Month: December 2019

December 31, 2019

Om Namaha Shivaya
Aaj Ka Suvichaar 🙏🏻🙏🏻 # 681

       Abb Toh Manzil Vaheen Hai

Maan liya jabb se Guruji ko
Apne jeevan kee naiya ka khivaiyaa
Tabb se zindagi mein museebaton kee oar
Kaafi badal gaya hai ravaiya

Mann kee fikrein kar dee hain
Guruji ke havaale
Jeevan ke har pehlu ko
Abb Guru hee sambhaale

Pehle jin baaton se dil hota thaa pareshaan
Abb veh uss pareshaani se hai bilkul anjaan
Pehle har sadme se ye dil jaata thaa toot
Abb kaafi hadd takk yeh aadat gayi hai chhoot

Har roz aata hai dil mein yeh vichaar
Ki pehle se behtar hon charitra aur vyavhaar
Iskee koshish jaari rehti hai lagaataar
Ismein madad karte Hain parwardigaar

Soch din-b-din sakaaraatmak hoti jaa rahi hai
Jo ho raha hai jeevan mein vahee lagta sahi hai
Guruji kee meher ke bina toh zindagi hee zindagi nahi hai
Jidhar Guruji le jaayenge, abb toh manzil vaheen hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 30, 2019

Om Namaha Shivaya
Aaj Ka Suvichaar 🙏🏻🙏🏻 # 680

Guruji Kee Bhakti Mein Doob Jaayein

Guruji hamaare paalanhaar Hain
Ve hamaare taaranhaar Hain
Ve hee bakshanhaar Hain
Ve hee parwardigaar Hain

Guruji koi jaadugar nahin
Jo Apni chhadee chalaayenge
Guruji koi saudaagar nahin
Jo hamaari maang ka mol lagaayenge

Guruji toh Bhagwaan Hain
Ve toh jaane-jahaan Hain
Ve murshid Hain hamaare
Madadgaar Hain hamaare

Ve Hain MahaShiv ka avataar
Karte Hain Ve divya chamatkaar
Lekin, saath hee saath karmon ka poora hisaab karvaate Hain
Aur hamaari mai ko marvaate Hain

Sachkhand kee seedhi chadhne ke liye
Karmon ka bhugtaan zaroori hai
Mai ko mitaana zaroori hai
Vikarmon ko tyaagna zaroori hai

Guruji hamaare maargdarshak Hain
Ve hee hamaare rakshak Hain
Ve banda bann-na sikhaate Hain
Aur sahi raasta dikhaate Hain

Lekin, hamaara hee hai uss sahi raaste par chalne ka farz
Tabhi toh utar paayega hamaare karmon ka karz
Dhyan rahe ki apne ahankaar aur vikaaron mein adhkar
Gir na jaayein hum Sachkhand kee seedhi kee oar chadhkar

Kyun na hum mukt ho jaayein
Har khokhli aur laukik kaamna se
Buss, Guruji kee bhakti mein doob jaayein
Niswaarth prem aur samarpan kee bhavna se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 29, 2019

Om Namaha Shivaya
Aaj Ka Suvichaar 🙏🏻🙏🏻 # 679

Bhool Hee Gaye Hum Shukrana Ka Zikr

Peechhe ateet kee yaad
Aagey bhavishya ke liye fariyaad
Beete kal par pachhtaava aur aane waale kal kee fikr
Ismein bhool hee gaye hum Shukrana ka zikr

Jo pal aaya hee nahin ya phir jo pal beet gaya
Uskee soch se kyun karein aaj ko barbaad
Har pal ka shukrana karte huey
Karein Guruji se ye fariyaad

Ki Ve sadaa rakhein Apni sharan mein
Ki Ve jageh dein hamein Apne kamal charan mein
Ki Ve hamein behtar insaan bann-ne mein madad karein har din
Abb na jiyaa jaaye ek bhi pal Guruji ke ashirwaad ke bin

Guruji kee kripa se saahas milega aane waale kal ka saamna karne ka
Guruji kee sharan mein rehte huey nahin koi matlab hai darne ka
Pichhlee bhoolon ka pashchyaataap hai toh Guruji karenge maaf
Dil mein sachchee shradha hai toh mann ho jaayega saaf

Lekin yeh sab karte karte Shukrana karna hai bahut zaroori
Shukrana se mit jaayegi bebasi aur majboori
Shukrana aur vishwaas se milegi himmat aur taakat
Shukrana aur niswaarth sewa se mitegi har buri aadat

Guruji toh har pal sangg Hain lekin apna farz toh hamein hee nibhaana hai
Guruji sab kuch dekh rahei Hain toh aur kisee ko kya dikhaana hai
Zindagi toh ek tajurba hai, ik safar hai, ik afsaana hai
Guruji kee nigraani mein hee yahaan par aana aur yahaan se jaana hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 28, 2019

Om Namaha Shivaya
Aaj Ka Suvichaar 🙏🏻🙏🏻 # 678

          Guruji Ka Mantra Jaap

Guruji ka mantra jaap hai har dukh ka upaay
Japp lein hum sabb Om Namaha Shivaya Shivji Sadaa Sahaay
Guruji MahaShiv Hain, yeh aagey kee pankti bataaye
Sach hai ye ki, Om Namaha Shivaya, Guruji Sadaa Sahaay

Mantra jaap ko har pal dil mein jo bhi gungunaaye
Mantra jaap uske jeevan se niraasha ko duur bhagaaye
Iskee shakti itnee, ki jeevan ka andhkaar mitt jaaye
Mantra jaap har bhakt ka vishwaas aur saahas badhaaye

Is mantra jaap kee mahima har koi suney sunaaye
Kyunki iske japne se kasht hamein sataaney na paay
Jo bhi vipdaa jo bhi mushkil hamaare jeevan mein aaye
Veh Guru Apni kripa se kumm kar ke hee laaye

Saral hai mantra jaap aur sakaaratmakta yeh phailaaye
Iske shradha poorvak uchhaaran se ghar mein khush-haali aaye
Udaasi se bujhe hriday mein yeh asha kee jyot jalaaye
Kalyuga mein bhatakte musaafir ke dil mein yeh utsaah jagaaye

Mantra jaap ka koi kaanoon nahin, yeh kaheen par bhi kiya jaaye
Mantra jaap se jo shanti miley, uske bina phir nahin jeeya jaaye
Mantra jaap mein magn rehkar Guruji ka naam jabb bhi liya jaaye
Bhakt mantra jaap kar ke Guruji ko apne paas bulaaye

Mantra jaap karte rehne se mann mein Guru samaay
Jaap aur Guruji ka anusaran karne se insaan changaa bann paaye
Chaahe Guruji ke dwara bhakt neembu ke jaise nichodaa jaaye
Antt mein Guru hee bhakton ko moksh kee manzil takk le jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 27, 2019

Om Namaha Shivaya
Aaj Ka Suvichaar 🙏🏻🙏🏻 # 677

   Duniya Chaahe Saath Chod De

Duniya chaahe saath chod de
Aap na kabhi muh moadna
Mushkilein aani hain toh aayein beshaq
Aap na kabhi saath chodna

Kyunki Aapke saath se har mushkil
Lagne lagegi aasaan
Aapki mamta se hee himmat milegi
Aap hee Hain karunanidhaan

Dena aisee buddhi
Ki Aapki mahima ko jaanein
Dena aisee shuddhi
Ki Aapke har hukm ko maanein

Apne kiye paapon kee mayl ko dho sakein
Hum praayashchit kar ke sachche mann se
Aapki kripa se neeven aur sadaachaari rehkar
Apna uddhaar karein achche jeevan se

Aap hee Hain Devon ke Dev
Aap hee Hain mool divya gyan ke daata
Aapka haath sadaa rahey hamaare sir par
Yeh uphaar hamein dena daata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 26, 2019

Om Namaha Shivaya
Aaj Ka Suvichaar 🙏🏻🙏🏻 # 676

Jaan Se Hee Toh Jahaan Hai

Guruji hee maalik Hain is jahaan ke
Unkee hukoomat hai is zameen aur aasmaan pe
Ve gyata Hain hamaari har tammanna, har armaan ke
Vishwaas hai toh anjaam achche hongei har imtehaan ke

Guruji ne thaama hai hamaara haath
Isliye ghabraane kee koi baat nahin
Unse kar sakte hain hum koi bhi baat
Unse sharmaane kee koi baat nahin

Jinke ishaare par chalti hai yeh saari srishti
Jinkee hai itnee kripaalu dayalu divya drishti
Unka shukrana karne se sanvar jaata har haalaat hai
Unke bachche kehlaana itnee khushi kee baat hai

Guruji se hee yeh shareer hai
Guruji se hee shareer mein shwaas hai
Shwaas se hee jaan hai
Aur jaan se hee toh jahaan hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 25

Om Namaha Shivaya
Aaj Ka Suvichaar 🙏🏻🙏🏻 # 675

           Dharti Par Bhi Swarg Hai

Guruji kehte Hain hum niswaarthtaa ka karein prayog
Guruji sikhaatey Hain hamein Shiv Yog
Isee se ho paayega karam bhog
Aur mitenge shaareerik aur maansik roag

Shiv Yog se praapt hoti hai sadgati
Shiv Yog se hoti hai atma kee unnati
Shiv Yog se hoti hai jeevan mein pragati
Aur atma-vishwaas yukt ho jaati hai jeevan kee gati

Isliye kalyuga mein Guruji ka saath ati anivaarya hai
Isliye Unkee sharan mein hona hamaara saubhagya hai
Shiv Yog ke dwaara Guruji hamaare sankat mitaate Hain
Shiv Yog sikhaakar Guruji hamein mukti ka maarg dikhaate Hain

Guruji hee Hain MahaShiv
Unkee sadhna se zaroori kuch bhi nahin
Sarvsamarpan kar dein Unhee ko
Mann kee shanti ke liye yahee hai sahi

Dharti par bhi swarg hai
Agar hamaare mann mein shanti hai
Andhkaar mein bhi ujaala hai
Agar sangg Guruji kee kanti hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 24, 2019

Om Namaha Shivaya
Aaj Ka Suvichaar 🙏🏻🙏🏻 # 674

    Har Samasya Ka Samaadhaan

Guruji toh MahaShiv Hain
Maalik Hain Ve srishti ke
Hum sabb Unke bachche hain
Ichhuk hain hum har pal Unkee drishti ke

Guruji ne apne har bachche ko
Kisee na kisee hunar se baksha hai
Guruji ne har haalaat mein
Bahut pyaar se kee sabki raksha hai

Himmat aur atma-bal hai tum mein
Usey Guru prem se badhaate chalo
Agar mushkil ke samay kamzor padd jaate ho
Toh Guru prerna se dil mein atma-vishwaas jagaate chalo

Kyunki Guruji kaheen duur nahin Hain
Ve toh basey Hain dil mein tumhaare
Jitna bharosa badhega Unpar tumhaara
Utnee himmat se jee sakoge tum Unke sahaare

Guruji ka sahaara hai sanaatan aur anant
Unhe sarvsamarpan kar ke ho jaao tum nishchint
Tumhe rakhna hai Guruji par apna atoot vishwaas
Kyunki tumhaari har samasya ka samaadhaan hai Guruji ke paas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 23, 2019

Om Namaha Shivaya
Aaj Ka Suvichaar 🙏🏻🙏🏻 # 673

             Simran Kee Mahima

Guruji ke simran kee zaroorat ko jaanein
Simran kee mahima ko hum pehchaanein
Guruji ke simran se hota hai kalyaan
Guruji ka simran deta hai jeevan daan

Guruji ke simran se nirmal hota hai shwaas
Guruji ke simran se badh jaata hai vishwaas
Simran se shareer aur atma kee badh jaati hai shakti
Guruji ke simran se rangg laati hai hamaari bhakti

Guruji kee yaad aaye jisey, veh simran kar sakta hai
Sachcha bhakt simran karte nahin thakta hai
Guruji ka simran phir aur dilaata hai Guruji kee yaad
Guruji ke simran se poori hoti hai fariyaad

Chaahe veh fariyaad dil se ho ya zubaan par
Guruji ka dhyan hai hamaare har armaan par
Kyunki Unke alaawa aur hai hee kaun hamaara
Guruji ke pyaar se aur kuch bhi nahin hai pyaara

Guruji ke simran se dil honei lagta hai saaf
Simran karne se Guruji karte Hain hamein maaf
Simran se karmon ka bojh halka ho jaata hai
Simran se bhakt antt mein mukti ko paata hai

Simran mein hota hai mann ko Guruji ka dhyan
Simran mein Guruji karte Hain divya gyan pradaan
Simran bhool kar na banein hum naadaan
Aao, simran mein japp lein hum sab Guruji ka naam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 22, 2019

Om Namaha Shivaya
Aaj Ka Suvichaar 🙏🏻🙏🏻 # 672

Kabb Takk Yoon Hee Bhaagte Rahoge

Kabb takk yoon hee bhaagte rahoge
Apne laukik armaanon ke peechhe
Apne aap ko apni hee nazron mein
Giraaoge aur kitna neeche

Kalyuga hai toh kya hua
Tum satyugi atma bann sakte ho
Aaspaas jhooth aur fareb hai toh kya hua
Tum toh sachchaa insaan bann sakte ho

Kabhi socha hai tumne ki Guruji ko kaisa lagta hoga
Dekh kar tumhaara bhatkaa hua chaal-chalan?
Kabhi jaana hai tumne ki Guruji ka dil kitna dukhta hoga
Dekh kar tumhaari soch aur tumhaara anuchit aacharan?

Yeh zindagi hai pyaare, koi daud nahin
Guruji kee nazar se bach paai, aisa koi raasta ya moad nahin
Phir kyun na kaam karo Vahee
Jo Guruji kee nazron mein hain sahi?

Vijay paani hee hai toh swayam ke vikaaron par paao
Prashansa ke gunn gaane hee hain toh Guruji ke gunn gaao
Changaa dikhna hee hai toh Guruji kee nazar mein changaa bannkar dikhaao
Kisee ke dil mein jageh banaani hee hai toh Guruji ke dil mein samaao

🌹🌹🌹🌹🌹🌹🌹

Jai Guruji 🙏🏻🙏🏻
Dhirja