Month: September 2022

September 10, 2022

Om Namaha Shivaya
Aaj Ka Suvichaar 🙏🏻🙏🏻 # 1665

Hamesha Aapka Shukrana Karoon Mai

Mai na soch paaoon kuch
Mujh mein gyan nahin, meri matt hai tuchh
Aapki soch sabse oonchi, Aapka dil udaar
Sumat bakhshte rehna, pyaare Guruji Parwardigaar.

Aaspaas ka ho jaisa bhi spandan
Mann mein chalta rahe Aapke naam ka vandan
Chaahe pratikool ho haalaat ka mausam
Na ho mere atma-vishwaas ka khandan.

Aapki mehar kee hoon mohtaaj
Aap hee sanvaar sakte Hain sab bigde kaaj
Aapke astitva ke siwaay kuch bhi nahin hai sthir
Aapke charnon mein sada jhuka rahe mujh nacheez ka sir.

Yahaan takk lekar aaye Hain Aap
Vahaan bhi Aap hee lekar jaayenge
Kab aur kaise, yeh Aap hee jaanein
Aap hee Apni karuna barsaayenge.

Aapki karuna kee har boond
Mere liye amrit hai
Har boond mein mahasaagar se bhi zyada
Ashirwaad sthit hai.

Mujh mein samajh nahin ki kaise karoon mai arzi
Isliye Aap kripa kar chalaayein Apni marzi
Usee mein hai Aapki leela kee kala
Isliye usee mein hai mera bhalaa.

Jo hona hai, vo ho, Aapki raza se sab ho
Aur usee mein raazi rahoon mai
Jaisa Aap jabb chaahein, vaisa tabb tabb ho
Aur hamesha Aapka Shukrana karoon mai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 9, 2022

Om Namaha Shivaya
Aaj Ka Suvichaar 🙏🏻🙏🏻 # 1664

Ganesha Visarjan aur Anant Chaturdashi

Is varsh ke Ganeshotsav ka
Samaapan din aaj hai aaya
Ganesh Visarjan kaha jaata hai isey
Unke Kailas lautne ka samay hai aaya.

Bhaadrapad maheene ke Shukla Paksh mein
Chaturdashi par hota hai yeh utsav
Aur Vishnuji ke anant roop kee pooja
Hoti hai is avsar par
Tabhi is mahatvapoorna din ko kaha jaata hai
Anant Chaturdashi ka parv.

Sri Krishna ke kehne par
Yudhishthir ne kiya thaa is parv par upvaas
Pandavon ne Kauravon par vijay paayi
Aur mit gayi unkee saari traas.

Satyanarayan pooja ke dwaara
Vishnuji kee stuti karte hain bhakt jann
Anant sootra aur Anant kalash ke saath
Gur wala prasad banta hai aaj ke din.

Modak, roli, paan, phool, phal aadi
Ganeshji ko hain bhaate
Haldi kumkum agarbatti aur archana se
Bhakt Ganapati ko hain rijhaate.

Pooja, nritya aur bhakti ke geeton ke saath
Jalaashay mein kiya jaata hai Ganeshji kee moorti ka visarjan
Agley varsh phir aayein Ve ghar par
Diya jaata hai Unhe pyaar bhara nimantran.

Sukh karta Dukh harta vighn Vinayak
Ganeshji kee hoti hai vidaayee
Anant vrat se Vishnuji ke Anant Swaroop
Karte Hain bhakton kee arzi kee sunvaayee.

Guruji ke anginat bhakt jann bhi
Is din parv hain manaate
Ve jis bhi devi devta ko poojein
Unke bol Guruji takk pahunch hain jaate.

Jis roop mein bhi bhakt poojein Guruji ko
Guruji usee roop mein dete Hain ashirwaad
Koi vehem nahin, andhvishwaas nahin karna
Yaad dilaate Hain Guruji Maharaj.

Bhakt jann jis bhi roop ya naam se
Uss param divya jyot ka karein vandan
Sabka Maalik Ek Hai, veh Nirankaar
Kalyaankaari hai Unke har naam ka stavan.

Sabhi ko is paawan utsav par
Mubarak aur dher saara pyaar
Divyata kee jyot se ujjwal rahe
Sada yeh sampoorna sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 8, 2022

Om Namaha Shivaya
Aaj Ka Suvichaar 🙏🏻🙏🏻 # 1663

          Mere Jeevan Ka Veh Pal

Pyaare Guruji,

Kitna khushkismat thaa mere jeevan ka veh pal
Jabb mujhpar padi Aapki mehar-e-nazar
Mujhe toh bilkul nahin thi is khushi kee khabar
Ki mai Aapse jud jaaoongi is kadar.

Aapki kripa bina ye nahin thaa mumkin
Iske liye jitna shukriya kahoon vo hai kumm
Aap sab kuch jaante Hain isliye Aapse chhipa nahin hai
Ki Aapka naam japey bina nahin lagta hai abb mann.

Aapki bahut bahut meharbaani
Ki Aapne Apne naam se deekshit kee hai meri zindagaani
Aapke laad pyaar mein yoon hui hoon mai deewani
Ki Aapko saump dee hai mainey apni zindagani kee kahaani.

Aapne mujhe kitnee sachchaayeeon se avagat karaaya
Kitnee beemaariyon se mujhe hai bachaaya
Sehenshakti aur sabr ka paath padhaaya
Aapne Apne naam ke bharose mujhe chalna sikhaaya.

Kripa kar mujhe taarte rehna
Meri rooh ko sanvaarte rehna
Apni ichchanusar saanche mein dhaal dena mujhe
Jaisi bhi hoon, Aap sambhaal lena mujhe.

Aap sambhaalenge toh bikharne se bach paaoongi
Aap sanvaarenge toh khoti se khari ho paaoongi
Aap sudhaar ka raasta dikhaate rahenge
Toh mai Aapki prerna se swayam mein aur bhi shodhan laaoongi.

Kyunki jabb takk nahin aayega yeh poorna shodhan
Tabb takk poori tareh se shant na hoga mann
Isliye Aapki mehar se karti rahoon Aapke naam ka simran
Taaki Aap mein dhyan lagaane se hota rahe mera pavitrikaran.

Bhaav aisa deejiye
Ki Shukrana karte huey jeevan karoon basar
Buddhi aisee bakhshiye
Ki Aapke har vachan ka ho mujh par Aapka chaaha hua asar.

Aapko khush karne mein ho meri prassanntaa
Aapki mehar se mila gyan ho meri sampannta
Aapke kamal charnon mein rahe meri prapannta
Aapki divyata se prerit ho meri akhandta.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 7, 2022

Om Namaha Shivaya
Aaj Ka Suvichaar 🙏🏻🙏🏻 # 1662

                    Pyaar Mila Hai

Pyaar mila hai
Beshumaar mila hai
Guruji kee saumya sharan mein
Shiksha milee hai
Deeksha milee hai
Guruji ke kamal charan mein.

Ashirwaad mila hai
Prasad mila hai
Guruji ke darbar mein
Mamta milee hai
Kshamta milee hai
Guruji ke dulaar mein.

Santosh kee sehar milee hai
Mehar kee anant leher milee hai
Guruji ke simran mein
Shanti ka mila hai spandan
Chinta ka hua hai khandan
Guruji ke vandan mein.

Chetna milee hai
Prerna milee hai
Guruji ke ashish se
Maafi milee hai
Sewa milee hai
Guruji kee dee bakhshish se.

Raah milee hai
Panaah milee hai
Guruji ke aanchal mein
Sahara mila hai
Kinaara mila hai
Guruji se har pal mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 6, 2022

Om Namaha Shivaya
Aaj Ka Suvichaar 🙏🏻🙏🏻 # 1661

                    Saagar Mahaan

Aapne hee aaj takk sambhaala hai
Aaj bhi sambhaal leejiye, Guruji
Aapne hee har museebat ka hal nikaala hai
Is baar bhi hal nikaal deejiye, Guruji.

Hum Aapki hee toh hain santaan
Aur jaayein bhi toh jaayein kahaan
Aap hee Hain praan-nath hamaare
Hum toh jee rahe Hain Aapke sahaare.

Aapne hamaara haath thaama hua hai
Ye tasalli hai sabse badi
Aapke hukm se ek pal mein jaaye tal
Jo bhi mushkil hai aan padi.

Sehni padti hai sazaa beete janmon ke karmon kee
Jinse beshak hotey hain hum is janam mein bilkul anjaan
Aap adhiktar bhaar uthaate Hain unn sab karmon ka
Taaki thoda hee sahe Aapki har santaan.

Ye sab jaante huey
Ye sab maante huey
Kar rahe hain hum ardaas
Ki sada rahe hamaare mann mein Shukrana ka ehsaas.

Sumat bakhshiye aisee ki sahi nirnay le sakein
Himmat deejiye aisee ki pralay se bhi na thakein
Simran aisa bakhshiye ki sthir ho jaaye mann
Atmabal aisa deejiye ki dagmagaayein nahin kadam.

Aapki bakhshi hui awaaz se kar paayein Aapka gungaan
Har mushkil Aapki kripa se hoti chale aasaan
Aapke simran aur dhyan se shakti paayein hum, Aap Hain sarvshaktimaan
Hum pyaase hain ek boond ke, Aap pyaar aur gyan ke saagar mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2022

Om Namaha Shivaya
Aaj Ka Suvichaar 🙏🏻🙏🏻 # 1660

            Shikshak Divas Ka Parv

Pyaare Guruji,
Deeksha ke daata
Shiksha ke pradaata
Guru aur vidhaata
Aapke charnon mein naman.

Aapke maargdarshan se
Aapke divya spandan se
Ujjwal aur sugandhit hain meri raahein
Gurudev, sada thaame rehna meri baahein.

Simran aur dhyan
Aapka diya gyan
Aapki mehar se usey prayog mein laaoon
Chitt kee chetna
Aapki dee har prerna
Uska uchit upayog mai kar paaoon.

Kripa kar mitaate rahiye
Mere agyan ka andhkaar
Tarti jaaoon, behtar banti jaaoon
Paakar Aapka divya pyaar.

Guru ke roop mein murshid Hain Aap
Mai shagird Aapki
Aapki dikhaayee raah par chaloon aur karoon
Mai kirt Aapki.

Shikshak Divas ka parv hai bahut khaas
Sada Apni sharan mein rakhna, hai Aapse yeh ardaas
Aap Hain pooran Guru aur shikshak mahaan
Aapke charnon mein vandan aur koti koti pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2022

Om Namaha Shivaya
Aaj Ka Suvichaar 🙏🏻🙏🏻 # 1659

 Karta Chal Tu Guruji Kee Jai Jaikaar

Karta chal tu Guruji kee Jai Jaikaar
Ek Ve hee dete Hain niswaarth pyaar
Beshak tere sangi saathi hon kayi hazaar
Guru hee kara sakte Hain tera beda paar.

Karta chal Unkee tu bandagi
Unke haathon mein hai teri zindagi
Tujhe miltee rahegi Unse bakhshindagi
Ve kisee ko na maalum honei denge teri sharmindagi.

Buss, Unke saamne kar le apni bhaavanaaon ka ikraar
Kar de Unse apni har chinta ka izhaar
Aisa nahin ki Unhe nahin hai khabar
Lekin tu Unhe suna de apne dukh is kadar
Ki tere mann ko tasalli ho jaaye
Ki toone Guruji ko apne dukhde hain sunaaye.

Chaahe tujhe manzil lagey bahut duur
Guruji ka Shukrana karta jaa zaroor
Jahaan takk Ve dekh sakte Hain ye srishti
Teri kabhi nahin ho sakti vaisi drishti.

Arey, Unkee toh anant ke paar takk hai nigraani
Phir Ve kyun nahin sanvaarenge teri zindagaani
Unkee sharan mein ho raha hai tere karmon ka bhugtaan
Aur unn galatiyon ka, jinse tu khud bhi hai anjaan.

Dukh ho ya ho sukh, tu simran kar baarambaar
Guruji sambhaal rahe Hain tera ghar parivaar
Vishwaas rakh, aur himmat na haar
Karta chal tu Guruji kee Jai Jaikaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2022

Om Namaha Shivaya
Aaj Ka Suvichaar 🙏🏻🙏🏻 # 1658

           Sthir Mann

Jitne bhi ho jaayein jeevan mein tajurbe
Taajjub ke pal phir bhi aayenge
Maana ki kuch haseen hongei zaroor
Lekin kuch tajurbe sadma bhi dekar jaayenge.

Apne apne nazariye par karta hai nirbhar
Ki tajurbe ka hum par hota hai kaisa asar
Tabhi toh mann kee sthiti ka aseem mahatva hai
Aur mann ko sthir rakhna hamaara kartavya hai.

Guruji Apne bhakton se Gurbani ka simran karne ke liye kahein
Aur samjhaayein ki hum jodein Unse seedhi taar
Iska nitya abhyaas agar hum karte rahein
Toh simran karte rahenge hum baarambaar.

Simran se dhyan, dhyan se gyan
Gyan se sthirta mann kee
Jitna hoga hamaara shraddha aur prem ka bhaav
Utnee zyada praapti hogi adhyaatmik dhan kee.

Karna utna saral shaayad nahin
Jitna saral hai ye sab kehna
Lekin anivaarya hai koshish karna
Agar mann ko sthir hai rehna.

Dheere dheere is dhan kee poonji badhegi
Guruji kee kripa hamaari madad karegi
Neeyat rakhein nek
Mauke mil rahe hain anek.

Mauke simran ke
Mauke satsang ke
Mauke sewa ke
Mauke paath ke.

Guruji de rahe Hain ye avsar
Taaki hum mann ko kar paayein sthir
Aur kumm karte rahein apne dosh
Taaki mann mein sada ho santosh.

Sthir aur santusht mann
Reh paayega dhyan mein magn
Veh Guruji ka har hukm ko rakhe sir aankhon par, uss par amal kar
Gyan ke prakash mein karega jeevan basar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2022

Om Namaha Shivaya
Aaj Ka Suvichaar 🙏🏻🙏🏻 # 1657

               Raasta Aur Manzil

Raasta hai manzil se bhi zyada zaroori
Raaste kee lambaayee se kumm ya zyada hoti hai manzil se doori
Aur jo mil jaaye rahnuma nipun
Toh madhur ho jaati hai safar ke saaz kee dhun.

Guruji ke bhakton ka bahut achcha hai naseeb
Guruji ke paas hai har mushkil ko hal karne kee tarkeeb
Ve raaste mein bhakt ka kabhi nahin chodte saath
Bhakt beshak Unka haath chode, Ve thaame rehte Hain bhakt ka haath.

Raaste ke har kadam par rakhte Hain Ve nigraani
Unkee sharan mein bilkul surakshit ho jaati hai zindagaani
Kitne karma Ve kaat dete Hain hamaare, hum andaaza bhi nahin lagaa sakte
Hum chaahe thakk jaayein, Ve hamaare karmon ka bhaar uthaate huey kabhi nahin thakte.

Raaste ke andhere ko mita dete Hain
Ve Apne noor se
Jo kasht shaayad hamein kareeb aate huey bhi nahin dikhta
Ve usey jaan lete Hain bahut hee duur se.

Jabb se mila hai Guruji ke naam ka anmol gehna
Unkee kripa se hamein kumm kasht padta hai sehna
Raaste par chalne se lagta nahin hai bhayy
Guruji kee leela mita deti hai har sanshay.

Kehta hai Guruji ke pyaar mein dooba hua yeh dil
Ki Guruji kee mehar se awashya milegi sunehri manzil
Tabb takk Unkee kripa se tayy karte rahein safar
Guruji angg sangg Hain, toh phir kaahe ka darr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2022

Om Namaha Shivaya
Aaj Ka Suvichaar 🙏🏻🙏🏻 # 1656

                   Gira Hua Phool

Gira hua phool hai toh kya hua
Uskee bhi hai tamanna
Veh bhi Guruji ke charnon mein padkar
Chaahta hai sajna aur tarna.

Uskee galati bilkul nahin hai
Agar vaig tez thaa vaayu ka
Usey bilkul andaaza nahin thaa
Apni alpa aayu ka.

Shaayad uss girey huey phool ka bhaav
Ho paudhe par lagey phoolon se bhi zyada achcha
Ye toh Guruji hee jaanein
Kiska bhaav hai jhootha aur kiska sachcha.

Insaan deen ya gareeb ho toh kya hua
Shaayad uska bhaav ho kisee dhanwaan ke bhaav se zyada nek
Uskee bhi toh hoti hai aksar arzoo
Ki veh Guru charnon mein maatha le tek.

Yeh dhan daulat aur ameeri- gareebi ka bhed-bhaav
Hum insaanon ne hee hai banaaya
Varna Guruji toh har bhakt ko pyaar karte Hain
Unke liye koi bhakt nahin hai paraaya.

Jabb Guruji sabhi ko sweekaarte hain
Toh samaj ke jann kyun kisee aur ko dhutkaarte hain?
Jabb Guruji sabka jeevan sanvaarte Hain
Toh kis haq se kayi jann doojon ka jeevan bigaadte hain?

Zara sochiye, yeh hai kitna ghor anyaaya
Jabki sab chaahte hain swayam ke saath sada ho nyaaya
Isliye kyun na anuchit ravaiye ke bajaaye
Insaaniyat aur sadbhaav ko banaayein iska upaay?

“Banda bann,” Guruji kahein
Phir kyun hum anyaaya karein ya sahein
Insaan ka roop mila hai, kyun na insaaniyat ke sadbhaav mein bahein
Aur jo mila hai aur jo nahin mila hai, sada dono ke liye Shukrana kee avastha mein rahein?

Swayam ke bheetar jhaankein
Apni kamzoriyan pehchaanein
Guruji ka karein simran, Guruji mein dharein dhyan
Taaki hota rahe pavitrikaran aur badhe adhyaatmik gyan.

Guru ke charan kamal mein sajna chaahta hai har phool
Phool aur hum mein shaayad bhed bhaav nahin karti hai Guru charnon kee dhool
Isliye kabhi kisee girey huey phool ko
Guruji ke charnon mein sajaa deejiye
Prakriti ke uss sundar ratna ko
Dhanya mehsoos honei ka mauka deejiye.

Beshak chhote chhote lagein aise karam
Lekin unke phal hotey hain sukhdaayee aur naram
Agar chaahat hai ki chauraasi lakh yooniyan na karein hum par aakraman
Toh anivaarya hai nibhaana insaaniyat ka dharam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja