Tag: suvichaar

October 2, 2025

Om Namaha Shivaya
Aaj Ka Suvichaar 🙏🏻🙏🏻

#2783

            Paudha, Titlee, Taruvar

Ik nanhi si niraali titli
Subah subah sayyr ke liye nikli
Idhar udhar mandaraate huey
Guruji ke naam kee dhun gungunaate huey.

Dhoop aur chhaaon ka khel chal raha thaa raahon par
Hawaa ka sparsh titli ko mehsoos ho raha thaa apni baahon par
Yahaan se vahaan dolte huey
Mann hee mann ‘Jai Guruji’ bolte huey
Titli kee padi ik chhote se paudhe par nazar
Jo pichhlee baar usne na dekha thaa udhar.

Titli gayi uss chhote se paudhe ke paas
Dekha usne ki uss paudhe par suraksha thi khaas
Kyunki veh thaa ik vishal taruvar ke paaon mein
Aur anand le raha thaa uss taruvar kee chhaaon mein.

Titli ke mann mein aaya vichaar
Ki Guruji Maharaj Hain taruvar kirpadhaar
Jis bhakt ko lete Hain Apni sharan mein
Usey poshit honei ka mauka dete Hain Apne charan mein
Bilkul is vishal taruvar kee tareh
Jisne dee uss chhote paudhe ko nikharne kee jageh.

Guruji ke aanchal ke taley
Jo bhi bhakt samarpit hokar paley
Uska ho jaaye kalyaan
Jaise harey patte baney uss chhote paudhe kee pehchaan.

Titli uss din ke baad
Vaheen tehelne aati rahi aksar
Dekhkar paudhe par taruvar kee mamta ka asar
Veh taruvar ka shukrana karti jhuka kar sir.

Taruvar kee paudhe par rahi daya
Paudha bada hota gaya
Dekh kar usey harey bharey patton se alankrit
Muskuraata thaa titli ka chit.

Guruji ka shukrana anant
Ki dete Hain Ve bhakton ko mamta beantt
Karte Hain Ve poshan hamaara
Taaki hamaare jeevan mein ho haraa-bharaa ujiyaara.

Hum hee hain vo chhote paudhe Guruji ke charnon mein pal rahe
Guruji kee paawan meher se hamaare kasht aur paap hain tal rahe
Guruji karte Hain hamaari raksha taaki hum rahein harey bharey
Ve Hain vo vishal taruvar jo hamaare liye itne tufaanon se Hain ladey
Dete Huey hum paudhon ko unnat honei ka bal
Kal bhi Guruji thei, Ve aaj bhi Hain, aur Ve hee hongei kal.

🌹🌹🌹🌹🌹🌹🌹

Jai Guruji 🙏🙏
Dhirja

Paudha, Titlee, Taruvar (10/02/2025)

July 1, 2025

Om Namaha Shivaya
Aaj Ka Suvichaar 🙏🏻🙏🏻

#2690

              Pahuncha Ek Bhakt

Pahuncha ek bhakt Guruji ke dwaar par
Shuru hua uska Guruji kee sharan mein safar
Aayiye sunein aur jaanein uske judne ka satsang
Kaise Guruji ho gaye uske angg sangg.

Guruji se milne ko bhakt thaa bekaraar
Ek din aakhir Guruji ne bulaa liya usey Apne dwaar
Apne sheher se nikal pada vo jaise hee sooraj uday hua
Raaste mein har kiran ne uske saath honei ke liye uska daaman chhua.

Kintu uske aagey chalte chalte
Kirnein peechhe gayin chhoot
Ve saath nahin jaa paayin uske
Unka dil toh gaya toot.

Veerane mein dikhne lagi bhakt ko hariyaali
Dil kee dhadkan tez hui aur uskee chaal hui matvaali
Jaan gaya ki Guruji ka dhaam kareeb hai
Usne Unka shukr kiya ki vo itna khushnaseeb hai.

Aaya mehekta paigaam
Jabb pahuncha Guruji ke dham
Ki Guruji usey bulaa rahe Hain bheetar
Vo toh bheetar gaya daudkar.

