Month: October 2021

October 11, 2021

Om Namaha Shivaya
Aaj Ka Suvichaar 🙏🏻🙏🏻 # 1331

         Hum Sabka Aashiyaan

Waqt ne musaafir par aisa sitam dhaaya
Ki uskee aankh khuli aur usey samajh mein aaya
Ki yeh saara jagg hai bilkul paraaya
Aur andhere mein saath chod deta hai khud ka bhi saaya.

Sitam ne dil ko toda lekin hui nahin koi awaaz
Poori duniya apne mein mastt rahi bin jaane yeh raaz
Lekin Guruji toh dekh rahe thei sabb
Yoon hee toh nahin kehte hain Unhe Rabb.

Musaafir thakk kar baitha saagar ke kinaare
Bandd ho chuke thei uske liye ummeed ke sabb dwaare
Soch raha thaa ki kaise yeh jeevan guzaare
Soch raha thaa ki jeevan guzaare bhi toh kiske sahaare.

Baitha raha veh hokar udaas
Buss, ek potli thi uske paas
Usmein se nikaal kar ek chhoti si tasveer
Usey dekh kar kisee ko pukaarne lagaa hokar veh adheer.

Koi phool nahin thaa aaspaas
Kewal ret thi vahaan
Saamne saagar kee lehren thee
Aur oopar thaa neela aasmaan.

Gin raha thaa veh apni atma ke ghaav
Utne mein saagar mein duur dikhi ek naav
Na jaane kyun aakarshan se sajaa uska bhaav
Aur bhool gaya usey apne jeevan ka har abhaav.

Naav lagg rahi thi aisee maano kisee aur duniya se ho aayi
Na jaane kyun musaafir ko veh naav itnee bhaayi
Prateet hua jaise naav se sooraj kee kiranon ka praadurbhaav ho raha thaa
Musaafir ne hakka-bakka hokar socha ki veh jaaga thaa ya so raha thaa?

Kyunki yeh sab lagg raha thaa usey ek sundar sapna
Aisa lagaa usey ki naav mein hai uska koi apna
Gulab kee khushboo aayi aur pyaar umad aaya uske mann mein
Yeh sabb mehsoos kiya usne jaise ek hee kshan mein.

Jaakar khadaa hua saagar ke kinaare
Uska dil chaaha ki veh naav ke maanjhi ko pukaare
Mann mein aaye ekaa-ek khayaal itne saare
Ki veh samajh na paaya ki kaunse khayaal ko pehle vichaare.

Lagaa usey jaise koi divya leela thi chal rahi
Naav kareeb aati gayi jaise jaise shaam thi dhal rahi
Uske aaspaas ka spandan badal sa gaya
Tabb se pehle usne kabhi aisa na thaa mehsoos kiya.

Apne par hairaan hua musaafir kyunki veh muskuraane lagaa
Maanjhi ne naav kinaare par roki aur veh musaafir ke nazdeek aane lagaa
Harsh kee tarang behne lagi musaafir ke roam roam mein
Jaise jaise veh leen honei lagaa maanjhi ke haath par baney Om mein.

Maanjhi ka roop thaa bahut viraat
Veh aankhon se kar raha thaa baat
Uske mukh par thi mandd si muskaan
Chehre par noor thaa aisa jaise ki veh ho Bhagwaan.

Mantramugdh hua musaafir maanjhi ke is noor se
Usne jaana ki yahee noor thaa jo chamak raha thaa itnee duur se
Musaafir khud-bakhud hee maanjhi ke aagey jhuk gaya
Uss ek pal ke liye toh jaise waqt bhi naman karte huey ruk gaya.

Maanjhi naav se utra aur aaya musaafir ke paas
Musaafir gir gaya maanjhi ke charnon mein bannkar maanjhi ka das
Jinkee tasveer thi uskee potli mein, ye vahee Guruji thei uske saamne
Unhonei Apna haath aagey badhaaya musaafir ka haath thaamne.

Musaafir kee khushi kee toh seema na rahi
Jo bhi maansik peeda usne abb takk thi sahi
Musaafir uss dukh aur peeda ko gaya bisar
Usey darshan de rahe thei Guruji ke roop mein swayam Har.

MahaShiv Guruji ke paawan sparsh se
Musaafir sadaa ke liye gaya tarr
Guruji antardhaan ho gaye
Dekar usey sadaa khush rehne ka var.

Apne hriday mein Unke darshan ko basaakar
Musaafir ne dekha naav kee oar
Uske dekhte dekhte ojhal ho gayi naav bhi
Aur naachne lagaa uske mann ka moar.

Duniya kee parvah ko chodkar
Guruji kee chhavi basaaye huey apne mann mein
Musaafir apna jeevan jeene lagaa
Guruji ke chintan aur vandan mein.

Hum sabhi musaafir ke jaise safar ke liye aaye hain yahaan
Hum mein se kisee kee bhi jaageer nahin hai ye jahaan
Na apni hai ye zameen na hee ye aasmaan
Guruji ka dar hee hai hum sabka aashiyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 10, 2021

Om Namaha Shivaya
Aaj Ka Suvichaar 🙏🏻🙏🏻 # 1330

       Maanav Bann Kar Aaye Thei

Ishwar kee leela se maanav ne janam liya
Satyug mein toh sadbhaav se maanav ne karam kiya
Jaise jaise yug badle toh tretayug aur phir dwaapar yug aaya
Aur uske pashchaat yeh kalyuga chhaaya.

Jisne janam liya thaa bann kar maanav
Uska swabhaav ho gaya jaise veh ho daanav
Jo bhi maanav aur daanav mein thaa fark
Veh kumm honei lagaa bin koi tark-vitark.

Phir toh kya hee kehna
Prakriti ko pada is hakeekat ko sehna
Swaarth aur vikaar karne lagey raaj
Chaahe ho veh koi bhi kaam kaaj.

Maanav bhoolne lagaa Bhagwaan ko bhi
Bhool gaya ki jeevan imtehaan hai, yeh bhi
Itna magn hua bann-ne mein bhautik ameer
Ki maano baych diya maanav ne apna zameer.

Guruji aaye dharti par bann kar bashar
Ve sarvgyani Hain, isliye jaante thei ki kalyugi hawaa ka kya hoga asar
Unhonei na chodi Apni oar se uddhaar karne kee koi bhi kasar
Lekin maanav kee bhautikvaad kee bhookh hoti chali agrasar.

Guruji ne kaha ki koi maangta hee nahin cheez asal
Guruji dekhte rahe ki maanav kaise raha hai badal
Apni shakti aur Apne prataap ko kiya Guruji ne pehle se bhi zyaada
Unhonei mahasamadhi lee aur nibhaate rahe kalyaan karte rehne ka vaada.

Maanav phir bhi karta raha daanav ke jaisa vyavhaar
Badhne lagaa laalach, krodh, kaam bhaav, irshya, nashaa, aur vyabhichaar
Prakriti ka bhi sammaan na kiya toh prakriti hui laachaar
Aur saare sansaar mein honei lagin praakritik vipattiyaan kayee hazaar.

Maanav phir bhi sudhar na paaya aur anuchit hota gaya uska vyavhaar
Phir mahaamaari aayi aur hua poora jagg laachaar
Kewal shaareerik sehat se hee nahin, balki mann aur charitra se maanav hua beemaar
Abb toh ek hee ummeed bachi hai, vo hai MahaShiv Guruji ka dwaar.

Maafi maang lein Guruji se hum sab maanav
Chod dein hum sabb bann-na daanav
Guruji chaahte Hain hum sudhar jaayein
Jaisa Ve chaahein hum sab kyun na vaisa bann paayein?

Chod dein daanav wale vichaar aur vyavhaar
Khud sudhar kar sanvaarein yeh sansaar
Guruji samjhaate Hain kayee tareekon se baar baar
Ve le jaana chaahte Hain hum sabko bhav saagar ke paar.

Guruji ne diya hai jo jeevan daan
Daanav bann kar na karein is daan ka apmaan
Maanav bann kar aaye thei, yahaan maanav bann kar hee rahein
Guruji ke diye huey jeevan daan ke liye sadaa Unhe Shukrana kahein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2021

Om Namaha Shivaya
Aaj Ka Suvichaar 🙏🏻🙏🏻# 1329

 Jo Jabb Achchaa Hoga Hamaare Liye

Guruji kee raza mein chalte jaa rahe hain
Chaahe din ho ya ho raat
Anginat dinon ke sooraj dhalte jaa rahe hain
Phir bhi badal nahin rahe haalaat.

Aisa hai toh bhi dheeraj dharein, bilkul na darein
Hamesha nahin rehne wala yeh vilamb
Ismein bhi bhalaayee hai hamaari
Jald hee hoga shubh aarambh.

Guruji hamaare deekshak Hain
Guruji hee Hain rakshak bhi
Ve jaante Hain hamaara kalyaan kis mein hai
Ismein bilkul koi bhi shaq nahin.

Unke haath mein jo saumpi hai jeevan kee doar
Toh phir kyun jaayein hum kaheen aur
Jo jabb achchaa hoga hamaare liye
Ve denge hamein tabb bin der kiye.

Balki achchaa hai ki Unhonei hamaara chaaha hua ashirwaad nahin diya abhi
Kyunki Ve hee jaante Hain ki veh abhi ya kabhi hamaare liye nahin hai achchaa
Guruji ko hum se zyaada chinta hai hamaari
Kyunki hum mein se har koi hai Unka bachcha.

Isliye Guruji par sadaa vishwaas karein
Unkee mamta aur suraksha ka ehsaas karein
Shraddha kee oorja se apna har shwaas bharein
Na hokar hum pareshaan yoon vyarth mein taqdeer se darein.

Kyunki taqdeer toh veh sikka hai
Jo Guruji kabhi bhi denge palat
Hamein pataa bhi nahin chalega aur kismat jaagegi
Hamaare jhapakte hee palak.

Isliye Guruji kee raza mein raazi rehkar
Bina atma-taras kee lehron mein behkar
Karte chalein har saans se Guruji ka shukrana
Koi bhakt aisa nahin jiska Guruji ne apne ashish se na sajaaya ho taraana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2021

Om Namaha Shivaya
Aaj Ka Suvichaar 🙏🏻🙏🏻 # 1328

        MahaShiv Guruji Dugri Wale

Divyataa kee saakshaat moorat
Poore Brahmaand mein sabse zyada khoobsoorat
Hamaare mann ke mayley bartan ko karte Hain saaf
Hamaari sainkdon galatiyon ko karte Hain maaf
MahaShiv Guruji Dugri wale
Saari sangat ke rakhwaale.

Prem karein Ve sangat se aisa
Ki koi na kar paaye prem aisa
Uss prem mein na hai koi bhi shart
Uss prem ka hai sabse paawan arth
MahaShiv Guruji Dugri wale
Saari sangat ke Jinhonei Hain kaaj sambhaale.

Sangat ko khila kar hee khud khaate Hain
Apne bachchon ko raah dikhaate Hain
Har bhakt kee uljhan sulajhaate Hain
De kar kabhi nahin jataate Hain
MahaShiv Guruji Dugri wale
Jinke ashirwaad dene ke tareeke Hain bade niraale.

Bhakton ka ahem aur vehem todein
Dukh se toote huey dilon ko jodein
Kabhi bhi sangat se muh na modein
Kabhi kisee bhakt ka saath na chodein
MahaShiv Guruji Dugre wale
Hain kitne bade dil wale.

Bhav saagar ko paar karaayein
Baadhaaon ko raaste se hataayein
Vikaaron ke roag ko duur bhagaayein
Beemari ko jadd se mitaayein
MahaShiv Guruji Dugri wale
Jinhonei khole kismat ke bandd taale.

Asal dhan Jo dena chaahte Hain
Isliye Apne darbar mein bulaate Hain
Banda bann-ne ka paath padhaate Hain
Chinta chod chintan karna sikhaate Hain
MahaShiv Guruji Dugri wale
Jinhonei taqdeer ke mohare badal daale.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2021

Om Namaha Shivaya
Aaj Ka Suvichaar 🙏🏻🙏🏻 # 1327

         Navratron Ke Shubh Din

Navratron ke shubh din hain aaye
Har jann Adi Shakti kee mahima gaaye
Shivji aur Mata Rani ke milan se Ardhnaareeshwar ka roop prakat ho jaaye.

MahaShiv Hain pyaare Guruji hamaare
Jinhonei mata pita bannkar bhakton ke kaaj Hain sanvaare
Devi ka har roop Guruji mein hai samaaya
Paata hai Adi Shakti ka pyaar jo Guruji ke charnon mein hai aaya.

Navratron ka pehla din samarpit hai Parvati Mata ko
Jinka Shailaputri hai naam
Himvaan aur Mena kee beti Hain Ve
Himalaya hai jinka dhaam.

Mata Parvati ke Brahmachaarini roop ko Pooja jaata hai navratron ke dooje din par
Shivji ke dhyan mein leen Hain Ve rehti
Taaki miley Unhe Shivji ka dar.

