Tag: suvichaar

December 6, 2024

Om Namaha Shivaya
Aaj Ka Suvichaar 🙏🏻🙏🏻

#2483

                            Anant

Guruji ka sneh anant hai
Jo chalna rukey, ye usey chalaaye
Jeevan ka sabse udaas lamha bhi
Isee sneh ke sahaare guzar jaaye.

Guruji kee mamta anant hai
Guru goad mein bhakt ko sambhaale
Girne se bachaaye bhakt ko
Guru swayam hee bhakt ko paale.

Guruji kee shakti anant hai
Har chunauti ka hai ismein upaay
Guru bhakt ke liye har mushkil se ladey
Bhakt ke bina bataaye.

Guruji kee mahima anant hai
Bhalaa ho uska jo iska gungaan karey
Guruji dein bhakt ko abhay daan
Toh bhakt kyun kisee se darey?

Guruji kee kripa anant hai
Andhere mein bhi ujaala dikhaaye
Niraasha kee ghadiyon mein bhi
Santosh, saahas, aur dheeraj barsaaye.

Guruji kee daya anant hai
Har ghaav ko marham bann ye bhar paaye
Patit ko banaa de ye paawan
Patjhad mein bhi dikhla de saawan.

Guruji kee maya anant hai
Rachey ye leela nyaari har ghadi
Bhakton ko hairaan ye kar de
Anokhi aur adbhut hai badi.

Guruji ka ashirwaad anant hai
Har bhakt ka kalyaan karey
Koi bhakt is se vanchit na rahey
Ye ashirwaad sabhi kee jholiyaan bharey.

Aise prataapi Guruji ko saadar namaskaar
Anant, anant, anant ke swami aur srijanhaar
Bashar ka roop lekar dharti par aaye jo Shiv avatar
Har bhakt ko dene anant takk Ve Apna anant pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anant (12/06/2024)

December 5, 2024

Om Namaha Shivaya
Aaj Ka Suvichaar 🙏🏻🙏🏻

#2482

      Mann Kee Ritu

Badalta rahega baahar ka vaataavaran
Badalta na rahe vaataavaran mann ka
Mann kee ritu rahe sada suhaani
Toh sehejta se beet sakti hai zindagaani.

Guruji ne bakhsha hai simran
Jiske dwaara seencha jaaye jo mann
Toh baani roopi amrit se anubhav hogi sheetalta
Mann ke konei konei mein vaas karne lagegi nirmalta
Ye sheetalta aur nirmalta mann ko shant rakhne mein sahaayak banenge
Guruji Apni meher se mann ka bartan saaf karenge.

Sunenge hum Gurbani jitnee
Mann kee ritu sudharegi utnee
Hoga chintaaon ka haran
Hoga pavitrikaran
Sab Guruji ke ashish se
Unhee kee bakhshish se.

Nahin rukega vikaaron ka aakraman
Nahin rukega badalna baahar ka mausam
Lekin agar sthir aur balshaali ho jaayega mann
Toh ruhaani path par unnati karega jeevan.

Dharma, arth, aur kaam
Hain purusharth ke teen stambh ke naam
Inke sangg judi hai insaani jeevan kee yukti
Chautha stambh anivaarya hai, jiska naam hai mukti.

Mukti takk pahunchne ke liye
Anivaarya hai ruhaani unnati
Guruji ne liya hai hamein sharan mein
Ye hai hamaari khushkismati.

Unhee ke charnon mein jeevan yahaan
Unhee kee sharan mein swarg ka jahaan
Unhee ke aanchal mein mukti
Unhee kee suraksha mein atma ko miley tripti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Kee Ritu (12/05/2024)

December 3, 2024

Om Namaha Shivaya
Aaj Ka Suvichaar 🙏🏻🙏🏻

#2480

Hamaare Bheetar, Hamaare Aas Paas

Hamaare bheetar, hamaare aas paas
Hain sarvavyaapi Guruji Maharaj
Yaani ki Ve har sthaan par Hain viraajmaan
Isliye Ve hamaare kisee vichaar aur karma se nahin Hain anjaan.

Is satya ko yaad karna kuch bhi sochne se pehle
Isey dhyan mein rakhna kuch bhi karne se pehle
Aur koi dekhe na dekhe, aur koi jaane ya na jaane
Guruji mein basaa Rabb hamaare har vichaar aur karma ko pehchaane.

Daro na Unse, Unhe karo pyaar
Aur satark raho har baar
Jitnee zyaada jaagrit rahegi chetna
Utnee hee veh banegi prerna
Achche vichaaron ko vichaarne kee
Aur apne karmon ko sudhaarne kee.