Guruji aasan par thei viraajmaan
Unka sowmya roop dekhkar bhakt ho gaya hairaan
Jaisa usne socha thaa, ye roop thaa uss se kaheen adhik noorani
Guruji ne usey charan chhoone deeye toh uskee toh badal gayi zindagaani.

Guruji ke charan sparsh se
Uska roam roam khil gaya harsh se
Aur jabb Guruji usey dekh kar muskuraaye
Toh usey lagaa ki abb jo hona hai ho jaaye
Par mai Guruji ko kabhi no chodoon
Kaheen aur na apna rukh modoon.

Guruji toh jaanein sabke jazbaat
Jaan gaye uske dil kee baat
Unhonei usey aate rehne ke liye keh deeya
Bhakt ke dil mein jal gaya utsaah ka diya.

Usne kaha Guruji se ‘Satya vachan’
Phir Guruji ko kar ke naman
Baitha sangat mein
Rangne Guruji kee rangat mein.

Chai prasad aur langar prasad
Guruji ka ashirwaad
In sabse hua vo kritagya
Mil gaye usey Guru sarvagya.

Yoon shuru hua is bhakt ka safar
Guruji kee sharan mein safar gaya guzar
Guruji karte rahe jis prakaar is bhakt ka kalyaan
Vaise hee saari sangat ka uddhaar karein Ve karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Pahuncha Ek Bhakt (07/01/2025)

June 13, 2025

Om Namaha Shivaya
Aaj Ka Suvichaar 🙏🏻🙏🏻

#2672

                  Guruji Ka Ik Das Thaa…

Guruji ka ik das thaa
Anginat daason mein se thaa vo bhi ek
Baaki sab ke jaise uske jeevan mein bhi
Khushiyon ke sangg thei gumm aur sankat anek.

Jaise jaise aagey badh raha thaa
Das ruhaani yatra mein
Imtehaan ho rahe thei aur bhi kathin
Ajab see hee matra mein.

Hui paristhitiyon kee aisee dasha
Ki har oar dikhne lagi niraasha kee nisha
Guruji par vishwaas thaa toh jeeta jaa raha thaa
Guruji ke hee sahaare abb takk bhi usne sabb saha thaa.

Mushkil ho rahi thi pareeksha
Parantu usey milee hui thi Guruji kee suraksha
Baithta thaa aksar vo Guruji ke paas
Unse kehta thaa apna har ehsaas.

Badhne lagi pareshaaniyan jabb
Guruji ke swaroop ko dekh kar tabb
Kabhi kabhi toh kuch kehta thaa
Kabhi rota thaa, kabhi chup rehta thaa.

Ek din jabb huey bahut saal
Aur sudhar na raha thaa haal
Thakk kar phir aaya Guruji se karne baat
Liye apni tanhaayee ko apne saath.

Dekhta raha vo Guruji ka swaroop
Baat na kar sakaa magar koi
Guruji ko dekhte dekhte
Uskee aankh ek baar phir royi.

Aansoo bahe phir itne
Ki ruk paana thaa mushkil
Guruji swaroop se dekhte rahe
Das bhi vahaan se na paaya hil.

Kyunki is baar Guruji ke swaroop se
Guruji kee aankh se bhi bahe aansoo
Dukhi das ne dekha jabb ye
Toh jaise pighal si gayi uskee toh rooh.

Phir toh Guruji aur das ke beech jo hua
Vo ve dono hee jaanein
Buss, gavaah bann sakti thi tanhaayee
Par vo abb nazar hee na aayi.

Na jaane beete kitne pal
Ya phir shaayad aaj se ho gaya kal
Buss, Guruji se jo judi das kee taar
Guruji mauj mein aaye aur kiya uska uddhaar.

Guruji aur das, dono ke mukh par
Ik adbhut si raahat thi
Das ko abhi bhi lekin
Vaheen rehne kee chaahat thi.

