Karmon kee patri par chal padi haamaare jeevan kee rail gaadi Pahadon ke beech se, surang ke bheetar se chalti hui Chodti hui har pichhlee manzil ko peechhe Aseem akash ke neeche Aglee manzil kee oar Nibhaati hui saanson kee daud.
Kayion ke sangg karma katt gaye hongei Kayion ke sangg abhi hain baaki Unke jeevan kee rail gaadi kee patri ko choom leti hai Hamaare jeevan kee rail gaadi.
Jitna lekha hai aapas ke beech ke karmon ka Utne samay ke liye patriyaan ho leti hain ek dooje ke sangg Rail gaadiyaan ek dooje ke saath karti hain safar Jabb takk patriyaan nahin jaati hain bichad.
Sabke jeevan kee rail gaadi ka safar Aise hee toh chalta rehta hai Pichhle karam kat-te jaate hain Waqt ka jalaashay behta hai.
Waqt kee leheron ke sangg Aur karam jaate hain bann Patriyaan miltee aur bichadti hain Rail gaadiyan unpar chalti hain.
Is safar ko tayy karaane mein Guruji madad karte Hain hokar meharbaan Beshak patriyaan maarg par kat-ti hain kayi baar Lekin is se bhugtaan ho jaata hai pehle se aasaan.
Jaise jaise safar ke antt kee bela hai aati Patriyaan mitti mein hain samaa jaati Dekhte dekhte patriyaan ho jaati hain ojhal Aur safar ka bhi antt hota hai, aaj ya kal.
Khada thaa parvataarohi chadhaayee chadhne ke liye Uske mann mein utsah thaa aagey badhne ke liye Kankad aur chhote chhote pathhar Bikhre thei idhar udhar.
Dikh raha thaa duuri par usey parvat ka shikhar Mitt gaya uske mann se niraasha ka timir Chal raha thaa mann mein Guruji ke naam ka simran Ardaas aur Shukrana ke sangg usne shuru kiye badhaane apne kadam.
Aasmaan ne uske sir par baandha sehra Hawaa har kadam par de rahi thi pehra Veh chalta chalaa lekar naam ka sahaara Hitkar lag raha thaa usey nazaara.
Jabb pahuncha veh thodi si oonchaayee par Toh ik alag sa nazaara aaya usey nazar Chadhaayee honei lagi kathin Pathhar ho gaye pehle se bhinn.
Chattaanein si dikhin usko apne saamne Veh kass kar apne mastool (pole) ko lagaa thaamne Mushkil thi chadhaayee Usne naam se himmat paayi Gati hui thodi kumm Lekin rukey nahin uske kadam.
Jaise jaise veh chadhaa parvat kee chadhaayee Vaise vaise hee badhti gayi oonchaayee Aane lagi zyada kathinaayee Lekin uske atma-vishwaas mein kamee na aayi.
Chattaanon par chadh raha thaa Aagey veh badh raha thaa Raaste mein thaa toh aaya bhayankar sa tufaan Tez aandhi aur baarish ne kiya usey pareshaan.
Kuch palon ke liye veh ghabraaya Lekin phir usne Guruji ka naam doharaya Ek kshaitij shila par ruka tufaan ke dauraan Prakriti kee shakti ka thaa usey anumaan.
Chadhna shuru kiya usne dobaara Pahaadon ke tukde girne lagey par veh na haara Usne pehena thaa kavach Guruji ke naam ka Usey darr nahin thaa anjaam ka.
Chadhaayee ke beech gira fisal kar Kameez ka kapda faad kar baandha usne zakhm par Veh chadhta gaya, aagey badhta gaya Aakhir pahunch hee gaya parvat ke shikhar par.
Adhyaatmik oonchaayee par pahunchne ke liye bhi Kathinaaiyon ka saamna toh karna padta hai Jo Guruji ke naam ka kavach pehen le Veh parishram kar ke oonchaayee par chadhta hai.
Jaise jaise hum oonchaayee ke kareeb hain aate Chunautiyaan bhi badi hoti jaati hain Lekin simran aur dhyan se atmabal kee hoti hai jo badhauti Uske sahaare insaan jhel paata hai har tareh kee chunauti.
Aakhir imtehaan hee toh hai yeh zindagi Jismein safal honei ke liye aawashyak hai ruhaani bandagi Kyunki atma kee safalta hai adhyaatamik oonchaayee mein Aur yeh oonchaayee miltee hai adhyaatmikta kee gehraayee mein.
Guruji, deejiye tapp kee dridhta kee daat Ki hum nirantar mann mein simran kar paayein Guruji, kripa kar deejiye samarpan kee saugat Taaki hum Aapke hukm par chal paayein.
Guruji, kripa kar deejiye dheeraj ka neeraj Taaki hum chunautiyon ka saamna kar paayein Guruji, deejiye nishtha aur neevenpann ka aisa nageena Ki hum uss oonchaayee takk pahunch paayein.
Jahaan pahunch kar hum apne bheetar Aapko paayein Aur is divya deedar se phir kabhi anjaan na ho paayein Jahaan pahunch kar hum aisa nirmal anand paayein Ki uss anand ko agley janam kee buniyaad banaayein.
Agley janam mein vahee hoga hamaara adhyaatmik starr Jis starr par hum hongei jabb hoga is jeevan ka antt Guruji, Aapki mehar se ooncha hota chale hamaara adhyaatmik starr Taaki hamaare janam maran ka silsila na chale anant.
Krodh kee aag jo jalee Dekhte dekhte ho gayi khatam Zameen par reh gaya angaara Diya usne maamuli sa zakhm.
Angaara shant ho gaya Zakhm bhar gaya Zameen ne bhula diya zakhm Krodh bhi ho gaya khatm.
Lekin, jabb krodh kee aag jalti rahi Toh atmik zameen ubalti rahi Zakhm hota gaya gehra Na bhar paaya usey marham ka pehra.
Shaareerik swaasthya par hua bura asar Maansik sehat bhi gayi bigad Atma par badhta gaya zakhm ka nishaan Janam maran ke chakravyuh ke beech atma hui pareshaan.
Usey dhaaran karta hai jo bhi shareer Veh kabb dega usey oordhvagati kee taqdeer Is duvidha mein karti rahi vo intazaar Ki kabb hoga uska uddhaar.
Paramatama ne dekhi atma kee neeyat Dee usey ek insaan kee deh mein aane kee izaazat Simran mein leen honei lagaa veh insaan Honei lagaa uska adhyaatmik kalyaan.
Rehta thaa veh Guru kee talaash mein Uska neevanpann badhta gaya rehte huey is aas mein Uske mann ka bartan kaabil hua anugraha paane ke liye Guruji ne usey apnaaya usey paar lagaane ke liye.
Guruji kee mehar se zyada hotey gaye simran ke pal Uskee atma ka bhavishya gaya badal Jaise jaise simran dwara Guruji karte rahe uska pavitrikaran Atma par se daag mitne lagey, safal honei lagaa uska janam.
Guruji ne usey aish karvaayee Simran aur dhyan ke dwara uskee aasakti chudvaayi Duur huey uske vikaar Shuddh huey uske vichaar Guruji ne uskee atma ko Moksh ke liye kiya tayyaar.
Uska mann banaa uska das Veh pahunchta gaya manzil ke paas Aakhir veh sundar bela aayi Jabb atma Paramatama mein samaayee.
Sabhi kee atma Paramatama se milne ke liye rahi hai taras Na jaane usey shareer mein rehte rehte Beet gaye hain kitne janam aur baras.
Jitnee sheeghrataa se vikaaron ka hota hai khaatma Utnee jald pavitra honei lagti hai atma Koshish karein ki uspar daag na lagein Isliye abb takk soye bhi thei toh abb toh jagein!
Krodh aadi vikaaron ko aakraman karne se roakein Taaki aur kalankit na ho atma Har pichhle daag ko simran aur dhyan dwaara mitaayein Taaki prassann hon Paramatama.
Tabhi toh milegi har atma ko apni manzil Usey Paramatama ke sangg ekta hogi haasil Poorna ho chukey hongei sab bhog Guruji kee kripa se praapt hoga divya sanyog.
Aayega, zaroor aayega veh sunehra samay Tu Guruji par bharosa rakh, mann se mita de har sanshay Pareshaani swaabhaavik hai jo aaya hai pralay Samarpan kar aur ho jaa nirbhay.
Itna toh hai bilkul tayy Ki Shivmayi hai teri layy Guruji kee karta chal tu Jai Duur hoga tera har bhayy.
Tu akela nahin hai Tu Guruji ke saanidhya mein hai Guruji kee agya ka paalan Chhalakta tere har kartavya mein hai.
Yahaan takk laayein Hain tujhe Guruji Aagey bhi zaroor lekar jaayenge Tera haath Guruji ne thaama hai Ve tujhe chod kar nahin jaayenge.
Yakeen kar Tu bilkul na darr Guruji ka hai sarvochch starr Kyunki Ve Hain avatar-e-Har.
Rangoli hai ye jeevan kee Prateek hai rangon ke mishran kee Hokar ekaagrachitt aur kar ke abhyaas Har rangg ka hissa aata hai raas.
Guruji mein swayam ke chitt ko kar ke kendrit Apne har kaarya ko Unke charnon mein kar ke arpit Pehen le Unka diya hua nirbhayta ka nageena Jeevan ke har rangg mein rangg kar aa jaayega tujhe jeena.
Jaan jaayega tu ki har rangg par hai Guruji ka pehra Bhakti ke rangg par chhaaye huey noor se khilega tera chehra Har sanshay, har bhayy ho jaayega duur Veh sunehra savera aayega zaroor.
Ek upvan thaa nadiya ke paas Sookh chuki thi vahaan kee ghaas Hariyali jaise ho chuki thi itihaas Koi dikhta nahin tha upvan ke aaspaas.
Beej jo boya maali ne bhakti ka Aur seencha usey shraddha ke jal se Guruji ke naam ke japp ke tapp se Paudhe ko milee mamta Hara bhara hokar veh bada hua tabb se Paayi usne phool phal dene kee kshamtaa.
Phal khaaye jabb gilheri ne Toh bheetar se phir nikle beej Ve bhi mitti mein samaaye Aur phir aur paudhe aaye.
Poore upvan mein bhakti ka spandan Laaya ruhaaniyat kee hariyaali Uss spandan ko liye aanchal mein Vahaan kee hawaa bhi hui matvaali Ghaas ugne lagi aur khush hua vahaan ka maali Phoolon se sajne lagi pedon kee har daali.
Bhakti ka bhaav lagaa yoon behne Ki vahaan sundar panchhi lagey rehne Bachche khelne lagey vahaan Aisa sundar hua samaa.
Loag bhi karne lagey upvan mein sayyr Aur narm ghaas ko chhoote thei unke payyr Nirogi honei lagaa unka mann aur unkee kaaya Maali ke parishram aur bhakti ke beej se ye sabb mumkin ho paaya.
Bhakti ka beej mann mein hai Guruji kee meharbaani se Hum bhi seenchein usey Shraddha roopi paani se.
Hara bhara ho jaaye Har jann ke mann ka upvan Mann mein jabb karein bhraman Toh aisa ho bhakti ka spandan Ki har tareh ka roag ho jaaye khatam Aur Guruji kee oar badhte rahein kadam.
Guruji jyot Hain, ujjwal aur divya Roshni hai Unkee anant Unke ashish se hum huey hain dhanya Ve Hain Guru ke roop mein Bhagwant.
Saari sangat aati hai Unke darbar Kaaran hotey hain kayee hazaar Koi maange ghar, koi maange kaarobaar Koi maange santaan ya saathi, koi maange mehengi car.
Jaise rangon ke mishran se Bann jaate hain rangg anginat Kuch isee tareh se chaahaton ka mishran liye Guruji ke paas aati hai sangat.
Guruji sab kuch dene mein samarth Hain Phir bhi “maango nahin, maano,”Ve kahein baar baar Kyunki Ve hamaare shubhchintak Hain Karna chaahte Hain hum par upkaar.
Upkaar aisa, ki ho hamaara uddhaar Aaye hamaari soch mein sudhaar Paath aur simran karein hum baarambaar Gupt daan aur sewa se sanvaarein hum sansaar.
Hamaare har prayaas mein Guruji Hain madadgaar Bhakton ke liye sada khula hai Unka dwaar Asal cheez dena chaahein Ve Parwardigaar Taaki hamein jeena marna na bhugatna padey baar baar.
Kyun na maangein Unse Unke charnon mein sada rehne kee izaazat Taaki hota rahe hamaara poorna kalyaan Guruji se maangna hee hai toh maangein ‘asal dhan’ ka daan Jabb tann se niklein praan.
Aaj ke na jaane kitne saare pal Kal ke baare mein sochte huey rahe hain beet Ya veh kal jo beet gaya, ya kal jo kal hee aayega Aise mein mann ko aaj se zyada kal se honei lagti hai preet.
Jo kal beet gaya, nahin sakte hum usey badal Khud ko sikhaayein, ki uss kal kee galatiyon se seekh kar aagey lein hum chal Beete kal kee madhur yaadon ko dil mein basaayein Agar hon koi gile shikve, toh unhe jald se jald bhulaayein.
Beete kal ko aaj par na padne dein bhaari Aaj ka sadupyog kar ke awashya karein aane wale kal kee tayyaari Lekin aisa karte karte bhool na jaayein dena aaj ko mahatva Ghar parivaar samaj kee oar nibhaayein aaj ka kartavya.
Achche se jeeyein aur karein parishram Chinta ke bajaaye chintan mein bitaayein kshan Vikaaron aur paapon ko na karne dein apne jeevan par raaj Waqt ka sammaan karein aur neki se jee lein aaj.
Bachche sada chhote nahin rahenge Apne pankh phailaakar kal bharenge udaan Isliye aaj unke sangg waqt bitaayein Dein unko aur paayein unse pyaar aur gyan.
Humsafar jeevansaathi aur parivaar ke saath Koshish kar lein ki aaj kar lein baat Kiske jaane ka kabb aa jaaye pal Veh pal aaye aaj ya kal Aisa na ho ki kal mein khokar Aaj ke lamhon ko ganva dein Aane wale kal ke peechhe aise daudein Ki aaj kee khushiyan dabaa dein.
Guruji Hain MahaShiv ke avatar Bashar bann kar aaye hamaare liye Unhonei maanav shareer choda Yeh bahut gehri shiksha hai hamaare liye.
Jabb swayam Prabhu ne bhi chod diya apna maanav shareer Toh hamaare shareer kee toh insaan honei kee vajeh se honi hee hai yeh taqdeer Isliye kal ke liye batorne mein itne bhi na ho jaayein magan Ki aaj ko jeene mein na laagey lagan.
Sabb yaheen ka yaheen reh jaana hai Kewal atma ne hona ravaana hai Hamaara yeh jeevan karega atma par jo asar Usee se tayy hoga uska aagey ka safar.
Sabne dekha aur suna hai yeh udaaharan Ki gilaas aadha khali hai ya hai aadha bhara hua Lekin jeevan kee bhaag-daud mein aksar Yeh vichaar ho jaata hai bhoola hua.
Shaayad aisee soch lagey saadhaaran Lekin bahut mainey rakhta hai yeh udaaharan Kyunki sakaaratmak soch le jaati hai shubhta kee oar Aur is se pakki hoti hai haunsle kee doar.
Guruji bhi kahein ki sabb rakhein soch sakaaratmak Aur sada karein Unka Shukrana Soch se hee bante hain karam Zaroori hai karmon mein sakaratmakta ko laana.
Bahut shakti hai sakaaratmak spandan mein Aur is se shukr ka ehsaas badhta jaata hai vandan mein Maansik aur kaayik roag honei lagte hain kumm Sehensheelta badhti hai, mitne lagte hain kayi gumm.
Jabb takk saansein hai, jeevan toh jeena hee hai na Aasaan hai sab uske liye, jisne sakaaratmakta ka gehna hai pehna Gehna hai ye sahi mainey mein, kyunki is se aata hai chehre par vishwaas ka noor Aur jitnee bhi badi samasya ho, mann kehta hai ki samaadhaan nahin hai duur.
Sakaratmak soch dwaara ekaagrachitt hona ho jaata hai aasaan Har kaam mein lagne lagta hai pehle se zyaada achcha dhyan Aur chaahe kasht mein ho koi paraaya ya phir apni hee santaan Sakaratmak soch se thamm jaata hai ghor se ghor tufaan.
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Gilaas Aadha Khali Hai Ya Hai Aadha Bhara Hua (08/04/2022)
Sangat hai Guruji ko bahut pyaari Guruji Hain sabhi ke adheen Sangat ke uddhaar ke liye Guruji rehte Hain tapp mein leen.
Bashar ke roop mein Shivji ke avatar Guruji aaye karne sangat ka beda paar Apni ichcha se Unhonei choda shareer Toad kar maanavta kee seema kee zanjeer.
Pehle se hee thei jo divyata ke shikhir par Huey Ve aur bhi prataapi Unke sikhaaye huey simran ke raaste par Tarr jaate hain bade se bade paapi.
Anuyaayi hain Guruji ke anginat Ve sabhi hain Unkee sangat Ve kisee mein koi bhed bhaav nahin rakhte Kisee ka kalyaan karte nahin thakte.
Unmein poora saamarthya hai Hamaare karmon ka poora bhaar lene ka Lekin hamein thode mein hee katvaakar Ve upaay nikaalte Hain hamein mukti dene ka.
Koi swaarth nahin hota Unka Apna kabhi Ve chaahein ki pyaar se rahein sabhi Har kisee ke shwaas ka ho raha hai hisaab Hisaab poora hotey hee kahaani khatm hogi janaab.
Karmon ka faisla toh chalta rahega uske bhi pashchaat Kuch galatiyan hui hongi anjaane mein, kuch kuch hamein hain gyat Kyun na unke liye kar lein praayashchit karke pashchaataap Is se bhi toh kumm ho jaayenge dukh aur santaap.
Guruji toh dete rahenge hamein pyaar Lekin kyun na hum bhi Unhe dikhaayein apni oar se aabhaar Jo Guru hamein insaaniyat ka paath padhaayein Kyun na hum Unhe bande bannkar rijhaayein?
Hamaara bhi isee mein hai faayda Taaki narmi se faisla karega karmon ka kaayda Saari sangat Guruji ko hai bahut hee pyaari Guruji ko khush karein nibhaakar hum apni zimmedaari.
Dekar vandan kee vibhuti sangat ko Dekar sumati Apne har bhakt ko Guruji prassann hotey Hain sunkar Apni stuti Ve aksar maaf Hain bhakton kee truti.
Guruji Gurbani sunvaate sunvaate Atmabodh ke safar par Hain le jaate Bheetar ke bhraman ka bhaav Hain jagaate Yoon bhakton ka pavitrikaran Hain karaate.
Kisee ka safar kisee doosre ke safar jaisa nahin Har bhakt ka safar hai anokha Lekin itna toh nishchit hee hai Ki Guruji sabhi ko dete Hain sudharne ka mauka.
Guruji kee mehar se hee bulaava aata hai Kismat wala hai jo is dar ko paata hai Zaroorat nahin yahaan se kaheen aur jaane kee Buss, samarpan bhari sweekriti zaroori hai Guruji ke bhaane kee.
Bhakt jabb aisa kar paaye Toh Guruji ko yeh bhaav bada bhaaye Yahee toh asal aur mool hai Guruji kee dee hui deeksha ka Is se antt hota hai kalyaan kee prateeksha ka.
Phir toh bhakt kalyaan ke saagar mein tayyr kar tarr jaata hai Uska roam roam Guruji ke ruhaani sparsh ke ashish se bhar jaata hai Guruji ka Prabhutva leta hai har kadam par bhakt ka imtehaan Jisey meetha laagey Unka bhaana, vahee hai Guruji kee safal santaan.
Aaj Ka Suvichaar 