Month: August 2022

August 21, 2022

Om Namaha Shivaya
Aaj Ka Suvichaar 🙏🏻🙏🏻 # 1645

       Upaay Hamaare Uddhaar Ka

Na karein kabhi bhi khushi par gumaan
Ye nahin hai anant
Apne gumm mein na khoyein apni muskaan
Is gumm ka zaroor hoga antt.

Na khushi, na gumm sthaayi hai
Ek ke aane se aksar hoti doosre kee vidaayee hai
Ye toh Guruji kee vaddi vadiyaayee hai
Ki hum bhakton kee raah Unhonei Apne ashirwaad se sajaayee hai.

Guruji swayam par le lete Hain
Hamaare karmon ka adhiktar parinaam
Aur sehensheelta tatha manobal badhaate Hain
Dekar simran ka anmol daan.

Karte Hain har pal Ve hamaara kalyaan
Shubhchintak Hain hamaare, Hain karunanidhaan
Jaise jaise abhyast hota hai hamaara simran aur dhyan
Vaise vaise Guruji dete Hain hamein asal dhan aur gyan.

Jaise jaise gyan ke prakash se
Pradeepak hota hai jeevan ke har pehar ka
Vaise vaise hum saamna kar sakte hain Badalte manobhaav kee har leher ka.

Samvritti badhti hai mann kee
Sweekriti hoti hai parivartan kee
Vishayon ka parityaag hota jaata hai aasaan
Sukh dukh, khushi gumm sab lagne lagte hain ek samaan.

Hamein milta hai Guruji ka ashish har pal aur Unkee deeksha ka uphaar
Har paristhiti mein hamein milta rahega Unka pyaar
Kabhi antt na hoga Unke pyaar ka
Unke pyaar mein hai upaay hamaare uddhaar ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 20, 2022

Om Namaha Shivaya
Aaj Ka Suvichaar 🙏🏻🙏🏻 # 1644

            Bhakton Ka Har Shwaas

Poojya Guruvar,

Bhakton ka har shwaas hai Aapka ashirwaad
Ann ka har daana hai Aapka diya hua prasad
Roam roam hai Aapke anugreha se aabaad
Kuch nahin hai Aapse pehle ya Aapke baad.

Aapse hee prerna insaaniyat kee
Aapse hee chetna ruhaaniyat kee
Aapse hee daat ibadat kee
Aapse hee yathaarthata hifazat kee.

Aapka noor phaylaa hai har oar
Usee se agyan ke timir mein dikhegi gyan kee bhor
Bin kuch boley, bin jataaye, bin kiye shor
Aapne sneh se thaami hai bhakton ke jeevan kee doar.

Aapki chuppi bhi kehti hai baat kalyaan kee
Aapki goad mein hai panaah Aapki har santaan kee
Aapse bakhshish miltee hai simran aur dhyan kee
Aapke naam ke deepak se jalti hai jyot gyan kee.

Aapki mehar se veh soorya uday hota hai jo thaa kabhi dhalaa
Aapki sakaaraatmakta har nakaaraatmakta ko deti hai jalaa
Katt jaati hai badi se badi balaa
Aapki leela mein hai bhakton ka bhalaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 19, 2022

Om Namaha Shivaya
Aaj Ka Suvichaar 🙏🏻🙏🏻 # 1643

           Tera Kiya Hua Guru Vandan

Chinta na kar
Buss, apna karma kar
Baaki sab chod de Guruji par
Ve awashya karenge mehar.

Tu buss apni bhakti ko nikhaar
Unke ashish se apni rooh ko sanvaar
Unka naam japp tu baar baar
Is se hoga teri rooh ka shringaar.

Guruji jaante Hain tera haal
Unka naam hai teri suraksha kee dhaal
Bina koi shart, bin koi sawaal
Ve rahe Hain tujhe sambhaal.

Shraddha aur prem bhavna se
Anjaan hokar baaki har kaamna se
Karta chal tu apne bheetar ka sringaar
Apne naam ka gehna de rahe Hain tujhe Guru sarkaar.

Guruji ke naam ke is aabhushan se
Sajaa le tu apna antakaran
Chinta chod ke karta chal tu chintan
Dekhna, rangg laayega tera kiya hua Guru vandan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 18, 2022

Om Namaha Shivaya
Aaj Ka Suvichaar 🙏🏻🙏🏻 # 1642

            Janamashtami Hai Aayi

Janamashtami Hai Aayi
Har oar madhur prem kee bajey shehnaayee
Vinamrata ka paigaam hai laayi
Sabhi ko ho bahut bahut badhaayi.

Vishnu ji ke aathvein avatar
Mathura mein janme pyaare Bal Gopal
Devaki aur Vasudev ka dhanya hua janam
Vasudev ne Unhe Gokul le jaane ka kiya karam.

Nanda aur Yashoda ne Krishna ji ko goad liya
Aur Krishnaji ne apne bhakton ka kalyaan kiya
Dushta-taa ka kiya antt
Baney sabke priya Bhagwant.

Pyaare se maakhan chor
Jinkee mahima phaylee chaaron oar
Aaj bhi Govinda pathak ka samudaayak kaaryakram
Badhaata hai utsaah ka spandan.

Ek doosre ke sehyog se
Oopar chadh kar handi todta hai yeh mandal
Aaspaas utsav ke geet hain chalte
Mehsoos hota hai har mann mein mangal.

Sabko milta hai maakhan aur dahi ka prasaad
Panjeeri aur charnaamrit se praapt hota hai ashirwaad
Bin aasakti ke bhog bhogne ka milta hai sandesh
Ekta se jeene kee prerna jaagrit rehti hai, mitaakar har tareh ka dvesh.

Krishna Ji Bhagwaan bhi Hain aur Guru bhi
Bhagwad Gita ke dwaara adhyaatmik deeksha Unhonei hai dee
Kitna shubh din hai aaj punah vichaar ka
Isey avsar maanein sudhaar dwaara uddhaar ka.

Ahem kee haandi ko hum todein
Swayam ko divyata se hum jodein
Khud jeeyein aur doosaron ko bhi jeene dein
Srishti ke sakaraatmak poshan mein yogdaan dein.

Ekta aur samanjasya ka karein apne vichaar aur karmon mein samaavesh
Guruji hamaare bhi dete Hain yahee aadesh
Gokul ashtami ke paawan parv par swayam ko ye yaad dilaayein
Aur Guruji ke dikhaaye raaste par hum chalte jaayein.

Simran karein, karein hum dhyan
Karein satya ka sangg
Samarpan karein, karein gupt daan
Apnaayein gupt paath, Shukrana, aur gupt sewa ka dhangg.

Karte rahein Krishna ji mein basey Guru aur Guru mein basey Krishnaji ka dhanyawaad
Jinke ashish bin na reh sakey bhakt ka jeevan aabaad
Guru hee Govind, Guru Hain pooja
Guru Hain hamre Thaakur, aur koi na dooja.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 17, 2022

Om Namaha Shivaya
Aaj Ka Suvichaar 🙏🏻🙏🏻 # 1641

    Aap Mein Basein Hain Nirankaar

Pyaare Guruji,

Mann mein bhi Aap
Aap hee mann ke paar
Aap dhadkan ka aadhaar
Aap dhadkan ke bhi paar.

Zindagi chale Aapke hukm ke anusaar
Taaki simran bina koi pal na jaaye bekaar
Satsang aur sewa ke avsar milein baarambaar
Aapki mehar aur karunadrishti de hamein taar.

Jabb takk is shareer mein saansein hain barkaraar
Badhta jaaye dil mein Aapke prati pyaar aur satkaar
Hota rahe Aapke divya roop ka deedar
Swapn mein, saakshaat, ya chaahein Aap jis bhi prakaar.

Aapke gunn gaata hai ye saara sansaar
Meri aukat yahee ki mai keh paaoon kewal shabd do-chaar
Kripa keejiye aisee ki mai Aapka gungaan karoon baar baar
Aur gungaan mein gaaoon Aapki mahima aparampaar.

Kitne toh sukoon kee talaash mein ghoome saara sansaar
Aur Apne bhakton ko sukoon dene ke liye Aapne khol diya Apna dar aur dwaar
Aapki sharan mein honei lagaa Aapke bhakton ka uddhaar
Aapke charnon mein teerath hai, Aap mein basein Hain Nirankaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 16, 2022

Om Namaha Shivaya
Aaj Ka Suvichaar 🙏🏻🙏🏻 # 1640

       Thoda Ruk Kar, Thoda Jhuk Kar

Maansik taur par
Thoda ruk kar
Thoda jhuk kar
Kalyaan hota hai aksar.