Vaheen Guruji ke kamal charan mein
Guruji ke hee chintan mein
Guruji ne lori dee gaa
Das ko neend gayi aa.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Ik Das Thaa… (06/13/2025)

May 29, 2025

Om Namaha Shivaya
Aaj Ka Suvichaar 🙏🏻🙏🏻

#2657

                Ik Mastt Sa Fakir

Ik mastt sa fakir
Toad kar moh kee zanjeer
Guruji ke geet gaa raha thaa
Akele chalta jaa raha thaa.

Baazaar aur sadkon se duur kaheen
Chalte huey aksar dekhte huey zameen
Phir oopar dekhte huey gagan
Guruji mein magn thaa uska mann.

Duur reh gaye sheher aur gaaon
Aise chalte gaye uske paaon
Veerane se nikal kar pahuncha vann mein
Lekin koi darr nahin thaa uske mann mein.

Baahar toh thaa jungle
Par uske bheetar thaa mangal
Kyunki bheetar basee thi Guruji kee chhavi ruhaani
Jiskee badaulat anandmayi lagti thi usey zindagaani.

Har paudha, har patta, har pashu pakshi kee awaaz
Fakir ko dete thei Guruji kee divyata ka ehsaas
Guruji Parameshwar Hain, veh jaanta thaa
Unse oopar koi shakti nahin, veh maanta thaa.

Guruji ke darshan ke liye rehti thi usey pyaas
Guruji ke simran aur dhyan ka karta rehta thaa prayaas
Badhti jaa rahi thi sakshat darshan kee aas
Is aas kee pyaas se honei lagaa veh thoda udaas.

Udaasi usey jagaati thi
Phir neend bhi nahin aati thi
Darshan kee pyaas sataati thi
Rooh chayyn nahin paati thi.

Guruji kee yaad mein
Darshan kee fariyaad mein
Beete anekon baras
Guruji ko aaya taras.

Ik din dhyan ke dauran aayi aisee khushboo
Jisne maano chhoo lee fakir kee rooh
Fakir ko hua Guruji kee maujoodagi ka ehsaas
Tabhi usey pukaarte huey aayi ek awaaz.

Fakir ne aankhein kholi aur dekha Guruji ko samaksh apne
Suna thaa usne pehle kuch logon se ki unhe aate thei Guruji ke sapne
Usey bhi lagaa vo sapna thaa dekh raha
Aur phir uskee aankh se aansoo baha.

Guruji ne Apne haath se usey ashirwaad diya
Fakir ne bhi jhuk kar Unka charan sparsh kiya
Usee pal Guruji ho gaye antardhan
Dekhta hee reh gaya fakir vahaan.

Khushboo abhi bhi thi, phir hoti gayi kumm
Lekin fakir ko nahin hua thoda sa bhi gumm
Antas ke naynon mein Guruji kee chhavi basaaye
Usne vaheen par nritya sangg geet gaaye
Pashu pakshi bhi dekhkar muskuraaye
Taruvar bhi phooley nahin samaaye.

Baahar aur bheetar mangal chhaaya
Fakir ne Guruji ka sakshat darshan paaya
Kehne ko jo thaa fakir, vo asal mein hua sabse ameer
Guruji ka shukr kiya usne aur saraahi apni taqdeer.

🌹🌹🌹🌹🌹🌹🌹

Jai Guruji 🙏🙏
Dhirja

Ik Mastt Sa Fakir (05/29/2025)

May 22, 2025

Om Namaha Shivaya
Aaj Ka Suvichaar 🙏🏻🙏🏻

#2650

              Karam Bade Balvaan

Karam bade balvaan, musaafir
Karein ve kismat ka nirmaan
Par sabse bade Bhagwaan, musaafir
Sabse bade Bhagwaan.

Bhagwaan swayam dharti par aaye
Lekar roop Guruji Maharaj ka
Unhonei Apni sharan mein liya kitnon ko
Anginat jann lete Hain naam Unn sartaj ka.

Rakhte Ve koi bhed bhaav nahin
Har bhakt ko dete Hain pyaar
Sabhi dho rahe hain jo karmon ka bhaar
Usey kumm karne aaye Guru sarkar.

Karmon se kaheen adhik balvaan
Hain Guruji Maharaj karunanidhaan
Tabhi toh abhi takk bach paaye hain hum insaan
Jinhe Guruji ne banaaya Apni santaan.

Varna jaane anjaane mein
Kiye hongei humne dushkarma kitne
Ye toh kewal Guruji hee jaanein
Phir bhi Ve Hain dayavaan itne.

Bakhshte rehte Hain Ve bakhshanhaar
Karte Hain Apni kripa dwaara sabka uddhaar
Utarvaate Hain bhakton ke karmon ka bhaar
Taaki balvaan karam na bann kar reh jaayein bhaar.

Beshak karam balvaan Hain
Par Guruji meharbaan Hain
Unkee marzi ho toh lekha bhi likh dete Hain dobaara
Bhaagya nikhaar Ve dete Hain saara
Parantu zaroori hai Unhe aur Unke hukm ko maan-na
Zaroori hai ye jaan-na
Ki rakhna hoga Unhe rijhaakar
Khud achcha insaan bann kar Unhe dikhaakar
Rakhte huye nek neeyat, nek kriyamaan karam
Nibhaate huey ruhaaniyat aur insaaniyat ka dharam
Varna is jeevan mein vyarth chala jaayega samay
Is baat mein nahin hai koi bhi sanshay.

Musaafir, Is jeevan ke dauran
Karta chal Guruji ka gungaan
Tu banaa balvaan apne mann ko
Taaki vo rok sakey vikaaron ke aakraman ko.

Guruji ka bakhsha simran karta chal
Taaki badhta rahe tera manobal
Vikaaron ka aakraman jaayega tal
Manobal kaam aayega aaj aur kal.

Sab kuch antar sambandhit hai
Ye jaan lene mein tera hitt hai
Guruji se judi rahegi jo teri rooh kee taar
Toh tujhe ye smaran hoga baar baar.

Pichhle karmon se milee ye kismat
Abb ke karmon se aagey kee kismat banegi
Aaj ke balvaan karam aise hon ki unke dwaara ho tere kalyaan ka nirmaan
O musaafir, Guruji kee bakhshi chetna aur sumat se apni soch aur karam par deta chal tu dhyan.

🌹🌹🌹🌹🌹🌹🌹

Jai Guruji 🙏🙏
Dhirja

Karam Bade Balvaan (05/22/2025)

April 25, 2025

Om Namaha Shivaya
Aaj Ka Suvichaar 🙏🏻🙏🏻

#2623

         Guruji Ke Darshan Kee Pyaasi

Guruji ke darshan kee pyaasi
Guruji se milne aayi daasi
Shraddha ke phool thi laayi
Guruji ko milne ke khayaal se phooli na samaayee.

Guruji mein hee khoyi rehti thi vo
Sabse Guruji kee baatein kehti thi vo
Ve dete Hain har pal itna pyaar
Sabhi ko bataati thi baarambaar.

Guruji ke satsang sunti sunaati thi
Guruji kee masti mein jhoomti jaati thi
Guruji ke hukm ko sada rakhti thi sir aankhon par
Guruji kee raza mein raazi rehkar beet raha thaa uska safar.

Uth-te baith-te sotey jaagtey
Kaam karte huey aur chaltey bhaagte
Rehti thi vo Guruji kee yaad mein
Magn Unke ashirwaad mein.

Aaj bhi shraddha ke phool liye
Jalaaye huey mann mein bhakti ke deeye
Pahunchi Unhee Guruji ke darbar
Jinke charnon mein thaa uska sansaar.

Guruji baithey thei aasan par
Daasi ne Unke aadar mein jhukaaya sir
Shraddha ke phool arpit kiye Guruji ke charan mein usne bade pyaar se
Uskee rooh gadd gadd honei lagi Guruji ke deedar se.

Uske mukh se koi lafz nikal na paaye
Toh aankhon ne apne tareeke se kehne ka kaam kiya
Aankhein num thi par muskuraa rahi thi
Guruji ne toh daasi ka saara bhaav jaan liya.

Guruji ne apna haath rakha daasi ke sir par
Daasi ko apne bheetar aaya Guruji ke jyotirmay roop nazar
Ek pal dekhti thi Guruji ko aasan par
Dooje pal uss jyotirmay roop ko
Mantramugdh ho gayi dekh kar
Guruji kee ye leela anoop vo.

Guruji daasi ko dekh kar muskuraaye
Uskee sthiti Ve toh thei jaan paaye
Unhonei daasi ko Apna anant saanidhya bakhsha
Daasi ko milee sada ke liye Unkee sampoorna suraksha.

Apni jhoothi chai daasi ko pilaakar
Daasi ko ashish dekar vidaa kar
Guruji ne dhanya kar deeya daasi ko
Nirantar simran bakhsh deeya uss pyaasi ko.

Hua bhakti mein leen daasi ka uddhaar
Gehra hota gaya uska Guruji ke liye pyaar
Guzaare daasi ne jeevan ke din chaar
Aur phir Guruji usey Apni goad mein le gaye uss paar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Darshan Kee Pyaasi (04/25/2025)

March 31, 2025

Om Namaha Shivaya
Aaj Ka Suvichaar 🙏🏻🙏🏻

#2598

           Guruji Kee Deewaani Thi

Guruji kee deewaani thi
Duniya mein rehte huey duniya se begaani thi
Guruji se milan kee pyaasi thi
Isee vajeh se usey udaasi thi.

Har din har raat karti thi intazaar
Ki Guruji aayenge uske dwaar
Chai aur naivedya rakhti thi Unke liye
Jalaati thi bhakti ke anginat deeye.

Guruji ke liye geet gaati rahi
Ghar ka aangan sajaati rahi
Anekon din raat beet gaye intazaar mein
Kabhi roti thi, kabhi muskuraati thi Guruji ke pyaar mein.

Parantu ho na paaye Guruji ke darshan
Niraash sa honei lagaa deewaani ka mann
Aansoo beh beh kar thakk gaye
Par aisa nahin ki ve ruk gaye
Muskuraahat labon ko lagne lagi thi bhaari
Aur muskuraahat ne chod dee labon se karni yaari.

Deewaani koshish karti rahi simran kee
Par itnee udaaseen dasha thi mann kee
Ki siwaaye lene Guruji ka naam
Uss se na ho paa raha thaa koi bhi aur kaam.

Guruji kee yaad mein rehte rehte
Mann hee mann Unse kuch kuch kehte
Beet gaye na jaane kitne din raat
Ik pal aaya jabb milee darshan kee saugat.

Baithi thi ghar kee dehleez par
Aaya ek fakir
Deewaani usey dekhkar aakarshit hui
Hui thodi si adheer.

Fakir kee aankhon mein ik chamak thi noorani
Jisey dekh kar bhaav vibhor hoti gayi veh deewaani
Uskee rooh ne dee gavaahi
Ki Guruji Hain vo fakir roopi raahi.

Deewaani toh jaise hui paagal Guruji ke pyaar mein
Ek baar mein hee hansne aur ronei lagi Unke deedar mein
Bhool gayi chai aur naivedya arpit karna
Bhool gayi Unke liye jal bharna.

Fakir ke roop mein aaye huey Guruji muskuraaye
Ve toh deewaani ko darshan dene ke liye thei aaye
Unhonei deewaani se kaha, “Kalyaan kitta” aur aankhein leen moond
Deewaani thi Unke charnon mein aur uspar barsi Guruji kee aankhon se ik boond.

Guruji kee hui aisee nadar
Ki deewaani toh gayi tarr
Guruji ne diye usey Shivlinga aur Om ke bhi darshan
Aur phir Unhonei chhaka naivedya ka ann.

Deewaani ne jee liye ye pal anmol
Dekhti rahi, veh kuch na paayi bol
Guruji ne Apna haath rakha uske sir par
Deewaani uthi Unke charnon ko choom kar
Poora hua deewaani ka armaan
Aur Guruji ho gaye antardhaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Deewaani Thi (03/31/2025)

March 6, 2025

Om Namaha Shivaya
Aaj Ka Suvichaar 🙏🏻🙏🏻

#2573

                  Aapka Swaroop

Param poojya Guruji Maharaj,

Jabb bhi kabhi
Kaheen bhi
Dikh jaata hai Aapka swaroop
Hota hai Aapki oar aakarshan anoop
Aapka hai hee itna pratibhamayi roop
Kyunki Aap swayam Hain SadaShiv ke roop.

Aapke chehre par aisee ruhaani chhavi
Jiska poora bakhaan kar na paaye bade se bada kavi
Itna sundar Aapka abhamandal
Ki poora ghar hee ho jaaye ujjwal
Aapke naynon ka toh kya kehna
Jee chaahe ki abb Unhee mein hai rehna
Aisee hai Aapke naynon kee gehraayee
Ki meri ekaagrata jaati hai Unhee mein samaayee
Chamakte Hain Aapki naasika aur gaal
Aapke labon ko dekh kar bhool jaaoon apna har sawaal.

Swaroop dekh kar laage ki kaan Aapke
Saari sangat kee baatein rahe hain sunn
Haathon ko kabhi kabhi gaal par rakhe
Na jaane Aap gungunaate Hain kaunsi dhun?

Maathe par itna noorani tej
Aur teesri aankh ke darshan
Jisey jabb dekhoon gaur se
Toh veh cheer de mera antakaran.

Sees Aapka toh maano Shivlinga swayam
Ye yakeenan nahin hai mera bhram
Kyunki Aap toh khud hee Hain Parabrahm
Jo sanvaarte bhi Hain hamaare karam.

Kisee swaroop mein mudraayein haathon dwaara
Jinse anugrahit ho sangat samooh saara
Toh kisee swaroop mein Aap dikhein karte namaskaar
Saari sangat ko maano rahe hon taar.

Kisee swaroop mein ashirwaad dete huey Aap aate Hain nazar
Har swaroop ka hota hai itna gehra aur prataapi asar
Besharte dekha jaaye jodkar seedhi taar
Aur prem aur shraddha se nihaara jaaye baar baar.

Seedhi taar se jodkar rooh ko Aap Paramatama ke sangg
Aapke har swaroop mein har bhakt ko dikhein bhinn bhinn darshan ke rangg
Jo aur jaisa Aap jisey chaahein dikhaana
Usey milta hai vaise hee darshan ka khazaana.

Aksar bhakt jann karein Aapke swaroop ko viraajmaan
Ghar ke kamron ya puja sthaan mein
Koi koi toh inhe rakhein batuye ya pustak mein bhi
Kaheen bhi ho, Aap swaroop mein se jhankte Hain har bhakt ke girebaan mein.

Koi rakhe Aapke swaroop ko apni gaadi mein
Koi apne takiye ke paas
Khaaskar jabb koi bhakt hota hai udaas
Ya jabb karni hoti hai Aapse ardaas
Toh Aapke swaroop se hota hai ehsaas
Ki Aap Hain angg sangg, bilkul aas paas.

Sach mein Aapka swaroop kewal tasveer nahin
Kyunki har swaroop dwaara hotey hain Aapke darshan
Aap swaroop dwaara baatein sunte aur karte Hain
Aap swaroop dwaara kitnon ke roag, kasht, aur paap harte Hain.

Aapke har swaroop mein hai itnee ruhaani shakti
Ki veh shakti protsaahit karti hai bhakti
Aapko aur Aapke har swaroop ko koti koti naman
Aapki sangat karey Aapke har swaroop mein Aapka vandan
Sumat aur nishtha bhaav bakhshiyega aisa ki kabhi na karein Aapke kisee bhi swaroop ka tiraskaar
Aapko aur Aapke har swaroop ko tahe dil se
shukrana baarambaar.

🌹🌹🌹🌹🌹🌹🌹

Jai Guruji 🙏🙏
Dhirja

Aapka Swaroop (03/06/2025)