Guruji nahin Hain Guru saadhaaran
Bahut prataapi hai Unkee maya ka aavaran
Kyunki Ve SadaShiv Hain swayam
Jinse bhaybheet rehta hai Yamm
Jinke kamal charan mein sukh hain saare
Jinkee leela ke nazaare hotey hain nyaare.

Bholenath Hain Guruji pyaare
Bhakton ka bhola bhaav karein pasand
Bhakton ke adheen Hain Ve
Unka ashirwaad hota hai akhand.

Khule hain Unke duss dwaar
Ve swayam Hain nirankaar
Anant aseem nirvikaar
Shukr hai ki Unhonei kiya hai hamein sweekaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hamaare Bheetar, Hamaare Aas Paas (12/03/2024)

December 2, 2024

Om Namaha Shivaya
Aaj Ka Suvichaar 🙏🏻🙏🏻

#2479

              Guruji Kee Yaad Mein

Guruji kee yaad mein
Guruji ke manan mein
Jo bhakt guzaar le apna samay
Kumm hotey chalein uske sanshay
Duur hota chale uska bhayy
Uddhaar uska hai bilkul tayy.

Zaroorat nahin usey kisee aur kee
Guruji usey disha dikhaayein har daur kee
Unka naam kavach baney suraksha raaste ke har moad kee
Aaj ya kal uske jeevan mein zaroor kiran dikhtee hai sunehri bhor kee.

Guruji kee yaad ke sangg rehna
Ye hai itna mehfooz gehna
Jis bhakt ne ye anmol gehna hai pehna
Usne har chunauti ko yoon hai sehna
Maano vo hai ek halka sa jhonka hawaa ka
Ya chhota sa ghoont kisee kadvi dawaa ka
Jiska zor jald hee khatm ho jaata hai
Aur bhakt aagey badh paata hai.

Guruji de rahe Hain jo shraddha aur saboori
Inke dwaara aur bhi jald mitegi Unse duuri
Tabb takk Unkee yaad ko hriday mein basaa lo
Ekant mein bhi Guruji ke sangg muskuraa lo
Unkee yaad mein Unhee ke sangg gungunaa lo
Anokha hai ye ehsaas, isey galey se lagaa lo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad Mein (12/02/2024)

November 29, 2024

Om Namaha Shivaya
Aaj Ka Suvichaar 🙏🏻🙏🏻

#2476

          Aapke Charnon Ke Taley

Param poojya Guruvar mere,

Aapke charnon ke taley rehne kee bhi nahi meri aukat
Phir bhi Aapne dee hai Apne charnon mein sir jhukaane kee daat
Kalpana bhi nahin kee thi ki kabhi milegi aisee sunehri saugat
Shukrana Guruji, ki Aapne diya hai ye anupam ashirwaad.

Aapke charnon kee mahima akhand hai
Aapke charnon mein hee sachkhand hai
Aapke charnon mein hai atulneeya sukh
Jiska antas Aapke charnon mein jaaye jhuk
Uss se pareshaaniyon ko moadna padta hai rukh
Kyunki Aapke charnon mein hai suraksha nishchit
Aapke charnon mein aane se ho jaata hai hitt.

Koi raat nahin rehti andheri
Nahin rehti jeevan mein ujaale kee deri
Barasta hai Aapka ashirwaad
Jo karta hai antas ko aabaad
Rooh takk tarne lagg jaati hai
Mann kee mai marne lagg jaati hai
Apni tuchhta ka badhta jaata hai ehsaas
Aapke charnon ka sukh hai itna khaas.

Jitna jhukta hai mann
Utna rukta hai veh kshan
Manan ke liye
Vandan ke liye
Aur jalte hain deeye
Ruhaani jaagriti ke
Sudharti aatmik aakriti kee.

In deeyon se hota hai aisa prakash
Jis se roshan hota hai apne bheetar ka mann roopi akash
Mulaakaat hoti hai seher se
Ye sab hota hai kewal Aapki hee meher se.

Guruji, Aapke charnon mein meher hai apaar
Aap hee Guru, Aap hee Parwardigaar
Aapke charnon mein aakar ho jaayega beda paar
Aapki kripa se badhta jaaye Aapke charnon ke prati mera pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Charnon Ke Taley (11/29/2024)

November 28, 2024

Om Namaha Shivaya
Aaj Ka Suvichaar 🙏🏻🙏🏻

#2475

               Kis Kis Baat Ka….

Kis kis baat ka karoon shukrana, mere daata
Kis kis daat ka karoon shukrana
Diya hai Aapne jo ruhaani khazaana
Uske bin na reh paaye abb ye dil deewaana.

Aapse judi hai taar Guruji, shukrana
Aapse mila hai pyaar Guruji, shukrana
Aapki raksha mein parivaar mera hai, shukrana
Aapke charnon mein sansaar mera hai, shukrana.

Mujhe Aapne Apne paas bulaaya, shukrana
Mujhe Aapne Apna das banaaya, shukrana
Apne charnon ke paas baithaaya, shukrana
Mujh par ashirwaad barsaaya, shukrana.

Sewa simran mein mujhe lagaaya, shukrana
Apne satsang mein mujhe bulaaya, shukrana
Apni mahima ka gungaan karaaya, shukrana
Apni kirpa ka bakhaan sunvaaya, shukrana.

Sadh sangat se milvaaya Aapne, shukrana
Langar prasad chhakvaaya Aapne, shukrana
Sabr aur shraddha ka paath sikhaaya, shukrana
Murjhaaye huey mann ko utsaah se khilaaya, shukrana.

Mann mandir mein vishwaas jagaaya, shukrana
Antas mein gyan ka deep jalaaya, shukrana
Har samay raasta dikhaaya, shukrana
Uss par Aapne chalna sikhaaya, shukrana
Duniyadaari se bhayy hatvaaya, shukrana
Na jaane kya kya karna katvaaya, shukrana.

Dee bakhshishein aur prerna, shukrana
Dee asisein aur chetna, shukrana
Suraksha dee bharpoor Guruji, shukrana
Baney mere huzoor Guruji, shukrana

Har angg, har rangg ka shukrana
Jeevan ke is dhangg ka shukrana
Sadh sangat ke sangg ka shukrana
Mann rehta hai Aap mein malang, shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kis Kis Baat Ka…. (11/28/2024)

November 27, 2024

Om Namaha Shivaya
Aaj Ka Suvichaar 🙏🏻🙏🏻

#2474

             Guruji Ke Pyaar Mein

Har bhakt jo hai Guruji ke pyaar mein
Har bhakt jo pahunch paata hai Guruji ke darbar mein
Har uss bhakt kee bhakti ko pranaam
Har uss bhakt ka bhaav pehchaanein Guruvar mahaan.

Koi muskuraata hai
Koi gungunaata hai
Guruji ka gungaan
Unkee mahima mahaan.

Koi rota hai
Koi sota hai
Koi khota hai
Guruji ke khayaalon mein
Ruhaani sawaalon mein
Simran mein ya vandan mein
Kisee bhi tareh Guruji ke chintan mein.

Koi aata hai arzoo lekar
Koi aaye khaa kar dar dar thokar
Koi aate hee karey shukar, koi lagaaye arzi
Lekin ye nishchit hai ki koi na aa paaye bin Guruji kee marzi.

Koi aata hai maangne kshama
Koi aaye kyunki bura chal raha hai uska samaa
Kisee ko hoti hai shikaayat
Koi aaye karta hua ibadat
Koi kisee shubh kaam se pehle ya uske baad
Koi laachaari bayaan karne, toh koi karey dhanyawaad.

Koi aata hai majboori mein
Koi aaye ‘Ji huzoori’ mein
Koi virla hee hota hai jo aaye buss Guruji ke pyaar mein
Bheegne buss Unke darshan deedar mein
Karne Unhee Guruji ke liye ardaas
Jinhonei bakhsha hai har shwaas.

Aisa ajab hai jeevan ka safar
Ki bhool jaate hain hum aksar
Ki bhakti bin swaarth ke hee sachchi
Niswaarth bhakti laagey Guruji ko achchi.

Guruji toh aaye hee karne kalyaan
Kalyaan toh karenge hee Ve karunanidhaan
Hum de paayein Unhe prasannata, Guruji bakhshein aisee buddhi
Hum bann jaayein Unke yogya, Guruji bakhshein aisee shuddhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Pyaar Mein (11/27/2024)

November 23, 2024

Om Namaha Shivaya
Aaj Ka Suvichaar 🙏🏻🙏🏻

#2470

Tumhaare Pukaarne Mein

Tumhaare pukaarne mein deri ho sakti hai
Guruji ke sunn-ne mein nahin
Is satya par karo yakeen
Guruji toh Hain bhakton ke adheen.

Beete lamhon ko hee dekh lo kar ke yaad
Jabb bhi tumne kee fariyaad
Guruji ne dee tumhe sehensheelta aur saboori
Kyunki Ve jaanein ki tumhaare liye ye thei zaroori.

Har chunauti ka saamna karne ke liye
Guruji dete Hain shakti
Dete Hain aagey badhne kee yukti
Guruji nikhaarte Hain tumhaari bhakti.

Unkee dee bakhshishein
Unkee dee ashishein
Ye sab sampoorna sanket hain
Ki Ve sabb bhakton kee sunte Hain.

Kabhi kabhi usee samay hoti hai aas poori
Lekin kabhi der se, aur kabhi reh jaati hai adhoori
Par yaad se karte raho Guruji kee ji huzoori
Jitna yaad karoge, utnee kumm hoti jaayegi Unse duuri.

Mitaani ye duuri
Yahee hai sabse zaroori
Guruji par rakhte chalo vishwaas
Agar tumhaare bhale ke liye hogi tumhaari aas
Toh poori ho jaayegi
Varna Guru kripa alag hee rangg laayegi
Jismein hoga aisa kalyaan
Ki tum andaaza bhi lagaa sakte nahin
Guruji tumhaare shubhchintak Hain
Ve sab kar denge sahi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Pukaarne Mein (11/23/2024)

November 22, 2024

Om Namaha Shivaya
Aaj Ka Suvichaar 🙏🏻🙏🏻

#2469

Purushaarth Toh Sambhaalna Hoga

Guruji kee sharan mein
Anokha banaa hai ye safar
Mauka banaa hai ye safar
Swayam ko sudhaarne ka
Bhakti ko nikhaarne ka
Guruji kee meher se
Aaj se, isee peher se.

Apaar shakti hai Guruji ke naam mein
Phir kyun karni der shubh kaam mein
Karte karte Unka chintan
Jaari rahe jo mann ka manthan
Har koshish ho poori apni oar se
Toh Guruji prasann hongei tumhaari daud se
Manzil kee oar
Mehfil ko chod.

Vo manzil, jiskee rooh ko hai talaash
Jahaan baandhta nahin koi paash
Jahaan aisa milan hota hai Guruji ke sangg
Ki rooh par poori tareh se chadhta hai Unka rangg.

Ye mumkin hai rehte huey yaheen par
Dharti kee isee zameen par
Kyunki mila hai Unn Guruji ka dar
Kyunki Ve bakhsh rahe Hain ye avsar.

Samaa hai purushaarth ke imtehaan ka
Purushaarth uddeshya hai har insaan ka
Bhautik zindagi yahaan kee
Ruhaani tayyaari vahaan kee
Purushaarth toh sambhaalna hoga, o paarth
Guruji har pal Hain tumhaare saath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Purushaarth Toh Sambhaalna Hoga (11/22/2024)

November 21, 2024

Om Namaha Shivaya
Aaj Ka Suvichaar 🙏🏻🙏🏻

#2468

     Shiv Roopi Guruji Karunanidhaan

Shiv roopi Guruji karunanidhaan
Guruji Maharaj bade meharbaan
Tekne diya Unn kripadhaari ne Apne charnon mein maatha
Abb Guruji ke gunn gaate huey beete jeevan kee gaatha.

Namumkin hai karna bayaan
Unke kiye kalyaan
Unkee mahima mahaan
Lafz padd jaayein kumm kyunki beantt hai bakhaan.

Panch tattvon se bann kar janmey hain hum
Unhee tattvon mein hai jaana humne mil
Ye toh Guruji Maharaj kee meher hai
Ki hamaare naseeb gaye hain khil.

Varna kya hai hamaari aukat
Antt mein bann jaana hai humne raakh
Unhonei phir bhi jageh dee Apne aanchal mein
Hum jaise bhi hain, Ve sambhaalte Hain pal pal mein.

Har roag mein, har bhog mein
Hum par hai Guruji kee nadar aur nazar
Jo bhi ho raha ho zindagi mein
Unke ashish ka zaroor ho raha hota hai asar.

Ve praarabdh bhogne mein saath nibhaate Hain
Karma kumm kar ke bhugatvaate Hain
Apna noor hamaare jeevan mein phailaate Hain
Prerna ke strot bann kar hamein aagey badhaate Hain.

Unkee sharan mein aane se pehle
Alag sa hee thaa zindagi ka chehra
Abb toh mehsoos hota hai apne aaspaas suraksha kavach
Kyunki Guruji ka hum par har pal hai pehra.

Aisee khushnaseebi ko kaise na saraahein
Bhaav vibhor hokar nayn kaise na bhar aayein
Sochne kee zaroorat nahin ki hum jaayein toh kahaan jaayein
Buss, mann mandir mein Guruji ke naam kee jyot jalaayein.

Jinkee daya se pehle bhi kasht talaa
Ve taalenge sir par aayi har balaa
Guruji karenge bhalaa
Ve bakhshenge chadhdi kala.

🌹🌹🌹🌹🌹🌹🌹

Jai Guruji 🙏🏻🙏🏻🌹🌹
Dhirja

Shiv Roopi Guruji Karunanidhaan (11/21/2024)