Kaun jeeta kaun haara
Ye shabd judey hain haar aur jeet se
Shanti kee oar jaana hai toh
Inhe chod kar judna hoga preet se.

Krodhit hokar durbhaav paalna
Is se kalankit hogi apni hee atma
Guru ke maargdarshan se aatmabodh kar
Ho jaayega har anuchit soch ka khaatma.

Is jeevan ko aise jeeyein
Ki yahee bann jaaye pichhle kukarmon ka praayashchitt
Aise praayashchitt mein hai swayam ka hitt
Kyunki is se atma ke kalank jaayenge mitt.

Guruji ke aadesh dwaara karna hai simran aur dhyan
Is se pavitrikaran hoga aur hoga kalyaan
Thoda ruk kar, thoda jhuk kar jo laabh hoga praapt
Uss se mit jaayega aaj aur kal ka maansik santaap.

Guruji ke hukm ko maanein
Unmein basey Ish ko pehchaanein
Apne kalyaan kee oar kadam badhaane ka mila hai avsar
Buss, thoda ruk kar, thoda jhuk kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 15, 2022

Om Namaha Shivaya
Aaj Ka Suvichaar 🙏🏻🙏🏻 # 1639

             Patjhad Ka Mausam

Patjhad ka mausam jabb aata hai
Pedon se patte jhadne lagte hain
Hawaa ke zordaar jhonkon ke aane se
Ve idhar udhar bikharne lagte hain.

Jis mitti ke poshan dwara ped par phal, phool, patte aate hain
Uss mitti mein girey huey pattey vaapis usee mitti mein samaate hain
Lekin uss se pehle na jaane kitnee baar
Logon ke pairon ke taley kuchle jaate hain.

Jo thode se patte ped par reh jaate hain
Ve hawaa ke vaig se nahin ghabraate hain
Ve ped ko hee aasara banaate hain
Aur jeevan bhar ped ka shukr manaate hain.

Guruji Hain jaise ek vishal taruvar
Hum patton kee bhanti hain Unpar nirbhar
Waqt ke mausam ka patjhad aata hai jabb
Anek bhakt Guruji ka dar chod jaate hain tabb.

Guruji, kripa keejiye hum par
Ki jabb bhi aaye jeevan mein patjhad
Hum patton par na ho uska asar
Aur na chhootey kabhi bhi Aapka dar.

Sada kaayam rahe hamaara Aap par vishwaas
Har mausam mein hum mein rahe Aapka pyaar paane kee pyaas
Aap taruvar, hum pattey, Aap Swami, hum das
Aapke naam se susajjit rahe hamaara har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 14, 2022

Om Namaha Shivaya
Aaj Ka Suvichaar 🙏🏻🙏🏻 # 1638

Guruji Kee Sharan Mein Aane Ka Saubhagya Mila

Guruji kee sharan mein aane ka saubhagya mila
Zindagi badal gayi anokhe dhangg se
Pehle se bhi zyada prem ho gaya
Bhakti kee har tarang ke rangg se.

Azaadi milee mujhe
Ki kabhi bhi Guruji se kar loon mai baat
Tasalli milee mujhe
Ki Ve sada Hain mere saath.

Bheeg gaya mera aanchal
Guruji ke ashish kee vrishti se
Tarne lagi mai
Unkee drishti se.

Mushkilein aani nahin rukin
Lekin kuch is tareh se jhukin
Ki unhe paar karna ho gaya aasaan
Guruji ne kee aisee himmat pradaan.

Kayi tufaan aane se pehle hee thamm gaye hongei
Yahee kehta hai mera yakeen
Guruji kee kripa se ve tufaan chhoo bhi na paaye mujhe
Varna pairon ke neeche se khisak jaati zameen.

Na maanga koi jaadoo, kyunki Guruji nahin Hain jaadoogar
Murshid Hain, Guru Hain, nath Hain, dein uddhaar ka var
Lekin Apni leela se sikhaaya Unhonei hona befikr
Aur ye ki apne dukh dard ka Unke alawa kisee se nahin karna zikr.

Sehensheelta badhti rahi Unkee mehar se
Simran ke anginat pal miley har pehar se
Guruji ne Apne se mujhe yoon joad liya
Ki meri har shanka ko toad diya.

Abb toh Shukrana mein beetein mere din aur rayyn
Unke darshan se kritagya rehte hain mere nayyn
Unhee ke dhyan se shuru ho meri har seher
Unhee ke simran mein beetey har din ka har pehar.

Chukaana chaahoon toh bhi na chuka paaoon mai
Kabhi bhi Guruji ka ehsaan
Utnee kshamtaa ho nahin sakti mujh mein
Na hee hai mujh mein itna gyan.

Nimaani hoon, hoon naadaan
Unke hastakshep se hai mera kalyaan
Mai karmon kee maari, Ve Hain karunanidhaan
Mai hoon khushnaseeb, kyunki Ve Hain mujh par meharbaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 13, 2022

Om Namaha Shivaya
Aaj Ka Suvichaar 🙏🏻🙏🏻# 1637

       Sammaan Karein Guruji Ka

Sammaan karein Guruji ka
Karein hum Unse pyaar
Darein na Unse, lekin bhoolein na
Ki Ve hamein dekh rahe Hain lagaataar.

Adhyaapak Hain Guruji
Hum Unke vidyaarthi
Jeevan ke jis rath par hain hum savaar
Guruji Hain uss rath ke saarathi.

Hamaari har soch se waakif Hain Guruji
Hamaare har karam se Ve avagat Hain
Duniya mein jahaan bhi Unke anuyaayi hain
Ve sabhi Unkee sangat Hain.

Nirdeshak Hain Guruji
Hum rahein nirdesh ka paalan karne wale
Daata Hain Ve
Hum hain apni jholiyan bharne wale
Hum deen, Ve hamaare dukh harne wale
Ve taaranhaar, hum Unkee kripa se tarne wale.

Kshamaasheel Hain Ve, dete Hain itna pyaar
Shubhchintak Hain, Hain kalyaan ke aadhaar
Guru Hain, mitaa dete Hain bheetar ka andhkaar
Neeven Hain, aur nahin pasand Unhe ahankaar.

Hum swayam ke bheetar dekhein ya na dekhein
Guruji hamaare bheetar ka har satya jaanein
Kaun kewal kahe aur kaun sach mein Guruji ka kahaa maane
Guruji toh ek ek kee neeyat pehchaanein.

Nirmal hai Unkee nazar, noor daayak hai Unkee nadar
Sada rehte Hain Ve Apne bhakton par meharbaan
Har nakaab mein chhipe asal chehre kee hai Unhe pehchaan
Koi deewar nahin tikk sakti Unke aur bhakt ke darmiyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 12, 2022

Om Namaha Shivaya
Aaj Ka Suvichaar 🙏🏻🙏🏻# 1636

        Ghar Jaisi Koi Jageh Nahin

‘Ghar jaisi koi jageh nahin’
Angrezi mein suna hai ye kayi baar
Ghar pahunch kar lagta hai kitna achcha
Aaj nahin toh kal ho jaata hai is baat par aitbaar.

Anek baar suna hai humne, ‘Ghar, pyaara ghar’
Ye kahaavat bhi angrezi mein hai mashhoor
Jabb kabhi hotey hain hum ghar se lambe arse ke liye duur
Toh ghar dekhte hee yahee kahaavat yaad aati hai zaroor.

Sachcha hee toh hai na, in dono ka paigaam
Panchhi bhi ghonsle ka karte hain intazaam
Taaki jabb ho jaaye shaam
Toh vahaan laut kar unhe miley aaraam.

Atma bhi chalee hai is safar par
Antt mein pahunchne vaapis apne ghar
Safar mein na jaane kitne shareeron mein karti hai vaas veh baari baari
Karte huey apne ghar pahunchne kee tayyaari.

Veh ghar, jahaan Paramatama ke sanyog mein hai atma ka basera
Veh ghar, jahaan atma ko praapt hota hai ujjwal savera.
Guruji Apni sangat ka karte Hain uddhaar
Karmon ka bhugtaan jald se jald karaate Hain Ve taaranhaar
Ve chaahein ki Unke bhakt paayein mukti
Jiske liye Ve sikhaayein simran aur dhyan kee yukti.

Hamaari deh ko dhaaran kar ke usmein bass kar
Atma deti hai hamein yeh jeevan jeene ka avsar
Sewa simran satsang dwaara kar ke atma ka poshan
Kyun na hum apni atma ko pahunchne dein uske ghar?

Ho jaayega pooran kalyaan
Jab atma pahunch jaayegi apne ghar
Guruji ke ashish se saarthak hoga ye anjaam
Kripalu Guruji ka hai dayalu dar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja