Month: September 2020

September 10, 2020

Om Namaha Shivaya
Aaj Ka Suvichaar 🙏🏻🙏🏻 # 935

        Is Paar Se Uss Paar

Subah jaane ke baad laut kar na aaye,
Yeh uska dastoor nahin,
Lekin har subah se pehle raat aaye,
Toh ye raat ka bhi kusoor nahin.

Guruji ne banaaya hai din aur raat ko,
Santulan dene sooraj aur chaand ko,
Taaki dono ko apna haq miley,
Aur prakriti suvidha se chaley.

Kuch aisee hee rachee hai Guruji ne zindagi kee kahaani,
Is jeevan par karti hai asar hamaari pichhlee zindagaani,
Aur jo sukh dukh ka mela lagaa rehta hai,
Veh hamein saboori rakhne ko kehta hai.

Kyunki Guruji pichhle karmon ka bhugtaan karaate huey,
Aaj ke karmon ka hisaab bhi likhte rehte Hain,
Unkee leela se jeevan ke din aur raat mein,
Hamaare sukh aur dukh ke lamhe behte hain.

Isliye kyun na hum karte chalein,
Apni oar se koshish poori,
Ki jaise raat apna poora samay leti hai jaane se pehle,
Vaise hee hamaari subah bhi na rahey adhoori.

Jis tarehn se silsila chalta rahega subah aur raat ka,
Vaise hee sukh subah ka chinh hoga aur dukh hoga prateek raat ka.
Jeevan mein sukh dukh dono hee aayenge,
Guruji kee aseem kripa se hum jee paayenge.

Raat ho toh shukrana karein Guruji ka,
Beetee hui subah ke liye,
Aur ardaas karein Unse,
Aane waali subah ke liye.

Subah honei ka Guruji ko shukrana karte huey,
Himmat maangein raat ka saamna kar paane kee,
Aur sukh dukh kee subah aur raat bitaate huey,
Tayyaari karein is paar se uss paar jaane kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 9, 2020

Om Namaha Shivaya
Aaj Ka Suvichaar 🙏🏻🙏🏻 # 934

Devon Ke Dev, MahaShiv Mahaan

Duniya tumhaara kuch nahin bigaad sakti kar ke atyaachaar,
Kyunki Guruji ni-sandeh Hain tumhaare paalanhaar,
Saump do Unhe apne jeevan kee naiya,
Na milega tumhe Unse zyada dhyan rakhne wala khewaiya.

Tumhaare raaste ke har shool ko hataane ka kiya hai jisne intazaam,
Ve yakeenan Hain Guruji, jo Hain tumhaare baagbaan.
Na sochna ki tumhaara raasta kabhi bhi hai gumaa,
Kyunki tumhe raasta dikhaayenge Guruji, tumhaare rahnuma.

Chaahe saare sagey sambandhi tumse toad dein naata,
Guruji mein paaoge tum bandhu, naath, aur bhraata.
Vipda jo aaye chaahe kitni bhi bhaari,
Tum chinta na karna, kyunki Guruji Hain kalyaankaari.

Na niraasha ke aansuon se numm karna apne lochan,
Guruji Hain dayaalu aur Ve Hain sankatmochan,
Uljhan aayegi toh suljhan bhi milegi har baar,
Ye nahin bhoolo, ki Guruji Hain taaranhaar.

Agar lagaa ki ho gaya jeevan mein khushi ka khaatma,
Toh bhi sab theek karenge Guruji jo Hain Paramatama.
Sab kuch lut gaya toh bhi naye daur se zindagi hogi shuru,
Kyunki pyaare Guruji Hain pooran Guru.

Isliye na khona tum apna sukh, chayyn, aur aaraam,
Kyunki tumhaare sangg Guru ke roop mein Hain Bhagwaan,
Na karna fikr, ki kaise hoga tumhaare karmon ka bhugtaan,
Kyunki Guruji Hain Devon ke Dev, MahaShiv mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 8, 2020

Om Namaha Shivaya
Aaj Ka Suvichaar 🙏🏻🙏🏻 # 933

        Guruji Hain Karunanidhan

Poojya Guruji se judne ke liye,
Har pal hai shubh mahoorat,
Zamaane ko pramaan dene kee,
Nahin hai koi zaroorat.
Ye toh seedha rishta hai,
Har bhakt ka Guruji ke sangg,
Ismein niswaarth prem ke saath milaana hai,
Samarpan aur shraddha ka rangg.

Guruji ke hukm ko sir aankhon par maankar,
Karna hai gupt daan aur gupt paath,
Gupt sewa ka farz hai nibhaana,
Poori bhakti ke saath.
Satsang sun-na aur sunaana hai,
Guruji ka ashirwaad paana hai,
Simran aur dhyan karna hai prem se,
Aur Guruji ke kareeb aana hai.

Achchi soch aur changey karam aavashyak hain,
Kyunki Guruji kehte Hain, ‘Banda bann,’
Ghar parivaar ka santulan banaaye rakhna hai
Taaki veh mandir jaaye bann.
Tann, mann, kamra, ghar mandir hain,
Guruji ne hai sikhaaya,
Phir Bade Mandir kee baari hai,
Jismein baarahn teerath dhaam ka ashirwaad hai samaaya.

Antarmann mein Guruji ke naam kee,
Divya dhaara sadaa bahey,
Hamaara tann mann dhan,
Nishkaam sewa mein rahey,
Guruji kee dee hui himmat se,
Har bhakt saahas se kasht sahey,
Har pal hamaara roam roam,
Guruji se shukrana kahey.

Guruji ke pavitra naam se,
Susajjit rahey hamaari zubaan,
Guruji ke bachche hain hum,
Unhee kee kripa se hai hamaari muskaan,
Fikr kee aadat chodni hogi,
Kyunki Guruji Hain karunanidhan,
Buss, Guruji ke naam mein ramm jaaye,
Hamaara dil aur hamaari jaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhirja Bhat M. D.: September 7, 2020

Om Namaha Shivaya
Aaj Ka Suvichaar 🙏🏻🙏🏻 # 932

        Sehar Aayegi Hee Aayegi

Sehar aayegi hee aayegi,
Kyunki raat kabhi na kabhi kat jaayegi,
Khaatma hoga dukh ka,
Aagaman hoga sukh ka.

Hukm na chal paayega dukh ka,
Kyunki paldaa bhaari hoga sukh ka,
Guruji khushiyaan laayenge,
Dukh ke lamhe beet jaayenge.

Andhera chalaa jaayega,
Ujaala laut aayega,
Tu bilkul bhi fikr na kar,
Kisee se bhi zikr na kar.

Kewal Guruji se sab kuch keh daal,
Bataa de Unhe tera kitnaa buraa hai haal, Ye nahin ki Ve is baat se anjaan Hain,
Lekin ye lafz zubaan par ek ehsaan hain.

Isliye unhe chukaa lene de tu ehsaan,
Taaki phir sukoon paaye teri zubaan,
Tu toh hai mehez ek insaan,
Kya karega tu bin Bhagwaan.

Ye bhi jaante Hain Guruji,
Aur tujhe apna maante Hain Guruji.
Isliye sab sambhaalenge Guruji,
Dekhna, tera jeevan sanvaarenge Guruji.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja
💚🌹🌹🌹🌹🌹

September 6, 2020

Om Namaha Shivaya
Aaj Ka Suvichaar 🙏🏻🙏🏻 # 931

    Saanson Ko Simran Se Sajaa Lo

Chod do tum vehem aur andhvishwaas,
Beshaq shauk aur khushi ke liye nibhaa lo reet rivaaz,
Lekin inka anusaran karne ko na socho tum majboori,
Aur ye bhi nahin socho ki tumhe inko nibhaana hai bilkul zaroori.

Jaise hamein fikr hoti hai, agar hamaare bachche khaana nahin khaate hain,
Vaise hee hamaare bhookhe rehne se shaayad Guruji bhi pareshaan ho jaate hain.
Achchaa socho aur doojon ko dukh na do, aisa karo upvaas,
Aur koshish karo ki vikaaron ka na ho mann mein vaas.

