Month: December 2018

December 21, 2018

Om Namaha Shivaya
Aaj Ka Suvichaar 🙏🏻🙏🏻 # 306

                  Guruji Kee Leela

Guruji ka naam lete hee
Viraane mein khushboo aa jaati hai
Guruji ke ashirwaad se
Patjhad mein bahaar aa jaati hai

Guruji ke muskuraate hee
Murjhaaye phool khil jaate hain
Guruji kee kripa se
Bichhde huey mil jaate hain

Guruji kee nazar se
Koi bhi bach sakaa nahin
Guruji kee leela se
Kisee ka uddhaar ruka nahin

Guruji ke divya darshan se
Har bhakt tar jaata hai
Guruji kee mamta dekhkar
Sabka dil bhar aata hai

Guruji ke diye huey amrit se
Har jann ka hota hai kalyaan
Guruji ka baksha hua langar prasad
Bachaataa hai kitnon kee jaan

Guruji kee karuna aur kripa se
Rogi aur peedit ko miley aaraam
Guruji ke dikhaaye raaste par chalkar
Lakshya takk pahunchta hai insaan

Guruji se adhik poojneeya aur koi nahin
Veh toh swayam hee hain Bhagwaan
Guruji ke komal kamal charan mein
Beintehaa shukrana aur baarambaar pranaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 20, 2018

Om Namaha Shivaya
Aaj Ka Suvichaar 🙏🏻🙏🏻 # 305

        Hamaare Maargdarshak Guruji

Kitna achchaa ho agar
Hamein manzoor ho Guruji kee raza
Kitna achchaa ho agar
Zindagi na lagey sazaa

Kitna achchaa ho agar
Har taraf pyaar aur bhaichaara ho
Kitna achchaa ho
Agar sach yeh khwaab hamaara ho

Guruji kee raza mein raazi hongei
Toh dil mein santosh kee bhavna hogi
Varna toh zindagi ke har moad par
Dil mein koi nayee kaamna hogi

Guruji se hum sabko milee hai
Yeh anmol zindagi khairaat mein
Guruji, subuddhi aisi dena ki hum
Hameshaan rahein apni aukat mein

Dhanya hain bhaagya hamaare ki hamein Aapne sewa simran ka daan hai baksha
Jab bhi museebat aati hai jeevan mein
Aap hee sadaiv karte Hain hamaari raksha

Aapke siwa koi na maargdarshak hamaara
Aapko hee saump diya hai jeevan saara
Aapke bina bilkul bhi nahin hai hamaara guzaara
Aapka koti koti shukrana karei har saans hamaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 19, 2018

Om Namaha Shivaya
Aaj Ka Suvichaar 🙏🏻🙏🏻 # 304

               Guruji Hee Hain

Guruji bastein Hain pattiyon kee sarsaraahat mein
Guruji bastein Hain har masoom muskuraahat mein
Guruji ka vaas hai har nagar har desh mein
Guruji dein darshan kayee divya vesh mein

Guruji hee har raat ko sulaate
Guruji hee jagaate Hain har savere
Sabse badi baat toh hai ki Guruji
Baste Hain dil mein tere aur mere

Guruji ke bina arth nahin hai jeene ka
Guruji se aarambh hai har pal har maheene ka
Guruji ke aagey mol nahin kisee heere ya nageene ka
Guruji see milta hai avsar divya amrit peene ka

Phir kaisi soch aur kaisi ghabraahat
Phalibhoot kar le Guru praapti kee chaahat
Ramtaa ja Guruji ke niraale rangg mein
Guruji kee chhavi basaa le apne jeene ke dhangg mein

Jeevan hai pyaare Guruji se jud jaane ke liye
Har pal mila hai Unke gunn gaane ke liye
Ekatrit kar le Guru naam ka khazaana
Sadaa hee kar Guruji ka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 18, 2018

Om Namaha Shivaya
Aaj Ka Suvichaar 🙏🏻🙏🏻 # 303

      Guruji Sadaa Angg Sangg Hain

Guruji tere mann mandir mein Hain
Kyun nahin sunta tu Unkee awaaz
Kyun tujhe Unke sakaash ka
Hota nahin ehsaas

Jinko dhoondhta rehta hai baahar
Ve toh tere dil mein rehte Hain
Chaahe tu sunei ya na sunei
Ve tere bhaley kee baat kehte Hain

Guruji sadaa tere sangg rahenge
Chaahe chod de tujhe saara jahaan
Tu duniya mein kaheen bhi chala ja
Guruji chalenge vahaan

Tere raaston ko roshan karte rahenge
Tere liye Ve har kasht sahenge
Kitna pyaar karte Hain Ve tujhse
Yeh toh tu beshaq poochh le khud se

Tu niraash honei lagega toh banenge Ve teri asha
Hameshaan protsaahit karegi tujhe Unke prem kee bhaasha
Tu girega toh Ve tujhe sambhaalenge
Har mushkil se baahar tujhe nikaalenge

