Tag: suvichaar

January 30, 2025

Om Namaha Shivaya
Aaj Ka Suvichaar 🙏🏻🙏🏻

#2538

               Bhakti Mein Bhaav

Har viveki deta hai ye anmol sujhaav
Ki laabhkaari hai badhaana bhakti mein apna chaav
Shubh hai badhaate jaana bhakti mein apna bhaav
Isliye zaroori hai gehra karte jaana Guru Govind se apna judaav.

Ye nahin hai aaj kee dee gayi salaah
Is paraamarsh ne ujjwal kee hai anekon kee andheri raah
Satya hee satya hai is hidaayat mein
Is sujhaav ko maan kar chale jo ibadat mein
Vo bhakt yakeenan Guruji ko kar de prasann
Vo is judaav ke bin na guzaar paaye apna jeevan.

Bhaav ke ichhuk Hain Guruji Maharaj
Beete kal se bhi zyada shuddh bhaav hota chale aaj
Aur aane wale kal mein bhaav hota chale aur bhi zyada
Toh yakeenan nahin aayegi bhakti mein koi baadhaa.

Kyunki bhaav hai sarvopari sada
Agar ho bhi jaaye koi khataa
Toh Guruji toh Bholenath Hain
Bhole bhaav wale ke toh nishchay hee Ve saath Hain.

Bhaav se miltee hai oorja
Bin bhaav adhoori hai pooja
Bhaav se miltee hai prerna
Bhaav jaagrit karta hai chetna.

Maangte chalein Guruji se
Bakhshish achche aur sachche bhaav kee
Bhaav vishwaas ka
Bhaav nek prayaas ka
Bhaav shuddhi ka
Bhaav subuddhi ka
Shraddha ka bhaav
Niswaarth prem ka bhaav
Bhaav samarpan ka
Bhaav chintan ka
Bhaav stavan ka
Bhaav manan ka
Bhaav Guruji mein kho jaane ka
Bhaav, sada ke liye Guruji ka ho jaane ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti Mein Bhaav (01/30/2025)

January 29, 2025

Om Namaha Shivaya
Aaj Ka Suvichaar 🙏🏻🙏🏻

#2537

                   Guruji Kee Mauj

Mauj wale Guruji Hain
Hain Ve maa aur pita mahaan
Unkee haan mein haan milaayein
Unkee na ko bhi lein maan.

Kyunki Unkee haan aur na
Dono mein hai bhalaa hamaara
Unkee haan aur na hee toh hain
Hamaare liye har uljhan ka sahaara.

Ve Hain maalik, hum Unke das
Hum sewak, Ve swami
Kab aa jaayein Ve mauj mein
Ye baat kisee ne na jaani.

Unkee mauj mein jeena marna abb
Unkee mauj mein karna hai sabb
Yahee sahi hai chaahe hamein lagey ajab
Kyunki Guruji mein hee baste Hain Rabb.

Guruji dekh sakte Hain
Jo hum dekh sakte nahin
Ve jaanein hamaara ateet, vartmaan, aur bhavishya
Unhe gyat hai sab kuch sahi.

Abhi beshak jisey aisa lagaa nahin
Ve bhi jaan jaayenge ki satya hai yahee
Mauj wale Guruji kee mauj ka rakhein maan
Kyunki Unkee mauj mein hee behta hai hamaara kalyaan.

Guruji kee mauj ka gungaan hum gaayein
Unkee mauj ke satsang sunein aur sunaayein
Har pal Guruji kee mauj mein rehte jaayein
‘Jai Guruji’ hum kehte jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Mauj (01/29/2025)

January 28, 2025

Om Namaha Shivaya
Aaj Ka Suvichaar 🙏🏻🙏🏻

#2536

                Salaam

Mann ke vash mein jeete jeete
Bante gaye mann ke aise khaas gulam
Ki mann jo bhi, jabb bhi chaahe, maan jaate uskee
Aur mann ko swami jaan kar karte gaye usey salaam.

Abb bhi nahin hui hai der
Sanvaarne kee karmon ka heir-pher
Mann mein basegi Guruji kee jitnee yaad
Mann hoga anukool vichaaron se aabaad.

Waqt lagg sakta hai mann ke saaf honei mein
Kyunki samay lagta hai mayl dhonei mein
Jaise jaise karne denge Guruji ko pehra
Mit jaayega daag gehre se bhi gehra.

Hum toh kar sakte hain kewal apni oar se koshish
Uske liye bhi maangte chalein Guruji se ashish
Karna sab kuch Guruji ne hai kar ke hum par taras
Unkee meher se toh sangat par bakhshishein jaati hain baras.

Guruji Hain Guru, Govind, bhraata, aur meet
Karte Hain Ve humse preet
Kyunki na hum bhi nibhaayein Unse preet kee reet
Jiske dwaara hai bilkul mumkin paana apne mann par jeet.

Guruji kee kripa se Unke naam amrit ko pee paayenge
Guruji kee meher se mann ko vash mein kar ke jee paayenge
Chitt mein bass jaayega charul Shiv dham
Toh mann bhi jhuk kar karega salaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Salaam (01/28/2025)

January 26, 2025

Om Namaha Shivaya
Aaj Ka Suvichaar 🙏🏻🙏🏻

#2534

   Maya Kee Galiyan

Maya kee galiyon mein
Phirte huey deewaane
Bhog mein tu yoon gumm na jaana
Ki mushkil ho galiyon se laut kar aana.

Bhool bhulaiyan hai in galiyon ka safar
Yahaan se moh nritya karte huey jaata hai guzar
Kaheen hai tandav maut ka
Kaheen dharma sankat jeevan ka
Kaheen raag ko galati se prem hain kehte
Kaheen vikaaron ke vash main vyakul hain rehte.

Maya kee galiyon ke baahar
Hai azadi anokhi aur anmol
Phir bhi tujhe bhaa jaate hain
In galiyon ke mook bol.

Galiyon se guzarna bhi zaroori hai
Aakhir karmon kee majboori hai
Inse bachna hai namumkin
Inhe jhelna kathin hai Guru ke bin.

Guruji ke chintan mein hai veh shakti
Jo bann sakti hai tere aanasakt honei kee yukti
Tu hoga jitna Guruji kee oar aakarshit
Unhe utna hee zyada chetega tera chitt
Maya kee galiyon ke prati tera lubhaav jaayega mitt
Guruji kee kripa se hota jaayega tera hitt.

Maya kee galiyon se jude tere karam kat jaayenge
Kintu tere mann ko galiyon kee bhool bhulaiyan ke sundar sarp dass na paayenge
Guruji ke prataap ke aagey har koi jhuk jaata hai
Guruji kee shakti ke vaig se bhakt bhatakne se ruk paata hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maya Kee Galiyan (01/26/2025)

January 25, 2025

Om Namaha Shivaya
Aaj Ka Suvichaar 🙏🏻🙏🏻

#2533

    Jee Chaahta Hai

Mere param pita Paramatama
Mere Guruji Maharaj
Jee chaahta hai Aapse kuch kuch kehne ka
Aur phir kehte hee rehne ka…

Aapki mamta aur meher
Aapki nirmalta aur nadar
Inke bin na ho jeevan basar
Inke sangg sabse mushkil samaa bhi jaaye guzar.

Aapki anukampa aur Aapka pyaar
Aapki daya aur Aapka dulaar
Sanvaarte hain mera ghar parivaar
Sudhaarte hain mera sansaar.

Maalik sampoorna tribhuvan ke
Sudhar jaayein vichaar mere mann ke
Bhram kee doar ko toad ke
Maya ke mehel se muh moad ke
Aapki kripa se mai paaoon veh vivek
Jis se khatm ho mera sanshay pratyek.

Maanoon Aapki vidhi, Aapka vidhaan
Bin maange aur bin dhoondhe koi bhi pramaan
Sumat dete rahiye taaki na ho jaaoon mushkilon mein pareshaan
Sweekaarti rahoon ki khushnuma mausam ke aagey peechhe aa sakte hain tufaan.

Aisa bharosa bakhshiye mujhe, mere Bhagwaan
Kyunki usee mein toh hai mera kalyaan
Dete rahiye mujhe aisee shuddhi aur buddhi ka daan
Ki mai atmasaat kar paaoon Aapka diya hua gyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jee Chaahta Hai (01/25/2025)

January 24, 2025

Om Namaha Shivaya
Aaj Ka Suvichaar 🙏🏻🙏🏻

#2532

                Prapanch Ke Paar

Ye hai duniya ka rangg manch
Jo vaastav mein hai ek vishaal vishay prapanch
Shukr hai Guruji ne hamein Apni sharan mein le liya hai
Swayam par sudhaar ka kaam karne ka hamein mauka diya hai.

Ye mauka hai sunehra
Kyunki Guruji ka hai pehra
Hamaare har vichaar par
Hamaare vyavhaar par
Hamaare sudhaar par
Hamaare ghar parivaar par.

Is mauke ko na gavaayein
Apne hit kee oar lagg jaayein
Soye hain toh abb jagg jaayein
Is se pehle ki prapanch se itna thakk jaayein
Ki uske zor ke samaksh jaayein hum haar
Aur adhoora reh jaaye atma-sudhaar.

Mil raha hai Guruji se hamein maargdarshan
Paawan prayatn karte chalein hum har kshan
Taaki sanvar jaaye na ki kewal ye janam
Balki Unkee meher se safal ho har janam.

Har janam mein jaari rahega sudhaar
Toh Guruji kee kripa se hota rahega adhyaatmik uddhaar
Guruji Apni rehmat se hamein denge taar
Kabhi na kabhi hum awashya pahunchenge prapanch ke paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Prapanch Ke Paar (01/24/2025)

January 22, 2025

Om Namaha Shivaya
Aaj Ka Suvichaar 🙏🏻🙏🏻

#2530

            Rut Aayi Hai Pyaar Kee

Rut aayi hai pyaar kee
Guruji ke deedar kee
Bakhshishon kee bahaar kee
Daata ke dulaar kee.

Neevan ho jaa
Unmein kho ja
Jinhe paane ke liye tu tarasta hai
Jinka ashish tere bheetar barasta hai.

Tu ho raha hai sampann
Ho jaa tu prasann
Guruji jaante Hain toone kya kya mushkil sahi hai
Unkee kripa tujh par hoti jaa rahi hai.

Unhonei kiya hai tere mann ka paatr saaf
Kar diya hai Unhonei tujhe maaf
Batorta chal tu Unka ashirwaad
Usey sambhaal kar hota chal tu aabaad.

Guruji ne toh kaha thaa tujhse
Ki raasta na hoga aasaan
Toone na aane diya kisee aur ko
Guruji aur apne darmiyaan
Isliye tujhse itne khush Hain
Guruji Maharaj meharbaan.

Pyaar kee rut ka honei de asar
Tu bhi Guruji se pyaar kar
Bahut pyaari hai Guruji kee nadar
Buss, tu rakh thoda aur sabar.

Pyaar se nikhaar tu bhakti
Pyaar mein hai bahut shakti
Pyaar de rahe Hain tujhe swayam Parwardigaar
Tu pyaar se Unmein ramm kar ho jaa shukrguzaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rut Aayi Hai Pyaar Kee (01/22/2025)

January 21, 2025

Om Namaha Shivaya
Aaj Ka Suvichaar 🙏🏻🙏🏻

#2529

                Sheetalta Kee Khoj

Sheetalta kee khoj mein ho tum
Toh na dhoondho usey bhautikvaad mein
Duniyavi rishte bhi ruhaani nahin hotey aksar
Kya padna vaad vivaad mein.

Abb takk nahin jaana hai tumne
Toh jald hee jaan jaaoge
Kisee na kisee swaarth par tikey hain ye
Bhugatne par tum maan paaoge.

Bhautikta kee vayu se
Maya kee agni hogi aur zyada prajwalit
Kyun na shraddha kee vayu se
Bhakti kee agni ka honei do hitt?

Bhakti kee agni kee shakti aisee
Ki jalaa degi har paap ko
Aur leela aisee hai Guruji kee
Ki is se sheetalta milegi aapko.

Sheetalta, shanti ke roop mein
Santosh ke roop mein bhi
Inse milega aantrik sukh
Bhaagya kee chhaaon aur dhoop mein bhi.

Sheetalta hai swayam ke bheetar
Ye satya bhool jaata hai aksar
Bhog bhogte huey, khojne lagte hain usey
Baahar kee duniya mein aksar.

Maya kee agni se na hoga hitt
Bhakti kee agni se paap jaayenge mit
Guruji karte rahenge kalyaan
Bakhshte huey bharosa daan.

Sheetalta legi yoon chhoo
Ki sheetal ho jaayegi rooh
Sheetal hoga antakaran
Aur sheetal ho jaayega jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sheetalta Kee Khoj (01/21/2025)

January 20, 2025

Om Namaha Shivaya
Aaj Ka Suvichaar 🙏🏻🙏🏻

#2528

          Deen Daasi

Guruji ke kamal charnon mein
Sharan paane aayi ik deen daasi
Guruji ko uspar aayi daya
Mitne lagi daasi kee udaasi
Jabb se jee rahi thi vo
Thi veh Guruji ke darshan kee pyaasi
Diye usey Guruji ne Apne darshan
Aur na chodi kalyaan kee kasar zara si.

Kalyaan ke dauran
Aaye kayi imtehaan
Daasi ne toh samarpit kar diye thei apne praan
Apne Guruji ko, jaankar Unhe srishti mein sabse mahaan.

Kis kis vipadaa ka zikr karein
Jo aayi daasi ke jeevan mein
Yahaan takk ki khud ke swaasthya ne bhi na diya saath
Par pyaar badhta gaya uske mann mein.

Pyaar, Guruji ke prati
Aisee dee Guruji ne usey mati
Ki hanste rotey jaagte sotey
Guruji ke khayaal thei uske mann mein hotey.

Maangti rahi veh Guruji se bakhshishein
Guruji dete rahe usey ashishein
Khushi aur gumm ke roop mein
Apni kripa ke swaroop mein.

Thakk gaya beshak uska shareer
Kintu chetna se prerit raha daasi ka zameer
Jaanti thi Guruji ke charnon mein hai uskee taqdeer
Aur veh khud toh hai mehez ek fakir.

Miltee rahi usey bharose kee daat
Yoon hee jeete jeete har din raat
“Guruji sab sambhaalenge,”
Veh sabse kehti thi ye baat.

“Jinhonei sambhaala hai har bhakt ko aaj takk
Vo mujhe bhi sambhaalte rahenge athak
Guruji kee mahima hai anant aur akath.”
Daasi ye kehte kabhi na jaati thi thakk.

Daasi aur Guruji ka kaisa thaa naata
Kuch kuch aisee hai preet kee ye gaatha
Ismein basaa hai bhaav shukrana kee mithaas ka
Guruji kee raza mein razi rehna hai saar daasi kee har aas ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deen Daasi (01/20/2025)

January 19, 2025

Om Namaha Shivaya
Aaj Ka Suvichaar 🙏🏻🙏🏻

#2527

    Pardes Mein Aaye Panchhi Pyaare

Pardes mein aaye panchhi pyaare
Ye ghar nahin hai tera
Isliye soch samajh ke jeena
Bin maane isey sthaayi dera.

Sundar hai sansaar ye saara
Iske moh mein na phans jaana
Maya ka bhandar hai saara
Is se mohit na ho jaana.

Guruji ne tujhe bheja hai yahaan
Taaki tu chhoo le ruhaani aasmaan
Unke dar par aakar
Unse ashish paakar.

Rakhna tu apne pankh salaamat
Taaki tu azad hokar udta rahe
Guruji se maangta chal tu sumat
Taaki tu Unse yoon judta rahe
Ki tujhe kheench na paaye maya
Na badal paaye vo teri rooh kee kaaya.

Chaahega har vikaar
Ki vo karey tera shikaar
Tu Guruji ko keh aur pukaar
Ki Ve karte rahein tera uddhaar
Pehne rehna tu kavach Guruji ke naam ka
Taaki tu rahe surakshit
Prayaas karte rehna Unke naam japp aur dhyan ka
Taaki hota rahe tera hitt.

Udte udte is sansaar mein
Jabb tu paa lega Guruji ka dar
Tabb tu jaan lega
Ki vo hai tera asal ghar
Vahaan maaf hongei tere dosh
Vahaan tu paayega sukoon aur santosh
Mukammal hoga tera intazaar
Guruji qubool karenge teri pukaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pardes Mein Aaye Panchhi Pyaare (01/19/2025)