Kyunki vehem aur andhvishwaas kee vajeh se darte rehna,
Veh bandish hai, bandagi nahin,
Aur aisee bandish mein saansein lena,
Veh adheen hokar jeena hai, lekin adhyatmik zindagi nahin.

Kyunki aisee bandish se atma-shakti par ho sakta hai asar,
Jabki Guruji chaahte Hain ki hum aadhyaatmikta mein hon agrasar.
Tabhi toh Guruji kehte Hain ki hum vehem aur andhvishwaas ko tyaag dein,
Aur Unkee sharan mein rehkar swayam kee ruhaani unnati mein bhaag lein.

Guruji kee sharan mein har din shubh hai,
Tumhaare liye kya sahi hai veh Guruji tumhe khud bataayenge,
Seedha naata rakho Guruji ke sangg,
Toh Ve har kshan har jageh tumhaare saath aayenge.

Vehemon kee bandish ko chod kar,
Saanson ko simran se sajaa lo,
Jo deewar khadi hai andhere aur roshni ke beech,
Uss deewar ko Guruji ka naam lekar tum hataa do.

Deewar kee doosri taraf na hoga koi bhi andhvishwaas,
Vahaan hoga adhyaatmik sukh aur simran bharaa shwaas,
Guruji mukt karenge har bandhan se,
Antt mein zaroor sukh milega Unke vandan se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2020

Om Namaha Shivaya
Aaj Ka Suvichaar 🙏🏻🙏🏻 # 930

          Shikshak Divas

Shukrana Guruji Aapka,
Hamein apna shishya banaane ke liye,
Shukrana Guruvar Aapka,
Hamein itna kuch sikhaane ke liye.

Aap mein Brahma, Vishnu, Mahesh Hain samaaye,
Aur Aap hamaare jeevan mein Guru ke roop mein aaye,
Dete Hain Aap Apne naam ka daan,
Aur karte Hain Apne bhakton ka kalyaan.

Itne protsaahan aur laad se Aap,
Apne satsang kee kaksha mein bulaate Hain,
Apne sangg hamein jod kar,
Simran ka mahatva samjhaate Hain.

Atma-bal badhaate Hain hamaara,
Aur dete Hain hamein adhyatmik deeksha,
Hamein taarne ke liye,
Lete Hain hamaari pareeksha.

Jeevan ka paathyakram jab kathin lagta hai,
Toh Aap sewa karaa kar baar baar padhaate Hain,
Aur hamaari shraddha aur bhavna dekhkar,
Hamaara utsaah aur bhi badhaate Hain.

Goodh gyan sikhaane ke liye,
Hamein Gurbani se jodte Hain,
Aapke chhaatr neeven bann jaayein,
Isliye kitne shishyon ka ahem Aap todte Hain.

Saadagi aur saralta se jeena sikhaate Hain Aap,
Taralta aur nirmaltaa ka mahatva samjhaate Hain Aap,
Gyan pradaan karne ke saath aish karaate Hain Aap,
Har mushkil kaam ko aasaan banaate
Hain Aap.

Maarg dikhaate Hain Aap insaaniyat ka,
Roshan karte Hain raasta ruhaaniyat ka,
Khandit kar ke har vichaar vikaaron ka,
Amrit pilaate Hain shudh sanskaaron ka.

Aap Hain Ve murshid jinse srishti hui shuru,
Aapko samarpit hai Shikshak Divas ka din.
Aap hee Hain Rabb, aur Aap hee Hain Guru,
Aapke sab shagird asahaay hain Aapke bin.

Kaayinaat mein sabse uttam Guru Hain Aap,
Jeevan ka paath padhaakar duur karte Hain hamaare santaap,
Hum itne khushkismat hain ki Aapne hamein sweekara hai,
Yeh shikshak aur chhaatr ka rishta sach mein bahut hee pyaara hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2020

Om Namaha Shivaya
Aaj Ka Suvichaar 🙏🏻🙏🏻 # 929

               Hamaare Sartaaj

Aye bande, ye duniya na hai teri, na hai meri,
Kalyuga ka toh jaise dharam bann gaya hai hera-pheri,
Iska anusaran karne mein duniya kadaachit nahin karti hai deri,
Guruji, Aap kripa kar bachaayiye, taaki aur bhaari na ho jaaye hamaare paapon kee dheri.

Aapki kripa se hum laukik aakarshanon se rahein duur,
Aur hamaara ahankaar ho jaaye chuur chuur.
Guruvar, chhichhorepan ke haathon na ho jaaye hum majboor,
Sadaa dil aur atma par chaaye Aapka noor.

Kisee ka bhalaa na kar sakein,
Toh kisee ka bura na sochein aur na karein,
Chaahe saari duniya jhoothi ho,
Hum sachchaayee ka saath dene se na darein.

Aapne kaha ki kewal maree machhlee bahaav ke sangg behti hai,
Aapki yeh baat kitnee gehraayi se itna kuch kehti hai.
Phir bhi ve anjaan banenge jinhonei sudharnaa nahin hai,
Aur bheed mein ulajhte rahenge jinhonei sulajhnaa nahin hai.

Oopari dikhaawa toh itnon ko bhatkaata hai yahaan,
Khuda ke bajaaye loag samajhne lagte hain insaan ko Bhagwaan,
Chaahe is kalyuga kee bheed mein na rahey sadaachaari ka koi nishaan,
Aap mein hee sadaa samaaye hamaara toh saara jahaan.

Kyunki Aapse hee hai divya dharamaacharan,
Aapse hee hai satya ka raaj,
Aap hee Hain maargdarshak hamaare,
Aap hee Hain hamaare Sartaaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2020

Om Namaha Shivaya
Aaj Ka Suvichaar 🙏🏻🙏🏻 # 928

     Aisa Kabhi Nahin Honei Denge

Kabhi kabhi niraasha itnee hoti hai,
Ki aisa lagne lagta hai baar baar,
Jaise khatm hee nahin ho raha hai,
Sukh kee subah ka intazaar.

Toh dil se lo Guruji ko pukaar,
Kyunki Ve hee sambhaalte Hain saara sansaar,
Ye toh hai nahin ki Guruji nahin jaante Hain tumhaari paristhiti,
Phir bhi agar badal nahin rahi hai abhi sthiti,
Toh shaayad
jo tumhe lagg rahi hai prateeksha,
Veh darasal ho Guruji kee dee hui koi pareeksha?
Aur jo tumhe lag raha hai Unkee oar se vilambh,
Kya maalum veh ho Guruji kee kripa se koi aur shubh aarambh?

Tumhaare bina boley hee,
Guruji sab jaante Hain,
Phir bhi, ye aansoon shaayad kabhi kabhi,
Is satya ko nahin maante hain.

Isliye ye beh jaate hain,
Aur dil ka dukh keh jaate hain,
Isliye tum Guruji ke saamne ronei se na ghabraana,
Guruji ko apna raaze dil tum sunaana.

Guruji ke bharose hee toh hai tumhaari har shwaas,
Isliye kaayam rakhna Guruji par tum apna vishwaas,
Bilkul bhi matt sochna ki tum reh jaaoge beech majdhaar,
Aisa kabhi bhi nahin honei denge itne pyaare parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2020

Om Namaha Shivaya
Aaj Ka Suvichaar 🙏🏻🙏🏻 # 927

   Tum Himmat Na Haarna

Tum jo socho veh Guruji na jaanein,
Aisa ho sakta hee nahin,
Isliye socho bhi zaraa dhyan se,
Taaki tumhaari soch ho sahi.

Na kisee vishesh intazaam kee zaroorat,
Na kisee khaas din ka chaahiye mahoorat,
Guruji se judne ke liye har pal hai shubh,
Buss apni neeyat ko tum rakho shudh.

Na jungle mein jaana padega tumhe,
Na chodna padega parivaar,
Yahaan kewal dil se jodo seedhi taar,
Kyunki ye hai Guruji ka darbar.

Yeh baat mann mein kabhi na laana,
Ki Guruji tumhaari aur dhyan nahin Hain dete,
Arey, ek Ve hee toh Hain jo tumhaare saare kasht,
Khud Apne aap par Hain le lete.

Agar tumhe lagta hai ki abhi,
Bahut buree dashaa hai tumhaari,
Phir socho ki Guruji kee kripa ke bin,
Yeh haalat hoti is se bhi zyaada maadi.

Tumhaari haalat ka sahi andaaza,
Guruji ko hai tumse bhi zyada,
Tum chaahe na bol paao mukh se,
Guruji waqif Hain tumhaare har dukh sukh se.

Kisee ne tumhaare sangg anuchit kiya,
Toh Guruji is paristhiti ko bhi sambhaalenge,
Tumhaare jeevan mein jaisi bhi uljhan ho,
Neeyat achchi hai toh Ve usey suljhaa lenge.

Arey, jab tum niraash aur udaas ho hotey,
Toh Guruji ke chakshu tumhaare naynon se bhi zyada hain rotey,
Tumhaare karmon ka bhugtaan karaane ke liye,
Guruji aaj bhi nahin Hain sotey.

Isliye iska toh prashn hee nahin hai uthtaa,
Ki Guruji tumhaari vintee sunenge ya nahin,
Haan, Unhe samarpan kar ke Unhe jeevan kee doar saump do,
Ve hameshaan vahee karenge jo tumhaare liye hoga sahi.

Swaarth na laao vichaar mein,
Sabke bhaley ke liye maango dua,
Phir dekhna Guruji tumse kitne khush hongei,
Kyunki tumhaari praarthanaa mein zikr sabka hua.

Guruji tumse kabhi bhi muh na modenge,
Ve tumhe kabhi bhi nahin chodenge,
Nyaayaadheesh Hain Ve Bhagwaan ke swaroop mein,
Tumhaare uddhaar ke liye aayenge kisee bhi roop mein.

Isliye tum himmat na haarna,
Dil mein basaa lo yeh sachchi dhaarna,
Ki Guruji se kuch bhi chhupta nahin,
Aur kisee bhi bhakt ka kalyaan rukta nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2020

Om Namaha Shivaya
Aaj Ka Suvichaar 🙏🏻🙏🏻 # 926

 Guruji Hee Hamaare Sarvesh Hain

Anant Chaturdashi ka din hai aaya,
Vishnu ji ke sammaan mein,
Ananta toh Vishnuji ke Hain avataar,
Jo Paalankarta Bhagwaan Hain.

Jab Kauravon ne Pandavon ko haraaya,
Jooey ke khel mein chhal se,
Toh Paandavon ne apna raajya kho diya,
Aur Ve ghabraaye aane waale kal se.

Tyaag kar saara aisho-aaraam,
Unhonei vanvaas le liya,
Tabb Krishanji gaye Unhe milne,
Aur Unhe mushkil se nikalne ka upaaya diya.

Krishna Bhagwaan kee baat maankar,
Yudhishthir ne Prabhu Anant ka kiya upvaas aur vandan,
Is shraddha poorna pooja se,
Ve apna raajya paakar huey sampann.

Ek aur pauraanik katha mein,
Brahmin putri Sushila ne ‘Ananta shapath’ lee,
Lekin uskee pooja mein uske pati ne vighn daali,
Phir bhi Ananta ne unhe saari khushi dobaara dee.

Isee din par Ganeshji ka pyaar bharaa visarjan,
Har varsh itne ullaas ke sangg hai hota,
Har koi khushi se gaata hai Ganeshji kee mahima,
Chaahe bhakt bada ho ya ho chhota.

Jabb se Guruji ne liya hai hamein sharan mein,
Kashi aur Baikunthdhaam mila Unke kamal charan mein,
Jahaan mil jaaye saare teerath dhaam ka sukh,
Aisee paawan panaah mein phir kaahe ka dukh?

Guruji ke bharose hee hai ab janam maran,
Kyunki Guruji hee Hain dukh haran mangal karan,
Guruji mein Brahma, Vishnu, Mahesh Hain,
Guruji mein Hain Ganesh, aur Guruji hee hamaare Sarvesh Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja