Month: March 2020

March 11, 2020

Om Namaha Shivaya
Aaj Ka Suvichaar 🙏🏻🙏🏻 # 752

Bhakt Kee Chhoti See Kahaani

Jabb jabb maayusi ka aalam chhaaya
Guruji ka pyaar nayee ummeed laaya
Is ummeed ne dil mein utsaah jagaaya
Aur bhakt ka beda paar karaaya

Bhakt ne pyaare Guruji mein paaya
Veh pita, jisne sukoon pahunchaaya
Veh maa, jiska jabb padaa bhakt par saaya
Toh bhakt ka muqaddar aur bhi nikhar aaya

Bhakt ne jaana ki Guruji mein hai samaaya
Veh meet, jo uskee har baat samajh paaya
Veh rakshak, jisne aisa kavach pehnaaya
Ki bhakt ke darr ko duur bhagaaya

Jabb jabb bhakt ne Guruji ko bulaaya
Yeh kripaalu Guru turant aaya
Guruji ne Apni maujoodagi se aisa mahaul banaaya
Ki kisee nakaaratmak shakti ne phir bhakt ko na sataaya

Bhakt ko na aakarshit kar sakte thei moh aur maaya
Guruji ne uska atma-bal aisa badhaaya
Bhakt ne Guruji kee mahima ka geet gaaya
Aur kashton ke beech reh kar bhi bhakt muskuraaya

Bhakt ka dil dukh sukh mein shant reh paaya
Usne apna koi pal phir na kiya zaaya
Usne sewa, simran, satsang mein jeevan bitaaya
Aur sarvsamarpan kar ke apne Guruji ko rijhaaya

Is kahaani se ye samajh mein aaya
Ki vyarth hain moh, lobh, aur maaya
Ki Guruji sadaa apne Hain chaahe jagg ho jaaye paraaya
Ki jeevan kee kadak dhoop mein Guruji Hain sheetal saaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 10, 2020

Om Namaha Shivaya
Aaj Ka Suvichaar 🙏🏻🙏🏻 # 751

               Holi Ka Tyohaar

Sharad ritu ke pashchaat
Jabb vasant ritu hai aati
Toh veh buraayee par achchaayee kee jeet manaane
Holi ka tyohaar hai laati

Saath hee saath changi fasal ke liye Shukrana
Holi ka mahatva hai badhaata
Rangon se ullaas phaylaakar
Har koi phoola nahin samaata

Phagun kee pooran-maashi par
Holi ka avsar hai manaaya jaata
Divyataa ke pannon mein bhi
Iska abhipraay likha hai jaata

Asur raja Hiranyakashipu ne kiya prajaa ko bhaybheet
Sabse zabardasti sammaan maangkar manaayee jhoothi jeet
Unke bete Prahlaad ne na chodi Vishnu kee bhakti
Toh Hiranyakashipu ne dikhaayee apni nakaaraatmak shakti

Asur raja ne apni behen Holika ko
Pehnaaya kapde ka kavach suraksha ke liye
Goad mein Prahlaad ko lekar Holika baithi
Agni kee chita mein ahankar ka ghoont piye

Vishnuji ke prataap se chogei ka kavach
Udd kar Prahlaad par aaya
Jis agni ne Prahlaad ko maarna chaaha
Usne Holika ko le jalaaya

Jo ho chuki, uska arth hai ho-li
Abb buss goonje pyaar kee boli
Guruji ke paawan prem se
Aao sab bharein apni jholi

Jo ho gaya so ho gaya
Beetey huey par abb rona nahin
Guruji ke ashirwaad kee Ganga mein Paapon ko dhona hai sahi

Holi ka yeh bhi matlab hai
Ki mai Guruji kee ho-lee
Guruji kee laadali sangat hee toh
Hai holi kee tolee

Holy ka angrezi mein hai ek aur taatparya
Jo hai shudh aur paawan
Sarvsamarpan kar ke thaam lo
Guruji ka tum daaman

Guruji kripa aisee keejiye hum par
Ki Aapke bhakti ke rangg mein rangg jaayein is kadar
Ki buss Aap, Aap, Aap hee nazar aayein
Jidhar bhi le jaaye jeevan kee dagar

Aapke rangg mein ranggkar
Har bhakt par noor Aapka chhaaye
Duniya ke har ek konei mein
Har bhakt Aapke hee gunn gaaye

Holi ke is tyohaar ko
Guruji ke ashish se manaayein
Guruji ke rangg mein rangkar hum sab
Sansaar ko pyaar ke rangon se sajaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 9, 2020

Om Namaha Shivaya
Aaj Ka Suvichaar 🙏🏻🙏🏻 # 750

        Anand Hee Anand

Guruji ke sangg baithne ke liye
Buss, mann ka ramm jaana zaroori hai
Na koi khaas upvaas rakhna hai
Na kisee teerath yaatra par jaane kee majboori hai