Navratron ke teesre din par hota hai Mata Chandraghanta ka gungaan
Chaand hai Jinke mastak par aur jo deti Hain peeda nivaaran ka daan.
Samarpit hai chautha din navratron ka
Kushmandi Mata Rani ko
Srishti kee rachna kee zimmedaari milee hai ushma wali in Mata gyani ko.

Shailaputri Maa ko ghee ka, aur Brahmachaarini maa ko cheeni ka
Bhog lagaate Hain bhakt jann
Aur Chandraghanta Devi ko kheer, Kushmanda Devi ko malpoore ke bhog se
Saadhak karte hain prasann.

Skand kumar kee ma Skandmata ko panchami par hai pooja jaata
Katyaayan rishi kee putri Katyaayani ke sammaan mein chhathha din hai aata
Skandmata ko kele, aur Katyaayani ko shehed hai bhaati
Sabse zaroori hai prem bhaav jis se bhakton kee peeda aur mushkil kumm ho jaati.

Saptami par Maa Kaalraatri gadhe par sawaar hokar Hain aati
Aur ashtami Maa Mahagauri ke aadar sammaan mein hai manaayee jaati
Saptami par gud, aur naariyal ashtami par
Bhakt chadhaate hain mata ko pooj kar.

Mata Siddhidhatri prateek Hain nipunta kee
Navratron ka aakhiri din hai Unhe samarpit
Til ke beej se Ve hoti Hain prasann
Aur bhakton ko deti Hain suraksha ka dhan.

Maa ka roop krodhit ho ya ho pyaar wala
Unka ashirwaad bann kar aata hai andhkaar bhare jeevan mein ujaala
Buraayee ka antt nishchit hai aur achchaayee ka hee hoga aagaman
Mata ka har roop ye kehta hai aur bhakt jhuk kar karte hain naman.

Bahut hee bhakti bhaav se saadhak
Navratron ko hain manaate
Bhakton ka vishwaas hai ki sankat aur bhayy ka antt hai hota
Aur khushhaali aur nirbhaytaa ke din awashya hain aate.

Guruji ke bhakton ko Guruji kee mamta mein
Dulaar milta hai Maa ke har roop ka
Saakshat Guruji kee chhavi aur leela basti hai Unke har Swaroop mein
Isliye aseem aadar hota hai Guruji ke har swaroop ka.

Isliye navratron ke saare din
Guruji ko bhi karein hum samarpit
Usee mein hamaara kalyaan hai
Usee se anugrihit hoga hamaara chitt.

Saari sangat ko navratron kee
Bahut pyaar bhari badhaayi
Navratron kee shubh tithi
Guruji kee kripa se hai aayi.

Guruji jo mamta Hain dete
Vo hum kabhi bhi na bhoolein
Aur jaise maa kee goad mein bachche hain palte
Vaise hee Guruji kee goad mein hum jeeyein aur jhoolein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2021

Om Namaha Shivaya
Aaj Ka Suvichaar 🙏🏻🙏🏻 # 1326

                 Saanson Kee Bel

Yeh jeevan toh hai sukh dukh ka mel
Hai yeh waqt kee deewar par chadhti hui saanson kee bel
Dhoop chhaaon ka hai yeh khel
Koi masti se jee leta hai isey toh koi buss isey leta hai jhel.

Kaafi hadd takk toh juda hai is janam ke jeevan se
Pichhle janmon ke karmon ka prabhaav
Baaki maayne rakhta hai ki is janam mein hamaara drishtikon kaisa hai
Aur kaisi hai hamaari soch, hamaare karam aur hamaara bhaav.

Saanson kee bel mein achche karmon ke phool ugein
Ya anuchit karmon ke kaante jo chubhein
Ye hai hamaare haath mein
Aur Guruji sadaa Hain saath mein.

Nadar bhi Unkee
Nazar bhi Unkee
Vishwaas hamaara
Prayaas hamaara.

Nirnay Unka, neeyat hamaari
Sneh Unka, shraddha hamaari
Guruji kee sharan mein toh hai sundar phulawari
Yoon hee toh nahin Unke liye kamlee hoti hai sangat saari.

Achche karmon kee maati se
Hum saanson kee bel ko dekhein phalte huey
Bin shikaayat Guruji se judey rahein
Aur waqt ke sooraj ko dekhein hum dhalte huey

Sooraj ke dhalte dhalte kitna saumya geruan rangg ho jaata aakash ka
Ruhaaniyat ka rangg usmein samaa kar Hisaa bann jaata hai uss prakash ka.

Har saans mein Guruji ka simran kar ke
Bel ko hum tarr jaane dein
Guruji kee mehar se waqt kee deewar ko Tarti hui saanson kee bel se bhar jaane dein
Waqt kee is deewar ke uss paar
Hoga atma ka Paramatma se deedar
Isee uphaar ka hai dil ko bahut intazaar
Yaad rakhein ki aisa mauka nahin milta hai baar baar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 5, 2021

Om Namaha Shivaya
Aaj Ka Suvichaar 🙏🏻🙏🏻 # 1325

        Antaratma Kee Ansuni Awaaz

Shareer mein bandhi atma laukikta ko sehti jaaye
Mukt honei kee intazaar mein yoon hee rehti jaaye
Abb toh sunn lein hum apni antaratma kee ansuni awaaz
Bheetar jaayenge toh hee jaan paaoge uska raaz.

Jitnee saansein Guruji hamaare jeevan mein likhte Hain
Unmein se kitnee reh gayin, hamein na ve dikhti hain
In saanson ko lete huey atma ko kasht kyun dete rahein hum
Isliye chaahe zindagi mein aaye khushi ya phir aaye gumm
Usey samajh kar zindagi ke is naatak ka bhaag
Hum prayaas karein ki hamaari chetna jaaye jaag.

Kyunki jiskee chetna hee na jaagi ho
Veh shakhs toh jaagte huey bhi so raha hai
Kyunki veh jaane ya anjaane mein
Yahaan ke maya jaal mein kho raha hai.

Guruji kehte Hain ki hum karein Unka simran aur dhyan
Isee raaste par paayenge hum veh hunar aur veh gyan
Jis se hum sunn sakenge antaratma kee ansuni awaaz
Aur jaan paayenge veh bataana chaahti hai jo raaz.

Is safar mein alag chal raha hai har insaan
Is safar par pehra de rahe Hain Bhagwaan
Hamein mila hai Guruji ka paawan naam
Jo pahunchaa sakta hai hamein
sachkhand ke dhaam.

Isliye bina kiye deri
Bin kiye koi herapheri
Shradddha se hum chalte rahein
Taaki baad mein haath na malte rahein.

Guruji par ekaagrachitt rehne ka karein prayatna
Antaratma kee azaadi ka karte rahein yatna
Guruji kee mehar se sureele sur se sajega saanson ka saaz
Jabb sunaayee degi veh awaaz aur jabb khulega veh ruhaani raaz.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2021

Om Namaha Shivaya
Aaj Ka Suvichaar 🙏🏻🙏🏻 # 1324

      Mai Toh Har Pal Vaari Jaaoon

Guruji ke pyaare pyaar par
Mai toh har pal vaari jaaoon
Guruji ke khayaalon mein rehkar
Apna jeevan sanvaari jaaoon.

Guruji kee mahima ke nagme
Magn hokar mai gaati jaaoon
Mere Guruji kitne pyaare Hain
Sabhi ko mai bataati jaaoon.

Jabb se hoon Guruji kee sharan mein mai aayi
Aksar bin vajeh hee muskuraati jaaoon
Unkee kripa se apne hriday ke aangan mein
Unka divya roop basaati jaaoon

Apne mann-mandir mein prem se
Shraddha kee jyot jalaati jaaoon
Guruji ne sangat se kaha, ‘banda bann’
Isliye khud ko insaaniyat ka paath yaad dilaati jaaoon.

Antar-mann ke maathe par
Guru naam ka tilak mai lagaati jaaoon
Har din ko tyohaar kee bhanti
Unkee kripa se mai manaati jaaoon.

Koi uljhan jo aaye jeevan mein
Guruji kee mehar se mai usey sulajhaati jaaoon
Guruji har pal angg-sangg Hain
Swayam ko mai samjhaati jaaoon.

Shukrana ke geet gaakar
Guruji ko mai rijhaati jaaoon
Is jeevan ko Guruji ka diya uphaar jaankar
Mai jeene kee reet nibhaati jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2021

Om Namaha Shivaya
Aaj Ka Suvichaar 🙏🏻🙏🏻 # 1323

Jeevan Ke Khaate Mein Kitne Pal Hain

Bank ke khaate mein kitne paise hain
Iske baare mein aksar hoti hai hamein jaankaari
Lekin jeevan ke khaate mein kitne pal hain
Is gyan se vanchit hai yeh duniya saari.

