Month: September 2022

September 30, 2022

Om Namaha Shivaya
Aaj Ka Suvichaar 🙏🏻🙏🏻 # 1685

                    Skand Mata

Paanchva din Navratri ka hai aaya
Adi Shakti ke ek aur swaroop ka karein darshan
Apni goad mein Skand Kumar Bhagwaan ko uthaaye
Skand Mata Apne bhakton kee raksha karti Hain har kshan.

Mandbuddhi ko Mata gyan karti Hain pradaan
Unkee bhakti se itne bhakt paa lein santaan
Shwet hai Unka varna, kamal par Hain Ve viraajmaan
Sinh hai Unka vaahan, Padmaasanaa hai Unka ek aur naam.

Skand mata Hain adhishthaatri devi soorya mandal kee
Upaasak Unse dua karein apne parivaar ke mangal kee
Dein Mata Apne shraddhaalu sewakon ko alaukik tej aur kanti
Moksh pradaan karein, mitaayein bhakton kee bhranti.

Vaani kee devi Hain Ve, Hain Maa Parvati ka Rudra roop
Unka diya gyan ka ashirwaad hota hai anmol aur anoop
Kaha jaata hai ki maa ko bhaati hain kesar wali kheer, kela, aur mithaai
Sukh samriddhi dene mein maa kee hai vaddi vadiyaayee.

Maa ka yeh swaroop darshaata hai
Ki Ve Brahmaand kee raksha karein Apne putr samaan
Maatritva kee anupam divya moorat
Dosh duur kar ke laati Hain jeevan ka shubh mahoorat.

Jaise Prabhu Kartikeya ko janam dekar
Maa ne Taarakasur ka vadh kiya mumkin
Vaise hee Unkee aradhana se
Nasht hon mann ke aasuri dosh bhinn bhinn.

Guruji ke bhakt karein jis bhi devi dev ka poojan
Guruji Unkee raksha karein aur dein Unhe ashirwaad
Sakaaratmak soch ka protsaahan dete Hain Guruji
Pehchaante Hain bhakton ke jazbaat.

Sambhaalein Guruji bhakton ko Apni goad mein maa kee bhanti
Bhakton par chhaaye Unkee bhakti ka rangg aur Unkee kanti
Unkee mamta se khil jaaye har bhakt kee zindagi
Imtehaan beshak lete Hain Gurujī, lekin kalyaankaari hai Unkee bandagi.

Guru aur Devi Devtaaon kee sharan
Sada hoti hai mangal karan
Navratri ka parv sab ke liye ho dukh haran
Shiv Shakti kee kripa se safal ho sabka janam.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 29, 2022

Om Namaha Shivaya
Aaj Ka Suvichaar 🙏🏻🙏🏻 # 1684

         Navratri Ka Chautha Din

Navratri ka chautha din hai aaya
Har roz kee tareh bhakton ke hriday mein utsaah hai chhaaya
Aaj ka din hai Maa ke Kushmanda swaroop ko samarpit
Jinke charnon mein shraddhaalu karein apni bhakti arpit.

Kiya Jinhonei Brahmand ke andd ko utpann
Apni mandd muskaan ke dwaara
Ve Hain Kushmanda Mata
Jo sada deti Hain apne bhakton ko sahaara.

Maa deti Hain mamta aur oorja
Unka tej har praani ko bheetar se taare
Kitne bhakt karte hain Unkee pooja
Shraddha se aakar Unke dwaare.

Ashta siddhi nau nidhi kee daata
Noor Unka sampoorna Brahmand par hai chhaata
Ashtabhuja Kushmanda mata
Ko jo bhakt hai dhyaata
Mata karein uss bhakt ke roag aur shoak ka naash
Aur usey dein bal, aayu mein vriddhi, aur mitaayein uskee traas.

Guruji ka divya noor chhaaya hai har disha mein
Unke bhakt jann ko Unka sahaara hai niraasha kee har nisha mein
Pooran Guru Hain Guruji, aur bhakt dhanya hain paakar Unkee mamta
Guruji kee kripa se simran aur sadhna se paa lein hum mann kee samta.

Divya ashirwaad se manaayein sabhi
Yeh navratri ka parv
Guruji ke kahein bande banein
Taaki Unhe ho hum par garv.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 28, 2022

Om Namaha Shivaya
Aaj Ka Suvichaar 🙏🏻🙏🏻 # 1683

Apne Bheetar Basey Bhagwaan Ko Paayein

Sharad navratri mein ho rahi hai
Maa ke nau swaroopon kee khaas vandana
Aaj teesra din hai Maa Chandraghanta ka
Bhakt karein aaj Unkee archana.

Uthaakar trishul, talwar, aur gadaa
Maa bhakton ke dukh duur karey sada
Mastak par ardhchandra hai ghante ke aakaar ka
Maa kee kripa se tal jaaye sankat har prakaar ka.

Svarn hai Maa ka rangg
Dus hain Maa ke haath
Vaahan hai Unka sinh
Jo sada hota hai saath.

Bhog ke liye mithai ho jismein ho doodh
Pooja ke liye pushp, deep, aur dhoop
Saath mein akshat, gandh, aur sindoor
Maa karey vaivaahik samasyaayein bhi duur.

Chandraghanta roop Maa ka
Bhakt ko dein aisa anmol ashirwaad
Ki divya sugandh aur divya dhvani ka ho anubhav
Aur divya dhyan ho jaaye aabaad.

Guruji ke bhakton ko bhi
Guruji karein aise anubhav pradaan
Tarta hai zaroor har bhakt
Jo karey Gurujī ka simran aur dhyan.

Samasyaayein sulajhaate Hain Gurujī
Kasht taalte Hain Guruji
Dete Hain pita ka pyaar aur maa kee mamta
MahaShiv Hain, aparampaar hai Unkee kshamta.

Navratron ke teesre din par
Maa ke Chandraghanta swaroop ko naman
Apne bheetar basey Bhagwaan ko paayein
Kar ke simran, manan, sadhna, aur vandan.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 27, 2022

Om Namaha Shivaya
Aaj Ka Suvichaar 🙏🏻🙏🏻 # 1682

     Jo Guru Ya Devi-Dev Ka Naam Japey

Sharad ritu ka pehla navratra beet gaya
Maa kee daya se doosra hai aa gaya
Shakti ke doosre roop ka karein stavan
Unka ashirwaad ho sabke liye mangalkaran.

Durga maa kee nau shaktiyon ke hain jo swaroop
Unmein doosra hai Maa Brahmachaarini
Tapp ka aacharan karne wali maiya
Ya yoon kahiye, ki Ve Hain tapp kee chaarini.

Daahine haath mein mala japp kee
Roop mein maa chhalkaaye roshni tapp kee
Baayein haath mein thaame huey kamandal
Deti Hain Ve Apne bhakton ko japp tapp ka phal.

Maa Parvati kee roop Hain ye tapasvi
Maa Parvati ka noor Hain ye tejasvi
Bhakton mein japp, tyaag, aur sanyam kee karein badhauti
Aur In Maa kee pooja se vairaagya aur sadachaar kee vriddhi hai hoti.

Maa Brahmachaarini laalasaaon se mukt karein
Bhakton kee jholi aadhyaatmikta se bharein
Har sangharsh ke liye Maa deti Hain shakti
Ruhaani oorja aur maansik sukoon de Unkee bhakti.

Guruji bhi kahein bhakton se
Ki ve jitna ho sakey, japein divya naam
Unke beej mantra aur mantra jaap se
Hota hai bhakton ka kalyaan.

Guruji koi roak-toak na karein
Jis devi dev ka naam le bhakt, Ve bhakt kee jholi bharein
Ve kahein ki Unke har bhakt ka japp tapp
Pahunch jaata hai Unn takk sada
Isliye koi bhi bhakt japey kahaan aur kabb
Guruji ko lagg jaata hai pata.

Mata ke Brahmachaarini roop se
Lete chalein hum japp tapp kee prerna
Vairagya aur gyan kee janani hai bhakti
Aur bhakti mein hai swayam shakti.

Mata ke Brahmachaarini roop ko
Koti koti pranaam
Jo Guru ya Devi-Dev ka naam japey
Uska nishchit hai kalyaan.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 26, 2022

Om Namaha Shivaya
Aaj Ka Suvichaar 🙏🏻🙏🏻 # 1681

        Sharad Navratron Ka Parv

Kailas se Prithvi Lok par
Aayin Hain Adi Shakti
Sharad Navratron ka parv hai aaya
Utsaahit hui hai bhakti.

Is baar maa ka aagaman
Ho raha hai haathi par hokar savaar
Sanket hai ye Devi Bhagwat ke anusaar
Ki aayegi samriddhi aur khush-haali kee bahaar.

Mata kee bhenton se goonjta hai vaataavaran
Sabhi ko mangal chhaaon dein Mata ke kamal charan
Buraayee par vijay acchhaayee kee
Adharma par jeet dharma kee
Aise sandesh laati Hain Mata Rani
Spandan hota hai shubh aur ruhaani.

Nau din par hoti hai maa ke nau roopon kee pooja
Apne ashirwaad se maa de bhakton ko gyan, shakti, aur oorja
Pehla din Maa Shailputri ko samarpit
Himvaan kee putri, Jinhe pooj kar shant ho jaaye chitt.

Karkamal mein kamal ka phool aur Trishul
Shwet rangg, aaye Maa Apne vrishabh vaahan ke sangg
Jagaayein bhakton kee chetna
Dein Ve shuddhi kee prerna.

Hain Ve Shivji ke Ardhnareeshwar roop ka bhaag
Jagaayein bhakton ke soye bhaagya
Guruji Hain MahaShiv swayam
Ve khud hee Hain Shiv aur Shakti param.

Guruji ke bhakton ke liye bhi
Navratri hai tyohaar khaas
Jahaan Shiv baste Hain swayam
Vahaan shakti ka hota hai vaas.

Sabhi ko sharad navratron ke aagaman kee
Shubhkaamnaayein bahut saari
Sabhi ka jeevan mangalmay banaaye
Mata Rani poojya aur pyaari.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 25, 2022

Om Namaha Shivaya
Aaj Ka Suvichaar 🙏🏻🙏🏻 # 1680

                 Beantt

Beantt hai Jinka mahaatmay
Beantt hai Jinka saamarthya
Beantt hai Jinkee mamta
Beantt hai Jinkee kshamta.

Beantt hai Jinkee daya
Beantt hai Jinkee maya
Beantt hai Unka prakash
Aur beantt hai Unkee chhaaya.

Beantt Hain Jo swayam
Aur beantt hai Jinka ashirwaad
Ve Hain param poojya Guruji
Jinka har hukm hai prasad.

Kyunki Unke diye hukm mein
Basta hai bhakt ka nishchit kalyaan
Bin sawaal bin sanshay uss hukm ko maan
Jo bhakt karey apna kaam
Usey awashya taarte Hain Guruji
Uska jeevan sudhaarte Hain Guruji.

Unka Apna swaarth kabhi nahin hota
Isliye jo bhakt swayam ko Unmein hai khota
Veh Guruji ko paane mein zaroor hota hai kaamyaab
Usey Gurujī se daatein miltee hain behisaab.

Unkee sharan milee hai, vo hai sabse oonchi daat
Unhonei haath thaama hai, hai ye sabse tasalli bakhsh baat
Unke charnon mein hona hee hona hai hitt
Tarr gaye anginat jann peekar Unke charan kamal ka amrit.

Unke charnon mein kat-te rahein sangat ke karam
Unke charnon mein hai manzil param
Unke charnon mein hai sukh charam
Unke charnon mein hai koti koti naman.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 24, 2022

Om Namaha Shivaya
Aaj Ka Suvichaar 🙏🏻🙏🏻 # 1679

    Gurujī Jaante Hain Teri Mushkil

Guruji jaante Hain teri mushkil
Jaante Hain Ve ki ro raha hai tera dil
Unkee mehar se murajhaaya phool jaayega khil
Mushkil ka hal bhi mushkil mein hee jaayega mil.

Guruji ka kar tu simran
Guruji par dhar tu dhyan
Guruji ka hee shukrana kar
Ve Hain bade meharbaan.

Guruji se tu aur bhi pyaar kar
Unpar aur bhi aitbaar kar
Itna kiya hai, thoda aur intazaar kar
Milega tujhe daan mein var.

Taaranhaar Hain Guruji
Achche se taar rahe Hain
Karmon ka bhugtaan karaakar
Jeevan sanvaar rahe Hain.

Unkee leela mein shaktishaali maya hai
Unke aanchal mein sheetal chhaaya hai
Unhonei tujhe Apne paas bulaaya hai
Tabhi toh tu yahaan takk pahunch paaya hai.

Samay samay kee baat hai
Din zaroor hoga chaahe abhi raat hai
Ghabraa matt, tera Guru tere saath Hai
Muskuraa de, kyunki yahee sabse badi baat hai.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 23, 2022

Om Namaha Shivaya
Aaj Ka Suvichaar 🙏🏻🙏🏻 # 1678

                         Bhakti 

Gyan aur vairagya kee mata
Bhakti, usmein santosh hai samaata
Kitnee aadaraniya hai bhakti
Ki iskee daasi hai mukti.

Har yug mein, har lok mein
Bhakti hoti hai sukhdaayee
Bhakti kee doar se badhti hai
Bhakt aur Bhagwaan ke rishte kee gehraayee.

Jabb jabb chhaate hain baadal niraasha ke
Tabb tabb bhakti banti hai asha kee kiran
Jabb jabb mushkilein aati hain
Tabb tabb bhakti protsaahit karti hai mann.

Shravan, kirtan, aur smaran
Sevan, daasya, aur archan
Vandan, sakhya, atmasamarpan
Ye hain bhakti ke saadhan.

Kehlaate hain ye bhakti ke angg
Shraddha, aur pyaar hon jabb inke sangg
Toh bhakti jaati hai nikhar
Safal ho jaata hai safar.

Guruji ne diya hai apni sangat ko bhi
Bhakti ka anmol daan
Andhvishwaas aur vehem tyaagne ko kaha hai
Taaki Unke divya prakash par kendrit ho sangat ka dhyan.

Avichalit nishtha se bhakti karey jo jann
Niswaarth bhaav aur shukrana se paripoorna ho jiska mann
Veh rahe bhakti ke angg aur rangg se sampann
Guruji awashya hotey Hain uss bhakt se prassann.

Bhog aur moksha kee hoti hai praapti
Chalkar bhakti ke raaste par
Isliye jo bhi chale shraddha se ispar
Vo bhakt paayega param dar.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 22, 2022

Om Namaha Shivaya
Aaj Ka Suvichaar 🙏🏻🙏🏻 # 1677

             Gyan Kee Jyot Jaley

Gyan kee jyot jaley
Hota chale antakaran ka pavitrikaran
Jaise jaise Guruji ka har bhakt
Karta chale Gurbani ka simran.

Gurbani ka pavitra spandan
Jis se susajjit hota hai vandan
Veh bann jaata hai marham
Aur zakhm ke dard ko karta hai kumm.

Divya mithaas
Ruhaani ehsaas
Gurbani sandesh hai Nirankaar ka
Gurbani ka shravan hamein hai taarta.

Guruji ne bakhsha hai Apne bhakton ko
Gurbani ka simran
Samajh aaye toh achcha hai, na bhi aaye toh
Guruji kahein ki hum karein Gurbani ka shravan.

Sikh Guruon kee mahima hai Gurbani mein
Aur Ram naam ka bhi hai stavan
Shiv, Vishnu, aur anya deviyon aur devon ka bhi gungaan hai
Karna hai divyata ka manan.

Jis bhi dharma ka bhakt sunei Gurbani ko
Ek hee hai paigaam
Sabhi ke bheetar jo Hain baste
Vo Hain Ek hee Bhagwaan.

Achcha insaan bann-ne kee
Miltee hai Gurbani se shiksha
Kasht tal jaate Hain
Hoti hai raksha.

Gurbani ke har shabd mein kalyaan hai
Har shabd ke har akshar mein jeevan daan hai
Gurbani Guruon kee mahanta ka bakhaan hai
Gurbani mein Guruon ko diya gaya sammaan hai.

Gurbani ashish ka amrit hai
Iska paan karne mein hitt hai
Gurbani ka shravan, manan, ya kirtan
Karta hai burey vichaaron ka khandan
Jitnee ho bhakt kee shraddha aur lagan
Utna hee paawan hota jaata hai mann.

Amritvela ho ya ho satsang
Ya kabhi bhi baith kar apne Guru ke sangg
Guru kee mehar se chadhne dein
Swayam par hum Gurbani ka ruhaani rangg.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja

September 21, 2022

Om Namaha Shivaya
Aaj Ka Suvichaar 🙏🏻🙏🏻 # 1676

                     Tu Yakeen Kar

Jaisa bhi ho tere jeevan ka samaa
Guruji de rahe Hain tujhe panaah
Teri saansein hain is satya kee gavaah
Isliye na chod tu Guru bhakti kee raah.

Beshak mushkil lagey kabhi kabhi
Guruji kee raza mein raazi rehna
Agar tera mann dolne lagey
Tu mann ko samjhaana aur kehna
Ki veh manaaye Gurujī ka shukr
Aur rakhta chale thoda aur sabr.

Kyunki Gurujī se bada koi shubhchintak nahin
Guruji se maahir koi chikitsak nahin
Guruji se pyaara koi pyaar karne wala nahin
Guruji se dayalu koi jholi bharne wala nahin.

Shukr ke kalam se likh bhakti ka patr
Shukr se aadar ka hoga zikr
Shukr se kumm honei lagegi fikr
Shukr se badhega tera sabr.

Sabr ka meetha hoga mushkil ke hal ka phal
Sabr se samay jaayega tal
Sabr se shant hogi mann kee uthal puthal
Sabr se intazaar hoga safal.

Tere shukrana ko jaan kar
Tere sabr ko pehchaan kar
Guruji ko hoga tujh par fakr
Tu yakeen kar, tu yakeen kar.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja