Shivji Hain satya kee sampoornata Unmein samaayi hai gyan kee poornataa Guruji Shiv avatari Hain Shiv roopi leela dhaari Hain.
Maya hai Unkee shakti Sweekaarein Ve sabki bhakti Lekin karmon ka kuch bojh phir bhi padta hai sehna Guruji ka sada se hai ye kehna.
Mehar kee mohar se ankit hai Unkee mamta Kshamasheel hai kshitij ko paar karti hui Unkee kshamta Mumkin hee nahin hai karna Unkee poori mahima ka bakhaan Kyunki Guruji ka prataap, paraakram, aur Prabhutva hai anant aur mahaan.
Swayam aaye lekar roop bashar ka Gyan dene kshar akshar ka Sammaan Unke diye har var ka Guruji Hain saakshaat swaroop Har ka.
Guruji kee bhakti karne ka alagg ho sakta hai andaaz Sabka bhinn bhinn beshak ho nazariya Aksar alagg hoti hai chalne kee bhi dagariya Lekin Guruji Hain sabhi kee naiya ke khivaiya.
Isliye Unkee kripa se sab pahunchenge kinaare par Karma hamaare hain, baaki Unkee rehmat toh deti hai avsar Bhaagya lekar aate hain hum, Guruji nikhaarte Hain usey Apni mehar kar Kitne khushnaseeb Hain hum sab, jo mila hai hamein Guruji ka pyaara dar.
Madhosh hokar Guruji kee bhakti mein Swayam ko samarpit kar Unkee divya shakti mein Aao, karein tayyaari Aayi hai MahaShivratri.
Sunaayein MahaShivratri kee katha Ved, upanishad, aur puran Srishti ko mila nirmaan ka vardaan Iskee hai ek divya dastaan Shivji Huey prakat mahaan Jyotirlinga ke roop mein Aur liya Unhonei Brahmaji aur Vishnuji ka imtehaan Unhe kshama kiya Shivji ne Ve Hain sada hee karunanidhaan.
Doosri kathaa mein Shivji aur Maa Parvati ke vivaah ko MahaShivratri ke roop mein manaaya jaata hai Varsh mein baarah ya terah Shivratri kee raatein aati hain Kintu MahaShivratri ka parv varsh mein ek baar hee aata hai.
Guruji kahein zaroorat nahin Karne kee ann ka upvaas Lekin, phir bhi ichcha hai toh Upvaas kar sakta hai daas.
Vaise toh hona Guruji ka sameepya Yahee hai asal upvaas Guruji ka sada rahe mann mein vaas Ye ehsaas hai sabse khaas.
Phalgun ke maheene ke Krishna Paksh kee chaturdashi tithi par MahaShivratri manaayi jaati hai Maanyata hai ki Bholenath aur AdiShakti kee pooja se Ghar mein sukh samriddhi aati hai.
Sabhi bhakton ke dil mein aur labhon par Hota hai Guruji kee mahima ka gungaan Shukrana aur ardaas ke spandan se Goonjta hai aseem aasmaan.
Reet riwaaj ke anusaar Shivlinga Abhishek hota hai Guruji Shiv avatari Hain Ye ehsaas aur bhi gehra hota hai.
Doodh, dahi, ghee,shehed, aur shakkar Inse baney panchaamrit Shivlinga par ye chadhaaye jaate hain Baari baari ya kar ke mishrit.
Koi Shivlinga par Bilva patr chadhaaye Koi Guruji ke kamal charan mein Guruji MahaShiv Hain swayam Isliye Bilva arpit hotey hain Unkee sharan mein.
Sundar suman aur phal manpasand Inse Guruji mein basey Shiv ko kiya jaata hai prasann Shraddha ke suman inse kaheen zyaada aawashyak hain Aur bhaav vibhor rahe bhakt jann ka mann.
Aksar pooja mein jalaaye jaate hain dhoop, agarbatti, aur deep Agyan ka timir Guruji ke ashish se mitt jaane ka hain ye prateek Aarti se bhakt jann Guruji ka divya saundarya nihaarein Aur panch bhoot kee aarti kee lau ko mastak par vaarein.