Paise toh hain aate jaate
Khaali hokar phir bhar jaate hain khaate
Lekin jo pal beet jaate hain
Ve kabhi nahin laut ke aate hain.

Paise se hum khareed sakte hain anginat bhautik padaarth
Lekin dekha jaaye agar pal ka upyogaarth
Ismein chahiye bahut buddhimaani
Kyunki kisee bhi pal ko vyarth ganvaana hai badi naadaani.

Guruji ne har pal ke sadupyoga ke liye diya hai saral saleeqa
Guruji ne har pal ka sammaan karne ke liye diya hai taral tareeka
Isliye kyun na har pal ko Guruji ka hukm sunn lene dein
Aur har pal mein Unka simran kar ke palon ko simran kee chaadar bunn lene dein.

Guruji ‘practical’ Hain, swayam Unhonei kaha hai yeh tathya
Ismein tanik maatra bhi sanshay nahin kyunki Unka kaha hua sab hai satya
Ve toh bashar ka roop lekar aaye hum sabko taarne ke liye
Aur simran karne ko Ve kehte Hain hamein sanvaarne ke liye.

Vehem aur karma-kaand ko chod kar
Ahem aur dikhaawe kee bandish ko toad kar
Unhonei Beej Mantra aur Gurbani ka simran sikhaaya
Aur sangat ne mantra jaap shuru kar Unke prati apna prem dikhaaya.

Gurbani na bhi samajh aaye, toh bhi sunein usey pyaar se
Guruji se rishta gehra karte jaayein Unse judi hui uss seedhi taar se
Satsang mein naam simran karein awashya
Lekin sotey jaagte huey bhi mann mein simran ka rakhein lakshya.

Har kaam ke saath saath
Mann mein chalta rahe simran
Har mahoorat, har sthaan shubh hai
Ekatrit karne ke liye Guru naam ka dhan.

Yeh Guruji aur hamaara nijee maamla hai
Isliye zaroorat nahin hai kisee ko dikhaane kee
Mann hee mann mein naam simran chalta rahe
Kyunki bahut zaroorat hai Guruji ko rijhaane kee

Paison se zyada pal ke khaate ka palda rakhein bhaari
Isee mein hai bhalaayee aur samajhdaari
Aagey jaakar kaam aayegi pal pal ke khaate kee poonji saari
Is poonji kee madad se hoti rahegi oordhvagati kee tayyaari.

Paisa bhi chahiye achche se jeene ke liye
Lekin paison se pal nahin khareede jaa sakte simran ka amrit peene ke liye
Isliye simran se bheega rahe antar-mann har pal
Isee se dhulta jaayega mann ka mal
Kitne kasht aane se pehle hee jaayenge tal
Isee se sudhrega hamaara aane wala kal

Yeh sab Guruji kee kripa se hee hai mumkin
Isliye Guruji se maangein ki chaahe raat ho ya ho din
Ve apne ashish se badhaayein hamaara atma-bal
Aur hamaare mann mein simran chalta rahe har pal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2021

Om Namaha Shivaya
Aaj Ka Suvichaar 🙏🏻🙏🏻 # 1322

 Arpit Hai Zindagaani

Jinkee sharan mein hota hai sabka kalyaan
Jinka dar hai bhakt ke liye sabse bada teerath dham
Jinke naam mein hai moksh daan
Unn pyaare Guruji ko pranaam.

Jinke saundarya ke aagey chaand bhi sharmaata hai
Jinke tej ke samaksh sooraj ka tej ksheen ho jaata hai
Jinke noor kee chhavi apne oopar padne se chaman itraata hai
Unn pyaare Guruji mein basaa srishti ka vidhaata hai.

Jinko paane ka khwaab dekhna bhi hota hai virlon kee kismat mein
Jinko rijhaane ke liye hawaa ka har jhonka rehta hai Unkee khidamat mein
Sabse paawan prem kee khan hai Jinkee ismat mein
Unn pyaare Guruji kee dee hui sumati bass jaaye hum sabki matt mein.

Jinke muskuraane se poora Brahmaand muskuraaye
Jinke naman mein poori srishti jhuk jaaye
Jinke daaman mein khushi khushi se phooli nahin samaaye
Unn pyaare Guruji par sangat vaari jaaye.

Jinke prem mein sangat hai deewaani
Jinke sangg judi hai har bhakt kee kahaani
Jinka ashirwaad hai Unkee mahima kee nishaani
Unn pyaare Guruji ko arpit hai zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja