Month: September 2023

September 20, 2023

Om Namaha Shivaya
Aaj Ka Suvichaar 🙏🏻🙏🏻

#2040

                       Samay Aur Bol

Samay aur bol
Dono nahi sakte tum tol
Kyunki dono hai anupam aur anmol
Dono hain khazaana
Inmein se ek ko bhi vyarth na ganvaana
Varna padega pachhtaana.

Samay ret kee bhanti
Tezi se haath se nikal jaayega
Bol jo ek bhi mukh se nikla
Toh vaapis laut kar na aayega.

Samay kee gati par na karo sanshay
Guruji se bakhshish maango taaki har kshan kar paayo tum Unka chintan
Unke chintan mein huey karma mein hogi Unkee dee hui chetna
Tumhaari zindagi sanvarne lagegi, tum dekhna.

Guruji andhvishwaas aur vehem se karte Hain duur
Nahin karte koi upvaas aadi karne ke liye majboor
Jaap aur Gurbani se karte Hain bhakton ke antas ka pavitrikaran
Kalyaankaari hota hai yoon bitaaya gaya har kshan.

Satsang, sewa, simran kee tum maangte chalo bakhshish
Guruji bahut dayalu Hain, denge kalyaan ka ashish
Unke bhaktibhaav mein arpit rahega jo tumhaara mann
Toh saarthak hoga tumhe mila samay ka dhan.

Apni soch kee oar raho tum saavdhaan
Tumhaari soch bhi jaante Hain kirpanidhaan
Bin soch kee vishuddhataa jaane na kuch bolo
Tumhaare bol bhi hain dhan anmol.

Na bann-ne do apne kisee bol ko nirarthak
Na bann-ne do apne kisee bol ko najaayaz ya haanikaarak
Keh diya tumne koi anuchit bol jo ek bhi baar
Toh kar sakta hai veh sunn-ne wale par vaar.

Guruji hamesha dein bhakt ke bhaav par zor
Shuddh bhaav ka spandan shuddhi phailaayega har oar
Soch aur bol par bhi hoga sakaaraatmak prabhaav
Anivaarya hai shuddh aur neevan bhaav.

Samay jaayega guzar
Bol kar jaayega asar
Guruji rakh rahe Hain nazar
Kar lo miley khazaane kee kadar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Samay Aur Bol (09/20/2023)

September 19, 2023

Om Namaha Shivaya
Aaj Ka Suvichaar 🙏🏻🙏🏻

#2039

       Aayi Hai Ganesh Chaturthi

Sabhi mein aayi hai sfoorti
Aayi hai Ganesh Chaturthi
Bajaa le nagaade dhol
Jai Ganapati kee bol.

Koi banaaye makhaane kee kheer
Toh koi modak banaaye
Ganesh ji ka har bhakt
Unkee pratima ko sajaa kar vandan ke geet gaaye.

Ye shuruaat hai dus din ke tyohaar kee
Shehnaayee si goonjti hai utsaah aparampaar kee
Jin Vinayak ko Maa Parvati ne Apne tann kee mitti se banaaya
Unhonei aagey chalkar putr, bhai, Ganapati, pita aur pati ka farz nibhaaya.

Aur saath hee Apne sabb bhakt janon ka
Aaj takk rakhte Hain khayaal
Vighn Hain harte, dukh Hain harte
Banaate Hain bhakton ka jeevan khush-haal.

Ganapati Bappa Morya pyaare
Sunn kar Aapki mahima ke charche itne saare
Aapke charnon mein sees jhukaaoon
Koshish hai ki jo soch rahi hoon veh keh paaoon.

Aapke maathe ka rangg sindoori
Bakhshe mujhe shraddha aur saboori
Aapki gehri chhoti aankhein dekh mai doordarshi hona seekh jaaoon
Taaki apne vichaar aur karma sachet hokar kar paaoon.

Kumm boloon aur sunoon dhyan se
Seekhoon Aapke mukh aur kaan se
Aapke sees ka naman karoon maan se
Kritagya ho jaaoon Aapke diye gyan se.

Apne gyan kee kulhaadi se
Mere karmon ko deejiye kaat
Jo rassi thaame Aapka ek haath
Uss se mujhe yoon kas ke rakhiye, nath
Ki mai bhatak na paaoon kaheen idhar udhar
Aur vaheen chaloon Aap chalaayein jidhar.

Aapke ashish dene wala hath
Sada de mujhe bakhshish ka ashish
Aur mujhe maangne wale ke bajaaye dene wala banaaye
Aur doojon se ummeed rakhne kee meri buri aadat chhoot jaaye.

Aapka diya har ashirwaad
Aapki dee ruhaaniyat kee daat
Mai paaoon sambhaal, mere nath
Sikhaaye Aapka modak thaamne wala haath.

Bhakt jann Aapke liye modak banaayein
Phir Aapko unka bhog lagaayein
Kitne yatnon se baney jo modak
Laagey ye meetha utna
Usey banaane mein bhaav gaya ho jitna
Usey banaane mein ahem mita ho jitna.

Mera bhaav ho meetha vaisa
Aapko modak pasand aaye jaisa
Guruji ne Aapko diya Hai sammaan
Karaa kar Aapki murti viraajmaan
Bade Mandir ke pravesh dwaar par
Jahaan har bhakt par Aap daalein Apni nazar.

Aap sadasya Hain Shiv Parivaar ke
Guruji roop Hain Shivji ke avatar ke
Rakshak Hain har sangat ke parivaar ke
Protsaahak Hain har tyohaar ke.

Is shubh din ka shukrana
Is utsav ka shukrana
Ye utsav aata rahe har varsh
Laaye bhakton ke liye anupam harsh.

Shuddhi ho har bhakt ke har karma aur vichaar kee
Leher umadti rahe saamanjasya aur pyaar kee
Paristhiti sudhar jaaye saare sansaar kee
Sabhi ko haardik shubhkaamnaayein Ganesh Chaturthi ke tyohaar kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aayi Hai Ganesh Chaturthi (09/19/2023)

September 18, 2023

Om Namaha Shivaya
Aaj Ka Suvichaar 🙏🏻🙏🏻

#2038

        Hartalika Teej Ka Shubh Parv

Bhadrapad Shukla Paksh kee tritiya tithi laayi
Hartalika Teej ka shubh parv
Suhaagin striyan apne pati kee deerghaayu ke liye
Rakhein nirjala vrat.

Gauri Shankar ke poojan se
Kunvaari kanyaayein maangein mann chaaha var
Kathaaon mein bhi itna mahatvapoorna kehlaata hai ye tyohaar
Striyan aur kanyaayein karti hain solah shringar
Parivaar mein ullaas laata hai utsaah ka uphaar
Hota hai AdiShakti aur MahaDev ka shodshoapchaar
Parvati Maa ka Shivji ke prati hai atoot shraddha bhara pyaar
Harat aur Aalika shabdon mein hai tyohaar ka saar.

Kaha jaata hai ki Maa Parvati kee sakhi
Maa ko le gayi ghane vann mein
Taaki Unkee ichcha ke viruddh na ho jaaye Unka vivaah
Itnee thee sakhi ko Adi Shakti kee sakhi roop mein parvah.

Maa ne swayam mitti se kiya Shivlinga ka nirmaan
Aur raat bhar jaag kar kiya Maha Dev ka dhyan
Kathor tapasya kee Unhonei Shivji dwaara sweekare jaane ke liye
Maha Dev mein Apna akhand suhaag aur saubhagya paane ke liye.

Mata Parvati ke is bhakti bhaav ko hai arpit
Hartalika Teej ka ye paawan tyohaar
Gauri Shankar kee pooja kar ke toh tarr jaata hai saara sansaar
Hum Guruji ke bhakton ko Guruji dete Hain Maa kee mamta aur Pita ka pyaar
Na vrat, na koi tapp zaroori, Guruji yaad dilaayein baar baar.

Phir bhi jo bhakt kee ichcha ho
Toh prem se uss bhaav ko sweekaarein Guru Sarvesh
Aur jo Unka aisa koi hukm ho kisee sangat ke liye
Toh Guruji swayam dein aadesh vishesh.

Sabhi ko Hartaalika Teej kee shubhkaamnaayein prem bhari
Sabke ghar parivaar kee bagiya Guru kripa se rahe hari bhari
Guruji sabhi ka karein kalyaan
Jis bhi roop mein dekhein, Guruji Hain karunanidhaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hartalika Teej Ka Shubh Parv (09/18/2023)

September 17, 2023

Om Namaha Shivaya
Aaj Ka Suvichaar 🙏🏻🙏🏻

#2037

     Aapki Ichcha Kee Pradhaanata

Guruvar mere,

Kehna chaahti hoon Aapse
Dil mein aa rahe hain jo vichaar
Agar lagein adhoore anuchit ya nirarthak
Toh pehle se hee kshama maangti hoon athak.

Mere antas mein asal gyan bhar deejiye
Mere charitra ka nirmaan keejiye
Apni kripa se mera nirvana keejiye
Maaf keejiye, kalyaan keejiye
Chaahein toh lekha phaad deejiye
Buss, Apni kripa se taar deejiye.

Sadh sangat ka dete rahiye sangg
Barsaate rahiye Apne naam ka rangg
Nasht kar deejiye mera guroor
Apne se kabhi na keejiyega duur.

Mujhe is duniya kee baatein na aayein samajh
Mai na chaahoon ki mai unmein jaaoon ulajh
Aap thaame rahiye yoon meri doar
Ki mera dhyan na bhatke kaheen aur
Jo bhi karoon, Aapka nirantar chintan karta rahe mera maargdarshan
Mera antas sada sachet rahe dekhte huey simran ka darpan.

Apni indriyon kee, apni vrittiyon kee
Gulam bann kar na reh jaaoon
Bakhshiye aisee sumat
Ki har kamzori ko peechhe chodti jaaoon
Aur badhti jaaoon vahaan
Aap le jaana chaahte Hain jahaan
Kyunki mere liye vahee manzar hoga sabse uttam
Mere liye sada Aapki ichcha kee pradhaanata ho sarvapratham.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Ichcha Kee Pradhaanata (09/17/2023)

September 16, 2023

Om Namaha Shivaya
Aaj Ka Suvichaar 🙏🏻🙏🏻

#2036

                       Tera Sabr

Guruji ko hai tere sabr par fakr
Is sabr ke liye karta chal tu Unka shukr
Agar Ve na bulaate tujhe Apne dar
Toh shaayad tu reh jaata besabar.

Guruji kee mehar se tujhe mila hai sabr
Is sabr kee tu kar hifazat aur kadar
Is sabr ka poshan kar tu har peher
Is sabr se shant rahegi teri bechaini kee har leher.

Toone kiya apni oar se prayaas
Aur toone kee Guruji se ardaas
Varna kabhi na bujhti teri pyaas
Aur bin sabr tu reh jaata udaas.

Kyunki sabr bin bahut mushkil hai karna intazaar
Niraasha bhi badhey, aur dil ho bekaraar
Mann mein uthein sanshay, bechayyn ho vyavhaar
Mann mein aane lagein ajeeb aur anuchit se vichaar.

Isliye safar mein sabr hai zaroori
Taaki Guruji se na badhe duuri
Guruji toh angg sangg rehkar dete Hain Apni maujoodagi ka ehsaas
Kintu tera sabr sahaayak banega dridh rakhne mein tera Unpar vishwaas.

Tu hai Guruji ka bachcha
Tera sabr aur tera vishwaas hai sachcha
Guruji par aur swayam par yakeen kar
Guruji kee kripa se ye daur bhi jaayega guzar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Sabr (09/16/2023)

September 15, 2023

Om Namaha Shivaya
Aaj Ka Suvichaar 🙏🏻🙏🏻

#2035

      Samay Aur Sthaan Se Parey

Samay aur sthaan se parey
Srishti mein sabse badey
Jinkee mehar se bhakt adhyaatmik raaste par badhe
Jinkee sharan mein aane se bhakt kisee vipda se na darey
Jo sabb bhakton ke sangg rehte Hain khadey
Jinhe kisee ke samaksh jhukne kee zaroorat na padey
Phir bhi itne vinamr aur komal
Itne saral, taral, aur nirmal
Hain param poojya Guruji pyaare
Jo bhakton ko yaheen dikha dete Hain sachkhand ke nazaare
Jinkee kripa Unkee saari sangat ko taare
Jo Apne noor se andheron ko banaayein din ujiyaare.

Lee hai Unhonei Apne bhakton ke har janam kee zimmedari
Sabse shubh pal hota hai jabb aati hai Unke sangg judne kee baari
Unkee izaazat ke bin koi na pahunch paaye Unke darbar
Har bhakt hai Unke liye ek jaisa aur dein Ve sabhi ko pyaar
Koi seema nahin Unke bhakton kee khushnaseebi kee
Unse judi seedhi taar hai dagar Unse kareebi kee
Unkee vadiyaayee mein basee hai jo Khudaayee
Kisee kee sakshamta nahin ki kar paaye uskee poori badhaayi
Kyunki Unkee divya leela hai anant aur anoop
Ve swayam Hain Ishwar ka roop.

Guruji sanvaarte Hain sabki taqdeer
Chaahe veh raaja ho ya ho fakeer
Unke saamne har koi hai bhikhari
Unkee deewani hai Unkee sangat saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Samay Aur Sthaan Se Parey (09/15/2023)

September 14, 2023

Om Namaha Shivaya
Aaj Ka Suvichaar 🙏🏻🙏🏻

#2034

              Bheetari Ruhaaniyat

Har waqt bolne kee pratikriya uchit nahin
Chup rehna aksar hota hai sahi
Guruji kee nazar se kabhi kuch chhipa nahin
Phir chaahe koi karey kuch galat ya sahi
Guruji kee jo raza hai hota hai vahi
Pathar kee lakeer hoti hai baat Unkee kahi.

Jabb takk na seekha jaaye maun mukh ka
Tabb takk shaayad na ho anubhav mann ke sukh ka
Maun mann ke liye pehle mukh maun rakhna seekhna hai achcha
Kyunki paripakvata na aayegi jabb takk mann rahega naadaan bachcha.

Saath hee koshish karni hai tann ko sthir kar ke baith paane kee
Aur tann ko vash mein karna hai mann dwaara
Koshish karni hai tann aur mann mein sanyam laane kee
Aur mann ko karna hai niyantran mein tann dwaara.

Bhakt kee koshish se Guruji hongei prasann
Unkee mehar se nikharta jaayega dhyan aur simran
Atma aagey badhne ke liye ho paayegi tayaar
Ho paayega Guruji se paawan ananya pyaar.

Guruji dekh rahe Hain bhakton kee neeyat
Rangg laayegi bhakt kee shuddh ibadat
Koshish karne wale par yakeenan barsegi Guruji kee inaayat
Guruji kee kripa se jaag uthegi uskee bheetari ruhaaniyat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetari Ruhaaniyat (09/14/2023)

September 13, 2023

Om Namaha Shivaya
Aaj Ka Suvichaar 🙏🏻🙏🏻

#2033

Guruji Kee Goad Mein Basera

Ek kalaa chaand kee dikhee gagan mein
Uske kareeb dikha ik taara
Lagaa taara prasann ho raha ho
Jaisa paa liya ho jahaan saara.

Apne mann kee aankhon se dekha
Toh chaand kee kalaa lagi anmol aanchal
Jismein maano taara mamta se raha ho pal
Aur taare ka janam hua ho safal.

Chaand kee mamta mein Guruji ka aanshik roop
Ansh bahut hee chhota kyunki Guru mamta toh hai anoop
Taare ke bholepan mein Guruji ka aanshik spandan
Ansh bahut hee alp matra ka kyunki anupam hai Guruji ka spandan.

Guruji Hain roop Maha Dev ke
Jinhe bhakt sada karna chaahein prasann
Maha Dev kee hee kripa se
Aseemta paaye prataapi gagan
Jismein chamkein chaand aur taare
Bannkar ratna bahumoolya aur pyaare.

Aasmaan se lekar zameen takk
Har disha mein Guruji ka prataap aata hai nazar
Chaand taare hon ya ho sooraj kee kiran noorani
Sabhi mein hai Guruji ka saanidhya ruhaani
Har drishya mein hai Guruji ka ehsaas
Har kann mein hai Unkee divyata ka vaas
Guruji kee mahima se andhera bhi laaye savera
Dhanya ho har praani paakar Guruji kee goad mein basera.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Goad Mein Basera (09/13/2023)

September 12, 2023

Om Namaha Shivaya
Aaj Ka Suvichaar 🙏🏻🙏🏻

#2032

          Aap Hee Sambhaalenge

Param poojya Guruji,

Aap swayam Mahadev, Aapki rehmaton mein koi kamee nahin
Yakeenan kamee hogi meri bhakti mein hee
Aapne sikhaane mein koi kasar na chodi
Mainey hee samajhne mein galati hogi kee.

Har khushi har gumm mein sarvapratham Aapka dhanyawaad
Kyunki har anubhav mein hai Aapki dee shiksha aur Aapka ashirwaad
Khushi meri yogyata se zyaada dete Hain Aap
Aur Aapki mehar se mere kiye paapon ke saamne bahut kumm hain mere gumm.

Koi toh achcha kaam kiya hoga mainey apne kisee janam mein
Jo Aapne mujh nacheez par daya kar ke bulaaya Apne dar
Aapke charnon ke taley kee dhool jitnee bhi nahin hai meri aukat
Usee dhool mein samaa jaaoon toh hogi meri khushkismati, mere Guruvar.

Jaisi bhi hoon, Aapki bachchi hoon, banaa kar rakhiyega Apna kinkar
Pal pal Aapse maangoon maafi, jaise jaise samay raha hai guzar
Kyunki jitnee bhi satark rehne ka prayatna karti rahoon
Chanchal mann achet na ho jaaye, ye soch ke mai daroon.

Putali hoon mai toh khataaon kee
Ichchuk hoon Aapke aanchal kee chhaaon kee
Is aanchal mein dete rahiyega mujhe sharan har janam
Taaki mai apni kamzoriyon kee khaamosh agni mein na ho jaaoon bhasma.

Mai shaayad is kaabil nahin lekin phir bhi kar rahi hoon guzaarish
Mujhe vaisa banaa deejiye jaisi ho Aapki khwaahish
Mere antas mein Aapke naam ke amrit kee hoti rahe aisee baarish
Ki dhulta jaaye mere kiye sabhi kukarmon ka vish.

Hoon aur rahoon Aapki mehar kee mohtaaj
Shukr hai Aapki nigaraani mein hotey rahenge mere aane wale kal ke kaaj
Sada sumat bakhshte rahiyega, mere sartaaj
Mera kal bhi Aapne hee thaa sambhaala, aur Aap hee sambhaalenge mera aaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Hee Sambhaalenge (09/12/2023)

September 11, 2023

Om Namaha Shivaya
Aaj Ka Suvichaar 🙏🏻🙏🏻

#2031

     Unkee Mehar Rangg Laayegi

Tu itna na gumaan kar
Guruji ka tu maan kar
Neevanpann tu seekh le
Rehmaton kee bakhshish le
Kuch bhi nahin hai tera yahaan
Guruji hee jaanein tu kal hoga kahaan
Tujhe toh agley pal kee bhi nahin khabar
Tu itna na gumaan kar.

Jo bhi hai tere aaspaas
Vo sab bhi ho jaayega khatam
Kalyaan chaahta hai jo tu
Toh maanta chal Guruji ka hukam.

Guruji se tu ardaas kar
Ki vinamrata mein jhuke tera mann aur sir
Unhonei bulaaya hai tujhe Apne dar
Unkee rehmat ka zaroor hoga asar.

Khatm hoti hai teri soch jahaan
Guruji kee soch shuru hoti hai vahaan
Waakif Hain Ve tere har vichaar se
Isliye socha kar tu pavitra pyaar se.

Tyaag de gumaan ko
Kintu sambhaal atma-sammaan ko
Praathamikta de dhyan aur gyan ko
Dil kee baat bataa Guru meharbaan ko.

Satya ko galey se lagaa le tu
Guru chintan mein waqt bita le tu
Har farz ko nibha le tu
Guruji ko rijhaa le tu.

Guruji de rahe Hain aisee panah
Jaisee kabhi na kee hogi toone kalpana
Lamhe anmol hain, unhe na ganvaa
Bhakti ke saadhan ko le apnaa.

Guru bhakti tujhe paar lagaayegi
Guruji kee kripa raah dikhaayegi
Tu maan jaa Guruji kee raza
Dekhna, Unkee mehar rangg laayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unkee Mehar Rangg Laayegi (09/11/2023)