Month: November 2021

November 10, 2021

Om Namaha Shivaya
Aaj Ka Suvichaar 🙏🏻🙏🏻 # 1361

                    Chhath Pooja

Diwali ke chhe din ke pashchaat
Chhath pooja ka aata hai tyohaar
Soorya Dev aur Chhathi Maiya ko samarpit
Is tyohaar ke hain chaar vaar.

Ghar kee achche se safaai kee jaati hai
Mann mandir kee divyataa nikhar jaati hai
Pooji jaati Hain Shashthi mata
Har bachcha maa ka ashish hai paata.

Pehla din hai Nahaay Khaay
Jismein bhakt jann nahaa kar lete hain saatvik bhojan ka swad
Soorya Dev ko prasann karne ke liye
Ve banaate hain chana dal aur kaddoo kee bhaat.

Gud, maide aur besan ko milaakar, aur banaakar chawal aur gud kee rasiya naamak kheer
Kharna, yaani ki doosre din par kiya jaata hai Maiya ko arpit
Bhakt jann khaate hain yeh ‘Thekua’ naamak prasad
Aur nirjala vrat shuru hota hai is din ke baad.

Yeh teesra din jispar nirjalaa vrat hai kiya jaata
Ye is tyohaar ka mukhya din hai kaha jaata
Sab mataayein apni santaan ke liye gaati hain mamta bhare geet
Aur sab ke mann mein umadti hai preet.

Shraddha bhaav zaroori hai is tyohaar mein bhi
Chhath Maiya veh dekhkar karti hai bhool chuk maaf
Jaise hamaare Guruji bhakt ka bhaav dekhkar
Kar dete Hain kshamaa ye dekhkar ki bhakt ka mann hai saaf.

Na aaye Chhath pooja ka koi bhi bhajan
Toh bhi fikr kee nahin hai koi baat
Kisee sakht niyam ya yagya kee zaroorat nahin
Buss, pooja karni hai pavitra bhaav ke saath.

Jalaashay ke kinaare par banaayi jaati hai mitti bedi/ vedi
Jispar aatey se chauka banaaya jaata hai
Prem aur shraddha se bhakton dwaara
Isey sajaaya jaata hai.

Ganne ke paudhe ko vedi ke chaaron konon par
Pyaar aur ullaas se gaad kar
Saari ya dhoti ya sundar vastra bichhaaya hai jaata
Aur phir Chhath ke geeton ko gaaya aur sunaaya hai jaata.

Is ookh ya ganne ko hee Chhath Maiya hai maana jaata
Na aur koi moorti, na hee tasveer ko hai pooja jaata
Aakhiri din jabb ek pehar andhera baaki hai reh jaata
Har bhakt ghar se nikal kar vedi par aakar utsav hai manaata

Sabhi jann ek se doosri vedi par jaakar maangte hain prasad
Chhath ke ghat kee har vedi par jhuk kar ve lete hain ashirwaad
Na jaat-paat ka bhed bhaav, na hoti hai koi bhaasha kee deewar
Sabhi ke mann mein hota hai ullaas aur dher saara pyaar.

Lagta hai ki poori maanav jaati
Chhath ke antim din par ek hai ho jaati
Adhiktar striyaan karti hain vrat
Lekin kayee purushon ko bhi yeh reet hai raas aati.

Guruji mein sabhi Deviyaan aur Devta Hain samaaye
Isliye Guruji ka har bhakt har tareh ka tyohaar manaa paaye
Guruji ka bhakt jis bhi Bhagwaan ko dhyaata hai
Uss bhakt ka vandan Guruji ko pahunch jaata hai.

Shraddha, pavitrataa, saadagi aur saralta
Ye naitik gunn hain is tyohaar ka aadhaar
Guruji bhi aise aacharan se hotey Hain prassann
Aur is bhaav aur sadhusheelta se santusht rehta hai mann.

Aayiye, Chhath pooja ke shubh avasar par
Karein hum sansaar ke mangal kee kaamna
Sabhi ke jeevan mein ullaas aur pyaar rahe
Hum sabhi ke mann mein ho yeh bhavna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2021

Om Namaha Shivaya
Aaj Ka Suvichaar 🙏🏻🙏🏻 # 1360

      Sukh Chayyn Har Janam Ka

Aglaa pal takk toh tere vash mein nahin
Toh kyun saamaan jodta jaa raha hai
Tera lakshya thaa is chanchal mann ko daas banaana
Tu uss lakshya se muh kyun modta jaa raha hai?

Pichhle janmon ke karmon aur paap ka bojh liye tu phirta hai
Phir bhi aane waale kal ke parinaam se nahin darta hai
Isliye toh bojh bhaari kiye jaa raha hai
Aur jhootha sukh tu paa raha hai.

Bheetar se kuch aur baahar se kuch aur hona, ye hai kiskee dee hui naseehat?
Apne sukh ke liye doojon ko dukh dena hai kahaan kee insaaniyat?
Vikaaron se bhare jeevan mein kaise basegi ruhaaniyat?
Kyun tere jeevan mein hai shaan-o-shaukat kee itnee ahmiyat ?

Kehta hai tu, ki laalach nahin hai theek
Lekin tera bhautikvaad toh hai laalach ka prateek
Kehta hai tu ki anaasakti hai zaroori
Lekin, tu padaarthon ke parde ke peechhe paal raha hai majboori.

Isee aasakti aur majboori ka rehta hai tujhe chintan
Toh kab aur kaise karega tu dhyan aur vandan?
Jiska chintan hoga tujhe poori umr, usee ke baare mein tu sochega apne jeevan ke antim kshan mein
Isliye tu khud hee soch tera agla janam kaisa hoga, agar tera dhyan rahega bhautik padaarthon ke dhan mein.

Guruji kahein, “Aish Kar” lekin iska arth yeh nahin ki badhaa le apni bhautikvaad mein aasakti
Yaad rakh, anaasakti hai adhyaatmik azaadi kee yukti
Isee se badhega tera atma-bal
Aur tera Guruji se judna hoga safal.

Abb bhi samay hai, aasakti kar le Guruji ke naam mein
Taaki tere chintan ka kendra ho Bhagwaan mein
Taaki jabb tera shareer pahunche shamshaan mein
Toh teri atma pahunch jaaye sachkhand ke dhaam mein.

Yahee yaad rakhne yogya hai, aur kuch bhi nahin
Apne mann ko apna daas banaa le, taaki veh maane baat teri kahi
Jiska chintan tu karega, tujhe praapt hoga vahee
Isliye isee pal se kar le apni aasakti kee disha sahi.

Isee mein hai tera sukh chayyn har janam ka
Isee mein bhugtaan hai tere har karam ka
Yahee raasta hai dharam kaa
Yahee uddeshya hai tere jeevan ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2021

Om Namaha Shivaya
Aaj Ka Suvichaar 🙏🏻🙏🏻 # 1359

‘Tu Tu Mai Mai’ Kee Beemari

Kaisa ajab hai yeh kalyuga
‘Tu tu mai mai’ kee hui hai beemaari
Phaylaa rahi hai bhay abb bhi mahaamaari
Lekin ‘tu tu mai mai’ se badi nahin hai koi bhi laachaari.

‘Tu tu mai mai’ har kisee kee kahaani ka hai kissa
Churaa liya is beemari ne sabki shanti ka bahut bada hissa
Panapti hai is ‘tu tu mai mai’ mein ahankaar kee janglee ghaas kee fasal
Aise mein namumkin hai hona adhyaatmik raaste par safal.

Na ‘tu tu’ ka ilzaam kaam aayega, na hee ‘mai mai’ ke ahem ne hai kaam aana
Jabb hum sabne is paar se uss paar hai jaana
Isliye ‘tu tu mai mai’ ke roag se mukt hona anivaarya hai
Agar humne paana hai sachkhand ka aashiyana.

Hum Guruji ke bhakton ko mila hai saubhaagya vishesh
Ki chaahe jo bhi ho praant ya desh
Hamaare sangg Hain Guruji roopi Sarvesh
Jo seedhi taar se jude naate ke dwaara dete Hain hamein har kadam par aadesh.

Aadesh aisa, jismein nahin hai koi ahem, koi vehem, ya koi andhvishwas
Aadesh aisa, jo sikhaata hai karna sewa aur simran ka nek prayaas
Aadesh aisa, jismein hukm hai banda bann jaane ka
Aadesh aisa, jismein hai sandesh doojon kee madad kar ke insaaniyat ka dharma nibhaane ka.

Is mein se kisee bhi aadesh mein ‘tu tu mai mai’ ka koi sthaan nahin
Is mein se kisee bhi aadesh mein kisee vikaar ka koi maan nahin
Buss, sachchaayee aur neevenpann ka hai paigaam
Agar pahunchna hai sachkhand ke dhaam.

Guruji ke naam ke sahaare se hum bande jaayein bann
Guruji ka simran karte karte nek neeyat se tarr jaaye mann
Hamaara har vikaar Guru naam ke yagya kee paawan agni mein ho jaaye bhasm
Aur ‘tu tu mai mai’ kee beemari kee kahaani ho jaaye bilkul khatm.

Yeh karna mushkil hai toh kya hua, namumkin toh nahin
Guruji poori sahaayata karenge dekh kar hamaari neeyat sahi
Guruji ko khush kar paayenge hum is shraddha poorna prayaas se
Aur Guruji bachaayenge hamein is ‘tu tu mai mai’ ke parinaam ke traas se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2021

Om Namaha Shivaya
Aaj Ka Suvichaar 🙏🏻🙏🏻 # 1358

Guruji Sab Kuch Sambhaalenge

Jeevan mein agar aaye tufaan
Na tootne dena Guruji par se apna vishwaas
Har lamha bhi agar lagey imtihaan
Na chodna tum safal honei kee aas.

Guruji Bhagwaan Hain
Karte sada kalyaan Hain
Rakhna tum itminaan
Sab dekh rahe Hain Ve meharbaan.

Naazuk hai dil lekin Guruji ne bakhshi hai tumhe himmat
Kamzor na padna, kyunki tumhaare paas hai Guruji kee dee hui taakat
Koi mushkil ya uljhan aaye agar aur karne lago tum Unse shikaayat
Toh kshamaa maang kar Shukrana karna kyunki Unkee hai badi inaayat.

Agar lagg raha hai tumhe ki kismat kharaab hai tumhaari
Toh yaad rakho, ki bahuton se achchi hai haalat tumhaari
Aise jann bhi hain jinke paas nahin hai khana, kapda, ya makaan
Phir bhi ve kehte Hain ki bada dayalu hai Bhagwaan.

Kya hua agar paise doob gaye, jaan toh bachee tumhaare apnon kee
Tumhe hee faisla lena hai ki tumne kitnee tamanna karni hai kewal bhautikvaad ke sapnon kee
Arey, tumhe toh yeh bhi nahin maalum ki tumhaare liye kya hai uchit
Phir ye kaise soch liya tumne ki tum ho Guruji kee mehar se vanchit.

Isliye tum abb se chod do udaasi aur niraasha
Jabb takk duniya hai, chalta rahega ismein tamaasha
Duniya ke rangg manch par nibhaao wafa se apna kirdaar
Guruji sab kuch sambhaalenge hameshan kee tareh aur dete rahenge tumhe pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2021

Om Namaha Shivaya
Aaj Ka Suvichaar 🙏🏻🙏🏻 # 1357

                           Bhai Dooj 

Bhai behen ka sanaatan pyaar
Bakhshte Hain Paalanhaar
Yeh rishta hai bahut anokha aur sundar
Hai yeh beshart prem ka gehra samundar.

Bhai Dooj Kartik Shukla Paksh ke doosre din hai manaaya jaata
Tabhi is tyohaar ke naam mein ‘dooj’, arthaat ‘dooja’ -yeh shabd hai aata
Bhai ka arth hai bhraata
Jisey pyaar se tilak hai lagaaya jaata.

Yamraj kee behen ka Yamuna hua naam aakhyaanon ke anusaar
Usne kayee avsaron par kiya apne bhai ka intazaar
Kintu Yamraj pahunch na paaye
Aur behna ne prateeksha mein anek varsh bitaaye.

Phir veh shubh din aaya
Yamuna ka bhai usey milne aaya
Behen ne khaas utsav manaaya
Aur Yamraj ke maathe par tilak lagaaya.

Yamraj apni behen ke bhaav se huey bahut prasann
Aur usey vardaan dene ka kiya Yamraj ka mann
Yamuna ne socha aur apne bhai Yamraj se maanga yeh var
Ki veh ek aise din ka tohfa dein jabb Ve aayenge har saal uske ghar par.

Kaha jaata hai ki tabb se lekar aaj takk
Bhai Dooj par behen lagaati hai bhai ko tilak
Yeh prateek hai bhai aur behen ke paawan pyaar ka
Aur yaad dilaata hai ki yeh rishta hai laad aur dulaar ka.

Guruji mein hum bhakton ko miley hain pita aur mata
Guruji hum sabke liye Hain murshid, meet, aur bhraata
Koi bhi tyohaar ya pal Guruji ko Shukrana kiye bin na raas hai aata
Bhai Dooj ke paawan utsav par bhi har bhakt Guruji kee mahima sunta aur sunaata.

Sab bhai-behnon ke pavitra rishte par rahe Guruji ka ashirwaad
Is pyaare naate mein bandhne wale har bhai aur har behen kee duniya rahe aabaad
Kitna sundar aur komal hai is rishte ka jazbaat
Kyun na ho, yeh rishta aakhir hai Guruji kee dee hui saugat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 5, 2021

Om Namaha Shivaya
Aaj Ka Suvichaar 🙏🏻🙏🏻 # 1356

               Govardhan Pooja

Kartik Shukla Pratipadaa hai aaj
Aaj ke din sammaanit huey Govardhan Giriraj
Dwaapar yug ke samay mein
Indra Dev ke machaaye pralay mein.

Braj vaasi karte thei Indra Dev ko yagya se prassann
Taaki Ve varsha dekar karein gaaon ko sampann
Aisa hota raha toh Indra Dev ko ho gaya abhimaan
Unhe lagaa ki Unpar nirbhar hain sab jeevon ke praan.

Yeh anuchit lagaa Shri Krishna Bhagwaan ko
Isliye chuur chuur karne Indra Dev ke abhimaan ko
Aur badhaane Govardhan kee mahima aur
shaan ko
Unhonei apni kanishtha anguli par uthaa liya Govardhan parvat mahaan ko.

Indra Dev ke krodh kee seema na rahi
Unhonei moosalaadhaar varsha kari
Tabb Govardhan ne chhatri ka kaam kiya
Sabhi vaasiyon ko varsha mein aashray diya.

Sabhi Braj vaasi rahe surakshit
Indra Dev huey pehle se bhi adhik kupit
Krishnaji ne saat din aur saat raaton ke liye Govardhan ko apni anguli par uthaaya
Is dauran Unhonei aur parvat ne ek daana bhi na khaaya.

Krishnaji kee leela thi ye, jabb Indra Dev ko hua ye gyaat
Tabb Unhe honei lagaa bahut pashchaataap
Jis din Shri Krishna ne Govardhan parvat ko bhoomi par rakha
Uss din thi Kartik Shukla Pratipadaa.

Jabb parvat ko vyanjan kiye gaye arpan
Tabb ve aur ann maang kar tript karte rahe apna mann
Krishnaji ne parvat mein kiya pravesh
Aur dhaaran kar liya ek viraat Ishwar ka vesh.

Unke kehne par Brajvaasiyon ne kee parvat ko Tulsi patr arpan karne kee yukti
Is yukti se Parvat kee bhookh mitee aur ho gayi parvat ko tripti.

Shri Krishna ko bhog lagaaya jaata hai ek din mein aath baar
Jabb manaaya jaata hai Govardhan pooja ka tyohaar
Ve niraahaar rahe saat raatein aur saat vaar
Isliye Unhe chhappan bhog arpit kar ke manaaya jaata hai ye tyohaar.

Gaay aur baylon ko snaan karaakar kiya jaata hai Unka sringaar
Gobar se Govardhan banaakar unhe pooja jaata hai dekar satkaar
Doodh dahi kheel bataashon ka baanta jaata hai bhakton ko prasad
Govardhan leela ko sunnkar jaagte hain niswaarth prem ke jazbaat.

Jaise Krishna ji ne Indra Dev ko shiksha dee is leela ke dwaara
Vaise hee shaktiyon ko niswaarth sewa mein lagaana hai farz hamaara
Guruji kehte Hain ahankaar chodne ke liye
Guruji kehte Hain vikaaron se muh modne ke liye
Har pal nek neeyat rakhte huey hum maanein Unke vachan
Aur Unke achche bachche bann-ne ka hum har pal karein prayatna.

Sabhi ko Govardhan Puja ke parv kee mubarak dhed saari
MahaShiv Guruji kee kripa se sadaa niswaarth neeyat ho hamaari
Lobhi aur ahankaari hona chod de hamaara mann
Guruji kee chaahat ke anusaar hum bande jaayein bann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 4, 2021

Om Namaha Shivaya
Aaj Ka Suvichaar 🙏🏻🙏🏻# 1355

                  Diwali Kee Raat

Guruji kee hai saugat
Diwali kee yeh paawan raat
Kitna shubh hai yeh tyohaar
Rangoli se sajaa hai ghar ka dwaar.

Har taraf jal rahe hain deep
Ye diye hain pyaar ka prateek
Pyaar, insaan ka insaan se
Pyaar, insaan ka Bhagwaan se
Pyaar, har praani se
Pyaar, is zindagaani se
Pyaar aisa, jismein nahin hai aasakti
Lekin jismein bharpoor hai bhakti.

Ye diye hain buraayee par achchaayee kee jeet ke
Ye diye hain Guruji ke prati preet ke
Ye diye hain sadbhaav ke
Swayam mein sudhaar ke chaav ke
Ye diye hain saamanjasya ke
Ye diye taakeed ( reminders ) hain kartavya ke.
Kartavya sewa, daan, paath, aur simran ka
Kartavya parivaar kee oar har jann ka.
Jaise jaise jal rahi hai shama
Kshamaa maang lein aur kar dein hum kshamaa.

Ye diye hain vidya aur chetna ke
Is kalyugi daur mein prerna ke
Prerna, Guruji par vishwaas kaayam rakhne kee
Prerna, Guruji kee kripa se adhyatmikta mein aagey badhne kee
Prerna, satya ka saath dene kee aur swayam satya bann jaane kee
Prerna, nirbhay hokar Guruji kee dikhaayee raah par kadam badhaane kee.

In diyon ke prakash se mita dein hum andhera andh vishwaas ka
In diyon ke ujaale se mita dein hum timir vehem ke har ehsaas ka
In diyon kee roshni ko swayam mein kar lein hum atmasaat
Taaki antar-mann ko mil jaaye anant prakash kee saugat.

Guruji kee kripa se sabki Diwali in diyon se saje
Guruji kee mehar se kisee ko na miley udaas honei kee vajeh
Jaise Guruji ka saath hai anant
Vaise hee in diyon kee roshni rahe anant
Har diye ko milta rahe Guruji ka ashirwaad
Ki Unkee roshni rahe Diwali ke bhi baad
Taaki jabb takk jeevan mein savera na ho
Tabb takk raahon mein andhera na ho
Aur in diyon ka prakash savera honei par
Sooraj kee kirnon se tarr ke paa le amaratva ka var.

Ujjwal mann kee sthiti rahe matvaali
Diyon kee raunak ho niraali
Aayiye, Guruji kee kripa se sajaayein aise diyon kee thali
Aur sabb mil kar har raat ko manaayein Diwali.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 3, 2021

Om Namaha Shivaya
Aaj Ka Suvichaar 🙏🏻🙏🏻# 1354

        Roop Chaudas Ka Tyohaar

Chhoti Diwali kehte hain jisey
Veh Roop Chaudas ka tyohaar hai aaj
Guruji kee mehar har din barasti rahe
Aur nek ho hamaara har kaam-kaaj.

Bhagwaan Shri Krishna, Satyabhama aur Kali maa
Inke dwaara asur Narakasur ka vadh hua
Isliye Naraka Chaturdashi aur Kali Chaudas bhi hai naam is tyohaar ka
Is din jann manaate hain utsav aalasya aur dusht-ta kee haar ka.

Paan ke paate, haldi, aur kafoor
Chandan, phool, naariyal, aur sindoor
In sab ke prayog se kiya jaata hai vandan
Abhyang snaan ke alaawa striyaan lagaati hain mehndi aur ubtan.

Rangoli aur diyon kee roshni se
Sajaaya jaata hai ghar ka dwaar
Swasth aur sundar shareer ke liye
Krishna ji aur Kali Maa ko poojta hai saara parivaar.

Krishna ji ne Brahmamahoorat mein kiya abhyang snaan
Aur bhakton ne is snaan ka kiya maan
Guruji hamey dein swacchta kee daat ka daan
Kyunki mann maylaa hokar rahega bahut pareshaan.

Dooshit hokar mann ho gaya hai rogi
Aise mein mukti kaise hogi?
Til ke tel se shareer toh saaf ho bhi jaaye
Lekin mann kee mayl na dhulne paaye.

Hamaare liye sab devi devta Guruji mein Hain samaaye
Hum toh Unke sangg hee jodein bhakti ke dhaage
Mann kee mayl dhonei ke liye
Bhakt Unke ashirwaad ke bina hain abhaagey.

Roop Chaturdashi ke is parv par
Swayam se karein yeh vaada
Ki achchi soch aur achche karmon ko
Mahatva denge hum aur bhi zyada.

Guruji kee mehar se hum tarein
Bhavishya mein aur paap na karein
Achche karmon kee Ganga se
Dhul jaaye mann ka vish
Nek neeyat rakhein taaki
Guruji poori karein yeh khwaahish.

Guruji ke naam ke amrit mein
Tann mann karta rahe abhyang snaan
Dooshit mann kee dusht-taa ho khatm
Aur sabka ho kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 2, 2021

Om Namaha Shivaya
Aaj Ka Suvichaar 🙏🏻🙏🏻# 1353

    Dhanteras Ka Tyohaar Hai Aaya

Dhanteras ka tyohaar hai aaya
Apne sangg Deepawali ka Sandesh hai laaya
Kisee ne momabatti jalaayi toh kisee ne diya jalaaya
Har oar sakaaratmak Spandan hai chhaaya.

Dhanatrayodashi ya Dhanvantari Trayodashi bhi isey hai kaha jaata
Judi hai is parv se Samundra Manthan kee gaatha
Maa Laxmi aur Kuber ji huey prakat
Mitaane har nirdhan ka sankat.

Jagg mein karne chikitsa ke gyan ka vistaar
Vishnuji ne liya jo ansh avatar
Ve thei Dhanvantari Bhagwaan
Jo is din laate Hain aarogyataa ka paigaam.

Amaratva ka amrit kalash mein lekar Apne saath
Bhagwaan Dhanvantari ne rakha bhakton ke sir par haath
Unhe kaha jaata hai Ayurveda ke Bhagwaan
Aur diya jaata hai Dhanteras par khaas sammaan.

Janma patri ke anusaar shadi ke chaar din pashchaat
Raja Hima ne hona thaa mrityu ko praapt
Unkee patni ne jalaaye anek deep uss raat
Soney aur chaandi ke sikkon ke dher kee banaayi paraat

Yamraaj aaye bannkar naag
Lekin patni ne bachaaya apna suhaag
Usne poori raat kiya gungaan chod kar sab kaam kaaj
Diyon aur sikkon kee chamak se theek se na dekh paaye Yamraj
Madhur sangeet ne naag ko kiya itna prasann
Ki ve subah aate hee laut gaye Hima ko liye bin.

Kayi kathaaon mein yeh Yamraj aur Hima raja ka kissa
Hai darasal Unke putr aur bahu kee kahaani ka hissa
Lekin sandesh vahee padta hai jaan
Ki mila akaal mrityu se bachaav ka daan.

In sab kathaaon ke aadhaar par
Maa Laxmi aur Bhagwaan Kuber ko pooja hai jaata
Ghar ke aangan aur dwaar par mitti ke deep jalaakar
Har koi mithai ka prasad hai khaata aur khilaata.

Kartik maas ke krishnapaksh kee trayodashi par
Manaaya jaata hai yeh tyohaar
Swaasthya ka dhan, akaal mrityu se nirbhay honei ka dhan
Is dhan ka mahatva hai aparampaar.

Hum Guruji ke hain bachche
Unkee kripa se hamaare vichaar hon achche
Karmon mein ho sachchaayee aur achchaayee
Har pal hamein yaad rahe Guruji kee vaddi vadiyaayee.

Aaj ke is shubh din par
Jaane na dein vintee ka avasar
Nirogi ho yeh kaaya, Guruji se karein yaachna
Mann bhi rahe swasth, Guruji se karein praarthna
Mann mein ho sampannataa ka santosh
Duur ho vikaaron aur paapon ka dosh
Abhay daan ka maangein dhan
Aur Shukrana kehte rahein har kshan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 1, 2021

Om Namaha Shivaya
Aaj Ka Suvichaar 🙏🏻🙏🏻 # 1352

                Jeevan Ka Jharna

Lamhe anubhav ke saath judte jaayenge
Ve hee jeevan ke jharne kee dhaara banaayenge
Agar hum baar baar bhi bulaayenge
Toh bhi beete lamhe mudd kar vaapis na aayenge.

Jharne ka srot kahaan hai, kisne jaana?
Kuch aisa hee hai lamhon ka taraana
Kab se chalaa aa raha hai lamhon ka yeh anant afsaana
Aur kab takk chalta rahega yeh waqt deewaana.

Hamein toh yeh bhi nahin maalum
Ki is janam se pehle kitne janam huey hamaare
Aur yeh bhi nahin gyat hamein
Ki hum bhatke kis kiske dwaare.

Sarvgyani MahaShiv Guruji mein hee hai shakti
Jinke vash mein hai lamhon kee dhaara ke anmol moti
Unhee ke hukm par behti hai dhaara
Unhee se shuru aur Unhee par ye khatm hai hoti.

Isliye kyun na har lamhe mein
Apni liv Guruji se jod lein?
Kyun na jeevan kee dhaara ko
Guruji ke dikhaaye raaste ki oar moad lein?

Beete lamhon ka karz utaarne mein bhi
Guruji hee kar rahe Hain madad
Unhee kee mehar se hum sunn paate hain
Gurbani ke amoolya shabad.

In shabad ka shravan aur manan
Karta hai antar-mann ka pavitrikaran
Beete lamhon ka utarne lagta hai karz
Raahat paata hai maansik aur shaareerik marz.

Isliye jo ye lamhe hain vartmaan ke
Inmein hum judey rahein MahaShiv Bhagwaan se
Toh beete huey lamhon ka bojh ho jaayega kumm
Aur aane waale lamhon mein achche hongei hamaare karam.

Guruji se dua karein ki hamaari swatantra ichcha ho achchi
Neeyat hamaari nek rahe aur pravritti ho sachchi
Bakhsh dein hamein Guruji aisee sumati
Ki hamein praapt hoti rahe sadgati.

Tabb bhi Guruji meharbaan thei
Aaj bhi baras rahi hai Unkee mehar
Unkee is mehar se sudhar jaayega
Har beeta hua aur aane waala har pehar.

Aaj ka ye lamha bhi mubarak mauka hai
Jismein mil raha Guruji ka pyaar anokha hai
Kal, aaj, aur kal ka uddhar Guruji ne hai karna
Unkee is kripa se sehej bahaav se bahega jeevan ka jharna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja