

dhirjabhatLeave a comment

September 30, 2024

Om Namaha Shivaya
Aaj Ka Suvichaar 🙏🏻🙏🏻

#2416
                  Jabb Labon Par

Jabb labon par bojh lagne lagey apni hee muskaan
Kisee pichhle karma ka parinaam aa jaaye tumhaare aur tumhaare sukoon ke darmiyaan
Jabb tumhaara saath na de paaye koi bhi aur insaan
Yaad rakhna, tumhaare saath tabb bhi Hain Bhagwaan.

Ve kisee bhi roop mein ho sakte Hain tumhaare angg sangg
Kyunki adbhut leela dhaari Hain Ve aur Unke dhangg
Aise hee toh MahaShiv dharti par aaye swayam
Ve Guruji ke roop mein aaye dene kitnon ko Apni sharan.

Guruji ke roop mein swayam Bhagwaan
Sab kuch Hain Ve jo tum lo maan
Kuch bhi nahin jo na maano tum
Kitne jann Unhe bin maane bhi huey andhere mein gum.

Guruji ne tumhe Apne se joda hai
Toh ye yakeenan hai tumhaari khushnaseebi
Is rishte se mit jaayegi
Tumhaari har tareh kee gareebi.

Ye baat nahin kewal bhautik padaarthon ya duniyavi dhan kee
Ye baat ho rahi hai rooh aur antakaran kee
Deh aur duniyavi sukh se kaheen zyada mahatvapoorna hai inka uddhaar
Kyunki antas aur rooh ke poshan bin toh janam hee ho jaaye bekaar.

Yoon hee thode hee na Guruji Hain gareeb nawaaz
Unn takk pahunchti hai Unke har bhakt kee awaaz
Adbhut aur sthaayi hain Unke kalyaan karne ke raaz
Aur bhakton kee anekon galatiyan bhi Ve karte Hain nazar andaaz.

Lete raho tum Guruji ka naam
Unkee yaad mein raho subah shaam
Yaad karte raho tumhaare gyan mein Unke kiye kalyaan
Kitnon se achcha hai tumhaara haal ye toh tum le chuke ho maan.

In sab ahemiyat wali baaton ka karte raho dhyan aur sammaan
Sehejta se sajne lagegi phir labon par muskaan
Pichhle karmon ka bhaar kumm hoga toh aagey ka raasta hoga aasaan
Guruji ke charnon mein safar ka nishchay hee hoga kalyaanmayi parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jabb Labon Par (09/30/2024)