Beshak na nibhaayein hum koi bhi reet Lekin, agar bhakti mein ho shraddha bhaav aur preet Toh uss paawan bhaav mein hai saari pooja Isliye aawashyak nahin phir upchaar koi dooja.
MahaShivratri ke sundar parv kee Sabhi ko haardik shubhkaamnaayein Sabhi bhakt jann Guruji se Sarvottam ashirwaad paayein.
Sabhi banein madadgaar ek dooje ke liye Jalaayein sabhi shraddha ke dhoop aur deeye Prem aur saamanjasya ke phool khilte rahein sansaar mein Pavitrata kee dhaara behti rahe sabhi ke vyavhaar aur vichaar mein.
MahaShivratri ke sundar parv kee Sabhi ko haardik shubhkaamnaayein Sabhi bhakt jann Guruji ke ashish ka shukrana manaayein Aur bhaav bhari bhakti se Guruji ko sada rijhaayein.
Kabhi bhool se bhi na mai Aapko bhulaaoon Madad kee zaroorat lagey toh kewal Aapko hee mai bulaaoon Deejiyega mujhe shuddhi aur subuddhi vichaar aur vyavhaar mein Na vikarshit hoon chaahe jo bhi ho raha ho baahar ke sansaar mein.
Bheetar Aapka deedar karti rahoon Apne hriday ke pyaale ko Aapke naam amrit se bharti rahoon Aap angg sangg Hain, mai is sabse pyaare satya se itnee khush rahoon Ki jo bhi mushkilein aayein mere raaste mein, mai unhe hanste huey sahoon.
Kyunki ve bhi na aa paayein Aapki raza ke bin Aapka hukm chalta rahe mere jeevan par raat aur din Aapki rehmatein itnee hain ki mai chaah kar bhi na sakoon unhe kabhi gin Aapne toh ashirwaad barsaaye Hain bhinn bhinn.
Guruji, jis dhara par chalein Aapke kamal charan Uss dhara kee mitti mein mai samaa jaaoon Aap jaise jaise rakhte chalein kadam Mai Aapke charnamrit se bheeg jaaoon.
Mila hai jo Aapka divya daaman Kabhi na kabhi toh ho jaaoongi paawan Bhaavshunya lagg rahi thi jo raah Aapki mehar se aaya hai uspar chalne ka utsaah.
Aapki har mehar ke liye jo muskuraaoon agar sirf ek baar Toh bhi kumm padd jaaye yeh jeevan, Aapki mehar hai itnee aparampaar Aapne diya hai mere jeevan ko aakaar Kripa kar mera dhanyawaad keejiye sweekar.
Bel ke ped kee pattiyaan Bilva patr kehlaati hain Aushadhiya laabh bhi inke hain Aur sukh samriddhi laati hain.
Shivji Hain Srishti ke nirmaata aur paalanhaar Ve hee samay aane par karein yathochit sanhaar Ve hee tirobhav aur anugraha karein Aur Apne bhakton ke kasht harein.
Kewal maanav jaati hee nahin hai Shiv ji kee nigraani mein MahaDev ka sahaara hai pashu ped paudhon ko Apni zindagaani mein.
Panchaamrit banaakar doodh, dahi, madhu, ghee, aur jal se Shivji ko rijhaaya jaata hai Chandan, pushp, deep, dhoopam, naivedya se Unka vandan kiya jaata hai.
Anginat ped aur paudhe hain srishti mein Ye sabhi hain Shivji kee drishti mein Ketaki jaise pushp Unhe nahin hain pasand Parantu Bilva patra se Unkee pooja Unhe karti hai prasann.
Bilva ke vriksh Shivji ka roop Hain sundar Anek devi devta basey Hain is vriksh ke bheetar Bahut dhaarmik mahatva hai is taruvar ka Manbhaavan hai ye Bhagwaan Har ka.
Bilva patr Shivji ko priya hain Ve Shivji kee pooja ke liye hain Kitna hai Unka aadar satkaar Judey huey teen patte hain Trishul ka aakaar.
Teen judey patton ko Tridev ka mila hai prateekvaad Maanyata hai ki Bilva patra se prasann hokar Shivji dete Hain ashirwaad Aur Shivji ke teen netron ke bhi hain prateek ye patte pyaare Inke shubh spandan ne Shiv kripa se kitnon ke hain kaaj sanvaare.
Aisa bhi sunn-ne mein aata hai ki Aum ka prateek hai Bilva Patr ka trayy Aur satva, rajo, aur tamogun ke prateekvaad ka bhi Milta hai isey shrey.
Shivji ke vandan mein Bilva patr kiya jaata hai arpan Aur jabb is se kiya jaata hai Shivlinga ka poojan Tabb Bilva patr mein samaa jaata hai Shiv tattva ka spandan Atyant pavitra maana jaata hai yeh shubh saadhan.
Shivji kee leela hai anant aur shaktishaali Shivji ke param tattva kee oorja hai atyant prabhavashali Bilva patra hain is adhyaatmik oorja kee khan Karte hain bhakton ko antrik shakti pradaan.
Bilva vriksh ke neeche jalaaye deep jo insaan Usey Shiv kripa se praapt hota hai adhyaatmik gyan Jo is paawan vriksh ke taley karaaye nirdhan ko bhojan Uskee aarthik sthiti mein aata hai shubh parivartan.
Maa Parvati ke paseene kee boond se hua hai uska praadurbhaav Bilva patr kabhi ashuddh nahin hai hota Vish ke asar ko kumm kar ke ye sheetalta pahunchaaye Aur bhakton ke paap Shiv kripa ke dwaara hai dhota.
Guruji Hain Shiv avatari Shiv kee ye pasand Guruji ko bhi hai pyaari Anek Guruji ke satsang judey hain bilva patra ke saath Aur abb jald hee aa rahi hai MahaShivratri kee bhi raat.
Prem, vishwaas, aur shraddha bhaav hai pooja mein sabse zaroori Ye sab na hon toh koi bhi pooja saamagri na mita sakegi Guru shishya kee doori Bilva Patr arpit kar sakein toh hai achcha Varna sada se sabse aawashyak toh hai bhaav sachcha.
Guruji sachcha bhaav pehchaanein Koi dravya na ho toh bhi poojan sweekaarein Ve Apne bhakton ko sudhaarein aur taarein Shukrana Unka ki Ve sada sangat ke kaaj sanvaarein.
Yug parivartan ka chal raha hai samaa Shukr hai Guruji kee nigraani mein hai bhakton kee dastaan Jis gyan kee ksheenta ke kaaran peedit hai ye jahaan Veh gyan ratnon ke roop mein chhipa hai yahaan vahaan.
Guruji avinaashi gyan ke ratn samet kar kar rahe Hain pradaan Bann jaayein jo hum inke yogya insaan Toh na rahenge phir hum anjaan Aur awashya ho jaayega hamaara kalyaan.
Guruji toh Shiv roopi Hain, Hain Bholenath Sada hotey Hain Apne bhakton ke saath Mann ke bartan ko khali kar ke aur jod kar apne haath Hum kar sakte hain Unse koi bhi baat.
Guruji kee kripa se hota rahe simran Aur simran dwaara ho jo antakaran ka pavitrikaran Toh mal se awashya khali hoga mann ka bartan Aur Guru ashish se gyan ratn grehen kar sakega mann.
Yeh avinaashi gyan ke ratnon kee khan Banaa degi hamein ruhaani dhanwaan Guruji rakhte Hain har bhakt ke kalyaan ka dhyan Guruji Apni sangat par Hain atyant meharbaan.
Mil jaaye jisey Guruji kee sukhdayee sharan Sampoornata aur asal gyan se khil jaaye uska aantrik upvan Ho jaaye uske har sankat ka haran Safal ho jaaye uska janam maran
Anant Hain Guruji aur Unkee mahima Ve parey Hain samay se aur sthaan se Sarv-vyaapi Hain, sarvgyani Hain Agochar Hain aur antaryaami Hain.
Aaye Ve dharti par bannkar bashar Sangat ke liye Unhonei guzaara insaani safar Aur bhi paraakrami Huey jabb choda Unhonei shareer Har roop mein Ve sanvaarte aaye Hain Apne bhakton kee taqdeer.
Chaahein Guruji hamaare bhaav kee shuddhi Unkee mehar se Unkee bhakti deti hai subuddhi Agyan ka timir duur ho antakaran ko karta hai jyotirmay Mil paati hai aisee shiksha, jis se aantarik poornata ho deeptimay.
Is poornata ke anubhav ke liye Jalaane hongei sampoornata ke deeye Sampoornata, samarpan kee Sampoornata, chintan kee.
Is sampoornata ke sangg swayam mein basey Shiv se hoga milan Shivoham se goonjega phir aatmagyan ka gagan Shiv avatari Guruji ko toh gyan ka gagan jhuk kar karey naman Sampoorna kalyaan karti hai Guruji kee sukhdayee sharan.
Niraakaar Hain srishti ka aadhaar Phir bhi Saakaar se karaate Hain Ve saakshaatkaar Guru aur Devi Devta ke swaroop mein Taaki hamein Nirankaar ke darshan hon Unke roop mein.
Guruji toh swayam kehte Hain Ki Ve Hain jyot divya Unke har swaroop mein Unka roop hota hai bhavya.
Jabb bashar roop mein hee Guruji lagte Hain itne sundar Toh Unka divya jyotirmay roop Awashya hoga divyata ka samundar.
Kitnaa nirmal anubhav ho Doobna uss samundar kee gehraayee mein Yoon doob kar toh tarna nishchit hai Guruji ke ashirwaad kee vadiyaayee mein.
Jitnee bhaav poorna hogi bhakti Utnee bann paayegi veh bhakt ke tarne kee yukti Tarte huey kisee na kisee janam mein awashya milegi mukti Atma aur Paramatama ke milan se safal hogi bhakti.
Yahee toh yatra ke uddeshya ka arth hai Baaki sab toh bilkul vyarth hai Poora ho jaaye Guruji kee kripa se yeh armaan Toh bhakt apne maanav jeevan ko safal le jaan.
Saamanjasya aur sehensheelta honei lagey kumm Vikaaron aur paapon se badhta gaya gumm Vigyan kee badhauti awashya hui lekin maya ka badh gaya dumm Sheeghrata se bhautikvaad kee oar badhne lagey insaan ke kadam.
Prakriti par honei lagey atyaachaar Dikhaawa banta gaya sammaan ka aadhaar Asal mein kumm hota gaya atma-vishwaas aur atma-sammaan Kayi jann toh bhool gaye pooja aur Bhagwaan.
Sakaaratmakta aur sachchaayee ne muh nahin moda Lekin nakaaratmak oorja ne badhkar santulan toda Achchaayee ko loag samajhne lagey kamzori Aur atma-bal kumm honei se honei lagi buraayee kee ji-huzoori.
Shaayad koi bhi praani nahin bachaa kalyuga ke prabhaav se Kisee kee bhi kahaani adhoori nahin anubhav ke abhaav se Badal gaye ghar parivaar Badal gaya hai sansaar.
Kalyuga kee achchaayee par chhaane lagi Yug Parivartan kee parchhaayee Bhakti hee is se bachne ka saadhan hai Sabhi ko lekin yeh baat samajh na aayi.
Lekin jinhei iska hua hai ehsaas Unke oopar toh zimmedaari hai khaas Kyunki ve bhakti dwaara nikhaar kar apna charitra Apne prayaas se banaa sakte hain spandan ko pavitra.
Guruji ne pehle se hee Dee thi chetavani is samay ke aane kee Aur vidhi bataayee Is samay ke klesh se bachh paane kee Atma ke uddhaar par dhyan dete huey Jeena hai Unke naam simran mein Banda bann kar khud jeena hai Aur doojon ko jeene dena hai jeevan mein.
Koi bachh nahin sakta hai yug parivartan se Ye toh hai srishti ka niyam Lekin atma ka safar shaayad is janam mein na ho khatam Isliye kyun na apne har karam par nigarani rakhein hum swayam?
Taaki jabb kalyuga kee raat chuki ho guzar Aur aaye satyuga kee pavitra peher Toh Shiv roopi sthirta kee layy se Judi ho aagey ke safar kee leher Hum apni oar se nek prayaas toh karein Nishchay hee kalyaan karegi Guruji kee mehar.
Dil kee dehleez par khadi thi dhadkan Karti hui Guruji ka intazaar Vyakul thi, daras ko thi taras rahi Uskee aankhon se ashru kee dhaara thi baras rahi.
Achanak lagaa usey jaise uske aansoo ko Thaama kisee ne Apne haath mein Dhadkan ne palkein uthaayeen toh dekha Ki Guruji khade thei saath mein.
Dhadkan ne kiya Guruji ko naman Jhuk kar chhooye Unke kamal charan Dhadkan soch mein gayi ulajh Na aa raha thaa usey samajh Ki baahar kadam rakhe ya jaaye bheetar Tabhi dhadkan se kaha Guruji ne ruk kar Ki Ve dil mein Hain rehte Jahaan Ve uska har dukh dard Hain sehte.
Guruji ne Apni mahima dikhaayee Dhadkan mein Unkee khushboo samaayee Dhadkan Guruji ke kayi swaroop dekh paayi Aur andekhi si awaaz usey dee sunaayee.
Dhadkan ne jabb dekha Dil ke bheetar jhaank kar Tabb hataa veh parda Jo thaa uskee aankh par.
Hua Guruji se uska deedar Barsa dono oar se pyaar Dekh kar Guruji kee leela aparampaar Dhadkan ne jaana Guruji ke paigaam ka saar.
Jaan gayi dhadkan yeh ruhaani raaz Ki Guruji ko dhoondh sakti hai veh baahar aur aaspaas Kyunki Ve toh Hain har sthaan par Parantu veh dil ke bheetar Guruji ko pehchaan Bin vyakulta ke kendrit kar sakti hai Unpar dhyan Aur Unkee kripa se paa sakti hai ‘Shivoham’ ka gyan.
Dhadkan kee bebasi aur bechaini tali Veh dil kee dehleez se dil ke bheetar chali Neerav hui, nishchint hui dhadkan Dil ka hua punarjeevan Dil mein basey Guru mein dhadkan yoon samaayee Ki sada ke liye duur ho gayi uskee tanhaayee.
Apni duaon ka khazaana Har pal aise hee barsaana Taaki tann, mann, aur atma ka hota rahe uddhaar Aapki rehmaton ka shukrana, shukrana baarambaar.
Aapki dua ke bin jeena hai vyarth Jabb se Aapne apnaaya, jeevan ne liya hai naya arth Is naye arth se nazariye mein aaya hai sudhaar Aapki rehmaton ka shukrana, shukrana baarambaar.
Aapne dee sewa, simran, satsang kee daat Dil chaahe karna Aapka stavan din aur raat Aapki mahima ka gungaan karti rahoon baar baar Aapki rehmaton ka shukrana, shukrana baarambaar.
Sikhaa deejiye karna Aap Apne charnon mein samarpan Aapka hee rahe meri har dhadkan par niyantran Aapki sharan ka sukh raha hai jeevan ko sanvaar Aapki rehmaton ka shukrana, shukrana baarambaar.
Aapki bakhshish se rahi hoon tarr Aap mein hee shikshak, Aap mein hee Har Aapki kripa aur daya hai aparampaar Aapki rehmaton ka shukrana, shukrana baarambaar.
Jeevan kee naiya ko jabb kabhi gherte hain aandhi tufaan Tabb bhi paar karaate Hain Aap karunanidhaan Aapne kinaare lagaayi hai naiya har baar Aapki rehmaton ka shukrana, shukrana baarambaar.
Duniya ranggmanch hai, Aapne samjhaaya Badalte huey rangon ka chalchitra dikhaaya Surakshit hokar Aapke aanchal mein loon har janam guzaar Aapki rehmaton ka shukrana, shukrana baarambaar.
Aaj Ka Suvichaar 