Isliye tu waqt kee chunaauti kar le sweekaar
Na kar tu duniya waalon ka intazaar
Khushi se muskuraa de baar baar
Tere saath Hain tere parwardigaar

🌹🌹🌹🌹🌹🌹🌹

Jai Guruji 🙏🙏
Dhirja

December 17, 2018

Om Namaha Shivaya
Aaj Ka Suvichaar 🙏🏻🙏🏻 # 302

        Sunn Le Guruji Kee Pukaar

Jeevan kee raahon par chalte chalte
Thakk gaye hain tere paaon
Kashton kee dhoop mein tu jal raha hai
Kaheen na miley tujhe chhaaon

Jo kehte thei ki veh tere apne hain
Vahee paraaye huey aaj
Tu bahut asamanjas mein hai
Ki kaun sanvaarega tere kaaj

Ummeed kee kiran kee talaash mein
Tu bhatakta jaa raha hai
Andhere mein akele chalkar
Tera dil ghabraa raha hai

Ek Guruji hee Hain jo har pal
Tere mann kee sthiti ko jaanein
Tu kin haalaat se guzar raha hai
Guruji bakhoobi pehchaanein

Guruji tujhe rahein Hain pukaar
Unpar kar le tu poora aitbaar
Unhee se chal raha hai sansaar
Vahee Hain srishti ke paalanhaar

Unhee ke bharose jeena shuru kar
Unhee ko karde tu jeevan arpan
Sotey jaagte karta ja abb tu
Sewa simran satsang aur samarpan

Matt soch ki bura kyun hua
Jab ki tera na thaa koi bhi kusoor
Buss Guruji se praarthana kar
Unkee kripa tujh par barsegi zaroor

Jitne dukh teri kismat mein hain
Guruji unhe kumm kar ke denge
Tu vishwaas rakh Guruji par
Dekhna, Ve tere kasht har lenge

Guruji ke sangg jod le atoot rishta
Aur Unke ashish ko banaa le apni dhaal
Guruji ke aashirwaad kee divya daulat se
Tu ho jaayega maalaamaal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 16, 2018

Om Namaha Shivaya
Aaj Ka Suvichaar 🙏🏻🙏🏻 # 301

          Guruji Sab Sambhaalenge

Tere jeevan ke safar mein
Is paheli jaisi dagar mein
Kitne mukaam aise aayenge
Jo tujhe hila ke jaayenge

Savaar ho ja Guruji kee nyaari naiya mein
Aur Unkee kripa kee kar tu kaamna
Kashton ka saagar tu paar kar paayega
Har tufaan ka kar sakega tu saamnaa

Haath thaamkar Guruji tera
Tere angg sangg rahenge
Tujhe sukh dene kee khaatir
Ve tere liye dukh sahenge

Apni kismat tu jagaa le
Mann Guruji mein lagaa le
Guruji ko dil mein samaa le
Unke charnon mein panaah le

Sewa, simran, satsang mein lagaa le dhyan
Kisee ko na aane de Guru aur apne darmiyaan
Sach bolkar rakh tu Guruji ka maan
Unko samarpan kar ke kar tu Unka gungaan

Guruji tujhe nikhaarenge
Tere karmon ka bhaar uthaalenge
Bigdee hui taqdeer sanvaarenge
Guruji sab sambhaalenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 15, 2018

Om Namaha Shivaya
Aaj Ka Suvichaar 🙏🏻🙏🏻 # 300

      Guruji Hamaare Dugri Waale

Sanvaarein sangat ke saare kaam
Guruji hamaare Dugri waale
Poori duniya mein roshan hai Unka naam
Guruji hamaare Dugri waale

Har bhakt ko apna bachcha kehte
Guruji hamaare Dugri waale
Har bhakt ke dil mein sadaa hee rehte
Guruji hamaare Dugri waale

Niswaarth sewa ka paath padhaate
Guruji hamaare Dugri waale
Simran hamein karna sikhaate
Guruji hamaare Dugri waale

Har satsang mein aatey Hain
Guruji hamaare Dugri waale
Kayee divya roop dikhaatey Hain
Guruji hamaare Dugri waale

Andhvishwaas se duur le jaate Hain
Guruji hamaare Dugri waale
Sachchaayee ke kareeb hamein laate Hain
Guruji hamaare Dugri waale

Bhooley ko raah dikhaate Hain
Guruji hamaare Dugri waale
Dukh ka timir mitaatey Hain
Guruji hamaare Dugri waale

Hamaari kamiyaan hamein bataate Hain
Guruji hamaare Dugri waale
Shishyon kee uljhan ko sulajhaate Hain
Guruji hamaare Dugri waale

Bujhe huey dil mein asha kee jyot jalaate Hain
Guruji hamaare Dugri waale
Hamein banda bann na sikhaate Hain
Guruji hamaare Dugri waale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 14, 2018

Om Namaha Shivaya
Aaj Ka Suvichaar 🙏🏻🙏🏻 # 299

         Guruji Ke Naam Ka Gehna

Guruji ke naam ka jo pehna mainey gehna
Abb Unke naam bina nahin rehna
Unhee ke naam se shuru hota hai din
Ek saans bhi nahin hai Unkee kripa ke bin

Pyaar Guruji ka komal itna
Ki antaratma sheetal ho jaati hai
Unhee ka naam le leti hoon
Koi mushkil paas jo aati hai

Guruji hee rakhte Hain dhyan
Har zaroorat aur har chaahat ka
Guruji hee sankat mein aate Hain
Intazaar rehta hai Unkee aahat ka

Mai toh phir bhi kabhi bhool jaati hoon
Magar Guruji ko har pal hai mera dhyan
Jab uljhan aati hai jeevan mein
Toh Guruji karte Hain uska samaadhaan

Guruji hee raah dikhlaatey Hain
Mai toh sirf uspar chal deti hoon
Khushi se mai phooli nahin samaati
Ki mai Apne Guruji kee beti hoon

Unse juda hokar toh astitva hee nahin hai mera
Unhonei hee Apne gyan se kiya hai mere jeevan mein savera
Unhee kee kripa se katega yeh janam maran ka phera
Unhee ke charnon mein hai abb hai mera baseraa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 13, 2018

Om Namaha Shivaya
Aaj Ka Suvichaar 🙏🏻🙏🏻 # 298

           Guruji Kee Sharan Mein

Guruji kee sharan mein aate hee
Jeevan badal sa jaata hai
Jo atma vishwaas kho gaya thaa kaheen
Veh laut ke vaapis aata hai

Aur kaheen veh chayn nahin
Jo milta hai Guruji kee sharan mein
Aur kaheen veh amrit nahin
Jo behta hai Guruji ke charan mein

Jab tu anubhav karega
Unki ruhaani chhavi ko swayam
Toh dekhna bhaav vibhor hokar
Bhar aayenge tere bhi nayan

Bheetar kee ruhaani dhwani dil ko behlaayegi
Kisee bhi laukik vastu se veh masti nahin aayegi
Dil kee bechayni toh itihaas bann ke reh jaayegi
Jab atma sadhna mein leen hokar anand paayegi

Kasht toh zindagi mein phir bhi aayenge
Lekin Guruji kee kripa se adhiktar kasht tull jaayenge
Tu taqleefon se guzrega Guruji ke diye haunsle ke saath
Har pal Guruji teri raksha karenge kyunki Ve Hain tere Bholenath

Guru naam ke divya amrit se dil mastt ho jaayega
Guru naam ko japne se nirmal anand aayega
Guru naam ke jaadu se khatm hogi niraasha kee nisha
Guru naam ke tapp se milegi divyataa kee disha

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 12, 2018

Om Namaha Shivaya
Aaj Ka Suvichaar 🙏🏻🙏🏻 # 297

      Hamaari Chetna Kee Awaaz

Hum sab hain ajeeb insaan
Sochte hain apne aap ko mahaan
Kitni kshanbhangur hai hamaari jaan
Yeh bhool jaatey hain hum naadaan

Apni ‘mai’ mein mehfooz hokar
Sochte hain ki duniya par hamaari hukoomat hai
Ek pal ka bharosa bhi nahin hai
Phir bhi bhool jaate hain, ki hamein Guruji kee zaroorat hai

Waqt ke mahatv ko jaanei na hum
Guruji kee baatein maanei na hum
Maut har pal sir par mandaraa rahi hai
Aakhiri ghadi har din paas aa rahi hai

Phir bhi, ahem kee tedhi seedi hum chadhey jaa rahey hain
Apne ahankar kee zidd par adhey jaa rahey hain
Vehemon ke bann rahey hain hum gulaam
Andhvishwaas kee pakadte hain hum lagaam

In sabse toh atma hoti chali jaayegi kamzor
Is timir ko duur karein, aur laayein jaagriti kee bhor
Shaktishaali banaayein apni antaratma ko
Poojein Guruji ko, hamaare Paramatma Hain jo

Guruji kee dikhaayee raah par chalna hee Unkee sachchi pooja hai
Guruji ke siva na koi maargdarshak dooja hai
Swayam MahaShiv ke avataar Hain Guruji
Hamaare Dev, hamaare paalanhaar Hain Guruji

Maafi maange Unse apne burey karmon kee
Ahemiyat samjhein hum jeevan ke lamhon kee
Neevanpan aur saralta laayein apne taur tareekon mein
Kya rakha hai dikhaavey aur burey saleeqon mein

Sewa aur Simran mein dhyan lagaayein
Apne Guruji ka maan badhaayein
Satsang mein baithein aur Unkee mahima suney aur sunaayein
Har insaan ke bhaley kee hum karein duaayein

Hamaari rooh kee chetna hamein har pal pukaare
Hamaara uddhaar ho sakta hai keval Guruji ke sahaare
Sab kuch chod kar aa jaayein hum Guruji ke dwaare
Baksh denge hamein Guruji, bakshanhaar Hain Ve hamaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja