Tag: suvichaar

January 17, 2025

Om Namaha Shivaya
Aaj Ka Suvichaar 🙏🏻🙏🏻

#2525

     Deewaanapann

Guruji se ye judaav
Ismein ho aisa deewaanapann
Ki roam roam ramm jaaye
Guruji chaahein toh jeevan chale
Varna toh jeevan hee thamm jaaye.

Nahin thamti hai uss samay mein bhi
Guruji kee rehmat
Aaj ya kal har bhakt hota hai
Is satya se sehmat.

Kyunki Guruji kee rehmat nahin hai kewal bhautikvaad
Unkee rehmat mein hotei hain samast ashirwaad
Ji se hota hai pichhle karmon ke bhaar ka samaadhaan
Aur vartmaan tathaa bhavishya ke liye kalyaan.

Sabb hai aur hota rahe Guruji ke anusaar
Toh nishchit hai ki hoga beda paar
Guruji kee maante rehna hai zaroori
Chaahe veh lagne lagey majboori.

Judaav mein jo hoga deewaanapann
Toh Unka hukm aasaani se maan paayega mann
Guruji mein roam roam jaayega ramm
Deewaane ke liye toh kya khushi, aur kya gumm?

Na sudh budh din raat kee
Na chinta kisee baat kee
Har haalaat mein hoga deewaanepann ka nirmal nasha
Guruji ko samarpit hogi disha aur dasha
Sainkdon ko chaahne par bhi nahin milta pooran Guru
Abb takk nahin hua, toh kyun na abb ye deewaanapann ho jaaye shuru?

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deewaanapann (01/17/2025)

January 16, 2025

Om Namaha Shivaya
Aaj Ka Suvichaar 🙏🏻🙏🏻

#2524

       Baaki Sabb Hai Mithyavaad

Duniya mein rehne wale praani
Duniya ko apna matt lena samajh
Guruji ne tujhe Apne se hai joda
Taaki tu bheetar se jaaye sulajh.

Guruji kee yaad mein rehta jaa
Duniyadari mein na behta jaa
Ek Guruji hee Hain tujhe samajhne wale, koi nahin dooja
Unse kar tu aisa paawan prem, ki vahee bann jaaye pooja.

Guruji kee tu kadar kar
Shraddha rakh aur sabar kar
Arey, tu kuch nahin hai Unkee mehar bin
Tu Unkee rehmatein ginte ginte bhi nahin sakta gin.

Beshak bade se bade hain tere kiye huey paap
Gagan se aseem hai Guruji ka dayalu prataap
Unke ashish ke amrit mein hai anant pavitra shakti
Unkee kripa se ye shakti hai tere paapon ko dhonei kee yukti.

Aur koi nahin hai, na hee ho sakta hai
Tera bhai bandhu murshid maa aur nath
Aur koi nahin reh sakta hai har pal tere saath
Aur koi nahin thaame rahega sada tera haath.

Arey, tu toh jaanta bhi nahin hai
Ki har din tujhe kitne kashton se bachaate Hain Guruji
Teri mushkilon ko kitna kumm kar ke tujhse bhugatvaate Hain Guruji
Tu baar baar galati karta hai toh baar baar bhi aksar sikhaate Hain Guruji.

Dhoondh le beshak tu poore sansaar mein
Unn jaisa kaheen koi nahin tera shubhchintak
Yoon hee nahin bhakt ramm jaate hain Unke pyaar mein
Aur Unhee ko yaad karte hain antim kshan takk.

Guruji thei tujhse pehle
Guruji hongei tere baad
Guruji Hain divyata aur satya
Baaki sabb hai mithyavaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baaki Sabb Hai Mithyavaad (01/16/2025)

January 14, 2025

Om Namaha Shivaya
Aaj Ka Suvichaar 🙏🏻🙏🏻

#2522

          Taarne Wale Taral Taruvar

Taarne wale taral taruvar
Hain mere param poojya Guruvar
Neechhe Unkee chhaaon mein
Baithey huey Unke paaon mein
Antas yoon sheetal ho jaaye
Mann Unmein yoon kho jaaye
Ki na rahe koi sud-budh
Aur bhaav khud bakhud honei lagey shuddh.

Paapi bhi jaaye tarr
Jabb bakhshein Guruvar
Unkee rehmat ka asar
Hota hai saari sangat par.

Ye hai Unka hee badappan
Ki Ve karvaate Hain simran
Jis se raasta paata hai mann
Aur mann seekhta hai samarpan.

Duniyavee tufaan se Ve rakhte Hain hamein surakshit
Unkee kripa se pavitra paryaavaran mein saans leta hai chitt
Kyunki antakaran ramm jaata hai aise ruhaani samundar mein
Ki shukrana aur shuddhi ka bhaav umadta hai andar mein.

Jo dhyan karey in taruvar ke taley rakhkar neeyat nek
Guruji uss bhakt ko bakhshein vidya aur vivek
Ve jaanein har ek bhakt kee zaroorat pratyek
Yoon hee toh nahin Unkee chhaaon mein aana chaahein jann anek.

Guruji roopi taruvar dete dete na thakey kabhi
Unke ashish ko paane wale hotey hain kismat wale sabhi
In taruvar ka har phal hota hai kalyaankaari
In taruvar kee chhaaon mein surakshit rehti hai sangat saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Taarne Wale Taral Taruvar (01/14/2025)

January 11, 2025

Om Namaha Shivaya
Aaj Ka Suvichaar 🙏🏻🙏🏻

#2519

   Safalta Kee Subah

Safalta kee subah aa rahi hai
Jaag tu, abb jaag jaa
Bhaagya ka sooraj honei wala hai uday
Guruji angg sangg Hain, ho jaa nirbhay.

Andheri bhi rahi hai aur lambi bhi ye raat
Shukr hai Guruji ne bakhshi shraddha aur saboori kee daat
Varna tu yahaan takk na pahunch paata
Beech raaste mein tera haunsla toot jaata.

Kayi baar Guruji ne tujhe girne se bachaaya
Kabhi kabhi tu gira toh Unhonei tujhe uthaaya
Dekar saahas aur prerna
Aisee hai Unkee samvedana.

Jo tu seekha hoga girne se
Vo shaayad na seekh paata bin girey
Aksar zindagi kee bhaag daud mein
Kuch kadam lene padte hain dheere dheere.

Kismat ka imtehaan bhi toh thaa zaroori
Varna badh jaati aane wali subah se teri duuri
Tu chod de abb darna
Na chod koshish karna
Jin Guruji Maharaj ne tujhe saahas hai bakhsha
Ve swayam kar rahe Hain teri raksha
Unhonei tujhe Apne ashirwaad ka kavach pehnaaya hai
Is raat ka itna lamba samaa katvaaya hai
Pahuncha rahe Hain Ve tujhe subah kee dehleez par
Ummeed, ullaas, utsah se tu saja apna safar.

Bachi hui raat jaayegi tal
Buss, abb tu badhta chal
Lete huey Guruji ka naam
Karte huey Unhe saadar pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safalta Kee Subah (01/11/2025)

January 10, 2025

Om Namaha Shivaya
Aaj Ka Suvichaar 🙏🏻🙏🏻

#2518

                       Baatcheet

Chal rahi thi baatcheet
Bhakt kee rooh kee Guruji ke saath
Baatein huin itnee saari
Ki din se honei lagi thi raat.

Agya lene ka waqt aaya
Guruji ne usey Apne paas bulaaya
Rooh ne Guruji se kaha
Mainey yahaan jo bhi hai sahaa
Vo Aapki dee hui saboori se
Abb udaas hoon is duuri se
Is deh ke pinjre mein rehna hoga kabb takk?
Ye na jaanoon, magar jaanoon ki gayi hoon thakk
Ye deh hai beech mein Aapke aur mere
Kaydd kar ke rakhti hai mujhe shaam savere.

Mujhe is deh se anaasakt keejiye ruhaani taur par
Is deh ka kabhi tiraskaar na karoon, yaad rakhoon magar
Ki ye panch tattvon mein samaa kar ho jaayegi ik din poori
Jab ho aisa, tabb mit jaaye meri Aapse har duuri.

Shukrana ki Aapne rakha hai Apni sharan mein
Mai jahaan bhi rahoon, rahoon Aapke charan mein
Mera lakshya hai Aap mein samaana
Taaki safal ho mere safar ka fasaana.

Rooh ke bhaav se bhakt kee aankhein thi numm
Sarvgyani Guruji ne usey Apna ashish diya usee kshan
Rooh ko raahat milee uss baatcheet se
Rooh ne agya lee apne Param meet se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baatcheet (01/10/2025)

January 9, 2025

Om Namaha Shivaya
Aaj Ka Suvichaar 🙏🏻🙏🏻

#2517

                      Umdaa Udaan

Ruhaani azaadi tujhe rahi hai pukaar
Bin vehem bin ahem tu jeevan guzaar
Guruji ne thaami hai teri naiya kee patvaar
Is saubhagya ke liye lene padte hain janam kayi hazaar.

Guruji Hain Guruji ke roop mein Ish
Ve hee Hain nyaayaadheesh
Unke hukm ko rakhte huey sir aankhon par
Tayy kar tu zindagaani ka safar
Ruhaani hai tu, ruhaani tere vichaar
Ruhaani pankh phaila kar paar kar tu sansaar.

Guruji Hain tere maargdarshak
Guruji Hain tere sahaayak
Unse juda rahega toh azaadi choomegi tere paaon
Guruji tujhe paar karaayenge har veh sheher, basti, har gaaon
Jahaan se jude hongei tere karam
Taaki bhugat le tu unhe isee janam.

Mukt hokar tu karmon ke bhaar se
Udaan bharega tu is sansaar se
Rehte huey yaheen par
Is dharti, is zameen par.

Isliye apne saubhagya ko saraahte huey
Apne ruhaani pankh phailaate huey
Guruji kee mahima ke geet gaate huey
Tu yahaan par jeevan bitaate huey
Karta chal aagey badhne kee tayyaari
Apni umda udaan ko rakhte huey tu jaari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Umdaa Udaan (01/09/2025)

January 8, 2025

Om Namaha Shivaya
Aaj Ka Suvichaar 🙏🏻🙏🏻

#2516

                      Chalte Jaao

Chalte jaao, chalte jaao
Guruji angg sangg Hain tumhaare
Tumhaare har kadam par
Ve Hain tumhaare atoot sahaare.

Ve hee Hain
Ik Ve hee Hain
Sach mein dooja koi nahin
Chaahte huey bhi ho sakta nahin.

Alag sa hai sab ka safar
Safar toh jaayega hee guzar
Lekin Guruji kee jo hogi nadar
Toh uss nadar ka hoga jo asar
Vo saarthak banaa dega zindagaani ko
Poornata dega purusharth kee kahaani ko.

Dharma, arth, kaam, har bhog mein milega Guruji ka ashish
Guruji kee kripa se miltee rahegi bakhshish
Dukh katvaate huey
Karmon ka karz ada karvaate huey
Guruji le chalenge sukh kee oar
Aur Unke charnon mein milegi mukti kee bhor.

Beshak jeevan mein chal raha ho jaisa bhi daur
Guruji ke charnon se zyada suraksha mil nahin sakti kaheen aur
Isliye jaan lo ki tum bahut khushnaseeb ho
Bheetar jhaank kar dekho ki tum Guruji ke kitne kareeb ho.

Is kareebi mein hai tumhaara kalyaan
Sabko nahin milta ye sundar vardaan
Jiska atoot sahaara ho Guru ke roop mein swayam Bhagwaan
Uska har shwaas choomta hai Guru charnon ke noorani nishaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chalte Jaao (01/08/2025)

January 4, 2025

Om Namaha Shivaya
Aaj Ka Suvichaar 🙏🏻🙏🏻

#2512

         O Phulwaari, Pyaari Pyaari

O phulwaari, pyaari pyaari
Teri sundarta hai itnee nyaari
Tere phoolon kee har kyaari
Dikhaati hai teri khoobsoorati saari.

Tere phoolon kee mehek matvaali hai
Har phool kee chhavi niraali hai
Divya si lagti hai teri dastaan
Bataa toh, kaun hai tera baghbaan?

Phulwaari ne dee prem bhari muskaan
Sunaane lagi veh apni dastaan,
“Mai thi banjar si zameen
Nahin thi pehle itnee haseen
Rehti thi mai bahut udaas
Mann hee mann karti thi ardaas
Ki meri madad karne aisa koi aaye
Jo mere chehre aur dil ko muskuraahat de paaye.

Ik raat jabb mai so rahi thi
Aur need mein bhi ro rahi thi
Tabb jyoti kee ek kiran yoon jagmaaayee
Ki lagaa mitne lagi meri tanhaayee.

Aankhein khuli toh dekha mainey
Itna manohar nooraani insaan
Ki mujhe lagaa veh insaan ke roop mein
Swayam Hain Bhagwaan.

Mainey hichkicha kar poochha, Aap kaun?
Toh Ve muskuraate huey pehle toh rahe maun
“Guruji,” phir Unhonei kaha
Sunte hee mera ik aansoo baha.

Ho gaya mujhe yakeen
Ki mai banjar si zameen
Abb jaaoongi tarr
Paakar in Guruji ka var.

Mere dekhte dekhte Guruji ne liya viraat roop
Unhonei gagan kee oar haath kiya toh ho gayi sunehri dhoop
Amrit kee varsha honei lagi
Mai Unkee leela mein khonei lagi.

Mujhe mila Guruji ke charnon ke taley rehne ka shubh avsar
Unke charnon ke neeche dabb kar mai yoon gayi tarr
Ki mai jo thi banjar si dharaa
Mujhe mehsoos hua haraa bharaa
Mujhe mila Guruji ka ashirwaad
Mil gayi phulwaari bann-ne kee saugat.

Guruji ne Apna viraat roop dikhaaya
Mujhe Unmein Ishwar nazar aaya
Mere dekhte dekhte Guruji Huey antardhaan
Dekar mujhe pyaara sa vardaan.

Tabb se mai bann gayi pyaari si phulwaari
Mai apne phoolon ko deti hoon apni mamta saari
Guruji kee kripa se Unse judi rehti hoon
Jo bhi dil mein hota hai, Guruji se hee kehti hoon.

Mausam jaisa bhi ho
Mujh par Guruji ka haath hai
Yahee sabse badi baat hai
Ki Vo Ishwar mere saath Hai. “

Ye hai pyaari si phulwaari kee kahaani
Guruji ne sudhaar dee jiskee zindagaani
Guruji ka shukrana ki sajj sanvar gayi ye phulwaari
Guruji se ardaas ki nikhar jaaye ye duniya saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Phulwaari, Pyaari Pyaari (01/04/2024)