Buss, shudh hriday se karni hai Unkee pooja
Aur apni aradhana mein laani hai shradha kee oorja
Laukik dhan kee zaroorat nahin, buss karam honei chaahiyen sahi
Guruji har pal hamein dekh rahei Hain, isliye Unse kuch bhi chhupa nahin

Na koi kaayda, na koi kaanoon
Buss, chahiye sirf shradha aur prem ka junoon
Is junoon se milta hai dil ko sukoon
Aur is sukoon se aur bhi badh jaata hai junoon

Guruji MahaShiv Hain
Isliye Ve hamaare sabhi manorath poorna karne kee rakhte Hain shakti
Lekin, jo bhakt bin kuch maange apna sab kuch Unhe karta hai arpan
Guruji ati-prassann hotei Hain dekhkar uss bhakt kee bhakti

Aise bhakt ko toh apni kismat se bhi zyada sukh mil jaata hai
Guru kripa se karampaash mein bandhaa insaan mukti ke kareeb aa paata hai
Ye Guru bhakt ka rishta jeevan mein ek naya rangg laata hai
Aur ye bhakti ka ruhaani rangg anand hee anand laata hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 8, 2020

Om Namaha Shivaya
Aaj Ka Suvichaar 🙏🏻🙏🏻 # 749

Karmalok Se Gyanlok Takk Ka Safar

Guruji kee kripa se hoga poora
Karmalok se gyanlok takk ka safar
Lekin ye tabhi mumkin hai
Jabb hum par hoga Guruji kee baaton ka asar

Guruji sikhaate Hain saadaapan
Aur hum dikhaawe kee oar jaate hain
Guruji sikhaate Hain niswaarth prem
Aur hum hain ki shart rakhte jaate hain

Guruji kehte Hain karo gupt daan
Aur hum karte hain daan karne ka bhi bakhaan
Guruji chaahein ki hum gupt paath karte rahein
Lekin duniya na dekhe, ye hum kaise sahein?

Gupt savinay sewa ka paath sikhaayein Guruji
Lekin hum sewa mein laayein ahem
Guruji kahein atma ko kamzor nahin karo
Aur hum phailaayein tarehn tarehn ke vehem

Guruji chaahein ki hum Unse pyaar karein
Phir kyun aisa kuch kahein ki bhakt Guruji se darein?
Ye niswaarth bhaav aur vinamr prem kee hai yatra
Phir kyun zyada ho rahi hai mannaton kee maatraa?

Guruji ke kahe anusaar kyun na Guruji ka gungaan karein
Kyun na hum gupt sewa, gupt paath, aur gupt daan karein
Vehem aur ahem ko tyaag kar atma-bal badhaayein
Guruji se niswaarth prem karein aur mann se darr ko bhagaayein

Is ruhaani safar mein mushkilon ke baavajood bhi anand hai sukh ka
Guruji kee dee hui shakti aur mamta se nivaaran ho sakta hai dukh ka
Beete huey kal ke karam chaahe na hon hamein yaad
Lekin aaj ke achche karmon se hamaari punya kee poonji ho sakti hai aabaad

Zindagi hai isliye sukh dukh toh aate rahenge
Guruji kee mehar se hum har haal mein Unse himmat paate rahenge
Guruji mein magn rahein toh yeh jeevan paawan parv hoga
Karmon ke sudharne se Guruji ko hum par
garv hoga

Guruji kee kripa se karmalok se gyanlok takk ka safar achche se tayy hoga
Guruji par atoot vishwaas kee badaulat mann mein nahin koi bhayy hoga
Guruji kee mahima phaylegee duur duur
Har bhakt par chhaa jaayega Guruji ka noor

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 7, 2020

Om Namaha Shivaya
Aaj Ka Suvichaar 🙏🏻🙏🏻 # 748

               Niyati Aur Neeyat

Karmapaash mein bandhey huey hain hum
Aur karmon dwaara hee paap aur punya bhogtey hain hum
Jabb takk rehta hai saanson mein dumm
Isee se milta hai hamein khushi aur gumm

Saansein khatm ho jaane ke baad
Ye silsila jaari rehta hai har agle janam mein
Isliye kyun na ye zindagi jeetey huey
Hum rakhein sachchaayee aur nek iraada har soch aur har karam mein

Guruji karam ke parinaam se bhi zyada
Azmaate Hain neeyat hamaari
Neeyat aur karam par hee toh
Nirbhar karti hai niyati hamaari

Kitna thoda fark hai in dono shabdon mein
Niyati aur neeyat
Lekin neeyat ka mahatva itna khaas hai
Kyunki is se banti hai hamaari kismat

Guruji sikhaate Hain ki jo neeyat changi rakhey
Veh khaayega janam maran ke kumm dhakkey
Baaki pichhle karmon kee bhi kitaab hai
Aur Guruji ke paas hee saara hisaab hai

Kyunki kya galat hai aur kya sahi hai
Ye faisla hamaare buss ka toh nahin hai
Guruji hum sabke adhiktar karam apne par lekar
Hamaare liye karte Hain jo hamaare liye sahi hai

Isliye Shukrana karte huey chalte rahein
Hum jeevan kee dagar par
Har pal hamaara vishwaas badhta rahey
Guruji kee mehre nazar par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 6, 2020

Om Namaha Shivaya
Aaj Ka Suvichaar 🙏🏻🙏🏻 # 747

     Shradha-Suman Ka Gulistaan

Aye bande, bandd hee rakhna giley-shiqve ka sandook
Varna har taraf se chal jaayegi ilzaamon kee bandook
Tark vitark mein dilon ko pahunchegi choat
Aur phir kaheen badh na jaaye dilon mein khoat

Guruji ka naam lekar seekh le karna maaf
Aur apni galatiyon ke liye bhi maang le kshamaa
Maafi dene aur maangne se dil ho jaayega saaf
Aur bigadne se bachh jaayega ye samaa

Ye samaa, jo mila hai is maanav vesh mein jeene ka
Na chod koi bhi mauka Guruji ke naam ke
amrit ko peene ka
Is samay ko bann jaane de ik haseen daastaan
Apne dil ko banaa le Guru naam ke shradha-suman ka gulistaan

Na lagne de thes apne atma-sammaan ko
Na khokhla kar apne sachche pyaar aur niswaarth balidaan ko
Doojon ke ahem kee vajeh se na ksheen kar apna spandan
Buss karta jaa tu Guruji ka manan aur vandan

Guruji ke dhyan aur simran mein
Tu ho jaa bilkul mastt
Guruji ke diye huey gyan mein
Tu ho jaa bilkul vyast

Baaki sab faisle tu Guruji par chod de
Ve tere naath Hain aur tu hai Unkee santaan
Unko Shukrana karte huey Unse guzaarish kar
Ki tujhe dikhein sabke bheetar basey huey Bhagwaan

Jeena saral ho jaayega
Mann nirmal ho paayega
Guruji kee aseem kripa se tera
Nishchay hee uddhaar ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 5, 2020

Om Namaha Shivaya
Aaj Ka Suvichaar 🙏🏻🙏🏻 # 746

       Moksh Ka Raasta

Moksh ka raasta toh srishti kee shuruaat se vaisa hee hai
Lekin insaan agyanta-vash bhatak jaaye
Isliye insaan ko sahi raaste par vaapis laane ke liye
Bashar ke roop mein Guruji aaye

Sadaa sadaa ke liye
Sanaatan hai mukti ka raasta
Ispar vinamrataa aur vishwaas se chalna
Tumhe hai aman ka vaasta

Raaste mein jo archanein aayengi
Toh tumhaara suraksha kavach banega Guruji ka naam
Is naam ko har pal japte rahoge
Toh zaroor pahunchoge sachkhand ke dhaam

Mann mein vehemon ko paal kar atma ko kamzor na karna
Guruji sangg Hain tumhaare, isliye kisee bhi museebat se na darna
Agyan ke andhere mein Ve Apni gyanmayee jyot se tumhe raasta dikhaayenge
Dukhon kee moosalaadhaar baarish mein Ve tumhe bheegne se bachaayenge

Unkee ruhaani maujoodagi se prerna paakar
Unke simran aur dhyan mein mann lagaana
Tumhaare bin boley hee Ve sab jaante Hain
Isliye beshaq tum Unhe kuch na bataana

Lekin agar apna mann halka karne ke liye
Kabhi Unke aagey rona ya kehna bhi pada
Toh sharminda na hona tum bilkul bhi
Kyunki Guru ka ohada hai mata-pita se bhi bada

Tumhaari pakad kamzor ho sakti hai
Lekin Guruji kee pakad hai mazboot
Isliye Guruji ko tum apna haath thaamne dena
Chaahe baaki sab sahaare jaayein chhoot

Guruji ke haath mein apna haath thamaakar
Mann mandir mein Unkee chhavi ko basaakar
Vishwaas, prem, aur shradha se chale chalo tum Unka naam lete huey
Guruji tumhe bakshenge tumhaare safar ko anant anand ka anjaam dete huey

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 4, 2020

Om Namaha Shivaya
Aaj Ka Suvichaar 🙏🏻🙏🏻 # 745

      Shaashwat Shukrana

Museebaton kee chaadar odhey huey
Chhup kar basaa thaa bhakt ke mann mein Guruji par vishwaas
Jabb usne mushkilon ke baavajood bhi Guruji ka Shukrana kiya
Toh Guruji ne bhar diya Apni shakti se uska har shwaas

Guruji ne hee dee thee museebat
Uska vishwaas aur uskee shradha azmaane ke liye
Isee museebat ne bhakt ko ek aur haseen mauka diya
Guruji ko apne paas bulaane ke liye

Bhakt ko maalum thaa
Ki Guruji mushkil ko taal denge
Jaise bhi haalaat hon uske
Guruji sab sambhaal lenge

Agar mushkil na bhi khatm hoti
Toh bhi uska atoot thaa Guruji par vishwaas
Yahee dekhkar toh Guruji ne
Aur bhi dridh kar diya uska Shukrana bharaa ehsaas

Jis bhi haal mein Guruji ne rakha bhakt ko
Uska Guru prem thaa bay-shart
Duniya waale kehte rahe jo kehna chaahte thei
Bhakt ko unkee baaton se na pada koi bhi fark

Apne Guruji kee lagan lagaaye huey
Veh apni zindagi Shukrana mein jeeta raha
Sewa, simran, satsang, samarpan karta hua
Guru prem ka amrit veh peeta raha

Jabb uska antim vela aaya
Toh bhi usne antarmann mein Shukrana ka deep jalaaya
Har laukik bandhan ko chod diya usne
Aur Guruji kee anant jyot mein veh samaaya

Shaashwat Shukrana mein kitnee shakti hai
Bataati hai is bhakt kee kahaani
Kyun na hum sab bhi har saans se Shukrana kar ke nikhaar lein apni zindagaani

Is nikhree hui zindagi ke noor ke nagmey
Yahaan se jaane par bhi hamaare saath hongei
Humko Apni mamta bhari goad mein liye huey
Hamaare Guruvar, hamaare naath hongei

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 3, 2020

Om Namaha Shivaya
Aaj Ka Suvichaar # 744

                 Guruji Aaye Hain

Kalyuga ke jaal mein phansey huey hain hum
Hamein is se mukti dilaaney Guruji aaye Hain
Yeh jeevan moh maya ka khel hai
Hamein yeh samjhaane aaye Hain

Apne karam aur kartavya par hum dhyan dein
Hamaare paapon ka bojh ghataane aaye Hain
Deen dukhi aur naadaan hain hum
Guruji hum par Apni rehmat barsaane aaye Hain

Abhimaani hain hum, tuchh khayaalaat hain hamaare
Hamaara ahem mitaane aaye Hain
Anjaan hain hum,
Hamein hamaari asliyat se parichay karvaane aaye Hain

Dhyan aur simran karein, kusangati se duur rahein
Ve hamein ye bataane aaye Hain
Gupt daan, gupt paath, gupt sewa karein
Ve hamein ye sikhaane aaye Hain

Divya srijan Hain, MahaShiv Hain
Hamaare uddhaar karne aaye Hain
Unhee ko sarv samarpan hum kar dein
Hamaare jeevan mein Ve sudhaar karne aaye Hain

Saral Hain Ve, aur taral Hain
Saadagi ka paath padhaane aaye Hain
Komal Hain, nirmal Hain
Satya aur prem ka maarg dikhaane aaye Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2020

Om Namaha Shivaya
Aaj Ka Suvichaar 🙏🙏 # 743

Guruji Kee Mamta Ke Aanchal Mein

Guruji kee mamta ke aanchal mein
Duniya mein jahaan bhi ho baseraa
Unke dulaar ke sukoon se
Vahaan hee lagta hai savera

Guruji kee divyataa ka ujaala aisa
Ki andhera sataa sakta hai nahin
Unhe samarpan kar ke ye jaana aur maana
Ki jo ho raha hai vahee hai sahi

Guruji ka diya hua atma-bal aisa
Ki koi jageh na ho dil mein vehem kee
Guruji ke sachche bhakt ke dil mein
Na jageh hai bilkul bhi ahem kee

Guruji ka gyan itna gehra
Ki antaratma takk roshan ho jaaye
Guruji ka dhyan itna manoram aur divya
Ki antarmann usee mein kho jaaye

Guruji ke darbar mein gurbani ke divya rass mein
Ramm jaati hai sangat kee atma
Guruji ke milne se sangat ko
Mil gaye Hain Paramatma

Guruji angg sangg Hain har pal
Ismein koi bhi shaq nahin
Isliye hum udaas ya niraash hon
Hamaara koi haq nahin

Guruji ne jeevan diya hai hamein
Vahee isey sambhaalenge
Unhonei ye zindagi bakshi hai
Vahee isey nikhaarenge

🌹🌹🌹🌹🌹🌹🌹

Jai Guruji 🙏🙏
Dhirja