Tag: suvichaar

March 6, 2025

Om Namaha Shivaya
Aaj Ka Suvichaar 🙏🏻🙏🏻

#2573

                  Aapka Swaroop

Param poojya Guruji Maharaj,

Jabb bhi kabhi
Kaheen bhi
Dikh jaata hai Aapka swaroop
Hota hai Aapki oar aakarshan anoop
Aapka hai hee itna pratibhamayi roop
Kyunki Aap swayam Hain SadaShiv ke roop.

Aapke chehre par aisee ruhaani chhavi
Jiska poora bakhaan kar na paaye bade se bada kavi
Itna sundar Aapka abhamandal
Ki poora ghar hee ho jaaye ujjwal
Aapke naynon ka toh kya kehna
Jee chaahe ki abb Unhee mein hai rehna
Aisee hai Aapke naynon kee gehraayee
Ki meri ekaagrata jaati hai Unhee mein samaayee
Chamakte Hain Aapki naasika aur gaal
Aapke labon ko dekh kar bhool jaaoon apna har sawaal.

Swaroop dekh kar laage ki kaan Aapke
Saari sangat kee baatein rahe hain sunn
Haathon ko kabhi kabhi gaal par rakhe
Na jaane Aap gungunaate Hain kaunsi dhun?

Maathe par itna noorani tej
Aur teesri aankh ke darshan
Jisey jabb dekhoon gaur se
Toh veh cheer de mera antakaran.

Sees Aapka toh maano Shivlinga swayam
Ye yakeenan nahin hai mera bhram
Kyunki Aap toh khud hee Hain Parabrahm
Jo sanvaarte bhi Hain hamaare karam.

Kisee swaroop mein mudraayein haathon dwaara
Jinse anugrahit ho sangat samooh saara
Toh kisee swaroop mein Aap dikhein karte namaskaar
Saari sangat ko maano rahe hon taar.

Kisee swaroop mein ashirwaad dete huey Aap aate Hain nazar
Har swaroop ka hota hai itna gehra aur prataapi asar
Besharte dekha jaaye jodkar seedhi taar
Aur prem aur shraddha se nihaara jaaye baar baar.

Seedhi taar se jodkar rooh ko Aap Paramatama ke sangg
Aapke har swaroop mein har bhakt ko dikhein bhinn bhinn darshan ke rangg
Jo aur jaisa Aap jisey chaahein dikhaana
Usey milta hai vaise hee darshan ka khazaana.

Aksar bhakt jann karein Aapke swaroop ko viraajmaan
Ghar ke kamron ya puja sthaan mein
Koi koi toh inhe rakhein batuye ya pustak mein bhi
Kaheen bhi ho, Aap swaroop mein se jhankte Hain har bhakt ke girebaan mein.

Koi rakhe Aapke swaroop ko apni gaadi mein
Koi apne takiye ke paas
Khaaskar jabb koi bhakt hota hai udaas
Ya jabb karni hoti hai Aapse ardaas
Toh Aapke swaroop se hota hai ehsaas
Ki Aap Hain angg sangg, bilkul aas paas.

Sach mein Aapka swaroop kewal tasveer nahin
Kyunki har swaroop dwaara hotey hain Aapke darshan
Aap swaroop dwaara baatein sunte aur karte Hain
Aap swaroop dwaara kitnon ke roag, kasht, aur paap harte Hain.

Aapke har swaroop mein hai itnee ruhaani shakti
Ki veh shakti protsaahit karti hai bhakti
Aapko aur Aapke har swaroop ko koti koti naman
Aapki sangat karey Aapke har swaroop mein Aapka vandan
Sumat aur nishtha bhaav bakhshiyega aisa ki kabhi na karein Aapke kisee bhi swaroop ka tiraskaar
Aapko aur Aapke har swaroop ko tahe dil se
shukrana baarambaar.

🌹🌹🌹🌹🌹🌹🌹

Jai Guruji 🙏🙏
Dhirja

Aapka Swaroop (03/06/2025)

February 12, 2025

Om Namaha Shivaya
Aaj Ka Suvichaar 🙏🏻🙏🏻

#2551

                 Zindagi Khadi Hai

Zindagi khadi hai gambheerta se
Lene ik nayi pareeksha har moad par
Beshak ye tere is janam ka dosh nahin
Ye pichhle janmon ka praarabdh ke roop mein hai asar.

Badon mein bhi sabse bade Hain Guruji
Saari sangat ke angg sangg khade Hain Guruji
Tere angg sangg bhi Ve Hain yakeenan
Is vishwaas kee vel thaame jee ye jeevan.

Guruji paalanhaar Hain
Guruji taaranhaar Hain
Beshak der se aaye teri baari
Awashya duur hogi teri vipadaa saari.

Tu Guruji se jodey rakh seedhi taar
Ye judaav tujhe dega saantvanaa baarambaar
Nishchit hai tera uddhaar
Guruji kee kripa paata hai saara sansaar.

Karta chal tu Guruji se yachna
Kumm hoti jaayegi teri yatna
Unkee kripa se sudhar jaayenge tere pichhle sanskaar
Guruji le chalenge tujhe ruhaani unnati ke dwaar.

Guruji kee kripa se praarabdh katt jaayega
Zindagi se gambheerta ka baadal hatt jaayega
Tu apni oar se reh honhaar
Guruji sambhaalenge tera ghar sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Khadi Hai (02/12/2025)

February 11, 2025

Om Namaha Shivaya
Aaj Ka Suvichaar 🙏🏻🙏🏻

#2550

            Vo Sukoon

Dekh rahe thei nayn mann ke
Beete huey lamhe jeevan ke
Kabhi nayn muskuraaye
Toh kabhi nayn bhar aaye.

Phir vo pal bhi aaya yaad
Jabb pehli baar suna thaa Guruji ka naam
Usee samay dil ne kiya Unka dhanyawaad
Jinke charnon mein mil gaya mujhe teerath dham.

Mai maanoon Unmein Hain sabb
Jo mai jaanti hee nahin thi tabb
Guruji ne mujhe apne se joda kabb
Ye toh jaanein Ve Rabb.

Naynon ko muskuraane ka ho gaya chaav
Guruji ke prati umadta hai aisa bhaav
Jo shabdon mein bayaan karna hai mushkil
Buss, Unkee yaad mein rehne lagaa hai dil.

Abb bhi aise lamhe aate rehte hain
Jinhe nayn kabhi kabhi rokar sehte hain
Lekin abb hai pehle se kaheen zyada himmat
Jo yakeenan hai Guruji kee inaayat.

Jaise bhi haalaat hon, shukrana mein haath jud jaate hain
Nakaaraatmak vichaaron mein ramm jaane ke bajaaye sakaaraatmakta kee oar mud jaate hain
Kyunki jo laagey mujhe pratikool, kya maalum vo ho mere bhale ke liye
Guruji sada kalyaan karenge, jalaaye rakhne zaroori hain is vishwaas ke deeye.

Jyot se jyot jalti jaayegi
Niraasha dhalti jaayegi
Jo param pita Guruji yahaan takk laaye Hain
Jinhonei kitne sankat paar karaaye Hain
Ve bakhshte rahein bharosa bharpoor
Ve kabhi na karein mujhe Apne se duur
Jaanti hoon Unkee sharan mein hee milega vo sukoon
Jo meri rooh na jaane kitne janmon se rahi hai dhoondh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vo Sukoon (02/11/2025)

February 7, 2025

Om Namaha Shivaya
Aaj Ka Suvichaar 🙏🏻🙏🏻

#2546

                  Guruji Se Pyaar

Guruji se arzi kar ki tu Unse pyaar badhaa paaye
Unke naam ka rangg chadhaa paaye
Isee se khilega teri rooh ka chehra
Ye rangg hai har rangg se gehra.

Ye rishta hai ruhaani
Iskee pavitrata suhaani
Na kar naadaani
Pyaar badhaa le, praani.

Is rishte mein sada karna Guruji ka aadar
Aur koi saaf karva nahin sakta tere karmon kee mayli chaadar
Guruji jaanein tere pichhle janmon kee kahaani saari
Is rishte par vishwaas rakh, Ve karmon ka bhaar utaarenge baari baari
Unke sangg judi seedhi taar kee shakti hai apaar aur nyaari
Is judaav mein behti hai Unkee mamta pyaari.

Is behte huey amrit mein teri rooh ke daag dhulenge
Pichhle karmon ka bhaar kumm hoga aur kismat ke dwaar khulenge
In sabke dauran Guruji kee praapti ka lakshya bhool na jaana
Varna jabb hosh mein aayega, toh padega pachhtaana.

Is rishte kee tu kar kadar
Is rishte par poora bharosa dhar
Ye rishta hai sabse ooncha var
Is rishte ke liye Guruji ka shukrana kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Pyaar (02/07/2025)

February 6, 2025

Om Namaha Shivaya
Aaj Ka Suvichaar 🙏🏻🙏🏻

#2545

    Bin Suney Gurbani

Bin suney gurbani
Kitnee neeras si thi zindagaani
Guruji kee hai badi meharbaani
Ki Ve Apni sangat ko sunvaate Hain Gurbani.

Kaanon se hota hai jabb iska shravan
Toh itna sukoon paata hai mann
Aur dheere dheere usey yoon atmasaat kar leti hai dil kee dhadkan
Ki iskee goonj aur iske spandan se hee chalne lagta hai jeevan.

Gurbani marham hai har ghaav kee
Gurbani prerak hai shuddh bhaav kee
Ye hai sahaayak aur aushadhi har beemaari mein
Gurbani se hum kho jaate hain Guru naam kee khumaari mein.

Anugrahit karey gurbani ka sur aur saaz
Madhur laagey iskee awaaz
Gurbani hai mahasaagar gyan ka
Gurbani hai strot aur sahaara simran aur dhyan ka
Amrit hai baani, na ki kewal paani
Aisee prataapi hai gurbani.

Gurbani sunkar na bhi aaye samajh
Toh bhi is se uljhanein jaati hain sulajh
Gurbani ka prabhaav hai itna kalyaankaari
Iske shravan manan se aksar duur ho jaati hai beemaari.

Kabhi kabhi aansoo behte hain sunte huey Gurbani
Suna aur maana hai ki vo hai pavitrikaran kee nishaani
Sunn-ne mein bhaav bhari
Jiskee gurbani se liv judi
Uske antas mein umad jaaye anand kee leher
Aur manan chal paaye aathon peher.

Suni toh pehle bhi thi gurbani
Par Guruji kee sharan milne ke baad
Gurbani ke sahaare Guruji kee yaad se rahe dil aabaad
Gurbani se judaav hua hai anokha
Guruji ka shukr hai ki Unhonei diya ye haseen mauka.

Jeevan ka safar hai ruhaani
Murshid aur meet hai Gurbani
Gurbani kee rachna hui Guruon dwaara
Govind aur Guru Hain ekmaatra sahaara
Guru Govind ek Hain
Beshak naam anek Hain
Guru roopi hai Gurbani swayam
Iskee ruhaaniyat mein rehkar magan
Hota rahe saari sangat ka bhalaa
Guruji sab ko bakhshein chadhdi kala.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bin Suney Gurbani (02/06/2025)

February 5, 2025

Om Namaha Shivaya
Aaj Ka Suvichaar 🙏🏻🙏🏻

#2544

Maalik Meharbaan Meet Mere

Param poojya Guruji,

Maalik meharbaan meet mere
Aap jaanein mainey liye hain kitne janmon ke phere
Mai toh in baaton se anjaan hoon
Agyani, nimaani, naadaan hoon.

Kis janam mein kya thi mai
Aur kya kiya, kya nahin kiya
Jiska parinaam bhugat rahi hoon
Mai in sawaalon ka kya jawaab doon?

Mere liye ye sab hain paheliyan
Jinhe boojhne mein mai hoon asamarth
Aisee sumat bakhshiye
Ki is janam ko na jaane doon vyarth.

Jabb takk janam maran ke silsiley mein rahoon
Aapki sharan mein rahoon
Hogi ye mere liye sabse shubh saugat
Ki Aap mujhe dein Aapki marzi kee daat.

Kyunki mera kya hai, mai toh naadaani mein maang loon kuch pratikool
Aur phir pachhtaaoon kar ke usey qubool
Nahin karna chaahti mai aisee koi bhool
Surakshit rakhiye banaakar mujhe Apne charnon ke taley kee dhool.

Aapke charnon ke taley dabti rahoongi toh tarti jaaoongi
Apne kalyaan ke bhandaar bharti jaaoongi
Rehna chaahti hoon har janam mein Aapki meher kee mohtaaj
Aisee rehmat kar dena mujh par, mere sundar sartaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maalik Meharbaan Meet Mere (02/05/2025)

February 4, 2025

Om Namaha Shivaya
Aaj Ka Suvichaar 🙏🏻🙏🏻

#2543

      Beet Chuka Hai Bahut Samay

Beet chuka hai bahut samay
Peechhe mud kar dekho agar
Is satya mein nahin hai koi sanshay…
Bahut samaa shesh hai magar
Isliye niraash na hona tum
Himmat aur utsah na khona tum
Bachi hai chalne ke liye aagey kee dagar
Abb kiye huey parishram ka hoga sukhdayi asar.

Ho gaya jo hona thaa
So liya jitna sona thaa
Abb jaag kar khud ko sambhaalo
Guruji ke liye samay nikaalo
Varna kaheen der na ho jaaye
Aur tumhaari chetna pachhtaaye.

Abb na do khud ko aur dhokha
Aaya hai sudharne ka mauka
Guruji ne liya hai Apni sharan mein
Leen ho jaao tum Unke kamal charan mein.

Unse apni rooh kee taar joad lo
Jitna ho sakey Unhee kee oar dhyan moad lo
Guruji ko yaad tum karte chalo
Unke vachan mein yoon dhalo
Ki bin sawaalon ke Guruji kee maano
Guruji ko apna sab kuch jaano
Kyunki hakeekat hai hee ki Ve sab kuch Hain tumhaare
Ve Hain sarvopari sarvottam sahaare.

Tumhe bulaakar Apne dwaare
Unhonei chamkaaye Hain tumhaare naseeb ke taare
Unpar vishwaas dhar kar dekhte chalo tum nazaare
Guruji bade kripalu Hain, kar denge tumhaare vaare nyaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Beet Chuka Hai Bahut Samay (02/04/2025)

February 3, 2025

Om Namaha Shivaya
Aaj Ka Suvichaar 🙏🏻🙏🏻

#2542

Guruji kee Sharan Mein Safar

Guruji kee sharan mein safar
Anokhe dhangg se jaata hai guzar
Guruji kee leela se raasta hai ruhaani
Pehle kabhi na thi, aisee ho jaati hai zindagaani.

Utaar chadhaav toh rehte hain jeevan ka hissa
Chalta rehta hai karmon ke hisaab ka bhi kissa
Lekin safar kee gati aur dhun hoti hai gazab kee
Beshak kabhi kabhi laagey ye ajab si.

Na pandit, na pravachan
Kewal Guruji ke hukm aur charan
Aisa hai Guruji ka vidhi vidhaan
Kyunki kewal Guruji hee Guruji Hain pradhaan.

Na chaahiye mehenga pehnaava
Na koi vehem ya dikhaawa
Na andhvishwaas, na koi chadhaava
Guruji dein adhyaatmik unnati ko badhaava.

Na chahiye koi pratinidhi ya dalaal
Guruji se seedhi taar jodkar bataana hai Unhe apna haal
Ve toh hamaare bin boley bhi jaanein hamaare khayaal aur sawaal
Ve Hain mahagyani, Ve hee mahadaani, Ve hee Hain Mahakaal.

Har din hai shubh, shubh hai har vela
Guruji ka koi bhakt kabhi nahin akela
Guruji ke saanidhya mein har vela hai suhela
Guruji ka pyaar paata hai Unka har chela.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji kee Sharan Mein Safar (02/03/2025)

February 1, 2025

Om Namaha Shivaya
Aaj Ka Suvichaar 🙏🏻🙏🏻

#2540

          Paawan Pyaar Aur Upkaar

Guruji ke pyaar mein jabb se hui hoon mai magan
Unhee kee yaad dilaate rehte Hain zameen aur gagan
Guruji kee hee baatein karne ka karta rehta hai mann
Mann karta hai Guruji kee hee baatein sunte rehne ka poora jeevan.

Pyaare Guruji ne mujhe Apni sharan mein liya
Kabhi na mainey dekha thaa jo, vo niswaarth pyaar Unhonei diya
Har pal, har din Unhonei daya se bharaa dulaar diya
Unkee mamta ne toh mera jeevan sanvaar diya.

Itne hain Guruji ke mujh nacheez par upkaar
Unkee prerna se aaya hai zindagi mein itna sudhaar
Ki bayaan karne ke liye kumm padd jaate hain alfaaz
Zindagi ne apnaa liya hai haseen ruhaani andaaz.

Bheetar se parivartan hota mehsoos hua hai aisa
Jaisa pehle hua thaa kabhi nahin abhi takk
Guruji se arzi hai pahunch paaoon uss mukaam takk
Jahaan chaahte Hain Ve mujhe lekar jaana
Unka aanchal banaa rahe mera ashiyaana
Phir na koi bhayy na hichkichaahat
Na koi sanshay na ghabraahat
Buss, suraksha jo hogi sampoorna har prakaar se
Aur tarti jaaoongi mai Guruji ke paawan pyaar aur upkaar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Pyaar Aur Upkaar (02/01/2025)

January 31, 2025

Om Namaha Shivaya
Aaj Ka Suvichaar 🙏🏻🙏🏻

#2539

               Raat Ho Chuki Thi

Raat ho chuki thi
Yaad nahin mai kis baat se dukhi thi
Shukr hai ki nahin thaa aaspaas koi shor
Chuppi chhaayi thi har oar.

Chuppi mein bhi sunaaayi dene lagi awaaz
Jaan na paa rahi thi awaaz ka raaz
Duniyavi nahin thi, pakki thi ye baat
Sochte sochte beet rahi thi raat.

Awaaz mein thaa bahut sakaaratmak spandan
Awaaz se judta jaa raha thaa mera mann
Jo thi pehle dheemi si
Vahee awaaz abb behtar dene lagi sunaayee
Bollne wala nazdeek aa raha hai, aisa hua ehsaas
Mera naam pukaar raha hai vo, iska hua mujhe aabhaas
Abb toh Unke kareeb aate aate, aane lagi ek anokhi manmohak khushboo
Divya noor hee swayam Hain ye, mujhse kehne lagi meri rooh.

Bin khole darwaaza
Unhonei pravesh kar liya bheetar
Ye toh khud hee roop Hain Ishwar ke
Is vichaar ne kiya mere mann mein ghar.

Usee kshan
Mujhe huey darshan
Unke viraat roop ke
Ve darshan anoop thei
Chehre par prakash itna
Mainey kabhi na dekha jitna
Muskuraahat pyaari si aur nazar mein anokha andaaz
Rutba aalishaan aur phir vahee awaaz.

Mai dekhti hee reh gayi
Kuch na saki bol
Lekin itna toh yakeen ho gaya
Ki ye darshan hain anmol.

Hichkicha kar poochha mainey
“Aap…”
Unhonei kaha, “Guruji” aur diya ashirwaad ka sanket Apne haath se
Mujhe toh ik pal mein poore jahaan kee khushiyan mil gayin saari
Unke darshan aur ashish kee anupam saugat se.

Mainey maatha teka
Jabb usee kshan phir dekha
Toh Guruji ho chukey thei antardhaan
Kintu Unkee khushboo abb bhi de rahi thi pramaan
Unkee chir-upasthiti ka
Unkee ruhaani aakriti ka.

Mere liye toh raat mein hee ho gaya thaa din sunehra
Mila jo Guruji ke shubh darshan ka pehra
Guruji ke darshan se gadd gadd thi rooh meri
Mann hee mann mein Unka shukrana karne mein mainey na kee deri
Unkee leela Ve hee jaanein, Ve Hain srishti ke swami
Unkee aseem sangat mein mai toh hoon ik deen si nimaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raat Ho Chuki Thi (01/31/2025)